December 2016

20 December 2016

Шаҳноза Ҳомидова

Шаҳноза Ҳомидова Рустамовна

мухбири шӯъбаи иҷтимоӣ

 

 

 

 

 

 

 

 

Читать далее

Пойдорсозии бузургтарин арзишҳои башарӣ

Дар Иҷлосияи ХVI Шӯрои Олӣ масоили самтҳои асосӣ оид ба мустаҳкамкунии Истиқлолияти миллӣ ва гузоштани қадамҳои устувор оид ба таъсиси давлати ҳуқуқбунёд, демократӣ, ягона ва дунявӣ замина гузошта шуд, ки мустаҳкамкунии бунёди ин асосҳои сохтори конститутсионӣ ва давлати миллӣ бо шахсияти Асосгузори сулҳу Ваҳдат - Пешвои миллат, Президенти Ҷумҳурии Тоҷикистон Эмомалӣ Раҳмон алоқаманд мебошад. Он кас тавонистанд, дар муддати кӯтоҳ ба боварии халқ сазовор гардида, фаъолияти худро баҳри таҳкими сулҳ, осоиштагии кишвар, ҳаллу фасли масоили сиёсӣ, иҷтимоӣ, иқтисодӣ ва фарҳангӣ равона намоянд.

Дар ин Иҷлосияи таърихӣ фарзанди фарзонаи миллати тоҷик Эмомалӣ Раҳмон раиси Шӯрои Олии Тоҷикистон интихоб шуда, суханҳои аввалинашон «Ман кори худро аз сулҳ оғоз хоҳам кард…» буд, ки оғози корнамоиҳо ва ҷонбозиҳои Сарвари давлатамон дар роҳи пурпечутоби расидан ба сулҳу ваҳдат ва берун овардани Тоҷикистон аз вартаи ҳалокат буд. Пас аз Иҷлосияи ХVI Шӯрои Олии Тоҷикистон дар таърихи навини кишварамон марҳалаи нав – давраи таърихию тақдирсози таҳкими Истиқлолияти миллӣ ва бунёди давлату давлатдории миллии тоҷикон оғоз ёфт, ки маҳсули сарнавиштсози он ба имзо расидани Созишномаи умумии истиқрори сулҳ ва ризоияти миллӣ дар Тоҷикистон мебошад. Ҳар як саҳифаи таърихи Ватанамон пас аз Иҷлосияи тақдирсоз ба номи меъмори сулҳу ваҳдат, кафили рушду нумӯи Тоҷикистон, бо шахсияти Пешвои миллат, Президенти ҷумҳурӣ Эмомалӣ Раҳмон вобаста аст, зеро ки сархати сиёсати хирадмандона ва боадолатонаи Cарвари давлатамон аз Иҷлосияи таърихии ХVI Шӯрои Олии Тоҷикистон то имрӯз баҳри ягонагии Тоҷикистон, ваҳдати халқҳои он, таҳкими сулҳу бародарӣ, мустаҳкамкунии давлати соҳибихтиёри миллӣ, демократӣ, хуқуқбунёд, дунявию ягона равона гардидааст.

Дар бунёди давлати миллӣ қабулшавии Конститутсия дар соли 1994 мавқеи муҳимеро дорад. Маҳз Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон чунин қайд менамоянд, ки Конститутсияи нави Тоҷикистони соҳибихтиёр ин санади ҳуқуқӣ, сиёсӣ ва таърихиест, ки қувваи олии ҳуқуқиро доро буда, дар он манфиату иродаи халқу давлат таҷассум ёфта, таҳкурсии ҳуқуқии ҷамъият эътироф карда шудааст, он дастовардҳои миллӣ, муқаддасоти миллӣ, андешаи давлатдории миллӣ, истифода ва татбиқи васеи анъанаҳо ва осори таърихии миллӣ ва волоияти қонунро таъмин менамояд.

Аз ҷониби Пешвои миллат Эмомалӣ Раҳмон баҳри бунёди давлати миллӣ дар даврони соҳибихтиёрӣ як зумра корҳои намоёне амалӣ гардидаанд, аз ҷумла:

-бунёди давлати миллии демократӣ, ҳуқуқбунёд, дунявӣ ва ягона;

-ташкил ва ба роҳ мондани фаъолияти мӯътадили ҳокимияти конститутсионӣ дар Ҷумҳурии Тоҷикистон;

-қабул ва ташаккули Конститутсияи давлати соҳибихтиёр ва инкишофи рукнҳои давлатдории миллӣ тибқи он;

-ҷаҳонишавии падидаҳои муҳими миллӣ, ҳуқуқӣ ва давлатӣ, аз ҷумла ислоҳоти қонунгузории Ҷумҳурии Тоҷикистон ва дар он мустаҳкам кардани манфиати миллӣ;

-ҷавобгӯ кардани санадҳои меъёриву ҳуқуқӣ ба талаботҳои байналмилалӣ ва эътирофи арзиши олии ҳуқуқ ва озодиҳои инсон ва шаҳрванд;

-таъсиси парлумони касбии доимоамалкунанда ва инкишофи институти парламентаризм дар Ҷумҳурии Тоҷикистон;

-таъсиси ниҳодҳои нави давлатӣ оид ба иҷрои саривақтии мақсад ва вазифаҳои давлат ва Ҳукумати Тоҷикистон;

-ба роҳ мондани ҳамкориҳои сиёсӣ, ҳуқуқӣ ва иқтисодии байналмилалӣ бо давлатҳои ИДМ ва ташкилотҳои бонуфузи байналмилалӣ;

-мубориза бо терроризм ва экстремизм баҳри таъмини сулҳ, оромии ҷомеа, якпорчагӣ, дахлнопазирӣ ва ҳимояи соҳибихтиёрии давлатӣ;

-дар раванди амалӣ намудани идоракунии давлатӣ ба мансабҳои давлатӣ таъин намудани ҷавонони лаёқатманд;

-эҳё гардонидани мероси илмию адабии мутафаккирони тоҷик ва дар раванди бунёди давлати миллӣ истифода бурдани мероси гаронбаҳои адабии мутафаккирони форсу тоҷик.

