September 2017

09 September 2017

Тақдими мукофотҳои давлатӣ

Дар маҷлисгоҳи мақомоти иҷроияи ҳокимияти давлатии шаҳри Истаравшан маросими супоридани мукофотҳои давлатӣ ба пешқадамону фаъолони ҷомеа, кормандони соҳаҳои мухталифи иқтисодиву иҷтимоии вилоят баргузор гардид. Мукофотҳои давлатиро Муовини якуми Сарвазири мамлакат Давлаталӣ Саид ва Раиси вилояти Суғд Абдураҳмон Қодирӣ дар вазъияти мутантан тақдим намуданд.

Муовини якуми Сарвазири мамлакат Давлаталӣ Саид ва Раиси вилояти Суғд Абдураҳмон Қодирӣ бо мукофоти давлатӣ сарфарозшудагонро табрик намуда, ба онҳо дар амалӣ гаштани нақшаву ниятҳои нек, ҷиҳати боз ҳам ноил гардидан ба дастовардҳои шоистаи меҳнатӣ, саҳмгузорӣ дар раванди созандагию ободкорӣ барору муваффақиятҳои тоза таманно намуданд.

Читать далее

08 September 2017

Паёми телевизионии Пешвои миллат Эмомалӣ Раҳмон ба муносибати 26-умин солгарди Истиқлолияти давлатӣ

Ҳамватанони азиз!

Фардо мардуми шарифи Тоҷикистон ҷашни муқаддасу мубораки бистушашумин солгарди Истиқлолияти давлатиро бо шукӯҳу тантанаи хосса таҷлил мекунанд.

Ба ин муносибат кулли сокинони кишвар ва ҳамватанони бурунмарзиамонро самимона шодбош гуфта, ба хонадони ҳар яки онҳо саодату хушбахтӣ ва дар роҳи амалисозии нияту нақшаҳои некашон барору комёбӣ орзумандам.

Читать далее

Сарчашмаи пирўзиҳо ва саодати миллат

Ҳангоми ҷашнгирии ҳар як санаи таърихӣ, одатан дастовардҳо ва мушкилоти мавҷударо таҳлил мекунанд ва аз ин хотир, мехостам ба баъзе дастовардҳои давраи соҳибистиқлолии мамлакатамон таваҷҷўҳи хонандагони рўзномаро ҷалб намоям.

Ҷоизи зикр аст, ки баъди пошхўрии давлати абарқудрати Шўравӣ дар як қатор кишварҳои собиқ Иттиҳоди Шўравӣ нооромиҳои шадиди сиёсӣ ба амал омада, Тоҷикистони офтобрўяи мо низ дар солҳои аввали ба даст овардани Истиқлолияти давлатӣ аз ин муноқишаҳои сиёсӣ берун намонд.

Дар давраҳои барои мардуми мо хеле мудҳиш, як гурўҳ шахсони манфиатхоҳ бо ҳамроҳии хоҷагони хориҷиашон зери ниқоби демократия ва озодихоҳӣ давлати соҳибистиқлоли ҷавони моро ба даргириҳои сиёсию маҳалгароӣ рў ба рў карда, оташи ҷанги шаҳрвандиро дар қисми ҷануби кишвар барангехтанд, ки он боиси талафоти калони молӣ ва фавти ҳазорҳо нафар шахсони бегуноҳ гардид.

Хушбахтона, тавассути сиёсати хирадмандонаю дурандешона Сарвари тозаинтихоби давлат, Президенти Ҷумҳурии Тоҷикистон Эмомалӣ Раҳмон дар лаҳзаҳои мураккабу ҳассос тибқи қарори вакилони Иҷлосияи тақдирсози ХVI Шўрои Олии Ҷумҳурии Тоҷикистон ба арсаи сиёсати калон ворид гардида, зимоми роҳбарии давлати дар он марҳала хеле нооромро ба ўҳда гирифтанд.

Яке аз дастовардҳои бузурги солҳои соҳибистиқлолии кишвари мо давлатсозии миллӣ бо истифода аз мустақилияти сиёсӣ, эътибори ҷиддӣ додан нисбат ба барқароркунии арзишҳои фарҳангии миллӣ, нигоҳ доштани забон ва рушди анъанаҳои аҷдодӣ ва татбиқи сиёсати иқтисодӣ бо назардошти рушди босуботи иқтисодию иҷтимоии минтақаҳои мамлакат ба шумор меравад.

Чуноне, ки ба ҳамагон маълум аст, дар ҳамаи ҷабҳаҳои иқтисодию иҷтимоии кишвари мо асосан аз соли 2000 оғоз карда, дигаргуниҳои куллӣ ба амал омада истодаанд. Натиҷаи сиёсати дурбинонаи Роҳбарияти кишвар буд, ки тўли солҳои охир дар саросари мамлакат корҳои ободонию созандагӣ мунтазам вусъати тоза мегиранд.

Зина ба зина амалишавии се ҳадафи стратегии Ҳукумати Ҷумҳурии Тоҷикистон - аз бунбасти коммуникатсионӣ раҳоӣ додани мамлакат, ба даст овардани истиқлолияти энергетикӣ ва ноил шудан ба амнияти озуқаворӣ худ далели дар солҳои соҳибистиқлолӣ ба дастовардҳои беназир ноил гардидани давлати тоҷикон мебошад.

