05 December 2017

Асоси миллӣ ва худшиносӣ

Дар Сарраёсати Агентии омори назди Президенти Ҷумҳурии Тоҷикистон дар вилояти Суғд дар доираи чорабиниҳо бахшида ба 25- солагии Иҷлосияи ХVI Шӯрои Олии Ҷумҳурии Тоҷикистон конфронси илмӣ баргузор гардид.

Сардори Сарраёсат Ҳокимбек Накҳатзода дар маърузааш роҷеъ ба аҳамияти таърихии Иҷлосия сухан ронда, гуфт, ки «маҳз дар ҳамин Иҷлосия нахустпойдевори сулҳу ваҳдат ва ҳамдигарфаҳмии байни гурӯҳҳои мухолиф гузошта шуд. Дуюм, интихоби дурусти вакилони халқ ба мансаби Раиси Шӯрои Олӣ, фарзанди фарзонаи миллат, Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мебошад, ки минбаъд содиқона ба халқу Ватан хизмати шоиста карданд. Сеюм, аҳамияти таърихии ин Иҷлосияи наҷотбахши миллат қабули рамзҳои давлатӣ – Нишон ва Парчам, ки баъди соҳибистиқлолӣ бори нахуст онро вакилон пазируфтанд…

Вакили Иҷлосияи тақдирсози миллат аз ҳавзаи интихоботии «Киров 164», ноҳияи Вахш, Темурҷон Дадобоев хотироти хешро аз он рӯзҳои муташанниҷи ҷумҳурӣ ёдовар шуда, гуфт, ки ҳозирин бояд ба қадри сулҳу ваҳдати комили имрӯза, ба қадри кӯшишу заҳматҳои шаборӯзии Пешвои муаззам Эмомалӣ Раҳмон нисбати таъмини амният, сулҳу ваҳдат ва ҳаёти осоиштаи халқ бирасанд. Раиси комиҷроияи Ҳизби Халқии Демократии Тоҷикистон дар шаҳри Хуҷанд Наим Маликисломӣ изҳор дошт, ки ҳизби мазкур чун ҳизби пешбарандаи ҷомеа ва татбиқгари сиёсати хирадмандонаи Президенти мамлакат, Пешвои миллат, Раиси муаззами ҲХДТ ҳамеша мекӯшанд, бо пеш бурдани корҳои тарғиботию ташвиқотӣ дар баланд бардоштани сатҳи некӯаҳволии мардум ҳиссагузор бошанд.

Баъдан дар вазъияти тантанавӣ барои саҳмгузорӣ дар татбиқи ғояҳои ҳизб ба сардори Сарраёсати Агентии омори назди Президенти Ҷумҳурии Тоҷикистон дар вилояти Суғд Ҳокимбек Накҳатзода Ифтихорнома, ба корманди Сарраёсат Хосият Алибоева Сипосномаи комиҷроияи ҲХДТ дар шаҳри Хуҷанд ва ба 10 нафар кормандони ҷавони Сарраёсат билетҳои ҳизбӣ супорида шуданд.

Абдуғафур АМИНЗОДА,
“Ҳақиқати Суғд”

Читать далее

Оғозбахши саодати миллат

Чанде қабл, Қасри Арбоби ноҳияи Бобоҷон Fафуров имрӯз, пас аз биступанҷ сол боз вакилон ва меҳмононро пазироӣ намуд. Вале симои ба куллӣ дигар - идона, тару тоза, ботароват дорад. Дар давоми биступанҷ сол чӣ қадар дигаргуниҳо, навгониҳо дар кишвари мо ба амал омаданд! Тарҳу намуди тамоми шаҳру ноҳияҳои Тоҷикистон тағйир ва боз шаҳраку деҳоти нав тавлид ёфтанд. Дар ҷумҳуриамон ваҳдат, сулҳу субот пойдор аст. Мардуми диёрамон имрӯз бо рӯҳияи бунёдкориву созандагӣ корҳои бузургро анҷом медиҳанд.

Дар рӯзҳои вазнини баргузории Иҷлосияи ХVI Шӯрои Олии Ҷумҳурии Тоҷикистон вазифаи мо, хизматчиёни соҳаи алоқа аз пайваст намудани вакилон бо иштирокчиёни Иҷлосия иборат буд. Оқибат, рӯзи баргузории Иҷлосия аниқ гардид. Мо, гурӯҳи алоқачиён дар он рӯзҳо вазифаи худро, ба қавле, ба таври аъло ба сомон расонидем. Яъне, робитаи вакилону иштирокчиёнро дар сатҳи баланд ба роҳ монда, баҳри дар вақташ доир гаштани ин Анҷумани таърихиву тақдирсоз саҳми сазовор гузоштем.

