December 2016

06 December 2016

Хуҷанд: Соли 2017 тахтаҳои нави эълон насб мешавад

Тибқи Қонуни Ҷумҳурии Тоҷикистон «Дар бораи матбуот ва дигар васоити ахбори омма», Фармони Президенти Ҷумҳурии Тоҷикистон «Дар бораи вокуниши шахсони мансабдор ба маводҳои танқидӣ ва таҳлилии воситаҳои ахбори омма» ва Низомнома «Дар бораи дида баромадани муроҷиатҳо, арзу шикояти меҳнаткашон дар Ҷумҳурии Тоҷикистон» мақомоти иҷроияи ҳокимияти давлатии шаҳри Хуҷанд мақолаи «Реклама дар кўча ё доғе ба ҳусни шаҳр», ки санаи 8 октябри соли 2016, №120 дар рўзномаи «Ҳақиқати Суғд» нашр гардидааст, мавриди омўзиш қарор дод. Маълум гардид, ки дар ҳақиқат вақтҳои охир дар тамоми қаламрави шаҳри Хуҷанд ба таври бесарусомонӣ насби эълонҳои сокинон ба назар мерасад, ки боиси нигаронии мақомоти иҷроияи ҳокимияти давлатии шаҳр низ гардидааст.

Пўшида нест, ки дар даврони иқтисодиёти бозоргонӣ барои ба фурўш рафтани моли худ ё намуди хизматрасонӣ шаҳрвандон роҳҳои гуногуни онро ҷустуҷў карда, маданияти шаҳрдориро фаромўш мекунанд. Махсусан, тарзи зуд ва осони он ин чоп ва насби варақаҳои эълонҳост, ки соҳибони он гирифтани иҷозати махсусро аз мутахассисони соҳа фаромўш карданд. Бояд хотиррасон кард, ки тарзи паҳни эълонҳо оид ба хариду фурўши мол ё хизматрасониро онҳо метавонанд тариқи телевизионҳои маҳаллӣ, радио ва нашрияҳои чопӣ ба самъи сокинони шаҳр расонанд. Аммо афсўс, шаҳрвандон тарзи осон ва бемузди онро интихоб кардаанд.

Насби варақаҳои эълонҳо агар аз як тараф мушкилоти соҳибони онро то қадри имкон ҳал кунад ҳам, аз тарафи дигар боиси дарди сари кормандони Корхонаи воҳиди давлатии коммуналии «Сарраёсати ободонӣ ва хоҷагии манзилӣ-коммуналӣ»-и шаҳр шудааст.

Агар онҳо имрўз панҷоҳ эълон бартараф кунанд, пагоҳ ба ҷои онҳо боз панҷоҳ эълони дигар насб мешавад, ки насб ё часпонидани эълонҳои шахсӣ асосан шабона ба амал меояд, аз ҳамин сабаб ҳам соҳибони онҳоро ҳангоми машғулияти «дўстдоштаашон» боздошт кардан номумкин аст. Агар дурусттар ба эълонҳои насбшуда нигоҳ кунем, қисми асосии онҳо дар мавзўи хариду фурўш ва ё ба иҷора додани хонаҳои истиқоматӣ мебошад ва аз рўи пурсишҳои мо муайян гардид, ки асосан соҳибони ин эълонҳо оҷонсиҳои ғайриманқули шаҳр ҳастанд, ки самти асосии фаъолияташон ин хариду фурўш ва ба иҷора додани хонаҳои истиқоматӣ мебошад.

Бояд зикр кард, ки дар навбати худ КВДК «Сарраёсати ободонӣ ва хоҷагии манзилӣ-коммуналӣ»-и шаҳри Хуҷанд барои бартараф кардани вазъияти ба миён омада, дар баъзе аз мавзеъҳои кўчаҳои марказии шаҳр якчанд тахтаҳои махсус барои насби варақаҳои эълонҳоро ҷойгир кардааст ва шаҳрвандон аз он истифода бурда истодаанд. Вале аз рўи мушоҳидаҳои мо шумораи эълондиҳандагон то ҳамин андоза зиёд ҳастанд, ки лавҳаҳои насбшуда ин миқдор эълонҳоро имконияти ҷойгир кардан надоранд. Аз ин лиҳоз, бо супориши раиси шаҳри Хуҷанд барои ҳалли ин масъала ба КВДК «Сарраёсати ободонӣ ва хоҷагии манзилӣ-коммуналӣ»-и шаҳри Хуҷанд бо мақсади насби тахтаҳои эълон маблағи иловагӣ ҷудо мешавад, ки он бояд ин мушкилотро осон гардонад. Насби тахтаҳои нав аз рўи нақша аз аввали соли 2017 оғоз ёфта, дар муддати кўтоҳ ин муамморо бояд ҳал намояд.