Ботантана ҷашн гирифтани 1100-солагии давлати Сомониён, 2700-солагии шаҳри Кўлоб ва Соли тамаддуни ориёӣ, барориши Пули миллӣ, дохил шудан ба СҲШ (Созмони ҳамкории Шанхай) дар радифи давлатҳои дигар (Русия, Хитой, Ўзбекистон, Қирғизис-тон), қабулшавии ташаббуси таърихии Тоҷикистон дар татбиқи Амалиёти даҳсолаи «Об-барои ҳаёт», барои солҳои 2005-2015, кушода шудани нақби Анзоб, оғози сохтмони роҳи автомобилгарди ағбаи «Шар-Шар», ба кор даромадани НОБ-и «Сангтўда-1», ба истифодабарии хатти барқии «Ҷанубу Шимол», кушода шудани нақби «Шаҳристон» ва ғайраҳо дастовардҳои бузурги Истиқлолият ба шумор мераванд.

Новобаста аз он, ки дар давраи начандон тўлонии ҷанги шаҳрвандӣ ба мардуму иқтисодиёти кишвар зарарҳои ҷиддии молиявӣ расонида шуда буд, алҳол давлати мо ба нишондиҳандаҳои хеле назарраси рушди макроиқтисодӣ ноил гардида, Ҳукумати кишвар дар назди масъулини тамоми шохаҳои ҳокимияти иҷроия вазифаи амалигардонии ҳадафи дигари олии иҷтимоӣ -ноил шудан ба зиндагии шоистаи ҳар як сокини мамлакатро гузоштааст.

Дар ин раванд, барномаҳои махсуси ҳукуматӣ таҳия гардида, чуноне, ки аз Паёми Асосгузори сулҳу Ваҳдати миллӣ-Пешвои миллат, Президенти мамлакат, мўҳтарам Эмомалӣ Раҳмон ба Маҷлиси Олии Ҷумҳурии Тоҷикистон бармеояд, ҷиҳати амалигардонии ҳадафҳои мазкур тадбирҳои судманд андешида шуда истодаанд.

Боиси зикр аст, ки сохтмонҳои азими роҳу пулҳо, иншооти табобатию соҳаҳои маориф, фарҳангу варзиш ва дигар соҳаҳои иқтисодию иҷтимоии кишвар аз натиҷаҳои хуби фаъолияти иқтисодиёт ва ғанӣ гардонидани қисми даромади буҷети давлатӣ шаҳодат медиҳад.

Дар ҳаллу фасли муаммоҳои иҷтимоӣ ва пешрафти корҳои ободонию созандагӣ дар маҳалҳо соҳибкорони бонангу номуси кишвар ва кулли сокинони мамлакат низ саҳми худро гузошта истодаанд, ки далели раднопазири Ваҳдати миллӣ мебошад.

Алҳол мо дар арафаи ҷашнҳои бузурги умумидавлатӣ - 26-солагии Истиқлолияти давлатии Ҷумҳурии Тоҷикистон ва 25-солагии Иҷлосияи таърихии ХVI Шўрои Олии Ҷумҳурии Тоҷикистон қарор дорем. Ҳар як сокини давлати моро зарур аст, ки ба қадри тинҷию оромии мамлакат, дўстию рафоқат расида, баҳри боз ҳам мустаҳкам намудани ин равандҳо ва пояҳои давлати соҳибистиқлоламон ҳамеша саҳмгузор бошем.

Зеро ҳаллу фасли тамоми муаммоҳои зиндагӣ танҳо тавассути оромии сиёсӣ, Ваҳдати комил, меҳнати аҳлона ва хирадмандию дурандешии ҳар як фарди ватандўст имконпазир аст. Бо чунин амалҳои содиқонаи хеш, мо метавонем кишвари азизамонро дар арсаи ҷаҳонӣ машҳур гардонем ва бори дигар исбот намоем, ки ҳар яки мо ворисони арзандаи шоҳ Исмоили Сомонӣ, Синою Рўдакӣ, Мавлоно Ҷалолиддини Румӣ, Бобоҷон Ғафурову Мирзо Турсунзода ва дигар алломаҳои миллати тоҷик ҳастем.

Карамулло Одилов,
Корманди шоистаи
 Ҷумҳурии Тоҷикистон, Аълочии
 молияи Иттиҳоди Шўравӣ ва
Ҷумҳурии Тоҷикистон 

Читать далее

Гулкорӣ нишонаи зебоипарастӣ

Имрўз дар Ҷумҳурии Тоҷикистон талабот ба гулҳо зиёд шудааст. Кишвари тоҷикон офтобрўя буда, дар ҳама фасли сол имконияти гулзору зебо гардониданро дорост. Бинобар он, ҳамасола гулҳои зиёд парвариш ва гўшаву канори вилоят кабудизор карда мешавад. Ҳатто, дар фасли сармо гулҳо шукуфону намуди зоҳирии кўчаву хиёбонҳо дилкашу рўҳафзо гардад.

