12 June 2018

Ҳадаф: пешгирии ҷиноятҳои коррупсионӣ

Дар Мақомоти иҷроияи ҳокимияти давлатии вилоят семинари омӯзишӣ доир ба татбиқи «Страгегияи муқовимат бо коррупсия дар Ҷумҳурии Тоҷикистон барои солҳои 2013 – 2020» доир гардид, ки дар он намояндагони мақомоти иҷроияи ҳокимияти давлатии шаҳру ноҳияҳо, сохторҳои масъул ва аъзоёни комиссияи ҷамъиятӣ оид ба пешгирии ҷиноятҳои коррупсионӣ дар вилоят ширкат варзиданд.

Дилшод Зарифӣ – мудири шуъбаи Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Суғд зимни суханрониаш аз раванди болоравии сатҳи ҷиноятҳои характери коррупсионӣ дар баъзе ташкилоту муассисаҳои давлатӣ изҳори назар намуда, бобати фаъолияти пурсамари Комиссияи ҷамъиятӣ дар самти пешгирии ин зуҳуроти хавфноки ҷомеа фикру андешаҳои судманд иброз дошт.

Муовини раиси Комиссияи ҷамъиятӣ оид ба пешгирии ҷиноятҳои коррупсионӣ дар вилоят М.Бобоҷонов оид ба натиҷаҳои фаъолияти комиссия дар соли 2017 ва панҷ моҳи соли равон иттилоъ дода, аз вазифаҳои муҳими аъзоёни Комиссияи ҷамъиятии  вилоятӣ ҳарф зад.

Дар фарҷом байни иштирокдорони семинар бобати натиҷаҳои татбиқи Стратегия, иштироки ҷомеаи шаҳрвандӣ дар ҷараёни муқовимат бо коррупсия, пешгирии ин амали номатлуб дар соҳаҳои маориф ва тандурустӣ табодули афкор сурат гирифт.

Хабарнигори
«
Ҳақиқати Суғд»

Читать далее

Аёдати рамазонӣ

Кормандони  Шуъбаи Вазорати корҳои дохилии ноҳияи Деваштич ба муносибати моҳи шарифи Рамазон амали некро анҷом доданд.

Маркази ёрии иҷтимоӣ ба шахсони яккаву танҳо дар ноҳия, ки зиёда аз 40 нафар аъзо дорад, дастархони идона оростанд. Муовини сардори ШВКД Абдусамад Абдулов  иброз дошт, ки дар оянда низ ин иқдоми наҷибро давом хоҳанд дод.

Сарвари Маркази ёрии иҷтимоии ноҳия Лутфинисо Солиева аз ин амали хайри кормадони милиса шод гардида, аз номи аъзоёни марказ изҳори миннатдорӣ намуд.

Лоиқ ТӮЙЧИЕВ,
мутахассиси таблиғоту иттилооти
КИҲХДТ ноҳияи Деваштич

Читать далее

Боздиди Раиси вилоят аз госпитали ҳарбии Гарнизони Суғд

12 июни соли 2018 Раиси вилояти Суғд Раҷаббой Аҳмадзода аз госпитали ҳарбии Гарнизони Суғд, воқеъ дар шаҳри Бӯстон боздид намуда, бо шароити солимгардонӣ ва истироҳативу табобатии афсарону сарбозон шинос шуд.

Зимни боздид Раиси вилоят бо сарбозоне, ки дар госпитали ҳарбии Гарнизони Суғд табобат мегиранд, суҳбат намуда, оид ба вазъи солимгардонӣ,  саломатии онҳо ва дигар шароити муассиса пурсон шуд. Табобатгирандагон изҳор доштанд, ки раванди хизмати онҳо зери таваҷҷуҳи доимии давлату Ҳукумат қарор дорад ва аз ин хотир дар госпитал тамоми шароити лозимӣ муҳайё мебошад.

Читать далее

Андешаҳои комили башардӯстонаро дастгирӣ мебояд!

Рӯзномаи вилоятии «Ҳақиқати Суғд» тасмим гирифт, ки дар доираи амалӣ намудани нақшаи чорабиниҳои Мақомоти иҷроияи ҳокимияти давлатии вилояти Суғд барои боз ҳам возеҳтар шарҳу тафсир намудани муҳтавои мулоқоти Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо намояндагони ҷомеаи кишвар, ки 12-уми майи соли равон баргузор гардид, иштирокдорони мулоқотро ба гӯшаи «Меҳмонхонаи «Ҳақиқати Суғд» даъват намояд.

Дар вохӯрӣ Сӯҳроб  Рустамзода - мудири шуъбаи дин, танзими анъана ва ҷашну маросими Ҷумҳурии Тоҷикистон дар вилоят, Мирзоқосим Каримов - сардори Раёсати кор бо ҷавонон ва варзиши Мақомоти иҷроияи ҳокимияти давлатии вилоят, Ҳоҷӣ Ҳусайн Мӯсозода - раиси Шӯрои уламои дини вилоят ширкат варзида, андешаҳои хешро доир ба мулоқоти мазкур баён доштанд ва ба пурсишҳои хабарнигорон посухҳои мушаххас ироа доштанд.

