December 2016

08 December 2016

“Ту аз умеди рафтагони мо нишонаӣ”

Варзиш яке аз воситаҳои беҳтарини муаррифӣ кардани давлат ва миллат мебошад. Миллати мо низ ба варзиш ҳамчун воситаи муҳими беҳдошти саломатӣ ва ташаккули ҷисмониву маънавии инсон ҳанўз аз замонҳои қадим майлу рағбати зиёд дошт.

Ниёгони мо барои беҳдошти саломативу нерўи ҷисмонӣ ва ҳамеша омода будан ба дифои марзу бум ва мардуми хеш намудҳои гуногуни варзиш, мисоли гўштингирӣ, шамшерзанӣ, гурзпартоиву камонварӣ, аспдавонию чавгонбозӣ ва дигар навъҳои варзишро инкишоф медоданд. Онҳо ҷавононро ба хотири тавоноии маънавию ҷисмонӣ аз овони хурдсолӣ барои иҷрои машқҳои гуногуни варзишӣ омода месохтанд, ки чунин анъанаи неки ниёгон то замони мо боқӣ мондаанд. Мусаллам аст, ки варзиш дар ҳаёти инсон ҳамчун омили тавонои таҳкими дўстӣ ва ҳамкории на танҳо варзишгарон, балки халқҳову давлатҳои зиёд маҳсуб мешавад.

Илова бар ин, варзиш барои насли ҷавон ҳамчун мактаби муҳими ҷаҳонфаҳмию тарғиби арзишҳои олии инсонӣ, аз қабили дўстиву бародарӣ, сулҳу озодӣ, эҳтиром ба халқу миллатҳои гуногун ва ҳамкориҳои судманди байни халқу миллатҳо хизмат мекунад.

Ҳукумати Тоҷикистон барои рушди соҳаи варзиш як силсила барномаҳоро амалӣ карда, кўшиш менамояд, ки барои мунтазам инкишоф ёфтани соҳаи варзиш шароити заруриро фароҳам орад. Баъди ба даст овардани истиқлолият дар кишвари мо муносибат ба варзиш ҳамчун мактаби бузурги тарбия ва воситаи муаррифии давлати соҳибистиқлол мазмуну моҳияти нав пайдо кард.

Дар мусобиқаи гуштингирӣ, ки бахшида ба Наврўзи байналмилалии соли 2015 дар Амфитеатри Қасри Арбоб баргузор гардида буд, Асосгузори сулҳу Ваҳдати миллӣ - Пешвои миллат, мўҳтарам Эмомалӣ Раҳмон барои рушди гўштини миллӣ ба масъулон дастур доданд, то арафаи ҷашнҳои миллӣ ва санаҳои таърихӣ мусобиқаҳои гўштингириро дар ҳамаи минтақаҳои кишвар доир намоянд.

Баҳри иҷрои ин дастури Пешвои миллат бахшида ба рўзҳои таърихӣ ва идҳои умумихалқиву ҷашнҳои миллиамон дар шаҳру ноҳияҳои мамлакат мусобиқаҳои гўштингирӣ баргузор мегарданд, ки дар онҳо мардуми зиёд, бахусус ҷавонон фаъолона ширкат варзида, ҳунар ва маҳорати хешро намоиш медиҳанд. Бешак, гўштини миллӣ низ дар радифи намудҳои варзиши муосир дар байни мардум мухлисони зиёд дошта, барои густариши тарзи ҳаёти солим мусоидат менамояд. Дар ин раванд рўзҳои 16-17 сентябри соли 2016 аз тарафи Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон, Федератсияи гуштини миллии «Гўштингирӣ»-и Ҷумҳурии Тоҷикистон ва сарпарастон бахшида ба 25-солагии Истиқлолияти давлатии Ҷумҳурии Тоҷикистон дар варзишгоҳи марказии шаҳри Душанбе мусобиқаи ҷумҳуриявӣ оид ба гўштини миллии «Гўштингирӣ», таҳти унвони «Ту аз умеди рафтагони мо нишонаӣ» дар сатҳи баланди ташкилӣ баргузор гардид. Мусобиқа таҳти роҳбарии сардовар Саидаброров Саидмаҳмуд бо низому тартиби хоса ва доварии одилона гузашт.

Боз ҳам ба хотири рушди соҳа пешниҳод менамоям, ки Федератсияи гўштини миллии «Гўштингирӣ» дар вилоят таъсис дода шавад.

Абдуқаюм ҶОНМАҲМАДОВ,
 сармураббии гўштини
миллии «Гўштингирӣ»-и
дастаи ҷавонони вилоят

Читать далее

Роҳи рушду комёбӣ

Дашти фароху зебои Тозак солҳои сол бекор мехобид. Аввали баҳор хеле зебову лолазор буд. Лолаҳои аҷоиби эндемикӣ мерўид, ки ҳайфо бебозгашт гум шуд. Аз охири нимаи аввали асри ХХ ин дашти васеи ҳамвор барои рушду равнақи хоҷагии қишлоқ шудгору аз худ карда шуд.

Ин мавзеъ барои фаъолияти кишоварзии байни се хоҷагии ҷамоавии ноҳияи кунунии Бобоҷон Ғафуров тақсим карда шуд. Ин дашти шудгоршуда аз оби Тагоб (Хоҷабоқирғон) ва як қисмаш аз Баҳри Тоҷик обёрӣ мешавад.

Замин аз худ шуда, обёрӣ гардид ва дашт минбаъд Навобод ном гирифт. Хоҷагиҳои ҷамоавии «Роҳи Ленин», «Фрунзе» ва «40-солагии Октябр» дар авҷи фаъолияташон ҷамъулҷамъ миқдори зиёди пахта, зироатҳои донагӣ ва хошок мерўёниданд.

Ба сабаби барҳам хўрдани давлати абарқудрати СССР ва сохти колхозӣ соҳаи кишоварзӣ дар Навобод таназзул ёфт. Ҳоло роҳҳо вайронаю заминҳои кишоварзӣ харобанд.

Баъди соҳибистиқлол гаштани Ҷумҳурии Тоҷикистон ва роҳи иқтисоди бозориро пеш гирифтани тамоми соҳаҳои хоҷагии халқ, аз ҷумла дар соҳаи кишоварзӣ бо қарори Ҳукумати Ҷумҳурии Тоҷикистон хоҷагиҳо таҷдид шуда, барои сохтани хоҷагиҳои оилавӣ-инфиродӣ мусоидат намуданд. Дар ин замина барои рушду равнақи минбаъдаи Навобод низ ду муаммо бояд ҳалли худро ёбад: Муаммои аввал роҳ ва дигаре об!

