December 2016

16 December 2016

Нодир Турсунзода

Турсунов Нодир Толибович

9-уми июли соли 1989 дар деҳаи Искодари ноҳияи Айнӣ дар оилаи зиёӣ ба дунё омадааст. Соли 2006 мактаби таҳсилоти миёнаи умумии №12-уми зодгоҳро бо баҳои хубу аъло хатм намуда, ҳамон сол ба бахши рўзноманигории факултаи филологияи тоҷики Донишгоҳи давлатии Хуҷанд ба номи академик Бобоҷон Ғафуров дохил шудааст. Аз давраи донишҷўӣ (соли 2010) то инҷониб дар рўзномаи вилоятии «ҳақиқати Суғд» ба ҳайси хабарнигор фаъолият бурда истодааст.

Соли 2014 Турсунов Нодир дар озмуни Кумитаи ҷавонон, варзиш ва сайёҳии назди ҳукумати Ҷумҳурии Тоҷикистон дар соҳаи рўзноманигорӣ иштирок намуда, соҳиби ҷойи аввал гардид.

Ҳамчунин, соли 2015 дар озмуни «Хомаи созанда», ки бо ибтикори Раиси вилоят тўли се сол аст, ки баргузор гардида истодааст сазовори ҷойи намоён гардидааст.

Айни ҳол аспиранти соли сеюми Маркази илмии Хуҷанди Академияи илмҳои Ҷумҳурии Тоҷикистон буда дар мавзўи «Шеъри муқовимат дар адабиёти муосири тоҷик» ба навиштани рисолаи номзадӣ машғул аст.

Читать далее

Шоири сапедасаро

Дар китобхонаи вилоятии оммавии ба номи Тошхӯҷа Асирӣ бахшида ба 70-солагии Шоири халқии Тоҷикистон, барандаи Ҷоизаи давлатии Тоҷикистон ба номи Абӯабдуллоҳи Рӯдакӣ Доро Наҷот маҳфилӣ адабӣ- фарҳангӣ таҳти унвони «Шоири сапедасаро» баргузор гашт.

Дар маҳфил аҳли илму адаби вилоят ва алоқамандони шеъри ноби Доро Наҷот ҳузур доштанд.

Маҳфилро сарвари китобхона вилоятии омавии ба номи Тошхӯҷа Асирӣ Баҳром Мирсаидов ифтитоҳ намуда, ҳозиринро ба ҳамоиши шеъру ишқ хайрамақдам гуфт. Раиси бахши Суғдии Иттифоқи нависандагони Тоҷикистон, Шоири халқии Тоҷикистон Аҳмадҷони Раҳматзод Доро Наҷотро ифтихори адабиёти муосири тоҷик унвон карда, баргузории ин маҳфилро аз саодати камназири ҳаводорони шеър донист. Ў хотироти хешро дар мавриди дӯстиву ҳамкорӣ бо устоди шеъри сапеди тоҷик ёдрас шуда, ба шоир саломатӣ ва қалами сабз таманно намуд.

Мудири кафеди умумидонишгоҳии забони тоҷикии ДДХ ба номи академик Бобоҷон Ғафуров Салоҳиддин Вайдуллозода роҷеъ ба «Ташреҳи калимаҳои лаҳҷавӣ дар «Фарҳанги Доро»» натиҷаҳои омӯзиши илмии хешро баён дошт.

Шоири ширинкалом Суруш дар баромади хеш андешаҳояшро дар мавриди шеъри Доро Наҷот баён дошта, таъкид намуд, ки Доро Наҷот дар осмони адабиёти тоҷик ситораи рахшон мебошад.

Дар мавриди «Ҷойгоҳ ва сайри воҷагон дар шеъри Доро Наҷот» дотсенти кафедраи адабиёти муосири тоҷики ДДХ ба номи академик Бобоҷон Ғафуров Баҳром Мирсаидов андешаҳои ҷолиберо баён дошт.