Дар навбати худ, мо низ хонандагони ин нашрияро бобати ҳалли ин масъала сари вақт огоҳ карда, аз рафти иҷрои он маълумоти иловагӣ дастрас хоҳем кард.

Хайрулло Fайбуллозода,
муовини якуми раиси шаҳри Хуҷанд

Читать далее

Барандагони озмуни вилоятии “Хомаи созанда-2016” бо мукофотпулиҳо сарфароз гардонида шуданд

Имрӯз, сешанбеи 6 декабр бо баргузории як ҷаласа дар Кохи Рӯдакии маркази вилоят ғолибони озмуни вилоятии “Хомаи созанда-2016” бо диплому мукофотпулиҳо сарфароз гардонида шуданд.

Раиси вилояти Суғд Абдураҳмон Қодирӣ зимни сӯҳбат дар ҳузури наздик 100 нафар журналистони расонаҳои чопиву электронӣ гуфт, ки дар ҷаҳони муосир нақши воситаҳои ахбори омма дар расонидани иттилоот ва таҳлилу баррасии масъалаҳои мубрами ҷомеа назаррас мебошад. Маҳз бо назардошти нақши матбуот, телевизиону радио ва дигар намуди расонаҳо Мақомоти иҷроияи ҳокимияти давлатии вилоят бо воситаҳои ахбори омма ҳамкории хубу самаранокро ба роҳ монда, ҷиҳати тавсеаи он боз ҳам тадбирҳои судмандро роҳандозӣ менамояд.

Читать далее

Табрики Раиси вилоят Абдураҳмон Қодирӣ ба ифтихори Рўзи кормандони мақомоти молия

Кормандони Сарраёсати молия дар вилоят, сохторҳои маҳаллии он ва собиқадорони соҳаро бо фарорасии иди касбӣ - Рўзи кормандони мақомоти молия табрику таҳният гуфта, бароятон тани баофият, хотири ҷамъ ва дар иҷрои вазифаи пурмўҳтаво ва бомасъулият комёбиҳо таманно дорам. Маҳз бо ҳидояту раҳнамоии Асосгузори сулҳу Ваҳдати миллӣ - Пешвои миллат, мўҳтарам Эмомалӣ Раҳмон ҳамасола санаи 7-уми декабр Рўзи кормандони мақомоти молия таҷлил карда мешавад.

Пешбурди сиёсати буҷету андоз, таҳияи буҷети давлатӣ, ҷараёни иҷроиши буҷет, назорати истифодаи маблағҳои буҷетӣ, маблағгузории саривақтии тадбирҳое, ки бо маблағгузории давлатӣ дар буҷет пешбинӣ шудаанд, ҳамчунин назорати фаъолияти штатию молиявии ташкилоту муассисаҳои буҷетӣ, хароҷоти босамар ва мақсадноки маблағҳои буҷетӣ ва ғайра аз вазифаҳои аввалиндараҷаи молиячиён маҳсуб мешаванд.

Читать далее

05 December 2016

Вазъи роҳҳо ва истифодаи маблағҳои буҷетӣ беҳбудӣ мехоҳад!

Дар ҷаласаи васеи ҳайати мушовараи Прокуратураи вилоят натиҷаи санҷиши ҳолати иҷрои қонунгузорӣ вобаста ба нигаҳдории роҳҳои автомобилгард, асоснокии маблағҳои ҷудогардида, сифати роҳҳои навсохташуда ва таъмири роҳҳои дар истифода қарордошта мавриди баррасӣ қарор дода шуд.

Таъкид гардид, ки дар фаъолияти муассисаҳои дахлдор як қатор камбудиву қонунвайрокуниҳои ҷиддӣ вобаста ба сифати таъмиру азнавсозии роҳҳои автомобилгард, нигоҳдории роҳу пулҳо, азонихудкунӣ ва исрофкории маблағҳои аз буҷети давлат ҷудогардида ҷой доранд.

