06 June 2018

Ҷаласаи корӣ оид ба таҳия ва амалӣ намудани нақшаи корҳои ободонию бунёдкорӣ ба муносибати 30 – солагии Истиқлолияти давлатии Ҷумҳурии Тоҷикистон

Нимаи дуюми рӯзи 5 июн дар толори Донишкадаи кӯҳӣ – металлургии Тоҷикистон бо ширкати гурӯҳи кории Ҳукумати Ҷумҳурии Тоҷикистон ва фаъолони шаҳри Бӯстон ҷаласаи корӣ баргузор шуд.

Дар ҷаласа масъалаи таҳия ва амалӣ намудани нақшаи корҳои ободонию бунёдкорӣ ба муносибати 30 – солагии Истиқлолияти давлатии Ҷумҳурии Тоҷикистон мавриди баррасӣ қарор гирифт.

Читать далее

Дӯстдори ҳунар

Ҳунар - сарват, ҳунар - давлат ва ҳунар боигарӣ аст. Аммо он сарват, давлат ва боигариро танҳо ҳунарманд метавонад захира кунад, ҷамъ оварад. Бахти ҳунарманд аст, ки сарвату давлату боигариашро касе наметавонад ситонад, вале агар дили муҳаббатбор нисбат ба халқ дошта бошад, албатта дасти нафареро мегирад ва ҳунарашро меомӯзонад. Исмоилхоҷа Музаффаров низ аз зумраи ҳунармандонест, ки дар солҳои мушкил, дар давраҳои карахтӣ на танҳо худ, балки дигаронро низ нон дод, яъне ҳунарашро ба талабгорон омӯзонду наҷот бахшид, ҳунарашро бо санъати моҳирона тасвир карду дӯстдоронро мафтун сохт.

Истеҳсолоти Ҷамъияти дорои масъулияташ маҳдуди «Исфара - Фарфор», ки сарварии онро И. Музаффаров бар дӯш дорад, на он қадар васеъ аст, аммо баҳри дили ӯ кушод аст ва асрори ҳунарашро то ба Истаравшану Панҷакент бурдаасту ба шарофати дарёдилиаш то Ӯзбекистону Қирғизистон дӯстону ҳамкорон пайдо кардааст.

Пас аз пошхӯрии Иттиҳоди Шӯравӣ бо маслиҳати дӯстон И.Музаффаров бо маблағи ҷамъовардааш дар мавзеи холӣ бино бунёд кард. Моҳи феврали соли 1993-юм ба фасли сармо нигоҳ накарда, ҳамагон барои ба фаъолият оғоз бахшидани коргоҳ тарафдор буданд. Дар ҳақиқат он рӯз вақте пирони диёр ба кор фотеҳаи нек доданд, ташнагони санъат сардии ҳаворо эҳсос накарданд, зеро дар он солҳои мушкил ба ин васила вазъи оилавии чанд тан беҳтар хоҳад шуд, аз ин рӯ, ба хурсандии сарвари коргоҳ ҳамроҳ гардиданд. И.Музаффаров тавонист, ки беш аз ҳафтод нафарро бо ҷойи корӣ таъмин намояд. То он даме ки интиқоли гази табиӣ қатъ нагардид, бонувон машғули меҳнат буданд. Аз оғози фаъолият то солҳои дуҳазорум то ҳафтод нафар духтаракону бонувон бо кулолгарӣ машғул буданд.

Дар даврони Истиқлолияти ҷумҳурӣ сехи номбурда гоҳе фаъолият дошту гоҳе ба сабаби набудани гази табиӣ дарбаста мешуд. Бо мурури замон ба сабаби қатъ гардидани гази табиӣ ва сермасраф будани таҷҳизоти куҳан миқдоран армуғонҳои рангобаранги сафолӣ кам гардиду дар баробари ин харидорони худро ҳам гум кард. Бо ҳамин масъала борҳо аз ҳаммаслакони худ аз дигар давлатҳо дар тамос гардид ва илоҷи корро низ ёфт.