Адабиётшинос Атахон Сайфуллоев, Шоираи халқии Тоҷикистон Фарзона, шоири ширинбаён Озарахш низ ҳарфи муҳаббату самимият ва иродати хешро ба шахсият ва ашъори Доро Наҷот иброз доштанд.

Қироати шеърҳо аз осори Доро Наҷот таъби ҳозиринро болида сохт.

Дар интиҳо Доро Наҷот муҳаббат ва саммимияти хешро ба аҳли нишаст иброз дошта, ёдрас шуд, ки Хуҷанди бостонӣ шаҳри ҷавониҳои ӯст ва ӯ ошиқи ин  шаҳр аст.

Сурайё Ҳакимова

Читать далее

Таъминоти аҳолӣ бо маҳсулоти худӣ

Инак, фасли зимистон дар кишвар ҳукмронӣ дорад. Имрўзҳо дар мағозаву бозорҳои шаҳру навоҳии вилоят нархи сабзавоту маҳсулоти полезии тару тоза болотар шудааст. Оё дар фасли зимистон деҳқонони мо имконият доранд, ки фаъолияти гармхонаҳои худро устувортар намуда, ба мардум ин намуди маҳсулотҳои босифату нархаш дастрасро пешкаш намоянд? Оё фаъолияти имрўзаи гармхонаҳои дар шаҳру ноҳияҳои вилоятбуда имконияти таъминоти мардумро дар зимистон бо маҳсулоти тару тоза доранд?

Ба ин суолҳои мо Мухтор Тоҷиев - мутахассиси шўъбаи иттилоот ва машварати Сарраёсати кишоварзии вилоят чунин посух гуфт:

- Бо мақсади таъмини амнияти озуқаворӣ дар кишвар ва дастрасии ҳарчи бештари маҳсулоти ниёзи аввал дар тамоми фаслҳои сол аз ҷониби Ҳукумати Ҷумҳурии Тоҷикистон ва Мақомоти иҷроияи ҳокимияти давлатии вилоят таваҷҷўҳи махсус зоҳир гардида, дар ин самт тадбирҳои мушаххас андешида мешаванд. Имрўзҳо новобаста аз фасли сармо дар гармхонаҳо, хоҷагиҳои шаҳру навоҳии вилоят парвариши сабзавоти гуногун ва лимў ба роҳ монда шудааст, ки ҳадаф таъмини бозори дохилӣ бо маҳсулоти худӣ ва нархҳои дастрас мебошад.

Алҳол дар шаҳру навоҳии вилоят аз 389 гармхона 328 ададаш фаъолият намуда истодааст, ки аз онҳо 138 - тоаш намуди хитоӣ буда, дар маҷмўъ масоҳати гармхонаҳо 23,1 гектарро ташкил медиҳад. Ин нисбат ба ҳамин давраи соли сипарӣ зиёдтар аст.

Имрўзҳо дар гармхонаҳои вилоят деҳқонон дар масоҳати 5,7 гектар помидор, 5,6 гектар бодиринг, 0,4 гектар қаламфури булғорӣ, 0,5 гектар сирпиёз, 4,1 гектар кабудӣ ва 6,7 гектар лимў парвариш намуда истодаанд. То 14 декабр аз гармхонаҳо ба мағозаву бозорҳои кишвар 79,4 тонна маҳсулоти тару тоза, аз қабили помидор - 8,3 тонна, бодиринг 19,3 тонна, кабудӣ- 27,5 тонна, қаламфури булғорӣ - 0,4 тонна ва лимў - 24 тонна пешкаш намуданд, ки нисбат ба ҳамин давраи соли қаблӣ истеҳсоли маҳсулот без аз 20 тонна мебошад.