 Дар минтақаҳои роҳҳои автомобилгарди Шӯрча – Рӯдакӣ (Панҷакент), Куркат – Ширин (Спитамен), Ғафуров – Булоқ – Пунгон (Бобоҷон Ғафуров), шаҳраки Адрасмон, Исфара – Ворух, шаҳраки Шӯроб (Исфара) ва маркази ноҳияи Деваштич дар маҷмӯъ дар масофаи беш аз 85 км роҳҳо таъмирталаб буда, қисми роҳҳо ба фарсудашавӣ омада расидааст, ки барои ҳаракати во-ситаҳои нақлиёт таҳдиди хатар ба миён меоранд.

Дар роҳҳои автомобилгарди ҳудуди вилоят аз рӯи меъёрҳои техникӣ ва қоидаҳои ҳаракати роҳҳои автомобилгард ба ҷойи беш аз 17,8 ҳазор 13,8 ҳазор аломати роҳ гузошта шудааст, ки 4 ҳазор адад кам мебошад.

Бояд қайд кард, ки набудани аломатҳои роҳ ҳаракати иштирокчиёни роҳ ва меҳмонони бори аввал ташрифовардаро хеле мушкил мегардонад.

Дар давраи таҳти санҷиш қарор гирифта, азонихудкунӣ ва исрофкории маблағҳои буҷетӣ ҳангоми будани корҳои таъмиру азнавсозии роҳҳои автомобилгард, дар фаъолияти МДНРА ноҳияи Деваштич ба маблағи 9870 сомонӣ, МДНРА-и ноҳияи Шаҳристон 1752 сомонӣ, МНДРА-и ноҳияи Ашт 23886 сомонӣ, ҶДММ «Хуҷандроҳ» 138632 сомонӣ, ҶДММ “Роҳи обод” 22820 сомонӣ ва ҶДММ “Манзил-2014” 7383 сомонӣ ошкор карда шудааст.

Муассисаи давлатии нигоҳдории роҳҳои автомобилгард ва ширкатҳои роҳсозӣ дар баъзе қитъаҳои роҳҳои автомобилгард бо сифати паст ва ғайристандартӣ корҳои таъмирӣ ва азнавсозӣ гузаронидаанд, ки дар муддати кӯтоҳ он роҳҳо фарсудаву таъмирталаб гаштаанд.

Санҷиши вазъи омодагӣ ба мавсими тирамоҳу зимистонгузаронӣ барои солҳои 2016-2017 нишон дод, ки дар Муассисаҳои давлатии назорати роҳҳои автомобилии вилоят захираи маводҳои зиддилағҷиш, тибқи нақша 6,8 млн. сомонӣ пешбинӣ карда шудааст.

Новобаста ба ин аз ҷониби муассисаҳои мазкур маводи зидди лағҷиш ба андозаи зарурӣ захира карда нашудааст. Аз ин рӯ, ба дараҷаи дахлдор таъмин намудани нигоҳдорӣ ва беха-тарии роҳҳои автомобилгард дар фасли зимистон ҳангоми бориши барф ва яхбандӣ мушкилоти кор хоҳад шуд.

Баҳри беҳтар намудани ҳолати нигаҳдории роҳҳои автомобилгард, асоснокии маблағҳои ҷудогардида, сифати роҳҳои навсохташуда ва таъмири роҳҳои дар истифода қарордошта ва таъмин намудани маводи зиддилағҷишӣ қарорҳои дахлдор қабул гардиданд.

Гулҷаҳон МАҲКАМОВА,
“Ҳақиқати Суғд”

Читать далее

Иқдоми нек

Тӯли 20 сол аст, ки дар «Мактаби хусусии Файз» анъанаи хубе амалӣ мегардад.

Бахшида ба рӯзи маъюбон аз ҷониби хонандагони мактаб маҳсулоти хӯрока, либосворӣ, бозичаҳои гуногун ва бисёр ашёҳои зарурӣ ҷамъоварӣ гардида ба хонаи бачагони Ҷамоати Деҳмойи ноҳияи Ҷаббор Расулов ва хонаи бачагони шаҳри Хуҷанд дастрас карда шуд.

Онҳо ният доранд, ки ин иқдоми некро идома дода, заррае бошад ҳам ба дили бепарастормондагон шодию меҳр бахшанд.

