December 2016

13 December 2016

Оилаи устувор – нерўи ҷомеа

Асоси зиндагӣ чист? Маҳаки оила аз чӣ иборат аст? Зиндагӣ аз чӣ оғоз меёбад? Мазмуни ҳаёт чист? Он чиҳоро фарогир аст? Ва барои чӣ аксарияти ҷавонон пас аз як - ду моҳи зиндагиашон хонавайрон мешаванд? Чӣ бояд кард, ки чунин нохушӣ рўй надиҳад? Вақте ба дарёи зиндагӣ, ҳаёт ғўтавар мегардӣ, бо чунин саволҳо, ки онро муаммо ва мушкилоти ҷомеа низ мегўянд, бисёр рў ба рў мегардӣ.

Чунин масъалаҳо дар маҳфилҳое, ки аз ҷониби Ташкилоти ҷамъиятии Маркази занон «Гулрухсор» таҳти шиори «Ҷомеаи солим аз фардҳои ҷисман ва рўҳан солим ташаккул меёбад» баррасӣ ва мавриди муҳокима қарор гирифтанд Маъракаи иттилоотии «16 рўзи алайҳи хушунат нисбат ба занон» дар ташкилоту корхонаҳои шаҳру навоҳӣ, макотиби олӣ бо иштироки ҷавонон, омўзгорон, устодони макотиби олӣ, фаъолзанон, собиқадорони соҳоти мухталиф ва пирони рўзгордидаю намояндагони оилаҳои ҷавон доир гардиданд. Сарвари ташкилоти номбурда Сабоҳат Бобоҷонова қайд кард, ки мавзўи кунунии чорабиниҳо оид ба масъала ва муаммоҳои оилавӣ, поймолкунии ҳуқуқи инсон, оқибатҳои иқтисодию иҷтимоӣ, мусоидат намудан дар баланд бардоштани мақоми иҷтимоӣ-сиёсӣ ва маърифати ҳуқуқии занонро фаро гирифта, дар амалӣ намудани қонуни Ҷумҳурии Тоҷикистон «Оид ба пешгирии зўроварӣ дар оила» ва татбиқи «Барномаи давлатӣ оид ба пешгирии зўроварӣ дар оила дар Ҷумҳурии Тоҷикистон барои солҳои 2014-2023» мусоидат менамоянд.

Зиндагӣ – бозичаидасти одамон

Мутаассифона, замоне шудааст, ки зиндагӣ бозичаи дасти одамон гардидааст. Вале набояд фаромўш кард, ки зиндагӣ аз оила оғоз мегардад, агар фазои хонадон ором бошад, пас он маҷрои хешро меёбад. Вале барои маҷрои зиндагиро ёфтани навхонадорон мебоист волидайни ду ҷониб ботаҳаммул бошанд. Мо, волидайнро зарур аст, ки тавре дасти кўдаку наврасонро гирифта, ба остонаи кўдакистону дабистон мебурдем, навхонадоронро низ ба роҳи зиндагӣ ворид созем, вагарна роҳгум мезананд.

 Мо бояд роҳнамои ояндаи онҳо бошем, ҳидоятгари роҳи неку пиндори неку рафтори нек бошем. Тавре Асосгузори сулҳу Ваҳдати миллӣ – Пешвои миллат, Президенти мамлакат, мўҳтарам Эмомалӣ Раҳмон борҳо таъкид намудаанд: «Бо назардошти хусусиятҳои хоси фарҳанги оиладории шарқӣ, аз ҷумла суннату ойинҳои неки тоҷикон ҳар як модари тоҷик вазифадор аст, ки дар хусуси ба ҳаёти мустақилона омода намудани фарзандон, хусусан духтарон, дар шуури онҳо тарбия кардани фарҳанги оиладорӣ, одобу ахлоқи ҳамида ва сабру таҳаммул кўшиши доимӣ дошта бошад».

Вале ҳастанд оилаҳое, ки чунин роҳнамоиро барои худ муносиб намебинанд, балки бо ҳисси рашку бахилӣ он чиро ки аз ҳаёт бардошт карда буданд, ба ҷавонон намегўянду балки ба рафтори ду навниҳоли боғи зиндагӣ бо назари танқид менигаранд. Вале охир мо то ба воя расидани тифламон, вақте гаҳвораи ононро меҷунбондему суруди сурудҳо «Алла»-ро замзама мекардем, бо як муҳаббати саршор аз шодиву фараҳ орзуву омоламонро дар дил мепарваридем. Орзу мекардем, ки хонаву дараш, бачаашро бинем. Вале вақте пораи ҷигарамон ба воя расид, аллакай ин гуфтаҳоро фаромўш месозему то метавонем, айб мекобем ва онро ё дар дил чун мўҳр мегирему ва ё бо шиква овоза мекунем. Дар натиҷа ҷигарбандонамон хонавайрону набераҳоямон, ки меваи умр, давомдиҳандаи насли фардоямон ҳастанд, сарсону саргардонанд.

Арифметикаи ҳаёт

Вақте пурсиш гузарондем, ҷавоби аксари волидайн ва навхонадорон як нишон дошт: Хушдоман садди роҳи зиндагиаш шудааст. Аммо модарони азиз, падарони меҳрубон, биёед, ба мазмуни ҳамин гуфтаҳо бирасем. Тавре ёдовар гаштем, мо - калонсолон, ки роҳи зиёди зиндагиро аллакай тай кардаему аз пастиву баландии ҳаёт то қадри имкон огоҳӣ дорем, барои навхонадорон баҳри омўзондани арифметикаи ҳаёт худдорӣ мекунем. Намегўем, ки нисбат ба пастии ҳаёт чӣ бояд кард? Намегўем, ки ҳаёти мо аз сонияву дақиқаву соату рўзу шаб иборат аст ва зиндагӣ ҳам чунин аст, торикӣ ҳам дораду рўзи рўшанаш ҳам ҳаст. Бо як ҷаҳон орзу фарзанди як нафарро ба хонадонамон меорем, аммо на ҳамаамон ўро чун пораи ҷигари хеш қабул мекунем. Навшукуфти гули ҳаёт ҳам бо ҳамин мақсад ба ин хонадон қадам ниҳодааст, ки «дар ҳамин ҷо пайванд гардам, реша гирам, яъне насл офарам», ки онро меваи умри инсонӣ меноманд. Дар чанд ҳолат калонсолон нисбат ба рафтори навхонадорон андешаи хеш намегўянд, аввалан, аз ҳисси рашк ва ё бахилӣ, сониян, бо андешаи «агар гўям боз наранҷад» ва ё «агар ёд диҳам, боз писарам аз ин ҳам зиёдтар занашро парастиш накунад» ва боз чанд андешаҳои дилгиркунанда, ки гўиё мо на пораи ҷигари хеш, балки бегонаеро хонадор намуда бошем. Чархи гардун гарданда аст, охир мо ҳам чанде пеш чунин будем!