Дар ин самт заҳмати деҳқонони ноҳияҳои Бобоҷон Ғафуров, Мастчоҳ ва Ҷаббор Расулов назаррас аст. Масалан, дар ноҳияи Бобоҷон Ғафуров алҳол 100 гармхона фаъолият дошта, аз он 71 - тоаш сохти хитоӣ буда, дар маҷмўъ масоҳати умумии гармхонаҳо 9,91 гектар мебошад. Масоҳати гармхонаҳои имрўз киштшудаи ноҳия 9,56 гектарро ташкил медиҳад, ки дар онҳо аз қабили помидор дар - 2,08 га, бодиринг - 3,13 га, қаламфури булғорӣ - 0,03 га, кабудӣ - 1,59 га ва лимў - 2,73 га парвариш намуда истодаанд. Аллакай деҳқонони ноҳия аз гармхонаҳои худ ба сокинони вилоят ва берун аз он зиёда аз 28 тонна маҳсулот, аз ҷумла бодиринг – 7,5 тонна, помидор 0,8 тонна, кабудӣ -11,5 тонна, қаламфури булғорӣ - 0,3 тонна ва лимў- 8,1 тонна пешкаш намуданд, ки маҷмўи маҳсулоти истеҳсолшуда, нисбат ба ҳамин давраи соли сипарӣ 10 тонна зиёд мебошад.

 Инчунин, то ин дам дар гармхонаҳои ноҳияҳои Мастчоҳ, Ҷаббор Расулов ҳам нисбат ба ҳамин давраи соли сипарӣ деҳқонон бештар сабзавоту маҳсулоти полезӣ, аз қабили помидору бодиринг истеҳсол намуданд. Боварӣ дорам, ки дар дигар гармхонаҳои шаҳру навоҳии вилоят низ деҳқонон дар ин самт фаъолияташонро ҷоннок менамоянд, то бештар маҳсулоти ниёзи аввал ва сабзавоти тару тозаро рўёнда, пешкаши дастархони мардум дар Соли нав гардонанд,- иброз намуд Мухтор Тоҷиев.

Абдуғафур АМИНЗОДА,
«Ҳақиқати Суғд»

Читать далее

Мусодираи наздик 83000 адад маводи пиротехникӣ

Истифодаи «хлопушка» ё худ маводи тарфгарӣ имрўзҳо, ки арафаи Соли нави милодист, бештар ба назар мерасад.

Аксарияти бачагону ҷавонон истифодаи хлопушкаро барои худ манбаи хушгузаронии вақт ё худ барои пешвоз гирифтани Соли нави милодӣ медонанд. Аммо атрофиёни хешро фикр намекунанд, ки ба торҳои асаби онҳо чӣ гуна зарар мерасонанд. Бештар шабонгоҳ ин маводи тарканда истифода бурда мешавад, ки аксарияти сокинон дар ҳоли истироҳат ва кўдакон бошанд, дар хобанд. Бо садои баланди чандин хлопушка сокинон нороҳат мешавад, кўдакон бошанд, метарсанд.

Чунин ҳолатҳоро ба инобат гирифта, соли 2008 ба Кодекси ҷиноятии Ҷумҳурии Тоҷикистон тағйиру иловаҳо ворид карда шуд. Аз ҳамон сол инҷониб мувофиқи моддаи 199 эзоҳи 1, қисми 2-и Қонуни Ҷумҳурии Тоҷикистон дар бораи «Муомилоти ғайриқонунии маводи тарфгарӣ (пиротехникӣ)» ворид намудани он ба қаламрави Ҷумҳурии Тоҷикистон манъ карда шудааст.

Ҳамчунин, дар ин модда гуфта шудааст, ки ғайриқонунӣ ворид намудан, истеҳсол кардан, нигоҳ доштан, фурўхтан, ба соҳибияти каси дигар додан ва истифода бурдани маводи тарфгарӣ ба миқдори начандон калон манъ мебошад. Имрўзҳо аксарияти шахсони воқеӣ барои фоида ба даст овардан ба воридоти чунин мавод машғул ҳастанд.