Сармуҳаррири рӯзномаи вилоятии «Ҳақиқати Суғд» Мухтори Абдулло нахуст меҳмононро хайрамақдам гуфта, баргузории ин маҳфилро ба хотири боз ҳам ба таври рӯшантар ба зеҳни хонандагони рӯзнома расонидани нуктаҳои асосии мулоқоти Пешвои миллат бо намояндагони ҷомеаи кишвар муҳим маънидод кард.

«Мулоқот саривақтӣ ва хеле муҳим буд»

Мудири шуъбаи дин, танзими анъана ва ҷашну маросими Ҷумҳурии Тоҷикистон дар вилоят Сӯҳроб Рустамзода зимни суҳбат баргузории мулоқотро аз ҳама ҷиҳат зарур ва манфиатбор унвон намуд.

- Мулоқот бо намояндагони ҷомеаи кишвар, ки ба муносибати фарорасии моҳи шарифи Рамазон ҷараён гирифт, саривақтӣ маҳсуб меёбад. Зеро дар он масъалаҳои мубрами рӯз аз қабили шомилшавии ҷавонон ба ҳизбу ҳаракатҳои экстремистиву террористӣ, норасоии оби ошомиданӣ дар бархе кишварҳои ҷаҳон, гирифторӣ ба бемории вируси норасоии масъунияти одам, моҷароҳои вазнини сиёсӣ дар ҷаҳон, афзоиши рӯҳияи исломситезӣ ва бадбинии мусулмонон, задухӯрдҳои мусаллаҳона дар чанд кишварҳои хориҷӣ ва дигар масъалаҳо мавриди баррасӣ қарор гирифтанд, - гуфт Сӯҳроб Рустамзода.

Аз ҷумла нуктаҳои иброз намудаи Сарвари давлат муҳтарам Эмомалӣ Раҳмон бобати пайравони мазҳаби муътадилу таҳаммулгарои ҳанафӣ будани сокинони кишвар, хайру сахоро нишонаи имондорӣ ҳисобидан, таҳким бахшидани ҷаҳони маънавӣ ва такмили одобу ахлоқ дар ҷомеаро бори дигар возеҳтар шарҳ дод.

- Мулоқоте, ки дар ибтидои моҳи шарифи Рамазон баргузор гардид, моро ҳидоятгар ба сӯи амалҳои хайру савоб, риояи фазилатҳои парҳезу накӯкорӣ ва худдорӣ аз аъмоли зишт, аёдати падару модарон ва беморону ранҷурон, дасти ёрӣ дароз кардан ба ятимону маъюбон ва камбизоатону дармондагон мебошад. Таҳлилҳо нишон медиҳанд, ки ҷаҳони босуръати кайҳонӣ тағйирёбанда ва муборизаи абарқудратҳо барои тақсими неъматҳои моддӣ ва сарватҳои табиӣ бисёр осебпазир гардида, зарари он ба ташаккули дунёи маънавии инсон рӯ ба афзоиш дорад ва ин ҳолат зиндагии инсонро дар рӯи замин мушкил гардонида истодааст,-гуфт мавсуф.

Сӯҳроб Рустамзода вобаста ба пайравии мазҳаби Имоми Аъзам Абӯҳанифа ибни Собит, ки мазҳаби таҳаммулгароист, андешаҳои Пешвои миллат муҳтарам Эмомалӣ Раҳмон бобати анҷом додани рӯзадорӣ ва сабукиҳои мазҳаби ҳанафиро нуктаҳои башардӯстона арзёбӣ намуд.

- Нафароне, ки бо корҳои зироаткорию кишоварзӣ машғул ҳастанд, набояд фаромӯш кунанд, ки дини Ислом ҳеҷ гоҳ пайравонашро ба сахтиву машаққат раҳнамоӣ накардааст. Аз ин хотир, барои рӯза дар кунҷи хона нишастану фаромӯш кардани таъмини аҳлу аёл гуноҳи кабира аст. Корҳои кишоварзӣ дар авҷ буда, гузашта аз ин, бахусус, дар Нерӯгоҳи барқи обии Роғун зиёда аз 18 ҳазор кор мекунанд, ба шарофати меҳнати сидқидилонаи онҳо иншооти аср сохта мешавад.

Мардум бояд барои зиндагии шоистаи худ мубориза барад, кору фаъолият намояд ва ба умеди доштани рӯза кунҷи хона нишаста, ба ризқи худ ва фарзандон зомин шудан, баръакс ба ҷои савоб гуноҳи бузургест. Зеро асосгузори силсилаи нақшбандия Хоҷа Баҳоваддини Нақшбанд шиори зиндагиашонро «даст ба кору дил ба ёр» эълон намуда буданд. Мо низ дар офаридани неъматҳои моддӣ бояд заҳмат кашем ва аз сахтиҳо наҳаросем. Яъне, бо гирифтани рӯза қонеъ шуда, фардоро андеша накардан сифати муъмини комил нест. Агар мо аз ин рӯзҳои офтобӣ ва ҷараёни киштукор самарабахш истифода набарем, фурсат аз даст меравад, ҳосил талаф мешавад ва дар айёми сармо, ки бинобар обу ҳавои гарми баҳори имсола бетаъсир намемонад, аҳли хонадони мо ба сахтиҳо дучор мешаванд, - иброз дошт Рустамзода.

