December 2016

22 December 2016

Ҳадафҳои барнома амалӣ мегарданд

Мақомоти иҷроияи ҳокимияти давлатии шаҳри Исфара мақолаи танқидиро таҳти унвони “Оҳи дили мардуми Шӯробро кӣ мешунавад?”, ки дар шумораи 122–юми рӯзномаи “Ҳақиқати Суғд” ба табъ расидааст, дар ҷаласаи назди раиси шаҳр бо ширкати масъулони воҳидҳои сохтории мақомоти иҷроия, роҳбарони муассисаҳои хизматрасонии шаҳр, сарварони Ҷамоати шаҳраки Шӯроб ва корхонаву ташкилотҳои дар ин шаҳрак фаъолиятдошта мавриди баррасии ҳамаҷониба қарор дод.

Дар иртибот ба ваҷҳҳои пешовардаи муаллиф бобати мавҷудияти камбудию норасоиҳо дар ҳаёти мардуми Шӯроб бояд қайд намуд, ки, мутаассифона, ин мушкилот воқеиянд ва омилҳои асосии бавуҷудойии онҳо аслан ба нобасомониҳои солҳои навадуми асри гузашта иртибот доранд.

Мавриди зикр аст, ки роҳбарияти шаҳри Исфара бо дастгирии Ҳукумати Ҷумҳурии Тоҷикистон ва Мақомоти иҷроияи ҳокимияти давлатии вилояти Суғд, дар ҳамкорӣ бо вазорату идораҳои дахлдор солҳои охир бо мақсади ҳалли масъалаву муаммоҳои дар шаҳрак ҷойдошта тадбирҳои муайянро роҳандозӣ намуда истодаанд.

Аз ҷумла, дар доираи амалигашти қарори Ҳукумати Ҷумҳурии Тоҷикистон аз 4 октябри соли 2011 “Оид ба барқарорсозӣ ва рушди иҷтимоиву иқтисодии шаҳраки Шӯроб барои солҳои 2011-2015” як қатор корҳо ба анҷом расонида шудаанд, аммо бинобар норасоии маблағҳои зарурӣ ҳамагӣ 32 дарсади нақшаи барномавӣ иҷро шудаасту халос. Умед ҳаст, ки минбаъд бо ҷудо гардидани маблағ ҳадафҳои барнома доир ба таъмини пешрафти ҳаёти иқтисодиву иҷтимоии шаҳрак ба таври мусбӣ амалӣ мегарданд.

Дар иртибот ба зарурати иҷрои барномаи зикргашта чанде қабл мутахассисони Ҷамъияти саҳҳомии “Шаҳрофар”-и шаҳри Душанбе ба Шӯроб омада, барои таҳияи нақшаи генералии шаҳрак корро оғоз намуданд. Дар сурати аз тарафи коршиносони соҳаҳои гуногуни шаҳрсозӣ баҳогузорӣ шудани лоиҳа ва аз тарафи Ҳукумати Ҷумҳурии Тоҷикистон тасдиқ гардидани он эътимод дорем, ки шаҳрак боз ҳам ободтар ва сокинонаш аз муаммоҳои мавҷуда раҳоӣ хоҳанд ёфт.

Тавре дар мақола зикр гардидааст, мушкилоти аввалиндараҷаи аҳолии Шӯроб норасоии оби нӯшокӣ маҳсуб меёбад. Зеро бо сабаби он, ки ба шоҳқубури хатти оби нӯшокии “Ворух-Шӯроб” тайи даҳсолаҳои гузашта қисме аз сокинони деҳоти Воруху Хоҷаи Аъло ва чандин деҳоти ноҳияи Боткени Ҷумҳурии Қирғизистон худсарона ҳамроҳ шудаанд, вазъи дастрасии об ба шӯробиҳо ногувор гаштааст.

Бо назардошти чунин ҳолат сохтмони хатти нави оби нӯшокии “Чорқишлоқ-Сурх-Шӯроб” оғоз шуда, алҳол корҳо дар ин самт идома доранд ва ҳамзамон, бо ба истифода додани иншооти мазкур муаммои таъминоти шаҳраки Шӯроб бо оби нӯшокиву полезӣ ҳалли мусбии худро хоҳад ёфт.

Дар алоқамандии хизматрасонии нақлиёти мусофиркашон бояд қайд намуд, ки то дирӯз фосилаи равуои микроавтобусҳо дар хатсайри “Исфара-Шӯроб” 40 дақиқаро ташкил медод ва шурӯъ аз моҳи декабр он ба 30 дақиқа табдил дода шуд.

Вобаста ба хатсайри “Шӯроб-Чоркӯҳ” зикри онро ҷоиз медонем, ки роҳи рафтуомади нақлиёт аз ҷониби Ҷумҳурии Қирғизистон баста шудааст ва ин масъала танҳо тавассути мувофиқаи тарафайн дар сатҳи роҳбарияти ҳукуматҳои ҳар ду кишвар метавонад, ҳаллу фасли хешро ёбад.

Ҳамин зайл, муаммову мушкилоти сокинони шаҳраки Шӯроб аз мадди назари роҳбарияти шаҳри Исфара дур нест ва мақомоти иҷроияи ҳокимияти давлатии шаҳри Исфара ҳамеша саъю кӯшиш ба харҷ медиҳад, ки бо истифода аз таваҷҷӯҳу ғамхориҳои пайвастаи Ҳукумати мамлакат, роҳбарияти вилояти Суғд ва имкониятҳои дохилии маҳаллӣ баҳри ободонии минбаъдаи шаҳрак, осон гардидани мушкилоти сокинони он тавассути тақвият бахшидан ба корҳои созандагию бунёдкорӣ ва ба талаботи рӯз мувофиқ намудани фаъолияти инфрасохторҳои шаҳрак тадбирҳои муҳиму чорасозро амалӣ намояд.

Ҷаъфар ҲАЙДАРЗОДА,
муовини раиси шаҳри Исфара

Читать далее

Эъҷози алла

Санаи 7-уми ноябр, яъне дар рўзи Театри тоҷик санъаткорони Театри давлатии мазҳакаи мусиқии ба номи Камоли Хуҷандии шаҳри Хуҷанд ба мухлисони худ намоишномаи нави «Алла»-ро пешкаш карданд. Ин драма аз ду қисму чаҳор намоиш иборат буда, ба қалами драматурги номии тотор Тўфон Минуллин тааллуқ дорад.

Асари саҳнавии мазкурро сарреҷиссёри театр Қурбон Бобоҷонов таҳия кардааст. Саҳнаҳоро барои намоишномаи нав саррассоми театр Fуломҷон Қосимов оро додааст. Нақшҳои асосиро дар спектакл ҳунарпешаҳо, Аълочиёни фарҳанги Ҷумҳурии Тоҷикистон Орифа Fафурова, Сурайё Хўҷаева, Озода Аҳадова, Моҳира Қандова ва Ҳунарпешаи шоистаи Ҷумҳурии Тоҷикистон Малоҳат Абдушукурова офаридаанд. Дар нақшҳои эпизодӣ бошад, Ҳунарпешаи мардумии Ҷумҳурии Тоҷикистон Зулфия Тўйчиева, Аълочии фарҳанги Ҷумҳурии Тоҷикистон Шаҳодат Ҷўраева, ҳунарпешаҳо Насиба Каримова ва Шаҳноза Юсуфова ҳунарнамоӣ мекунанд.

Ҳар як саҳнае, ки ин ҳунармандон дар он нақш меофаранд, хеле пандомўз аст, чунки онҳо масъалаи умдатарини ҷомеа-лавҳае аз ҳаёти иҷтимоии занро бо ҳама паҳлўҳояш ба тамошобин нишон медиҳанд ва зимни он ғам мехўранд, шодиву фараҳмандияшонро зоҳир менамоянду бинандаро ба ҳаяҷон меоранд.