Мувофиқи маълумоти Раёсати минтақавии гумрук дар вилояти Суғд то аввали моҳи декабри соли равон 4 ҳолати ғайриқонунӣ ворид намудани маводи тарфгарӣ ошкор ва дастгир шудааст. Дар натиҷа, маълум гардид, ки шахсони воқеӣ мехостанд, 38 422 адад маводи пиротехникиро ба фурўш бароранд. Аз ин миқдор 38 000 навъи «хлопушка» ва 422 адади онро навъи «оташпора» ташкил медиҳад. Барои чунин ашхос мутобиқи Кодекси ҷиноятӣ парвандаи ҷиноятӣ боз карда шудааст.

Бино ба маълумоти дафтари матбуоти ин марказ чунин маводҳо аз кишвари Қирғизистон ворид карда мешавад. Аксарияти чунин муомилоти ғайриқонунӣ дар сарҳад рух медиҳад.

Маркази матбуоти Раёсати Вазорати корҳои дохилии Ҷумҳурии Тоҷикистон дар вилояти Суғд низ иттилоъ медиҳад, ки дар арафаи Соли нав кормандони раёсат 4 ҳодисаи муомилоти ғайриқонунии маводи тарфгарӣ (пиротехникӣ)-ро ошкор намудаанд, ки дар натиҷа ба миқдори 44 530 адад мусодира карда шуд. Чунин амали бар хилофи қонун анҷомдодаро чор нафар ҷавонони шаҳри Хуҷанд, ноҳияҳои Ашт ва Бобоҷон Ғафуров анҷом додаанд.

Чунин кирдорҳои ғайриқонунӣ, яъне ворид намудан ва ба фурўш баровардани онро танҳо барои манфиати шахсии худ истифода мебаранд.

Дар маҷмўъ, дар арафаи Соли нави милодӣ аз ҷониби кормандони ин Раёсатҳо ба миқдори 82 952 адад маводҳои тарфгарӣ дарёфт ва мусодира карда шудааст.

Истамҷони НАҶМИДДИН,
"Ҳақиқати Суғд"

Читать далее

15 December 2016

Баргузории ҷаласаи ҷамъбастӣ оид ба натиҷаҳои рушди иқтисодиву иҷтимоии вилоят дар 11 моҳи соли 2016

Имрӯз, 15 декабр дар маҷлисгоҳи Мақомоти иҷроияи ҳокимияти давлатии вилояти Суғд ҷаласаи ҷамъбастӣ оид ба натиҷаҳои рушди иқтисодиву иҷтимоии вилоят дар 11 моҳи соли равон баргузор гашт.

Дар кори ҷаласа, ки таҳти раёсати Раиси вилоят Абдураҳмон Қодирӣ  ва бо иштроки муовини якуми Сарвазири мамлакат Давлаталӣ Саид  доир гашт, муовинони Раиси вилоят, мудирону шӯъбаву бахшҳои дастгоҳи Раиси вилоят, сохтору мақомотҳои вилоятӣ, раисони шаҳру навоҳӣ, сардорони мақомоти ҳифзи ҳуқуқи вилоят, раисони ҷамоату деҳот, намояндагони мақомоти андоз ва дигар шахсони дахлдор иштирок намуданд.

Читать далее

Маҷлиси фаъолони шаҳр оид ба ҷамъбасти фаъолияти рушди иқтисодию иҷтимоии шаҳр дар ёздаҳ моҳи соли 2016

Тибқи нақшаи мақомоти иҷроияи ҳокимияти давлатии вилояти Суғд  санаи 14 декабри соли 2016 дар мақомоти иҷроияи ҳокимияти давлатии шаҳри Конибодом маҷлиси фаъолон оид ба ҷамъбасти фаъолияти  рушди иқтисодию иҷтимоии  шаҳр дар ёздаҳ моҳи соли 2016 баргузор гардид. Ҷаласаро Раиси шаҳр Ғайбулло Боҳирӣ оғоз бахшид.

