February 2019

11 February 2019

Коҳиши сафи муҳоҷирзанон

- Яке аз самтҳои асосии фаъолияти шуъбаю бахшҳои сабти асноди ҳолати шаҳрвандии шаҳру ноҳияҳои вилоят барпо намудани оилаҳои пойдор ва пешгирии вайроншавии он ба ҳисоб меравад, - қайд кард зимни нишасти матбуотӣ мудири шуъбаи Раёсати асноди ҳолати шаҳрвандии Мақомоти иҷроияи ҳокимияти давлатии вилоят Муқаддама Ҳошимзода.

Соли 2018-ум дар вилоят 119702 сабти асноди ҳолати шаҳрвандӣ ба қайд гирифта шуд, аз ҷумла 64105 сабти таваллуд (нисбат ба соли 2017 –ум 1648 нафар зиёд), 11083 сабти вафот (34 нафар зиёд), 22781 сабти никоҳ (736 адад зиёд), 4046 адад сабти бекор кардани ақди никоҳ (6 адад зиёд), 3303 сабти муқаррар кардани падарӣ (417 адад зиёд) ва 271 сабти фарзандхонӣ ба қайд гирифта шудааст. Дар ин давр 53 ақди никоҳи шаҳрвандони хориҷӣ ва бешаҳрванд дар шуъбаю бахшҳои сабти асноди ҳолати шаҳрвандии шаҳру ноҳияҳо ба қайд гирифта шудааст, ки асосан шаҳрвандон аз давлатҳои Федератсияи Русия, Ҷумҳуриҳои Ӯзбекистону Қирғизистон, Украина ва Хитой буданд. Сардори Раёсати кор бо занон ва оилаи Мақомоти иҷроияи ҳокимияти давлатии вилоят Нигора Ғаффорзода зикр кард, ки аз як миллиону 315 ҳазору 4 нафар занону духтарони вилоят 6733 нафар занони роҳбарикунанда ва 1267 нафар хизматчиёни давлатӣ мебошанд.

Дар вилоят 1204 нафар магистрант, 108 нафар аспирант, 46 нафар гирандаи Стипендияи Президентӣ ва 97 нафар гирандаи стипендияи Раиси вилоят буда, онон дар корҳои ҷамъиятӣ низ фаъоланд. Баҳри рушди ҳунармандӣ ва ба кор ҷалб намудани занони хонанишин чун анъана соли 2018-ум низ 13 нафар занону духтарони аз шаҳру навоҳии вилоят сазовори Гранти Президентӣ ва 60 нафар соҳиби гранти Раиси вилоят шуданд. Дар қаламрави вилоят 267 Марказҳои таълимӣ - истеҳсолӣ амал карда истодааст, ки аз он 103 адад ба атласу адрасбофӣ ва 74 адад ба қолинбофӣ машғул аст.

Шумораи занони хонанишин 200000 нафарро ташкил дода, соли гузашта 19121 нафари онон бо шуғл фаро гирифта шуданд. Мудири шуъбаи Раёсати кор бо ҷавонон ва варзиши вилоят Мадина Ҳомидова дар бораи фаъолияти яксолаи Раёсат ҳозиринро огоҳ сохт. Дар вилоят шумораи ҷавонони аз 14 то 30 - сола 901700 нафар буда, аз он 452700 нафар писар ва 449000 нафар духтар мебошанд. Шумораи умумии донишҷӯён дар соли 2018 –ум 65171 нафар буда, 3268 нафар дар донишгоҳҳои олии хориҷи кишвар бо таҳсил фаро гирифта шудаанд. То ҳол 17 нафар донишҷӯ аз муассисаҳои динии хориҷи кишвар барнагаштаанд, ки ду нафари онон занон мебошанд.

