February 2018

28 February 2018

Рухак: Боғу токпарварӣ эҳё мешавад

Касе, ки меҳр ба боғу токпарварӣ дорад, аз беҳтарин шарофатҳо бархурдор аст...

Боғу токпарварӣ аз қадимулайём хоси мардуми тоҷик аст ва ҳамасола баҳри бунёди майдонҳои нав ва азнавсозии боғҳои кӯҳна тадбирҳои судманд андешида мешаванд. Дар асоси Барномаи давлатии “Рушди соҳаи боғу токпарварӣ барои солҳои 2016-2020 дар Ҷумҳурии Тоҷикистон” соли ҷорӣ дар ноҳияи Бобоҷон Ғафуров 90 гектар боғу токзори нав бунёд гардида, он минбаъд идома дорад. Ҳамчунин, имсол низ ба масоҳати 255 гектар боғу токзори кӯҳна аз нав барқарор мешавад.

Дар ноҳия 9359 гектар боғ ва 3 ҳазору 45 гектар токзор мавҷуд буда, боғпарварон бо бунёди боғу токзори нав майдони боғро афзун намуда, дар ин самт корҳои шаклдарорию агротехникии токзорҳои ҳосилдеҳ бомаром идома доранд.

Бояд гуфт, ки зимни сафари корӣ ба ноҳияи Бобоҷон Ғафуров таваҷҷуҳи иҷрокунандаи вазифаи Раиси вилоят Раҷаббой Аҳмадзода ба ҳолати боғу токзори ҳудуди заминҳои минтақаи Рухак бештар ҷалб гардид. Бо мақсади огаҳӣ пайдо намудан аз ҳолати кунунӣ аз ин мавзеъ боздид намудем ва раиси Ҷамоати деҳоти Ғозиёни ноҳия Юлдош Шокиров изҳор дошт, ки имрӯз дар минтақаи Рухак зиёда аз 100 гектар замини боғу токзор мавҷуд буда, он соли 1980 ташкил гардидааст.

Дар ҳамон солҳо дар ин минтақа наздик 200 гектар токзор мавҷуд буд, ки аз он 1200 то 1300 тонна ангур истеҳсол мешуд.

Солҳои пеш ин минтақа хеле ободу зебо буда, аз оби полези танқисӣ надошт. Имрӯз норасоии об муаммои асосии ин заминҳо гаштааст. Хатти оби ин мавзеъ аз минтақаи Деҳмой - 4-и ноҳияи Ҷаббор Расулов кашида шуда буд. Бо сабаби он, ки лӯлаҳо фарсуда шудаанд, то ҷойи зарурӣ об омада намерасад. Агар ҳолати обрасонӣ беҳтар мешуд, заминҳо аз нав барқарор ва боғу токзори нав ташкил мегардид.

Баъди таҷдид шудани хоҷагиҳои калон заминҳои ин мавзеъ ба зиёда аз 50 нафар саҳмдор тақсим шуд, ки имрӯз ҳамаи онҳо барои обод намудани ин мавзеъ камари ҳиммат баста, барои аз нав барқарор кардани боғу токзор кӯшиш намуда истодаанд. Саҳмдорон аз обу ҳавои мусоид истифода бурда, ҳар рӯзи истироҳат шинонидани ниҳолу тоза кардани заминҳо аз ҳар гуна алафҳои бегона, башаклдарории токзору дарахтони мевадиҳанда, сафед кардани танаи дарахтони гирду атрофи токзор, шудгор кардани заминҳоро хуб ба роҳ мондаанд.

-Имрӯз муаммои асосии минтақа партовгоҳи шаҳри Бӯстон мебошад, ки дар минтақаи Рухак ҷойгир шуда, наздик 20 гектар заминро ташкил медиҳад. Ба ин макон партовҳои зиёдро оварда мепартоянд, ки ҳангоми вазидани шамол салафану зарфҳои пластикӣ ва коғазпораҳо парида, ба заминҳои токзор ва болои дарахтон меоянд.

- Тариқи ҳашар ҳар ҳафта ду - се маротиба бо сокинону хонандагон ва кормандони касбу кори гуногун баромада, ин ифлосиҳоро тоза мекунем, -гуфт номбурда.

