Ҳаракат – асоси муваффақият

Details

Published on Thursday, 23 May 2024 14:12

Соли 2021 барои Фурқатҷон басо соли хурсандиовар ва хотирмон гашт: аввалаш, МТМУ №50 ноҳияи Бобоҷон Ғафуровро бо сарбаландӣ хатм кард, дуюмаш, ҳамон сол тариқи Маркази миллии тестии Ҷумҳурии Тоҷикистон имтиҳон супорида, бо 384 хол аз 4 фан донишҷӯи шуъбаи муҳандисӣ – иқтисодии ДПДТТХ дар шаҳри Хуҷанд (тариқи ройгон) гузашт. Ҳоло вай хатмкунандаи курси 3-юм аст. Ӯ ҳамаи фанҳоро бо ҷиддият ва аз сидқ омӯхта истодааст. То ин дам онҳо дар донишгоҳи олӣ 54 фанро омӯхта, сари вақт имтиҳон супорида истодаанд. Фурқатҷон Олимов танҳо аз 2 фан баҳои хуб дорад ва ҳамаи дигар аъло мебошад.

Вай ҳамсабақони худ Шаҳзод Муқимов, Тавҳида Бузурукова, Акбаршо Ҳаитов, Алишер Зуфарҷонзодаро чун донишҷӯёни боғайрат ва соҳибобрӯ ном гирифт, ки маҳз ба туфайли ғайрати чунин донишҷӯён донишгоҳ шуҳратманд аст.

Ӯ муқими деҳаи Унҷӣ буда, дар корҳои хоҷагидорӣ ёрдамчии падару модараш аст. Онҳо 0,8 сотих замини наздиҳавлигӣ доранд. Дар замини наздиҳавлигӣ дарахтони ангур, зардолу, шафтолу, бодом, гелос, анор месабзанд ва ҳосил медиҳанд. Фурқатҷон хуб фаҳмидааст, ки асоси ҳамаи муваффақиятҳо меҳнат аст. Дар майдони онҳо шибит (укроб), шалғамча, шалғам, сабзӣ, кашнич, помидор, қаламфури булғорӣ, боқило, қулфинай хуб нашъунамо доранд. Аз ин рӯ, дар хонадон ва корҳои хоҷагӣ ҷавони ниҳоят серҳаракат мебошад. Вақти худро дуруст тақсим карда, ба ҳамаи корҳо фурсат меёбад.

Онҳо имсол дар 0,2 сотих картошка кишт намудаанд. Ҳамаи картошкаи онҳо ғарқи гул аст, ӯ ҳамаи корҳои агротехникиро хуб ба сомон мерасонад. Умед дорад, ки аз картошкаи имсола ҳосили хуб ба даст оварда, зиндагии оилавии худро давоми як сол бо серию пурӣ таъмин месозанд.

Шиори ҳамарӯзаи ӯ дар ҳар бобат ин байти шоир М.Миршакар мебошад:

Зи меҳнат ҳеҷ кас сарро натобад.

Агар сар тобад ӯ, роҳат наёбад.

Мо ба ин ҷавони чашмикордон ва серҳаракат хониши аъло ва муваффақиятҳои хоҷагидориро таманно дорем.

Маъмурахон САМАДОВА,

“Ҳақиқати Суғд”