Имрӯз, бо гузашти чаҳоряк аср аз он рӯзу лаҳзаҳои ҳассоси гузашта ёд карда, шукр менамоям, ки дар Иҷлосия тақдири миллати тоҷик ҳал шуд. Он рӯзҳо халқи тоҷик ҷаҳд дошт, ки бо ҳар васила парчами сулҳро парафшон кунад. Мо, кормандони соҳаи алоқа шоҳиди изтиробу ҳаяҷон, лаҳзаҳои ҳалкунандаи Иҷлосия будем, ки чӣ гуна Сарвари тозаинтихоби Шӯрои Олии мамлакат бо эҳсоси масъулият нақшаи сулҳу субот ва рушди минбаъдаи кишварро тарҳрезӣ мекарданд. Ободиву сулҳу субот, рӯзгори фаровони мардуми диёрамонро дида, аз натиҷаҳои беамсоли талошҳои Президенти мамлакатамон муҳтарам Эмомалӣ Раҳмон шукргузорӣ мекунам. Дар нафақа бошам ҳам, мекӯшам дар радифи фардони барӯманду фаъоли ҷомеа арзиши сулҳу суботро ба ҷавонон бифаҳмонам.

Сулҳия МӮЪМИНОВА,
собиқадори соҳаи алоқа,
шаҳри Хуҷанд

Читать далее

Санъат барояшон ишқ аст!

Умарҷони Абдусаттор 9-уми марти соли 1988 дар деҳаи Ворухи шаҳри Исфара ба дунё омадааст. Баъди хатми синфи 9-уми мактаби миёнаи деҳааш ҳуҷҷатҳояшро ба Коллеҷи мусиқии шаҳри Исфара супорида, нозукиҳои санъати мусиқиро аз бар кард. Соли 2005 ба Донишкадаи санъати Тоҷикистон ба номи Мирзо Турсунзода дохил шуд ва шуъбаи сарояндаи мардумии ин боргоҳи ҳунарро бомуваффақият хатм мекунад. Аз устодон Исроил Файзиддинов, Абдураҳим Шерматов, Лутфулло Файзиев дарси мусиқии Шашмақомро аз бар кардааст.

Фаррухи Абдуманнон 14-уми октябри соли 1987 дар деҳаи Устомуллои шаҳри Исфара ба дунё омадааст. Баъди хатми синфи 9-уми мактаби миёнаи деҳааш дар Коллеҷи мусиқии шаҳри Исфара таҳсилро идома додааст. Риштаи дӯстиаш бо Умарҷони Абдусаттор дар ҳамин дабистон оғоз гашта, ин дӯстиву ҳамкорӣ дар саҳнаи эстрадаи тоҷик дуэтро бо номи «Сорбон» ба бор овард. Замони донишҷӯӣ риштаи дӯстии онҳоро боз ҳам мустаҳакамтар намуд, гурӯҳ низ рӯз то рӯз муваффақтару маҳбубтар гашт. Фаррухи Абдуманнон ва Умарҷони Абдусаттор, ҷавонҳои боистеъдод ва дар айни замон таҷрибакорони сабкҳои мусиқии ПОП-эстрадӣ 10 сол аст, ки ба мухлисони савту навои эстрадӣ сурудҳои нав ба наву дилнишинро пешниҳод намуда, мухлисону ҳаводорони зиёде пайдо кардаанд. Имсол, ки бо пешниҳоди Президенти мамлакат «Соли ҷавонон» эълон гаштааст, баҳри ин ҷавонони соҳибистеъдод чӣ гуна сол буд, онҳо чӣ дастовардҳоеро ноил шуданд? Дар ин хусус суҳбате доштем бо Умарҷон ва Фаррух, ки фишурдаи онро манзури хонандагони рӯзнома месозем.

-Умарҷон, Фаррухҷон, чаро маҳз ҷодаи санъатро интихоб кардед? Сарояндагӣ барои Шумо чист? Ишқ, касб ё чизи дигар?

Умарҷони Абдусаттор: - Санъат ҳамеша бароям ишқ буд ва мемонад. Аз хурдӣ ба сурудан муҳаббат доштам. Дар ёд надорам кай ин эҳсос дар ман рӯ зада бошад, фикр мекунам ман бо ҳамин ишқ таваллуд шудаам. Ҳамзамон мехоҳам бигӯям, ки муҳит ва тарбия дар афзунии ин муҳаббат мусоидат кардааст. Ман аз шодравон падарам миннатдорам, ки бароям ҳама шароитро муҳайё мекарданд. Падар чунин андеша доштанд, ки фарзандро бояд аз хурдӣ дар фазои майлу хоҳишҳои ояндааш тарбият кард. Муҳаббати ман нисбат ба сурудану навохтанро эҳсос намуда, падарам бароям асбобҳои мусиқӣ мехариданд. Барои сайқали маҳорати ман аз мутахассисон маслиҳат мепурсиданд. Аввалин асбоби мусиқии падарам бароям харида фортепиано буд.