Бояд гуфт, ки баъди боздиди иҷрокунандаи вазифаи Раиси вилоят аз ин минтақа ҳамарӯза баҳри ободу зебо гардонидани ин гӯшаи диёр боғдорон азму талош доранд. Тоза кардани бешазорҳо, каналҳо, решаҳои дарахтон, сафед кардани танаи дарахтон, яхобмонӣ, шудгори заминҳо, кофтани ҷӯйборҳо, ҳамчунин, шинонидани ниҳолҳои ҳамешасабзу ороишӣ дар қади роҳҳо хуб ба роҳ монда шудаанд.

Дар ин минтақа мо аз рафти корҳои саҳроӣ дар хоҷагии деҳқонии “Домуллоҷон - саркор” боздид намудем. Зимни суҳбат раиси хоҷагӣ Абдуллоҷон Домуллоҷонов гуфт, ки тайи солҳои охир дар хоҷагӣ соҳаи боғу токпарварӣ рушд меёбад.

Бахусус, дастуру супоришҳои иҷрокунандаи вазифаи Раиси вилоят Раҷаббой Аҳмадзода дар самти эҳё ва рушди соҳаи боғу токпарварӣ моро дилгарм ва рӯҳбаланд месозад.

Оре, касе, ки меҳр ба боғу токпарварӣ дорад, аз беҳтарин шарофатҳо бархӯрдор аст. Зеро, ниҳолеро сабз кардан рисолати бузург аст!

Нодир ТУРСУНЗОДА,
“Ҳақиқати Суғд”

Читать далее

Об – сарчашмаи ҳаёт

«Дар дунё касе инкор карда наметавонад, ки об дар ҳастии инсоният дурри гаронбаҳост, об ин худи ҳаёт, об ин рушд, тараққиёт, пешрафт ва ояндаи ободу осудаи наслҳои нав мебошад».

Эмомалӣ Раҳмон

Шароити кишвари мо аз ҷиҳати захираҳои обӣ нисбат ба дигар ҷумҳуриҳо хубтару мувофиқтар аст. Ҳаёт ва афзоиши тамоми мавҷудоти рӯи Замин, алалхусус одам ба об, ба ин муъҷизаи асрорангези табиат вобаста мебошад.

Аз ин рӯ, баҳри бедор намудану ташаккул додани одобу маърифати экологии наврасону ҷавонон ҳар як шахси солимақлу бохирад, ватандӯсту ифтихори миллидоштаро зарур аст, ки дар сарфакорона истифода бурдани ин неъмати бебаҳо намунаи ибрат бошанд. Аз нигоҳи олимон муайян карда шудааст, ки ҳаёт ва нишонаҳои он ибтидо дар об ба вуҷуд омадаанд.

Тоҷикистон дар ҷодаи ҳифзи муҳити зист, хоса бо эълон намудани «Даҳсолаи амалиёти об барои ҳаёт» ташаббускор ва афзункунандаи ин неъмати табиӣ дар ҷаҳони муосир пазируфта шудааст. То ба имрӯз нигоҳ доштани чаҳор унсур – обу ҳаво ва хоку оташ, ки бо мақсади обод нигоҳ доштани муҳити зист равона гардидааст, оини мардуми покгавҳар буду ҳаст. Муаммоҳои глобалии экологӣ ба ҳар минтақа бо хусусиятҳову тазоҳуроти алоҳида муҳимият касб мекунанд.

Яке аз масъалаҳои мубрами замон – ин дар ниҳоди наврасон ташаккул додани шавқу завқ, одобу маърифати экологӣ, муҳофизати табиату сарватҳои гаронбаҳои он, аз ҷумла об ва оқилонаю сарфакорона истифода намудани он ба шумор меравад. Гузашта аз ин, ҳар як ашхоси боақлу хирад бояд бифаҳмад, ки табиат сарчашмаи ҳаёт, хонаи мо, манбаи меҳнату фароғат, зиндагию зебоӣ ва саломатии гаронбаҳои онҳо мебошад.

Дар кураи Замин зиёда аз 2,5 миллиард одам ба оби тозаи ошомиданӣ эҳтиёҷ доранд. Ҷумҳурии мо дар ҷодаи манбаву захираи обҳои тозаи нӯшокӣ дар ҷомеаи ҷаҳонӣ яке аз ҷойҳои намоёнро ишғол менамояд.