Оре, дар ин намоишнома маҷмўи масъалаҳои иҷтимоии зан ба назар мерасад, ки он ба ҳамаи қавму миллатҳо дахл дорад. Серфарзандӣ, безурётӣ, фарзандталабӣ ва ниҳоят аз тифли навзоди худ даст кашидани зан, ки ин намоишнома ҷузъиёти онҳоро инъикос менамояд, касеро бефарқ намегузорад.

Нақши Гулфинаи серфарзандро, ки тифли дувоздаҳумашро таваллуд кардааст, ҳунарпеша Орифа Fафурова меофарад. Дар симои ў Гулфина як зани деҳотии зиндагидўст, меҳнатӣ, хайрхоҳ, нисбат ба аҳли оилаву фарзандонаш мушфиқу ғамхор менамояд. Дар айни замон, Гулфина ба ҳар як беадолативу бешафқатӣ, ки аз ҷинси латиф зоҳир мегардад, оштинопазир аст. Бинобар он, вақте ки Дилеммаи фарзандбезор аввал ба тифли навзодаш бо ҳар баҳона шир намедиҳад ва ниҳоят аз вай даст мекашад. Гулфина бо панду насиҳат оқибати ноҳинҷору бади ин кору рафторашро ба ин ҷавонзан фаҳмонданӣ мешавад, вале чун мебинад, ки суханҳояш ба Дилеммаи хунсард таъсире намебахшад, он гоҳ ба вай кинояи сахту нешдоре мезанад ва дар натиҷа байни ҳар ду моҷарои тезутунде ба амал меояд.

Нақши Дилеммаро ҳунарпеша Сурайё Хўҷаева офаридааст. Дар иҷрои ў Дилемма ҷавонзани эркатулфору якрав, худпарасту беадаб аст. Сурайё Хўҷаева дар аксар лаҳзаҳои намоишнома хомўшонаву бесухан ба тамошобин маъниҳои зиёдеро, аз он ҷумла хислатҳои бади Дилемма, ба монанди бешафқатию дилсангӣ, хунсардиву сабукандешигияшро ба хубӣ изҳор менамояд, ки ин далели рўз то рўз сайқал ёфтани малакаву маҳорати касбии ҳунарпеша мебошад.

Нақшҳои Олтинчочи яккаву танҳо, ки чашмдори шавҳаршавандааш ё ягон хешовандаш мебошад ва Валентинаи бо тифли нахустини деринтизору хуштолеъро ҳунарпешаҳо Озода Аҳадова ва Моҳира Қандова бо ҷидду ҷаҳд ва маҳорати хосса офаридаанд. Нақшҳои Нина дар иҷрои ҳунарпеша Шаҳодат Ҷўраева, Вазифа дар иҷрои Шаҳноза Юсуфова, Римма дар иҷрои ҳунарпеша Зулфия Тўйчиева табииву хотирмон ҳастанд. Алалхусус, нақши Зани ношинос, ки онро ҳунарпеша Насиба Каримова офаридааст, хеле ҳаяҷонангезу риққатовар аст. Дар лаҳзае, ки зани ношинос дар пеши духтур Айзара Аҳадовна (офарандаи ин нақш ҳунарпеша Малоҳат Абдушукурова) ба зону афтода, лобаву зорӣ мекунад, дар назари ҳар бинанда як ҷавонзани безурёти бахтбаргашта, аз кардааш пушаймону дар тангнои рўзгор ноилоҷмонда ҷилвагар мегардад, ки ин аз ҳунари хуби офарандагии Насиба Каримова дарак медиҳад. Ў, дар ҳақиқат, дар офариниши чунин нақшҳо маҳорати чашмгире дорад. Тамошобинон ҳоло ҳам дар хотир доранд, ки дар намоишномаи «Дўстиро ҷустуҷў дорем мо»-и Атахон Сайфуллоев ин актрисаи хушсалиқа нақши фаррошзан Қуроқхоларо хеле дилрабову хотирнишин офарида буд.

Дар рафти намоиши драмаи мусиқии «Алла» якчанд маротиба суруди алла бо забонҳои гуногуни мардуми дунё танинандоз мешавад, ки он рамзу нишони бузургии модар ва шукўҳу шаҳомати ўст. Оре, модар ва аллаи ў ба олам ишқу муҳаббат, раҳму шафқат, амну осоиш, рўзгори хушу хуррам ва зиндагии бардавом ато мекунад. Ин аст эъҷози меҳри модар ва аллаи ў…

Қабл аз намоиши драмаи мазкур эҷодкорони театр мазҳакаи «Қалби зан»-ро ба тамошобинони худ пешкаш карда буданд. Ин асарро драматурги ўзбек Эркин Хушвақтов навиштааст ва мавзўи он оилаву оиладорист. Одатан, чун аз ҳаёти оилавии хушдоману арўс сухан меравад, дар хаёли бисёриҳо хушдомани рашкманшаву иззатталаб ва арўси аз ҷабру ситами вай бадодомада ҷилвагар мешаванд. Аммо дар намоишномаи «Қалби зан» симои хушдоману арўс тамоман дигар аст. Дар ин спектакл хушдоман як зани ҳалиму меҳрубон, ғамхору ҳолдони келини худ мебошад. Арўси ў низ нисбат ба хушдоманаш хайрхоҳ, дилҷў ва хидматгузор аст.

Лекин рўзе мешавад, ки на арўс, балки шавҳари худи ин зан бо рафтору кирдори ноҷояе хушдоманро ба шўр меорад, сахт меранҷонад ва дар ин рўзгори чун асал ширини ин хонадон чанд фурсат айши ў хеле талх мегардад…

Драматургияи асар, ба қавли Ҳунарпешаи мардумии Ҷумҳурии Тоҷикистон Сайрам Исоева, хеле нозуку аҷоиб аст ва он тамошобинро ҳар лаҳза ба ваҷд меорад. Бо вуҷуди он, ки намоишнома дар мўҳлати хеле кўтоҳ аз ҷониби Қурбон Бобоҷонов таҳия шудааст, таҳиягар бо гурўҳи хубу мувофиқи ҳунармандон онро рўйи саҳна овардааст. Дар ҳунарнамоии санъаткорон ягон сохтакорие нест, ҳамаи онҳо нақшҳои худро содда, самимӣ ва аз таҳти дил офарида тавонистаанд.

Дар нақши Тоҳир – падари хонадон, ронандаи собиқадор Ҳунарманди шоистаи Ҷумҳурии Тоҷикистон Абдураҳмон Ашўров ниҳоят хуб ҳунарнамоӣ мекунад. Дар ҳаракату гуфтори ў оташаке ниҳон аст, ки тамошобинро ҳар лаҳза ба ҳаяҷон меорад. Нақши завҷаи вайро Аълочии фарҳанги Ҷумҳурии Тоҷикистон Замира Юлдошева ба таври бояду шояд офаридааст. Дар симои ў Зўҳро, хушдомани ин оила як зани оддиякак, вале бомаърифат, рўзгордор, меҳрубону ғамхор, насиҳатгару раҳнамои аҳли хонадон таҷассум гардидааст ва дар айни замон, дар ботину замири ин зан гоҳе мавҷи норизоиву армонҳо туғён мекунад, ҳарчанд ки худро дар моварои шавҳару фарзандон хушбахт мепиндорад. Ин эҳсосоти вайро воқеаи бо дастагули «партова» ҳадя кардани шавҳараш ошкору фош месозад.