Имрӯз мо - мардуми диёр, бахусус ҷавонони Тоҷикистон, бо боварии комил гуфта метавонем, ки нисбат ба имрӯзу фардои давлати тозаистиқлол бетараф набуда, дар атрофи сиёсати хирадмандонаи Пешвои миллат Эмомалӣ Раҳмон муттаҳидем ва дар радифи пойдорсозии бузургтарин арзишҳои башарӣ - сулҳу субот, адлу инсоф ва ҳуқуқу озодиҳои инсон заҳмат кашида, бунёдкорию созандагиро шиори зиндагии хеш қарор хоҳем дод.

Шӯҳрат Кенҷаев,
декани факултети ҳуқуқшиносии
Донишгоҳи давлатии ҳуқуқ, бизнес ва сиёсати Тоҷикистон

Читать далее

Паёми табрикии Раиси вилоят Абдураҳмон Қодирӣ ба муносибати Рӯзи энергетикҳо

Кормандони соҳаи энергетикаи вилоятро бо Иди касбӣ - Рӯзи энергетикҳо, ки ҳар сол 22 декабр дар саросари кишвари азизамон ҷашн гирифта мешавад, аз номи Мақомоти иҷроияи ҳокимияти давлатии вилояти Суғд сидқан табрику муборакбод менамоям.

Дар қарни ХХI энергетика ба яке аз омили муҳимтарини ҳастии давлатҳои олам табдил ёфта, бе рушди энергетика рушди соҳаҳои иқтисодиёту иҷтимоиёт ғайриимкон гардидааст.

Читать далее

Хароҷоти тўи арўсӣ: Дар шаҳр бештар ё дар деҳот?

Дар илми забоншиносӣ хароҷоти аз меъёр зиёдро бо истилоҳи “исроф” ном мебаранд, ки шариати Ислом онро ҳаром медонад. Қонуни Ҷумҳурии Тоҷикистон “Дар бораи танзими анъана ва ҷашну маросимҳо дар Ҷумҳурии Тоҷикистон» маҳз барои пешгирии хароҷоти изофа, сарфакориву гузаронидани маъракаҳои ихчам нигаронида шудааст . Чунон ки огоҳ шудем, дар вилоят беш аз 200 тўйхона вуҷуд дорад.

Хизматрасонӣ бо ҳисоби миёна барои гузаронидани маъракаҳои тўй тақрибан аз 2 то 10 ҳазор сомонӣ нарх аз тарафи соҳибони тўйхона муқаррар карда шудааст. Интихоби тўйхонаҳо аз худи тўйдор вобаста буда, дар вақти гузаронидани базмҳо, нархи тўйхонаҳо бо мутасаддиёни тўйхона мувофиқа мешавад. Имрўзҳо оё қонуни танзими анъана ва ҷашну маросимҳо аз тарафи шаҳрвандон риоя мегардад? Хароҷоти базми арўсиву домодии маркази шаҳр аз деҳот имрўз чӣ фарқ дорад? Гузаронидани тўи арўсиву домодӣ дар шаҳр гарон аст ё дар деҳот? Ба ин пурсиш мо аз бархе сокинони вилоят посух гирифтем.

Сўҳроб РУСТАМЗОДА - иҷрокунандаи вазифаи мудири шўъба оид ба корҳои дин, танзими анъана ва ҷашну маросимҳои Мақомоти иҷроияи ҳокимияти давлатии вилоят: - Мутобиқи моддаи 4-уми Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон», роҳбарони вазорату идораҳо, ташкилоту муассисаҳо ва корхонаҳое, ки на камтар аз 30 нафар корманд доранд, сарфи назар аз шакли моликият, оид ба танзими анъана ва ҷашну маросимҳо комиссияҳои ҷамъиятӣ таъсис дода, фаъолияти онҳоро тибқи қонуни мазкур ба роҳ мемонанд. Агар тибқи қонун ҳама баробар корбарӣ намоянд, қонуншиканӣ аз байн меравад.

Имрўз мардум моҳияти қонунро дарк намудаанд ва ҳама медонанд, ки бояд ҳатман қонунро риоя намуд. Оид ба нарху навои тарабхонаҳо дар вилоят мо бо роҳбарону мутасаддиёни тўйхонаҳо корҳои фаҳмондадиҳӣ мегузаронем, то ки нарх дастраси халқ бошад.

Комиссияи доимӣ амал мекунад, раисони маҳаллаҳо ва мутасаддиён ҳар маъракаро таҳти назорат қарор додаанд, аммо новобаста ба ин ҳастанд нафароне, ки ба қонуншиканӣ роҳ дода, аз тарафи мақомотҳои дахлдор ҷаримабандӣ ва чораҳои маъмурӣ андешида шудааст.

Сабоҳатхон МУҲИДДИНЗОДА - сокини шаҳри Хуҷанд: - Ҳар як падару модар аз овони хурдии фарзандаш орзу дорад, ки рўзе ў калон шавад ва соҳиби бахт гардад. Ману шавҳарам низ ин рўзи хурсандии фарзандонамонро дер боз интизор будем. Соҳиби ду фарзанд ҳастем, як духтар ва як писар.

Ҳамин сол писарамро оиладор намудам, барои хароҷоти тўй ва оши наҳор тақрибан 16 ҳазор сомонӣ, аз ҷумла 8 ҳазор нархи тўйхона дар базми оши наҳор ва шаби тўй, 2 ҳазор ҳофиз, 500 сомонӣ барандаи тўй, 700 сомонӣ карнай ва боқимонда барои ороиши дастархон масраф гардид.