Аз ин ҷост, ки суханрониҳо ва иқдомҳои неку хирадмандонаи Асосгузори сулҳу ваҳдати миллӣ – Пешвои миллат, Президенти ҷумҳурӣ муҳтарам Эмомалӣ Раҳмон ҳар нафарро водор месозад, ки барои рушду нумуи соҳаи экология, манбаву захираҳо ва истифодаи оқилонаю сарфакоронаи об чораҳои мушаххас андешад.

Бояд ба олами зебою нотакрори гӯшаи кишварамон бо назари нек ва муҳаббати бепоён нигариста, сарвату боигариҳои гаронбаҳояшро дарёфт ва ба ҳифзи он ҳамаҷониба кӯшиш намоем.

Парвиз Олимов,
омӯзгори МТУҒ
 «Гулчини маърифат»

Читать далее

Фурӯши маҳсулоти пастсифат пешгирӣ гардид

Прокуратураи вилояти Суғд баҳри иҷрои Қонуни Ҷумҳурии Тоҷикистон “Дар бораи ҳимояи ҳуқуқи истеъмолкунандагон", бехатарии маҳсулоти ғизоӣ, таъмини амнияти санитарию эпидемиологӣ ва дигар санадҳои меъёрии ҳуқуқӣ пайваста чораҷӯӣ мекунад.

Бо ин мақсад бо фармони прокурори вилоят гурӯҳи корӣ таъсис дода шуд. Ба ҳайати он ҳамчунин, мутахассисони Маркази “Тоҷикстандарт”, Маркази назорати давлатии санитарию эпидемиологӣ ва Раёсати Хадамоти зиддиинҳисории назди Ҳукумати Ҷумҳурии Тоҷикистон дар вилояти Суғд шомиланд.

Дар давраи санҷиш ҳолатҳои риоя накардани қоидаҳои савдо ва хизматрасонӣ, истеҳсол, фурӯш, таҳвили маҳсулот, иҷрои кор ва хизматрасонӣ ошкор карда шуд. Ҳамзамон, ҳолатҳои бе сертификатсияи ҳатмӣ ба фурӯш баровардани молу маҳсулоти хӯрока ва хизматрасонӣ, риоя накардани қоидаҳо ва бе муоинаномаи тиббӣ истеҳсол ва фурӯши маҳсулоти хӯрока ба фурӯш баровардани молу маҳсулоти мӯҳлати истеъмолиашон гузашта, ки ба ҳаёт ва саломатӣ хатар доранд, муайян гардид. Инчунин, ҳолатҳои фиреб додани истеъмолкунандагон, низ ошкор карда шуд.

Чунончӣ, соҳибкори инфиродӣ Ю.Мӯъминов, дар ноҳияи Зафаробод, кӯчаи И.Сомонӣ, ошёнаи якуми бинои меҳмонхонаи “Наргис” ба истеҳсоли панири ҳолландӣ машғул шуда, маҳсулоти истеъмолиро бе ҳуҷҷатҳои тасдиқкунандаи бехатарӣ (хулосаи санитарию эпидемиологӣ) ба фурӯш баровардааст. Дар рафти санҷиш аз ин сехи истеҳсолӣ 40 кг. панирӣ ҳолландӣ ба маблағи умумии 1160 сомонӣ дарёфт ва аз фурӯш боздошта ба ташхис супорида шуд.

Мувофиқи хулосаи ташхиси озмоишии санитарӣ-микробиологии Маркази назорати давлатии санитарию эпидемиологии вилоят дар таркиби панир қаламчаи микроби рӯда дарёфт карда шудааст, ки ба талаботи бехатарӣ, ҳаёт ва саломатии истеъмолкунандагон хатарнок аст.

Бинобар ин, аз тарафи прокуратураи вилоят нисбати З.Мӯъминов парвандаи ҷиноятӣ оғоз карда шудааст.

Ё ин, ки соҳибкори инфиродӣ А.Рауфов бо роҳи фиреб додани истеъмолкунанда ба шаҳрванд А.Абдуазизов, 9 адад машруботи спиртиро ба маблағи 181 сомонӣ фурӯхтааст, ки дар он санаи истеҳсол нишон дода нашуда, қувватнокии он, назар ба тамғақоғази дар болои он насб карда шуда, пасттар мебошад.