Фаррухи Абдуманнон: - Албатта, то ба касби худ муҳаббат надошта бошӣ, муваффақ нахоҳӣ буд. Барои ман низ ҳофизӣ пеш аз ҳама ишқ аст ва сипас касб. Ба фикрам барои мутахассиси касбӣ шудан бояд кори худро бо тамоми вуҷуд дӯст дорӣ.

 - Ростӣ, чаро гурӯҳро «Сорбон» унвон кардаед?

Умарҷони Абдусаттор: - Вақте мо ҳамкориро оғоз кардем ва аввалин сурудҳои якҷояи хешро ба дӯстон шунавонида, барои таъсиси дуэт муътақид шудем, фикри чӣ ном гузоштани гурӯҳ ба миён омад. Он вақт мо, як гурӯҳ ҷавонон аз Конибодому Исфара, аз ҷумла Муҳиддини Музаффар ва Фарҳоди Ғаффорпур мухлиси асарҳои нависанда Сорбон гашта будем. Маслиҳат кардем, ки номи гурӯҳро ба ифтихори ин нависандаи маъруфи тоҷик «Сорбон» унвон кунем.

- Дар таҷрибаи дуэтҳо мо зиёд шоҳиди таҷрибаҳое шудаем, ки пас аз муддати ҳамкорӣ ва дар аксар вақт маъруфият пайдо кардан аксаран парешон мешаванд. Ба мисли дуэтҳои «Эҳсон», «Боло», «Иқбол»… Ба дуэти шумоён чунин таҷрибаҳои талх таҳдид намекунанд?

Фаррухи Абдуманнон: - Мо дар алоҳидагӣ ҳеҷ коре карда наметавонем. Агар кунем ҳам, бароямон мушкил меафтад. Ҳамон як кори тадвини оҳанг, сабти садо, навор бардоштан, боз дигар корҳоро бояд як худат иҷро намоӣ. Аммо ин хуб аст, ки мо ду нафарем ва дар якҷоягӣ метавонем ин корҳоро анҷом диҳем. Шуруъ аз интихоби матни воло, оҳанги ҳирфаӣ, таҳияи клип дар сатҳи олӣ бо маслиҳати ду нафар беҳтар аст. Вале таҷрибаи парешонии дигар гуруҳҳо ба фикри ман, ин якдигарро дуруст нашинохтан аст. Умед ва талош мекунем, ки мо ду дӯст дар «Сорбон» то охир як ҷо бошем.

- Имрӯз Шумо дар шаҳри Исфара зиндагӣ ва дар Театри ба номи Тӯҳфа Фозиловаи шаҳри Конибодом фаъолият доред. Дар марказ набудану дар як гӯшаи кишвар фаъолият намудан барои Шумо мушкил нест?

Фаррухи Абдуманнон: - Барои ҳунарманд муҳим нест дар куҷо фаъолият дорад, дар марказ ва ё музофот. Албатта, ҳама наметавонанд дар Душанбе ё Хуҷанд монанд ва дар ин шаҳрҳои марказӣ кору эҷод кунанд. Дигар гӯшаҳои диёрро низ бояд обод кард. Ба мо кифоя аст, ки як наврас дар як кунҷи деҳаи диёр моро дида, бо табассум салом диҳаду як мисраъ аз суруди моро сарояд.

Умарҷони Абдусаттор:-Аммо бояд бигӯем, ки мо мақсадҳои бузург дорем. Барои расидан ба ҳадафаҳои бузург муҳим талош аст, на макон. Ҳамқадами замон будан муҳимтар аз ҳама аст.

- Соли ҷавонон ҳам ба интиҳо мерасад. Ин солро гурӯҳи «Сорбон» чӣ гуна ба поён расонид?

- Умарҷони Абдусаттор: - Шарофати Соли ҷавонон эълон шудани соли 2017 буд, ки мо дар хеш масъулият ва илҳоми бештареро эҳсос кардем. Сурудҳои наву сабти клипҳои тоза натиҷаи талошҳои эҷодӣ буд. Моҳи марти соли равон таҳти унвони «Фарёди хомӯшӣ» дар Қасри фарҳанги шаҳри Исфара консерти ҳунарӣ баргузор намудем. Бахшида ба Соли ҷавонон ва 26-солагии Истиқлолияти давлатии кишвари азизамон дар гулбоғи ба номи Сайфуддини Исфарангӣ консерти калон бо номи «Дили ман» пешкаши мухлисон карда шуд.