Ҳунарнамоии Аълочии фарҳанги Ҷумҳурии Тоҷикистон Сурайё Хўҷаева мазмуну мундариҷаи намоишномаро ғанитар гардонида, руҳияи мазҳакавии онро меафзояд. Дар ҳақиқат, дар иҷрои вай Муҳаббат - духтари эркатулфори ин хонадон, ки аз шавҳари майзадааш ба дод омадааст, ниҳоят самимиву боварибахш ба ҷилва меояд.

Нақши Мурод – писари ягонаи хонадонро Аълочиёни фарҳанги ҷумҳурии Тоҷикистон Темурҷон Султонов ва Шукўҳ Иброҳимов иҷро кардаанд. Темурҷон Султонов агарчи дар саҳнаи ин театр бори нахуст нақши асосиро бозида бошад ҳам, бо қаду басти расо, нутқи бурро кўшиши зиёде ба харҷ дод, ки нақши Мурод ба тамошобин писанд ояд.

Ҳунарпеша Шукўҳ Иброҳимов низ ин нақшро ба таври худ, бо обуранги хосса ба тамошобинон манзур кард.

Нақши Лайло – наварўси оиларо Аълочии фарҳанги Ҷумҳурии Тоҷикистон Озода Аҳадова хеле хуб офарид. Дар иҷрои ў наварўси хонадон Лайло як ҷавонзани зебову фаттон, боғайрат, худкор, зиндагидўст ва ғамхору меҳрубони шавҳар ва хушдомани худ мебошад.

Ҳаминро ҳам бояд гуфт, ки саҳнаҳои ҳар ду спектаклро саррассоми театр Fуломҷон Қосимов бо завқи баланд ва дараҷаи дилхоҳи касби рассомӣ оро додааст ва он ба руҳия, ғоя ва талаботи таҳиягари асар созгоранд.

Ҳам мазҳакаи «Қалби зан» ва ҳам драмаи мусиқии «Алла» саршори бозёфтҳои эҷодии реҷиссёр ва ҳунармандони театр мебошад. Бинобар он сафи тамошобинони талабгори ин намоишномаҳо рўз то рўз афзуда истодааст. Ин спектаклҳоро аллакай мухлисони зиёди асари саҳнавӣ бо шавқу завқи афзун тамошо кардаанд.

Таъкид кардан бамаврид аст, ки дар ду-се соли охир Театри давлатии мазҳакаи мусиқии ба номи Камоли Хуҷандии шаҳри Хуҷанд бо сарварии Абдуҷамил Раҳимов ва сарреҷиссёри он Қурбон Бобоҷонов ба туфайли чунин намоишномаҳои хубу марғуб ва барномаҳои консертии тамошобоб ба комёбиҳои назаррас муваффақ шудааст ва обрўву эътибори он торафт меафзояд. Чанде пеш Сардори Раёсати фарҳанги вилоят Ориф Набиев дар оғози нахустнамоиши яке аз спектаклҳо бо ҷомеаи меҳнатии театр вохўрда, ба санъаткорон муҷда расонд, ки дар мушовараи Вазорати фарҳанги ҷумҳурӣ Театри давлатии мазҳакаи мусиқии ба номи Камоли Хуҷандӣ дар байни қариб бист театри касбии ҷумҳуриамон яке аз беҳтаринҳо ҳисобида шуда, он бо Дипломи Вазорати фарҳанг мушарраф гаштааст ва сарреҷиссёри театр Қурбон Бобоҷоновро бо Ифтихорномаи Вазорати фарҳанги Тоҷикистон мукофотонидаанд.

Сайидамин ҶИЛО,
“Ҳақиқати Суғд”

Читать далее

21 December 2016

16 рӯз алайҳи хушунат

Бо ибтикори Маркази занон дар вилояти Суғд «Гулрухсор», бахши занон ва оила, бахши ҷавонон, варзиш ва сайёҳии Мақомоти иҷроияи ҳокимияти давлатии ноҳияи Деваштич дар доираи Барномаи 16 рӯз алайҳи хушунат таҳти шиори «Ҷомеаи солим аз фардҳои ҷисман ва руҳан солим ташаккул меёбад», конференсияи ноҳиявӣ баргузор гардид. Сарвари Маркази занон дар вилояти Суғд «Гулрухсор», муовини Раиси ноҳия, узви фаъоли Кумитаи иҷроияи ҳизби Халқии Демократии Тоҷикистон дар ноҳияи Деваштич Рафоат Каримова ифтитоҳ намуда, зикр кард, ки ҳамасола дар тамоми ҷаҳон аз 25-уми ноябр то 10-уми декабр маъракаи иттилоотии «16 рӯз алайҳи хушунат нисбат ба занон» сурат мегирад, ки он дар иртибот ба «Конвенсия оиди бартараф намудани ҳама гуна маҳдудкуниҳои ҳуқуқи занон» қабул гардидааст.

Фаъолияти сохторҳои марбутаи Мақомоти иҷроияи ҳокимияти давлатии ноҳияи Деваштич бо мақсади таъмини иҷроиши Қарори ҳукумати Ҷумҳурии Тоҷикистон «Дар бораи пешгирии зӯроварӣ дар оила барои солҳои 2014-2023» ба роҳ монда шуда, самараи муфид медиҳад. Чунончӣ дар ҷамъбасти ёздаҳ моҳи соли равон дар ҳудуди ноҳия 11 ҳодисаи даст задан ба худкушӣ ба қайд гирифта шудааст, ки аз он 3 нафарашон зан мебошанд. Аз ин рӯ, бахши кор бо занон ва оила, бахши ҷавонон, варзиш ва сайёҳӣ, бахши кор бо дин, танзими анъана ва ҷашну маросимҳои миллӣ, бахши фарҳанг, шӯъбаи маориф, муассисаҳои таълимиву тандурустӣ, ташкилоти ҷамъиятӣ, ҷамоатҳои шаҳраку деҳот, кумитаи маҳаллаҳо, шӯрои занону духтарон, масҷидҳои ҷомеъ ва панҷвақта вазифадоранд, ки дар ҳамбастагӣ баҳри пешгирии ҳодисаҳои номатлуб корҳои тарғиботӣ-ташвиқотиро ба роҳ монда, муваффақ гарданд, ки сатҳи маърифати ҳуқуқии аҳолӣ баланд бардошта шавад.

 Дар чорабинӣ мавзӯъҳои «Баланд бардоштани сатҳи маърифати ҳуқуқӣ яке аз омилҳои асосии пешгирии хушунат дар оила» муовини сардори ШВКД дар ноҳия подполковник Д.Қосимов, «Сабабҳои ҷудо шудани оилаҳо, пешгирӣ, роҳҳои устуворӣ ва пойдории оилаҳо» судяи Суди ноҳия Д.Мирзоҳомидзода, «Нақши Маркази занон «Гулрухсор» дар мустаҳкамкунии оилаҳо» С.Бобоҷонова, «Модари солим, насли солим, ҷомеаи солим» духтури амрози занонаи Маркази саломатии ноҳия Х.Шокирова, «Оила аз нигоҳи дини мубини ислом» имом-хатиби масҷиди марказии ноҳия Н.Бобоҷонов баромадҳо карданд. Вобаста ба мавзӯъ ҳамчунин муовини раиси Ҷамоати деҳоти Ғазантарак Р.Ёдгорова, муовини раиси Ҷамоати деҳоти Исмоили Сомонӣ ҳ.Музаффарзода фикру андеша баён намуданд. Ин чорабинӣ барои иштироккунандагон ва ҳозирин таассуроти муфид бахшид.