Манзура FАФУРОВА,
омӯзгори МТF «Файз»

Читать далее

Абармарди фазлу хирад

Дар Тоҷикистон баробари расидан ба истиқлолияти миллӣ пешрафти назарраси соҳоти гуногуни ҷомеа ҷараён гирифт, ки барои густариши минбаъдаи давлатдорӣ ва соҳиб гардидан ба истиқлолияти иқтисодӣ заминаи мусоид фароҳам овард. Бидуни шак, барои пешрафти соҳаҳои гуногуни кишвар нақши Асосгузори сулҳу Ваҳдати миллӣ - Пешвои миллат, Сарвари давлатамон Эмомалӣ Раҳмон хеле назаррас аст. Аз ҷониби сиёсатмадорон ва шахсиятҳои маъруфи ҷаҳон борҳо эътироф гардида, ки Эмомалӣ Раҳмон барои эҳёи дубораи давлати ҷангзада ва бунёди   Тоҷикистони демокративу ҳуқуқ-бунёд саҳми намоён гузоштаанд.

Ин аст, ки ҷомеаи Тоҷикистон барои эътирофу эҳтироми ин шахсияти сиёсӣ мақоми баланди Пешвои миллатро барояшон сазовор донист. Бояд эътироф кард, ки як марҳалаи рушду нумӯъ ва таърихан муҳими Тоҷикистони навин ба номи ин абармарди хираду сиёсат марбут аст. Аз ин лиҳоз, зикри корномаҳои таърихии Президенти кишвар дар пешрафти ҳамаҷонибаи Тоҷикистони соҳибистиқлол   мавзӯи ҳамешагии сиёсатшиносӣ ва таърихнигории навини Тоҷикистон мебошад. Пешвои миллат дар таърихи давлатдории Тоҷикистон сиёсати таҳаммулпазириро асос гузоштанд, ки маҳз ҳамин сиёсат давлатро аз вартаи ҳалокат раҳонид ва ба ин восита дар мактаби сиёсатшиносии ҷаҳон шеваи нави муносибат ба мухолифин зуҳур кард. Хатари аз байн рафтани давлат ва парешон гардидани миллат маҳз бо ҷоннисориҳои Эмомалӣ Раҳмон аз байн рафт. Дар ҳамон даврон ҷони худро ба хатар гузошта, барои якпорчагии миллату давлат тадбирҳо андешидан ва барои таъмини амнияти миллӣ амал намудан қаҳрамонӣ буд. Ба мардуми парешон умеди ояндаро додан ва сарҷамъ намудани гурезагони иҷборӣ дар ҳамон даврони хараҷу мараҷ хидмати таърихии дигари ин чеҳраи мондагори сиёсат буд. Барои аз вартаи гуруснагӣ раҳонидани мардум тақсимоти заминҳои Президентӣ аз тадбирҳои огоҳона ва хирадмандонаи Пешвои миллат буд. Дигар аз тадбирҳои муҳиме, ки барои ҳифзи миллату давлат аз ҷониби Эмомалӣ Раҳмон ҷараён гирифт, ин эътироф ва бузургдошти арзишҳои милливу маънавӣ мебошад, ки дар ин росто корҳои ниҳоят судманд ва таърихӣ ба анҷом расиданд. Руҷӯъ ба таърихи маданият ва фарҳанги миллӣ аз ҷониби ҳукумату давлат ва ба виҷа, аз ҷониби Президент на танҳо рисолати таърихӣ, балки дар таҳким бахшидани ҳисси ватандӯстӣ ва худогоҳии миллӣ дар марҳалаи нави таърихию сиёсӣ ниҳоят муҳим буданд.

Аҳли сиёсат хеле хуб медонанд, ки ба роҳи дуруст мондани сиёсати хориҷӣ ва дар ин самт нигоҳ доштани мавқеи геополитикии кишвар аз корҳои ниҳоят мушкили давлатдорӣ мебошад. Дар ин самт Сарвари давлат тавонистанд, ки на танҳо худро ҳамчун   сиёсатмадори сатҳи ҷаҳонӣ муаррифӣ намоянд, балки Тоҷикистонро, ки ҷаҳониён   ҳамчун давлати ҷангзада мешинохтанд, чун кишвари тамаддунофар, демокративу    дунявӣ ва ҳуқуқбунёд ошно созанд ва собит намоянд, ки ба давлати Тоҷикистон эътимод намудан мумкин аст.