Дар тарабхонаи «Тоҷикистон»-и шаҳри Хуҷанд, ки макони зебо ва шароити хубу фароҳам барои гузаронидани базм дорад, бо хоҳиши аҳли оила тўйро барпо намудем.

Бояд қайд намоям, ки тибқи қонуни танзими анъана ва ҷашну маросимҳо тўй бо иштироки хешу табор ва ёру дўстони келину домод гузаронида, на кам аз 140 нафар меҳмон дар шаби хурсандиамон ширкат варзиданд.

Ҳар шахс аз рўи тавонаш бояд тўйро барпо намояд, ман низ аз рўи орзуву ният ва имкониятам шаби хурсандии фарзандамро гузаронидам.

Абдуллоҷон ҒОИБОВ - сокини ноҳияи Деваштич: -Ҷашнгирии тўю маърака дар ноҳия вобаста аз рўи қонун ва хости дили нафаре, ки тўй мегузаронад, сурат мегирад. Аслан баргузории тўйҳо байни деҳаву ноҳия ва шаҳр фарқияти калон дорад. Дар деҳот нисбат ба шаҳр тўй камхарҷ мегузарад. Тўй дар саҳни ҳавлӣ баргузор мегардад ва маблағи тўйхона бошад, барои дигар лавозимот сарф мешавад. Вобаста ба хешу табор ва дўстону наздикони шахси тўйдор. Мо наметавонем, агар дўстони зиёд дошта бошем, бидуни онҳо тўи худро баргузор намоем. Мехоҳем, ки бо ҳамроҳии ёру дўстон ва наздикони хеш шодиву хурсандӣ намоем.

Дар маъракаҳои деҳот барои халқи оддӣ, танҳо оши палав кифоя аст. Барои ҳофизон бошад, ман гуфта метавонам, ки то 1000 сомонӣ хароҷот менамоем. (Баъзан шахсони орзуву ҳавасдор ба маблағҳои калон ҳофизони номдорро аз маркази вилоят ба маъракаашон меоранд).

Дигар хароҷот бошад, вобаста ба худи шахс аст. Агар тахминан ҳисоб намоям, маълум мешавад, ки то 15 ҳазор сомонӣ ва аз он ҳам зиёд, барои маъракаи тўйҳои деҳот хароҷот мешавад.

Шахси тўйдор (агар чорво надошта бошад) ба маблағи 2 ҳазор сомонӣ (ё се-сеюним ҳазор сомонӣ ҳам) моли калони шохдор барои гўшт мегирад, 2 ҳазор сомонӣ барои биринҷ ва дигар маҳсулоте, ки ба оши тўй хароҷот мешавад, масраф мекунад. Ҳамчунин, барои ороиши дастархон, барои ҳадя ба нафароне, ки дар тўй хизмат мекунанд, наздики 5 ҳазор сомонӣ хароҷот мегардад. Ба қавле тўй, ки сар шуд, маблағи зиёд сарф мешавад. Бинобар ин хароҷотҳои майдаи ба назар ноаёнро шахсони тўйдор ҳисоб намекунанд.

Ҳамин тавр, гуфтан мумкин баҳри баргузории тўй наздик понздаҳ ҳазор сомонӣ сарф мешавад.

Умеда РАҶАБОВА- сокини шаҳраки Шайдони ноҳияи Ашт: - Дар ноҳияи Ашт чандест, ки як анъанаи аҷибе ҳукмрон аст. Тўй як рўз дар хонаи домод, рўзи дигар дар хонаи арўс баргузор мегардад. Ҳоло мардум, ки тўйро дар тўйхонаҳои деҳа, шаҳрак мегузаронанд, маълум мешавад, ки танзимро риоя наменамоянд.

Базми духтарон дар ноҳияи Ашт ё як рўз пеш аз тўй ё ҷониби домод ё як рўз баъд аз тўй баргузор мегардад. Пас, қонуни танзими Ҷумҳурии Тоҷикистон дар ноҳия риоя намегардад. Чунки домодталабон дар доираи қонун бояд бо иштироки 15 нафар сурат гирад. Аммо дар ноҳияи Ашт бошад, анъанаи қадимаи худро давом медиҳанду базми духтаронро нигоҳ медоранд ё пас аз тўй домодталабон баргузор менамоянд. Меҳмонони домодталабон низ ҳамонҳое ҳастанд, ки дар шаби тўйи арўсӣ иштирок карда буданд. Танзим танҳо дар он аст, ки як намуд хўрок мепазанду халос ва хароҷоти тўй аз худи ҳар тўйкунанда вобаста аст.

Моҳияти қонуни танзими анъана ва ҷашну маросимҳо ин камхарҷ ва ихчам гузаронидани маъракаҳо буда, он ашхосе, ки ба исрофкорӣ роҳ медиҳанд, ба буҷаи оилаи худ зарар мерасонанд.

Чунон ки Сарвари мамлакат, Ҷаноби Олӣ, мўҳтарам Эмомалӣ Раҳмон дар баромадҳои хеш иброз медоранд, бояд маъракаҳоро камхарҷ намуда, маблағро барои омўзиши фарзандон ё барои беҳбудии шароити зисти навхонадорон харҷ намоянд. Чунки имрўз соҳибилмию соҳибмаърифатӣ дар зиндагӣ мақоми аввалро дорад...

 Шаҳноза ҲОМИДОВА,
 «Ҳақиқати Суғд»

Читать далее

19 December 2016

Ҳама ҳастиямро фидоят кунам!...

…Қувваҳои Мусаллаҳи кишварамон аз санҷишу имтиҳонҳои ҷиддии таърихӣ гузашта, қудрату тавоноии худро дар ҳифзи суботи ҷомеа ва амнияти давлат борҳо собит намудааст.