Сараввал, дар назди ҳозирин бо маърӯзаи муфассал муовини Раиси шаҳр ҳомидӣ И.М., доир ба «Ҷамъбасти фаъолияти рушди иқтисодию иҷтимоии шаҳр дар ёздаҳ моҳи соли 2016» баромад намуда, аз ҷумла қайд намуд, ки мақомоти иҷроияи ҳокимияти давлатии шаҳр дар ёздаҳ моҳи соли 2016 фаъолияти худро баҳри ҳамаҷониба татбиқ намудани дастуру супоришҳои Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, инчунин баҳри амалӣ намудани «Барномаи рушди иқтисодию иҷтимоии шаҳри Конибодом барои солҳои 2016-2020», «Стратегияи тараққиёти иқтисодию иҷтимоии шаҳр то соли 2020» ва таъмини иҷрои нақшаю вазифаҳои вогузоргардида равона карда, дар аксари соҳаҳои хоҷагии халқ нисбат ба ҳамин давраи соли гузашта нишондиҳандаҳои мусбӣ ба даст оварда шуданд, аз он ҷумла:

- ҳаҷми истеҳсоли маҳсулоти саноатӣ бо нархҳои муқоисавӣ–109 млн. 889,4 ҳазор сомонӣ;

- ҳаҷми истеҳсоли маҳсулоти кишоварзӣ–316 млн. 147,2 ҳазор сомонӣ;

- сармоягузорӣ аз ҳамаи сарчашмаҳо– 21 млн. 166,2 ҳазор сомонӣ;

- ҳаҷми гардиши савдои чакана– 310 млн. 55,6 ҳазор сомонӣ;

-хизматрасонии пулакӣ– 170 млн. 779,3 ҳазор сомонӣ ба иҷро расонида шуданд.

Нақшаи даромад аз андозҳо ва пардохтҳои ҳатмӣ ба буҷети давлатӣ бе назардошти андози иҷтимоӣ дар ёздаҳ моҳи соли 2016 – 49614,5 ҳазор сомонӣ пешбинӣ гардида, дар ин давра 44102,3 ҳазор сомонӣ ба буҷет ворид карда шуд, ки 88,9 фоизи нақшаро ташкил намуда, нақшаи қисми даромади буҷети маҳаллии шаҳр ба андозаи 88,8 фоиз иҷро шудааст. Нақшаи қисми хароҷоти буҷети маҳаллии шаҳр ба маблағи 49605,7 ҳазор сомонӣ пешбинӣ шуда, ба маблағи 43729,4 ҳазор сомонӣ иҷро гардида, баробари 88,2 фоизи нақша мебошад.

Аз сабаби бемасъулиятии соҳибмулкон коргоҳҳои саноатии ҶС «Конибодом» ва ҶС «Ресмон» дар давраи ҳисоботӣ тамоман фаъолият накарданд. Дар асоси нақшаи амал оид ба таъсиси  коргоҳҳои нави саноатӣ, дар соли ҷорӣ 6 коргоҳҳои саноатӣ бо 170 ҷойи корӣ ба истифода дода шуданд. Дар арафаи ҷашни Иди байналхалқии «Наврӯз» бо иштироки Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон коргоҳи коркарди нафти ҶДММ «Нафтрасон» бо иқтидори 70 ҳазор тонна коркарди нафт дар як сол бо  таъсиси 80 ҷойи кори доимӣ ва коргоҳи банду басти меваи хушки ҶДММ «Меваи Канд» бо иқтидори 1200 тонна коркарди меваи хушк дар як сол бо таъсиси 20 ҷойи корӣ ба истифодадодашуда, инчунин дар давраи ҳисоботӣ коргоҳҳои истеҳсоли гаҷ ва гипсокартон бо таъсиси 60 ҷойи корӣ ба фаъолият шурӯъ намуданд.