Ба пурсиши хабарнигори рӯзнома Тавҳида Ҷӯраева, бобати то кадом андоза кам ва ё зиёдшавии теъдоди ҷавонон дар таҳсили ғайриқонунии муассисаҳои динии хориҷи кишвар, мавсуф чунин посух дод:

- Бо ҳамоҳангӣ бо Мақомоти иҷроияи ҳокимияти давлатии вилоят мақомотҳои иҷроияи ҳокимияти давлатии шаҳру ноҳияҳо ва мақомотҳои қудратии вилоят аллакай бобати ин масъала корбарӣ шуда истодааст. Шукр, ки самараи теъдодашон торафт кам ва дар назар аст, ки ҳамаи онҳо ба Ватан бозпас гардонида хоҳанд шуд.

Хабарнигор Гулҷаҳон Махкамова бо мазмуни ба ҷои Ҳаҷ анҷом додани иқдомҳои хайр аз қабили сохтани пул, муассисаҳои маориф ва тиб аз ҷониби соҳибкорон дар кадом сатҳ қарор дорад, пурсиш ба амал овард.

- Ин иқдом шоистаи дастгирист, зеро нафарони хайрхоҳ рӯз ба рӯз зиёд шуда, аллакай дар ноҳияҳои Деваштичу Мастчоҳ ва дигар қаламрави вилоят корҳо амалӣ шуда истодаанд. Тавре Пешвои миллат иброз доштанд, ба ҷои дуввумбораву савумбора ба хотири худнамоӣ Ҳаҷ рафтан, савоби сохтани иншоотҳои ҳаётан муҳим калонтар аст, - посух дод Сӯҳроб Рустамзода.

Пешвои миллат ҳамеша такя ба ҷавонон мекунанд

Сардори Раёсати кор бо ҷавонон ва варзиши Мақомоти иҷроияи ҳокимияти давлатии вилоят Мирзоқосим Каримов, ки яке аз иштирокчиён буд, мулоқотро амали дилсӯзонаву ғамхоронаи Пешвои миллат унвон кард.

- Ҳадафи асосии мулоқот тарбия намудани насле аст, ки аз нигоҳи одобу ахлоқ, донишу заковат, худшиносиву ҷаҳонбинӣ дар шароити ҷаҳонишавӣ ба ниёзмандиҳои ҷомеа ҷавобгӯ бошанд. Аз ҷониби Сарвари давлат вазифаҳои ҷавонон ҳамчун нерӯи созанда бори дигар таъкид гардид, мо ҷавононро муваззаф ва водор месозад, ки дар пешрафти кишвари азизамон саҳми беназари худро гузорем.

Ҷавонон бояд аз ҳама қишрҳои ҷомеа бештар фаъол бошанд, ба ташаббусҳои созанда рӯ оваранд, рамзҳои давлатӣ, муқаддасоти миллӣ ва дастовардҳои истиқлолиятро ҳифз намоянд, дар ҳаёти сиёсиву иҷтимоии Тоҷикистон бо дасту дили гарм ва нерӯи бунёдгарона ширкат варзанд, амнияти давлат ва шарафу номуси ватандориро ҳимоя карда, худро аз ҳама хавфу хатарҳои номатлуби ҷаҳони муосир эмин нигоҳ доранд ва парчамбардори ин сарзамин, марзу бум ва кишвари муқаддасамон бошанд, - гуфт Мирзоқосим Каримов.

Бобати пешгирии тақлиди кӯр-кӯронаи баъзе ҷавонон ба фарҳангу мазҳаби бегона ва гаравиши онҳо ба ҳизбу гурӯҳҳои ифротӣ ва ҳатто, ба кишварҳои ҷангзада, амсоли Сурияву Либияро мавсуф дар нигоҳ доштани зиракаву ҳушёрии сиёсии дастҷамъонаи аҳли ҷамоатчигӣ унвон намуд.

- Набояд дар ғафлат монем, манфиату зарари худро дар гуфтору амали хеш дуруст дарк намоем, ба қадри бузургтарин неъмату дастовардҳои зиндагиамон-истиқлолияту озодӣ, соҳибватаниву соҳибдавлатӣ, сулҳу оромӣ ва ваҳдати миллӣ расем. Тавре Президенти кишвар дар суханрониашон ҷиҳати покизагии имон, хайру эҳсон ва ҷилавгирӣ аз ҳама амалҳои номатлуб ҳидоятҳои созанда доданд, бояд имондор бошему имони худро нафурӯшем, фирефтаи хоҷагони хориҷӣ нашавем. Он бадбахтие, ки солҳои навадуми асри ХХ ба сари халқ омаду ҷанги бемаънии бародаркушӣ сар зад, аз фирефтаи хоҷагони хориҷӣ шудани баъзе афрод сарчашма мегирад. Имрӯз дар шароити ҷаҳонишавӣ зарур аст, ки иттиҳоду сарҷамъ шавем, шукри ваҳдату осудагии кишвари азизи хешро ба ҷо оварем, ҷиҳати ислоҳи камбудиҳои мавҷуда саъю талош варзем. Ҷоиз ба қайд аст, ки пас аз се сол сокинони сарбаланди кишвар бо ифтихормандӣ ҷашни 30 - солагии Истиқлолияти давлатии Ҷумҳурии Тоҷикистонро таҷлил менамоянд. Ҷиҳати бо дастовардҳои арзанда истиқбол гирифтани ин ҷашни мубораку таърихӣ Пешвои миллат дар назди аҳли кишвар вазифаҳои мушаххас гузоштанд, ки вусъат додани корҳои бунёдкорию созандагӣ аз қабили онҳост, - иброз дошт М.Каримов.