Дар байни ҷавонон 144 ҳолати нашъамандӣ рух додааст, ки нисбат ба соли 2017-ум 38 ҳолат кам, вале 107 нафар ба бемории ВНМО/БПНМ гирифтор шуда, дар муқоиса бо соли 2017- ум 33 ҳолат зиёд мебошад. Сафи ҷавонони бекор дар соли 2018-ум афзуда, тибқи маълумоти оморӣ 7543 нафарро ташкил дода, он бештар дар шаҳру ноҳияҳои Истаравшан, Гулистон, Исфара, Зафаробод, Ҷаббор Расулов, Мастчоҳ ва Спитамен ба қайд гирифта шудааст. Ҳамчунин, М. Ҳомидова дар бораи иштироки ҷавонон ва наврасон дар баргузории чорабиниҳои сиёсию фарҳангӣ, аксияҳо, тарғибу ташвиқи Паёми Президенти мамлакат, баланд бардоштани маърифати зеҳнии ҷавонон ва таъсиси маҳфилҳои мухталиф изҳори андеша кард. Дар анҷом ҷурналистон ба саволҳои хеш посухҳои мушаххас гирифтанд.

Т. ҶӮРАЕВА,
«Ҳақиқати Суғд»

Читать далее

АШТ: ИҚДОМИ НАВ ДАР МАДАНИЯТИ ЗАМИНДОРӢ

Ба гардиши кишоварзӣ ворид намудану ба заминҳои зархез табдил додани қитъаҳои замини бекорхобида яке аз ҳадафҳои асосии Ҳукумати Ҷумҳурии Тоҷикистон ба шумор меравад. Соли 2018 дар вилояти Суғд барои васеъ намудани масоҳати замини кишт, ки пас аз пошхӯриии Иттиҳоди Шӯравӣ солҳо бекор монда буд, заминаҳои хеле воқеиву устувор гузошта шудаанд.

Вусъати муносибати дилсӯзона

Бале, азхудкунии заминҳои бекорхобида, ки он раванди ободкориву созандагиро дар худ таҷассум мекунад, яке аз самтҳои афзалиятноки сиёсати Ҳукумати Ҷумҳурии Тоҷикистон дар соҳаи кишоварзӣ қарор дорад. Биноан, ба гардиши кишоварзӣ даровардани заминҳои корам имконият медиҳад, ки фаъолият дар соҳаи истеҳсоли маҳсулоти кишоварзӣ устувор гардад, ҷойҳои нави корӣ таъсис ёбад, даромади аҳолӣ зиёд шавад ва бад - ин минвол некӯаҳволии мардум ба сатҳи боз ҳам баландтар расад.

Дар асоси қарори Ҳукумати Ҷумҳурии Тоҷикистон оид ба «Барномаи давлатии азхудкунии заминҳои нави обёришаванда ва барқарорсозии заминҳои аз гардиши кишоварзӣ берунмондаи Ҷумҳурии Тоҷикистон барои солҳои 2012 - 2020» дар ноҳия солҳои охир эътибори хоса зоҳир мегардад. Барои фаҳмидан аз вазъи корҳо моро лозим омад, ки ба ноҳияи Ашт сафар намоем. Нақлиёти мусофиркашони Хуҷанд – Шайдон бомаром ба пеш ҳаракат мекарду роҳи масофаи байни маркази вилоятро ба шаҳраки Шайдон наздиктар месохт. Ҳама саргарми суҳбат буданд. Диққати моро заминҳои бекорхобидаю доманфарох ба худ кашид, ки он шаҳри Хуҷанд, ноҳияи Бобоҷон Fафуров ва ноҳияи Аштро ба ҳам мепайваст. Бале, дар даврони Шӯравӣ барои бунёди сохтмони мавзеи Ашти Калон заминаи воқеӣ гузошта буданд. Аммо баъди пошхӯрии Иттиҳоди Шӯравӣ имконияти молӣ даст надод, ки ин замини доманфарох ба мавзеи кишту сохтмонҳои азими аср табдил ёбад. Маълум аст, ки баъд аз барҳам хӯрдани Иттиҳоди Шӯравӣ заминҳои зиёде дар дохили ноҳия низ аз кишт бозмонданд. Зеро хоҷагиҳо муфлис гардиданд, имконияти молиявӣ даст намедод, ки хоҷагиҳои кишоварзии ноҳия пурра онро истифода намоянд. Нарасидани сӯзишворӣ, техникаю тухмиҳои босифат, қувваи корӣ сабаб гардид, ки қисми заминҳое, ки дар «Ҳафттеппа» - и хоҷагии ба номи Калинин ҷойгир буд, аз кишт бозмонда, як муддат ба теппачаҳо табдил ёфтанд ва ё майдони алафҳои бегона гардиданд.