Дар ҳудуди шаҳр 222,3 км роҳҳо таъмиру тармим гардида, 102,3 фоизи нақшаро дар бар гирифт. Инчунин, зиёда аз 5 км роҳҳо пурра мумфарш гардида,  54,1 км роҳҳо шағалпӯш ва дар 165,2 км роҳҳо таъмири ҷорӣ бо асфалт ба итмом расонида шуданд.

Сипас, Раиси шаҳр Ғайбулло Боҳирӣ аз рӯи натиҷаҳои фаъолият дар ёздаҳ моҳи соли 2016 аз  муовини аввал, муовинони раиси шаҳр ва як қатор роҳбарони соҳаҳои хоҷагии халқ, аз ҷумла, нозироти андоз, раёсатҳои кишоварзӣ, идораи беҳдошти замин ва обёрӣ, идораи барқ, бахши кор бо ҷавонон, корхонаи хоҷагии манзилию коммуналӣ, тандурустӣ, шӯъбаи кор бо занон ва оила, бахши кор оид ба дин, шӯъбаи рушди иҷтимоӣ ва робита бо ҷомеа, раисони ҷамоатҳои деҳот ва кумитаҳои маҳаллӣ оид ба фаъолияташон дар давраи ҳисоботӣ пурсиш ба амал овард.

Дар маҷлиси ҷамъбастӣ  намояндаи  мақомоти иҷроияи ҳокимияти давлатии   вилояти  Суғд-муовини Раиси вилояти Суғд  Файзуллозода З.Қ.,иштирок намуда, оид ба натиҷаҳои фаъолияти соҳаҳои мухталифи хоҷагии халқи шаҳр аз як қатор роҳбарони соҳаҳо пурсиш ба амал оварда, доир ба самтҳои афзалиятноки фаъолияти Мақомоти иҷроияи ҳокимияти давлатии вилоят дар ёздаҳ моҳи соли 2016 ва вазифаҳои минбаъда мухтасар баромад намуда, ҷиҳати татбиқи ҳадафҳо ва иҷрои дастуру супоришҳои Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва Раиси вилояти Суғд  дар масъалаҳои пешрафти ҷомеа, боз ҳам беҳтар намудани сатҳи зиндагии мардум, рушди соҳаҳои мухталифи хоҷагии халқ дастуру супоришҳои мушаххас дод.

Дар фарҷоми маҷлис, фаъолияти ҳамаи соҳаҳои мухталифи хоҷагии халқ  мавриди таҳлил  ва  баррасӣ  қарор  дода шуда, дар назди масъулин вазифаҳои мушаххас гузошта  шуданд.

Парвина АБДУЛЛОЕВА,
шаҳри Конибодом

 

Читать далее

Гузоштани арча ҷойи мувофиқро талаб мекунад

Баробари наздик шудани Соли нави милодӣ дар тамоми ҷаҳон омодагӣ ба ин чорабинии бонуфуз оғоз мегардад. Дар кишварҳои гуногуни дунё ин идро ба таври худ, бо расму русуми миллии худ таҷлил менамоянд. Дар кишвари офтобии мо низ иди Соли Навро пиру барно бо рўҳияи идона ва завқи беандоза таҷлил менамоянд.

Оростани арчаи солинавӣ аз омадани Соли нави милодӣ муҷда медиҳад.

Оре, Соли нав файзу баракати афзуни худро дорад. Дар шаҳри Хуҷанд низ ҳар сол баробари наздик гардидани Соли нави милодӣ дар чандин мавзеъҳо арчаҳои солинавӣ ороста, бо бозичаҳои ороишии гуногун зеб дода мешаванд. Баробари гузоштани арчаҳои солинавӣ дар гирди арчаҳо чорабиниҳои гуногуни фарҳангӣ гузаронида мешаванд. Агар яке барои нигоҳ доштани тартиботи ҷамъиятӣ заҳмат кашад, дигар сохтор барои бехатарии он кўшиш ба харҷ медиҳад. Ҳар сол баробари гузоштани арчаҳои солинавӣ фаъолияти кормандони Хадамоти давлатии нозироти бехатарӣ аз сўхтор низ зиёд мегардад.