- Соли 2009 ба сабаби қатъ гардидани гази табиӣ коргоҳ аз фаъолият бозмонда бошад ҳам, рӯҳафтода нагаштем, балки хумдони тавассути ҳезум истифодабарандаро омода кардем. Соли 2013 якчанд чунин хумдонҳоро ба кор даровардем. Аммо алҳол, ки «асри техника» мегӯянд, бояд ба таҷҳизоти муосир рӯй оварем…

Дирӯз дар мулоқоти Раиси вилоят Раҷаббой Аҳмадзода бо ҳунармандон И.Музаффаров ҳам оид ба сахопешагӣ ва хирадмандии Асосгузори сулҳу ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон, дастгирии ҳунармандон аз ҷониби Ҳукумати Ҷумҳурии Тоҷикистон ва Мақомоти иҷроияи ҳокимияти давлатии вилоят, эълон доштани соли 2018- «Соли рушди сайёҳӣ ва ҳунарҳои мардумӣ», роҳҳои пешравӣ дар кор, омода кардани гулдону табақу косаҳо аз гил ва фоиданок будани он, инчунин дастрас намудани таҷҳизоти муосир фикру андешаи хешро иброз дошт.

Нукта нишонрас гардид…

Вақте ба аёдаташ рафтем, ӯ бо мамнуният изҳор дошт, ки таклифу пешниҳодоташ дар назди Раиси вилоят Раҷаббой Аҳмадзода ҳалли худро ёфтааст ва таҷҳизоти навтарин, дар мисоли хумдони гилпазиро дастрас кардаанд. Вақте аз фарқияти он пурсон шудем, изҳор дошт, ки дар хумдони муосир сӯзишворӣ панҷ маротиба сарфа хоҳад шуд. Ӯ бо дард замони гузаштаро ба хотир оварда, қайд кард, ки «агар солҳои пешин то ҳафтод нафар ба омода сохтани беш аз сад намуди кӯзаву гулдону табақ ва ғайраҳо машғул бошанд, алҳол мо, як гурӯҳи хурдакак кӯшиш ба харҷ дода истодаем, ки 30 намуди армуғонҳои хешро пешкаши муштариён гардонем».

Масоҳати коргоҳ 0, 94 гектар бошад ҳам, аммо сарвари он зикр медорад, ки вақте ба усули дигари кор гузаштанд, албатта кӯшиш ба харҷ хоҳанд дод, ки маҳсулоти эшон дар бозори ҷаҳонӣ мавқеъ пайдо кунад.

Ин марди саховатпеша боз гуфтаҳои Раиси вилоят Раҷаббой Аҳмадзодаро ҳангоми мулоқот бо ҳунармандон оид ба таъсис додани Ассотсиатсияи соҳибкорон ба хотир овард. Ӯ ҳангоми дар корхонаҳои ҳунармандии шаҳрҳои Тошканд, Риштон ва Қӯқанди Ҷумҳурии Ӯзбекистон буданаш чанд навовариҳои онҳоро аз худ кард. Шумораи кормандони корхонаҳои ҳунармандии давлати ҳамсоя аз як нафар то 80 нафар буда, дар коргоҳ маҳсулотро нимтайёр ва пасон дар хона онро идома медиҳанд. Маҳсулоти тариқи сӯзишвории гази табиӣ омодагардида, нисбати бо ҳезум тайёр кардашуда сифатан беҳтар аст. Инчунин, дӯстони ҳамҷавор Ассотсиатсияи ҳунармандон таъсис додаанд, ки маҳсулоти омодасохтаро зери назорат мегирад. Дар як вақт Ассотсиатсияи дӯстии кулолгарони Ӯзбекистон ва Япония низ амал мекунад, ки аз рӯи талабу дархости японҳо маҳсулот омода сохта армуғонҳо - маҳсули дасти ӯзбекон пешкаши харидорони япон мегардад.