Номбурда аз ҷумла қайд намуд, ки татбиқи босамари сиёсати давлатии ҷавонон аз рӯзҳои нахустини соҳибистиқлолӣ дар меҳвари фаъолияти Ҳукумати Ҷумҳурии Тоҷикистон қарор дорад. Дар ҷомеаи имрӯза дар кори пешбурди соҳаҳои мухталифи иқтисоди миллӣ мавқеи ҷавонон хеле муҳим аст, чунки ин қишри ҷомеа дорои афкори тозаю нав, нерӯи муҳими пешбарандаи иқтисод буда, истифодаи васеи технологияи муосирро дар истеҳсолот метавонад ба хубӣ таъмин созад.

Пешвои миллат муҳтарам Эмомалӣ Раҳмон ба дастгирии ҷавонон ва таъмини онҳо бо ҷойҳои нави корӣ, дар асоси истифодаи технологияҳои иттилоотиву коммуникатсионӣ бо донистани забонҳои хориҷӣ диққати махсус дода, пешниҳодҳоро баҳри инкишофи Ватани азиз доимо дастгирӣ менамоянд ва бунёди шароити мусоиди кору фаъолиятро пайваста ва таъкид месозанд: «Ҷавонон қувваи бузург, нерӯи созанда ва ояндаи миллатанд». Ин дастуру ҳидоятҳои Пешвои миллат бояд сармашқи асосии кору пайкор ва фаъолияти ҳамарӯзаи ҷавонон дар давраи ҷаҳонишавии муносибатҳо буда, афкору андешаҳои тозаи онҳо нахоҳад гузошт, ки гурӯҳҳои тундраву ифротгаро фазои софи Ватани азизамонро ғуборолуд созад.

Имрӯз дар арафаи таҷлили Рӯзи Ваҳдати миллӣ қарор дорем. Ба мо, ҷавонон зарур аст, ки ҷавобан ба ин ғамхориҳо тамоми саъю талоши хешро ба донишандӯзӣ, интихоби касбу ҳунарҳои муосир, ободиву пешрафти сарзамини аҷдодӣ, ҳимояи Ватан, рушди илму техника ва бунёдкорӣ равона созем, илова кард Мирзоқосим Каримов.

Хабарнигори нашрия Рафоат Мӯъминова бобати аз ҷониби Раёсат дар шаҳру ноҳияҳои вилоят амалӣ шудани дастурҳои Пешвои миллат Эмомалӣ Раҳмон бобати истифодаи нерӯи ҷавонон, бахусус соҳибкорон ба истиқболи ҷашни 30-солагии Истиқлолият пурсон гардид.

- Дар ин замина мо бобати пешгирии шомилшавии ҷавонон ба ҳизбу ҳаракатҳои ифротӣ ва ба амалҳои боманфиат ҷалб намудани онҳо борҳо вохӯрӣ баргузор намудем. Инчунин, андешаҳои Сарвари кишвар дар бораи дар ҳар деҳоти мамлакат бунёд намудани майдончаҳои варзишӣ, марказҳои саломатӣ ва дигар ободкориҳо ба пешвози ҷашни 30-солагии Истиқлолияти давлатӣ ташвиқу таблиғ гардид, ки ин корро дар оянда низ идома хоҳем дод,-посух гуфт М. Каримов

Сарвари давлат дар Каъба барои сарбаландии миллат дуо карданд

Ҳоҷӣ Ҳусайн Мӯсозода - раиси Шӯрои уламои дини вилоят, ки яке аз иштирокчиёни мулоқоти Пешвои миллат бо намояндагони ҷомеаи кишвар аст, ин мулоқотро таърихӣ унвон намуд.

- Мо дар моҳи шарифи Рамазон қарор дорем, ки моҳи хайрхоҳӣ, покию сабурӣ, эҳсону хайру сахо, некӯӣ ба якдигар аст. Дар баробари моҳи шарифи Рамазон фарорасии Иди Ваҳдатро, ки дар ин моҳи муборак таҷлил мегардад, ба тамоми хонандагони рӯзнома муборакбод мегӯям.

Мулоқоте, ки бо аҳли ҷамоатчигӣ дар арафаи моҳи шарифи Рамазон баргузор гардид, мулоқоти таърихӣ буд. Аз ибтидо то интиҳо ҳар як сухани Пешвои миллат, ҳар як калимаву ҳатто ҳар ҳарфи он ба манфиати мардум равона гардида, ҳадаф ислоҳи ҷомеа ва саршор аз ғамхорӣ ба мардум буд.