- Медонем, ки дар чанд соли охир гурӯҳи Шумо саундтрекҳои филми «Сарнавишт», «Сазои вафо» «Паймон» ва «Коса»-ро иҷро кард. Ин сурудҳо миёни шунавандагон мухлисони зиёдеро пайдо намудааст.

Фаррухи Абдуманнон: - Бале, ин филмҳо миёни шунавандагон ҳаводорони зиёд пайдо кардааст. Саундтреки филм дар баробари оҳанг матну овоз ҳамзамон бояд муҳтавои филмро баён кунад ва дар тарғибу ташвиқи филм мусоидат намояд. Ҳангоми сурудани саундтрекҳо мо бештар ҳамин масъулиятро эҳсос мекунем. Хубии кор дар он аст, ки ҳамкорӣ бо синамогарон низ зиёд мешавад ва табодули таҷрибаҳо ба такомули фаъолияти эҷодии мо кӯмак мерасонад.

- Ба фикри Шумо дар ҷодаи муаррифии истеъдоди ҷавонон чӣ мушкил пеш меистад?

Фаррухи Абдуманнон: - Яке аз мушкилии мо - ҷавонон маблағ аст. Дар баробари истеъдоду санъати асил барои муаррифии садои хубу дониши бузурги мусиқӣ маблағ ҳам, барои ситораи санъат шудан нақш мебозад. Агар маблағ бошад, метавонӣ, бо устодони варзидаи дунё тамрин гузарониву сабту тадвини мусиқиро дар студияҳои ҳирфаӣ роҳандозӣ намоӣ. Баъдан барои сабти клипнаворҳо ва пешниҳоди он ба шабакаҳои телевизионии сатҳи ҷаҳонӣ боз ҳам маблағ лозим аст.

- Чӣ орзу доред? Оё орзуҳои даҳ сол қаблинаи Шумо аз орзуи имрӯзатон тафовуте доранд?

Фаррухи Абдуманнон: - Орзуҳо зиёданд. Даҳ сол қабл орзуҳои ман кӯчак буданд ва кӯдакона. Орзуи суруданро доштам ва муваффақ шуданро. Имрӯз дарк кардам, ки то орзуҳо ғалатӣ ва бузург набошанд, орзу нестанд, балки нақша ва мароми зиндагиянд.

Умарҷони Абдусаттор: - Фаррухҷон дуруст мегӯянд, орзуҳо бояд боли парвози баланд дошта бошанд. Агар ту орзуи кайҳоннавард шуданро кунӣ, ҳадди ақал халабони чархбол мешавӣ (механдад). Бинобар ин орзуҳои мо ҳам хеле баланданд. Мо талоши расидан ба орзуҳоямонро дорем. Яке аз орзуҳоям ин аст, ки бо Фарҳоди Дарё дуэт сароем.

- Нақшаҳои Шумо?

Умарҷони Абдусаттор: - Ният дорем дар маркази вилоят- шаҳри Хуҷанд консерти ҳисоботӣ баргузор намоем. Гурӯҳи мо тариқи шабакаи Интернет дар шаҳрҳои Россия мухлисони зиёд дорад. Мехоҳем ба ин шаҳрҳо сафари эҷодӣ намоем. Эҷоди пайвастаи сурудҳои нав ба нав ва ҷавобгӯ ба талаботи замон мароми ҳамешагии мост.

- Барои суҳбат ташаккур.

Суҳбаторо
Сурайё ҲАКИМОВА,
«Ҳақиқати Суғд»

Читать далее

05 December 2017

Мақсад: Камхарҷ гузаронидани маъракаҳо

“... То расму оин ва маросими милливу динии худро ба як низоми муайян надарорем ва хароҷоти беҳудаву зиёдатии мардумро аз байн набарем, бо қабулу татбиқи барномаҳои давлатӣ ва сарфи маблағҳои зиёд дар масъалаи паст кардани сатҳи камбизоатии аҳолӣ ба натиҷаҳои дилхоҳу назаррас ноил шуда наметавонем”.

Эмомалӣ Раҳмон

Ба шарофати қабули Қонуни танзим барои соҳибмаъракаҳо дигар ҳоҷат ба фурӯши иҷбории молу ҳол, қарзу қавола аз бонку касони дигар, аз ҳама муҳимаш исрофгариҳои беҳуда, шунидани таънаву маломати якдигар, сабқати ноҷояи "ман аз ту кам не"-и байни хешу табор, ҳамсояҳо барои барпо кардани тӯю маросими дакадангу пурдабдаба намонд. Чунки миқдори меҳмонони ҳар кадом тӯю маърака, ҳатто вақту соати гузаронидани онҳо аниқ муайян гашт.