Эмомалӣ РАҲМОН

Хизмат ба Ватан ин ҳимояи марзу буми аҷдодӣ, таъмини сулҳу субот ва амнияти ҷомеа барои зиндагии осудаи наслҳои оянда ба ҳисоб меравад. Бинобар ин хизмати ҷавонон дар сафи Қувваҳои Мусаллаҳи кишвар мактаби ҳаёт, дарси ҷавонмардиву шуҷоат аст. Чунин мафҳумро аксар ҷавонони далеру ҷасур ва ватанпарасту хештаншинос дарк намуда, дар сафи Қувваҳои Мусаллаҳи кишвар софдилона хизмат мекунанд. Тўли чанд муддат мешавад, ки ҷавонони навдаъватгардида, дар қисми низомии 3501 Қўшунҳои дохилии Вазорати корҳои дохилии Ҷумҳурии Тоҷикистон дар вилояти Суғд содиқона адои хизмат намуда истодаанд.

Баҳри аз наздик шинос гардидан бо шароити хизмати наваскарон ба ин қисми низомӣ омадем. Бо командири қисми низомӣ полковник Умарзода Насриддини Эргаш ҳамсўҳбат гардида, ба чанде аз саволҳои худ посух гирифтем. Аз гуфтаи командир маълум гардид, ки шароити будубош дар ин қисми низомӣ хуб буда, сарбозон қаноатмандона адои хизмат намуда истодаанд. Ҳамчунин, баъди адои хизмат хоҳишмандон метавонанд, дар қисми низомӣ бо ҷойи кор таъмин бошанд,- гуфт командир.

Хизмат дар ин қисми низомӣ тибқи дастуру супоришҳои Асосгузори сулҳу Ваҳдати миллӣ – Пешвои миллат, мўҳтарам Эмомалӣ Раҳмон ба роҳ монда шудааст, - гуфт полковник Умарзода Насриддини Эргаш.

Барои аз наздик шинос гардидан дар ҳуҷраҳои таъминоти ҷангӣ, тайёрии ҳарбӣ, башардўстӣ ва оркестри асбобҳои нафасӣ шудем, ки сарбозон дар ин ҳуҷраҳо машғулият мегузарониданд. Ҳамчунин, китобхона низ фаъолият менамояд, ки дар рўзҳои истироҳатӣ сарбозон метавонанд, бо мутолиаи китоб машғул шаванд. Муовини командир, майор Наимҷон Рўзиев, ки моро ҳамроҳӣ менамуд, қайд кард, ки сарбозон бо се маҳал хўроки гарми серғизо таъминанд. Дар ин ҷода ягон камбудӣ мавҷуд нест, зеро ки дар ин самт мо аз рўи супоришҳои Президенти кишвар ва Вазири корҳои дохилии Ҷумҳурии Тоҷикистон фаъолият менамоем.

Ҷойи хоби сарбозон ва ҳаммом бо оби гарм таъмин ва мувофиқи талаботи замон аст. Аз рўҳияи сарбозон маълум, ки бо шукргузорӣ аз даврони Истиқлолияти миллӣ ва сулҳу суботи кишвар софдилона адои хизмат намуда истодаанд. Сарбозони навдаъватгардидаро аз тарзу усули тамринҳо ва қоидаҳои роҳгардии низомиву суханронӣ сарбозони мўҳлати хизматашон тўлонӣ меомўзонанд. Яъне раванди мураббиягӣ ба пешрафти хизмат мусоидат менамояд.

Ҳисси баланди ватандўстиву хештаншиносии ҷавонони имрўза аз он ҳувайдо мегардад, ки софдилонаву хушбахтона ва ҷавонмардона хизмати Модар – Ватан ва қарзи шаҳрвандии худро ба ҷо меоранд.

Ҳангоми ба ҳуҷраҳои омўзишии наваскарон ворид гардидан бо чанде аз онҳо сўҳбат намудем:

Абўбакр Саидов - сарбози қаторӣ аз ноҳияи Абдураҳмони Ҷомӣ: - Мехостам монанди дигар ҳамсолонам бар Ватани худ хизмат намоям. Интизори он будам, ки синну соли ман барои ба сафи Қувваҳои Мусаллаҳ шомил гардидан расад. Ҳамин тавр, пас аз ба итмом расидани таҳсил дар мактаб аризаи худро ба комиссариати ҳарбии ноҳия супоридам. Хушбахтона, дар қатори дигарон маро низ барои хизмат намудан бар Ватан қабул намуданд ва ба қисми ҳарбии 3501- и шаҳри Хуҷанд фиристоданд.

Мақсади асосии мо, ҷавонон ин аст, ки Ватани худро содиқона ҳифз намоем, нагузорем, ки пои нохалафе марзи моро убур кунад. Дар ин қисми низомӣ мо ба машғулиятҳо аз ҷумла, дарс хондан, омўзиши яроқу аслиҳа ва тарзи истифодабарии он, бо омўзиши компютер машғул мешавем.

Исмоил Ҷабборов - аз ноҳияи Ёвони вилояти Хатлон: - Ба ҷо овардани хизмати Ватан - Модар барои ҳар як фарзанди Тоҷикистон ҳам қарз асту ҳам фарз. Ин мафҳумро бояд ҳар як ҷавонмарди тоҷикистонӣ дарк карда тавонад. Ватани худро худи мо ҳифз накунем, каси дигар ҳифз нахоҳад кард. Хизмат ҷойи мардон аст. Дар хизмат ба қадри ҳама чиз хоҳӣ расид. Дўстиву рафоқат ва меҳру муҳаббат нисбат ба якдигар маҳз дар даврони хизмат пайдо мешавад.