Пешвои миллат эҳтироми худро ба моҳи мубораки Рамазон, ба мазҳаби Имоми Аъзам дар як чаҳорчӯбаи муайяни боадолат ҳамчун мазҳаби таҳаммулпазир баён доштанд. Ҳадафи Сарвари давлат сарбаландии миллат аст. Дину оине, ки мо дорем, бояд беолоиш бошад. Аслан дин одобу ахлоқ ҳикмату насиҳат аст. Сӯиистифода аз ин дин бадтарин гуноҳ ба ҳисоб меравад, зеро онро бояд покиза нигоҳ дорем. Нафароне, ки худро мусулмон мепиндоранду аз дин сӯиистифода мекунанд, динро силоҳи ҷангӣ қарор медиҳанд, ба дин хизмати хирсона менамоянд. Ишораҳои Пешвои миллат ҳам ба он буд, ки мо пири мазҳаб дорем. Дин осонӣ аст. Худованд дар чандин оятҳои Қуръони азимушшаън мефармояд, ки мо бояд динро осон нишон диҳем. Худо барои мо осониро мехоҳад, на мушкилиро. Дар ҳақиқат Рамазон моҳи ибодат аст, аммо нафароне, ки соҳиби узр ҳастанд, бемору мусофир ҳастанд, аз рӯзадорӣ озод карда мешаванд. Ҳамаи инро Пешвои миллат бо далелу ҳуҷҷат баён карданд, - мегӯяд Ҳоҷӣ Ҳусайн Мӯсозода.

Инчунин, бобати Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» сухан ронда, онро аз ҳама ҷиҳат қонуни мукаммал ва саривақтиву миллӣ унвон намуд.

- То қонуни мазкур чандин маротиба оиннома, низомнома қабул шуда буд, аммо амалӣ нашуд. Пеш фикри асосии мардум ҷамъоварии мол буд: «кор мекунад, пул меёбад, вай бояд тӯй кунад, маърака гузаронад, аз ҳамсоя қафо набояд монад». Ин як хурофот буд, ки Пешвои миллат муҳтарам Эмомалӣ Раҳмон аз байн бурданд. Хароҷоти зиёд бардошта шуд. Мутаассифона, ҳозир Ҳаҷ ибодат не, балки ба таассуб бадал шудааст. Мардум бояд фаҳмад, Ҳаҷ барои он касе фарз аст, ки қудрат ва тавоноӣ дошта, муҳтоҷ набошад. Онҳое, ки бо қарз ба Ҳаҷ мераванд, қабули даргоҳи Худо нест. Нафароне ҳастанд, ки маблағи Ҳаҷро ба корҳои хайр сарф мекунанд, роҳро обод мекунанд, бунгоҳи тиббӣ, мактабу иншооти ба мардум даркориро месозанд, ки садақаи ҷория мебошад ва савоби вай доимӣ аст. Агар ҳамсояе, пайванде аз онҳо муҳтоҷ бошад, ҳаҷравӣ ҷоиз ва қабул нест, - гуфт Мӯсозода.

Ҳамзамон, бобати ҳимояи Пешвои миллат аз дини мубини Ислом дар созмонҳои ҷаҳонӣ ёдовар шуда, мавсуф иброз дошт, ки нафаре, ки аз минбари Созмони Милали Муттаҳид Исломро ҳимоя кардааст, Сарвари кишвар Эмомалӣ Раҳмон ҳастанд.

-Инро мо бояд ба мардум расонем, онҳобояд донанд, хизмате, ки Пешвои миллат муҳтарам Эмомалӣ Раҳмон барои дин, мазҳаб, миллат ҷиҳати нигоҳ доштани арзишҳои миллӣ анҷом доданд, касе на ҷуръате дошт ва на ҳиммате. Гумон мекунам, Сарвари ватанамон барои ҳазорсолаи ояндаи мо хизматҳои арзанда кардаанд, - таъкид намуд раиси Шӯрои уламои дини вилоят Ҳоҷӣ Ҳусайн Мӯсозода.

Ба суоли хабарнигор Набиюллоҳ Суннатӣ бобати он, ки имрӯз дар дунё динҳои хеле зиёд ҳастанд, вале чаро маҳз радикализми динӣ домони пайравони дини мубини Ислом гирифтааст, мавсуф посух дод, ки ин бозичаи дасти абарқудратҳост.

- Аслан ҳама динҳо барои некӯаҳволии Бани башар нигаронида шудаанд. Аммо абарқудратҳои ҷаҳон барои тақсими геополитикии ҷаҳон аз дини Ислом, ки ҷавонтарин дини дунё аст, истифода карда, маҳз пайравони ин динро бо таҳмили фикру ақидаҳои ғайридинӣ ба қатлу куштор ва ифротгароӣ ҷалб карда истодаанд. Инҳо бозиҳои сиёсӣ аст ва мо набояд гирифтор ба найрангҳои бадкорон шавем.