Чунин машруботи спиртии пастсифат дар маҷмӯъ 18 адад ба маблағи умумии 141,5 сомонӣ аз дохили мағозааш дарёфт карда шуд.

Инчунин, А.Рауфов дар пештахтаи мағозаи худ 26 намуд, ба маблағи умуми 645,50 сомонӣ молу маҳсулоти хӯрокаи мӯҳлати истеъмолиашон гузаштаро ба фурӯш мондааст. Оид ба ин ҳолат аз тарафи прокуратураи вилоят нисбати А.Рауфов парвандаи ҷиноятӣ оғоз ва бо ҳукми суд маҳкум карда шуд.

Ба ин монанд, соҳибкори инфиродӣ Р.Аҳроров дар мағозаи №43-и дохили бозори “Бунёдкори Нов”-и ноҳияи Спитамен бо роҳи фиреб додани истеъмолкунандагон молу маҳсулоти худсози пастсифати сохтмониро ба маблағи умумии зиёда аз 30 000 сомонӣ ба фурӯш баровардааст, ки нисбати номбурда аз тарафи прокурори вилоят парвандаи ҷиноятӣ оғоз карда, бо ҳукми суд маҳкум карда шуд. Дар маҷмуъ, аз натиҷаи санҷишҳо нисбат ба 104 нафар шахси воқеӣ ва ҳуқуқӣ парвандаҳои ҷиноятӣ оғоз ва баъди тафтишот ба судҳои дахлдор ирсол гардидаанд.

 А.Мирзозода,
 прокурори шуъбаи
назорати умумии прокуратураи вилояти Суғд 

Читать далее

Эҳёи ҳунарҳои мардумӣ-гарави тараққиёт

Ҷиҳати дар амал татбиқ намудани дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон «Соли 2018-Соли рушди сайёҳи ва ҳунарҳои мардумӣ» бобати эҳё намудани ҳунарҳои миллии ниёгон, баланд бардоштани ифтихори миллӣ, арҷгузорӣ ба фарҳанги воло, тарбияи зебоипарастӣ, тарғибу ташвиқи либоси миллӣ, таъсиси ҷойҳои корӣ, ба касбомӯзӣ ҷалб кардани занону духтарони хонашин ва ба насли оянда пешкаш кардани ҳунари аҷдодӣ, паст кардани сатҳи камбизоатӣ ва коҳиш додани сафи занҳои муҳоҷир аз тарафи Роҳбари давлат дастгирӣ гардид. Қадам ба қадам ҳунарҳои аҷдодии миллим аз нав эҳё шуда истодаанд. 

Имрӯз шукрона аз даврони Истиқлолият мекунам, ки ҳама ҷо аз матоъҳои гуногун, аз ҷумла адрасу атлас фаровон шудааст ва ҳама имконияти харида пӯшидани онро доранд. Тавре моделҳои сатҳи ҷаҳонӣ низ исбот карданд, дар ҳақиқат матои атласу адрас шинаму зебо буда, ҳуснорои зани тоҷик аст.

Ҳунари атласу адрасбофӣ нозукиҳои ба худ хос дошта, хушбахтона солҳои охир аз нав эҳё шуда истодааст. Нафаре, ки бо ин кор машғул мешавад, на танҳо донишу малака, балки завқ, истеъдод ва маҳорати нотакрор дорад. Кӯшиши бофанда дар ба ҳам овардани гули нақш беҳудуд аст.

Амали дигар ин ранг додани ресмон аст. Барои ранг кардани ресмон ранги махсус лозим буда, ду-се мутахассис дар як вақт дар ҳамҷоягӣ кор мекунанд. Рангҳоро ба ҳаҷми гулҳои кашида нигоҳ карда, ба дегҳои алоҳида меандозанд. Пас аз хушк шудани нахҳои рангкардашуда амали гулчинӣ оғоз меёбад. Ресмони тихканкардашударо ба дастгоҳ гузошта, пут омода месозанд. Баъди нақшбандӣ абрабандӣ ҷараён гирифта, он намудҳои гуногун дорад: «карбоси сафед», «зирагӣ», «адраскӯб», «қарха», «бодомча», «подшоҳи зангор», «подшоҳи заказ», «подшоҳи гӯлас», «бӯғма», «салла» ва ғайра.