Баъди даҳ соли амал бори дигар ҳангоми баргузории мулоқоти Асос- гузори сулҳу ваҳдати миллӣ-Пешвои миллат, Президенти Ҷумҳурии Тоҷикис-тон муҳтарам Эмомалӣ Раҳмон бо фаъолон ва намояндагони табақаҳои гуногуни ҷомеаи мамлакат мавриди муҳокима қарор гирифтани бурду бохти рафти татбиқи Қонуни Ҷумҳурии Тоҷикистон "Дар бораи танзими анъана ва ҷашну маросим дар Ҷумҳурии Тоҷикистон" аз он шаҳодат медиҳад, ки ин Қонуни ҳимоятгари мардум, инчунин дигар санадҳои меъ-ёрию ҳуқуқии ба он вобаста ба даровардани тағйиру иловаҳо ниёз доранд.

Дар муқоиса бо солҳои қаблӣ ҳат- талимкон аз хурофоту бидъат озод гардидани ҷаҳонбинии мардум, аз ҳама муҳимаш бештар гардидани диққату эътибори аҳли ҷомеа ба фарҳанги маъракаороӣ аз ҷумлаи дастовардҳои назарраси татбиқи Қонуни танзим маҳсуб меёбанд. Ба забон овардани ҳамин далелҳо кофист, ки тӯли даҳ соли амали Қонуни танзим дар натиҷаи камхароҷоту муъҷаз гузаронидани тӯю маъракаҳо мардуми кишвар тибқи маълумоти оморӣ қариб 30 миллиард сомонӣ маблағи пасандозашонро сарфа намуданд. Азбаски баҳри оростани дастархони маросими хурсандию азодорӣ ба истифодаи гӯшти бисёр дигар ҳоҷат намонд, дар ин давра беш аз 1 миллиону 250 ҳазор сар чорвои хурду калон забҳ нагардида монд ва ин раванд боиси бемайлон афзоиш ёфтани саршумори чорво дар мамлакат гардида истодааст. Ба ҷои оростани маъракаҳои пурдабдаба аксар сокинон маблағҳои пасандозашонро барои соҳиби маълумоти олӣ ва касбу ҳунарҳои гуногун гардонидани фарзан- дон, ободонии манзили зист, харидани мошинҳои сабукрав ва дигар ҷиҳози замонавии рӯзгор масраф карда истодаанд, ки ин ҳама манфиати Қонуни танзим мебошад.

Тибқи тағйироти нави воридгашта дар рӯзи идҳои Рамазон ва Қурбон оростани дастархони маънавии хоксорона ва роҳ надодан ба исрофкорию зоҳирпарастӣ ва зиёдаравӣ таъкид гардидааст. Дар моддаи 9-и Қонуни танзим бошад, баъди даровардани тағйирот тартиби нави баргузории тӯи суннатии хатнасур пешниҳод шудааст, ки аз пештара фарқ дорад. Яъне, минбаъд хатнасур дар доираи оила ва бе хизматрасонии санъаткорон гузаронида хоҳад шуд. Хатнаи фарзанд бошад, бо розигии падару модар аз рӯзи таваллуди писар то рӯзи бистуми баъди таваллуд дар муассисаҳои тиббии дахлдор ба таври ройгон бо тартиби муқаррарнамудаи мақоми ваколатдори давлатӣ дар соҳаи танду-рустӣ гузаронида мешавад.

Тибқи Қонуни танзим минбаъд доир намудани маъракаи ақиқа умуман манъ карда шудааст.

Тибқи муқаррароти нави моддаи мазкур шахсони воқеӣ ва ҳуқуқӣ, ки имконияти молиявӣ доранд, метавонанд бо иштироки комиссияҳои доимии маҳаллӣ хатнасури хайриявии писарони бепарас-тор ва аз оилаҳои камбизоатро бар- гузор намоянд. Тартиби гузаронидани хатнасури хайриявиро мақоми ваколатдор муайян менамояд.

Ба моддаи 10-и Қонуни танзим, ки баргузории тӯйи домодию арӯсиро ба низом медароварад, низ илова ворид гардидааст ва тибқи он баробари дигар маъракаҳои қаблан манъшуда, аз қабили фотиҳаи тӯй, маслиҳатошӣ, идонабарӣ, сандуқбарон, сарупобинон, чойгаштак, раисталбон, қудоталбон инчунин минбаъд доир намудани маъракаҳои ноншиканон, модарталбон, падарталбон, чодарканон, муборакбодӣ, шаҳтоз (роҳбандон) мумкин нест. Ҳамчунин дар ҳамин модда меъёре пешбинӣ гардид, ки тибқи он падару модари домоду арӯс ва ё шахсони онҳоро ивазкунанда бо мас- лиҳати тарафайн метавонанд, ба ҷои додани оши тӯй маблағи онро ҷиҳати беҳтар гардонидани шароити зин- дагии минбаъдаи навхонадорон масраф намоянд.