Оид ба рафти шинонидани гулҳои зимистонӣ сардори қитъаи кабудизоркунии Сарраёсати ободонии хоҷагии манзилию коммуналии шаҳри Хуҷанд Ғайбулло Тошматов гуфт, ки дар машварати омӯзишию амалӣ оид ба муаррифии навъҳои гуногуни гулҳои зимистонӣ дар қаламрави вилоят, ки бо иштироки Раиси вилояти Суғд Абдураҳмон Қодирӣ баргузор гардид, супориш шуда буд, ки то санаи 10-уми сентябр ба муносибати ҷашнҳои бузурги миллӣ шинонидани гулҳо ба анҷом расонида шавад. Бинобар ин айни замон мо асосан чор навъи гулкарам, навъҳои сенариум, тагес, виола ва календула, ки шумораашон аз панҷ то сад ҳазор дона аст, шинонида истодаем. Барои дар сатҳи зарурӣ гузаронидани маъракаи гулшинонӣ 9 мутахассиси соҳаи гулпарварӣ ва 128 коргар дар 8 минтақа корро вусъат бахшида истодаанд. Дар муассиса гармхона мавҷуд аст, ки дар он намудҳои гуногуни гулҳои тирамоҳию зимистонӣ парвариш карда мешаванд, ки ин намуди гулҳо ба сардии фасли зимистон тобовар буда, то фасли баҳор шукуфон хоҳанд монд.

Дар кадом сатҳ қарор доштани маъракаи шинонидани гулҳоро барои фаҳмидан ба Боғи фарҳангию фароғатии ба номи Камоли Хуҷандӣ омадем ва маълум гардид, ки аллакай аз санаи 31 август гулшинонӣ оғоз шуда, дар боғ тақрибан 40 ҳазор гулҳои зимистонӣ шинонида шудаанд.

- Парваридани гул кори саҳл нест ва барои ба таври бояду шояд шукуфону зебо гаштани он мисоли марди деҳқон арақи ҷабин рехтан лозим аст. Нигоҳубини нодурусти гул ба нобуд гаштани он боис мешавад. Бояд гуфт, ки гулҳо натанҳо дар фасли баҳору тобистон, балки дар давраи тирамоҳу зимистон низ парвариш карда мешаванд, - изҳор дошт зимни сўҳбат Абдусалом Шодибеков - муовини аввали омири кулл, директори Боғи фарҳангию фароғатии ба номи Камоли Хуҷандӣ.

- Пеш аз парвариши гул бояд тухми онҳоро дуруст нигоҳ карда, хокашро бо нуриҳои минералӣ ғанӣ гардонидан лозим аст, танҳо дар ҳамин ҳолат мо метавонем гулҳои зебои рангорангро ба халқ пешкаш намоем,-гуфт ў.

Ҳамчунин ў иброз дошт, ки дар осоишгоҳи “Баҳористон”-и шаҳри Гулистон гармхона мавҷуд аст, ки дар он ҷо гулҳои бешумори зимистонӣ парвариш карда мешаванд. Гармхонаи мазкур шаҳру навоҳии Бобоҷон Ғафуров, Гулистон, Бўстон, Истаравшан, Мастчоҳ, Шаҳристон, Истиқлолро бо гулҳои зимистонӣ таъмин мекунад.

Оид ба дар фасли сармо гулпўшу зебо гардонидани назди боғу гулгашт ва муассисаҳои мухталиф сокинон чунин изҳори ақида намуданд:

Нуринисо Раҳматова, сокини шаҳри Хуҷанд, мураббия:

- Шод аз он ҳастам, ки дар шаҳри Хуҷанд аллакай шинонидани гулҳои зебову рангоранги зимистона оғоз шудааст. Рўзи гузашта аз Боғи фарҳангиву фароғатии ба номи Камоли Хуҷандӣ гузар доштам ва дидам, ки занони гулпарвар гул шинонида истодаанд. Аз дидани ин манзара шод гаштам, зеро дар фасли тирамоҳу зимистон дар атроф гулҳоро дида, инсон худро бардаму солим ва аз зебогии онҳо зиндадилу некбахт эҳсос менамояд. Ин аз он дарак медиҳад, ки диққату назари роҳбарият нисбат ба мо - мардуми кишвар басо баланд аст. Зеро зебову обод ва сарсабзу гулпўш кардани гўшаву канори кишвар аз фарҳангдўстиву меҳанпарастии эшон дарак медиҳад. Бояд гуфт, ки гулпўш кардани вилоят ба фарорасии 26-умин солгарди Истиқлолияти Ҷумҳурии Тоҷикистон айни муддаост. Гулпўшу зебо нигоҳ доштани Ватани азизамон бояд мақсади асосии ҳар фарди соҳибдил бошад.

Ҳурибибӣ Каримова, сокини ноҳияи Бобоҷон Ғафуров, соҳибхоназан:

- Имрўз дар ноҳияи зебоманзари мо гулшинонӣ оғоз шудааст ва ин аз он шаҳодат медиҳад, ки роҳбарони вилояту ноҳия барои сарсабзу зебо гаштани хиёбону мавзеъҳои диёр таваҷҷўҳи хоса зоҳир менамоянд. Гул худ нишонаи зебоиву нозукист ва дар фасли сармо дидани гулҳои шукуфта рўҳи инсонро болида ва қалбро шод мегардонад. Гумон дорам, ки дар оянда низ сиёсати пешгирифтаи роҳбарони вилояту ноҳия оид ба дар фасли сармо кабудизоркуниву гулшинонӣ ва зебову обод нигоҳ доштани кишвар давом хоҳад ёфт. Имрўз ба вилояти Суғд аз ҳар гўшаву канори ҷаҳон меҳмонон ва сайёҳон меоянд ва сарсабзу зебо будани диёрамон айни муддаост.

Бояд зикр кард, ки аз ҷониби кормандони қитъаи кабудизоркунии Сарраёсати ободонии хоҷагии манзилию коммуналии шаҳри Хуҷанд давоми ҳафта дар маҳаллаҳои “Бофанда”, “Гули ҷаҳон”, кўчаву хиёбонҳо ва роҳҳои асосии шаҳри Хуҷанд беш аз 20 ҳазор гулҳои зимистонӣ шинонида шуданд.