Лоиқ ТӯЙЧИЕВ,
мутахассиси бахши таблиғоту иттилооти 
КИ ҲХДТ дар ноҳияи Деваштич

Читать далее

Бахшида ба соли нав санаҳои 29 ва 30 декабр ярмарка-фурӯши маҳсулоти кишоварзӣ баргузор мешавад

Ба диққати шаҳрвандон ва меҳмонони маркази вилоят расонида мешавад, ки бо ибтикори Мақомоти иҷроияи ҳокимияти давлатии вилояти Суғд бахшида ба соли нави мелодӣ санаҳои 29 ва 30 декабри соли  2016 дар Регистони Панҷшанбеи шаҳри Хуҷанд ярмарка-фурӯши маҳсулоти кишоварзӣ баргузор мегардад.

Дар ярмарка корхонаҳо ва кишоварзони шаҳру ноҳияҳои вилоят маҳсулоти гуногун, аз ҷумла картошка, пиёз, сабзӣ, гӯшт, биринҷ, равған, меваҷот, полезиҳо, маҳсулоти шириву қаннодиро нисбати нархҳои бозор аз 30 то 40 % арзон пешниҳоди сокинон менамоянд.

Оғози ярмарка - соати 08:00.

Марҳамат ба ярмарка-фурӯши маҳсулоти кишоварзӣ!

Читать далее

Адрасбофиро аз «Дугонаҳо» омӯхтам!

Дар Маркази ҳунаромӯзии «Дугонаҳо», воқеъ дар ноҳияи Бобоҷон Ғафуров тайи чанд сол аст, ки занону духтарон ҳунари атласу адрасбофӣ меомӯзанд. Чунонки огоҳ шудем, ин даргоҳ ба манбаи омода намудани мутахассисони соҳибкасб табдил ёфтаасту садҳо бонувон дар ин даргоҳ соҳибҳунар гашта, дар шаҳру деҳи худ сехҳо кушодаанд ва шогирдон тайёр мекунанд. Тавре ба мо иброз доштанд, маҳсули дастранҷи ҳунармандони марказ, ҳатто, иштирокчии намоишгоҳи чандин мамлакати ҷаҳон гаштааст.

Ба қарибӣ дар ин марказ мо, гурӯҳи бонувон аз навоҳии ҷануби кишвар ҳунаромӯзӣ намудем. Ҳоло дар ноҳияи мо-Тавилдара занону духтарон ба атласу адрасбофӣ шавқу ҳаваси беандоза пайдо кардаанд. Барои онҳо дастгоҳҳо ва тамоми шароит муҳайё аст. Каме аз ин ҳунарҳо огоҳ будам. Ин ҷо сирру асрори атласу адрасбофӣ, инчунин бофтани адраси ҳафтрангро ёд гирифтам. Акнун ният дорам, аз ин ҷо рафта, сех кушоям ва духтаронро ба омӯзиши ин ҳунарҳо ҷалб намоям.Ба қавле, зан дар хона нишинад, ҷаҳонбиниаш маҳдуд шуда монда, азбаски ноогоҳ аст, дар тарбияи фарзанд низ азоб мекашад.

Бо ҷомеа пайвастани бонувон имкон медиҳад, доираи биниши онҳо фарох гардад. Ҳамчунин, онҳо дастранҷи ҳунари худро ба фурӯш бароварда, метавонанд, сатҳи рӯзгорашонро баланд бардоранд.

Замира ФАҚИРОВА,
ҳунарманд аз ноҳияи Тавилдара

Читать далее

Мақсад: Содироти бештари маҳсулоти кишоварзӣ

... Ҳукумати мамлакат бояд тамоми монеаҳои мавӣударо дар самти содироти меваю сабзавот, аз ӣумла меваи хушк аз байн бардорад.

Эмомалӣ Раҳмон

Солҳои охир корҳои деҳқонӣ хеле назаррас гардида, на танҳо бозори истеъмолии дохилӣ, инчунин содирот ва хушккунии мева ва сабзавот низ хуб ба роҳ монда шудааст. Дарозои ёздаҳ моҳи соли равон умуман ба маблағи 401538,5 ҳазор доллари ИМА маҳсулот ба давлатҳои хориҷ интиқол гардидааст. Шарикони асосии содирот мамолики Шветсария, Қазоқистон, ӯзбекистон, Чин, Русия, Нидерландия, Туркия, Италия, Эрон ва Қирғизистон мебошанд. Дар ёздаҳ моҳи соли равон ба миқдори 37941 тонна маҳсулоти кишоварзӣ содир шудааст. Тавассути содироти маводи хӯрока ва дигар маҳсулот буҷаи давлатӣ низ ғанӣ мегардад. Заминаи чунин дастовардҳо чист? Барои ба чунин комёбӣ шарафёб гардидан чӣ корҳоро бояд анҷом дод?

Бо мақсади амалигардонии Қарори Ҳукумати Ҷумҳурии Тоҷикистон аз 30 декабри соли 2015 «Дар бораи Барномаи рушди соҳаи боғу токпарварӣ дар Ҷумҳурии Тоҷикистон барои солҳои 2016-2020» ва дар асоси он қарори Раиси вилоят аз 8 феврали соли 2016 «Дар бораи рушди соҳаи боғу токпарварӣ дар вилояти Суғд барои солҳои 2016-2020» кишоварзони вилоят як қатор тадбирҳои заруриро андешиданд. Баҳри иҷроиши қарори мазкур соли равон дар масоҳати 10 гектар бунёди боғи нави интенсивӣ дар назар дошта шуда бошад ҳам, аммо дар майдони 13 гектар он амалӣ гардид. Аз ҷумла, дар шаҳру ноҳияҳои Истаравшан дар 1 гектар, Исфара ва Бобоҷон Ғафуров ду гектарӣ, Шаҳристон се гектар ва Панҷакент панҷ гектар боғи нави интенсивӣ бунёд шуд.

Аз рӯи ҳисоботи оморӣ, кишоварзон то моҳи декабри соли равон дар масоҳати 1413 гектар боғу токзорҳои нав бунёд намуданд, ки ин 129,7 фоизи нақша мебошад.

Соли ҷорӣ дар минтақаҳои кӯҳӣ ба сабаби номусоид омадани обу ҳаво истеҳсоли мева дар шаҳру ноҳияҳои Панҷакент - 114 тонна, Айнӣ - 182 тонна, Деваштич - 359 тонна, Кӯҳистони Мастчоҳ- 3357 тонна ва дар Шаҳристон-138 тонна кам гардида бошад ҳам, умуман дар хоҷагиҳои кишовазрии вилоят ба миқдори 80,1 ҳазор тонна мева ҷамъ оварда шуд, ки нисбат ба ҳамин давраи соли 2015-ум 59,5 ҳазор тонна зиёд мебошад. Дар ин давра ҳаҷми истеҳсоли ангур низ афзудааст. Кишоварзон ба миқдори 36,7 ҳазор тонна ангур ғундоштанд, ки 108,8 фоизи нақша мебошад.

Тибқи дастуру супориши Раиси вилоят Абдураҳмон Қодирӣ, дар Ҷамоати деҳоти Чашмасори ноҳияи Бобоҷон Ғафуров дар майдони беш аз 100 гектар боғи сиёҳолу ва 20 гектар шафтолу, дар Ҷамоати деҳоти Суғдиёни ноҳияи Мастчоҳ дар майдони 68 гектар боғи сиёҳолу бунёд гардиданд.

Соли ҷорӣ деҳқонон кишт ва ғунучини пахтаро низ хуб ба роҳ монда, дар натиҷа ҳосили дилхоҳ ба даст оварданд. Имсол деҳқонони заркор ба миқдори 87,1 ҳазор тонна “тиллои сафед” ҷамъоварӣ намуданд, ки ин нисбат ба соли гузашта 10,7 ҳазор тонна зиёд мебошад. Ба ҷуз пахтакорони шаҳри Конибодом (истеҳсоли пахта нисбат ба якуми декабри соли 2015-ум 1808 тонна кам) боқимонда ноҳияҳои пахтакор зафарёб шуданд.