Назаралӣ Холов – наваскар аз ноҳияи Исмоили Сомонии шаҳри Душанбе: - Мақсади ба хизмат омадани ман ҳамин буд, ки каме ҳам бошад, саҳми худро барои ҳимояи марзу буми аҷдодии хеш гузошта, бо сари баланд ба назди волидайн баргардам. Барои ба хизмати Ватан омадани ман падару модарам боварӣ надоштанд. Худ ба комиссариати ҳарбӣ омадам, баъд ба падарам занг зада гуфтам, ки ман барои хизмат рафтан омодаам ва айни ҳол дар комиссариати ҳарбӣ ҳастам. Падарам бовар накарданд. Пас омаданд ва барои хизмати шоиста хурсандона фотеҳа доданд.

Падарам беш аз 30 сол дар Вазорати корҳои дохилӣ кор кардаанд ва орзуи ман низ ҳамин аст, ки мисли падарам хизматчии давлатӣ гардида, ба Ватани худ хизмат намоям.

Саидбек Раҳимов - наваскар аз ноҳияи Деваштич: - Бо хоҳиши худ ба хизмати ҳарбӣ омадаам. Мехоҳам дар оянда дар сафи кормандони мақомоти ҳифзи ҳуқуқ хизмати хешро идома диҳам. Иқдомҳои Пешвои миллатро шиори худ дониста, барои ободию сарсабзии кишварамон ҳамеша камари ҳиммат баста, хизмат намоям. Ногуфта намонад, ки имрўз шароит дар қисмҳои низомӣ хуб аст, ягон камбудӣ нест.

Ба шахсоне, ки аз хизмати ҳарбӣ саркашӣ мекунанд, гуфтанӣ ҳастам, ки хизмат ба Ватан шараф аст.

Рамазон Мирзокаримзода - аскари қаторӣ аз шаҳри Ваҳдат: - Ман мехостам мисли ҷавонмардони Ватан бо либоси ҳарбӣ дар чорабиниҳо дар саф биистам.

Хизмат ҳамаи моро ба ҳам меоварад, мо - ҷавонон муттаҳид гашта, чун мушти як даст мешавем. Дар хизмат аз ҳар гўшаву канори кишварамон сарҷамъ мешавем ва мо як кишвар-як Тоҷикистон дорем ва онро муҳофизат менамоем. Ҳамаи шароитҳои хизмат бароямон муҳайё мебошанд. Мехоҳам, ки ҷавонони кишвар мардона ва далерона ба хизмат омада, қарзи шаҳрвандии худро содиқона баҷо оранд.

Агар аскаронем ё афсарем,

Далеру шуҷоъу ватанпарварем.

Ватанхоҳро худ чӣ марду чӣ зан,

Ҳама ҳастии мо фидои Ватан!...

Воқеан, ҷавононе, ки дар қисмҳои низомӣ хизмат доранд, шараф ва номуси кишвари худро ҳифз менамоянд.

«Хонаи бахт», ки дар қисми низомии 3501-и Қўшунҳои дохилии Вазорати корҳои дохилии Ҷумҳурии Тоҷикистон дар вилояти Суғд мавҷуд аст, аз он шаҳодат медиҳад, ки шароити хизмат дар ин ҷо хуб ба роҳ монда шудааст. Зеро ки дар ин ҷо сарбозон метавонанд, зиёда аз 2 рўз бо оилаҳои худ мулоқот намоянд. Сарбозоне, ки оиладор ҳастанд, метавонанд давоми 2 ё 3 рўз бо оилаи худ дар «Хонаи бахт» зиндагӣ намоянд, гуфт зимни сўҳбат майор Наимҷон Рўзиев.

Хизматчӣ Роҳат Ҷумъаева ба шустушўи сарулибоси сарбозон мутасаддӣ аст. Тавассути мошинаи ҷомашўӣ давоми ҳафта ду маротиба сарулибос ва ҷиҳози хобашонро мешўяд. Аз меҳнати ў ҳамаи сарбозон қаноатманданд.

Ҳамин тавр, пас аз савганди ҳарбӣ ёд намудан, бо сарулибоси тоза ва рўҳияи баланд имрўз ҷавононе, ки ихтиёран ба сафи Қувваҳои Мусаллаҳ шомил гардидаанд, хизмати Ватан, ҳифзи марзу буми онро баҷо оварда истодаанд.

Хизмат ба Ватан мояи ифтихори ҳар як ҷавонмард аст. Зеро ки хизмат ба Ватан ин хизмат намудан бар Падар – Модар ва ҳимоя намудани оилаи хеш аст. Пас, ҳар як ҷавонмард аз хизмат дар сафи Артиши миллӣ саркашӣ накарда, бо эҳсоси ватандориву ифтихор баҳри осудагиву оромии диёри аҷдодии хеш бояд саҳми арзандаи худро ҳамроҳ намояд.

Истамҷони НАҶМИДДИН,
Улуғбек ХУДОЙБЕРДИЕВ,
"Ҳақиқати Суғд"

Читать далее

Бо мақсади шиносоӣ бо таҷрибаи эҳёи ҳунарҳои мардумӣ гурўҳи корӣ аз шаҳри Душанбе ба Суғд омад

Тибқи дастури Ҳукумати Ҷумҳурии Тоҷикистон дар самти эҳё намудани ҳунарҳои миллии атласу адрасбофӣ бо мақсади шиносоӣ бо таҷрибаи эҳёи ҳунарҳои мардумӣ аз пойтахти кишвар шаҳри Душанбе бо роҳбарии муовини аввали раиси шаҳр Шакарбек Самадзода гурўҳи корӣ ба вилояти Суғд ташриф овард.

Зимни сўҳбат бо меҳмонон Раиси вилояти Суғд Абдураҳмон Қодирӣ оид ба рушд ва эҳёи ҳунарҳои мардумии атласу адрасбофӣ ва қолинбофии дастӣ дар вилоят иттилоъ дод. Зикр гардид, ки дар вилоят бо мақсади ҷалби занҳо ба омўзиши ҳунарҳои адрас ва атласбофӣ зиёда аз 159 маркази омўзишӣ таъсис дода шуда, давоми се сол 9000 зани хонашин соҳиби касбу ҳунар шуданд. Ҳамчунин, барои дастгирии ҳунармандон грантҳои Мақомоти иҷроияи ҳокимияти давлатии вилоят ба маблағи 200 ҳазор сомонӣ таъсис дода шудааст, ки ҳар сол лоиҳаҳои беҳтарини занҳои ҳунарманд барои амалӣ намудани фаъолияти ҳунармандӣ дар ҷамоату деҳоти вилоят дастгирӣ карда мешаванд.