Шаҳбонуи СИДДИҚ,
“Ҳақиқати Суғд”

Читать далее

Номаҳои шодбошӣ аз сарони давлатҳои хориҷӣ ба муносибати 26-умин солгарди Истиқлолияти давлатии Ҷумҳурии Тоҷикистон

Дар робита ба фарорасии ҷашни 26-мин солгарди Истиқлолияти давлатии Ҷумҳурии Тоҷикистон ба унвонии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз сарони давлатҳои хориҷӣ ва ҳукуматҳо, роҳбарони созмонҳои байналхалқию минтақавӣ, раисони созмонҳои молиявию ҷамъиятӣ номаҳои шодбошӣ ворид гардиданд.

Читать далее

Табрики Раиси вилоят Абдураҳмон Қодирӣ ба муносибати Рӯзи роҳсозон

Ҳамасола якшанбеи дуюми моҳи сентябр дар қаламрави ҷумҳурӣ Рӯзи роҳсозон таҷлил карда мешавад.

Дар Ҷумҳурии Тоҷикистон, ки 93 дарсади ҳудудашро кӯҳҳо ташкил медиҳанд, роҳҳои автомобилгард яке аз воситаҳои асосии пайваст намудани манотиқи мухталифи кишвар ба ҳисоб меравад. Аз ин боис, ҳукумати Ҷумҳурии Тоҷикистон ба сохтмон, таҷдид ва азнавсозии роҳҳои автомобилгард ва иншоотҳои он таваҷҷӯҳи хоса зоҳир менамояд.

Самараи талошҳои ҳамешагии Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон аст, ки инфрасохтори нақлиёт сол аз сол беҳтар гардида, ҳамасола садҳо километр роҳҳо ва даҳҳо пулҳои замонавӣ бунёд гардида истодаанд.

Чи тавре, ки Сарвари кишвар дар Паёми навбатии худ ба Маҷлиси Олии Ҷумҳурии Тоҷикистон баён доштанд: «Бо мақсади пурра ба меъёрҳои замонавӣ мутобиқ гардонидани роҳҳои мошингард ва дигар инфрасохтори нақлиётӣ ва ба мамлакати транзитӣ табдил додани Тоҷикистон дар давраи миёнамӯҳлат бо ҷалби сармояи хориҷиву ватани таҷдид ва азнавсозии зиёда аз 2000 километр роҳҳои мошингард пешбинӣ шудааст».

Маврид ба қайд аст, ки бо мақсади тақвият бахшидан ба корҳои таъмиру тармими роҳҳои автомобилгард дар партави дастуру супоришҳои Сарвари давлат Барномаи вилоятии «Соли роҳҳои обод» қабул ва мавриди амал қарор дода шуд, ки дар доираи он ҳолати техникии зиёда аз 6,0 ҳазор км роҳи автомобилгарди вилоят беҳтар гардонида, 400 км роҳ аз таъмири асосӣ бароварда шуд.

Роҳсозони вилоят саъю кӯшиш доранд, ки бо истифода аз имкониятҳои моддию зеҳнӣ роҳҳои автомобилгардро тамоми сол дар ҳолати коршоямӣ нигоҳ дошта, фаъолияти мунтазами воситаҳои нақлиётро таъмин намоянд.

Итминони комил дорем, ки кормандони соҳа минбаъд низ бо дарки баланди масъулиятшиносӣ фаъолиятро ба роҳ монда, санаи тақдирсози миллат 25-умин солгарди Иҷлосияи XVI Шӯрои Олии Ҷумҳурии Тоҷикистон бо нишондиҳандаҳои баланди истеҳсолӣ пешвоз мегиранд ва дар ободонию пешрафти кишвари азизамон ҳиссаи босазо мегузоранд.

Ба кулли кормандони соҳа, саломатии бардавом, ободии рӯзгор ва барору комёбиҳои меҳнатӣ таманно менамоям.

Иди касбӣ муборак!

Читать далее

Мусоидат ба беҳдошти зиндагии мардум

Рўзи гузашта бахшида ба 26-умин солгарди Истиқлолияти давлатии Ҷумҳурии Тоҷикистон дар шафати Театри мазҳакаи мусиқии ба номи Камоли Хуҷандӣ ва Кохи матбуот ярмарка - фурўши маҳсулоти кишоварзӣ баргузор гардид, ки дар он деҳқонону кишоварзон аз шаҳру навоҳии вилоят маҳсули дастранҷи хешро ба фурўш бароварданд.

Бино ба маълумоти намояндаи Сарраёсати кишоварзии вилоят Алишер Дадобоев дар ярмаркаи мазкур аксари шаҳру навоҳии вилоят, аз ҷумла Спитамен, Исфара, Конибодом, Панҷакент, Шаҳристон, Ҷаббор Расулов, Мастчоҳ ва Кўҳистони Мастчоҳ иштирок намуда, маҳсулоти кишоварзии хешро ба мардум бо нархҳои аз бозор 20 то 30 фоиз арзонтар пешниҳод намуданд. Дар маҷмўъ, беш аз 437 тонна маҳсулот ва 46 ҳазор дона тухм барои сокинони маркази вилоят пешкаш гардид.