Шахсияти Эмомалӣ Раҳмон ҳамчун Пешвои миллат ва сиёсатмадори бузург боз дар он зоҳир мегардад, ки Тоҷикистонро барои ҷаҳониён мисоли давлати соҳибистиқлол, демократӣ, ҳуқуқбунёд ва дунявӣ, илова бар ин, мардуми ин кишварро ҳамчун халқи сулҳҷӯву фарҳангофару соҳибтамаддун муаррифӣ намуданд. Ин буд, ки таҷрибаи сулҳи тоҷикон дар манотиқи гуногуни кишварҳои ҷангзада мавриди омӯзиш ва пайравӣ қарор гирифт. Барои як шахсияти сиёсӣ хеле душвор аст, ки дар зудтарин фурсат давлати ҷангзадаро ба як кишвари ободу озод ва амну амон табдил диҳад. Сиёсатмадорони бузурге ҳам ҳастанд, ки ояндаи давлаташонро дар маърифати баланди халқашон медонанд. Сарвари давлати мо аз зумраи ҳамингуна сиёсатмадоронеанд, ки маърифати мардум, бахусус, насли нави тоҷикро омили пешрафт ва минбаъд густариш ёфтани давлати худ медонанд.

Дилбар САМАДОВА,
мудири кафедраи журналистика ва назарияи тарҷумаи
Донишгоҳи давлатии Хуҷанд ба номи академик Бобоҷон Ғафуров

Читать далее

Боғи Хоҷа Камол - макони осоиши рӯҳу тан

Субҳи барвақт. Фазои боғи истироҳатиро тумани тунуке пӯшонида. Аз сабзазорҳои дохили боғ бӯи муаттари сабзаҳо ба димоғ расида, ба тану ҷони кас роҳате мебахшад. Қатраҳои шабнами пагоҳӣ, ки дар рӯи гулҳои шукуфони гулкарами дар қадди пайроҳаҳо шинондашуда нишастааст, аз нури офтоб дурахше дорад. Ҳарчанд фасли сармост, хуршеди оламтоб нурҳои худро бедареғ ба ин мавзеъ мепошад. Ин макон - Боғи фарҳангиву фароғатии Хоҷа Камол аст…

Моҳи августи соли равон дар гулгаштҳои Боғи ба номи Камоли Хуҷандӣ ҳамроҳи наберагонам сайругашт доштему дар сӯҳбат бонуи хуҷандӣ Замира Мамадҷонова, ки чаҳор сол инҷониб дар мамлакати Туркия буд, гуфт, дар ин муддат шаҳрамон чӣ қадар обод шудааст, боғи шаҳр бошад, дар зебоиву дилрабоӣ нотакрору камназир аст… - Ин аст таассуроти як нафар тамошобини боғ…

Барҳақ, ин ҷо макони осоиши рӯҳу ҷон, сарчашмаи шифоёбии бемориҳо, ҷои истироҳату фароғат барои мардум аст, ки ҳар рӯз ҳазорон нафар аз дидани он баҳраёб мегарданд.

Оё дар ин рӯзҳои мавсими сармо низ боғ ҷои истироҳатӣ аст, мардум ба сайругашту меҳмонон барои дидан меоянд?

Мухбирамон бо ин суолҳо ба омири кулли Муассисаи давлатии Маҷмааи фарҳангию таърихии “Қалъаи Хуҷанд” Иброҳим Иброҳимов муроҷиат намуд.

-Маҷмааи фарҳангиву таърихии “Қалъаи Хуҷанд” аз се қисми таркибӣ иборат аст:- Осорхонаи таърихӣ-кишваршиносӣ ва Осорхонаи бостоншиносӣ; Боғи истироҳативу фароғатии Камоли Хуҷандӣ; Мақбараи рамзӣ ва Хона-музеи Камоли Хуҷандӣ. Ба ин ҷо ҳамчун мавзеи таърихии шаҳр аксари меҳмонон ва гурӯҳҳои сайёҳӣ ба тамошо меоянд. Дар барномаи сафари меҳмонони расмӣ аз давлатҳои хориҷа ва хориҷи дур, ки ба шаҳри Хуҷанд меоянд, албатта дидан кардан аз ин Маҷмаа ҳаст, ки ин тамоми сол давом меёбад. Меҳмонону сайёҳонро роҳбаладон, ки бо забонҳои тоҷикӣ, русӣ, англисӣ ва арабӣ сухан мекунанд, роҳнамоӣ карда, аз таърихи ин иншоотҳо шинос мегардонанд.

 Албатта, имрӯзҳо низ ба боғи фарҳангиву фароғатӣ сокинон барои тамошои сабзкориҳо, гулҳои ороишии хушнамуд, ки дар ин сардиҳо низ дар гулгаштҳои боғ шукуфон гашта, гӯё ҳусни худро намоиш медиҳанд, меоянд. Ё ки алҳол анъана шудааст ба бисёр сокинон, ки барои барқарор намудани саломатиашон меоянд. Онҳо гурӯҳ-гурӯҳ аз субҳи барвақт барои аз ҳавои тоза баҳра бурдан, ғизои рӯҳ гирифтан меоянд ва дар оромии субҳ соатҳо гаштугузор мекунанд.