Боиси шодмонист, ки солҳои охир барои нигоҳ доштани сабзавот ва меваҷоти хоҷагиҳои деҳқонӣ дар аксари шаҳру навоҳии вилоят сардхонаҳо бунёд гардиданд. Алҳол дар шаҳру ноҳияҳои вилоят беш аз 22 адад сардхона бунёд гардидааст, ки ғунҷоиши онҳо аз 40 то 1000 тоннаро ташкил медиҳад. Аз рӯи маълумотҳои оморӣ, то санаи 22 ноябри соли ҷорӣ дар сардхонаҳои ҳудуди вилоят 2365 тонна маҳсулоти кишоварзӣ, аз ҷумла 1052 тонна себ, 1060 тонна ангур, 208 тонна хурмо ва 45 тонна биҳӣ захира гардидааст. Тибқи дастуру супориши Раиси вилоят, 328 адад гармхона дар вилоят фаъолият мебарад, ки аз ин 138 ададаш навъи хитоӣ мебошад. Дар ин гармхонаҳо маҳсулоти кишоварзии сабзавот, кабудӣ ва лимӯ парвариш намуда, то санаи якуми декабри соли равон 65,5 тонна маҳсулот ҷамъоварӣ карда шуд.

Минбаъд кишоварзон ва соҳибкорон метавонанд, аз ин маҳсулоти ҷамъоваринамуда дар асоси талаботи бозори истеъмолии хориҷ мева ва сабзавот содир намоянд. Дар асоси дастуру супориши Асосгузори сулҳу Ваҳдати миллӣ – Пешвои миллат, Президенти мамлакат, мӯҳтарам Эмомалӣ Раҳмон ва Раиси вилоят Абдураҳмон Қодирӣ, бо мақсади таъмингардонии бозори истеъмолӣ ва амалигардонии содирот дар майдони 1104 гектар кишти пиёзи барвақтӣ гузаронда шуд. Маблағи умумии содироти маҳсулоти хоҷагии деҳқонӣ дарозои ёздаҳ моҳи соли равон беш аз 47,7 миллион доллари амрикоиро ташкил дод. Дар ин давра пиёз – 80,5 ҳазор тонна, мева беш аз 45,5 ҳазор тонна, тамоку 44 тонна, консерва 466 тонна ва нахи пахта 22975 тонна ба давлатҳои хориҷ содир карда шуд. Боиси хушнудист, ки чанд сол инҷониб тармеваҳо бо усули хушккунӣ аз ҷониби соҳибкорони ватанӣ ба хориҷ содир шуда истодааст. Айни ҳол дар вилоят 18 корхонаи коркарди мева фаъолият мебарад. То санаи якуми декабри соли равон 2,1 ҳазор тонна меваи хушк коркард шудааст, ки нисбат ба соли гузашта 600 тонна зиёд буда, 139,5 фоизи нақшаро дар бар мегирад. Корхонаҳои коркарди меваи хушк дар шаҳру ноҳияҳои Исфара, Хуҷанд, Панҷакент, Конибодом, Ашт, Бобоҷон Ғафуров амал карда истодаанд. Имсол ҶДММ «Баракат» 376,9 тонна, ҶДММ «Исфара-фут» 288 тонна, ҶДММ «Оро Исфара» 272 тонна, ҶДММ «Меваи Канд» 168 тонна меваи хушкро содир намуданд. Инчунин, коргоҳҳо ба консервкунии маҳсулоти кишоварзӣ машғул буда, соли равон ҶДММ «Субҳи Ватан» ба миқдори 1 миллиону 503,7 қуттии шартӣ, заводи консервбарории ба номи Ҳасанов - 2 миллиону 918,4 қуттии шартӣ, ҶММ «Сирдарё» - 485,18 ҳазор қуттии шартиро ба давлатҳои хориҷ содирот намуданд. Умуман, дар сатҳи вилоят меваи хушк ба миқдори 37941 тонна содир шудааст.

Дар самти содироти мева ва сабзавот соҳибкорон, намояндагони корхонаҳои коркард ва истеҳсол, истгоҳҳои роҳи оҳани Спитамен, Ҷаббор Расулов, Хуҷанд, Маҳрам, Конибодом ва Деваштич, Маркази “Тоҷикстандарт” дар вилояти Суғд, бахши Хадамоти назорати давлатии фитосанитарӣ ва карантини растаниҳо дар вилоят ва дигарон вазифадоранд, ки маҳсулоти кишоварзӣ сари вақт ва бемамониат ба дигар давлатҳо интиқол карда шавад.

Тавҳида ҶӮРАЕВА,
«Ҳақиқати Суғд»

Читать далее

Шиносоии Раиси вилоят бо ҷараёни сохтмони корхонаи металлургӣ дар шаҳри Истиқлол

Дирӯз Раиси вилояти Суғд Абдураҳмон Қодирӣ бо мақсади шиносоӣ бо ҷараёни корҳои сохтмонии корхонаи металлургӣ ба шаҳри Истиқлол сафари корӣ анҷом дод.

Дар оғози сафар Раиси вилоят бо нақшаи схематикии минтақаи саноатии Тоҷикистону Чин дар шаҳри Истиқлол шинос шуд.

Тавре аён гардид айни замон барои иҷрои корҳои сохтмонӣ 130 нафар мутахассисон ва сохтмончиён машғули кор ҳастанд.

Читать далее

Абдураҳмон Қодирӣ сафири Белорус дар Тоҷикистонро ба ҳузур пазируфт

Дирӯз, сешанбеи 20 декабр Раиси вилояти Суғд Абдураҳмон Қодирӣ сафири Фавқулода ва Мухтори Ҷумҳурии Белорус дар Ҷумҳурии Тоҷикистон Олег Ивановро ба ҳузур пазируфт.

Зимни мулоқот ҷонибҳо бо қаноатмандӣ изҳор доштанд, ки ҳамкориҳои судманд дар соҳаҳои гуногун миёни Тоҷикистону Белорус беш аз пеш тақвият меёбанд.

Читать далее

20 December 2016

ПАДАР, маро кино баред!

Бо ташаббус ва дастгирии бевоситаи Раиси вилоят, мӯҳтарам Абдураҳмон Қодирӣ дар вилояти Суғд фазои созандае барои рушди синамои тоҷик муҳайё шудааст. Таъсиси Муассисаи давлатии “Суғдсинамо” ба номи Комил Ёрматов далели бебаҳси ин гуфтаҳост. Киностудияи мазкур давоми як сол се филмро ба навор гирифт, ки мақбули тамошобинони тоҷик гашт. Айни замон “Суғдсинамо” филми наверо бо номи “Тангно” ба навор гирифта истодааст, ки гузоришеро аз ҷараёни сабти филм пешкаши хонандагон мегардонем.

Ривояти “Суғдсинамо” дар Амондара

Ассалому алайкум, додо! Ҳоло аниқ намедонам, ки Шумо дар кадом шаҳр муҳоҷири меҳнатӣ ҳастед. Аммо аниқ медонам, ки барои писартӯйии ман маблағ ҷамъ мекунед. Ман ҳоло дар Амондара. Ин ҷо амакҳои ҳунарманд аз “Суғдсинамо” дар бораи ман Армон филм ба навор мегиранд. Дар такя ба романи Нависандаи Халқии Тоҷикистон Сорбон “Тангнои гетӣ” аз рӯи филмномаи “Тангно”-и Бахтиёр Каримов коргардони ҷавон Муҳиддини Музаффар дар чодари хаёли синамо қиссаи маро ба тасвир мекашад. Имрӯз ба тими таҳиягарони “Тангно” рӯзноманигоре шарик шуд, то аз заҳмати синамогарони “Суғдсинамо” мақолае нависад ва ман тасмим гирифтам, ки мактуби худро тавассути ҳамин журналист ба Шумо расонам.