Муовини Раиси вилоят Ориф Хоҷазода аз ҷараёни ярмарка – фурўши маҳсулот боздид ба амал оварда, ба масъулин таъкид дошт, ки бобати арзиш ва сифати молу маҳсулот назорат намоянд.

Қайд кардан ба маврид аст, ки бо дастуру супориши Роҳбарияти вилоят чунин ярмаркаҳо дар ҳар иду чорабиниҳои мухталиф баргузор мегарданд. Ҳадафи асосии ташкили ярмаркаҳо пеш аз ҳама, мусоидат намудан ба пастравии арзиши маҳсулот ва беҳдошти сатҳи зиндагии мардум мебошад.

Маъмурахон Самадова,
«Ҳақиқати Суғд»

Читать далее

07 September 2017

Бо нерӯи бунёдгарона – дар ҳифзи дастовардҳои Истиқлолият

Дар даврони Истиқлолияти давлатӣ ҷиҳати дастгирии ҷавонон заминаи боз ҳам мусоид фароҳам оварда шуд. Дар ин давра санадҳои муҳими давлатӣ қабул гардида, самтҳои фаъолияти онҳо дар шароити муносибатҳои нави сиёсию иҷтимоӣ муайян карда шуданд.

Бо пешниҳоди Асосогузори сулҳу ваҳдати миллӣ – Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон соли 2017 – Соли ҷавонон эълон ва пазируфта шуд. Омилҳо барои ин пешниҳоди муфид, хушбахтона, зиёданд. Зеро саҳми ҷавонон дар рушди ҷомеа зиёд буд ва ҳаст. Ҷавонон дар ҳаёти сиёсиву иқтисодии мамлакат иштироки фаъолона доштанду доранд.

Аҳамияти рушди илм ва маориф байни ҷавонон дар Тоҷикистони соҳибистиқлол таҳти сиёсати давлат қарор дорад. Тавре аз нуктаҳои Паёми имсолаи  Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон ба Маҷлиси Олӣ бармеояд, «Наврасону ҷавонони моро зарур аст, ки ҷавобан ба ин ғамхориҳо тамоми саъю талоши хешро ба донишандўзӣ, интихоби касбу ҳунарҳои муосир, ободиву пешрафти сарзамини аҷдодӣ, ҳимояи Ватан, рушди илму техника ва бунёдкорӣ равона созанд.

Ҷавонони имрўзаи мо, яъне насли замони Истиқлолият аз наслҳои пешина бо савияи илму дониш, маърифату ҷаҳонбинӣ, сатҳи тафаккур ва одобу ахлоқ фарқи куллӣ доранд, ки ин ҳама боиси ифтихори мо мебошад».

Дар рушди ҷомеаи демократию ҳуқуқбунёд илму фарҳанг ва маориф дунёи маънавии инсонро ташаккул медиҳанд, дар ин замина мавқеи муҳимро ҷавонон ишғол мекунанд. Забон, адабиёт, таърих, сарчашмаҳои хаттӣ, ёдгориҳои таърих, барномаҳои радио, телевизион, маводи компютерӣ, шабакаи интернет, васоити ахбори умум дар тарбияи ахлоқию маънавии ҷавонон нақши асосӣ доранд.

Муҳаққиқони ҷавон ба рисолати таърихии халқи худ ва имрўзи дурахшони он шукргузорӣ карда, дастовардҳои беназири халқи худро аз кӯшишу ғайрат, садоқату мардонагӣ, поктинатӣ, ватандўстиву меҳанпарастии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон  мешуморанд. Бетардид Пешвои миллат наҷотбахшандаи воқеиву ростини халқу Ватани худ ҳастанд. Бо иродаву ҳамзабонӣ Ваҳдати миллиро миёни халқи тоҷик ва ҷавонон таҳким бахшида, барои сарҷамъии мардуми тоҷик хизматҳои беназир доранд ва ҷавонон ифтихори чунин Сарвари ваҳдатофару маърифатпарвар ва фидоии миллат доранд.

Падидаи дастгирии ташаббусҳои Пешвои миллат, ки татбиқи босамари сиёсати давлатии ҷавонон аст, аз рӯзҳои нахустини соҳибистиқлолӣ дар меҳвари фаъолияти ҳукумати Тоҷикистон қарор дорад. Ҷавонон давомдиҳандаи кору фаъолияти насли калонсол, нерӯи созанда ва иқтидори воқеии пешрафти ҷомеа, ояндаи миллат ва давлат мебошанд. 

Воқеан, аз баракати истиқлолияти давлатӣ имрӯз ҷаҳонбинии ҷавонон куллан тайғир ёфта, сатҳи одобу маърифат ва муносибати онҳо ба зиндагӣ, иштироки онҳо дар корҳои давлату ҷамъият зиёд шудааст.

Ҷавонон барои ободии Ватан, рушду нумӯи иқтисодӣ, суботу оромии кишвар ва ояндаи дурахшони Тоҷикистон сидқан хизмат менамоянд.

Имрӯзҳо дар муассисаҳои таҳсилоти олии касбӣ ҷавонони номзадҳои илм, аспирантон магистрантон ба фаъолияти илмию тадқиқотӣ машғул мебошанд.

Бо дастгирии бевоситаи Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон ва ҳукумати мамлакат ҳамасола конфронси илмӣ – назариявии олимони ҷавони вилоятҳо дар сатҳи баланд доир гардида, беҳтарин мақолаҳои олимони ҷавон гирд оварда шуда, аз ҳисоби буҷети давлатӣ ба нашр расонида мешавад, ки ин дастгирии олимони ҷавон, пайваста барои ҷустуҷӯҳои нав ба нави илмӣ водор месозад.