Ҳамзамон ба моддаи 11-и Қонуни амалкунанда, ки маросимҳои дафну азодориро ба танзим медароварад, тағйироти ҷиддӣ ворид гардидаанд. Тибқи он ҳамаи маросими вобаста ба дафну азодорӣ, аз ҷумла маъракаҳои "се", "чил" ва "сол" минбаъд бе забҳи чорво ва додани таом бояд гузаронида шаванд. Дар маросими дигари манъшудаи "оши сари тахта", "душанбегӣ", "ҷумъагӣ", "ҳафт", "бист" ва "шашмоҳагӣ" низ забҳи чорво ва додани хӯрок манъ шудааст. Ҳамзамон таъкид гар- дидааст, ки тартиби гузаронидани маросими дафну азодориро мақоми ваколатдор муайян менамояд.

Мувофиқи талабу дархости аксар сокинони мамлакат ба моддаи 14-и Қонуни танзим якчанд иловаҳо ворид карда шудаанд. Аз ҷумла, вақти баргузории тӯю маъракаҳо минбаъд дар шаҳрҳо дар рӯзҳои истироҳат аз соати 8-и пагоҳ то соати 22 ва дар рӯзҳои корӣ аз соати 18 то соати 22, дар шаҳраку деҳот (аз ҷумла шаҳраку деҳоти тобеи шаҳр) дар рӯзҳои истироҳат аз 1 апрел то 31 октябр аз соати 6 то соати 22, аз 1 ноябр то 31 март аз соати 8 то соати 22 ва дар рӯзҳои корӣ аз соати 18 то соати 22 муқаррар гардидаанд. Давомнокии ҳар кадом тӯю маърака 3 соат мебошад.

Ҳамзамон тибқи талаботи нави Қонуни танзим шахсони воқеӣ ва ҳуқуқӣ уҳдадор шудаанд, ки ба рукнҳои фарҳанги миллӣ, аз ҷумла забони давлатӣ ва сару либоси миллӣ эҳтиром гузошта, онҳоро аз таъсирҳои манфии замони муосир муҳофизат намоянд. Бояд тазаккур дод, ки ин нукта бесабаб ба Қонуни танзим илова нашудааст. Аз қади- мулайём барои мардуми мо хислати бегонапарастӣ ва тақлидкорӣ хос набуд ва бинобар ҳамин ҳам тӯли ҳазорсолаҳо забони аҷдодӣ ва урфу одатҳои гузаштагонамон то ба имрӯз омада расидаанд.

Вале ба туфайли равандҳои ҷаҳонишавӣ, тараққиёти босуръати техникаю технологияи нав, телевизиону дигар воси-таҳои ахбори электронӣ, барои аксарият дастрас шудани интернету шабакаҳои иҷтимоӣ, хусусан, дар байни ҷавонону духтарони мо алҳол ҳисси тақлидкорию бегонапарастӣ торафт авҷ гирифта истодааст. Дар натиҷа ҳангоми доир шудани маросими ақди никоҳи давлатии навхонадорон, баргузории тӯйҳои домодию арӯсӣ бо "ташаббус"-и наворбардорони тақлидкор, барандаҳои ба қавли худашон "касбӣ"-и тӯйҳо, продюссерони ширкатҳои навбаромади хизматрасон баҳри зебу ороишдиҳии тӯйхонаю тарабхона ва манзилгоҳҳои мардум одатҳои аҷоибу ғароиби халқу миллатҳои ғайр ва дар аксар маврид кирдорҳои хунуки ба одоби тоҷиконаи мо бегона ва беҳаёёна, аз қабили барои аксу наворгирӣ аз ҷониби домод рӯи даст бардоштани арӯс, якдигарро бешармона ба оғӯшгириҳои онҳо, дар кӯчаҳои васеъ атрофи ҷуфти навхонадор бо суръати ниҳоят тез то дуд баровардани резинаи чархҳо давонидан ва давр занонидани мошинҳо, ҳангоми гусел ба хонаи домод ба зону афтода, бӯсидани пои волидайн аз ҷониби арӯс, овони ба хонаи домод даромадан гулдастаро ба паси сараш ҳаво додани келин ва аз сари домоду арӯс пошидани пати гулҳои зиёд, иҷрои "рақси сафед" дар базм аз ҷониби арӯсу домод ва ғайраю ҳоказо расм шуда истодаанд, ки номгӯи нестдарҷаҳони чунин навгониҳоро боз худи ҳамон даст-андаркорҳои "тӯйҳои замонавӣ" медонанд. Фақат ҳаминаш мондааст, ки дар вақти базм меҳмонон ҳангоми табрики навхонадорон қадаҳҳо дар даст аз ҷой хеста "горко", яъне "ширин шавад" гӯён доду фарёд зананду арӯсу домод дар пеши назари мардум якдигарро бӯсобӯсӣ намоянд.