Озмуни ҳунарпешагон дар Хуҷанду.... интихоби маркабҳо дар Амондара

Айни гармои саратони соли 2016 дар Хуҷанд озмуни интихоби ҳунарпешагон, ба истилоҳи синамо “Кастинг”, бештар аз 400 нафар ҳаваскорони санъати синаморо аз гӯшаю канори вилояти Суғд атрофи “Суғдсинамо” ҷамъ намуд. Дастаи созандагони филми “Тангно” бо роҳбарии Муҳиддини Музаффар бо иштирокчиёни озмун, ки аз 6-сола то 60-сола буданд, як ба як сӯҳбат карда, тавассути бозидани саҳна маҳорати эшонро дар тарозуи ҳунари синамо месанҷиданд. Ҳамвора дар Қасри фарҳанги шаҳри Панҷакент ҳам байни ҳаводорони бозӣ дар синамо кастинг доир гардид. Аз ғалбери коргардони филм танҳо дувоздаҳ нафар барои иштирок дар филм гузаштанд, ки Армон ҳам дар ин саф буд.

Ба зиммаи ёварони коргардон Темури Султон ва Кароматуллоҳи Нор гузаронидани кастинги маркабҳо (харҳо) дар деҳаи Амондараи шаҳри Панҷакент вогузошта шуда буд. Маркабҳои довталаби дар синамо нақш бозидан кам набуданд. Ин ҷо маркабҳоро бештар ба номи соҳибонашон мешиносанд. Ана хари Абдуғаффор, хари Носир, хари Исмат, хари Умриддин, хари Бегимхола ва даҳҳо харҳои дигар бо тӯқумҳои зебо лаҷом ба дасти соҳибони худ навбати ғамзакунӣ назди дастгоҳи наворбардорӣ доштанд. Дар маҷмӯъ, 8 маркаб ба нақшҳои марказӣ, 4 маркаб барои нақшҳои умумӣ ва 2 маркаб ҳамчун борбардори гурӯҳи маъмурии филм интихоб шуд.

Ҳатто як рӯзи наворгирӣ хари Армон гурехта, паси кӯҳ рафт. Аз он рӯз пас маркабҳоро низ шабона назди гурӯҳи синамогарон ҷой доданд....

Оши Панҷакент дар хонаи Сорбон

 Барои гурӯҳи таҳиягарони филми “Тангно” дар ҳавлии сердолу дарахти нависанда Сорбон манзили хоб додаанд, ки дар оғӯши кӯҳсори Амондара маъво гирифтааст. Ин табиати дилфиреб ҳар нафари эҷодкорро бетараф намегузорад. Фаридуни равшандиҳанда ба қафасҳои худ дом гузошта, саъба меқападу Тоҳири рассом манзараи кӯҳистонро ба тасвир мекашад.

 Дар паҳлӯи хонаи Сорбон осоишгоҳи “Санги сипар” амал мекунад, ки тиҳӣ аз сайёҳон аст. Аз афташ, соҳибмулкони нав ғофил аз олами ҳангомасозӣ ҳастанд, ки мизоҷони навро барои истироҳат ҷалб намоянд.

 Рӯи ҳавлӣ зирбаки оши палави акаи Мисбоҳиддин дар ҷӯш аст. Пас аз тановули палави Панҷакент аҳли гурӯҳро фаъолияти пурҷӯшу хурӯши синамо интизор аст.

-Ҳар лаҳзаи рӯзи офтобӣ ғанимат аст,- мегӯяд ёвари коргардон Темури Султон, - мо аз сентябр боз инҷоем ва имсол охири ноябр барф борида, саҳнаҳои тобистонаи моро ба зимистон табдил дод.

Саҳнаҳои сабз дар фасли хазонрез

 Тоҳири Назар рассом-таҳиягари филм ҳанӯз августи соли 2015 назди Тути калони Амондара саҳнаи чойхона, сартарошхона, мағоза, нонвойхона, пули чӯбин, чархак сохта, майдони сабтро омода намуд. Давоми ду моҳ маркази деҳа ба шаҳраки синамо табдил ёфт. Чун ҳодисаҳои филм айёми тобистон мегузарад, бо вуҷуди фаро расидани тирамоҳ рассом кӯшиш мекард, ки дар саҳна ҳама бо либоси тунук ва дарахтон сабз бошанд. Дар интихоби либос, саҳна, равшанӣ, ҳаракати мавзуни ҳунарпешагон ва ҳатто тарзи талаффузи калимаҳо аҳли гурӯҳи эҷодӣ бо роҳбарии Муҳиддини Музаффар заҳмати зиёд мекашанд.

Нақши харидор кори саҳл набудааст...

 Инак, саҳнаи бозори Амондара омода шуд. Армони кӯдак барои пасандози роҳкиро ва тӯяш аробакашӣ мекунад. Дар қатори дигар иштирокчиёни саҳнаи умумӣ коргадони филм ба мани рӯзноманигор офаридани нақши харидорро бовар мекунад. Як халта пиёзро харида, нигоҳам ба Армони аробакаш меафтад, ки омода аст ба ивази 1 сомонӣ бо велосипеди худ халтаи пиёзро то назди мошинам барад. Шумо бовар мекунед, ки барои наворгирии ҳамин як саҳна ду рӯзи мо дар бозор сарф шуд.

-Омодагӣ! Мотор! Рафтем!- амр медиҳад коргардон ва паси дастгоҳи наворбардорӣ мегузарад.

Саҳнаи бозор. Равуои одамон. Баҳси харидору фурӯшанда. Армон ва ҳамсолони ӯ бо велосипеду харароба “Бор ҳаймӣ?!” гӯён дар бозор фарёд мезананд. Мани харидор як халта пиёзро ба велосипеди Армон бор карда, аз байни анбӯҳи харидорон аз бозор берун мешавам.

-Стоп! – фарёд мезанад коргардон, - о, чаро ҷомаи худро накашидед?

Воқеан ҳам ман бо ҷомаву қаҳрамони марказии филм Армон бо либоси тунук. Тамошобини зирак пай мебарад, ки ин саҳна на дар тобистон, балки тирамоҳ наворбардорӣ шудааст.

Ҷомаро бадар мекунам ва ба саҳнаи дуюм омода мешавем.

-Ҳама ба ҷойҳои пешинаи худ!-амр медиҳад ёвари коргардон. Аз сари нав халтаи пиёзро аз велосипед гирифта, назди харидор мегузорам.

-Омодагӣ! Мотор! Рафтем! - амр медиҳад коргардон ва паси дастгоҳи наворбардорӣ мегузарад.

Такрори саҳнаи аввал. Аммо боз фарёди коргардон боло мешавад: “Стоп!”

- О, ту чаро ба камера нигоҳ мекунӣ-а? – як наврасро сарзаниш мекунад наворбардор Комилҷон.

- Ҳамон нафарони дар қафобуда Шумо ҳам ба савдо машғул шавед охир, на мисли тамошобин рост истода... - таъкид мекунад коргардон.

- Илтимос, ба тоҷикӣ хуб ҳарф зада, савдо кунед,- хоҳиш мекунад садобардор, - овози зинда сабт мешавад.