Боиси хурсандист, ки соли ҷорӣ Боғи фарҳангиву фароғатии Камоли Хуҷандӣ боғи беҳтарин дар мамлакат эътироф гардид. Ва кормандон аз таҳти дил кӯшиш ба харҷ медиҳанд, ба беҳтарин будан сазовор бошанд. Зикри он ҷоиз аст, ки имрӯз таваҷҷӯҳи Мақомоти иҷроияи ҳокимияти давлатии вилоят, шахсан Раиси вилоят, мӯҳтарам Абдураҳмон Қодирӣ дар нигаҳдории боғ, дигар иншоотҳои таърихии Маҷмаа доимӣ буда, дар ҳалли тамоми масоил кӯмаку дастгирии худро дареғ намедоранд. Ин ғамхориву таваҷҷӯҳ ҳамаи масъулон ва кормандонро водор мекунад, ки ба иҷрои вазифа бо масъулияти бештар муносибат кунем.

Бояд гӯям, ки ба бисёр мамолики хориҷа сафар карда, аз ҷумла аз боғҳои истироҳатӣ дидан кардаам. Ба қарибӣ дар шаҳри Москваи Федератсияи Русия будам. Ба қавле, дар ягон мавзеи истироҳатӣ дар мавсими сармо чунин сабзкориҳо, гулпӯшу гулбасарии боғро мушоҳида накардам. Яъне, на дар ҳама минтақа низ чунин гулҳо, ки ба сармо тобовар бошанд, нашъунамо меёбанд.

Ҳарчанд боғи фарҳангиву фароғатӣ баъди азнавсозӣ аз моҳи марти соли 2015 дар хизмати мардум вогузор шудааст, ба қавле, моҳ ба моҳу сол ба сол тағйироту пешравиҳо ба назар мерасанд. Бахусус, имсол барои аҳли кормандон соли пешравиҳои назаррас буд. Аз оғози сол 90-солагии Осорхонаи таърихӣ таҷлил карда шуд, ки дар доираи ин ҷашн бо иштироки васеи олимону донишмандон чандин конфронси илмиву амалӣ сурат гирифт. Боз як иқдоми нек он буд, ки Осорхонаи бостоншиносӣ ва истеҳкомот, ки дар сӣ соли мавҷудияташ таъмир нашуда буд, таъмир, нигораҳои нодири он ба талаботи осоршиносӣ мувофиқ гардонида шуданд. Ин пешравиҳо, албатта, ба афзудани даромадҳо низ мусоидат кард. Дар хусуси теъдоди меҳмонон бошад, давоми даҳ моҳи соли равон 52058 нафар аз Маҷмаа дидан карданд. Дар рӯзи дарҳои кушод, ки ба ифтихори Рӯзи Президенти мамлакат доир карда шуд, шумораи бинандагон аз 4500 нафар зиёд буд.

Чунонки аз сӯҳбати сарвари гулпарварони боғ Абдусамад Шодибеков аён гардид, дар боғ 17 нафар боғбон буда, аксарашон бонувонанд. Дар ҳудуди боғ давоми сол гулҳои мавсимии петуня, тагес, вёла, катарантус, тоҷи хурӯс, мехчагул, вербена, гарсания, салвия, гулкарам ва дигарҳо, ҷамъ беш аз 250 ҳазор бех шинонда, парвариш карда мешавад. Ба онҳо гулпарварони чобукдаст Дилафрӯз Шерназарова, Зулфия Эргашева, Меҳринисо Топилова, Муҳаббату Дилрабо бо дастони эъҷозкорашон нигоҳубин менамоянд. Ҳоло дар гулгашту пайроҳаҳо се намуди гулкарам-сурх, сафед ва гулобӣ шинонда шудааст ва дар гармхонаи «Баҳористон»-и боғ, ки дар ҳудуди деҳаи Сомғори ноҳияи Бобоҷон Ғафуров воқест, тухми гулҳои баҳорӣ кошта шуда истодаанд.

Дар маҷмӯъ, аҳли меҳнати Маҷмаа барои истироҳати бофароғати мардуми диёр, ташаккул додани эҳсоси зебоипарастии онон ва ҳамчун макони осоиши рӯҳу тан, ба ҷои дӯстдоштаи сокинон табдил ёфтани он монда нашуда, заҳмат мекашанд.