Боиси қайд аст, ки роҳи Қотма – маркази Навобод дар масофаи 10 км аз давраи Шўравӣ то инҷониб таъмир ё азнавсозӣ нашудааст. Айни замон бо ин роҳ ягон навъи нақлиёт намегардад. Роҳкирои таксиҳо бо сабаби вайрона будани роҳ хеле гарон аст. Агар он барқарор шавад – роҳи стратегии аҳамияти вилоятро доро мешавад. Ва шоҳроҳи Душанбе – Бўстон – Конибодом бо роҳи кўтоҳу ободи Қотма – Маркази Навобод бо деҳаи Овчиқалъача ва деҳаҳои Тоҷикобод, Зарафшон ва Ўзбекқишлоқи ноҳияи Ҷаббор Расулов пайваст мегардад. Роҳ, ки обод шуд, хатсайрҳои нав бо роҳи наздик «Ёва–Фрунзе–Ғозиён-Қотма-маркази Навобод» бо роҳкирои арзон ба роҳ монда мешавад. Ин хатсайр саҳмдоронро аз Ёваю Ғозиён ба сари заминашон тез ва арзон мерасонад.

Айни ҳол рафтуомад бо ин роҳи вайрона ба самти Навобод барои ба сари заминаш рафтани деҳқон – 10 сомонӣ, ин ҳам бо сарфи вақти бисёр ва агар 2 ё 3 аъзои оила раванд – дар 1 рўз 30 сомонӣ, дар 1 моҳ 900-1000 сомонӣ маблағ сарфи роҳ мегардад.

Маблағи барои роҳ сарфгардида ба деҳқони навхоҷагидор хеле гарон аст. Деҳқон бо нархи арзон ба ҷои кор равад, бо нархи арзон маҳсулоти кишоварзиро ба бозор мебарад. Аҷаб не, бозор ҳам нисбатан арзон шавад.

Мушкилии дигар ин аз беобӣ азият кашидани деҳқонон мебошад. Ба қавле, об дар кўзаву мо ташналабон мегардем… Як баҳри калон об бошаду замин шодоб нагардад. Раиси вилоят Абдураҳмон Қодирӣ вақти мулоқоташон бо фаъолони соҳаи кишоварзӣ таъкид карданд, ки аз механизми тақсимоти об тақдири ҳосил ҳал мешавад: - «як сомонӣ барои об диҳед, ду сомонӣ мерўёнед»…

Қисми болои Навобод аз наҳри Тагоб (Хоҷабоқирғон) бо хеле мушкилӣ обёрӣ мешавад, қисми поёнаш аз Баҳри Тоҷик. Барқ ҳаст - об ҳаст. Барқ нест - об нест. Фарсудагӣ ва гаронии муҳаррикҳои обкаш сабаби дигари мушкилот аст. Маҳз, бо ҳамин муаммои об таҷдиди ҳоҷагии ҷамоавии ба номи Ҷаббор Расулов хеле тўл мекашад. Агар то давраи таҷдид як хоҷагӣ об мегирифт, ҳоло бояд садҳо хоҷагиҳои нави инфиродӣ аз об истифода баранд. Деҳқон боварӣ надорад, ки ба замини ў об мерасад ё не. Агар об ба миқдори кофӣ нарасад, ҳосили дилхоҳ намерўяд. Харҷи роҳу харҷи кишт ва харҷи андозро чӣ хел бояд пўшонд?!

Мутахассисон бар он ақидаанд, ки роҳи ҳалли ин муаммо ҳаст.

Чӣ мешуд, агар дар дарғоти баромади наҳри Тагоб аз Рухак як Сарбанд сохта мешуду ин оби пурқимати беҳуда талафшаванда дар обанбори нав захира мегардид ва вақти зарурӣ бемалол истифода мешуд.

Аз ин об тамоми Рухакро бо тарзи обёрии чакравӣ (қатравӣ) ба боғи пуршукўҳи серсоҳил табдил додан инмконпазир хоҳад шуд. Чӣ илоҷ? Дигар сарчашмаи об айни ҳол ба назар намерасад. Кофтани чоҳҳои чуқур, харидани муҳаррикҳои обкаш сарфи барқи дастнорас ба назари камина хеле гарон аз он, ки ин об захира шаваду ба манфиати кишоварзон истифода гардад.

Дар вилоят дар ҳалли ин масъала ду идораи бонуфуз – «Суғдобсохтмон» ва «Сарраёсати беҳдошти замин ва обёрӣ» метавонанд, саҳм гузоранд.

Таъмини кишоварз бо об ин доғи рўз аст. Мақолаи – «Шояд токзори Рухак эҳё шавад?!»-и Усмон Саид – аграном - олим, иқтисодчӣ, ки дар рўзномаи «Ҳақиқати Суғд», №130 аз 27 октябри соли 2015 чоп шуда буд, айнан ҳамин муаммо-норасогии об, беҳуда ҷорӣ шудани оби наҳри Тагоб «Хоҷабоқирғон»-ро фарогир буд.

Ҳалли муаммоҳои роҳ ва об – ин кафолати амнияти озуқаворӣ ва имкониятҳои бисёри содиротии вилоят ва давлат мебошад.

Толиб Усмон Исмоил,
иҷоракори хоҷагии ҷамоавии
ба номи Ҷаббор Расулови
ноҳияи Бобоҷон Ғафуров

Читать далее

Ифтитоҳи бинои нави муассисаи таълимӣ

Дар деҳаи Равғангарони шаҳри Истаравшан маросими ифтитоҳи бинои нави таълимии муассисаи таҳсилоти миёнаи умумии № 11 доир гардид.

Раиси шаҳри Истаравшан Наим Набизода аҳли деҳаро бо ин рўйдоди муҳим табрик гуфт. Муовини Вазири маориф ва илми Ҷумҳурии Тоҷикистон Раҳматулло Мирбобоев аз сиёсати оқилонаи Асосгузори сулҳу Ваҳдат - Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмон ва эътибори хоса ба соҳаи маориф изҳори сипосмандӣ намуд. Раиси комитети деҳа ҳабибҷон ўзбеков дар бораи иқдоми соҳибкорони маҳаллӣ ҳарф зада, бунёди боз як бинои иловагиро нек арзёбӣ намуд.