Саҳнаи навори бозор маротибаи сеюм ҳам бо нидои “Стоп!” қатъ мегардад. Ин дафъа кадоме бо либоси зимистона дар саҳна намудор ва ду духтар бо табассум ба сӯи наворбардор нигоҳ кардаанд.

-Канӣ, ҳа, шитоб мекунем, - даъват мекунад коргардон,-офтоб ба ғуруб меравад.

Ниҳоят ин саҳна ба навор гирифта мешаваду лаҳзаи аз велосипед халтаи пиёзро гирифта, ба мошин гузоштанам ба рӯзи дигар мононда мешавад.

Ду сӯиқасд ба ҷон дар як тӯй

Рӯзи наворгирии саҳнаи тӯй тибқи филмнома Армон қаҳр карда, дар лаби дарё қасди худкушӣ мекунад. Ҳама мубталои наворгирӣ ва ин замон духтаре аз Амондара ба қуллаи кӯҳ баромада, қасди худкушӣ мекунад. Нахуст ӯро чун як тамошобин мепиндоранд, вале дертар авзои ноҷой ва ҳаракатҳои худкушии ӯро дида, ҳама паи халос кардани духтар мешаванд. Аён шуд, ки он духтар бо падари худ моҷаро карда, қасди худкушӣ намудааст.

 Аз ин пас дар майдони сабт ва берун аз он шахсони тасодуфиро роҳ намедоданд, то касе дар рафти навор осеб наёбад.

 Умарҷон Сатторови ҳунарпеша мегӯяд, ҳар боре дар лаҳзаи ошхӯрӣ ба иштиҳо даст ба даҳон мебурданд, амри “Стоп”-и коргардон боло мешуд ва табақҳоро аз назди дастархон мебурданд. Ба мисли Умарҷон дигар иштирокчиёни саҳнаи тӯй низ аз навори такрор ба такрори як саҳна хулоса бароварданд, ки барои нони санъаткориро хӯрдан дандони оҳанин лозим.

Офтоб ҳасту соя нест....

Барои саҳнаҳои умумӣ бештар сокинони маҳаллӣ ҷалб мешуданд. Аммо иштироки эшон дар филмбардорӣ фаъол набуд. Бештар хонандагони синфҳои болоии мактаби деҳаи Амондара ҷалб мешуданд. Аммо аз нигоҳи созандагони филм дар саҳнаҳои умумӣ ба таври сояҳо бояд нафарони синну соли гуногун иштирок намоянд. Дар ин маврид директори филм Осим Орифзода бо роҳбарони ҷамоатҳо тадбирҳои маърифатӣ гузаронида, пиру барноро ба майдони сабт ҷалб менамуд.

-Қаҳрамони марказии филм офтоб бошад, - шарҳ дод коргардон Муҳиддини Музаффар, - пас нафарони саҳнаҳои умумӣ шабеҳи сояҳо мебошанд, ки наворро пурра месозанд.

Воқеан ҳам дар саҳнаи умумӣ як худи қаҳрамон мисли офтоби бесоя танҳост.

Даллолу шоира: тарозуи ҳунар ба дасти кист?

 Аҳлиддини Шариф ҳунарпешаи театри “Аҳорун”, ба иҷрои нақши марказии Даллол ва Сурайёи Ҳаким шоира ва рӯзноманигор ба нақши Розия ҷалб шудаанд. Яке чун актёри касбӣ аз ҳад зиёд вориди образ мешуду дигаре чун ҳаваскори санъат бояд барои дар сатҳи профессионалӣ нақш бозидан талошҳои зиёд мекард. Рисолати коргардон ҳам чунин буд, ки ҳамин тавозунро дар тарозуи ҳунар нигоҳ дорад. Зимнан, дар филми ҳунарии “Тангно” тақрибан 80 фоиз ҳаваскорони санъат ва 20 фоиз ҳунарпешагони касбӣ ҷалб шудаанд. Нафари огоҳ аз олами синамо ин рақамҳоро қиёс намуда, хулоса мекунад: каппаи реҷиссёр дуд кард. Бале, такрор ба такрор навор гирифтани як саҳнаи кӯчак аз он гувоҳӣ медиҳад, ки коргардони филм хуни дил мехӯрад. Ба мисле, ки таваллуди фарзандро мушоҳида мекунӣ, таваллуди синамо ҳам чунин дардомез аст.

Армону Амондара: пули машъалафрӯз

Барзин, Рӯдакӣ, Неру....набераҳои нависанда Сорбон ҳам дар ҳайати тими Темури Султон ҳастанд, ки ба кӯчактарин кор ёвари гурӯҳи филмбардорон мешаванд. Дили беғаши кӯдакон ба мазмуни филм оҳанги ҷолиб ато мекунад. Бале, ин кӯдакон паёмбарони қиссаи филмбардории “Тангно” ба 50-солаҳои дигар ҳастанд ва аминам, ки дар Амондара ба тифлакони навзод дар пайравӣ ба номи қаҳрамони марказӣ Армон ном мегузоранд.

 Ва боз солҳои дигар пулҳои майдони сабт болои наҳри Амондара барои ин мардум ва сайёҳон адои хизмат мекунад. Шояд ҳангомасозони осоишгоҳи “Санги сипар” номи филми “Тангно”-ро парчами рекламаи худ карда, сайёҳони хориҷиро ҷалб мекунанд. Бошад, то ин мавзеи кӯҳистон ба саҷдагоҳи аҳли фарҳанг табдил ёбад.

Медонам, пас аз рафтани гурӯҳи эҷодӣ нерӯи барқро хомӯш мекунанд. Аммо, муҳим дар қалби ҳазорҳо пиру барнои Амондара машъали “Суғдсинамо” фурӯзон шуд....

Чаро билети кино намехарем?

 Солҳои салтанати шӯравӣ ягона толори синамои “Гулистон” дар маркази шаҳри Конибодом ҳангоми намоиши филмҳои ҳиндӣ ончунон серодам мешуд, ки дарёфти билети кино ба осонӣ даст намедод. Тамошобин давоми дуним соат дар толор нишаста, базавқ филм тамошо мекарду мерафт. Аммо аз заҳмати синамогарон, ки ҳамагӣ ба 40 ё 50 тини шӯравӣ подош додем, аксарият ғофил буданд. Асрори синамогарӣ ҳам чандон фош намешуд...

Инак, завқи тамошои паси чодари хаёли синамо боло мегираду роҳи майдони сабт дар Амондараи Панҷакентро пеш мегирам. Таксиронҳо аз Хуҷанд то Панҷакент ба ивази 90-100 сомонӣ бурданӣ мешаванд.

-Роҳкирои арзонро аз инҳо мунтазир нашавед, - мегӯяд продюсери “Суғдсинамо” Дилошӯби Орифзода,- гумон мекунанд, ки Шумо аз аҳли синамо бошед, киссаатон пури пул ва одатан пас аз нисфирӯзӣ нархро ба осмон мебардоранд.

-Рафтем, бо мошини худам мебарам,- гуфт Дилошӯбе, ки ба иллати беморӣ дар оташи таб месӯхт.

-Дилошӯб, о, ҳарорати бадан аз 37 гузаштаасту паси чанбари мошин чӣ хел мешинед? - ҳайратзада суол медиҳам.

-Боке нест, о, Шумо ҳам шаҳодатномаи ронандагӣ доредку,- пешниҳод намуд Дилошӯб ва мошини мо роҳи Панҷакентро пеш гирифт.