Аксаран дар хона арўс ва хушдоман танҳо мемонанд, зеро агар бар дўши мардон таъминоти иқтисодии хонавода вогузор шуда бошад, бар зиммаи зан нигоҳубини дохили хона, аз ҷиҳати иҷтимоӣ беҳтар намудани зиндагии оилавӣ аст. Бинобар ин аксаран дар хона ду нафар – арўс ва хушдоман танҳо мемонанд. Аз рўзи нахустини қадам ба ин хонадон ниҳоданаш арўс кўшиш ба харҷ медиҳад, ки табъи дили ин хонавода рафтор намояд. Вале таомули бонувони калонсол чунин аст, ки ҳар як қадами арўсро назора менамоянд. Пас аз назора мо бояд чӣ кор кунем? Вазифаи нахустини мо, модарон ин навниҳоли пайроҳаи ҳаётро бо маънои томаш ба хонадонамон ворид созем. Яъне чӣ тавр? Вақте арўс бо коре машғул аст, камбудии ўро саривақт тавре ба духтарамон дарси рўзгор – пухту пазу рўбучинро меомўзондем, ба ў низ омўзонем. Аммо баръакси ин ҳол, аксарият аз ҳамин қадами нахустини арўс камбудии ўро бо назораи чашмаш «чида», бе ҳеҷ каму кост ба шавҳар ва ё писараш «хабар» медиҳад. Ҳол он ки мо метавонистем сари вақт ба ислоҳи он бикўшем. Инчунин, модарони «дурандеш» низ ҳастанд, ки бо андешаи он, ки агар гўям меранҷад, хомўширо авло медонанд. Бигзор ранҷад, аммо аз зиндагӣ, аз ҳаёт наранҷад, дилмонда нагардад. Ҳамин хизмати хирсонаи мо, модарон боис мегардад, ки ба ҳаёти навҷавонон торикӣ ворид гардад. Ҳамин торикии ҳаёт қалби ононро низ тира мегардонад.

Рўзгори оилаи нав мисли баҳор аст

Арўсеро медонам, ки пас аз муноқишаи тезу тунд бо хушдоману шавҳараш даст ба домони куштор заданӣ буд. Вақте аз дари ошхона ба берун бо мақсади худкушӣ баромаданӣ мешавад, чашмаш ба дегу табақи ношуста меафтад ва бо андешаи он, ки пас аз маргаш ҳамин камбудии ошхонаро бегонагону пайвандон дида, номашро ба ифлосӣ набароранд, ба тозакунӣ машғул мегардад ва ҳамин фурсат сабаб мешавад, ки вай аз фикри худкушӣ барояд. Яъне тангии ҳаёт лаҳзае баъзе нафаронро ба сўи худкушӣ мебарад. Дар ҳамин лаҳзаҳо вазифаи хушдоман аз он иборат аст, ки бо лаҳни ширин арўси ба тангомадаро аз субҳи поёни шаби сияҳ ошно созад.

 Сабоҳат Бобоҷонова қайд кард, ки асоси зиндагӣ, ҳаёти ҳар як инсон аз оила оғоз меёбаду гармию сардӣ, талхию ширинӣ, ғаму шодӣ, машаққату роҳаташ аз он ибтидо мегирад. Асосгузори сулҳу Ваҳдати миллӣ – Пешвои миллат, Президенти мамлакат, мўҳтарам Эмомалӣ Раҳмон хеле оқилонаву ғамхорона изҳор карданд, ки «Бунёди ҷомеаи солим, дар сари оилаи солим қарор мегирад», ки ин ҳақ асту рост. Охир, барои оилаи солим доштан қаблан пойдевори оила бояд аз меҳру садоқат, эҳтирому муҳаббат, адолату шафқат, мурувват, покдоманӣ ва инсоф бунёд шуда бошад, зеро оилаи устувор нерўи пешбарандаи ҷамъият аст.

Ақди никоҳу тўй ибтидои таъсиси оилаанд. Пас аз тўй муҳити нав дар назди ду ҷавоне, ки қаблан аз мушкилоти зиндагӣ бехабар буда, қалби пур аз ишқу муҳаббати самимӣ доштанд, як қатор масъалаю муносибати нав, шебу фарозҳоро мегузорад. Аз ин рў, ҳар як волидайн пеш аз баргузории базми арўсӣ фарзанди худро ба ҳаёти мустақилона тайёр мекунад ва таманнои онро дорад, ки фарзандаш хушбахту саодатманд гардад. Вале, мутаассифона, рўзгори оилаи нав мисли баҳорон, дорои гулу меваҳои зебою ҷаззоб, аз сўи дигар, вай дорои селоб ва раъду барқ, дорои ғурбат, ҷанҷол, ташвишҳо, камбудиҳо ва норасогиҳои моддӣ низ дорад. Тавлиди фарзанд дар ҳаёти падару модари ҷавон на танҳо шодию хурсандӣ, балки мушкилоту муаммоҳои навро низ зам мекунад: бехобӣ, тарбияи тифл, хастагӣ, таъминоти моддӣ, беморӣ ва ғайраҳо.

Сухани беандеша – сардии муҳаббат

 Ғурури беасос, сухани беандеша ва рафтори зишт боиси нохушӣ, ранҷиш ва сардии муҳаббат хоҳад шуд. Аз ин рў, ба зану шавҳар лозим аст, ки ҳини беморию хастагӣ нисбат ба якдигар ҳамеша ғамхор ва меҳрубон бошанд ва ҳаргиз дар назди фарзандон ба таҳқиру паст задани шахсияти якдигар даст назананд. Зеро падару модар барои фарзандон намунаи ибрат буда, бардошти худро хоҳ бад, хоҳ нек бошад, дар ҳаёти худ такрор менамоянд. Рафтори оқилона боиси афзудани ҳурмати тарафайн, муҳаббат ва тақвияти пояи зиндагиашон мегардад. Ҳалимию хайрхоҳӣ бояд пешаи зану шавҳар бошад. Пояи мустаҳкаму идомат, хушбахтию саодати оила-ҳамдилии зану шавҳар аст. Бе ҳамдилӣ, ҳамрозу ҳамраъйӣ, хайрхоҳу ҳамдарди ҳамдигар будан пояндагии оила имконнопазир аст. Зеро фарзандон бо тарбияи падару модар парвариш меёбанд ва аз онҳо сармашқ мегиранд. Духтар аз модараш дарси шавҳардорӣ ва писар аз падараш дарси зандорӣ меомўзад. Хонаводае, ки созгору меҳрубон бошад, фарзандон низ ғолибан созгору меҳрубон ва хушахлоқ хоҳанд буд, - қайд кард дар интиҳо С.Бобоҷонова.

 Дар анҷом: Дўстони азиз, биёед, кўшиш ба харҷ диҳем, ки аҳли ҷомеа ва алалхусус ҷавонон, оилаҳои солим бунёд намоянду ҳамарўза хушбахт бошанд, оилаҳо вайрон нашаванду решаҳои издивоҷашон мустаҳкам бошанд, давлатамон тавоною миллатамон сарбаланду пойдор, фарзандонамон солиму некбахт ва некному некрўз бошанд.

Воқеан, мавзўъҳое, ки дар маҳфилҳо мавриди баррасӣ қарор гирифтанд, гуногунмазмун буданд ва мо дар иншои хеш яке аз шохаи онро овардем ва боварии комил дорем, ки дар иртибот ба ин бахш гуфтаниҳо ҳастанд, ки нашрия бо беқарорӣ онро интизор аст, зеро «бо сухан пухта шавад хоми ҳама» гуфтаанд.

Тавҳида ҶЎРАЕВА,
«Ҳақиқати Суғд»

Читать далее

12 December 2016

Боғи Сайфи Исфарангӣ симои нав мегирад

Ман ҳоло бо итминони комил гуфта метавонам, ки мо бо такя ба нерўи созандаи мардуми соҳибмаърифати худ ва бо заҳмати содиқонаву софдилонаи онҳо ба ҳамаи мақсадҳои некамон ва дар навбати аввал, фароҳам овардани шароит барои зиндагии шоистаи ҳар як сокини мамлакат наздик шуда истодаем. Муҳайё намудани шароити ҳарчи беҳтари зиндагӣ барои сокинони кишвар ҳадафи олитарини фаъолияти Президент ва ҳукумат мебошад.

Эмомалӣ Раҳмон

Нерўи созандагии мардуми диёри мо аст, ки таҳти роҳбарии Сарвари мамлакат дар давоми чаҳоряк асри соҳибистиқлолӣ ба ин қадар дастовардҳои оламшумул ноил гардидем. Имрўз ба симои шаҳру деҳоти сарзаминамон назар меафканему аз сатҳи баланди зиндагӣ, ободиву сарсабзиҳо бори дигар ба қудрати дастони инсон қоил мемонем. Тамоми комёбиву дастовардҳои мардуми диёрамон, маҳз бо ҳидояту дастурҳои Президенти мамлакат ба даст оварда шудаанд.

Дар ин радиф тибқи дастуру супориши Сарвари кишвар ва дастгирии Раиси вилоят мардуми шаҳри Исфара ба амалҳои созандагиву бунёдкорӣ ҷараёни тоза бахшида, аз ҷумла корҳои азнавсозии Боғи фарҳангиву фароғатии ба номи Сайфи Исфарангиро ба роҳ мондаанд.

Бобати рўшанӣ андохтан ба рафти корҳои азнавсозии боғ мухбири рўзнома ба сардори Идораи сохтмони асосии шаҳр Баҳром Бобоев муроҷиат кард.

-Дигаргун кардани симои Боғи фарҳангиву фароғатӣ бо дастгирии Мақомоти иҷроияи ҳокимияти давлатии вилоят амалӣ гардонида шуда, баҳри истиқболи сазовори ҷашни 830- солагии шоир ва мутафаккири бузург Сайфи Исфарангӣ ба нақша гирифта шудааст. Корҳои созандагиву бунёдкорӣ ҳанўз аз моҳи майи соли равон оғоз ёфтанд. Мувофиқи нақша дар боғ сохтмону бунёдкориҳо ба маблағи бештар аз 4 миллиону 200 ҳазор сомонӣ анҷом дода хоҳанд шуд. Ҳудуди корҳои азнавсозиву ободонӣ 3,3 гектарро ташкил медиҳад. Иншоотҳои фарсуда, аз ҷумла аттраксионҳо гирифта шудаанд, ки баъди азнавсозӣ ба ҷои онҳо таҷҳизоти бозиҳои бачагонаи наву замонавӣ гузошта мешаванд.

Алҳол корҳои ҳамворкунии заминҳо, мустаҳкамкунии ҳудуди боғ, бунёди дарвозаи даромади боғ бунёди шаршара давом карда, ба маблағи зиёда аз 600 ҳазор сомонӣ корҳо анҷом дода шудааст. Бояд зикр намоям, ки рафти корҳо дар маркази диққату эътибори роҳбарияти Мақомоти иҷроияи ҳокимияти давлатии вилоят қарор дошта, Раиси вилоят, мўҳтарам Абдураҳмон Қодирӣ маҳз бо мақсади шинос шудан бо рафти корҳо се маротиба ба шаҳри Исфара ташриф оварданд ва баҳри пешрафти минбаъдаи корҳо дастуру супоришҳо доданд.

Ҷоиз ба зикр аст, ки аксари бунёдкориҳо дар Боғи фарҳангиву фароғатӣ бо қувваи соҳибкорони маҳаллӣ ба сомон расонида мешавад. Аз ҷумла, дарвозаи боҳашамати даромадгоҳи боғ аз тарафи ҶДММ «Ширкати сохтмонии Исфара», азнавсозии фаввора аз ҷониби Корхонаи кимиёвии шаҳр анҷом дода шуда истодааст. Баҳри муҳайё намудани масолеҳи сохтмонӣ корхонаи сементбарории шаҳр, Ширкати сохтмонии «Бинокор», Комбинати масолеҳи бинокорӣ ва инчунин соҳибкорон бо роҳбарии вакили маҷлиси шаҳрии шаҳри Исфара Саидалӣ Миристоев, Фурқат Деҳқонов ва дигарон ҳиссаи шоиста гузошта истодаанд.

Қайд кардан ҷоиз аст, ки бо дастгирии маъмурият ва директори боғ Акрамҷон Воҳидов ҳар рўз 30-35 нафар корманд ба кор баромада, баҳри дар мўҳлати муқарраршуда ба анҷом расидани азнавсозии боғ саҳм гузошта истодаанд.

Супоришгари лоиҳаи таҷдиди боғ шўъбаи сохтмони асосии мақомоти иҷроияи ҳокимияти давлатии шаҳри Исфара буда, лоиҳа аз ҷониби шўъбаи меъмории шаҳр таҳия гардидааст.

Корҳои марҳалаи якуми азнавсозии боғ дар рўзҳои наздик ба анҷом расида, тибқи дастуру супоришҳои Раиси вилоят созандагиву бунёдкориҳо дар марҳалаи дуюм идома хоҳанд ёфт. Дар назар аст, ки Боғи фарҳангиву фароғатии ба номи Сайфи Исфарангӣ дар рўзҳои ҷашни Наврўзи соли 2017 мавриди баҳрабардорӣ қарор хоҳад гирифт.

Рафоат МЎЪМИНОВА,
“Ҳақиқати Суғд”

Читать далее

Ислом ба зоти худ надорад айбе...

Дар таълимоти дини мубини Ислом ва Қуръони маҷид оёту ҳадисе ёфт намешавад, ки барои мусалмонеро куштани мусалмон иҷозат медода бошад. Худованди муттаол дар сураи Моида кушта шудани фарзанди ҳазрати Одамро баён мекунад ва мегўяд, ки аз ин сабаб мо ҳукм кардем, ки агар инсоне, бе ягон гуноҳе як инсони дигарро кушад, ҳамчуноне бошад, ки тамоми инсонҳоро кушта бошад!

Модом ки чунин аст, вой бар ҳоли он касоне, ки ба доми фиреб афтоданду иштирокчии задухўрдҳои мусаллаҳонаи Ироқу Сурия гардиданд ва хуни ноҳақ рехтанд. Дар ҳадиси Ҳазрати Муҳаммад саллалоҳу алайҳи васаллам омадааст: "Чун муслиме ба муқобили бародари мўъминаш силоҳ бардорад, фариштагони Худо ӯро лаънат мекунанд, то он замоне, ки ин силоҳро ба ҷояш бигзорад". Охир, аз рӯи кадом принсипи демократӣ ва кадом оёту ҳадиси дини мубини Ислом аст, ки саркардагони гурўҳи ба ном “Давлати исломӣ” одамонро бо силоҳу мошинҳои зиреҳпўш мусаллаҳ карда , барои шикори одамон, хуни бегуноҳ рехтан, дар масҷидҳо, мактабҳо, бозорҳо худро тарконидани маргталабон, ё ин ки хонаҳои мусалмононро тирборону молу мулкашонро талаву тороҷ кардан мефиристонанд. Барои онҳо фарқ надорад, ки дар рў ба рўяшон кист ва ў оё ягон заррае гуноҳе содир кардааст? Аммо ин “ҳомиён”-и дини Ислом намедонанд, ки бо чунин амалҳои ғайриинсонии содиркардаашон ба решаи дини Ислом теша зада истодаанд. Зеро дини Ислом дар зоти поки худ ҳеҷ айбе надорад.

Ку инсонигарӣ, канӣ инсофу адолат?! Ку меҳру муҳаббати инсонӣ! Оё чунин ҷаллодони силоҳбадаст, ки зери ниқоби муҳофизати дини Ислом амал мекунанд, зодаи инсонанд?! Онон ба дараҷае тарбия дода шудаанд, ки барои онҳо куштани инсон як бозии муқаррарӣ гаштааст.

 Аз оинаи нилгун чунин қатлу кушторҳо, сарсониву саргардонии ҳазорон мардуми бегуноҳи кишварҳои ҷангзадаро мебинаму ба ҳоли онон дилам хун мешавад. Шукрона аз он мекунам, ки мо имрўз дар даврони орому осоишта умр ба сар мебарем. Ҳамаи ин сулҳу субот дар кишвари мо бо талошу ҷонсўзиҳои Пешвои миллат, Президенти мамлакатамон, мўҳтарам Эмомалӣ Раҳмон ба даст омад.

Вале, имрўз аз ин рўзгори ободу осудаамон мо, мардуми диёр набояд орому хотирҷамъ бошем. Зеро имрўз хатарҳои экстремизму терроризм тамоми мамолики ҷаҳонро фаро гирифта, аз он сарзамини мо эмин нест. Мо - мардуми диёр, бахусус ҷавонон, бояд зиракии сиёсиро аз даст надиҳем, ба худ роҳи дурусти ҳаётро бо ақли солим интихоб намоем, фирефтаи суханони бардурўғ нашавем, хонему соҳибилму соҳибмаърифат гардем ва ба халқу давлати худ аз дилу ҷон хизмати шоиста кунем.

Муллосафар РАҲМАТОВ,
донишҷўи соли сеюми факултаи
ҳуқуқшиносии Донишгоҳи давлатии ҳуқуқ, бизнес ва сиёсати Тоҷикистон

Читать далее

Ба доди 25 000 аҳолии шаҳрак кӣ мерасад?

Агар аз шаҳри Хуҷанд то маркази ноҳияи Зафаробод, ки бештар аз 90 км роҳ аст, дар як соат бирасӣ, аз маркази ноҳия то шаҳраки Бахт, ки 27,6 км масофа дорад, якуним соат вақтро сипарӣ менамоӣ. Яъне, роҳеро, ки бояд аз шаҳри Хуҷанд то шаҳраки Бахт се соат рафта биёӣ, як рўз паси сар мекунӣ.

Роҳи автомобилгарди Зафаробод – шаҳраки Бахт дорои аҳамияти маҳаллӣ буда, сохтмони он соли 1970 оғоз ёфта, соли 1976 ба анҷом расонида шудааст. Роҳи мазкур ба аҳолии ду ҷамоати ноҳияи Зафаробод хизмат мерасонад, ки дар ин ҳудуд зиёда аз 25 ҳазор аҳолӣ истиқомат доранд.

 Солҳои 1985-1988 таҷдиди роҳ оғоз шуда, аз сабаби пош хўрдани Иттифоқи Шўравӣ таъмири роҳ ба анҷом нарасид. Аз ҳамон вақт то кунун боре ҳам рўйи таъмирро надидааст. Вақте аз ин роҳ дидан кардем, он асфалтҳои даврони шўравӣ рехташуда пора-пора дар рўи роҳ ба чашм мерасиданд.

Вақте бо сокини шаҳрак Темур Рашидов ҳамсўҳбат шудем гуфт, ки тўли чанд сол аст дар ин минтақа зиндагӣ дорем. Ин роҳ чандин сол аст, ки рўи таъмирро надидаву рафту омади сокинон ба маркази ноҳия хеле душвор аст. Мо - сокинони ин минтақа якчанд маротиба ба раиси ноҳия мактуб ирсол кардем ва, ҳатто, намояндагони мардуми ду ҷамоат ба қабулашон рафта, вазъияти ин роҳро фаҳмонданд. Аммо, ягон натиҷа надод. Соли 2015 бошад, дар тамоми воситаҳои ахбори умум эълон карда шуд, ки роҳи Зафаробод - шаҳраки Бахт таъмир мешавад ва огоҳӣ доштем, ки бо ин мақсад аз буҷаи Ҳукумати ҷумҳурӣ 3.5 млн. сомонӣ маблағ ҷудо гардида, он ба наздикӣ таъмир мешавад. Лекин соли 2017 наздик мешаваду ҳеҷ не ки кор пеш равад. Маблағ куҷо шуду таъмир канӣ? 50 солагии ноҳияи Зафарободро магар чунин пешвоз мегиранд?

Айни ҳол аз маркази ноҳияи Зафаробод ба самти шаҳраки Бахт роҳи мошингард хеле ташвишовар буда, имкони ҳар лаҳза рух додани ҳар гуна садамаи нақлиётӣ дар ин масир ҷой дорад. Вазъи роҳи мазкурро ин ҷо воҳима карданӣ нестем, вале замоне расида, ки Вазорати нақлиёт ва ниҳодҳои вобаста ба ин қитъаи роҳ ҷиддан таваҷҷўҳ намоянд.

Ҳарчанд тўли 25 соли даврони Истиқлолият аз вазъи ногувори роҳи мошингарди Зафаробод – шаҳраки Бахт мақолаву гузоришҳо дар ВАО-и давлативу хусусӣ нашр гардида бошанд ҳам, вале то кунун касе ба доди бедоди мардуми аз ин қитъаи роҳ истифодабаранда нарасидааст.

Бояд гуфт, ки ободонии роҳҳо омили муҳими рушди иқтисодиву иҷтимоии кишвар ба ҳисоб рафта, дар сурати пурра таъмир ва азнавсозӣ шудан он ба сатҳи болоравии некўаҳволии мардуми ин маҳал мусоидат мекунад. Итминони комил дорем, ки мардуми сарбаланди ноҳияи Зафаробод, соҳибкорон, шахсони ташаббускор, хулоса ҳар як фарди ин сарзамини тоҷикон барои татбиқи ин ҳадафи муҳим дар соли равон саҳми худро хоҳанд гузошт.

Н.ТУРСУНОВ

Читать далее

Шароити хизматрасонӣ беҳтар шуд

Аз ҷониби Раиси вилояти Суғд Абдураҳмон Қодирӣ эълон гардидани «Соли 2016 - Соли фарди солим» ба ҳамаи беморхонаҳои шаҳру ноҳияҳои вилоят имконият фароҳам овард, ки таҷҳизотҳои нав ворид намоянд. Ҳамчунин, бисёр муассисаҳои тиббӣ пурра таъмир, барои беморон шароити хуб муҳайё гардид. Соли фарди солим эълон гардидани соли равон саривақтӣ буд. Зеро саломатии миллат сарвати бебаҳост.

Беморхонаи ноҳиявии №1 ноҳияи Деваштич дар минтақаи Калининобод ҷой гирифтааст. Имрўз беморон аз тамоми шароитҳои мавҷуда истифода мебаранд. Ба муносибати Соли фарди солим чаҳор шўъба: шўъбаҳои таваллуд, амрози занона, бачагона ва шўъбаи бемориҳои дарунӣ аз таъмири пурра бароварда шуд. Бо дастгирии Раиси вилояти Суғд Абдураҳмон Қодирӣ 3 таҷҳизоти замонавӣ, аз ҷумла кардиомонитор бо маблағи 9200 сомонӣ, оксигенератор ба маблағи 4600 сомонӣ ва таҷҳизоти сабти барқи дил бо маблағи 4600 сомонӣ ворид гардид, ки ин баҳри беҳтаршавии хизматрасонӣ ба аҳолӣ мусоидат кард.

Шералӣ Машарифов - сардухтури беморхона зикр намуд, ки соли 2001 бо дастгирии Мақомоти иҷроияи ҳокимияти давлатии вилояти Суғд бинои асосӣ ва соли 2005 бошад, ду бинои дигари беморхона аз таъмири пурра бароварда шуда буд. Имрўз дар беморхона 135 кати табобатӣ мавҷуд аст, ки дар он ҳамаи шароит барои беморон муҳайё карда шудааст. Дар маҷмўъ, дар ин беморхона 24 нафар фаъолият намуда истодаанд ва табибони ҳозиқ баҳри солимии аҳолии ноҳия аз тамоми имкониятҳо самаранок истифода мебаранд.

Ҳамчунин, барои шахсони камбизоат, иштирокчиёни ҷанг ва дигар шахсоне, ки имтиёз доранд, табобат ройгон ба роҳ монда шудааст.

Солҳои пеш ҳамаи беморон барои ташхиси тиббӣ ба маркази вилоят ва ё пойтахти кишвар мерафтанд. Хушбахтона, имрўз бо дастгириҳои Раиси вилоят Абдураҳмон Қодирӣ таҷҳизотҳои наву замонавӣ ворид гардида истодаанд. Мо вобаста ба имкониятҳои мавҷуда барои беморон хизмат намуда истодаем, - изҳор дошт Шералӣ Машарифов.

 Истамҷони НАҶМИДДИН,
"Ҳақиқати Суғд"

Читать далее

09 December 2016

Омилҳои пешгирии хушунат

Чанде пеш дар асоси нақша-чорабиниҳои Маъракаи иттилоотии «16 рӯзи алайҳи хушунат нисбати занон» дар хонаи фарҳанги ноҳияи Деваштич конфронси илми-амалӣ доир гардид, ки дар он масъалаҳои пешгирикунандаи зӯроварӣ дар оила аз ҷумла, Раиси ташкилоти ҷамъиятии Маркази занон «Гулрухсор» Сабоҳат Бобоҷонова, мудирони шӯъбаҳои кор бо занон, кор бо ҷавонон, намояндагони соҳаи тиб ва дин, раисони ҷамоатҳо ва сарварони мактабҳои таҳсилоти умумӣ иштирок доштанд.

Конфронсро бо сухан муқаддимавӣ муовини раиси ноҳия Рафоат Каримова ҳусни ифтитоҳ бахшид. Сипас муовини Сардори Шӯъбаи Вазорати Корҳои Дохилӣ дар ноҳия Б.Қосимов, оиди «Баланд бардоштани сатҳи маърифати ҳуқуқи - яке аз омилҳои асосии пешгирии хушунат дар оила», судяи суди ноҳия Диловар Мирзоҳамидзода дар мавзӯи «Сабабҳои ҷудо шудани оилаҳо, пешгирӣ, роҳҳои устуворӣ ва пойдории оилаҳо», Раиси ташкилоти ҷамъиятии Маркази занон «Гулрухсор» Сабоҳат Бобоҷонова, дар бораи «Нақши  Маркази занон «Гулрухсор» дар мустаҳкамкунии оилаҳо ва шунида шуда, аз тарафи иштирокдорон саволу ҷавоб доир гардид.

Чорабинии мазкур бо иқдоми мудири бахши кор бо занон ва оилаи ноҳия Зебинисо Азимова ва бахши кор бо ҷавонон, варзиш ва сайёҳии ноҳия Бунафша Қутбиддинова дар ҳамкорӣ бо ташкилоти ҷамъиятии Маркази занон «Гулрухсор» гузаронида шуд.

Т. ҶӮРАЕВА

Читать далее

Бозичаҳо шодиоваранд, вале ...

Даврони кўдакиро бе бозичаҳо тасаввур кардан ғайриимкон аст. Аксарияти коршиносон бар он ақидаанд, ки бозичаҳои бачагона дар ҳаёти кўдакон ва ҷаҳонбинии онҳо нақши муҳим дорад. Аз ин хотир, тўҳфаи беҳтарин барои ҳар як кўдак ин бозичаи дўстдоштаи ўст.

Аз ҳама саволи муҳиме, ки дар вақти интихоб ва харидории бозичаҳои бачагона пайдо мешавад, ин бехатарии он аст. Оё овоз, ранг ва бўйи бозича бехатарии онро муайян мекунад? Кадом талаботҳои бехатарии бозичаҳои бачагона бояд риоя карда шавад? Бозичаҳои бачагона бештар аз кадом кишварҳо ба Тоҷикистон ворид карда мешаванд? Оё дар вақти харидорӣ намудан ба сифат ва бехатарии он аҳамият дода мешавад? Ба ин суолҳо ҳар як падару модар ва истеъмолкунандагон посух меҷўянд.

 Имрўз дар бозорҳо ва нуқтаҳои фурўш даҳҳо намуди бозичаҳои истеҳсоли Ҷумҳурии Халқии Хитой ва дигар мамлакатҳо фурўхта мешаванд.

Кадом санадҳои меъёрӣ-ҳуқуқӣ талаботро нисбати истеҳсол ва ташхису истифодабарии бозичаҳои бачагона танзим мекунад?

Ҳар як мамлакат дар истеҳсол, назорат ва истифодаи бозичаҳо талаботҳои умумӣ ё стандартҳои худро дорад. Дар Тоҷикистон стандарти байнидавлатии ГОСТ 25779-90 «Талаботҳои умумии бехатарӣ ва тарзи назорати бозичаҳои бачагона» амал мекунад, ки дар асоси он бехатарии маҳсулоти номбурда танзим карда мешавад.

Боиси зикр аст, ки бо қарори Ҳукумати Ҷумҳурии Тоҷикистон аз 23 августи соли 2016, №375 регламенти техникии “Бехатарии бозичаҳо”, дар асоси қонуни Ҷумҳурии Тоҷикистон “Дар бораи бамеъёрдарории техникӣ” таҳия ва тасдиқ гардида, талаботи ҳатмиро ба бозичаҳо бо мақсади ҳифзи ҳаёт ва саломатии кӯдакон ва шахсони нигоҳубинкунандаи онҳо, инчунин огоҳ намудани амалҳое, ки истифодабарандагони (истеъмолкунандагони) бозичаҳоро нисбат ба таъйиноти бехатарӣ ва ҳифзи муҳити зист ба иштибоҳ мебаранд, муқаррар менамояд.

Боиси таассуф аст, ки аз ҷониби истеҳсолкунанда- гони бозичаҳои бачагона ва воридкунандагону фурўшандагон дар баъзе мавридҳо талаботи стандарти байнидавлатӣ риоя карда намешавад. Дар натиҷаи гузаронидани санҷиши навбатии мутахассисони шўъбаи нозироти савдои Маркази “Тоҷикстандарт” дар вилояти Суғд дар бозорҳо ва нуқтаҳои фурўш миқдори зиёди бозичаҳои бачагонаи ғайристандартӣ ошкор карда шуд. Аз ҷумла, дар натиҷаи гузаронидани 4 рейди назоратӣ аз се нуқтаи савдои бозори ҶДММ «700 - солагии Ҳамадонӣ»-и шаҳри Бўстон ва якчанд нуқтаи фурўши бозорҳои шаҳри Хуҷанд номгўи зиёди бозичаҳои бачагонаи шаклу намудашон гуногуни лўхтакҳо, хирсак, палангча, аспак, тўбчаҳо ва ғайра ба миқдори 308 адад ошкор карда шуд.

Маълум гардид, ки аксарияти бозичаҳо аз Ҷумҳурии Халқии Хитой ворид карда шуда, ягон ҳуҷҷати тасдиқкунандаи бехатарӣ надорад ва тамғагузории онҳо ба талаботи санадҳои меъёрӣ-ҳуқуқӣ мутобиқат намекунад. Аз рўи маълумоти сардори озмоишгоҳи маҳсулоти хўрока ва хоҷагии қишлоқи Маркази “Тоҷикстандарт” дар вилояти Суғд Равшан Бақоев натиҷаи ташхис нишон дод, ки аз рўи нишондиҳандаҳои ноустувории сохти бозичаҳо, ҷудошавии рангҳо, овози баланд ва бўйи номгўи зиёди бозичаҳо ба талаботи стандарти байнидавлатии СБД 25779-90 номутобиқ дониста шуда, дар асоси хулосаи озмоишгоҳ бо иштироки комиссия мутобиқи қоидаҳои муайяншуда бозичаҳои ба талаботҳои стандарт номутобиқ несту нобуд карда шуд.

Мавриди зикр аст, ки дар давоми 11 моҳи соли 2016 дар озмоишгоҳи маҳсулоти хўрока ва хоҷагии қишлоқи Маркази “Тоҷикстандарт” дар вилояти Суғд 49 намунаи бозичаи бачагонаи истеҳсоли Ҷумҳурии Халқии Хитой ва Ҷумҳурии Ўзбекистон ба миқдори 36 ҳазору 365 дона аз ташхис гузаронида шудааст, ки 38 намунаи бозичаи бачагонаи истеҳсоли Ҷумҳурии Халқии Хитой ба миқдори 2635 дона ба талаботи стандарт ҷавобгў набуданд.

 Нисбати соҳибкороне, ки ба фурўши бозичаҳои ғайристандартии бачагона машғул буданд, мутобиқи моддаи 625-и Кодекси ҳуқуқвайронкунии маъмурии Ҷумҳурии Тоҷикистон «Барои истеҳсол, фурўш, барориш, таҳвил, истифодаи маҳсулот, иҷрои кор ва хизматрасонӣ, ки ҷавобгўйи талаботи стандартҳои давлатӣ ва шартҳои техникӣ нестанд» чораҳои қонунӣ андешида шуданд.

Дар вақти харидорӣ намудани бозичаҳои бачагона кадом талаботҳои бехатарии онро бояд риоя кард?

Пеш аз ҳама, харидор ба бехатарии маҳсулоте, ки аз он бозича тайёр карда мешавад, бояд эътибор диҳад. Сониян, ба бехатарии болопўши он, яъне ба устувории рангҳои истифодашуда аҳамият бояд дод. Гузашта аз ин, бозичаҳои бачагона бояд шиносномаи махсус дошта бошад.

Аз ҷониби дигар бозича бояд бўйи тези нохуш надошта бошад. Яке аз талаботҳои дигари бехатарии бозичаҳо ин мустаҳкамӣ ё устувории он, яъне сифат мебошад.

Дар хотир дошта бошед, ки риояи назорати бехатарии бозичаҳои бачагона хеле муҳим аст, чунки бо он кўдак вақти зиёди худро мегузаронад.

Маҳкамбой КАРИМОВ,
сардори Дафтари матбуоти
Маркази “Тоҷикстандарт” дар вилояти Суғд

 

Читать далее

Фард солим гар шавад, ҷомеа нерў мегирад...

Басо бомаврид буд, ки бо ибтикори Раиси вилоят, мўҳтарам Абдураҳмон Қодирӣ соли 2016 дар вилояти Суғд ҳамчун «Соли фарди солим» эълон гардид. Ниёгони мо хуб гуфтаанд: «Пок дор аз ҳар ғубор оинаат», ё худ «Гарави тансиҳатии ҳар як инсон тозагии ўст». Одамон дар рўи замин сарчашмаи ҳамаи ободиҳо, озодиҳо ва пешравию комёбиҳои ҳаётанд.

Онҳо бояд тавассути ақли расояшон муҳитро тозаву озода аз ифлосиву нопокиҳо эмин доранд. Бояд хуб дарк намоянд, ки нафас кашидани ҳавои тоза сарчашмаи тансиҳатии инсонҳо буда, ҳавои ифлос боиси сар задани кулли бемориҳост. Бинобар он ҳаёти ҳаррўзаи моро бе таъсири муҳити зист тасаввур кардан амри маҳол аст. Инсоният дар оғўши табиат камол ёфта, обу ҳаво, зебоию нафосати онро истифода мебарад. Ҳамчунон вазифадор аст, ки табиатро ҳифз намояд.

Мутаасcифона, аксаран ба мушоҳида мерасад, ки ба қадри зебогиҳои диёр намерасем, атрофамонро бо баъзе рафторамон вайрон мекунем, маконеро, ки дар он умр ба сар мебарем, доғдор менамоем. Асадии Тўсӣ дар ин боб фармуда:

Макун бад, ки бинӣ ба фарҷом бад,

Зи бад гардад, андар ҷаҳон ном бад.

Мувофиқи қонун «Шахсоне, ки муҳити зистро ифлос менамоянд ва бо амалашон ба саломатии аҳолӣ, олами набототу ҳайвонот ва хоҷагии халқ зарар меоранд, ба ҷавобгарӣ кашида мешаванд». Бо вуҷуди ҳамин, дидаю дониста аксаран бархе аз сокинони шаҳрамон ба оддитарин қоидаҳо риоя намекунанд. Бо тақозои иҷрои қарзи шаҳрвандӣ, яъне як соли хизмати Ватанро солҳои 80-уми асри гузашта дар яке аз ҷумҳуриҳои назди Балтика, аниқтараш шаҳри Вируи Эстония гузаронидам. Он ҷо борҳо шоҳиди он шуда будам, ки, ҳатто, барои партофтани қоғази қанд, чиптаи кино ё театр ва ё сигор касро фавран дар ҷойи ҳодиса ҷавобгар менамуданд.

Умуман, шаҳру деҳи он кишвар чунон тозаву озода аст, ки дили кас намешавад ба ҳар куҷое, ки рост ояд, ҳатто қоғазпораеро партоӣ. Дар мо чӣ? Фарҳангу одоби шаҳрдорӣ ва маданияти шаҳрвандиамон то дараҷае коста шудааст, ки доир ба масоили тозагиву солимӣ дар ҷомеа ниҳоят бепарвоем.

Бино ба ақидаи мутахассисон дар шаҳрҳои калонтарини кишварамон аз 100 то 400 тонна ва дар як сол аз 110 000 то 160 000 тонна, партов ҷамъ мешавад. Биёед, дур нарафта ба корҳои дар интиҳои фасли поиз дар кўчаҳову муассисаҳои шаҳру деҳаамон ба сомон расонида, аз қабили тоза кардани саҳни ҳавлиҳо аз баргҳои рехтаи дарахтон бо нигоҳи таҳлилӣ назар афканем. Мебинем, ки масъулин хазонро ҳарҷо-ҳарҷо ҷамъ намуда оташ мезаданд. Дар ин фасл гоҳ-гоҳ дуд хўрдани мо гўё ба назар безарар менамояд, вале дар асл бошад, гази аз баргҳо, бахусус, барги чинор ба фазо паҳнмешуда ба саломатии инсон хеле таъсири манфӣ расонида, боиси ангезиши касалиҳои роҳи нафас мегардад. Имрўз аз ин гуна хатогиҳоямон, ки назарногир бошад ҳам дар маҷмўъ касоди ҷиддии экологиро ба миён меорад, чаро нодидагирӣ менамоем? Зарур аст, ки чӣ корхонаҳо ва чӣ аҳолӣ нодуруст будани ин гуна амалҳоро дарк намуда, минбаъд ба такрори чунин хатогиҳо роҳ надиҳем. Бояд донем, ки бо таври васеъ дар кишварҳои хориҷӣ, хусусан Чин ва Ҷопон аз партовҳо фаровон истифода мебаранд. Дар мо бошад баръакс, партовҳо манбаи вайрон кардани муҳити зист ва солимии ҷомеа гардидаанд.

Дар ин росто, ибтикори шаҳрдории шаҳрҳои Хуҷанду Исфараро қайд кардан бамаврид аст. Дар ҳар хиёбон ва гулгашт, кўчаҳои шаҳр, қуттиҳои махсуси партовпартоӣ гузошта шудааст. Бо вуҷуди ҳамин ҳам мушоҳида менамоем, ки як қадам он тарафтар рафта, партовҳои нодаркориро ба қуттиҳо намепартоем. Боз дар канори роҳу кўчаҳо пасмондаҳои ҳар гуна ашёро мебинем, ки табиати бинандаро хира месозанд. Агар хоҳем, ки зиндагиамон пурсурур ва нишотангез бошаду ҳар як фард солим, бояд дар оғўши табиат бошему нисбат ба ин бераҳм набошем.

Расул Додхудои Раҳимиён,
узви Иттифоқи
журналистони ҷумҳурӣ

Читать далее

Мусоидат ба хушзотӣ ва фаровонии маҳсулоти чорво

Тибқи дастуру супоришҳои Раиси вилоят Абдураҳмон Қодирӣ аз 19 декабри соли 2014 дар ҳудуди ҷамоати деҳот ва шаҳ-ракҳои шаҳру навоҳии вилоят бояд комплексҳои хизматрасонии зообайторӣ (дорухона, клиникаи байторӣ ва нуқтаи хушзот намудани чорво) таъсис дода шаванд.

Зеро бо бунёду ташкили марказҳои зообайторӣ ва фаъолияти он ба таъсиси ҷойҳои корӣ ва гирифтани чорвои хушзот мусоидат намояд, аз тарафи дигар барои фаровонии маҳсулоти гўшту шир низ замина хоҳад гузошт.

Иҷрои ин дастури Раиси вилоят дар шаҳру навоҳӣ чи гуна амалӣ мешаванд? Мо ба сардори Раёсати назорати давлатии байтории вилоят Икром Абдураҳмонӣ муроҷиат намудем. Ў гуфт, ки бо дастгирии Раиси вилоят барои бунёди марказҳои зообайторӣ ба 140 нафар сокинони шаҳру навоҳии вилоят қитъаҳои замин ҷудо карда шуд ва то 1 декабри соли равон дар ҷамоати деҳоту шаҳракҳои шаҳру навоҳии вилоят 75 маркази зообайторӣ фаъолият намуда истодааст.

Тибқи маълумотномаи фаврии Раёсати назорати давлатии байтории вилоят дар миқёси вилоят 119 ҷамоати деҳот ва шаҳракҳо мавҷуд буда, барои ташкили чунин марказҳо ба мақомотҳои иҷроияи ҳокимияти давлатии шаҳру навоҳӣ 223 ариза ворид шуда, 121 қарори раисони шаҳру ноҳияҳо ба имзо расидааст. 102 ариза дар истеҳсолот мавриди баррасӣ қарор дошта, чи хеле, ки дар боло ишора рафт, то ин дам 75 маркази зообайторӣ сохта шуда, боз 22 -тоаш бо бино таъмин гардида, бунёди сохтмони 43 маркази дигар идома дорад.

Масалан, дар ноҳияи калонтарини вилоят Бобоҷон Ғафуров, ки дорои 14 ҷамоати деҳоту шаҳрак аст, барои ташкили маркази зообайторӣ ба мақомоти иҷроияи ҳокимияти маҳаллӣ 30 ариза ворид гардида, аз он 19 ариза дар истеҳсолот қарор дошта, 11 қарори раиси ноҳия барои таъсиси марказҳо ба имзо расидааст. Барои бунёди 14 марказ қитъаи замин ҷудо гардида, 12 маркази зообайторӣ сохта шудааст.

Бояд гуфт, ки дар ноҳияи Спитамен моҳияти дастури роҳбарияти вилоятро хуб дарк намуда, дар ҳамаи ҷамоатҳо марказҳои зообайторӣ ташкил кардаанд. Тибқи маълумот ба мақомоти маҳаллии ин ноҳия бобати ташкили маркази зообайторӣ 7 ариза ворид шуда, 7 қарори раиси ноҳия ба имзо расида, 7 маркази зообайторӣ сохта шудааст. Чунин вазъро дар ноҳияи Ҷаббор Расулов низ дидан мумкин аст. Дар шаш ҷамоати деҳоту шаҳраки ноҳия ҳафт маркази зообайторӣ фаъолият намуда истодааст.

Ташкили чунин марказҳои зообайторӣ дар ноҳияҳои Кўҳистони Мастчоҳ, Шаҳристон, Деваштич, Исфара, Истаравшан, Конибодом низ хуб ба роҳ монда шуда, мардуми ин ноҳияҳо аз фаъолияти онҳо қаноатманд буда, барои манфиати хеш самаранок истифода бурда истодаанд.

Аммо дар шаҳру навоҳии Айнӣ, Ашт, Зафаробод, Мастчоҳ, Гулистон, Хуҷанд, Панҷакент, Истиқлол ва Бўстон то ҳол бобати амалӣ гардидани ин дастури Раиси вилоят саҳлангорӣ дида мешавад. Мақомотҳои маҳаллии ин шаҳру навоҳӣ ва сохторҳои дахлдори соҳаи ноҳияро зарур аст, ки баҳри амалӣ шудани ин тадбир чораҳои дахлдор андешанд.