Мавриди зикр аст, ки бинои мактаби фарсудаи - дорои 8 синфхона соли 1968 тариқи ҳашари сокинон бунёд ёфта, ба талаботи имрўза ҷавобгў набуд. Инак, аҳли деҳа соҳиби ду бинои замонавӣ гардиданд. Бинои асосӣ барои 240 хонанда иборат аз 7 синфхонаву 4 кабинет, аз ҷумла синфхонаи компютерӣ бо 12 компютеру 1 принтер бо дастгирии Вазорати маориф ва илми Ҷумҳурии Тоҷикистон бунёд гардид. Тармими бинои иловагии дорои 6 синфхона бо дастгирии мақомоти иҷроияи ҳокимияти давлатии шаҳр ва саҳми соҳибкорони маҳаллӣ сурат гирифта, бо харҷи беш аз 800 ҳазор сомонӣ ба анҷом расид.

 

Анвари Абдуҷалил,
шаҳри Истаравшан 

Читать далее

07 December 2016

Бо китоб то қуллаҳои мақсад

Китоб дар радифи Модар ва Ватан арзандатарин муқаддасот ба ҳисоб меравад.

Эмомалӣ Раҳмон

Хурсанд аз онам, ки фаъолияти меҳнатии худро ҳамчун сарвар пас аз таъсисёбии Китобхонаи бачагонаи вилоятӣ оғоз намудаам. Доир ба кушодани китобхона фармони шўъбаи маданияти вилоят (ҳоло Раёсати фарҳанги вилоят) аз 13-уми октябри соли 1975, таҳти № 216 дар асоси қарори Шўрои депутатҳои меҳнаткашони вилоят (ҳозира Мақомоти иҷроияи ҳокимияти давлатии вилоят) аз 20-уми декабри соли 1974, № 496 ба тавсиб расид.

Бо кўмаку дастгирии Мақомоти иҷроияи ҳокимияти давлатии вилоят ва шаҳр барои китобхона бинои курси таълимӣ-истеҳсолии комбинати шоҳибофии шаҳр (ҳозира бинои ДДТТ шаҳри Хуҷанд)-ро интихоб намудем. Бо дастгирии собиқ вазири фарҳанги Ҷумҳурии Тоҷикистон М. Назаров, собиқ раисони вилоят У.Қосимов ва шаҳри Хуҷанд А. Расулов барои таҷҳизонидани китобхона оғоз намудем. Баъди дастрасии таҷҳизот аз хазинаи китобхонаи вилоятии ба номи Тошхоҷа Асирӣ ба миқдори муайян китоб ҷудо карда шуд. Аз моҳи декабри соли 1977 Китобхонаи бачагонаи вилоятӣ дари худро ба рўи хонандагон кушод. Аз ҳамон рўз барои муштариён шўъбаҳои хизматрасонӣ, пуркунӣ, толори хониш, методисту китобшинос ба кор шурўъ намуданд. Соли 1978 хазинаи китобии китобхона 24.404 нусха ва хонандагонаш 3.293 нафарро дар бар гирифта, барои ҷалби муштариён ва тарғибу ташвиқи адабиёт дар давоми сол 145 чорабинии гуногунмазмун гузаронида шуд.

Барои дар амал татбиқ намудани қарори комиҷроияи Шўрои депутатҳои меҳнаткашони вилояти Ленинобод (ҳозира вилояти Суғд) барои гузаронидани таътили тобистонаи кўдакон ва наврасон дар ду лагери пионерии «Огонёк» ва «Космос» ва инчунин дар назди кўдакистони рақамҳои 4 ва 8 нуқтаи китобдиҳӣ ташкил гардид.

Ҳамон сол ба китобхонаҳои бачагонаи ноҳияҳои Ҷаббор Расулов, Спитамен, Зафаробод, Ашту Мастчоҳ ёрии методию амалӣ расонида шуд. Китобхона туфайли заҳмати аҳли кормандони ҷавону соҳибфазилаташ тавонист дар муддати кўтоҳ ба як макони илму ирфон мубаддал гардад. Дар ин ҷода саҳми Мавзунахон Ҳоҷибоева (рўҳашон шод бод), Рустам Асроров, Гавҳар Раҳматова, Анна Лигус, Эркиной Аҳмадалиева ва Олга Скубенко ҳамчун китобдор бисёр калон мебошад.

Ҳамин тавр, китобхона ба арсаи фарохи хонандаю китобхона ворид гардид ва дар уқёнуси васеи фарҳангу адабиёт қадамҳои устувори худро гузошт. Соли 1978 аввалин дар ҷумҳурӣ хизматрасонии китобии навро аз китобхонаҳои бачагонаи шаҳрҳои Россия омўхта, дар китобхона ҷорӣ намудем. Минбаъд вобаста ба синну соли хонандагон хизмат расонида мешуд. Вобаста ба он шўъбаи хизматрасонӣ низ ба ду баст - шўъбаҳои хизматрасонии синни томактабӣ ва хурди мактабӣ ҷудо шуд, ки тавассути чунин иқдом аз тарафи китобдор тавсияи адабиётҳо осонтар ва ба худи хонанда низ дарёфти китоб беҳтар гардид. Инчунин, дар ин шўъбаҳо фонди кушод низ ташкил карда шуд. Китобдорон барои ҷалби хонандагон аз ҳама роҳу воситаҳои тарғибу ташвиқи адабиёт ва гузаронидани чорабиниҳо, ба монанди, конфронси хонандагон, вохўрӣ бо шоирону нависандагон, озмуну викторина, сўҳбату байтбаракҳо, намоиши китобу сўҳбатҳо ва ғайраҳо истифода мебурданд. Дар ҳамон сол бори аввал бо пешниҳоди ман байни китобдорони китобхонаҳои бачагонаи вилоят озмуни вилоятии «Касби ман - ифтихори ман» (Китобдори беҳтарини сол) ташкил ва гузаронида шуд. Мақсади баргузории озмун баланд бардоштани дониши ҳар як китобдор, сатҳу сифати корбарӣ дар ҷойҳо, ҷалби хонандагон ба китобу китобхона буд, ки он то ҳол идома дорад. Дигар навъи корбарӣ дар китобхона ташкили нуқтаҳои китобдиҳӣ ва филиалҳо дар китобхона буд. Дар бинои мазкур то соли 1982 китобхона фаъолият намуд. Аксарияти китобдорон ҷавон буданд, аз ҷумла Мақсуда Усмонова, Мўътабар Мамадҷонова, Е. И. Лебеденко, М. Қодирова, Фароғат Аминова ва дигарон бо меҳру муҳаббат худро ба кори китобхона сафарбар менамуданд.