Солҳои даврони соҳибистиқлолӣ дар кишвар барои ба гардиши кишоварзӣ ворид намудани заминҳои бекорхобида корҳои зиёде ба сомон расиданд. Чаро, ки шодоб намудану ба заминҳои ҳосилхезу зардеҳ табдил додани ҳар як қитъа ва аз хоки мушкбезу зарофар рӯёнидани ҳосили фаровони «тиллои сафед» ва дигар зироатҳои кишоварзии ниёзи ҳаррӯзаи мардум рӯз аз рӯз вусъати тоза мегирад. Дар ҳамаи шаҳру ноҳияҳои вилояти Суғд ба ин масъалаи муҳиму зарурӣ таваҷҷуҳи хоса зоҳир гардида, кишоварзон барои зиёд намудани масоҳати заминҳои обӣ, алалхусус кишти пахта ва зироатҳои дигари хоҷагии қишлоқ дар асоси имконияту технологияҳо ва қоидаҳои агротехникӣ кӯшиши зиёд ба харҷ медиҳанд.

Ба ин масъала тибқи талаботи имрӯза дар ноҳияи Ашт эътибори махсус дода мешавад. Барои аз ҳисоби заминҳои бекорхобида ва ҳам аз гардиши кишоварзӣ берунмонда тадбирҳои ҳадафманд зоҳир мегарданд. Кишоварзон бори дигар дарк намудаанд, ки муносибати хуб ба замин асоси ҳосили фаровон, некӯаҳволии тамоми мардум аст. Онҳо пайваста баҳри зиёд намудани масоҳати заминҳои корами обӣ ҷидду ҷаҳд менамоянд.

Гули мурод мешукуфад дар «Рахшона»

Яке аз хоҷагиҳои пахтакоре, ки дар шодоб намудани заминҳои бекорхобидаю аз гардиши кишоварзӣ берунмонда тадбирҳои зиёдеро анҷом додааст, ҷамъияти дорои масъулияташ маҳдуди «Рахшона» мебошад. Ҷараёни рафти корҳо вобаста ба азхудкунии замин ва фаъолияти хоҷагии мазкур шаҳодат доданд, ки он аз соли 2009 фаъолият дошта, соҳаи кишоварзӣ яке аз самтҳои афзалиятнок барои он маҳсуб меёбад. Ба Ҷамъият аз мавзеи “Ҳафтеппа” (дар гузашта Етитеппа) 414 гектар замин вобаста шудааст. Зиёда аз 107 гектари вобасташуда, дар ҳолати ғайриқаноатбахш ва аз гардиши кишоварзӣ берунмонда маҳсуб меёфт.

Тӯли 3 соли охир заҳматкашони Ҷамъият тавонистанд ҳамон 107 гектарро пурра ба гардиши кишоварзӣ ворид намоянд. Бо фаъолияти пурмаҳсул ва меҳнати софдилонаи кишоварзон заминҳои ин мавзеъ обод гардида, кишти пахта ба роҳ монда шудааст. Фаъолияти пурсамари ҶДММ «Рахшона» боис гардид, ки аз ҷониби мақомоти иҷроияи ҳокимияти давлатии ноҳия ба Ҷамъият барои азхудкунии заминҳои бекорхобида дар ду давр иловатан 213 гектар замин вобаста карда шавад. Дар даври якум хоҷагӣ тавонист 105 гектар заминро корам намояд. Имсол заҳматкашон ният доранд, ки боз 116 гектар заминро барои ба гардиши кишоварзӣ ворид намуда, ҳосилнокиро баланд бардоранд.