Онҳо баҳри пешгирӣ ва роҳ надодан ба ҳодисаҳои нохуши сўхтор ҳангоми гузаронидани чорабиниҳои «Арчаи солинавӣ» тадбирҳои мушаххас меандешанд. Чунончӣ, аз тарафи Раёсати Хадамоти давлатии оташнишонии вилояти Суғд ҳамасола моҳи декабр чорабиниҳои профилактикӣ - оташнишонии комплексии рамзии «Арча» гузаронида мешавад.

Бо мақсади пешгирии ҳодисаҳои нохуши сўхтор дар ташкилоту муассисаҳо, муассисаҳои таҳсилоти олӣ ва умумӣ, боғчаҳои бачагона, ки дар онҳо чорабиниҳои солинавӣ гузаронида мешаванд, корҳои фаҳмондадиҳӣ, дастурҳо оид ба риояи қоидаҳои бехатарӣ аз сўхтор дар байни аҳолӣ, ҷойҳои ҷамъшавии зиёди одамон, омўзиши қоидаҳои оддитарини бехатарӣ аз сўхтор бурда мешаванд.

Кормандони ин муассиса мекўшанд, ки чорабиниҳо аз ҳар ҷиҳат хотирмон гузараду ягон ҳодисаи нохуши сўхтор ба амал наояд. Зеро нисфи зиёди бозичаҳое, ки барои ороиши арчаи солинавӣ истифода мешавад, бо воситаи қувваи барқ фурўзон мегарданд. Аз ин рў, кормандон пеш аз гузоштани арча мекўшанд, ки ҷойи мувофиқро муайян намоянд, то боиси сар задани сўхтор нагардад. Гузоштани арча низ ҷойи мувофиқро талаб менамояд. Масалан, дар гузаргоҳҳо ва ҳам назди баромадгоҳҳо гузоштани арча қатъиян манъ аст.

Ҳамзамон, арча бояд дар ҷойи мустаҳкам (тагмонак, зарфи регдор) гузошта шуда, шохаҳои арча бояд аз девор ва шифти хона дар масофаи на кам аз 1 метр дуртар ҷойгир бошад. Ҳангоми ороиши арчаҳои солинавӣ бо чароғакҳои рангин, хатти ҷараёни барқ ва пайвастшавии ноқилҳои барқӣ ба талаботҳои сохти дастгоҳи барқӣ, қоидаҳои бехатарӣ аз сўхтор ҷавобгў бошанд ва танҳо аз тарафи мутахассисони ин соҳа ба роҳ монда шаванд. Ҳамзамон, барои ороиши арчаҳои солинавӣ истифода бурдани ҷиҳози оташгиранда, маводҳои пиротехникӣ ва шамъҳои бенгалӣ қатъиян манъ аст, таъкид менамоянд мутахассисони соҳа.

Тибқи қоидаҳои зидди сўхтор ҳамзамон, гармкунии биноҳое, ки дар онҳо чорабиниҳои солинавӣ гузаронида мешаванд, танҳо аз гармхонаҳои марказонидашуда ва ё гармкунакҳои стандартӣ ба роҳ монда шавад.

Гулҷаҳон МАҲКАМОВА,
«Ҳақиқати Суғд»

Читать далее

Улуғбек Худойбердиев

1-уми  июли  соли  1988  дар  оилаи деҳқон, ноҳияи Ашти вилояти Суғд таваллуд ёфтааст. Солҳои 1995-2006 дар  мактаби таҳсилоти миёнаи умумии  №14-и  ба  номи Исмоили Сомонии  деҳаи  Ашт  таҳсил намудааст.