Ду пешниҳоди саривақтӣ

- Ду пешниҳоде, ки соли равон Пешвои муаззами миллат ба миён оварданд, барои ҳунармандон хеле хуш омад, яке эълон гардидани соли 2018 - «Соли рушди сайёҳӣ ва ҳунарҳои мардумӣ» ва дигаре аз андоз озод будани соҳибкороне, ки дар хона фаъолият мебаранд. Алҳол мо дар сех маҳсулоти нимтайёр омода мекунем, рангу борашро бошад, кӯшиш намуда истодаем, дар хона анҷом диҳем. Дар ин масъала алҳол духтарам Зӯҳрохон бо эҷоди тоза фаъолият бурда истодааст.

Макони маҳсулоти хом

Мо маҳсулоти хомро аз каналу кӯҳҳои сурхи диёри офтобрӯяамон дастрас менамоем. Вақте бо масъалае ба Раиси вилоят муроҷиат кардем, он кас моро дастгирӣ намуда, баҳри харидории таҷҳизот бо тамғаи «НОУХАУ» кӯмак карданд. Истифодаи таҷҳизоти номбурда имкон медиҳад, ки гази табиӣ сарфа гардида, инчунин сифати маҳсулот хеле беҳтар шавад, он гоҳ мо ҳам аз ҷиҳати сифат ва ҳам миқдор ба бозори ҷаҳонӣ рақобатпазир шуда метавонем.

Ҳунарманд - эҷодкор

И.Музаффаров ақидае дорад: Ҳунармандону кулолгарон низ мисли нависандагонанд, вақту соати муайяни корӣ надоранд. Вақте дар корхонаҳои шаҳри Тошканд будам, боре як нафар рангуборчиро пурсон гаштам, ки дар як рӯз чанд дона кӯзаро ороиш медиҳад. Ӯ дар ҷавоб гуфт: - Дар як рӯз гоҳе то 10 дона ва гоҳе як донаашро ҳам ба итмом расонида наметавонам. Эҷодкор вақту соати кории муайяне надорад. Дар корхонаҳои шаҳри Риштон ҳам чунин ҳолатро дидам, аз нафаре пурсон шудам, ки барои нақшофарӣ ва ё рангубори он чӣ қадар вақт меравад. Лаҳзае мешавад, ки дар як рӯз то 10 дона кӯзаву табақ ва ё дигар намудҳои армуғониро наққошӣ менамояд ва дар баъзе ҳолати танҳо як табақро нақшбандӣ менамояд. Аз ин рӯ, ман кормандони нақшофаринро мисоли эҷодкорон медонам…

Чанд андешаи ҳунарманд…

Ҳангоми суҳбат бо ин марди меҳнатқарин дарк кардам, ки на танҳо худ, балки дигаронро низ ба ин самт бо муҳаббат равона месозад. Ӯ хоҳишмандони шаҳрҳои Истаравшан ва Панҷакент, толибилмони мактаби таҳсилоти ҳамагонии рақами 62-и зодгоҳаш ва дигар ҳамшаҳриёнашро бо санъати кулолгарӣ ошно сохтааст ва дар ин масъала, метавон гуфт, комёб гаштааст. Алҳол ҳамроҳи ӯ бонувони чирадаст – наққошон Муҳиба Аҳмадова, Дилбархон Юнусова ва Гулчеҳрахон Алиева ба гулкории кӯзаву табақҳои гуногун машғуланд.

Чанде пеш ба истиқболи Наврӯзи байналмилалӣ, ки дар шаҳри бостонии Панҷакент доир гардид, барои банду басти машрубот армуғонҳои хеле зебою наққошикардашударо омода сохт, ки аз ин меҳмонони ба тантана ташрифоварда арзи сипос намуданд.