Тавре маълум аст, мутобиқи Фармони Президенти мамлакат идрорпулии президентӣ барои ҷавонони болаёқат, таъсис дода шуда, теъдоди сазоворгаштагони он марҳила ба марҳила зиёд мегардад. Теъдоди зиёд гирандагони идрорпулиҳои президентӣ дар сатҳи ҷумҳурӣ, шаҳодати таваҷҷӯҳи хосаи ҳукумат ва Сарвари давлат ба ҷавонони собҳибистеъдод гардидааст. ҳушбахтона, ҳамасола дар қатори дигар ҷавонони мамлакат хонандагони муассисаҳои таълимии вилояти Суғд ба гирифтани идрорпулии президентӣ мушарраф мегарданд.

Бо мақсади ҳавасмандии моддиву маънавии донишҷўёну магистрантон ва аспирантон стипендияи Раиси вилоят таъсис дода шудааст.

Асосҳои рушди соҳаи илм ва маориф дар байни ҷавонон ҷойи махсуси худро дорад, ки дар тўли солҳои соҳибистиқлолӣ ба натиҷаҳои назарраси худ оварда расонидааст.

Сарвари давлат ҳамеша таъкид менамоянд, ки ҷавонон, аз ҳама қишрҳои ҷомеа бештар фаъол бошанд, ташаббуси созанда пешниҳод намоянд, рамзҳои давлатӣ, муқаддасоти миллӣ ва дастовардҳои Истиқлолиятро ҳифз кунанд, дар ҳаёти сиёсиву иҷтимоии Тоҷикистони азиз бо дасту дили гарм ва нерўи бунёдгарона ширкат варзанд, амнияти давлат ва шарафу номуси ватандориро ҳимоя карда, худро аз ҳама хавфу хатарҳои номатлуби ҷаҳони муосир эмин нигоҳ доранд ва парчамбардори ин сарзамин, марзу бум ва кишвари муқаддасамон бошанд.

Имрӯз, ҷавонон ҳастии хешро баҳри ободиву шукуфоии Ватани маҳбубамон ва халқи азизамон мебахшанд. Ҷавонон пайваста кӯшиш менамоянд, ки қуллаҳои баланди илмро фатҳ намуда, вориси ҳақиқии ниёгони хеш гарданд. Он вазифаҳое, дастуру супоришҳоро, ки аз ҷониби Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон барои ҷавонон дода мешавад, бо тамоми ҳастӣ ва сарбаландона иҷро намоянд.

Ҳ.С. Бобоев,
С. В. Мамадов,
дотсентони кафедраи андоз
ва андозбандии Донишгоҳи давлатии ҳуқуқ,
бизнес ва сиёсати Тоҷикистон

Читать далее

Кафили пирӯзӣ ва саодат

Бисту шаш сол муқаддам муҳимтарин воқеаи таърихии сарнавишти миллати тоҷик ба вуқӯъ пайваст. Истиқлолияти давлатии Ҷумҳурии Тоҷикистон эълон гардида, халқи тоҷик соҳиби давлати озоду соҳибихтиёр шуд.

Ин ҳодисаи фараҳбахш аввали моҳи сентябри соли 1991 ба вуқўъ пайваст ва 9 сентябр расман Рўзи Истиқлолияти давлатии Ҷумҳурии Тоҷикистон қабул гардид. Дар харитаи сиёсии ҷаҳон давлати наве бо номи Тоҷикистон арзи вуҷуд намуд, ки ҳоло мо бистушашсолагии  Истиқлолияти онро ҷашн мегирем. Аз ҳамон вақт то имрўз ин санаи муборак барои миллати тоҷик ҷашни муқаддас маҳсуб меёбад. Истиқлолият буд, ки Тоҷикистонро аксар давлатҳои ҷаҳон ҳамчун давлати мустақил ва дорои фарҳанги бою ғанӣ то имрӯз мешиносанд ва ба Сарвараш эҳтироми хоса доранд. Даврони Истиқлолият барои мо имкони воқеӣ фароҳам овард, ки пешрафти минбаъдаи кишвари азизамонро ба суи ҷомеаи демократӣ, ҳуқуқбунёд ва дунявӣ интихоб намоем. Бисту шаш сол аст, ки хуршеди истиқлол бо нурҳои ҳаётбахши худ, дар осмони софи Тоҷикистон  нурафшонӣ мекунад. Дар солҳои аввали Истиқлолият Тоҷикистон ба гирдоби ҷанги шаҳрвандӣ печид, иқтисодиёт фалаҷ гардид ва ҷомеаро бӯҳрони гарони сиёсиву иқтисодӣ фаро гирифт. Иқтидори истеҳсолӣ рӯ ба коҳиш оварда, хазинаи давлат холӣ монд ва хатари гуруснагӣ ба миён омад.

Бо ҷаҳду талош,  ва ҷоннисориҳои Асосгузори сулҳу Ваҳдати миллӣ- Пешвои миллат, Президенти Ҷумҳурии Тоҷикистон. мӯҳтарам Эмомалӣ Раҳмон мамлакат аз вартаи ҷанги хонумонсуз баромад ва инчунин сохти конститутсионӣ барқарор гардида, таҳкиму тақвияти давлату давлатдории миллӣ ва сарҷамъиву ваҳдат таъмин гардид.