Соли 1982 китобхона ба ошёнаи якум ва таҳхонаи бинои истиқоматии кўчаи ба номи Камоли Хуҷандӣ, 164 кўчид. Китобхона соҳиби толорҳои барҳаво, утоқҳои корӣ барои шўъбаҳо ва фонди хазинавӣ гардид. Бо дастгирии Ҳукумати вилоят ва Раёсати фарҳанги вилоят барои харидани адабиётҳои тозанашр ва таҷҳизот, таъмир, сафари хизматӣ ба шаҳру ноҳияҳо, обуна ба рўзномаю маҷаллаҳо маблағ ҷудо гардид ва туфайли он хазинаи китобхона сол ба сол бой гардида, сафи ихлосмандонаш зиёд шуд. Китобхона дар фаъолияти чилсолаи худ якчанд озмун, аз қабили «Бонучаи Хуҷандӣ» (баъдтар унвони «Бонучаи Суғдӣ» ва алҳол «Шукуфаҳои Истиқлол») доир намуд, ки ҳадаф аз он бедор намудани меҳру муҳаббат ва шавқу ҳаваси кўдакон ба китоб ва ба ин васила дар онҳо тарбия намудани ҳиссиёти ватандўстию хештаншиносӣ мебошад.

Дигар чорабиние, ки барои баланд бардоштани донишу малакаи тахассусии китобдорон гузаронида мешуд, озмуни вилоятии «Касби ман-ифтихори ман»-ном дошт. Инчунин, озмунҳои вилоятии «Хонандаи беҳтарини сол», «Китобхонаи беҳтарин», намоиши иттиҳодияҳо, клубҳои шавқу завқ ва аёниятҳои тарғиботии китобҳои бачагона гузаронида мешуданд. Чунин чорабиниҳо ба баланд бардоштани савияи дониш, ташаккули ҷаҳонбинӣ, малакаю маҳорат, тақвияти меҳру муҳаббати бачагон нисбат ба китоб, миллат, Ватан мусоидат мекунад.

Маҳфилҳои адабӣ, муаррифии китобҳои шоирон ва нависандагон, ба монанди Додоҷон Раҷабӣ, Маҳкам Пўлод, Карим Абдулов, Ҳоҷӣ Содиқ, Наримон Бақозода, Абдумалик Баҳорӣ, Озод Аминзода, Неъмат Оташ, Ғуфрон Рустам (рўҳашон шод бод), Фарзона, Нурмуҳаммад Ниёзӣ, Аҳмадҷони Раҳматзод, Усмонҷон Ғаффоров ва дигарон имкон дод, ки хонандагон аз наздик бо онҳо мулоқот намуда, аз эҷодиёташон баҳраманд шаванд. Бахшида ба рўзи Дониш қабули хонандагони синфи якумро баргузор намудем. Маҳфилҳои «Китобхона дар меҳмонии мактабҳо», «Мактаб дар меҳмонии китобхона», дар таътили баҳоронаи мактаббачагон «Ҳафтаи китоби кўдакону наврасон» доир мегарданд, ки алҳол ба ҳукми анъана даромадааст.

Солҳои охир баҳри баланд бардоштани маънавиёти насли наврас ҳамкории байни оила, мактаб ва китобхона нағз ба роҳ монда шуда, дар назди китобхона шўрои волидайн амал мекунад. Кормандони китобхона ҳамеша бар онанд, ки сифати хизматрасониро хуб ба роҳ монда, шакл ва усулҳои нави корбариро ҷустуҷў намоянд, дар баланд бардоштани савияи дониш, маънавиёти насли навраси ҷомеа саҳми арзанда гузоранд. Хушбахтона ҳоло хазинаи китобии китобхона ба 70.868 нусха расида, сафи хонандагонаш 2676 нафарро ташкил медиҳад.

Бо дастгирии Раиси вилоят Абдураҳмон Қодирӣ китобхона ба номи Шоири халқии Тоҷикистон Аминҷон Шукўҳӣ гузошта шуд. Ҳоло кормандон мекўшанд, вазифаҳои дар ўҳда доштаашонро дар роҳи баланд бардоштани маънавиёт, худшиносиву ватандўстии насли наврас то қадри имкон бо истифода аз тамоми имкониятҳои мавҷуда дар асоси санадҳои меъёрию ҳуқуқӣ ба ҷо оранд. Дар ин кор бо роҳбарии директори китобхона Муаззама Расулова, кормандон М. Усмонов, М. Асимова, М.Бобоҷонова, М. Расулова, С. Турсунова, Ф. Аминова, М. Болтубоева, П. Мамадова бо муассисаҳои мактабӣ ва томактабӣ ҳамкорӣ намуда, пешравии маънавии кўдаконро бо роҳи таълиму тарбия амалӣ месозанд.

Кормандони китобхона бар онанд, ки сифати хизматрасониро хуб ба роҳ монда, шакл ва усулҳои нави корбариро ҷустуҷў намоянд, дар баланд бардоштани савияи дониш ва маънавиёти насли наврас саҳми арзанда гузоранд. Китобхонаи бачагонаи вилоятии ба номи Аминҷон Шукўҳӣ дар давоми 40 соли фаъолияти худ ба дастовардҳои назаррас соҳиб шуд. Соли 1984 ҳамчун китобхонаи беҳтарини бачагона акси китобхона дар Намоишгоҳи Комёбиҳои Хоҷагии Халқи шаҳри Москва ба намоиш гузошта шуд. Соли 2000 ғолиби озмуни ҷумҳуриявии «Дониш талабу бузурги омўз» ва мукофоти моддӣ гардида буд. Якчанд сол ғолиби озмуни вилоятии «Рўзӣ Рўдакӣ» гардида, инчунин бо Ифтихорномаҳои Вазорати фарҳанги Ҷумҳурии Тоҷикистон, Иттифоқи нависандагони Тоҷикистон, Мақомоти иҷроияи ҳокимияти давлатии вилоят, Раёсати фарҳанги вилоят ва дигарҳоро дорост. Кулли кормандони китобхона ба Ҳукумати Ҷумҳурии Тоҷикистон, хоса ба Асосгузори сулҳу Ваҳдати миллӣ – Пешвои миллат, Президенти мамлакат, мўҳтарам Эмомалӣ Раҳмон, Раиси вилоят Абдураҳмон Қодирӣ, Вазири фарҳанги Ҷумҳурии Тоҷикистон Шамсиддин Орумбекзода ва ҳамаи дигар ихлосмандон барои дастгирию кўмак, маслиҳату машвараташон изҳори сипос менамоем.

 Хайринисо Раҳимова,
 директори Китобхонаи вилоятии
бачагона дар солҳои 1976-2013,
дорандаи Ифтихорномаи
Президенти Ҷумҳурии Тоҷикистон,
Аълочии фарҳанги ҷумҳурӣ

Читать далее

Сифати маҳсулот чӣ гуна аст?