Имрӯз дар хоҷагӣ 50 намуд техникаи гуногунтамғаи замони муосир аз қабили тракторҳои МТЗ 80 - 82, мошини пахтачинӣ мавҷуд буда, онҳо дар майдонҳои васеи хоҷагӣ вобаста ба мавсим фаъолият мебаранд. Бояд зикр намуд, ки ҶДММ «Рахшона» хоҷагии серсоҳа аст.

Моҳипарварӣ дарсамти иқтисодиёти ҷомеа

Аҳли заҳмат ният доранд, ки имсол дар масоҳати 45 гектар хоҷагии моҳипарварӣ бунёд намуда, барои дар бозори истеъмолӣ зиёд кардани чунин намуди маҳсулот заминаи воқеӣ гузоранд. Барои дар сатҳи баланд ташкил намудани хоҷагии моҳипарварӣ сарвари Ҷамъияти дорои масъулияташ маҳдуди «Рахшона» Шӯҳрат Мамадҷонов ба вилояти Фарғонаи Ҷумҳурии Ӯзбекистон рафта, аз таҷрибаю нозукиҳои ин соҳа огоҳ гардид. Бояд зикр сохт, ки намояндагони Ҷумҳурии Ӯзбекистон, мутахассисонии соҳа барои дастурдиҳӣ ба хоҷагии моҳипарварӣ ташриф оварда, дар бораи иқлим, роҳҳои парвариши моҳӣ дар ин минтақа ба ҳамкасбони тоҷики худ маслиҳатҳои муфид доданд. Вақте ки ба хоҷагӣ омадем, дар ҳар тарафи заминҳои хоҷагии мазкур овози техникаҳои гуногун ба гӯш мерасид, ин мавзеъро барои парвариши моҳӣ омода месохтанд.

Имсол мо ният дорем, ки моҳичаҳоро барои парвариш харидорӣ ва аз соли оянда биолабаротрияи худамонро ташкил карда, парвариши моҳичаҳоро ба роҳ монем, - изҳор дошт муҳосиби хоҷагӣ Пӯлодҷон Шералиев.

Бояд тазаккур дод, ки аҳли хоҷагӣ ният доранд, сол аз сол масоҳати парвариши моҳиро дар ҳавзҳо ва обанборҳои хоҷагӣ бештару беҳтар ба роҳ монда, рӯи дастархони мардуми натанҳо вилоят, балки ҷумҳуриро бештар бо маҳсулоти моҳигӣ таъмин намоянд. Аз ин рӯ агар соли 2019 дар нақшаи хоҷагӣ дар масоҳати 45 гектар ташкил намудани обанборҳои моҳипарварӣ ба назар гирифта бошанд, соли 2020 ин миқдор ба 70 гектар расонида мешавад. Обёрӣ намудани заминҳои ба гардиши кишоварзиро ворид гардида, аз ҳисоби канали М1 - и пойгоҳи калони минтақавӣ ба роҳ монда шудааст, ки ба Идораи давлатии беҳдошти замин ва обёрии ноҳия тааллуқ дорад. Аз он дар масофаи 3 километр лӯлаи об кашида, дар идомааш канали обёрӣ ба дарозии 4 километр кофта шудааст. Дар ду даври азхудкунии қитъаҳои замини бекорхобида бо иншооти обрасон дастрас кардани қариб 1 мукааб об ба заминҳои ташналаб дар назар мебошад. Зеро дар он ҷое, ки об ҳаст, ободӣ ҳаст ва ҳосили фаровони деҳқон низ аз ин мӯъҷизоти олам сарчашма мегирад. Аҳли хоҷагӣ ният доранд, ки поёноби заминҳои қаблан азхудкардашударо низ барои парвариши зироатҳои дигар ва ҳосилбардорӣ истифода баранд.