Истиқлолияти мо гувоҳи он аст, ки миллати тоҷик аз қадимулайём дорои марзу бум, расму оини ба худ хос ва фарҳанги бою ғанӣ буда, барои нигоҳдошти онҳо ҷаҳду талошҳои беандоза менамуд.

Тамоми сокинони кишвари озоду ободи мо имрўз ифтихор доранд, ки бисту шаш сол қабл  нахустин хиштҳои пойдевори истиқлолияти воқеӣ ва давлатдории миллии худро ниҳоданд. Аз шарофати мустақилият соҳиби рамзҳои давлатӣ – Парчам, Нишон ва Суруди нави миллӣ гардидем, ки Парчами давлатиамон дар минбарҳои баланди ҷаҳонӣ парафшон гардида, суруди миллиамон бошад  дар маросиму чорабиниҳои сатҳи олӣ ва дигар маъракаҳои муҳим бо садои баланд Тоҷикистонро ба ҷаҳониён муаррифӣ менамояд.

Маҳз дар даврони Истиқлолият Артиши миллӣ таъсис дода шуд, ки ҳифзи марзу буми Ватан ва сарҳади давлати худро ба души худ гирифтем. Нақши Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон дар пойдории Истиқлолият, Ваҳдати миллӣ ва бунёди ҷомеаи демократии адолатпарвар басо бузург аст. Дар солҳои  аввали  ба даст овардани Истиқлолият то ба имрӯз ҳукумати мамлакат ғамхорӣ дар ҳаққи мардуми кишвар, боло бурдани сатҳи зиндагии онҳо, ҳаёти осудаву саодатмандонаи ҳар хонадони мамлакат мақсаду маром ва ҳадафи ҳамешагии худ меҳисобад. Маҳз бо заҳматҳои шабонарӯзии Пешвои миллат дар муддати 26 соли Истиқлолият бо вуҷуди мушкилоту монеаҳои зиёд иқтисодиёти милламон бо суръати кайҳонӣ рушд ёфта, сатҳи зиндагии мардум бо маротиб баланд гардида истодааст. Дар даврони Истиқлолият якчанд барномаи стратегӣ қабул ва роҳандозӣ шуда истодаанд, ки  барои пешрафти ҳамаи соҳаҳо мусоидат менамоянд.

Ҷумҳурии Тоҷикситон ҳамчун давлати соҳибистиқлол таҳти сарварии Асосгузори сулҳу Ваҳдати миллӣ- Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон барои ҳалли масъалаҳои глобалӣ, аз ҷумла дастрасии аҳолии ҷаҳон бо  оби тоза, нақши муҳим бозида истодааст.

Бояд гуфт, ки Истиқлолият ин ганҷинае бебаҳое мебошад, ки ҳамаи муваффақият аз он маншаъ иегиранд. Аз ин хотир ҳар як фарди тоҷику тоҷикситониро зарур аст, ки барои  нигоҳдории арзишҳо ва манфиатҳои миллӣ саъу кӯшиш намояд,  барои  Ватан содиқона хизмат намуда Истиқлолият ва якпорчагии Тоҷикистонро ҳифз намояд. 

Муҳаммадсодиқ БОҚИЗОДА,
сокини ноҳияи Кӯҳистони Мастчоҳ

Читать далее

Самараи Истиқлолият

Истиқлолияти давлатӣ барои рушди босуръати соҳаи маориф ва тайёр кардани кадрҳои баландихтисос  шароитҳои мусоид фароҳам овард.

Асосгузори сулҳу Ваҳдати миллӣ – Пешвои миллат, Президети Ҷумҳурии Тоҷикистон борҳо таъкид кардаанд, ки «Яке аз масъалаҳои бисёр муҳум,  ин тарбияи кадрҳои ҷавобгў ба талаботи бозори меҳнати дохилӣ ва хориҷӣ мебошад. Кишварамон имрўз, алалхусус ба тайёр намудани мутахассисони баландихтисоси соҳаи геология ва коркарди маъдани сатҳи байналмилалӣ ниёзи бештар дорад ».

Донишкадаи кўҳӣ-металлургии Тоҷикистон дар кори тайёр намудани мутахассисони соҳавӣ ва рушди саноати кўҳӣ-металлургии кишварамон саҳми арзишманду назаррас дорад.

Донишгоҳи мазкур 3-уми майи соли 2006 дар асоси қарори ҳукумати Ҷумҳурии Тоҷикистон таъсис дода шуд ва соли 2016 даҳсолагии он таҷлил гашт.

Бахшида ба ҷашни 10-солагии ин донишкада китоби номзади илмҳои геология ва минералогия, дотсент М.Фозилов ва номзади илмҳои таърих, дотсент И.Абдуллоев Донишкадаи кўҳӣ-металлургии Тоҷикистон «Марҳилаҳои асосии таърихӣ» нашр гардид.

Дар соли аввали хониши 2006-2007 аввалин донишҷўён аз рўи 10 ихтисос бо шумораи 344 нафар ба факултаҳои корҳои кўҳӣ, металлургия ва энергомеханика қабул гардиданд.

Аз рўзҳои аввал дар донишкада ба масъалаи ташкили ҷараёни таълим, тарбия ва корҳои таълимию методӣ аҳамият дода шуда, корҳои зиёде иҷро гардид.