 Адрасро аз нахи пахта тайёр мекунанд. Аз пахта 7 намуд ресмон ресида мешавад. Аввал тор мекашанд, қат мекунанд ва гул мебанданд. Нақшбандии адрас бо ҳамаи ҳафт намуди ресмон сурат мегирад. Дар дастгоҳ ду намуди сурохӣ-теғ ва гула бояд мавҷуд бошад. Ресмони хушкшударо аз теғу гула гузаронида, ба бофтан тайёр мекунанд. Баъдан бофанда бояд дӯконро ба кор дарорад ва матоъро ба истеҳсол омода намояд.

Фарқияти атлас ва адрас дар он аст, ки матои атлас 100 фоиз аз нахи пилла омода шавад, нахи адрас батамом аз пахта тайёр мешавад. То ба дасти харидор расидани шоҳи матоъҳои тоҷикӣ-атласу адрас бофандагон заҳмати беандоза мекашанд. Бар замми ин, зебогии ин матоъҳо назаррабо буда, зеби ҳар бонуи тоҷик аст.

Бояд тазаккур дод, ки аз қадимулайём бо меҳнати пурмашаққат нони ҳалол хӯрдан дар хуни миллати тоҷик ҷой гирифтааст. Ибтикори Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон бобати эълон доштани Соли 2018 «Соли рушди сайёҳӣ ва ҳунарҳои мардумӣ» хеле саривақтӣ буда, итминон дорам барои пешрафти ҳунарҳои мардумӣ ва ба ҷои кори доимӣ таъмин шудани аҳолӣ мусоидат мекунад.

Мавлуда ПОЧОЕВА,
омӯзгори МТМУ №10,
шаҳри Бӯстон

Читать далее

27 February 2018

Шиносоии Раҷаббой Аҳмадзода бо рафти омодагиҳо ба мавсими кишти баҳорӣ

Рӯзи 25 феврал иҷрокунандаи вазифаи Раиси вилоят Раҷаббой Аҳмадзода ба як қатор ноҳияҳои вилоят сафар намуда, бо рафти омодагиҳо ба мавсими кишт, аз ҷумла кишти картошка шинос шуд.

Раҷаббой Аҳмадзода нахуст ба ноҳияи Шаҳристон ташриф оварда, бо фаъолияти ниҳолхонаи муассисаи давлатии Хоҷагии ҷангали ноҳия шинос гардид ва ҷиҳати парвариши ниҳолҳои ҳамешасабз ба масъулин тавсияҳо дод. Тавре таъкид гардид, Шаҳристон яке аз ноҳияҳои наздикӯҳӣ маҳсуб ёфта, обу ҳавои тоза, таърихи куҳан ва табиати нотакрори он барои ривоҷу равнақи соҳаи сайёҳӣ хеле мусоид мебошад. Куҳҳои сар ба фалак кашидаи ин ноҳия дар саросари кишвар ва берун аз он маъруф буда, минтақа барои рушди сайёҳӣ ва ҷалби ҷаҳонгардон имкониятҳои фаровон дорад. Бо назардошти эълон шудани “Соли рушди сайёҳӣ ва ҳунарҳои мардумӣ”, инчунин минтақаи сайёҳӣ будани ноҳияи Шаҳристон дастур дода шуд, ки ба корҳои ободониву кабудизоркунӣ, тозагии муҳит ва канори роҳҳо диққати махсус дода шавад.

Читать далее

Тадбирҳои амалӣ баҳри таъмини донишҷӯён бо ҷои кор

-Айни ҳол Донишкадаи кӯҳӣ – металлургии Тоҷикистон дар шаҳри Бӯстон тибқи иҷозатномаи Вазорати маориф ва илми Ҷумҳурии Тоҷикистон аз рӯи 16 ихтисоси равияи кӯҳӣ - металлургӣ мутахассисонро тайёр намуда истодааст, - гуфт зимни нишасти матбуотӣ ба рӯзноманигорон ректори донишкада Мухтор Фозилзода. - Шуруъ аз соли хониши 2018-2019 боз аз рӯи 3 ихтисоси навтаъсис: технологияи химиявии моддаҳои ғайриорганикӣ, мавод ва маҳсулот, менеҷменти экологӣ ва аудит дар саноат, технология ва таҷҳизоти саноати заргарӣ қабули довталабонро ба роҳ хоҳад монд.