Ҳар қитъаро ҳосилбахш мегардонанд

Соли якум ба заминҳои бекорхобида гандум кишт карда, солҳои минбаъда кишти пахта ба роҳ монда мешавад. Заминҳои кишти гандум дар хоҷагиҳои Ҷамъият хеле зиёд буда, баъди азхуд кардани қитъаҳои дигар ҳудуди он боз ҳам васеъ мегардад.

ҶДММ «Рахшона» дар он заминҳое, ки ба онҳо вобаста карда шудааст, беҳтару хубтар дар асоси талабот нигоҳубин карда, маданияти кишоварзиву заминдориро баланд мебардорад. Соли равон дар масоҳати наздик 300 гектар пахта кишт карда мешавад. Аҳли заҳмат тасмим гирифтаанд, ки заминҳои бекорхобидаи дигар хоҷагиҳоро низ ба иҷора гирифта, аз он ҳосили фаровон ба даст оранд. Масалан, заминҳои хоҷагиҳои деҳқоние, ки имконияти пешбурди фаъолиятро дар минтақаҳои Иттифоқ, Хуросон, Ориён ва Ашт надоранд, онҳо ба иҷора гирифта, бо меҳнати содиқона дар рушди соҳаи пахтакорӣ саҳм гузошта истодаанд.

Ҷамъияти дорои масъулияташ маҳдуди «Рахшона» натанҳо кишти пахта, балки парвариши моҳӣ, тайёр намудани масолеҳи сохтмон ва дигар намуди фаъолиятро низ ба роҳ мондааст.

Хоҷагии моҳипарварии он дар масофаи на он қадар дур аз шоҳроҳи Марҳамат воқеъ гардида буд. Моро лозим омад, ки барои аз наздик ошноӣ пайдо кардан ба ин мавзеъ омада, оид ба рафти тайёриҳо ба мавсими имсола огоҳ гардем. Хоҷагии моҳипарварӣ дар масофаи тақрибан 7 километр аз роҳи мошингард дар байни заминҳои нопайдоканори ин мавзеъ ташкил шуда истодааст. Бино ба гуфти муҳосиби хоҷагӣ Пӯлодҷон Шералиев заҳматкашон ният доранд, ки имсол дар масофаи 45 гектар ҳавзи моҳипарварӣ бунёд намоянд аз моҳи март то октябр парвариши моҳиро ба роҳ монанд. Бояд зикр кард, ки дар саҳроҳои доманфарох ба ғайр аз чиниши дастӣ онҳо аз «киштии кабуд» низ истифода мебаранд. Ҷамъият аз Ҷумҳурии Ӯзбекистон ду мошини нави пахтачиниро харидорӣ намудааст.

Ҳангоми сафари кории худ Раиси вилоят Раҷаббой Аҳмадзода аз ҶДММ «Рахшона» дидан карда, барои самаранок ба роҳ мондани фаъолияти кишоварзӣ супоришу тавсияҳо дод. Кишоварзони ноҳия бошанд, барои ба гардиши кишоварзӣ ворид намудани заминҳои бекорхобида аз имкониятҳои мавҷуда ва захираҳои ҳанӯз истифода нашуда корбарӣ намуда, қадри замину заминдориро амалан баланд мебардоранд. Пурра аз худ намудани заминҳои бекорхобидаи нақшавӣ то ҷашни 30 - солагии Истиқлолияти давлатии Ҷумҳурии Тоҷикистон дар назар аст ва дар ин самт ҳадафмандона ҳамагон кору пайкор доранд.