Шоира САЛИМОВА,
Набиюллоҳ СУННАТӢ,
«Ҳақиқати Суғд»

Читать далее

Вазъи коинот ва низоми олам аз Ваҳдат аст!

Таърихи инсоният собит кардааст, ки рушди босуботу мунтазами ҷомеа аз Ваҳдат вобаста буда, бар асари ҳукмфармо будани носуботӣ идораи давлатҳо ба сакта дучор ва дар натиҷа бесарусомонии иҷтимоӣ фарогири ҷомеа мегардад. Тавре воқеияти объективӣ шаҳодат медиҳад, ҳаёт барои ба эътидол овардани вазъияти сиёсию иқтисодӣ ҷомеаро водор менамояд, ки сулҳу суботро таъмин ва ба ин васила истеҳсоли неъматҳои моддӣ ва рушди маънавиро ба роҳ монад.

Аз нигоҳи илми муосир вазъи коинот ва низоми олам ба ваҳдат ва қонуни ҷозибаи сайёраҳо асос ёфтааст. Аз ин рӯ, ваҳдат на танҳо омили ҳастии ҷамъияту одам, балки асли худи олам ҳам ҳаст ва нафақат сайёраи мо, балки кайҳону коинот ҳам қонунияту низоми муайян доранд, ки ягонагии онҳоро барҷо нигоҳ медорад ва боиси дар сайёраи Замин рушду нумӯъ кардани ҳаёт мегардад. Ин аст, ки ваҳдат асли муносибатҳои миллӣ буда, ба ин васила ҳалли муаммоҳои ҷойдошта дар муносибатҳои миллатҳо арзи ҳастӣ мекунад. 

Ҷамъияти инсонӣ дар дарозои таърих исбот намудааст, ки осудагии мардум танҳо ҳангоми дар муҳити ваҳдат зистан воқеъ мегардад. Аз ин рӯ, он натанҳо арзиши миллӣ, балки умумиинсонӣ низ маҳсуб мешавад, ки барои ҳар макону ҳар замон дархӯр аст.

Инсон дар муҳити ваҳдат ҳамчун моҳӣ дар дарё осудаву озод зиндагӣ ба сар мебарад, худро ҷузъи миллат ҳам мешиносад ва аз афкори маҳдуди қавму маҳалгароӣ раҳоӣ ёфта, манфиатҳои умумимиллӣ ва умумидавлатиро аз маҳаллию шахсӣ авло меҳисобад. Дар натиҷа шахс ба дарки он маънии бузург мерасад, ки ҳастии ӯ танҳо бо ҳастии тамоми мардуму миллат маънову қудрат пайдо менамояд.

Ваҳдат аз ҷониби аҳли адаб ҳамчун падидаи худовандию инсонӣ, иҷтимоию рӯҳонӣ, фардию умумибашарӣ дарк шуда, ҳамчун василае, ки барои расидан ба ҳадафҳои ормонии онҳо хидмат мекунад, ситоиш шудааст. Аз ҳам ҷудоӣ хулқу атвори инсон нест, чизе, ки инсонро инсон месозад, ваҳдати ӯ бо дигарон, муттаҳидии ӯ бо мардум аст. Шоири бедордили мо Лоиқ низ ваҳдатсаро буд ва даъват мекард:

Зи ҳар ҷо биёему якҷо шавем,

Ҳама қатраҳоему дарё шавем.

Ҳамагон огаҳӣ доранд, ки кишвари ҷавони мо дар солҳои аввали соҳибистиқлолӣ ба душвориҳои зиёд рӯ ба рӯ шуд. Он вақтҳо абрҳои сиёҳи ҷанги хонумонсӯзи шаҳрвандӣ осмони кишвари азизамон - Тоҷикистонро фаро гирифта, мардумро ба муқовимати дохилӣ барангезонд, ки аз натиҷааш зиёда аз 25 ҳазор оила бесаробон ва қариб 60 ҳазор нафар кӯдакони маъсум ятим монданд. Бешубҳа, дар он лаҳзаҳои хеле ҳассоси таърихӣ, ки эҳтимолияти аз байн рафтани давлату миллат қарор дошт, барои Тоҷикистон нафаре лозим буд, ки пеши роҳи ин ҷанги хонумонсӯзи шаҳрвандиро бигирад ва Ватану миллатро аз хатари нобудшавӣ раҳоӣ бахшад.

Дар ниҳояти амр қувваҳои солими ҷамъият хатари аз байн рафтани давлат ва пароканда шудани миллатро амиқан дарк карда, барои устувор кардани асосҳои низоми давлатдории навин вакилон моҳи ноябри соли 1992 дар Иҷлосияи ХVI Шӯрои Олии Ҷумҳурии Тоҷикистон дар шаҳри Хуҷанд Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро Раиси Шӯрои Олии Ҷумҳурии Тоҷикистон интихоб намуданд. Пешвои миллат, бо қатъият ба халқи тоҷик чунин изҳор карда буданд: “То даме, ки силоҳро нагузорему сулҳу оромиро дар сарзамини худ барқарор насозем ва ба меҳнати созанда шурӯъ накунем, ҳеҷ гоҳ кӯмаку мусоидати кишварҳои дигар вазъияти моро беҳтар карда наметавонад. То охирин гурезаҳои иҷбориро ба Ватан барнагардонам, худро орому осуда ҳис карда наметавонам ва тамоми донишу таҷрибаамро барои дар ҳар хона ва дар ҳар оила барқарор шудани сулҳ равона карда, барои гулгулшукуфии Ватани азизамон садоқатмандона меҳнат мекунам”.