Дилошӯб Орифзода продюсери филм мегӯяд, ки ба дараҷаи кофӣ набудани маблағ боиси мушкилоти ҷалби нафарони ҳаваскор ба синамо мегардад. Чунки ҳар рӯз барои харҷи нақлиёт, таом, ҷои хоб, ороиши саҳна, либосҳои актёрон, иҷораи таҷҳизоти техникӣ маблағи зиёд сарф мешавад. Подоши заҳмати ҳунарпешагон ва гурӯҳи эҷодию техникӣ тибқи шартнома пардохта мешавад. Хуллас, барои навори як филми ҳунарӣ бештар аз 200-250 ҳазор сомонӣ масраф мешавад. Табиист, ки танҳо бо фурӯши дискҳо хароҷот пӯшонида намешавад. Чунки як тӯдаи риёкорони қаллоб нусхаи аслии филмро гирифта, ба ҳазорҳо диск нусхабардорӣ мекунанд ва бе иҷозати созандагони филм нусхаҳои пастсифати филмро ба фурӯш мебароранд. Аз ин рӯ, айни замон ягона роҳ намоиши филм дар толори синамо ва ё ҷалби рекламадиҳандаҳои калон харҷи филмбардориро пӯшида метавонад.

Дуруст аст, ки қадамҳои нахустини Муассисаи давлатии “Суғдсинамо” ба номи Комил Ёрматовро Мақомоти иҷроияи ҳокимияти давлатии вилояти Суғд дастгирӣ менамояд. Таъмини шабонарӯзии қувваи барқ дар Амондара ва то қадри имкон дастрас намудани нақлиёт, таъмини сокинону хонандагон дар майдони сабт ва амсоли ин аз дастгирии мақомоти маҳаллӣ гувоҳӣ медиҳад.

Аммо ин ҷо худи тамошобини хушзавқ бояд филмсозони ватаниро дастгирӣ намояд. Даҳ сол пеш шиква мекардем, ки чун филмсозони маҳаллӣ маҳсулот надоранд, филмҳои хориҷӣ бозорро пур карда, тафаккури бегонаро дар шуури мо ҷой мекунанд. Ҳамоно ба ивази 3 сомонӣ филмҳои пастсифатро харидорӣ намуда, киссаи амакҳои асардуздро пур мекунему барои тамошои филми маҳаллӣ 5-10 сомонии худро дареғ медорем.

Саёҳати фарҳангӣ ба олами синамо

-Барои қадрёбии заҳмати созандагони филм бояд бештар саёҳати фарҳангӣ ба майдони сабт намуд,- пешниҳод дорад Осим Орифзода-директори филми “Тангно”,- то аз наздик ба гарду ғубор, дарду доғ ва мушкилоти филмсозон воқиф шаванд.

Ҳамин аст, ки коргардони филм Муҳиддини Музаффар муҳосиби “Суғдсинамо” Муяссара Усмоноваро ба майдони сабт даъват намудааст, ки аз наздик бо заҳмати аҳли синамо ошно шавад. Пас аз ду рӯзи тамошои заҳмати паси синамо муҳосиб майдони сабтро тарк намуд ва минбаъд дар рӯихати маошгирон номи ҳунарпешагонро ба ҳарфи калон менависад.

 Дуруст аст, ки давоми 3 моҳи наворбардории филми “Тангно” аз майдони сабт Раиси вилояти Суғд Абдураҳмон Қодирӣ ва раисони шаҳрҳои Панҷакенту Конибодом боздид намуданд.

Ташкили пресс-тур (сафари аҳли қалам) низ бамаврид мебуд. Танҳо нависанда Сорбон ташриф овард ва ба аҳли гурӯҳ арзи сипос ва дасти мадад дароз намуд.

P.S. Охирсухани Армон

Додо, журналист ҳам аз чангу ҷанги синамо сер шуд ва тарки Амондара мекунад. Мо чандкаса мошини ягонаи гурӯҳи эҷодиро тела медиҳем, то муҳаррикаш ба кор дарояд ва ронанда - Сӯҳроб амаки журналистамро то мавзеи Дупула - шоҳроҳи Панҷакент-Душанбе барад. Охир, ман бо харам то кай ба Дупула мерасам, вақте мошин ҳаст, кӯҳна бошад ҳам. Ана ҳамин хел сангин аст заҳмати синамогарон. Аз ин рӯ, маро кино баред, тамошо, додо, пулро дареғ надоред... Номаро ба кисаи амаки рӯзноманигорам гузоштам...

Бо эҳтиром Армони Шумо. Амондара
Зайнуддин Орифӣ,
узви Иттифоқи журналистон,
Конибодом-Панҷакент-Конибодом,
ноябри соли 2016

Читать далее

Дастоварди беназири ангиштканони вилоят

“Татбиқи сиёсати пешгирифтаи Ҳукумат дар соҳаи саноати истихроҷ ва коркард нишон дод, ки вобастагии иқтисодии кишварро аз воридоти ангишт, семент ва дигар навъҳои масолеҳи сохтмон бартараф кардан ва барои содироти минбаъдаи онҳо замина фароҳам овардан мумкин аст”.

Аз Паёми Президенти
мамлакат ба Маҷлиси Олии
Ҷумҳурии Тоҷикистон

Ангиштканони вилоят соли равон истихроҷи ангиштро ба 1,1 миллион тонна расониданд, ки дар таърихи соҳибистиқлолии кишвар беназир аст.

Дар натиҷаи роҳандозӣ намудани тадбирҳои судманд солҳои охир рушди соҳаи саноат дар вилоят таъмин гардида, нишондиҳандаҳои соҳа афзун мегарданд. Чунончӣ, давоми ёздаҳ моҳи соли ҷорӣ ҳаҷми истеҳсоли маҳсулоти саноатӣ дар вилоят ба 6,2 млрд. сомонӣ расонида шуд, ки нисбат ба ҳамин давраи соли гузашта 2,0 млрд. сомонӣ зиёд буда, суръати афзоиш 139,1 фоизро ташкил медиҳад.

Дар ин давра дар вилоят 90 корхонаву коргоҳҳои нав бо 2460 ҷойи нави корӣ ба фаъолият шурӯъ намуданд, ки асосан корхонаҳои саноати истеҳсоли масолеҳи сохтмон, хӯрокворӣ ва сабукро дар бар гирифта, барои таъмини бозори дохилӣ бо маҳсулоти истеҳсоли ватанӣ ва воридотивазкунанда мусоидат намуданд.

Яке аз дастовардҳои соҳаи саноати вилоят ин зиёд намудани истеҳсоли ангишт дар соли равон мебошад. Ангиштканони вилоят дар ин давра истихроҷи ангиштро ба 1,1 миллион тонна расониданд, ки дар таърихи соҳа беназир мебошад. Танҳо кони ангишти “Фон – Яғноб” истеҳсоли ангиштро ба 616, 6 ҳазор тонна расонид. Ҳамин тариқ, дар конҳои ангишти вилоят - “Талко - ресурс” 329, 2 ҳазор тонна, комбинати металлургии тоҷик 93, 5 ҳазор тонна, кони ангишти Шӯроб 46,5 ҳазор тонна ангишти босифат истеҳсол карда шудааст.

Алҳол дар вилоят беш аз 80 корхонаи саноатӣ, аз ҷумла корхонаҳои “Хуаксин Fаюр Суғдсемент”, “Нафтрасон”, коргоҳҳои истеҳсоли консерв ва хиштбарорӣ фаъолияти худро бо истифодаи ангишт ба роҳ мондаанд.

Бо супориши Президенти мамлакат дар раванди истеҳсолоти саноатӣ истифодаи ангишт сол то сол зиёд мегардад. Зикр бояд намуд, ки ангишт яке аз сарватҳои табиии мамлакати соҳибистиқлоламон буда, захираи воқеии он дар кишвар аз 4,5 миллиард то 7 миллиард тоннаро ташкил медиҳад.

Хабарнигори
 “Ҳақиқати Суғд”

Читать далее