Рафоат МӮЪМИНОВА,
“Ҳақиқати Суғд”

Читать далее

02 December 2016

Аз хушунат то муҳаббат як қадам

Ҳамасола дар тамоми ҷаҳон аз санаи 25-ноябр то 10-декабр маъракаи иттилоотии «16-рӯзи зидди зӯроварӣ» қайд мегардад, ки он ба қабули Конвенсия оид ба бартараф намудани ҳамагуна маҳдудкуниҳо нисбати занон бахшида мешавад.

Вобаста ба ин маъракаи муҳим дар Донишкадаи политехникии Донишгоҳи техникии Тоҷикистон дар шаҳри Хуҷанд чорабинии маърифативу фарҳангӣ таҳти унвони «Аз хушунат то муҳаббат як қадам» доир гардид.

Дар ин чорабинӣ устодону шогирдони донишкада, сарвари  маркази занони «Гулрухсор» Сабоҳат Бобоҷонова дар бораи омилҳои сар задани хушунат дар оила сухан ронда, таъкид доштанд, ки маҳз паст будани маърифати оиладорӣ, бетарафии аҳли ҷомеа сабаб мешавад, ки сафи пошхӯрии оилаҳо зиёд шаваду фишору тазйиқ низ аз ҷониби яке аз аъзои оила нисбат ба дигараш сар занад. Ба андешаи маърӯзакунандагон хушунат ба чанд навъ ҷудо мешавад: Равонӣ, ҷисмонӣ, ҷинсӣ, молӣ-иқтисодӣ ва ғайра, ки ҳамаи ин намудҳои хушунат дар оилаҳо дида мешавад. Меваи ин амал кӯдакони кӯча, ноболиғони моҷароҷӯю ҷинояткор, хонагурезу мактаббезор аст, ки мо ҳамарӯза онро мушоҳида мекунем.

С.Бобоҷонова доир ба мавзӯи муноқишаҳои оилавӣ, муносибати арӯсу хушдоман ва мавқеи занону духтарон дар рушди иҷтимоиёт маърӯза намуд.

Устоди донишкада, номзади илмҳои педагогӣ Хайринисо Темирова аз донишҷӯёни донишкада даъват ба амал овард, ки барои бунёди оилаҳо ҳаргиз ба шитобкорӣ роҳ надиҳанд.

Суруд дар васфи муҳаббати хонаводагӣ, саҳначае аз рӯзгори як оилаи ҷавон, рақси «Рангҳои зиндагӣ» аз ҷониби донишҷӯёни донишкада хеле хушу хотирмон буд.

Абдусабур АБДУВАҲҲОБОВ

Читать далее

Ҳадаф: дастгирии маъюбон

Филиали ташкилоти ҷамъиятии «Иттиҳодияи миллии нобиноёни Тоҷикистон» дар шаҳри Хуҷанд бо фонди байналхалқии «Абилис», ки ки аз рўи лоиҳаи «Оид ба баланд бардоштани сатҳи маърифати ҳуқуқии шахсони маъюбияти биноӣ дошта» созишнома ба имзо расонид.

Дар доираи лоиҳа  соли равон «Конститутсияи Ҷумҳурии Тоҷикистон», Қонуни Ҷумҳурии Тоҷикистон «Дар бораи ҳифзи иҷтимоии маъюбон» ва Конвенсияи СММ «Оид ба ҳуқуқи маъюбон» дона ба чоп расида ба маъюбон ройгон тақсим намуданд. Инчунин, барои студияи сабти овоз таҷҳизотҳои замонавӣ харида шуда, айни замон дар сатҳи муҷаҳҳазкунӣ қарор дорад.

Улуғбек ХУДОЙБЕРДИЕВ,
«Ҳақиқати Суғд»

Читать далее

Шунидан кай бувад монанди дидан...

Дар шумораи 139 аз 22 ноябри соли 2016-и «Ҳақиқати Суғд» таассуроти намояндагони вилояти Хатлон, Вилояти Мухтори Кўҳистони Бадахшон, шаҳри Душанбе ва шаҳру ноҳияҳои тобеи ҷумҳуриро дар бобати шиносоӣ аз рушди ҳунарҳои  қолинбофии дастӣ ва адрасу атласбофӣ дар вилояти Суғд нашр карда будем. Меҳмонон зиёд буданду таассуротҳо аз он ҳам зиёдтар. Бинобар он хостем, боз чанде аз таассуроти меҳмононро рўи саҳфаи рўзнома ҷой диҳем.