Соли 2016, яъне соли ҷашни бузурги 25-солагии Истиқлолияти давлатии ҷумҳурӣ бо дастовардҳову бунёди иншооти беҳтарин, аз ҷумла сохта, ба истифода додани коргоҳҳои нави саноатӣ дар сатҳи баланд таҷлил гардид. Бахшида ба ин ҷашни бошукўҳ як қатор иншооти ҷашнӣ, корхонаҳои истеҳсолӣ низ бо иштироки Сарвари давлат Эмомалӣ Раҳмон мавриди истифодабарӣ қарор дода шуданд. Дар ин радиф дар ноҳияи Спитамен коргоҳи нави саноатӣ- хатти истеҳсоли қубурҳои металлии гуногунҳаҷм ба фаъолият шурўъ кард. Ба кор оғоз кардани ин коргоҳ натанҳо дар ҳаёти мардуми ноҳия, балки дар тамоми ҷумҳурӣ рўйдоди фараҳбахш маҳсуб меёбад.

Оид ба фаъолияти имрўза ва сифату хусусиятҳои хоси маҳсулоти истеҳсолии ин коргоҳи саноатӣ бо масъулини соҳа, роҳбарияти он ва истифодабарандагони ин ашёи сохтмонӣ сўҳбате доштем, ки мухтасаран пешкаши хонандагон менамоем:

Озифхон Шарифзода - мудири шўъбаи энергетика ва саноати Мақомоти иҷроияи ҳокимияти давлатии вилоят:

- Дар зарфи чанд соли охир дар мамлакат, аз ҷумла дар вилоят даҳҳо корхонаҳои нав таъсис ёфтаанд, ки онҳо, бешубҳа, ба рушди устувори иқтисоди миллиамон ва муҳимтар аз ҳама, бобати бо ҷои кори доимӣ таъмин намудани мардум такони ҷиддӣ мебахшад.

Бунёд ва мавриди баҳрабардорӣ қарор гирифтани ҶСП «Норд Азия Металл» натиҷаи таваҷҷўҳ ва дастгириҳои пайвастаи Пешвои миллат, мўҳтарам Эмомалӣ Раҳмон нисбати соҳибкорони мамлакат аст, ки аз самараи ҳамкориҳои манфиатбори доираи соҳибкорону сармоягузорони Тоҷикистон ва Ҷумҳурии Мардумии Чин сарчашма мегирад. Сохтмони корхона соли 2014 оғоз гардида, барои бунёд ва васлу насби таҷҳизоти муосир беш аз 23 млн. сомонӣ масраф шудааст, ки 11 млн. сомонии онро арзиши таҷҳизоту технологияҳои корхона ташкил медиҳад.

Дар корхонаи навбунёд асосан лўлаҳо ва профилҳои металлии даврашакл ва чоркунҷашакл истеҳсол шуда, иқтидори солонааш баъди пурра ба кор даромадани корхона 60 ҳазор тонна маҳсулоти тайёр мебошад. Ҳоло роҳбарияти корхона азм гирифтааст, ки то охири соли ҷорӣ ба 50 млн. сомонӣ маҳсулот истеҳсол кунад.

Бино ба гуфти масъулин корхона барои коркарди маҳсулоти бинокории аз металл нигаронидашуда, ашёи хомро аз давлатҳои Федератсияи Русияву Қазоқистон дастрас менамояд. Маҳсулоти истеҳсолии хешро дар бозорҳои маҳаллӣ, шаҳру навоҳии ҷумҳурӣ пешниҳод кардааст. Коргоҳ бо технологияи хатти буррандагӣ ва чор хатти истеҳсоли маҳсулоти тайёр фаъолият мебарад.

Коргоҳи навтаъсис, аз ҷумлаи коргоҳҳое мебошад, ки дар самти бо истифода аз таҷҳизоту дастгоҳҳои муосир, ашёи хом - истеҳсоли маҳсулоти тайёри металли саноатиро васеъ ба роҳ мондааст. Технологияи истеҳсоли корхонаи мазкур дар кишварамон якумин маротиба истифода шуда, ин коргоҳ соҳоти сохтмону саноатро бо профилу металлҳои сохтмонӣ таъмин менамояд.

 Мутахассисони соҳа бо боварии комил мегўянд, ки маҳсулоти ин коргоҳ пурра ба меъёрҳои ҷаҳонӣ ҷавобгў буда, талаботи зарурии истифодабарандагону бозорҳои дохили кишвар ва берун аз онро таъмин карда метавонад.

Илҳомҷон Мухторов - директори ҶСП “Норд Азия Металл”:

– Боиси ифтихори мост, ки бо иштироки Пешвои миллат, Президенти кишвар, мўҳтарам Эмомалӣ Раҳмон коргоҳи мазкур ба таври расмӣ ба фаъолият оғоз намуд. Дар ин соли ҷашнҳои бузурги миллӣ мо тавонистем, ба яке аз ҳадафҳои муҳими стратегии Ҳукумати Тоҷикистон, аз ҷумла таъсиси коргоҳи истеҳсолӣ мусоидат намоем. Корхона бо истифода аз технологияи пешрафтаи ҳозиразамон маҳсулоти саноатӣ истеҳсол мекунад ва сифати маҳсулот ба стандартҳои ҷаҳонӣ ҷавобгў аст. Дар коргоҳ имрўз 60 нафар сокинони маҳаллӣ бо ҷои кори доимӣ таъминанд ва музди миёнаи маоши коргарон беш аз 2600 сомонӣ мебошад. Оянда дар сурати пурра ба кор оғоз намудани хатҳои дигари истеҳсолӣ дар назар дошта шудааст, ки шумораи кормандон ба 120 нафар расонида шавад.

Зимни сафари кории хеш ва шиносоӣ бо рафти истеҳсолот ва техникаю технологияи кории коргоҳи мазкур Сарвари давлат, мўҳтарам Эмомалӣ Раҳмон таъкид дошта буданд, ки дар баробари бунёд ва ташкили корхонаҳои муштараки истеҳсолӣ масъулини соҳа ҳамзамон бояд ба масъалаи омода намудани мутахассисони идоракунандаи кори истеҳсолот ва технологияи муосир таваҷҷўҳи зарурӣ зоҳир карда, бо ин васила дар афзудани нишондиҳандаҳои соҳаи саноат, таъсиси ҷойҳои нави корӣ ва ғанӣ гардонидани буҷети давлатӣ нақши сазовор гузоранд. Айни замон мо баҳри иҷрои дастуру супоришҳои Пешвои миллат ҳамаҷониба фаъолиятро пурзўр намуда, дар самти баланд бардоштани савияи тахассусии кормандон ва боз ҳам беҳтар намудани шароити кории онон чораҳои зарурӣ андешида истодаем.