Ҷараёни таълим дар донишкада тибқи Стандарти давлатии таълимии таҳсилоти олии касбӣ аз рӯи низоми кредитӣ ба роҳ монда шудааст. Тибқи нақшаи раванди таълим ва фармоишҳои ректор донишҷӯёни бахши 2 ба корхонаҳои соҳавӣ ва муассисаҳо ба монанди: ҶМТКММ «Апрелевка», ҶМДММ «Петролиум Суғд», ҶСК «Ангишт», Шабакаҳои барқии вилояти Суғд, НБО «Дӯстии халқҳо», Шабакаҳои барқии шаҳри Бӯстон, ҶДММ «Элегант», КВД «Роҳи оҳани Тоҷикистон» Коргоҳи таъмири қатораҳо, КВ «Экспедитсияи комплексии геологии Қайроққум», КВД «Фулузоти нодири Тоҷикистон», КФД «Хизматрасонии нақлиётӣ ва логистикӣ» дар вилояти Суғд, ҶДММ «МНА - 31» ноҳияи Бобоҷон Ғафуров, КВД «Аэрогеодезияи Суғд», ҶСК «КМ Адрасмон», КФ «Корхонаи мошинсозӣ»-и шаҳри Бӯстон ва дигарҳо барои шиносоӣ ва таҷрибаомӯзӣ бо истеҳсолот сафарбар карда шуданд.

Имрӯз теъдоди умумии кормандон 272 нафарро ташкил дода, аз ин 174 нафар корманди илмӣ-педагогӣ, аз ҷумла 5 нафар профессор, 45 нафар номзади илм, дотсент, 61 нафар муаллими калон ва 63 нафар ассистент фаъолият доранд. Ҳайати донишҷӯёни донишкада бошад, дар соли сипаришуда дар се факулта аз рӯи 16 ихтисос ҳамагӣ 3121 нафарро ташкил намуда, аз ин 2168 нафар дар шуъбаи рӯзона ва 945 нафар дар шуъбаи ғоибона мебошанд.

Раёсати донишкада ва бахши рушди касбият, таҷрибаомӯзӣ ва кор бо мутахассисони ҷавон баҳри бо ҷойи кор таъмин намудани хатмкунандагон - мутахассисон мунтазам тадбирҳои амалӣ меандешад. Яке аз ин тадбирҳо ба тавсиб расонидани шартномаҳои ҳамкорӣ бо корхонаҳои соҳавӣ-саноатӣ ва ташкили озмунҳои ҷойи кор мебошад.

Дар охир рӯзноманигорон ба саволҳои хеш ҷавобҳои мушаххас гирифтанд.

Нодир ТУРСУНЗОДА,
“Ҳақиқати Суғд”

Читать далее

Маориф - зербинои рушди кишвар

Дар нишасти матбуотӣ сардори Раёсати маорифи вилоят Осим Каримзода ба рӯзноманигорони ватаниву хориҷӣ доир ба натиҷаҳои соли 2017 маълумот дод.

Зикр гардид, ки дар соли сипаришуда аз ҳисоби сарчашмаҳои маблағгузорӣ 32 иншооти нав мавриди баҳрабардорӣ қарор дода шуд. Инчунин, барои сипарӣ намудани зимистон дар муассисаҳои таълимии вилоят 12 ҳазору 675,3 тонна ангишт ва 6 ҳазору 310 метри мукааб ҳезум захира шуд.

Бобати пешрафтҳои назарияву амалии хонандагони макотиби таҳсилоти миёнаи умумии вилоят мавсуф илова намуд, ки 125 нафар хонанда дар олимпиадаҳои байналмилалӣ ширкат варзида, сазовори ҷойҳои ифтихорӣ ва 87 нафари онҳо дар олимпиадаҳои фосилавии давлатҳои Амрико, Фаронса ва Тайван ҷойҳои намоёнро ишғол намудаанд.

- Бо мақсади ҳавасмандгардонӣ ва дастгирии хонандагони болаёқати вилоят 4 нафар хатмкардагони муассисаҳои таълимии вилоят дорандаи Шаҳодатномаи аъло ва медалҳои тиллову нуқра гардида, бо маблағи пулӣ қадрдонӣ шуданд,-гуфт Осим Каримзода.