Дарди дил…

Дарди замон дарди ӯст. Дар солҳои Иттиҳоди Шӯравӣ вақте 50 фоизи армуғон бо тарҳи миллӣ омехта мегардид, аз он танҳо андози иҷтимоӣ ва даромад рӯёнида мешуд, ҳоло бошад… Агар ба тарзи пешин боз рӯй оварем ва маҳсулоти нимтайёрро дар хона омода созем, боз метавонистам бист нафарро бо кор таъмин намоям…

Нақшаҳо зиёданд…

Ҳангоми боздид аз коргоҳ ба ҷӯяндаву меҳнатқарину инсонпарвар будани И.Музаффаров бори дигар боварӣ ҳосил кардам. Ӯ инсонест дилдарё, сахопеша, инсондӯст. Новобаста ба баъзе мушкилот ва ё нофаҳмиҳои бархе аз садрнишинон орзу дорад Маркази таълимӣ - истеҳсолӣ таъсис дода, ҳунари қадимаро дар қалби ояндагон эҳё созад, санъату маҳорати касби кулолгариро ба дигарон ҳам омӯзонад. Дар дохили ҳамин коргоҳ сехи наботпазӣ низ фаъолият мебарад. Вақте вориди он гардидам, дегҳои калонҳаҷми ресмонкашида ҳам буду инчунин наботҳои пухташуда мисоли марҷони зарду сурху сафед ҷилоҳои хосаи худро доштанд. Писари И. Музаффаров Исломхоҷа бо наботпазӣ машғул будааст.

Исмоилхоҷа Музаффаровро чунин дарёфтам: ҳамқадами замон аст, зеро вақте интиқоли гази табиӣ қатъ гардид, хумдони бо ҳезум, пасон хумдони тавассути аррамайда ва чанде пас бо гази моеъ истифодабарандаро омода сохт. Алҳол бошад, аз Раиси вилоят Раҷаббой Аҳмадзода сипосманд аст, ки дар бобати дастрасии таҷҳизоти муосир мусоидат намуд ва минбаъд маҳсулоти босифатро на танҳо дар ҳудуди ҷумҳурӣ, балки берун аз он ҳам пешниҳод хоҳад кард.

Тавҳида ҶӮРАЕВА,
«Ҳақиқати Суғд»

Читать далее

Сарсабзии диёр аз ҳар яки мо вобаста аст!

5-уми июн - Рӯзи байналмилалии муҳити зист дар тамоми олам, аз он ҷумла дар кишвари соҳибистиқлоли мо низ таҷлил мегардад.

Дар ин радиф кормандони Раёсати ҳифзи муҳити зисти вилоят дар таъмини беҳдошти ҳолати экологӣ саҳми арзанда мегузоранд. Роҷеъ ба ин масъалаҳо сардори Раёсати ҳифзи муҳити зисти вилоят Темурҷон Нӯмонзода изҳори ақида намуд.

- Масоили мубрами экологӣ имрӯз тамоми мардуми сайёраро ба ташвиш оварда, экологҳои суғдӣ низ дар ин раванд бетараф нестанд. Мегуфтед, ки имрӯз кадом муаммоҳоро глобалӣ мешуморанд?

- Аз аҳди қадим то имрӯз пок нигоҳ доштани ҷаҳор унсур - обу ҳаво, хоку оташ оини мардуми покгавҳар буду ҳаст. Албатта, гармшавии иқлим, обшавии пиряхҳо, торафт кам шудани намудҳои алоҳидаи набототу ҳайвонот, эрозияи хок, ҷамъ шудани газҳои гармхона, сӯрохӣ дар қабати озонӣ, нарасидани оби ошомиданиву обёрӣ, хушкидани баҳри Арал ва чанде дигар масъалаҳои муҳими ҳалталаби экологӣ на танҳо экологҳо, балки тамоми аҳли башарро бетараф гузошта наметавонанд.