Шаҳноза Шарифова - намояндаи Кумитаи кор  бо занон ва оилаи назди Ҳукумати ҶумҳурииТоҷикистон:

- Ба ростӣ, ҳеҷ бовар надоштам, ки мардуми Суғдзамин ин қадар меҳмоннавозанд.  Аз бозе, ки тавассути  воситаҳои ахбори омма ва шабакаҳои интернетӣ  дар бораи фаъолияти марказҳои ҳунармандии мардуми вилояти Суғд огоҳ гардидам, орзу доштам, ки бо  нозукиҳои ҳунари адрасбофӣ шинос гашта, занону духтарони Душанбешаҳрро аз сеҳри ин ҳунар бохабар созам. Ҳар куҷое, ки мерафтем, ба меҳмоннавозии мардум қоил мешудем. Дар ҳақиқат, «Шунидан кай бувад монанди дидан»  гуфтани гузаштагон бесабаб набудааст. Баробари ворид шудан ба марказҳои истеҳсоли адрасу атласбофӣ сари дастгоҳи адрасбофӣ нишаста, аз ҳунармандон хоҳиш кардам, ки маро ҳунари адрасбофӣ омўзонанд. Мехостам, дар муддати кўтоҳи сафарамон ҳарчи бештар аз асрорҳои адрасбофон бохабар шавам. Ҳунари атласу адрасбофӣ нозукиҳои ба худ хос дошта, на ҳар кас аз ўҳдаи иҷрои он баромада метавонистааст.

Ҳарчанд бо душворӣ бошад ҳам, бароям муяссар гардид, ки то андозае  аз ин ҳунари аҷдодӣ бохабар бошам.

Алиҷон Тоҷиев - муовини раиси ноҳияиҚубодиён:

-Гумон мекардам, ки адрасбофӣ пешаест басо осону шавқовар. Агар чунин намешуд, ҳунармандони вилояти Суғд дар муддати фаъолияти хеш ба чунин  дастовардҳои назаррас ноил намешуданд. Баргузории Фестивали «Атлас-2016» ва таваҷҷўҳи банда ба маҳсули эҷоди ҳунармандзанони суғдӣ имкон фароҳам овард, ки бо фаъолияти онҳо аз наздик шинос шавам. Агар меҳмоннавозии ин минтақаи зархезро дар як паллаи тарозу гузорем, соҳибҳунар будани занону духтарон паллаи дигари тарозу ба ҳисоб меравад. Давоми чанд рўзи бо ҳунармандон будан кашфи асрори адрасбофӣ маро мафтун кард. Усто то омода шудани дастгоҳ бояд якчанд амалро ба иҷро расонад. Чиҳил дона захўтагириву гирдогирди давра 24 маротиба печонида, омода намудани 960 адад нах барои бофтани 60 сантиметр матоъ заминагузор буда,  насби калобачўб ба кори минбаъда вобаста аст. Мафҳумҳои ҷавз ва  ҷула, ки  васл карда, аз теғ гузаронда мешаванд, ҳарчанд ҳанўз бароям нофаҳмо аст, аммо омўхтанист.

Сабоҳат Тоҳирова - мудири бахши кор бо занон ва оилаи ноҳияи Сангвор (Тавилдара):

- Аз аҳолии беш аз 21-ҳазорнафараи ноҳияи Сангвор 10 737 нафарашон занон мебошанд. Агар даъвати моро ҳунармандони суғдӣ пазируфта, ба ноҳияи мо раванд, тамоми шароити кориро барояшон муҳайё хоҳем кард, то ин ки ба занону духтарони хонашин ҳунари волояшонро омўзонда бошанд. Тақдими матои адрас ҳамчун тўҳфа писанди ҳар яки мо буда, умед дорем, ки занону духтарони мо низ барои омўхтани ин ҳунар шавқу завқ пайдо хоҳанд кард.

Ҳарчанд меҳмонон зиёд буданду аз сафари хеш ба вилояти Суғд таассуроти бою рангин доштанд, мо бо овардани нуқтаи назари чанде аз онҳо иктифо намудем. Умед бар он мебандем, ки ҳунари волои қадимаи адрасбофӣ на танҳо дар манотиқи кишвар, балки берун аз он низ шўҳратёр гашта, ин матои пурҷило тани занону духтарони тоҷикро  басо зебанда  хоҳад буд.

Шоира САЛИМОВА,
«Ҳақиқати Суғд»

Читать далее