Алҳол гуфтушунид баҳри ҳамкориҳои судманд ва содироти маҳсулоти коргоҳ ба дигар давлатҳо, аз ҷумла ба давлати Афғонистон идома дошта, рўзҳои наздик созишномаи тарафайн ба имзо хоҳад расид.

Имрўз Ҳукумати Тоҷикистон ва ҳам Мақомоти иҷроияи ҳокимияти давлатии вилоят бо мақсади дастгирии фаъолияти соҳибкорони ватанӣ, пеш аз ҳама рушди соҳибкории истеҳсолӣ тамоми шароити заруриро фароҳам овардаанд. Воқеан баҳри пешрафти соҳа имтиёзҳои зиёд роҳандозӣ гардидаанд, аз ҷумла барои воридоти таҷҳизоту технологияи муосир аз ҳама гуна пардохтҳои гумрукӣ ва ҳамчунин ашёи хоми марбут ба коргоҳи мо аз боҷи гумрукӣ озод карда шудаанд. Дар асоси моддаи 110, қисми 6-и Кодекси андози Ҷумҳурии Тоҷикистон ба мўҳлати 4 сол аз супоридани андоз аз фоидаи шахсони ҳуқуқӣ озод карда шудаанд, ки ин албатта, ба манфиати кор аст. Ин омилҳо мо - масъулини соҳаро водор месозад, ки бо заҳмати софдилона барои ободонии диёр, таҳкими иқтидори иқтисодии он кўшиш ба харҷ дода, бо ин барои баланд бардоштани сатҳу сифати зиндагии мардум ҳиссагузор бошем.

Мавлон Ҳалимов, соҳибкор:

- Чунин коргоҳи пуриқтидорро, ки дар давоми 70 соли шўравӣ дар кишвар вуҷуд надошту имрўз бо шарофати соҳибистиқлолии кишвар таъсис ёфтааст, иқдоми басо хуб меҳисобам. Таи солҳост, ки ман бо соҳибкорӣ машғуламу аз давлатҳои Русия, Қазоқистон ва Хитой қубуру профилҳои металлҳои гуногунҳаҷми сохтмониро ба бозорҳои вилоят ворид мекардам, ки муаммоҳои зиёд доштанд. Ҳоло бошад, аз коргоҳи навтаъсиси ҶСП “Норд Азия Металл”-и Спитамен маҳсулоти тайёрро харидорӣ менамоям ва имрўз металлҳои сохтмонии ин коргоҳ дар бозорҳо мизоҷони зиёди худро дорад. Барои соҳибкорон ҳамаҷониба ин муфид аст, пештар, вақте ки мо ин намуди маҳсулотро аз давлатҳои хориҷа ворид мекардем, барои аз гумрук гузаронидану боҷи давлатӣ супоридан вақт ва маблағи зиёд сарф мешуд, ки ин боиси гаронии нархи масолеҳи сохтмонӣ мегардид.

Муродҷон Юлдошев, сокини ноҳияи Спитамен:

- Солҳои пеш бо тақозои шароити иқтисодӣ дар муҳоҷирати меҳнатӣ қарор доштам. Бинобар сар задани бўҳрони иқтисодӣ дар мусофират кор ёфтан душвор гардид. Чун ба Ватан баргаштам, ободкориҳоро дар кишвар дида, азм намудам, ки дар маҳалли зисти худ ҷойи кор ёбам. Ин буд, ки аз оғози корҳои сохтмонии коргоҳи мазкур дар ин ҷо фаъолият дорам. Алҳол ба ҳайси таҳкунанда - кафшергар кор мекунам, музди маоши хуб ба даст оварда, зиндагии хешро пеш мебарам. Шароити хуби корӣ бароямон муҳайё буда, шукргузорам, ки алҳол бо дастгирии Сарвари давлатамон, мўҳтарам Эмомалӣ Раҳмон ва Раиси вилоятамон, мўҳтарам Абдураҳмон Қодирӣ чунин коргоҳҳо рўи кор омадаанд.

Далерҷон Эрназаров, сохтмончӣ, сокини ноҳияи Бобоҷон Fафуров:

- Чанд сол инҷониб дар сохтмони иншоотҳои баландошёнаи нави маркази вилоят ба ҳайси сохмончӣ кор мекунам. Ба буридани профилу маҳсулоти металлӣ низ сарукор дорам, яъне онҳоро ба талаботи сохтмончиён мувофиқ карда, бурида, ҷо ба ҷо мекунам. Дар ин радиф мушоҳида намудам, ки ҳоло аксари истифодабарандагон дар сохтмонҳои хеш аз маҳсулоти маҳаллӣ, аниқтараш аз ҶСП “Норд Азия Металл” истифода мебаранд. Агар воқеъбинона назар андозем, ҳақиқатан маҳсулоти ин коргоҳ аз ашёи воридмешудаи дигар давлатҳо бо чанд хусусияти хеш бартарӣ дорад. Масалан, маҳсулоти сохти маҳаллӣ сифати баланд дошта, инчунин арзишаш ҳам дастрас мебошад, ки ин, албатта, ба манфиат ва некўаҳволии мардум равона гардидааст.

Маъмурахон САМАДОВА,
“Ҳақиқати Суғд”

 

Читать далее

Дастоварди саноатчиёни вилоят

Дар 11 моҳи соли равон корхонаҳои саноатии вилоят ба маблағи 6,2 млрд. сомонӣ маҳсулот истеҳсол намуданд, ки ин нишондиҳанда нисбат ба ҳамин давраи соли гузашта 2 млрд. сомонӣ зиёд мебошад. Дар ин бора аз шӯъбаи энергетика ва саноати мақомоти иҷроияи ҳокимияти давлатии вилоят иттилоъ доданд.

Ин гувоҳи он аст, ки саноатчиёни вилоят дар давоми 3 соли охир ҳаҷми истеҳсоли маҳсулотро 2 маротиба афзун намудаанд. 

Читать далее

Амалҳои коррупсионӣ ошкор мегарданд!