Инчунин, аз рӯи маълумотҳо бармеояд, ки дар назди 669 муассисаи таълимии шаҳру ноҳияҳои вилоят маҳфилҳои рӯзгордорӣ ташкил ва дар 859 муассисаи таълимӣ танӯр ва оташдон шинонида шуда, 290 маҳфили сӯзанидӯзӣ, 328 маҳфили қолинбофӣ, 70 маҳфили атласу адрасбофӣ амал мекунад.

Лозим ба ёдоварист, ки дар ҳудуди вилоят 13 адад муассисаи таълимии типпи мактаб-интернатҳо фаъолият намуда, аз онҳо се адад мактаб-интернат барои кӯдакони ятим, бепарастормонда ва аз оилаҳои камбизоат, панҷ адад мактаб-интернати махсуси бачагонаи имконияташон маҳдуд, як Хонаи кӯдакон ва чор интернати наздимактабӣ фаъолият дошта, дар онҳо 1 ҳазору 306 нафар ба таълиму тарбия фаро гирифта шудаанд.

-Дар давраи ҳисоботӣ муассисаҳои таҳсилоти миёнаи умумии вилоятро 34 ҳазору 721 нафар хонанда хатм намуда, аз онҳо 19 ҳазору 624 нафар дар Маркази миллии тестӣ ба қайд гирифта шуданд, ки нисбат ба соли хониши 2015-2016-ум 3,5 фоиз зиёд мебошад, -илова намуд О.Каримзода

Дар қисмати дуюми нишасти матбуотӣ ба суоли рӯзноманигорон сардори Раёсати маорифи вилоят ва масъулини сохторҳои мухталиф посух доданд.

Шаҳноза ҲОМИДОВА,
«Ҳақиқати Суғд»

Читать далее

Сирки Тошканд дар Хуҷанд

Таҳти роҳбарии Нарзинисо Алиева гурӯҳи 27 нафараи ҳунармандони сирк ва ромкунандаи ҳайвонҳои ваҳшии шаҳри Тошканди Ҷумҳурии Ӯзбекистон ба шаҳри Хуҷанд барои намоиши ҳунари волои хеш омадаанд. Омадани сирки Тошканд воқеаи муҳим ва зарурӣ ба шумор меравад, зеро мардум ин рӯзро интизор буданд.

Тавре роҳбари сирки давлатӣ қайд кард, дар сирки шаҳри Тошканд 400 нафар ҳунарманд ҳайвонҳои гуногуни ваҳшӣ, аз ҷумла хирс, паланг, мор, асп, маймун ва саг фаъолият доранд. Ба Ҷумҳурии Тоҷикистон беҳтарин ҳунармандони сирки Тошканд, гирандагони ҷоизаҳои байналхалқию ҷумҳуриявӣ омаданд.

Онҳо бо завқи баланд маҳорати касбии хешро пешкаши аҳли нишаст карданд.

Баргузории сирк дар шаҳри Хуҷанд барои наслҳои калонсолу ҷавон воқеаи фараҳбахш гардид.

12 нафар ҷавондухтару писарон машқи ҳавоӣ, роҳ гаштан дар болои арғамчин ва дигар бозиҳои ҳайратангезу хатарнокро намоиш доданд.

- Аз намоиш ва ҳунари баланди онҳо ба завқ омадам ва хушҳол аз он ҳастам, ки ин намоиш дар шаҳри бостонии Хуҷанд баргузор шуд. Ҳарчанд ҳунармандон хеле ҷавон бошанд ҳам, тавонистанд дар муддати кӯтоҳ бо фарҳанг ва ҳунари худ ҳамагонро мафтун созанд, зеро аксар машқҳову ҳаракатҳояшон ба ҳаёти онҳо хатар дошт. Хеле хуб мебуд, ки падару модарон фарзандҳояшонро ба чунин чорабиниҳо ҷалб созанд, зеро сирк ҳам ҳунар ва ҳам санъат аст, - гуфт омӯзгор Нуринисо Раҳматова.

Бояд қайд кард, ки моҳҳои декабр ва январ дастаи ҳунармандони сирки Ҷумҳурии Ӯзбекистон таҳти роҳбарии Нарзинисо Алиева дар пойтахти кишвар ҳунарнамоӣ карда, аз ҷониби Вазорати фарҳанги Ҷумҳурии Тоҷикистон ба гирифтани Ифтихорнома ва дигар туҳфаҳои хотиравӣ мушарраф гаштанд.