Аз  соли  2006  то  2011  дар шўъбаи журналистикаи факултаи Филологияи тоҷики Донишгоҳи давлатии Хуҷанд  ба  номи  академик  Бобоҷон Ғафуров таҳсил  намуда,  онро бомуваффақият  ба  итмом расонидааст.

Солҳои  2013  ва  2014  дар  сафи Қувваҳои мусаллаҳи Ҷумҳурии Тоҷикистон адои хизмат намудааст.   

Худойбердиев Улуғбек фаъолияти кориву эҷодиашро  аз овони донишҷўӣ оғоз намуда, аз соли 2009 дар рўзномаи вилоятии «Ҳақиқати Суғд» фаъолият мебарад.  

Читать далее

Самараи иқдом – ободӣ!

Соли равон аз номи сокинони маҳаллаи «Курушкада» доири мумфарш намудани роҳи нақлиётгарди хатсайри № 198 «Истаравшан – Курушкада», ки аз маркази маҳалла мегузарад, ба Шумо муроҷиат намуда будем.

Шумо ба мо пешниҳод намуда будед, ки худи аҳолӣ иқдом нишон дода, ин роҳи марказиро, ки дарозиаш 1,5 км аст, бо усули ҳашар таҳту ҳамкор карда, новаҳои обгузар хобонем, бо дастгирии Мақомоти иҷроияи ҳокимияти давлатӣ мумфарш мегардад.

Мардуми маҳаллаи мо ҷавобан ба пешниҳоди Шумо ташаббуси олиҳимматона нишон дода, ҳақиқатан ҳам, дар ҳашари умумихалқӣ якдилона иштирок намуда, роҳи нақлиётгардро бо кўмаки бевоситаи корхонаи вилоятии «Суғдроҳсоз» ва муассисаи давлатии таъмир ва роҳсозии шаҳри Истаравшан хушсифат тахту ҳамвор карда, барои мумфаршнамоӣ омода карданд.

Маҳз, бо супориши Шумо ва маблағгузории Мақомоти иҷроияи ҳокимияти давлатии вилояти Суғд соли равон роҳи марказии масиргарди маҳалла ба масофаи беш аз 1100 метр хушсифат мумфарш карда шуд.

Бинобар ин, аз номи кумитаи маҳалла ва ҳамаи истиқоматкунандагон ба Шумо, Раиси дилсўз ва ғамхори халқ миннатдории самимиамонро изҳор менамоем.

Бо эҳтиром,
Ҳалимбой ҲАБИБОВ,
Рустам АҲМАДОВ,
аз номи 5000 сокини маҳаллаи
«Курушкада»-и шаҳри Истаравшан

Читать далее

Қарори Раиси вилояти Суғд аз 12 декабри соли 2016, № 525

Дар бораи ворид намудани тағйирот ба қарори Раиси вилояти Суғд аз 2 декабри соли 2016, № 518 “Дар бораи даъвати иҷлосияи нўҳуми Маҷлиси вакилони халқи вилояти Суғд, даъвати панҷум”

Мутобиқи моддаҳои 12, 19 ва 20 Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ», бинобар санаи 22 декабри соли 2016 ироа шудани Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон, қарор мекунам:

1. Банди 1-уми қарори Раиси вилояти Суғд аз 2 декабри соли 2016, № 518 «Дар бораи даъвати иҷлосияи нўҳуми Маҷлиси вакилони халқи вилояти Суғд, даъвати панҷум» ба таври зайл хонда шавад: «Иҷлосияи нўҳуми Маҷлиси вакилони халқи вилояти Суғд, даъвати панҷум 27 декабри соли 2016, соати 9:00 дар шаҳри Хуҷанд даъват карда шавад».

2. Назорати иҷрои қарори мазкур ба зиммаи роҳбари дастгоҳи Раиси вилоят Зоирӣ F.М. гузошта шавад.

Читать далее