Дар Прокуратураи вилоят ҷаласаи Шўрои ҳамоҳангсозии фаъолияти мақомоти ҳифзи ҳуқуқи вилоят дар асоси талаботи Нақшаи чорабиниҳо дар бобати татбиқи “Стратегияи муқовимат бо коррупсия барои солҳои 2013-2020”, ки бо Фармони Президенти Ҷумҳурии Тоҷикистон, таҳти № 1504 аз 30 августи соли 2013 тасдиқ гардидааст, ҳолати амалишавии қонунгузорӣ дар бораи мубориза бар зидди коррупсия ва пешгирии ҳуқуқвайронкуниҳои коррупсиониро дар фаъолияти кормандони мақомоти ҳифзи ҳуқуқ, мақомоти иҷроияи ҳокимияти давлатии вилоят ва дигар мақомоту муассисаҳои давлатӣ дар даҳ моҳи соли 2016 мавриди баррасӣ қарор дод.

Қайд гардид, ки Прокуратураи вилояти Суғд дар якҷоягӣ бо дигар мақомотҳои ҳифзи ҳуқуқи вилоят ба масъалаи пешгирии амалҳои коррупсионӣ, ошкор ва тафтиши ин қабил ҷиноятҳо диққати махсус дода истодааст.

Дар ин давра, аз ҷумла аз ҷониби кормандону хизматчиёни сохторҳои бонкӣ - 106, Раёсати кишоварзӣ - 40, Раёсати маориф - 31, Раёсати тандурустӣ - 26, мақомоти милитсия - 16, кумитаи заминсозӣ - 14, системаи нақлиёт - 10, Раёсати адлия ва суд- 9, Идораи хоҷагии об - 9, меҳнат ва шуғли аҳолӣ - 3, Агентии коррупсия -1 ва дигар ташкилоту корхонаҳо ва соҳибкорон 319 ҷиноят содир карда шудааст. Дар даҳ моҳи соли равон дар миқёси вилоят 646 (2015-602) ҷиноятҳои коррупсионӣ ва иқтисодии хусусияти коррупсионӣ дошта ошкор ва 47,9 млн. сомонӣ зарарҳои молиявӣ муайян карда шудаанд.

Инчунин, аз ҷониби Раёсати Агентии назорати давлатии молия ва мубориза бо коррупсия 208 парвандаи ҳуқуқвайронкунии маъмурӣ мансуб ба омилҳои коррупсионӣ мавриди баррасӣ қарор гирифтанд.

Дар ҷаласа фаъолияти мақомоти ҳифзи ҳуқуқ, мақомоти иҷроияи ҳокимияти давлатии шаҳру ноҳияҳо, худидоракунии шаҳраку деҳот, кумитаи заминсозӣ, муассисаҳои маорифу тандурустӣ, бонкҳо ва дигар корхонаю ташкилотҳои давлатӣ дар самти пешгирии қонунвайронкуниҳои коррупсионии дохилиидоравии байни кормандон, ошкор ва тафтиши парвандаҳои ҷиноятӣ ва оғози парвандаҳои маъмурии коррупсионӣ мавриди таҳлил ва ҷамъбаст қарор дода шуданд.

Дар ҷаласаи Шўро баҳри тақвият бахшидан ба фаъолияти субъектҳои зидди коррупсия муборизабаранда ва баланд бардоштани сатҳи тарбияи ҳуқуқии шаҳрвандон қарорҳои дахлдор қабул гардиданд.

Гулҷаҳон МАҲКАМОВА,
“Ҳақиқати Суғд”

Читать далее

Чароғи маърифат

Китобхонаи вилоятии бачагонаи ба номи Аминҷон Шукуҳӣ бо шўъбаи суғдии Иттифоқи нависандагони Тоҷикистон ҳамкории хуб дорад. Ягон чорабинии он бе адибон намегузарад. Китобхона бо фаъолияти намунавию ибратбахши худ натанҳо дар байни наврасон, балки калонсолон низ маъруф мебошад.

Ҳар гоҳе ки гузорам ба он тараф афтад, ҳатман ба китобхона медароям, чунки муомилаи хубу муносибати марғуби кормандонаш писанд омадааст ва ҳар як вохўриам бо онҳо ба ман шодию хурсандӣ мебахшад ва он дам гумон мекунам, ки бо дўстони наздику қаринам дучор шудаам. Ин, албатта, сабабҳои худро дорад, зеро баъзеи онҳоро солҳои тўлонӣ инҷониб мешиносам. Аз ҷумла Хайринисо Раҳимоваро. Ин зани хушфеълу атвор, инсони беғубор ба ин маърифатгоҳ аз солҳои ташкилёбиаш сар карда, то дирўз сарварӣ мекард. Дар давоми фаъолияти ў симои китобхона борҳо тағйир ёфту шумораи адабиётҳо хеле афзуданд. Дар ин муддат шогирдони зиёдеро тарбия карда, ба камол расонд. Яке аз онҳо директори имрўзаи китобхона Муаззама Расулова мебошад. Ҳамроҳи ў якҷоя китобдорони соҳибтаҷриба Муамбарахон Осимова, Маъсуда Усмонова, Матлуба Расулова, Биорифа Бобоҷонова, Саодатхон Турсунова заҳмат мекашанд.

Собиқ сарвари китобхона Хайринисо Раҳимова низ бо вуҷуди дар нафақа будан, ҳамроҳи дастпарваронаш нашъаи меҳнат мечашад, зеро меҳри китобу китобдорӣ дар дилаш маъво гирифтааст. Дар китобхона ҳар сол чорабиниҳои зиёд гузаронда мешавад. Аз ҷумла, бахшида ба ҷашну зодрўзҳои адибон озмунҳо ва маҳфилҳои адабӣ барпо мегарданд. Чанде пеш бахшида ба 65-солагии зодрўз ва 45-солагии фаъолияти эҷодиам маҳфили адабӣ доир шуд. Дар он адибон Атахон Сайфуллоев, Муҳаммад Субҳон, Равшан Замир, Муқим Воҳид, Камоли Рўмонӣ ширкат варзиданд. Хонандагони мактаби таҳсилоти миёнаи умумии рақами 16, шаҳри Хуҷанд аз рўи ашъори банда шеъру сурудҳо хонданд. Инчунин, дар асоси ҳикояи «Узр» саҳначаеро манзури тамошобинон гардонданд.

 Ба наздикӣ китобхонаи мазкур 40-солагии худро таҷлил менамояд. Кормандони китобхонаро бо фаро расидани ҷашни бошукўҳ самимона табрику муборакбод намуда, ба ҳар яки онҳо пеш аз ҳама сиҳату саломатӣ, хушбахтии оилавӣ, умри дарози Саъдиёна ва ба фаъолияти минбаъдаашон комёбиҳои наву бешумор таманно менамоям.