Гулҷаҳон МАҲКАМОВА,
«Ҳақиқати Суғд»,
Хуҷанд - Ашт – Хуҷанд

Читать далее

08 February 2019

Конференсияи хоинон ё ҷустуҷӯйи маблағгузорон

Имрӯзҳо ташкилотҳои террористию ифротӣ тамоми ҷомеаи байналмилалро фаро гирифтааст.

Читать далее

Акбар Шариф, журналисти чирадаст

                                     

    Акбар Шариф соли  26-уми феврали соли 1963 дар ноњияи Панљи вилояти Ќурѓонтеппа таваллуд шудааст. Аз моњи августи соли 1994 то моњи майи соли 1995 муовини сардабири њафтаномаи «Наврўзи Ватан» аз 7-уми августи соли 1995 муњаррири барномањои мусиќии Телевизиони Тољикистон буд.

Читать далее

Оё нахи пахта то ба ниҳоӣ коркард мешавад?

Дар ду - се соли оянда бояд ягон кило нахи пахта бе коркард ва бе маҳсулоти тайёр аз кишвар берун набарояд.

Эмомалӣ Раҳмон

Пахта боигарии миллат, сарчашмаи ризқу рӯзии деҳқон мебошад. Соли 2018 бо дастуру ҳидояти Асосгузори сулҳу ваҳдати миллӣ - Пешвои миллат, Президенти мамлакат муҳтарам Эмомалӣ Раҳмон майдони кишти пахта нисбат ба солҳои пешин зиёд гардида, коркарди он низ дар дохили кишвар суръати тоза гирифт. Агар соли 2017 - ум дар хоҷагиҳои деҳқонии ноҳияи Бобоҷон Ғафуров дар майдони ҳафт ҳазору 201 гектар донаи умед кишта бошанд, соли 2018 - ум масоҳати он ба ҳашт ҳазору се гектар расид. Мутаассифона, бо сабаби номусоид омадани обу ҳаво, яъне гарм шудани фасли тобистон деҳқон натавонист ҳосили дилхоҳ рӯёнад, аз ҷумла дар баробари дигар зироатҳои кишоварзӣ, пахта низ муддате аз сабзиш бозмонд. Гарчанде масоҳати кишти пахта зиёд гардида бошад ҳам, аммо деҳқон ҳосили дилхоҳ гирифта натавониста, дар ноҳия ҳамагӣ 16193,5 сентнер “тиллои сафед” ҷамъоварӣ гардид.

Шартнома - роҳи ҳалли масъала

Дар ҳамин раванд соли 2018 хоҷагидорони ноҳияи овозадори Бобоҷон Ғафуров кишти пунбадонаро хуб ба роҳ монда, барои коркарди он дар дохили кишвар соҳибкорон бо деҳқонон шартнома бастанд.

Соли 2018 - ум панҷ корхонаи коркарди пахтаи ноҳия – Ҷамъияти саҳомии кушодаи “Хуҷанд – Стандарт – Коттон”, ҶДММ ба номи Юсуф – саркор, ҶДММ “Шамс 777”, ҶДММ “Зафариён” ва ҶДММ “Хуҷанд – Сидней” тариқи шартнома аз хоҷагиҳои деҳқонии шаҳру ноҳияҳои Конибодом, Зафаробод, Ҷаббор Расулов ва Мастчоҳ ба андозаи 16998,5 тонна “тиллои сафед” қабул карданд.

Ҳавасмандии деҳқон шарти зарурист!

Ҳанӯз моҳи сентябри соли 2018 - ум Раиси вилоят Раҷаббой Аҳмадзода дар ҷаласаи васеи вилоятӣ оид ба соҳаи кишоварзӣ зикр дошта буд, ки майдони кишти пахта, картошка ва дигар зироатҳо афзун гардонида, содироти маҳсулоти хӯрока зиёд ва коркарди пахта дар дохили вилоят рушд дода шавад.