Ин ҳама ҳавою ҳавас ва падидаҳои нозеб, ки теша ба решаи анъана ва расму оинҳои миллии мо мезананд, тақлиди кӯр-кӯрона ба филмҳои ҳиндию туркӣ ва аврупоӣ, клипҳои ҳофизони эронӣ, хулласи калом бегонапарастӣ мебошаду бас. Ҳол он ки дар чунин мавридҳо мо, тоҷикон одатҳои қадимаи аз ҷониби пирони дуогӯи оила бо фотеҳаи нек ба хонаи бахт гуселонидани навхонадорон, барои ширин шудани зиндагиашон ба онҳо нӯшонидани шарбат ва аз сарашон пошидани қанду қурс, зери пояшон густурдани пойандоз, атрофи гулхан бо нақшхонӣ ва сурудани "Ёр-ёр" давр занонидани домоду арӯс ва дигар урфу одат, расму таомулҳои анъанавӣ ва хос миллӣ доштему дорем ва минбаъд низ бояд онҳоро риоя намоем.

Ҳангоми шарҳу тавзеҳи тағйироти ба Қонуни танзим воридгашта ҳамзамон бояд таъкид намуд, ки ба моддаи 481-уми Кодекси ҳуқуқвайронкунии маъмурии Ҷумҳурии Тоҷикистон низ иловаҳо дохил шудаанд. Тибқи онҳо ҷавобгарии шахсони мансабдор ва воқеӣ барои риоя накардани қонунгузории Ҷумҳурии Тоҷикистон дар бораи танзими анъана ва ҷашну маросим боз ҳам пурзӯр карда, андозаи ҷарима нисбат ба шахсони воқеӣ ба андозаи 100 нишондиҳанда барои ҳисобҳо, ки баробар ба 5000 сомонӣ мебошад, ба шахсони мансабдор ба андозаи 500 ва ба шахсони ҳуқуқӣ ба андозаи 700 нишондиҳанда, ки мутаносибан ба 25000 ва 35000 сомонӣ баробар аст, ба соҳибкорони инфиродӣ, ходимон ва уламои дин низ ба андозаи 700 нишондиҳанда барои ҳисобҳо, ки 35000 сомониро ташкил медиҳад, ҷарима муқаррар гардидааст. Инчунин барои дағалона ва ё такроран вайрон намудани тартиби гузаронидани анъана ва ҷашну маросим ба шахсони воқеӣ ба андозаи 600 нишондиҳанда барои ҳисобҳо, яъне 30000 сомонӣ, ба шахсони мансабдор ба андозаи 800 нишондиҳанда, яъне 40000 сомонӣ ва ба шахсони ҳуқуқӣ ба андозаи 1000 нишондиҳанда барои ҳисобҳо, ки баробари 50000 сомонӣ мебошад, ҷарима муайян шудааст.

Дар ин мақола, ки роҷеъ ба шарҳу эзоҳи тағйироту иловаҳои ба Қонуни Ҷумҳурии Тоҷикистон "Дар бораи танзими анъана ва ҷашну маросим дар Ҷумҳурии Тоҷикистон" воридгардида таълиф гардид, бо овардани иқтибос аз суханони Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳусни хотима бахшиданиам: "...Ба халқи шарифи худ, хусусан ба падару модарон муроҷиат менамоям, ки маблағи ёфтаи худро ба ҷои ба маросими беҳудаву нодаркор ва серхароҷот барбод додан ба ғизои дурусти оилаи худ, беҳбуди шароити зист ва таълиму тарбияи шоистаи фарзандони худ сарф намоянд".

Мазбутҷон ВОҲИДОВ,
собиқадори матбуот ва
хизмати давлатӣ, Аълочии матбуоти Тоҷикистон

Читать далее

05 December 2017

Саъй агар комил бувад...

Имрӯз ҷавонони мо бо азму иродаи қавӣ илму дониш ва касбу ҳунар меомӯзанд, ба хотири ободиву пешрафти кишвари маҳбубамон фаъолона саъю талош меварзанд.