Бо мақсади мутамарказ намудани корҳои  илмию методӣ, ҷорӣ намудани усулҳои нави таълимӣ аз лаҳзаи таъсисёбӣ шўъбаи таълим ва шўрои таълимӣ-методӣ ба фаъолият оғоз намуда, то ба имрўз пурсамар фаъолият дорад.

Дар Донишкада оид ба тайёр намудани кадрҳои илмӣ-педагогӣ аҳамият дода мешавад. Бо ин мақсад дар Донишкада соли 2014 шўъбаи аспирантура таъсис ёфт. Алҳол ин ҷо 12 нафар аспирант таҳсил намуда, корҳои илмӣ-тадқиқотӣ мебаранд.

Ба ғайр аз ин бо роҳи унвонҷўӣ тайёр намудани кадрҳои унвондор  низ ба роҳ монда шудааст. Дар тўли даҳ соли фаъолияти донишкада 12 нафар устод дар мавзўъҳои гуногун рисолаҳои номзадиро дифоъ намуда, сазовори унвони номзади илм гардиданд.

Имрўз дар донишкада 41 нафар номзади илм-дотсентон ва 5 нафар доктори илм-профессорон фаъолият менамоянд.

Бояд зикр, кард ки дар донишкада ба масъалаи ташкили конфронсҳои илмӣ, намоиш – озмунҳо дар баробари раванди таълим аҳамияти лозими додашуда, корҳои зиёде иҷро шуданд.

Ихтирооти дотсент А.Қодиров - «Насоси автоматики гидравликӣ, таҷҳизоти фотометрии ДКМТ», ихтирооти профессор Х.Назаров – «Тарзи гирифтани уран аз тахтаҳои обдор», «Тарзи коркарди боқимондаҳои урани саноатӣ», ихтирооти дотсент О.Тўхтасинов «Сохтор барои ҳосил кардани йод аз пўсти чормағз» ва дигарон сазовори потент гардиданд, ки онҳо барои истеҳсолот аҳамияти муҳим доранд.

Донишкада бо бисёр донишгоҳҳои бонуфузи давлатҳои хориҷ ҳамкориҳои судманд доранд. Чунончӣ, бо донишгоҳҳои бонуфузи Федератсияи Россия, Украина, Белорус, Қазоқистон, Қирғизистон, Норвегия, Словения, Португалия, Ҷумҳурии халқии Чин ва Словения.

Чунончӣ, дар ин донишкада бо профессори донишгоҳи илмҳои табии Нарвегия Харта Ратнавира, мактаби байналмилалии Словения Петер Стегнер, ректори донишгоҳи нафти Ҷумҳурии халқии Чин Шан Хун Хун, директори кули иттиҳодияи Тетис – петролиуми ИМА Дэвид Робсон, роҳбари корхонаи омўзиши портовҳои радиатсионии Шветсария Эберл Хансҷонрч ва бисёр дигар олимону мутахассисони хориҷӣ вохӯриҳобаргузор гардиданд.

Бояд афзуд, ки бо мақсади боз ҳам васеъ ривоҷ додани ҳамкориҳои илмию фарҳангӣ бо Ҷумҳурии ҳалқии Чин соли 2015 дар назди Донишкадаи қўҳӣ – металлургии Тоҷикистон Донишкадаи Конфутсий таъсис дода шуд, ки он дар кори омўхтани забон ва фарҳангӣ чинӣ дар байни донишҷўёни тоҷик саҳми арзандаю назаррас хоҳад гузошт.

Соли хониши 2010-2011 хатми аввалини донишҷўён Донишкадаи кўҳӣ – металлургии Тоҷикистон ба вуқўъ пайваст. Дар ин сол 165 нафар донишҷў аз рўи ихтисосҳои корҳои кўҳӣ, тоза кардани канданиҳои фоиданок, коркарди конҳои нафту газ, металлургияи ранга ва ғайра Донишкадаро хатм намуданд. Дар асоси мактуби Вазорати энергетика ва саноати Ҷумҳурии Тоҷикистон 74 нафар хатмкунанда ба 17 корхонаи саноатӣ барои кор фиристонида шуданд.

Дар донишкада ба масъалаи бо ҷойи корӣ таъмин намудан ва гузаронидани таҷрибаомўзии истеҳсолӣ аҳамияти хосса дода мешавад.

Донишкада бо корхонаи «Фулузоти нодири Ленинобод», ҶСК «Чароғ», ҶДММ «Хуаксин Ғаюр семент», ҶДММ «Петролеум Суғд», корхонаи алюминии тоҷик, комбинати «Такоб», ҶДММ «Элегант» ва даҳҳо корхонаҳои дигар ҳамкорӣ дорад ва дар 45 корҳонаи саноатӣ таҷрибаомўзии истеҳсолии донишҷўён гузаронида мешавад.

Донишкадаи кўҳӣ – металлургии Тоҷикистон яке аз ҷавонтарин муассисаҳои олии кишвар ба ҳисоб меравад.

Имрўз дар ин донишкада аз рўи 17 ихтисос мутахассисон тайёр карда мешаванд, ки шумораи умумии донишҷўён зиёда аз 3000 нафарро ташкил медиҳад.Б.Ризоев,

          Ф.Ҳомидов,
          д.и.т., профессорони Донишгоҳи давлатии
          ҳуқуқ,  бизнес ва сиёсати Тоҷикистон,
         А.Одинаев,
Б.Алимов,
 н.и.т. дотсентони Донишгоҳи давлатии
         ҳуқуқ, бизнес ва сиёсати Тоҷикистон

Читать далее