Саиднабӣ Наҷимӣ,

узви Иттифоқи нависандагон ва

рўзноманигорони Тоҷикистон

Читать далее

06 December 2016

Ёдкарди олимони барҷастаи тоҷик

Ба ифтихори 1250-солагии Ҳаким Тирмизӣ ва 1150-солагии Закариёи Розӣ дар Донишкадаи политехникии Донишгоҳи техникии Тоҷикистон ба номи академик М.Осимӣ дар шаҳри Хуҷанд мизи мудаввар доир гардид.

Чорабиниро мудири кафедраи умумитаълимии донишкада Зафар Раҳмонов ҳусни ифтитоҳ бахшида, қайд кард, ки арҷ гузоштан ба осори гаронмояи ин мутафаккирони барҷаста барои боз ҳам баланд бардоштани эҳсоси худшиносӣ такконе хоҳад бахшид.

Устодони донишкада, номзади илмҳои фалсафа Абӯбакр Шодиев ва номзади илмҳои таърих Мӯътабар Ғозиева дар бораи зиндагӣ ва осори ин файласуфон, ки дар асрҳои 9 ва 10 зиндагиву эҷод кардаанд, гузориши муфассал доданд. Дар суханронии онҳо қайд шуд, ки бо вуҷуди гузашти беш аз 1000 сол то ҳанӯз асарҳои безаволи файласуфон дар илми муосири имрӯза, аз ҷумла тиббу иқтисодиёт фаровон истифода бурда мешаванд.

Ҳаким Тирмизӣ ҳамчун олим, файласуф ва тасаввуфшинос замони зиндагии худ беш аз 400 асарҳои илмӣ навишта, забон ва фарҳанги миллати тоҷик ва форсро ба оламиён муаррифӣ кардааст. Закариёи Розӣ бошад, ҳамчун донандаи хуби илмҳои тиб дар кишварҳои Арабу аҷам ном баровардааст. Ӯ аввалин касест, ки тибро ба амалия пайвастааст.

Дар фарҷоми мизи мудаввар донишҷӯён ба саволҳои худ оид ба паҳлӯҳои гуногуни зиндагинома ва эҷоди ин нобиғагони миллат посухҳои мушаххас гирифтанд.  

Абдусабури Абдуваҳҳоб,
котиби матбуотии ДПДТТ дар шаҳри Хуҷанд

Читать далее

Кафолати ҳастии миллат

Сабақи таърихӣ воло ва бебаҳотарин маҳсули ақлу хиради инсон аст. Эзиди офарандаи замину осмон, аз ибтидо ҳамчун гавҳари мазмуну моҳият ва мақсади ҳаёт дар дилу тафаккури инсоният барои амали неку субот, танзими созандагӣ ва кафолати амнияту озодии башарият ба он ҷои хосае додааст.

Чунин хислату хусусиятро Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмон низ доранд. Баъди ба даст овардани Истиқлолият дар кишвари мо як муддат нооромиҳо сар заданд. Мардум вобаста ба мақсаду маром ва сатҳи маданияти сиёсиашон ба майдону сангарҳо ҷудо шуданд, мамлакатро бўҳрони сиёсиву иқтисодӣ фаро гирифт. Таърих гувоҳ аст, ки пас аз кашмакашҳои зиёди бемаънии сиёсӣ, моҳи ноябри соли 1992 дар шаҳри Хуҷанд Иҷлосияи ХVI Шўрои Олӣ баргузор гардид. Дар ин Иҷлосияи сарнавиштсоз номзадии Раиси Шўрои Олии Тоҷикистон пешниҳод гардид ва бо ҷонибдории вакилон Эмомалӣ Раҳмон ба ин вазифа интихоб шуданд.

Аз он рўзе, ки Эмомалӣ Раҳмон ба ҳайси Сарвари давлати Тоҷикистон савганд ёд карданд, ба ваъдаҳо ва мақсадҳову ҳадафҳо содиқона амал намуда, нахустин иқдоми пешгирифтаашон баргардонидани муҳоҷирони иҷборӣ ба Ватан буд.

Роҳи халосиро аз бўҳрони идеологӣ ва қашшоқии маънавӣ ҳукумати навтаъсиси ҷумҳурии соҳибистиқлоли Тоҷикистон таҳти сарварии Эмомалӣ Раҳмон дар таҳқиқу таҳлил ва омўзиши эҳёи суннатҳои миллӣ ва таърихиву худшиносӣ, ифтихори миллӣ ва эҳсоси ватандўстӣ дарёфт.

Бунёди ҷомеаи шаҳрвандӣ чун кафолати сулҳу салоҳ, рушди иҷтимоию иқтисодӣ ва фарҳангии ҷомеа дар мадди назари Пешвои миллат Эмомалӣ Раҳмон аст.

Бояд қайд кард, ки Истиқлолият муҳимтарин дастоварди таърихи муосири халқи тоҷик, омили наҷоти миллат ва давлатдории миллии он аст. Дар натиҷаи Истиқлолият давлати мо ҳифз гашт, миллат аз вартаи нобудӣ наҷот ёфт, сокинони кишвар ба зиндагии осудаву осоишта расиданд, сохтори давлатӣ шакли комили худро гирифт ва роҳи рушди кишвар аз тарафи худи халқ интихоб ва муайян гашт.

Дар масъалаи дастрасӣ ба мусолиҳаи миллӣ ҳусни ният, садоқат, ватанхоҳӣ ва миллатдўстии Сарвари давлат Эмомалӣ Раҳмон хеле муассир буданд. Дар натиҷаи саъю кўшишҳои муштарак, ниҳоят 27-уми июни соли 1997 “Созишномаи умумии истиқрори сулҳ ва ризоияти миллӣ” ба имзо расид. Назар ба эътирофи ҳамагон мусолиҳаи миллии Тоҷикистон як мисоли бориз ва барҷаста дар таърихи муносибатҳои миллӣ ва байналмилалӣ ба шумор рафта, намунаи ибрат ва пайравӣ дар ҳаллу фасли муноқишаҳои сиёсӣ, қавмӣ ва минтақавӣ дониста мешавад. Сулҳи тоҷикон сабақи таърихист, ки бо ҳарфҳои заррин сабт шудааст. Ва ин неъмати бузурги даврони Истиқлолият мебошад.

Истиқрори сулҳ дар Тоҷикистон як воқеияти таърихист ва миллати мо онро набояд аз хотир фаромўш кунад. Пешравиҳои имрўзаи Ҷумҳурии Тоҷикистон, маҳз бо истиқрори сулҳу Ваҳдат ба даст омада, ба он пайванди ногусастанӣ дорад.

Шафоат ҲОШИМОВА,
cармуаллимаи факултети таърих ва ҳуқуқи
Донишгоҳи давлатии Хуҷанд
ба номи академик Бобоҷон Ғафуров

Читать далее