Эмомалӣ Раҳмон

Марому мақсади ҷавонони имрӯзаи кишвар, ки яке аз онҳо омӯзгори ҷавону соҳибэҷоди Мактаби Президентӣ дар шаҳри Бӯстон Наргиса Абдувалиева боиси пайравист. Наргиса хатмкардаи муассисаи таҳсилоти умумии №23-шаҳри Хуҷанд буда, соли 1992 ба Коллеҷи тиббии шаҳри Хуҷанд ба номи Ю.Б.Исҳоқӣ дохил мешавад ва ин даргоҳи тиббиро соли 1995 бо дипломи аъло ба итмом мерасонад.

Ӯ аз хурдӣ орзу дошт, чун ворисони аҷдоду авлодӣ пайи касби омӯзгорӣ равад ва ба тарбияи насли наврас машғул шавад. Ин аст, ки Наргиса ба Донишгоҳи давлатии Хуҷанд ба номи академик Бобоҷон Ғафуров, факултаи табиатшиносӣ-география, ихтисоси биология сарбаландона дохил шуд. Баъди хатми донишгоҳ муаллимаи ҷавон фаъолияти омӯзгориро аз мактаб-интернати Мақомоти иҷроияи ҳокимияти давлатии вилоят барои кӯдакони ятим ва ниёзманд, воқеъ дар шаҳри Бӯстон оғоз намуд ва аз рӯзҳои аввали омӯзгорӣ худро чун як мутахассиси эҷодкор, навҷӯ ва навгӯю навовар нишон дод.

Муаллимаи ҷавон ҳар як дарси худро бо истифода аз аёниятҳои васеи дастисохт, варақаҳои саволу ҷавоби тасвирӣ, тестҳо бо забонҳои тоҷикӣ ва русӣ, воситаҳои техникии таълим, аз қабили компютер, DVD ва тахтаи электронӣ хеле ҷолиб ва хотирмон мегузаронид. Дар баробари таълим Наргиса бо шогирдони хеш маҳфилҳои мухталиф, чорабиниҳои илмӣ, викторина ва мусобиқаҳои синфӣ ташкил менамуд. Онҳоро меомӯзониду шавқу ҳавасашонро ҳамаҷиҳата такмил медод. Бо ибтикор ва дастгирии Пешвои миллат, муҳтарам Эмомалӣ Раҳмон соли 2009 дар шаҳри Бӯстон Муассисаи таълимӣ - давлатӣ барои хонандагони болаёқат - Мактаби Президентӣ ба фаъолият оғоз намуд. Наргисаи ҷавону боистеъдод тариқи озмун омӯзгори фанни биологияи ин макони маърифатӣ гардид.

Акнун дар роҳи пурпечутоби омӯзгорӣ ба муаллимаи ҷавон боз масъулияту маҳорату матонати касбии баланд ва донишу дастовардҳои зиёд лозим буд. Дар муҳити маърифатии нав усулҳои ҳозиразамонро ба кор бурд, бо шогирдон тез унс гирифт. Дӯсташон дошт, дасташонро сӯи илм гирифт.

Дастовардҳои муаллима дар озмунҳои шаҳрӣ, вилоятӣ ва даставиву ҷумҳуриявӣ, Академияи хурди илмҳо сол ба сол зиёд мешуданду обрӯву эътибори омӯзгор зина ба зина боло мерафт. Шогирдони азизаш Шукрона Бурҳонова, Амир Толибов, Азиза Нурматова, Маниҷа Ёқубова, Рустамҷон Ҷӯраев, Сӯҳроб Дадоҷонов, Наргис Болтубоева, Сабрина Шарифова ва Нигина Ишонқулова, ки ғолибони озмунҳову Академияи хурди илмҳо буданд, номи устоди худ ва обрӯву эътибори Мактаби Президентиро сӯи қуллаҳои баланди илмӣ бурданд.

Шарҳу тафсири истилоҳҳои душворфаҳми ихтисосиро аз забонҳои дигар ба забони ноби тоҷикӣ мегардонаду ба дафтари махсуси “Луғатнома”-и шогирдон шарҳу эзоҳ медиҳад.

Наргиса Абдувалиева гуфтаҳои Сарвари давлат “Вазифа ва қарзи ҳар як соҳибватани бонангу номус аст, ки Ватанашро на дар сухан, балки дар амал дӯст дорад, ҳастии худро бо ҳастии ин марзу буми муқаддас пайванд шуморад ва ба хотири пешрафти он ҳамеша ҷаҳду талош намояд”-ро сармашқи кори хеш медонад. Мэлс НУРОВ,

омӯзгори Мактаби Президентӣ
дар шаҳри Бӯстон

Читать далее