Нерӯи нави сиёсӣ бо сарварии Президенти Ҷумҳурии Тоҷикистон муҳтарам Эмомалӣ Раҳмон тавонист ваҳдати умумимиллиро ба вуҷуд оварда, мардумро барои барқарор кардани институтҳои давлатдорӣ сафарбар намояд ва муносибати миллати тоҷикро бо дигар миллатҳо барпо кунад.

Ҳоло кишвари мо дар марҳалаи дигар қарор дорад. Низоми иқтисоди бозорӣ устувор шудааст. Дар ҷомеа фаъолияти ҳизбҳои сиёсӣ ва сохторҳои ҷомеаи шаҳрвандӣ мутобиқи Конститутсия ва қонунҳои ҷорӣ ба низоми муайян даромадааст. Воситаҳои ахбори оммаи озод ба вуҷуд омада, теъдоди рӯзномаву маҷалла, телевизиону радио ва оҷонсиҳои иттилоотии хусусӣ нисбат ба шумораи умумии воситаҳои ахбори оммаи давлатӣ ба маротиб зиёд шудаанд, таҷзияи ҳокимият ба ҳокимияти қонунгузор, иҷроия ва судӣ амалӣ шуда, кишварамон ба низоми демократӣ ворид гардид.

Дар ин марҳалаи тараққиёти давлат таъмини Ваҳдати миллӣ аз ҳар яки мо – аъзои ҷомеа иштироки фаъолонаро дар ҷустуҷӯи роҳҳо ва усулҳои мушаххас, аз ҷумла, баланд бурдани сатҳи донишу эҳсоси ватанпарастӣ дар худ, хусусан дар байни ҷавонон, ҳалли масъалаҳои иқтисодӣ ва иҷтимоӣ ба воситаи таъсиси ҷойҳои нави корӣ, самарабахш ба роҳ мондани истифодаи замин ва корхонаҳои соҳаи кишоварзӣ, тараққӣ додани саноат бо назардошти коркарди пурраи молу маводи маҳаллӣ, вусъати тиҷорат ва соҳибкории хурду миёна, бахусус соҳибкории истеҳсолӣ ва ғайраро тақозо менамояд.

Искандар ШАФЕИЁН

Читать далее

Маданияти шаҳрдорӣ

Оё тозагӣ субҳ таъмин мегардад?

Бинобар эълон гардидани 1300 рӯзи меҳнати зарбдор бахшида ба 30 - солагии Истиқлолияти давлатӣ дар қаламрави вилоят корҳои ободонӣ бомаром ҷараён дорад. Шаҳри Хуҷанд, ки маркази вилоят маҳсуб меёбад ва аксар сайёҳону меҳмонон ба ин ҷо меоянд, бояд зебову диққатҷалбкунанда бошад. Дар ин самт фаъолияти Корхонаи давлатии истифодабарии манзили шаҳр назаррас арзёбӣ мегардад, зеро тозаву озода будани кӯчаҳо аз фаъолияти онҳо вобастагии зиёд дорад.

Тавре Усмон Махкамов - роҳбари корхонаи давлатии истифодабарии манзили соҳили рост иттилоъ дод, тибқи супориши Раиси вилоят Раҷаббой Аҳмадзода таъмири се иншооти ҷашнӣ ба зиммаи онҳо вогузор шудааст. Аз ҷумла, гирду атрофи кӯдакистони рақами 28-и маҳаллаи 34 ва 6 – 7 бинои баландошёнаи ин маҳалла рангубор карда шуда, ҷойҳое, ки аз ҷониби сокинон ғайриқонунӣ ишғол гардида буданд, бартараф шуданд. Дар маҳаллаи 32 майдончаи варзишии бачагона сохта шуд. Чунин корҳо дар маҳаллаҳои 3, 18 ва 19 бомаром ҷараён дорад.

Сокинон чӣ ақида доранд?

Тозаву назаррабо будани шаҳр аз фаъолияти рӯбандаҳо вобастагии зиёд дорад. Дар шаҳри Душанбе аз субҳи барвақт рӯбандаҳо сари коранду то ба берун баромадани сокинон кӯчаву роҳрав ва шоҳроҳҳо тоза карда мешаванд. Ин ҳолат дар шаҳри Хуҷанд дар кадом сатҳ қарор дорад? Оё сокинон аз фаъолияти рӯбандаҳо ризоянд?

Дар соҳили рости шаҳр 5 қитъа аст, ки дар он зиёда аз 100 нафар рӯбанда фаъолият мебарад.

- Соати кории онҳо ба ду қисм тақсим шудааст, як қисми онҳо аз соати 5-и субҳ ва қисми дигар аз соати 8-и субҳ то 17 кор мекунанд, - гуфт Усмон Махкамов.