Дар ҳамин ҷаласа Раиси вилоят сарварони хоҷагиҳои деҳқониро баҳри беталаф ҷамъоварӣ намудани “тиллои сафед” ва масъулони корхонаҳои коркарди пахтаро вазифадор намуд, ки деҳқонро ҳавасманд гардонанду ҳосили ба даст овардаашро бо арзиши назаррас харидорӣ намоянд. Ҷамъоварии пахта сари вақт анҷом ёфта, воридот ба корхонаҳои коркард бонизом сурат гирифта бошад ҳам, аммо тавре дар ҷаласаи васеи Ҳукумати ҷумҳурӣ таъкид гардид, “яке аз сабабҳои пурра коркард нашудани нахи пахта аз фаъолият бозмондани корхонаҳои ресандагӣ ё бо иқтидори пурра фаъолият накардани онҳо мебошад”.

Захираи чигити тухмӣ

Соли гузашта корхонаҳои коркарди ноҳия, аз ҷумла ҶДММ ба номи Юсуф - саркор ба миқдори 5960,9 тонна пахта ва 2213 тонна нахи пахта истеҳсол кард, ки 39,6 фоизро ташкил дод.

Инчунин, ҶДММ “Зафариён” 4059,2 тонна пахта қабул карда, аз он 1494 тонна нахи пахта (38,1 фоиз), ҶДММ “Шамс 777” аз 3812 тонна 1452 тонна нах (39,2 фоиз), ҶДММ “Хуҷанд - Сидней” аз 2702, 9 тонна 751 тонна нах (27,7 фоиз) ва ҶСК “Хуҷанд – Стандарт Коттон” ба миқдори 733,5 тонна пахта қабул карда, 280,2 тонна нахи пахта (38,6 фоиз) истеҳсол намуданд. Дар маҷлиси фаъолон Раиси вилоят дар бобати истифода бурдани навъҳои тухмии босифат изҳори андеша намуда буд.

Тавре сармуҳосиби Раёсати кишоварзии ноҳия Шамсиддин Ҷумъаев изҳор медорад, соли 2018 корхонаҳои коркард чигити тухмии навъи “Иншан”, “Тинян”, “Синсзян”, “Чунянсо”, “Дӯстӣ”, “Флора” ва “Флеш” - ро бештар истифода бурданд. Масъулини коргоҳҳои коркард барои соли 2019 низ аз ҳамин навъҳои пахта ба миқдори 819,6 тонна захира кардаанд.

Навъи тухмӣ чӣ гуна бояд бошад?

Дар бобати он ки оё масъулини корхонаи коркард метавонанд аз хоҷагидорон ё иҷоракорон ҳамаи навъи пахтаро, новобаста аз сифат қабул кунанд, намояндаи Кооперативи тиҷоратии ба номи Ҷаббор Расулов Исроил Раҳимов чунин посух дод:

- Новобаста аз навъ ва сифат корхонаҳои коркард ҳама намуди пахтаро қабул мекунанд. Тавре дар маҷлиси фаъолони вилоят моҳи сентябри соли гузашта Раиси вилоят таъкид дошта буд, ба ҳар килои пахта роҳбарияти корхонаҳои коркард то шаш сомонӣ маблағгузорӣ менамоянд. Масалан, дар хоҷагии мо 19 нафар иҷоракор дар замини 630 гектар пахта корида, аз ҳар гектар 23 сентнерӣ ҳосил гирифтанд ва ҳамаи он мувофиқи шартномаи байни соҳибкор ва иҷоракор сари вақт ба коргоҳи коркард супорида, маблағгузорӣ карда шуд.

Сарвари коргоҳи коркарди ҶДММ “Шамс 777” Юсуфҷон Мирзоҷонов изҳор медорад, ки соли 2018 - ум аз хоҷагиҳои деҳқонӣ ва иҷоракорони шаҳру ноҳияҳои Конибодом, