12 September 2017

Ҳастӣ ва бақои миллат

Ба Истиқлолияти Ҷумҳурии Тоҷикистон 26 сол пур шуд. Гарчанде дар назди таърих ин фурсат начандон тўлонист, кишвари азизамон ба таври шинохтанашаванда пеш рафта, гул-гул шукуфт. Беш аз 200 мамолики сайёра онро шинохта, ҳамкории судмандро оғоз ва тоҷиконро чун халқи тамаддунофар, дорои фарҳанги бой ва меҳнатқарин шинохтанд. Ин муаррифӣ ба оламиён тавассути кўшишҳои беамсоли фарзанди сарсупурдаи миллат, Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмон моро насиб гардид.

Бисту шаш сол муқаддам-санаи мубораки 9-уми сентябри соли 1991 Шўрои Олии Ҷумҳурии Тоҷикистон Эъломияро дар бораи Истиқлолияти давлатӣ қабул намуд. Ваҳдат, фарҳанги сулҳ, созандагиву бунёдкорӣ мўҳтавои зиндагӣ ва маънии ҳаёти тоҷикон гардид. Лек, мутаассифона, пайроҳаи сулҳу истиқрори миллат суфтаву ҳамвор набуд. Тавассути кўшишҳои як идда душманони миллат, сияҳкорон ҷанги хунини шаҳрвандӣ ба сари мардум ғаму кулфати зиёдеро ба бор оварду боиси гуреза шудани мардум гашт ва ашкҳоро ба хун табдил дод. Ақлу заковат, хиради волои азалӣ пеши роҳи ҳалокати миллиро гирифт. Санаи 27 июни соли 1997 Созишномаи истиқрори сулҳи тоҷикон имзо гардид ва дар таърих чун Рўзи Ваҳдати миллӣ номнавис гашт. Тоҷикистонро чун аъзои комилҳуқуқи СММ хуш пазируфтанд ва аъзои фахриву соҳибманзалати он гардида, муносибатҳои дўстонаро ба роҳ монд. Тоҷикон давлати худро аз нав эҳё намуданд. «Ман ба Шумо сулҳ меоварам» - ваъда дода буданд, сарвари тозаинтихоби кишвар Эмомалӣ Раҳмон ба халқи кишвар ва ҳамин тавр ҳам шуд.

Ҳоло таҷрибаи сулҳи тоҷикон мавриди омўзиш ва эҳтироми хосаи ҷаҳониён қарор дорад. Истиқлолияти кишвар ва сиёсати сулҳпарварона аз тарафи мамолики мутараққии дунё дастгирӣ ёфта, муносибати давлат ва шаҳрвандон дар асоси қонунҳои қабулгардида амалӣ гашта истодаанд. Аз ҷумла 6 ноябри соли 1994 ба тариқи райъпурсии умумихалқӣ Конститутсияи Ҷумҳурии Тоҷикистон қабул ва ҳуқуқу озодиҳои инсон чун арзиши олӣ эътироф шуданд. Тағйироту иловаҳои воридшуда низ шаҳодат аз он медиҳанд, ки ҳадафҳои асосии давлат бунёди ҷомеаи озод, дунявӣ мебошад. Зина ба зина гузаронидани ислоҳоти судию ҳуқуқии кишвар, қабули қонунҳои ҷавобгўи талаботи замони муосир, тағйир додани сохторҳои судию мақомоти ҳифзи ҳуқуқ аз ворид шудани Тоҷикистон ба низоми нави ҳуқуқӣ дарак медиҳад. Дар бораи дастовардҳо дар ин самт сухан ронда, месазад таъкид бар он намоем, ки маҳз бо ибтикори Сарвари давлат Эмомалӣ Раҳмон Қонуни авф борҳо қабул шуда, чун санади башардўстона аз ба амал баровардани адолати судӣ дар даврони соҳибистиқлолӣ дарак медиҳад. Ҳокимияти судӣ ҳуқуқ, озодиҳои инсон, манфиати давлатӣ, ташкилоту муассисаҳо, адолатро ҳифз менамояд.

 Чун ин ҷо сухан дар бораи дастовардҳои 26-солаи Истиқлолияти миллӣ меравад, месазад аз ҷиҳати ободонӣ, созандагӣ сари ҳар қадам дар тамоми гўшаву канори Тоҷикистони азиз ҳарф зада, бо алоҳидагӣ зикри пойтахти азизамон – Душанбе, Хуҷанд, шаҳру навоҳии вилояти Суғд, Бадахшону Хатлон намоем, ки ба куллӣ дигаргун гаштаанд.

Аз бунбасти коммуникатсионӣ баромадан, сохтмони НБО-и «Роғун»-ро идома бахшидан, тавассути нақби Анзоб Шимолро бо Ҷануб пайвастан, бунёди кўпрукҳо, иқдомҳо сўи Истиқлолияти энергетикии кишвар, таъмини амнияти озуқаворӣ, инқилоби навин дар рушди маориф, компутеркунонии мактабҳо, дари худро боз кардани литсейҳо, коллеҷу мактабҳои ғайридавлатӣ, донишгоҳу донишкадаҳои олӣ ва миёнаи махсус, инқилоб дар соҳаи таъмин бо кадрҳои нави замони муосир, эътибор ба насли ҷавон чун ояндасози миллат, пешрафти тиб аз ҷумлаи дастовардҳои даврони соҳибистиқлолист. Ҳақ бар ҷониби Пешвои миллат Эмомалӣ Раҳмон аст, ки дар ин боб зикр дошта буданд: «Итминони комил дорам, ки тамоми мардуми Тоҷикистон, ҳар фарди худогоҳу худшинос ва бонангу номуси миллат бо дарки масъулияти ватандорӣ, ҳадафҳои наҷиби созандагӣ ва ободонии Ватани азизамонро қарзи инсонӣ ва вазифаи шаҳрвандии хеш ҳисобида, ба қадри соҳибистиқлолӣ ва соҳибихтиёрӣ, сулҳу субот ва оромии ҷомеа мерасанд, онро чун неъмати бебаҳо қадршиносӣ мекунанд, зиракии сиёсиро аз даст намедиҳанд ва ҳамеша барои ҳифзи манфиатҳои олии миллат ва давлат азму талош менамоянд».

Ҳар як фарди бонангу номус бояд ба қадри сулҳу Ваҳдати миллӣ расида, баҳри ободии кишвар саҳмгузор бошад.

Раҳмон Ҷўрахон Қурбоналӣ,
муовини раиси Суди шаҳри Хуҷанд

Читать далее

Иштироки Раиси вилояти Суғд дар нахустнамоиши филми ҳунарии “Тангно”

Бегоҳии рӯзи гузашта дар Кохи фарҳанги ба номи Абӯабдуллоҳи Рӯдакии маркази вилоят намоиши нахустини филми «Тангно», ки аз рӯйи асари нависандаи маъруфи тоҷик Сорбон ва дар коргардонии Муҳиддини Музаффар ба нафор гирифта шудааст, баргузор шуд.

Дар нахустнамоиши филми ҳунарии “Тангно” Раиси вилояти  Суғд Абдураҳмон Қодирӣ низ иштирок намуд.

Читать далее

Шукри оби равон

Наздик як моҳ пеш сокинони Ҷамоатҳои деҳоти Унҷӣ ва ба номи Ҳайдар Усмонови ноҳияи Бобоҷон Fафуров аз оби полезӣ танқисӣ мекашиданд.

Аввали моҳи августи соли равон бо дастгирии Раиси вилоят, мўҳтарам Абдураҳмон Қодирӣ пойгоҳҳои обкашии «Унҷӣ-1» ва «Унҷӣ-2» аз мувозинат (баланс)-и Ҷамъияти саҳҳомии ба номи С.Ўрунхўҷаев гирифта, ба мувозинати Муассисаи давлатии беҳдошти замин ва обёрии вилоят гузаронида шуд. Пас аз ин, яъне аз 7 август оби полезӣ ниҳоят фаровон гашт, ки мардум аз ин хушҳоланд, зеро майдони наздиҳавлигӣ ва заминҳои кишт бо об таъминанд.

Собиқадори соҳаи обрасонӣ Абдулаким Ваҳҳобов, ки зиёда аз 55 сол дар ин соҳа фаъолият намудааст, гуфт:

- Пойгоҳҳои обкашии «Унҷӣ-1» ва «Унҷӣ-2» 1 июни соли 1952 аввалин бор ба заминҳои колхози «Москва» (ҳоло Ҷамъияти саҳҳомии «Ўрунхўҷаев») об додаанд. Аз ин пойгоҳҳо каналҳои «Унҷӣ-1» (2,5 км) ва «Унҷӣ-2» (5 км) ибтидо меёбанд. Бо воситаи ин каналҳо заминҳои колхоз дар минтақаҳои Унҷӣ, Оқтеппа, Арбоб, Кулангир, Шайхбурҳон, Рўмон шодоб мешуданд. Инчунин, қисман колхозҳои ба номи Фрунзе (ҳоло Пўлод Бобокалонов) ва «40-солагии Октябр (алҳол Раҳмон Набиев), инчунин Трести кабудизоркунии шаҳри Ленинобод (ҳоло шаҳри Хуҷанд) бо оби дарёи Сир таъмин мешуданд.

Хулоса, заминҳои наздиҳавлигӣ ва майдонҳои кишти хоҷагиҳо наздик 1000 гектарро ташкил медод, ки мо бо об таъмин мешудем. 10 сол мешавад, ки бинобар ба мувозинати Ҷамъияти саҳҳомии ба номи “Ўрунхўҷаев” гузаштани ин пойгоҳҳо таъминот бо оби полезӣ кофӣ набуд.

Дигар мутахассиси соҳаи об Раҳимшех Мамадшехов, ки зиёда аз 40 сол дар ин соҳа фаъолият дорад, мегўяд:

- Ин иншооти обрасонӣ таърихи 65-сола дорад. Мо бояд ба қадри он бирасем ва эҳтиёткорона аз он истифода барем.

Истифодабарандагони обро зарур аст, ки каналу ҷўйборҳоро сари вақт тоза намоянд, обро сарфакорона ва боэҳтиёт истифода баранд.

Дар ин ҳолат ҳама ҷо сабзу хуррам мешаваду аҳолӣ ва деҳқонон аз замини худ ҳосили дилхоҳ ба даст оварда метавонанд.

Алиҷон ОЛИМОВ,
сокини деҳаи Унҷӣ,
ноҳияи Бобоҷон Fафуров

Читать далее

Инъикосгари ҳақгўи иҷлосия

Солҳои нахустини соҳибистиқлолии кишвар, яъне аввали солҳои навадуми асри гузашта, ки дар мамлакатамон ҷанги шаҳрвандӣ ба вуқўъ пайваст, на ҳар аъзои ҷомеа мавқеи худро дар ҳамон рўзҳо мушаххасу аниқ карда метавонист.

Дар чунин рўзҳо ва лаҳзаҳои ҳассос маҳз рўзнома, ки аз азал рисолаташ ба ҳам овардану муттаҳид гардонидани оммаи халқ, ба мардум расонидани афкори солим аст, метавонист роҳи росту дурустро нишон диҳад. Дар ҳамин рўзҳои душвори ба сари халқи кишварамон омада ҳайати эҷодии нашрияи вилоятии «Ҳақиқати Суғд» ба вазъияти кишвар баҳои дуруст дода, дарҳол мавқеи худро аниқ кард. Дар он солҳо ба ҳайати эҷодии рўзнома Файзулло Атохоҷаев, ки аз охири солҳои шастуми асри гузашта тақдирашро ба кори газета бахшидаву пас аз хатми шўъбаи ҷурналистикаи Мактаби олии ҳизбии шаҳри Тошканд ҳамчун сиёсатмадори комил сабзида расида буд, сарварӣ мекард. Дар он рўзҳо мўҳтавои маводи рўзнома дар рўҳияи сафарбар намудани мардум ба меҳнати бунёдкорона, дастгирии аҳолии минтақаҳои вазъияташон муташанниҷ равона карда мешуд. Дар аввалин рўзҳои баргузории Иҷлосияи ХVI Шўрои Олии Ҷумҳурии Тоҷикистон бошад, аз ҷониби роҳбарияти идораи рўзнома ҳайати бонуфузи ҷурналистони парлумонӣ ба инъикоси рафти иҷлосия сафарбар карда шуданд, то ки мардум ба ҳар як ҷузъиёти он огоҳ бошанд. Мухбирони парлумонӣ Ҳасанбой Шарифов, Ҳадиятилло Тўйчизода, Шарифҷон Мамадҷонов, Исроилҷон Рабиев (рўҳашон шод бошад!), Fафури Нарзулло, Мазбут Воҳидов бо сарварии Файзулло Атохоҷаев ҳама фардони аз ҷиҳати сиёсӣ комил буданд. Он рўзҳо, ки телевизиони мамлакат ба ҷуз эълони рўихати гурезагони иҷборӣ барномаи дигареро пахш намекард, маводи рўзнома барои мардум ҳамчун роҳнамо, роҳбалад дар интихоби роҳу мавқеи дуруст буданд. Рўзнома бо маводҳояш эътиқоди мардумро ба сохти конститутсионии давлат мустаҳкамтар мегардонд. Ақидаву андешаи солим кадом асту афкори хато кадом, рўшан мекард. Ин ғояҳо аз номи сиёсатмадорони дар ақида устувор, инсонҳои дар имтиҳоноти рўзгор санҷидашуда ва ба эътимоду боварии халқ сазоворгардида дар рўзнома инъикос меёфтанд. Ҳамин буд, ки Раиси дар Иҷлосияи ХVI интихобшудаи Шўрои Олии Ҷумҳурии Тоҷикистон Эмомалӣ Раҳмон дар рўзҳои нахустини ба фаъолият шурўъ кардани худ бо ҳайати эҷодии нашрияи вилоятӣ мулоқот оростанд. Ин нишонаи эътирофи роҳу мавқеи рўзнома, нишонаи эътимод ба нашрияи Ҳукумати вилоят буд.

Аслан ҷурналисти асил бояд сиёсатмадор бошад, ба вазъи замона хуб сарфаҳм равад, мавқеи худро ҳамчун тарғибгари сиёсати давлат донад. Сиёсатмадорони бузургтарини олам - Маркс, Энгелс, Ленин, Бобоҷон Fафуров ва бисёр дигарон ҷурналист буданд.

Ана дар ҳамин рўзҳои ҳалкунандаи тақдири мамлакат, ба андешаи ман нақши сармуҳаррири рўзномаи вилоятӣ, ки мавқеи худро, рисолати рўзномаро аниқ идрок мекард, дар инъикоси воқеъбинона ва то ба ҳар сокини вилоят ва кишвар расонидани афкори солим, ҳуҷҷатҳои Иҷлосия, муҳимияти баргузории он хеле шоиста аст.

Зикри он ҷоиз аст, ки ин фарди шариф бароям ҳаққи устодӣ ҳам дорад. Вақте ба даргоҳи мўътабари рўзнома қадам гузоштам, дар ин ҷо зумраи ҷурналистони оташсухану соҳибқалам фаъолият доштанд. ҳайати кормандони идора бештар аз ҳафтод нафарро ташкил медод ва сармуҳаррири рўзнома аз соли 1971 то соли 1985 Усмонҷон Тоҷибоев (рўҳашон шод бод) бо вуҷуди он, ки маълумоти олӣ доштам, маро ба вазифаи ҳуруфчин ба кор қабул карданд. Яъне, он замон ҳарчанд теъдоди ҷурналистон кам буд, дар интихоби рўзноманигори асил ҳаргиз шитоб намекарданд. Ин охири солҳои ҳафтодум буд. Файзулло Атохоҷаев ҳамчун мудири шўъбаи кишоварзӣ маводи ба шўъбааш воридшудаи меҳнаткашонро дода, мегуфт, ки якбора бо таҳрир чоп кунам. Яъне ба ман малакаи таҳрир намуданро меомўзонид. Дар ҳамин вақтҳо пай мебурдам, зодаи ноҳияи Бобоҷон Fафуров, ки мебошад, баҳри пурраву ҳамаҷониба инъикос намудани фаъолияти ҳар як хоҷагӣ он вақт вилоятамон асосан ба самти аграрӣ буду кори соҳа домани фарох дошт, ҳар як хоҷагидор, сарвари бригада, обмон, каландзан, чорводор, даҳмарда мекўшид дар кору пайкор пешсаф бошад ва дар ҳар шумораи рўзнома, ки он вақт ҳафтае панҷ маротиба интишор мегашт, маводе ё очерки хондание аз ҳаёти ноҳия, албатта буд. Ба назарам, ягон ноҳия аз назари он кас дур намонда буд. Яъне, кору азму субот ва заҳмати сокинони ноҳияро, асосан аз ҷиҳати мусбат дар пеши назари хонанда ҷилвагар мегардонд. Ин аст, ки дар қаламрави ноҳия ҳама эҳтиромаш мекарданд.

Боз як хислати неки ин шахс буд, ки дуои волидон гирифтааст. Чун бо аҳли оила дар шаҳр истиқомат дошт, зуд-зуд аз ҳоли волидонаш хабар гирифта меистод ва субҳи барвақт, аз деҳа албатта, бо ду нони гарму се-чор сар ангур ё ягон меваи дигар ба ҷои кор меомад.

Давоми солҳои сарвариаш, ки ба солҳои аз ҷиҳати сиёсиву иҷтимоӣ душвори мамлакат рост омад, баҳри таъминоти рўзгори кормандон доимо ғамхорӣ мекард, то ки мо дар он рўзҳо азият накашем.

Газетачии асил ҳаст, ки барориши рўзномаро бо тамоми ҷузъиёташ ба таври аъло медонад. Солҳои шўравӣ газета нозукиҳои худро дошт: нахуст тарҳи саҳифа тартиб дода мешуд, мавод аз рўи ҷадвали рубрикаҳо омода мегардиданд, як мавод аз назари чанд нафари масъул мегузашт (яъне мавод мебоист тарбиявӣ бошад, тарзи солими ҳаётро тарғиб кунад). Дар давоми ҳар як мавсими сол бошад, ҳафта ба ҳафтаву моҳ ба моҳ соҳаи кишоварзӣ мавзўоти инъикоси хоси худро дошт. Аз ҷумла, дар мавсими киштукори чигит аз лаҳзаву рўзҳои нахустини чигитпартоӣ то дубаргаву себарга шудан, гулу шона бастан, сарчинӣ, нармкунии зери ниҳолҳо, обмонии вегетативӣ, ғунучин, ба корхонаҳои коркард кашонидан ҳар як раванди ҷараёни ҳосилрасониву ҷамъоварӣ инъикос меёфт. Ва се нафар корманди шўъбаи кишоварзӣ - Ф. Атохоҷаев, зиндаёд Исмоилхон Бобоҷонову Карим Солеҳзода соҳаро монанди панҷ панҷаи худ омўхтаву медонистанд. Ва шояд ҳамин замина гашт, ки ба ҳайси мухбир ба фаъолият шурўъ карда, беш аз бист сол дар вазифаи мудири шўъбаи кишоварзии рўзнома фаъолият доштам...

Дар кадом вазифае фаъолият барад, хоҳ мухбир, ҷонишини котиби масъул, котиби масъул, хоҳ мудири шўъба, муовини сармуҳаррир ё сармуҳаррир, барои нашри рўзнома чун шахси масъултарини идора муносибат мекунад. Одате дорад, ки аз ҳама ҳамкорон дертар аз кор меравад. Пеш аз рафтан ҳар саҳифаи рўзнома ва ҳар сарлавҳаро дигарбора аз назар мегузаронад.

Имрўз, дар ин замони ҳассос низ содиқ ба сиёсати пешгирифтаи давлату Ҳукумат аст, баҳри тарғиби афкори солим дар ҷомеа, барои ба мардум талқин намудани роҳи дуруст, ғояву моҳияти аслии Истиқлолияти давлатӣ ва Ваҳдати миллӣ бо дили софу нерўи хос заҳмат мекашад.

Рафоат МЎЪМИНОВА,
«Ҳақиқати Суғд»

Читать далее

Ҷаҳонбинии ҷавонон аз файзи Истиқлолият аст!

Дар даврони Истиқлолияти давлатӣ ҷиҳати дастгирии ҷавонон заминаи боз ҳам мусоид фароҳам оварда шуд. Дар ин давра санадҳои муҳими давлатӣ қабул гардида, самтҳои фаъолияти онҳо дар шароити муносибатҳои нави сиёсию иҷтимоӣ муайян карда шуданд. Бо пешниҳоди Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмон соли 2017 – Соли ҷавонон эълон ва пазируфта шуд. Омилҳо барои ин пешниҳоди муфид, хушбахтона зиёданд. Зеро, саҳми ҷавонон дар рушди ҷомеа зиёд аст. Ҷавонон дар ҳаёти сиёсиву иқтисодии мамлакат иштироки фаъолона доштанду доранд.

Аҳамияти рушди илм ва маориф байни ҷавонон дар Тоҷикистони соҳибистиқлол таҳти сиёсати давлат қарор дорад. Тавре дар Паёми навбатии Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмон ба Маҷлиси Олӣ зикр доштаанд:

«Наврасону ҷавонони моро зарур аст, ки ҷавобан ба ин ғамхориҳо тамоми саъю талоши хешро ба донишандўзӣ, интихоби касбу ҳунарҳои муосир, ободиву пешрафти сарзамини аҷдодӣ, ҳимояи Ватан, рушди илму техника ва бунёдкорӣ равона созанд. Ҷавонони имрўзаи мо, яъне насли замони Истиқлолият аз наслҳои пешина бо савияи илму дониш, маърифату ҷаҳонбинӣ, сатҳи тафаккур ва одобу ахлоқ фарқи куллӣ доранд, ки ин ҳама боиси ифтихори мо мебошад».

Дар рушди ҷомеаи демократию ҳуқуқбунёд илму фарҳанг ва маориф дунёи маънавии инсонро ташаккул медиҳад. Дар ин замина мавқеи муҳимро ҷавонон ишғол мекунанд. Забон, адабиёт, таърих, сарчашмаҳои хаттӣ, ёдгориҳои таърих, барномаҳои радио, телевизион, маводи компютерӣ, шабакаҳои интернетӣ ва васоити ахбори умум дар тарбияи ахлоқию маънавии ҷавонон нақши асосӣ доранд.

Муҳаққиқони ҷавон ба рисолати таърихии халқи худ ва имрўзи дурахшони он шукргузорӣ карда, дастовардҳои беназирро аз кўшишу ғайрат, садоқату мардонагӣ, поктинатӣ, ватандўстиву меҳанпарастии Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмон мешуморанд. Дар ҳақиқат ҳам Пешвои миллат наҷотбахши воқеиву ростини халқу Ватани худ ҳастанд. Бо иродаву ҳамзабонӣ Ваҳдати миллиро миёни халқи тоҷик ва ҷавонон таҳким бахшида, барои сарҷамъии мардуми тоҷик хизматҳои беназир доранд ва ҷавонон ифтихори чунин Сарвари ваҳдатофару маърифатпарвар ва фидоии миллат ҳастанд.

Падидаи дастгирии ташаббусҳои Пешвои миллат, ки татбиқи босамари сиёсати давлатии ҷавонон аст, аз рўзҳои нахустини соҳибистиқлолӣ дар меҳвари фаъолияти ҳукумати Тоҷикистон қарор дорад. Ҷавонон давомдиҳандаи кору фаъолияти насли калонсол, нерўи созанда ва иқтидори воқеии пешрафти ҷомеа, ояндаи миллат ва давлат мебошанд.

Воқеан, аз баракати Истиқлолияти давлатӣ имрўз ҷаҳонбинии ҷавонон куллан тайғир ёфта, сатҳи одобу маърифат ва муносибати онҳо ба зиндагӣ, иштироки онҳо дар корҳои давлату ҷамъият зиёд шудааст.

Ҷавонон барои ободии Ватан, рушду нумўи иқтисодӣ, суботу оромии кишвар ва ояндаи дурахшони Тоҷикистон сидқан хизмат менамоянд. Имрўзҳо дар муассисаҳои таҳсилоти олии касбӣ ҷавонон-номзадҳои илм, аспирантон, магистрантон ба фаъолияти илмию тадқиқотӣ машғул мебошанд.

Бо дастгирии бевоситаи Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмон ва ҳукумати мамлакат ҳамасола конфронси илмӣ – назариявии олимони ҷавони вилоятҳо дар сатҳи баланд доир гардида, беҳтарин мақолаҳои олимони ҷавон гирд оварда шуда, аз ҳисоби буҷети давлатӣ ба нашр расонида мешаванд, ки ин дастгирӣ олимони ҷавонро пайваста барои ҷустуҷўҳои нав ба нави илмӣ водор месозад.

Тавре маълум аст, мутобиқи Фармони Президенти мамлакат идрорпулии президентӣ барои ҷавонони болаёқат таъсис дода шуда, теъдоди сазоворгаштагони он марҳала ба марҳала зиёд мегардад. Теъдоди зиёди гирандагони идрорпулиҳои президентӣ дар сатҳи ҷумҳурӣ, шаҳодати таваҷҷўҳи хосаи ҳукумат ва Сарвари давлат ба ҷавонони соҳибистеъдод гардидааст. Хушбахтона, ҳамасола дар қатори дигар ҷавонони мамлакат хонандагони муассисаҳои таълимии вилояти Суғд ба гирифтани идрорпулии президентӣ мушарраф мегарданд.

Бо мақсади ҳавасмандии моддиву маънавии донишҷўёну магистрантон ва аспирантон стипендияи Раиси вилоят низ таъсис дода шудааст.

Сарвари давлат ҳамеша таъкид менамоянд, ки ҷавонон, аз ҳама қишрҳои ҷомеа бештар фаъол бошанд, ташаббуси созанда пешниҳод намоянд, рамзҳои давлатӣ, муқаддасоти миллӣ ва дастовардҳои Истиқлолиятро ҳифз кунанд, дар ҳаёти сиёсиву иҷтимоии Тоҷикистони азиз бо дасту дили гарм ва нерўи бунёдгарона ширкат варзанд, амнияти давлат ва шарафу номуси ватандориро ҳимоя карда, худро аз ҳама хавфу хатарҳои номатлуби ҷаҳони муосир эмин нигоҳ доранд ва парчамбардори ин сарзамин, марзу бум ва кишвари муқаддасамон бошанд.

Имрўз, ҷавонон ҳастии хешро баҳри ободиву шукуфоии Ватани маҳбубамон ва халқи азизамон мебахшанд. Ҷавонон пайваста кўшиш менамоянд, ки қуллаҳои баланди илмро фатҳ намуда, вориси ҳақиқии ниёгони хеш гарданд. Вазифаҳо, дастуру супоришҳоеро, ки аз ҷониби Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмон барои ҷавонон дода мешаванд, бо тамоми ҳастӣ ва сарбаландона иҷро намоянд.

Ҳ.Бобоев,
С.Мамадов,
дотсентони кафедраи
андоз ва андозбандии
Донишгоҳи давлатии ҳуқуқ,
бизнес ва сиёсати Тоҷикистон

Читать далее