Роҳат Абдуҷалилова,
омӯзгори мактаби таҳсилоти
миёнаи умумии №7, шаҳри Хуҷанд

Читать далее

Саратон ва пешгирии он

- Саратони ғадуди сина яке аз бемориҳоест, ки дар байни навъҳои бемории саратонӣ дар ҷаҳон бештар гардидааст. Дар миқёси ҷаҳон ҳар сол аз ҳаштсад ҳазор то як миллион нафар гирифтори бемории саратон мегарданд, - қайд кард зимни суханронӣ дар ҷаласае, ки дар маҷлисгоҳи КВД «Кохи матбуот» бо иштироки табибон ва намояндагони ВАО баргузор гардид, директори Маркази тибби оилавии вилоят Мунира Содиқова.

Маҳфилро рӯзноманигор Хуршеда Содиқова ҳусни оғоз бахшида, аҳли нишастро муаррифӣ намуд.

Дар бораи бемории саратон, омилҳои хатарнокӣ ва нишонаҳои аввалини он М. Содиқова маълумоти муфассал дод. Айни замон бемории саратон, хосатан саратони ғадуди сина дар байни аҳолӣ, бештар байни занон зиёд паҳн гаштааст. Бемории саратони ғадуди сина бемориест, ки дар он ҳуҷайраҳои саратонӣ аз бофтаҳои ғадуди сина ба вуҷуд меоянд. Дар миқёси ҷаҳон байни дигар бемориҳои саратонӣ он ҷойи аввалро гирифтааст.

Нишонаҳои он кадомҳоанд? Дар зери пӯсти ғадуди сина пайдо шудани гиреҳҳои сахт, ки ҳангоми ҳаҷман калон гаштанаш роҳҳои лимфорав маҳкам шуда, рӯи пӯсти ғадуди сина мисоли пӯсти лимӯ мешавад. Ҳамчунин, кашиши пӯст дар рӯи ғадуд ва варами сина, пайдоиши сурхӣ, кафидани омос ва аз он рафтани хуноба ва пайдоиши гиреҳҳои калони лимфагии зери бағал мебошад.

Баҳри пешгирӣ ва ё муолиҷаи он занони ҷавон соле ду маротиба, пас аз панҷоҳсолагӣ як маротиба аз муоинаи табибон бояд гузаранд. Мутаассифона, дар байни мардон низ чунин беморӣ ба мушоҳида расидааст. Агар бемор сари вақт ба табиб муроҷиат намояд, дар марҳалаи якум ва дуюм имкони табобат кардани он ҳаст. Баҳри муоина ва пешгирии он айни ҳол мунтазам корвони сайёри саломатӣ ба шаҳру ноҳияҳо рафта, кулли аҳолии деҳоти дурдастро ройгон ташхис менамоянд.

Табибон Саломат Каримова, намояндаи Раёсати кор бо занон ва оилаи Мақомоти иҷроияи ҳокимияти давлатии вилоят Истамбону Расулова, сармуҳаррири рӯзномаи вилоятии «Согдийская правда» Исҳоқҷон Зокиров оид ба беаҳамият набудан нисбат ба саломатӣ, пешгирии бемории мазкур, ба сабаби алҳол дар ҳудуди вилоят ҳамагӣ ду таҷҳизоти тиббии момография амал карданаш ва бинобар ин гаронарзиш будани муоина, бо мақсади баррасӣ ба аҳолӣ оид ба масъалаи мазкур мунтазам ба роҳ мондани ҳамкории табибон бо расонаҳои хабарӣ ва электронӣ таклиф ва пешниҳодҳо карда шуданд.

Семинар бо ташаббуси ташкилоти ҷамъиятии «Авасто» тибқи барномаи ЮСАИД «Тандурустии босифат», ташкилоти Аврупо «ДОННА» ва Медиа - клуби «Согдиана» ба муносибати чоруми феврал – Рӯзи муборизаи ҷаҳонӣ бар зидди бемории саратон доир гардид.

Тавҳида ҶӮРАЕВА,
«Ҳақиқати Суғд»

Читать далее