- Бисёр хуб аст, ки соли равон дар миқёси кишвар «Соли рушди сайёҳӣ ва ҳунарҳои мардумӣ» эълон гардид: оё сайёҳӣ, хоса сайёҳии экологӣ метавонад, манфиатовар бошад ва дар ин самт нақшаҳои Раёсати ҳифзи муҳити зист аз чӣ иборат аст?

- Дар Паёми Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон яке аз самтҳои асосии иқтисодии давлат ин рушди соҳаи сайёҳӣ ва истифодаи самараноки ёдгориҳои табиӣ арзёбӣ гардид.

Солҳои қабл аз тарафи мутахассисони Раёсат "Кадастри давлатии Ёдгориҳои табиии шаҳри Панҷакент" таҳия гардида, оид ба ташкил намудани "Китоби Ёдгориҳои табиии шаҳри Панҷакент" корҳои зарурӣ ба анҷом расида буд ва соли 2015 бо қарори раиси шаҳри Панҷакент ба ин ёдгориҳо статуси расмии махсус муҳофизатшаванда дода шуд. Раёсати ҳифзи муҳити зисти вилоят тасмим гирифтааст, ки минбаъд бо дастгирии Кумитаи ҳифзи муҳити зисти назди Ҳукумати Ҷумҳурии Тоҷикистон ҷиҳати тартиб додани "Кадастри давлатии Ёдгориҳои табиии вилояти Суғд" ва ташкил намудани "Китоби Ёдгориҳои табиии вилояти Суғд" дар миқёси шаҳру ноҳияҳои вилоят ҳиссагузорӣ намояд. Солҳои охир ҷиҳати барои минтақаи сайёҳии байналхалқӣ табдил додани минтақаи Баҳри Тоҷик чораҳо андешида мешавад. Ба фаъолият шурӯъ намудани истироҳатгоҳи «Баҳористон» дар шаҳри Гулистон, ки ба талаботи муосир ҷавобгӯ аст, теъдоди сайёҳонро ба вилоятамон ба маротиб афзун намуд.

Худи манзараҳои Искандаркӯл, дар сурати васеъ ба роҳ мондани таблиғу ташвиқи тарзи ҳаёти солим метавонад, ҳазорон дӯстдорони табиатро ба сӯи хеш хонад. Зеро мавриди истифода қарор додани шоҳроҳи Душанбе-Айнӣ-Хуҷанд-Чаноқ мушкилоти роҳро аз байн бурда, дар муддати начандон зиёд ба чунин гӯшаҳои биҳиштосо рафтан имконпазир шудааст. Ташкили сайру саёҳат ба кӯҳсорону кӯлҳои нодирманзараи Зарафшон, арчазорони Шаҳристону Деваштич ва дигар минтақаҳои махсус муҳофизатшаванда албатта, боиси рушди соҳаи сайёҳӣ мебошанд.

- Дар вилоят партовгоҳҳои радиофаъол мавҷуданд, ки боиси хавотирии сокинон мегардад. Вазъият дар ин самт ташвишовар аст?

 - Дар миқёси вилоят ягона маҳфузгоҳи «Деҳмой»-и Корхонаи воҳиди давлатии «Фулузоти нодири Тоҷикистон» амал мекард. Масоҳати маҳфузгоҳи мазкур ҳамагӣ 90 гектар буда, дар он 36 миллион тонна партовҳо ҷойгир карда шудааст. Бо дастгирии Мақомоти иҷроияи ҳокимияти давлатии вилоят давоми ду соли охир баҳри пешгирии паҳншавии партовҳои радиофаъол масъалаи хокпӯш намудани партовгоҳ дар масоҳати 14,5 гектар бо қабати 0,5 метр хоки инертӣ ҳалли худро ёфта, корҳои болопӯш давом дода мешаванд. Албатта, корҳои хокпӯш намудани партовгоҳ бо маблағгузории муайян вобастагӣ дорад ва ман боварӣ дорам, ки давоми солҳои наздик ин муаммои экологӣ дар қатори аввал гузошта шуда, ҳалли мусбати худро меёбад.