Мукаррама Одилова - истиқоматкунандаи кӯчаи Камоли Хуҷандӣ:

- Соати 5 - и субҳ садои ҷорӯбзании рӯбандаҳо ба гӯш мерасад. Аз амали онҳо хушнуд мешавам, зеро то ба берун баромадани мардум аллакай ҳама ҷо тоза ва партовҳо низ ба пуррагӣ бардошта шудаанд.

Далер Сангинов - сокини маҳаллаи 27:

- Субҳ вақте сӯи коргоҳ равон мешавам, рӯбандаҳо асабамро хароб месозанд, зеро чангро ба осмон дакказанон пеши роҳгузаронро мерӯбанд. Оё намешавад, ки камтар барвақт корашонро оғоз кунанд? Аз чанг пойафзолу либосам олуда мегардад ва вақте норозигӣ баён месозам, аҳамияте намедиҳанд.

Дар фасли тобистон соати 4 субҳ медамад ва агар онҳо як соат пеш ба рӯбучин машғул шаванд, ҳам ба манфиати худашон асту ҳам ба роҳгузарон халал намерасонанд.

Шаҳноза Ҳайдарова - сокини маҳаллаи Бофанда:

- Қарибии соати 7 хонандагони мактаб аз маҳаллаи мо гузашта мераванд, ки дар ин вақт рӯбандаҳо ба кор овора мешаванд. Ростӣ, ҳам ба роҳгузарон дилам месӯзаду ҳам ба рӯбандаҳо. Вақте онҳо мегузаранд, рӯбандаҳо таваққуф мекунанд. Шояд аз ҳамин сабаб корашонро дер анҷом медиҳанд. Хеле хуб мешуд, ки онҳо кори худро барвақт ва ё дертар оғоз кунанд. Чизи дигарро бояд ишора кард, ки имрӯзҳо даруни ҷӯйборҳо низ аз партов пур шудаасту онро бояд тоза кард, зеро кӯдакон бештар дар наздикии он ҷойҳо бозӣ мекунанд. Ин вазъ ба саломатӣ ва ҳаёт хатар дорад.

Ранг бину ҳол пурс!

Боиси таассуф аст, ки дар шаҳр баъзе ҷойҳоеро дучор мегардем, ки аз назари рӯбандаҳову масъулин тамоман дур мондааст. Аз ҷумла, дар маҳаллаҳои 31, 32, 33, «Баҳор», «Пахтакор» биноҳо дар ҳолати садамавианду гирду атрофаш ифлосу норӯфта мондааст. Мардум аз он шикоят доранд, ки масъулин нисбат ба фаъолияти кории худ саҳлангорӣ мекунанд.

Фаридун Эшонқулов – сокини шаҳри Хуҷанд:

- Дар маҳаллаҳои 31 ва «Пахтакор» ҳолати якчанд биноҳо таъмирталаб аст. Корхонаи давлатии истифодабарии манзилӣ ба куҷо нигоҳ мекунад? Агар маълумотнома аз ҷойи истиқомат талаб кунем, даррав «қарзи манзилро супоред» - гӯён даъво мекунанд. Пас ин ҳама маблағ ба куҷо ва барои чӣ истифода мешавад? Лоақал дар ду-се сол бино ва ё бомро як маротиба таъмир кунанд, чунин ҳолати ногувор пеш намеояд. ҳол он ки ҳам барои таъмири бом ва ҳам шикасту рехт худи сокинон маблағ ҷамъ мекунанд.

Саёҳат Сатторова - сокини шаҳри Хуҷанд:

- Пас аз хӯроки шом барои сайругашт баромадаем. Вақте аз назди Коллеҷи санъати ба номи Содирхон ҳофиз гузар доштем, бӯйи ғализ ҳама ҷойро фаро гирифта, қуттиҳои партов пуру гирду атрофаш норӯфта буд. ҳол он ки аз ин мавзеъ нафарони зиёде роҳгузар мешаванд. Бар замми ин, дар наздикии партовҷо сехи кулчақанди «Минутка» фаъолият дорад, ки комилан ҷои партовпартоӣ номуносиб аст.

Мутаассифона, дар бораи фаъолият дар самти ободонӣ аз масъулини Корхонаи истифодабарии манзили соҳили чап маълумот пайдо карда натавонистем, зеро роҳбарияти коргоҳ барои надодани иттилоот баҳонаи зиёдеро пеш оварданд!...

Ободонию тозагии шаҳр, пеш аз ҳама, ба сокинон вобаста аст. Агар ҳар нафар аз тирезаи худ партовро напартояд, қафои бинои истиқоматиаш ба партовҷо мубаддал намеёбад ва агар чизҳои нолозимаро ба сари роҳ ва роҳрав ҳаво надода, ба қуттӣ гузорад, он вақт шаҳр тозаву рӯҳияи мардум низ болида мегардад. Маданияти шаҳрдориро бояд дар хона ва дар макони зисти худ омӯхт!

Шаҳбонуи СИДДИҚ,
«Ҳақиқати Суғд»

Читать далее