Читать далее

Стратегияи миллии рушд – пешбинии афзалиятҳо

Дирўз дар толори маҷлисҳои Муассисаи давлатии «Кохи матбуот» оид ба ҳуҷҷати муҳим - Стратегияи миллии рушди Ҷумҳурии Тоҷикистон барои давраи то соли 2030 бо иштироки муовини Вазири рушди иқтисод ва савдои Ҷумҳурии Тоҷикистон Умед Давлатзод ҷаласа доир гардид.

У. Давлатзод ба аҳли нишаст оид ба ҳуҷҷати стратегии барои муддати дурудароз қабулгашта маълумоти муфассал дод. Мавсуф аз ҷумла қайд кард, ки Стратегияи миллии рушди иқтисод ва савдои Ҷумҳурии Тоҷикистон ҳуҷҷати муҳим ба шумор рафта, он супориши бевоситаи Асосгузори сулҳу Ваҳдати миллӣ, Президенти мамлакат, мўҳтарам Эмомалӣ Раҳмон ба Вазорати рушди иқтисод ва савдои ҷумҳурӣ буда, дар ҷаласаи навбатии Шўрои миллии рушди назди Президенти Ҷумҳурии Тоҷикистон таҳти роҳбарии Пешвои миллат санаи 21-уми июни соли 2016 мавриди муҳокима қарор гирифт. Инчунин масъалаи мазкур дар маҷлиси навбатии Ҳукумати Ҷумҳурии Тоҷикистон таҳти Раёсати Президенти мамлакат бо иштироки аъзоёни Ҳукумати ҷумҳурӣ баррасӣ гардид. Дар ин замина, дар ҳамбастагӣ бо Барномаи рушди Созмони Милали Муттаҳид Вазорати рушди иқтисод ва савдо ҷиҳати иҷрои супориши Президенти кишвар дар бобати паҳн намудани иттилоот ба аҳолӣ доир ба қисмати асосии Стратегияи мазкур дар манотиқи гуногуни кишвар аз 13 то 20 декабри соли ҷорӣ сафари кории масъулин ба роҳ монда шудааст.

У. Давлатзод инчунин дар бораи дастовардҳо дар соҳаи иқтисодиёти ҷумҳурӣ изҳор дошт, ки давоми солҳои 2007-2015 устувории макроиқтисодӣ таъмин гардида, суръати солонаи рушди иқтисодӣ ба ҳисоби миёна то ба 7 фоиз расида, буҷети солонаи давлатӣ аз 1,8 то 15,7 миллиард сомонӣ расид ва ё 9 баробар афзуд. Қарзи давлатӣ нисбат ба маҷмўи маҳсулоти дохилӣ хеле кам гардида, тибқи Стратегияи қаблӣ 1600 корхонаи нави саноатӣ ба фаъолият пардохта, беш аз як миллион ҷойи корӣ муҳайё гардид. Дар натиҷа истеҳсоли ашёву маҳсулоти ватанӣ афзуда, ҷумҳурӣ аз кишвари воридоткунанда ба содироткунанда табдил ёфт. Сатҳи камбизоатӣ низ аз 53 фоизи соли 2007 то ба 31 фоиз коҳиш дода шуд.

Дар бораи нақшаҳои минбаъда ҳарф зада, мавсуф қайд намуд, ки зимни амалигардонии Стратегияи миллии рушди ҷумҳурӣ маҷмўи маҳсулоти дохилӣ ба ҳар нафар аҳолӣ то андозаи зарурӣ афзун ва кишварамон ба гурўҳи давлатҳои миёнадаромади сатҳи миёна дохил гардида, сатҳи камбизоатӣ зиёда аз ду баробар кам хоҳад шуд. Давоми 15 соли минбаъда саҳми соҳаи саноат дар маҷмўи маҳсулоти дохилӣ ба таври назаррас зиёд гардида, ҷумҳурӣ аз кишвари аграрӣ – индустриалӣ ба индустриалӣ-аграрӣ ва сохтори содирот аз ашёи хом бештар ба содироти молу маҳсулоти тайёр табдил мегардад. Вазифаҳои аввалиндараҷаи Стратегияи минбаъда дар амал татбиқ намудани се самти стратегии мамлакат – баромадан аз бунбасти коммуникатсионӣ, расидан ба истиқлолияти энергетикӣ ва таъмини амнияти озуқаворӣ мебошад. То соли 2030 иқтидори энергетикии кишвар дар як сол аз 17 то 45 миллиард киловатт-соат хоҳад расид.

Маъракаи паҳн намудани иттилоот ба аҳолӣ доир ба Стратегияи миллии рушди Ҷумҳурии Тоҷикистон барои давраи то соли 2030 дар дигар шаҳру навоҳии вилоят низ доир гардид.

Тавҳида ҶЎРАЕВА,
“Ҳақиқати Суғд”

Читать далее

Нақш дар таҳкими Ваҳдати миллӣ

Ҳар як насли оянда бояд таърихи миллати худ, давлати худро донад. Таърих ба мо имкон медиҳад, ки дирўзи худро дониста, ба фардо бо иродаи қавӣ қадами устувор гузорем. Бинобар ин, пеш аз оне, ки оид ба дастовардҳои давлат, Сарвари давлат огаҳӣ пайдо намоем, бояд донем, ки ба кадом тарз бо бартараф кардани кадом омилҳо мо соҳибистиқлол гардидем.