- Солҳои охир натанҳо табиатдӯстон, балки сарони кишварҳоро вазъи ногувори муомилот бо партовҳо ба ташвиш овардааст, ки яке аз онҳо партовҳои пластикӣ мебошад.

 - Пластик маҳсулоти универсалӣ, сабук, печон, обногузар, сахт буда, мутаносибан гарон нест. Ин сифату хусусиятҳо маҳсулотро серистеъмол, дар ҷаҳон маъмул ва таҳкурсии бисёр ихтироъкориҳо гаштааст. Аммо, муносибати хунукназарона ва истифодаи бемеъёри маводи пластикӣ ба он оварда расонидааст, ки ифлосшавии муҳити зист бо партовҳои пластикӣ офати экологиро ба миён овардааст. Аз рӯи маълумот соли 2015 дар ҷаҳон 6,3 миллиард тонна партовҳои пластикӣ ҳосил шудааст. Танҳо 9 фоиз аз нав коркард ва 12 фоиз дар корхонаҳои махсус безарар гардонида шуданд. Ба ҷуз ин ҳар сол дар ҷаҳон бештар аз 500 миллиард пакетҳои пластикӣ истифода шуда, ҳамасола қариб 8 миллион тонна партовҳои пластикӣ ба уқёнусҳои ҷаҳон партофта мешаванд. Дар ҷаҳон дар як дақиқа 1 миллион зарфҳои пластикӣ бо нӯшокиҳои гуногун харидорӣ мешаванд.

- Ба дӯстдорони табиат чӣ таманно доред?

 - Бо истифода аз ин лаҳзаи фараҳбахш шаҳрвандон, бахусус кормандону мутахассисони сохторҳои мақомоти ҳифзи муҳити зист ва табиатдӯстонро сидқан табрику муборакбод намуда, барои онҳо саломатӣ, саодатмандӣ, рӯзгори неку барори кор таманно менамоям. Саҳми ҳар яки мо дар ҳифзи муҳити зист баҳри пешравии ҷомеаи имрӯза мусоидат хоҳад кард.

Хуршед Саидов

Читать далее

Ба қадри сулҳ расидан ватандорист!

(Дар ҳошияи мулоқоти Президенти Ҷумҳурии Тоҷикистон Эмомалӣ Раҳмон бо намояндагони ҷомеаи кишвар)

Имрӯз таҳаввулоти тез-тез дигаргуншавии ҷаҳонӣ ҷомеаи башарро дар нуқтае қарор дода истодааст, ки ба сари хулосаи амиқ омадан душвор гаштааст. Абарқудратҳо барои талош ва ишғоли ҳарчӣ бештари минтақаҳои геополитикӣ равияву гурӯҳҳоеро созмон додаанд, ки мутаассифона, аз зеҳну рӯҳу қувваи ҷавонони ноозмуда ба манфиату ғарази худ истифода мебаранд.

Мисолҳои зиёдеро аз воқеаҳои хунини Ховари Миёна метавон овард, ки махсус ҷавонон ба гирдоби фиребу ғарази гурӯҳҳои табаҳкор афтодаанд. Агар сидқан сафи аъзоёни гурӯҳҳои даҳшатафкан ба синну сол ҷудо карда шавад, дақиқан метавон шоҳид шуд, ки аксари онҳо ҷавононанд. Ҷавононе, ки ҳанӯз лаззату рангинии дунёро надидаанд. Ҷавононе, ки падару модаронашон оҳи ҷигарсӯз дар сина доранду онҳо бошанд, даст ба террору қатлу ваҳшоният зада истодаанд.