Гуфтан ҷоиз аст, ки бахшида ба Соли фарди солим, ки соли равон бо пешниҳоди Раиси вилоят эълон гардид, дар байни кормандони соҳаи байтории вилоят озмун эълон шуд, дар он марказҳои зообайторӣ низ иштирок доштанд. Маркази зообайтории Ҷамоати деҳоти Ёваи ноҳияи Бобоҷон Ғафуров беҳтарин дониста шуда, бо мукофотпулӣ дар ҳаҷми чор ҳазор сомонӣ ва Диплом қадршиносӣ гардид.

Ҳамзамон, озмуни кормандони соҳаи байторӣ ҷамъбаст гардида, ба ғолибон дар маҷмўъ 50 ҳазор сомонӣ мукофотпулӣ тақдим шуд.

Стансияи мубориза алайҳи бемориҳои ҳайвоноти шаҳри Исфара беҳтарин дониста шуда, соҳиби 10000 сомонӣ ва Диплом гардид. Инчунин, Стансияҳои мубориза алайҳи бемориҳои ҳайвоноти шаҳрҳои Хуҷанд, Гулистону Конибодом ва ноҳияҳои Ҷаббор Расулову Айнӣ дар ҳаҷми аз ду то ҳафт ҳазор сомонӣ мукофотонида шуданд. Мукофотҳоро дар вазъияти тантанавӣ Изатулло Сатторӣ - 3Вазири кишоварзии ҷумҳурӣ ва Хоҷазода Ориф Ашўрӣ - муовини Раиси вилоят ба роҳбарони марказҳои зообайторӣ ва Стансияҳои мубориза алайҳи бемориҳои ҳайвоноти шаҳру ноҳияҳо супурданд.

Абдуғафур АМИНЗОДА,
“Ҳақиқати Суғд”

Читать далее

БУНЁДГУЗОРИ ВАҲДАТ ВА ДАВЛАТИ МИЛЛӢ

Баъди эълон шудани соҳибихтиёрӣ ва Истиқлолияти давлатии Тоҷикистон яке аз аввалин падидаҳое, ки ба он мардум дучор гардид, ин ҷанги таҳмилӣ буд. Аз ҷиҳати сиёсатшиносии миллӣ ва ҳатто муосири умумибашарӣ таҳлили соли аввали истиқлолият нишон медиҳад, ки сиёсати давлатӣ умуман побарҷо набуд. Хусусан, солҳои нахустини он давраи озмоишҳои сахту сангини тақдири таърихии миллат ва имтиҳони ҷиддитарини ҳаёт буд.

Ба ин маънӣ, ҳар соли истиқлолияти мо ҳам аз лиҳози масъулияти таърихӣ ва ҳам бо ҳаҷму андозаи фоҷиаи тақдир, ки бар сари халқамон омад, бо даҳсолаҳо баробар аст. Зеро тифли раҳомўзи истиқлолияти мо ҳанўз дар ибтидои роҳи худ ба фоҷиаи ҷонкоҳе гирифтор шуд, ки таърихи қадимаи миллатамон чунин фоҷиаро кам дар ёд дорад.

Вале бар хилофи хостаҳо ва нақшаҳои коргардонҳои ҷанги даҳшатноки таҳмилӣ истиқлолияти мо побарҷо монд. Зеро дар Иҷлосияи ХVI Шўрои Олӣ аз тарафи намояндагони мардумӣ Президенти имрўзаи Ҷумҳурии Тоҷикистон Эмомалӣ Раҳмон ҳамчун Раиси Шўрои Олӣ бо бештари овозҳо интихоб ва пазируфта шуданд. Маҳз, бо сиёсати хирадмандона ва ботадбирона Сарвари давлат, Ҷаноби Олӣ Эмомалӣ Раҳмон дар муддати кўтоҳ тавонистанд мухолифини исломӣ ва равандҳои дигари сиёсии зиддиҳукуматиро, ки бо ҳам як шуда, опозитсияи муташаккилро таъсис дода буданд, бо роҳи сиёсӣ ба сулҳу салоҳ оварданд.

Боиси тазаккур аст, ки ин гуна сулҳофаринӣ ва давлатдории дунявӣ дар Осиёи Марказӣ ва, ҳатто, ҷаҳони имрўза назире надорад. Ин таҷрибаи сиёсӣ борҳо аз тарафи сиёсатмадорон, ҷомеашиносон ва олимони Fарбу Шарқ аз минбарҳои баланд тавсиф ва эътироф гардидааст.

Аз ин ҷост, ки бо чунин унвони олӣ Асосгузори сулҳу Ваҳдати миллӣ – Пешвои миллат пазируфта шудани ин абармард, шоҳсутуни давлат Эмомалӣ Раҳмон арзанда аст, зеро эшон дар рушди сиёсӣ, иқтисодиву иҷтимоӣ ва таърихиву фарҳангии Тоҷикистон саҳми бебаҳо ва хизматҳои бузурги тақдирсоз намуданд.

Минбаъд Президенти тозаинтихоб Эмомалӣ Раҳмон ба бунёди давлати мутамаддини муосиру демократӣ ва ҳуқуқбунёд рў оварданд. Роҳи таърихие, ки мо дар бисту панҷ соли охир тай намудем, ҳамвор набошад ҳам, Асосгузори сулҳу Ваҳдати миллӣ – Пешвои миллат Эмомалӣ Раҳмон тавонистанд дар як муддати кўтоҳ Тоҷикистонро соҳиби рамзҳои давлатӣ – Парчам, Нишон ва Суруди Миллӣ гардонанд. Асосҳои сохтори конститутсионӣ, рукнҳои нави идоракунии давлат, меъёрҳои танзимкунандаи ҳаёти иқтисодиву иҷтимоӣ ва фарҳангии кишварро муқаррар намуда, асъори миллиро ба муомилот бароранд. Артиши Миллӣ ва нерўҳои сарҳадиро таъсис дода, ҳифзи сарҳади давлатӣ, ҳимояи манфиатҳои мамлакатро дар арсаи байналхалқӣ таҳти назорати онҳо қарор диҳанд. Таъмини истиқлолияти энергетикӣ, амнияти озуқаворӣ ва аз бунбасти коммуникатсионӣ раҳоӣ бахшидани мамлакатамонро ҳамчун ҳадафҳои стратегии сиёсати давлат муайян намоянд.

Дар арсаи байналхалқӣ дастовардҳои бузурги сиёсии Тоҷикистонро узвияти СММ, ИДМ, Созмони ҳамкории Шанхай, СУС, САҲА, СААД, аъзогӣ дар Конфронси ҷаҳонии исломӣ ва ширкату фаъолият дар дигар созмонҳои сиёсиву иҷтимоӣ ва иқтисодии минтақавиву умумиҷаҳонӣ баръало инъикос менамоянд.

Зилола КОМИЛОВА,
омўзгори кафедраи сиёсатшиносӣ ва
фарҳангшиносии Донишгоҳи давлатии
Хуҷанд ба номи академик Бобоҷон Ғафуров

Читать далее