Солҳои аввали соҳибистиқлолӣ Тоҷикистон дар вазъияти бенизомӣ, ҷанги шаҳрвандӣ қарор дошт. Ин ҷанг низ мисли ҳамаи ҷангҳои шаҳрвандӣ на ғолибу на мағлуб дошту талафот, мусибат ва мўҳтоҷиро фақат халқи тоҷик мекашид. Дар чунин вазъият мавқеи асосиро воқеае ишғол мекунад, ки моҳи ноябри соли 1992 рух дод. Он Иҷлосияи ХVI Шўрои Олии Ҷумҳурии Тоҷикистон буд.

Дар натиҷаи овоздиҳӣ аз 197 вакили мардумӣ бо тарафдории 186 нафар Эмомалӣ Раҳмон Раиси Шўрои Олии Ҷумҳурии Тоҷикистон интихоб гардиданд.

Хушбахтона, барои халқи тоҷик дар арсаи воқеаҳои сиёсӣ инсони хирадманд, шахсияти воқеан бузург, Пешвои воқеии миллат - Эмомалӣ Раҳмон зоҳир шуд. Бо 24 соли гузашта аз баргузории Иҷлосияи ХVI Шўрои Олии Ҷумҳурии Тоҷикистон дурустии қарори вакилони мардумии Парлумони тоҷик исбот гардид.

Воқеан ҳам, Эмомалӣ Раҳмон аз байни мардум баромада, дар давраи гузариш ҳамаи масъулиятро ба зиммаи худ гирифтанд. Ҳамон рўз аз минбари Иҷлосия ба ҳайси раиси тозаинтихоб гуфта буданд: «Ё ман дар Тоҷикистон сулҳро барқарор мекунам, ё дар ин роҳ ҷони худро медиҳам…Ман ҷонибдори давлати демокративу ҳуқуқбунёд ҳастам. Мо ҳама бояд барои мўътадил сохтани вазъият дўсту бародар бошем». Садоқату вафодориашон яқинан бо хизматҳояш дар назди халқу Ватан исбот гардиданд.

Марҳилаи бистучорсолаи аз тарафи Эмомалӣ Раҳмон роҳбарӣ намудани кишварро ба ду давраи комилан гуногун ҷудо кардан мумкин аст:

- давраи якум - аз моҳи ноябри соли 1992 то моҳи марти соли 2000-ум, ки марҳилаи барқарор кардани низоми конститутсионӣ, бозгашти ҳамаи гурезагон ва муҳоҷирони иҷборӣ, хотимаи ҷанги шаҳрвандӣ, истиқрори сулҳ, иҷрои бомуваффақияти шартҳои Созишномаи сулҳ ва ризоияти миллӣ дар Тоҷикистон мебошад;

- давраи дуюм - аз моҳи апрели соли 2000-ум то имрўз – марҳилаи рушди осоиштаи кишвар: таҳкими Истиқлолияти давлатӣ, барқарор кардани иқтисодиёт ва гузаронидани ислоҳоти иқтисодӣ, сохтмони иншоотҳои дорои арзиши миллӣ, баланд бардоштани некўаҳволии халқ, инкишофи фарҳанг, тамаддун, дин ва густариши фаъолияти байналмилалии Ҷумҳурии Тоҷикистон.

Ба шарофати саъю кўшиши Президент ва ҳукумати кишвар дар остонаи соли 2000-ум Ҳукумати Тоҷикистон дар роҳи рушди босубот қадамҳои устувор бардошт. Навсозиҳои иқтисодӣ самараи хешро намоён сохтанд, ки асоситарини онҳо аз сохтмони роҳҳо ва иншооти энергетикӣ иборат буданд ва ин тадбирҳои кишвар барои раҳоии кишвар аз бунбасти коммуникатсионӣ ва таъмин бо нерўи барқ мусоидат намуданд.

Дар тўли роҳбарии Эмомалӣ Раҳмон бештар аз 150 кишвари ҷаҳон Ҷумҳурии Тоҷикистонро эътироф карданд. Ба шарофати татбиқи сиёсати «Дарҳои кушод» ва муносибатҳои мутақобила бо кишварҳои дигар дар доираи робитаҳои дуҷониба ва бисёрҷониба обрўву эътибори Тоҷикистон сол аз сол баланд мешавад. Ташаббусҳои Президенти Тоҷикистон дар арсаи байналмилалӣ, дастгирии онҳо аз ҷониби кишварҳои бузургу созмонҳои байналмилалӣ ва минтақавӣ гувоҳӣ медиҳанд.

Пешвои миллат шахсияти барҷастаи таърихии миллат, дар бунёди низоми давлатдории Тоҷикистони соҳибистиқлол, барқарорсозии сохти конститутсионӣ, ба даст овардани сулҳу Ваҳдати миллӣ саҳми беназир гузошта, дар эъмори давлати соҳибихтиёр, демократӣ, ҳуқуқбунёд, дунявӣ ва иҷтимоӣ нақши арзанда гузошта, миллатро аз парокандагӣ, давлатро аз нестшавӣ ва халқро аз ҷанги шаҳрвандӣ раҳо намуда, дар рушди сиёсӣ, иқтисодиву иҷтимоӣ ва таърихиву фарҳангии давлати мустақили Тоҷикистон хизматҳои бузурги тақдирсоз намудаанд.

Д.ОБИДОВ,
 дотсент, номзади илмҳои ҳуқуқшиносии
Донишгоҳи давлатии ҳуқуқ,
бизнес ва сиёсати Тоҷикистон

Читать далее

«Тирози ҷаҳон» меваи боғи Истиқлолият

Бахшида ба 24-умин солгарди таъсисёбии рӯзномаи шаҳрии «Тирози ҷаҳон» дар толори бинои Донишгоҳи давлатии ҳуқуқ, бизнес ва сиёсати Тоҷикистон конфрониси  илмӣ таҳти унвони «Мақоми васоити ахбори омма дар пешрафти ҷомеа» баргузор гашт.