Аммо дар қиболи чунин гирудори ҷаҳонӣ Ҷумҳурии Тоҷикистон тавонист, ки таҳти сиёсати пешгирифтаи Президентамон Эмомалӣ Раҳмон ҷавононро ба сӯи ободкориву созандагӣ, иттиҳоду ҳамбастагӣ ва гулгулшукуфии Ватани азизамон раҳнамун созад. Таҷрибаи сулҳи Тоҷикистон ва хатми ҷанги шаҳрвандӣ, ки худ як институти замонсолорӣ ва сиёсатмадории баргузидаи Пешвоямонро нишон медиҳад, як мавзӯи алоҳидаест, ки борҳо муфассирону муҳаққиқони сатҳи ҷаҳонӣ пиромуни он гуфтаанд.

Ба қарибӣ гуфтори як ҷавони фаъоли ҷамъиятии Афғонистон маро ба андеша фурӯ бурд.

-Агар Худованд ба кишвари мо мисли Эмомалӣ Раҳмон сарваре медод, бешак кайҳо дар ватани мо низ сулҳ пойдор буду кӯдакони мо ба ҷои тӯп садои алларо мешуниданд, - гуфта буд мавсуф.

Ин ҳарфҳояш ҳаводисеро ба хотирам меорад, ки имрӯз баъзе ҷавонони миллати мо бо вуҷуди он ки дар кишвари азиз оромиву ободӣ ҳукмфармо аст, бо буҳтонбофию дурӯғ дар кишварҳои Ғарб худро ҷабрдида нишон медиҳанд, то ки мақоми паноҳандагӣ дарёфт намоянд.

Афғонистонро фаҳмидан мумкин, ки он ҷо ҷанги дохилӣ идома дорад ва мардум осуда зиндагӣ карда наметавонанд. Аммо дар ҳоле, ки кишвари мо саршори сулҳ аст, магар камоли ношукрӣ нест, ки ба чунин давлат ва бахусус Пешвое, ки ҳатто дигар миллатҳо орзуяшро мекунанд, хиёнат намоем?

Тавре огоҳем, ба сари миллати афғон тақрибан чил сол аст, ки ба ҷои борон тир меборад. Халқияту миллатҳои ин сарзамини ҷангзада пароканда дар чор акнофи дунё шудаанд ва имрӯз дар дохили Афғонистон гурӯҳу гурӯҳчаҳои зиёди силоҳбадаст хоби оромро аз қалбу рӯҳи мардум бурдааст ва халқи ин кишвар орзу доранд, ки сарваре чун Эмомалӣ Раҳмон дошта бошанд.

Неъмати Худованди меҳрубон аст, ки ба сари миллати тоҷик ба мисли фариштаи наҷот Пешвои миллат Эмомалӣ Раҳмон истодаанд ва аз ин лиҳоз метавон умедвор шуд, ки то замоне чунин сарчашмаи хиради азалӣ бо мост, ҳеҷ гоҳ ягон гурӯҳи ифториву террористӣ наметавонад, ба сафи маҳками мо рахна занад. Раҳпаймоии осоиштаи ҷавонон дар Рӯзи ҷавонӣ бори дигар собит сохт, ки ягон қувваи аҳриманӣ наметавонад ин оромиши абадиро аз меҳвари зиндагии Тоҷикистони азиз бигирад.

Тӯли солҳои истиқлолият борҳо шоҳид шудем, ки Сарвари кишвар Эмомалӣ Раҳмон дар тамоми пешомадҳои ҳаёти сиёсиву иҷтимоии Тоҷикистони азиз нахуст бо нерӯи ҷавонон машварат мекунанд, ба пешниҳоду дархостҳои онҳо сидқидилона гӯш меандозанд.

Ҳамеша такя ба қувваи бузурги ҷавонон кардани сиёсати Пешвои миллат мазмуни воқеан нерӯи пешбаранда ва азими ҷомеа будани ҷавононро нишон медиҳад.

Набиюллоҳ СУННАТӢ,
«Ҳақиқати Суғд»

Читать далее