Дар кори конфронс намояндагони илму адаб ва журналистикаи вилоят иштирок доштанд. Конфронсро ректори донишгоҳ Ҷамшед Ҷӯразода оғоз бахшида, васоити ахбори оммаро дар замони муосир аз пуриқтидортарин минбари таблиғу ташвиқ унвон кард ва дар ин замина нақши рӯзномаи шаҳрии «Тирози ҷаҳон»-ро дар инъикоси ҳаводиси давр бориз арзёбӣ кард.

Раиси шаҳри Хуҷанд Шарифзода Шариф Файз аҳли қалами рӯзномаи шаҳрии «Тирози ҷаҳон»-ро бо ин санаи хотирмон шодбош гуфта, дар маърӯзаи худ роҷеъ ба  «Мақоми Пешвои миллат Эмомалӣ Раҳмон дар рушди воситаи ахбори омма дар Тоҷикистон» андешаҳои ҷолиб баён дошт. ӯ таъкид кард, ки Сарвари давлат ба рушди журналистикаи муосири тоҷик таваҷҷӯҳи хос дошта, замони истиқлолият тамоми шароитро барои инкишофи бемайлони рӯзноманигорӣ муҳайё кардааст. «Тирози ҷаҳон» фарзанди замони истиқлолияти давлатӣ буда, тӯли ин солҳо дар равнақи журналистикаи муосири тоҷик саҳм мегузорад.

«Виҷагиҳои ҳамкории Мақомоти иҷроияи ҳокимияти давлатии маҳаллӣ бо воситаи ахбори омма» дар гузориши номзади илмҳои сиёсӣ, дотсенти кафедраи сиёсатишиносии ДДҲБСТ Ҷумъа Ёқубов таҳлили хешро пайдо кард.

Номзади илмҳои таърих, мудири кафедраи таърихи халқи тоҷик Ҷурабек Исомаддинов дар мавриди «Матбуоти чопии вилоят ва инъикоси воқеаҳои муҳими ҷомеа дар он» баромад намуда, натиҷаҳои хуби илмиро арзёбӣ кард.

Сармуҳуррири рӯзномаи «Тирози ҷаҳон» Фарзона Алиева аз дирӯзу имрӯз ва фардои рӯзномаи мазкур ёдрас шуд. Зимни гузориши мавсуф хидматҳои шоистаи рӯзноманигорони варзидаи вилоят дар рушду такомули ҷаридаи мазкур таъкид гашт. Фарзона Алиева аз нақшаҳои минбаъдаи аҳли қалами рӯзнома ҳарф зада, қайд кард, ки баҳри ободиву созандагии ватани маҳбуб рӯзнома саҳми босазо хоҳад гузошт.

Дар интиҳои конфронси илмӣ раиси шаҳри Хуҷанд Шарифзода Шариф Файз собиқадорони матбуот ва пешқадамони соҳаро бо Сипосномаи мақомоти иҷроияи ҳокимияти давлатии шаҳри Хуҷанд кадршиносӣ кард.

Сурайё ҲАКИМОВА,
«Ҳақиқати Суғд»

Читать далее

16 December 2016

Ҷавонон ҷонибдори Пешвои миллат

Дар муассисаи таълимии №20-и деҳаи Истиқлоли ноҳияи Деваштич бо ҷонибдорони фаъоли НТҶҶ «Созандагони Ватан» мулоқот баргузор гардид, ки дар ҷараёни он рафти донишомӯзӣ, даъвати ҷавонон ба хизмати ҳарбӣ ва яке аз мавзӯъҳои мубрами рӯз аз қабили шомилшавии ҷавонон ба ҳизбу ҳаракатҳои ифротгаро мавриди баррасӣ қарор гирифт.

Иҷрокунандаи вазифаи ин ташкилот дар ноҳияи Деваштич Сарвар Саидов изҳор намуд, ки барои посдории фарҳанги аҷдодиамон ҳар яки мо, ҷавонони бо нангу ор бояд кӯшиш ба харҷ диҳем. Сиёсати хирадмандонаи пешгирифтаи Пешвои миллатро, ки барои ободониву шукуфоии кишвари соҳибистиқлоламон равона шудааст, содиқона ҷонибдорӣ намуда, бо ҷону дил барои ободонии ватанамон хизмат намоем.

Мутаассифона, имрўзҳо нафароне ҳастанд, ки гумроҳе шудаанд барои ноором кардани Ватан ба ҳар гуна ҳизбу ҳаракатҳои тундрав ва бо ин амали ношоиста шомил мешаванд онҳоро ба сўи ҷинояткорӣ равона менамояд. Ин ашхос фирефтаи хоҷагони хориҷӣ гардидаанд. Баланд бардоштани маърифати ҳуқуқӣ, ҳуввияти миллӣ, масъулияти волидону омӯзгорон дар тарбияи насли наврас имкон медиҳад, ки ҷавонон бо ақли солим роҳи ҳаётро интихоб намоянд. Барои пешгирии ҳодисаҳои номатлуб, ҷинояткорӣ, шомилшавии ҷавонон ба ҳизбу ҳаракатҳои ифротгаро ва тақлиди фарҳанги бегона муборизаи дастаҷамъона зарур аст, то сулҳу оромии Тоҷикистони соҳибистиқлоламонро халалдор нагардад.

Дар охир хонандагон аз дастгириву ғамхориҳои Ҳукумати Ҷумҳурии Тоҷикистон, алалхусус Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон миннатдории худро баён намуда, барои рушду тарақиёт ва содиқона хизмат намудан ба Ватан-Модарро қарзи аввалиндараҷаи худ ҳисобиданд.

Лоиқ Тӯйчиев, мутахассиси таблиғоту
иттилооти КИН ҲХДТ дар ноҳияи Деваштич

Читать далее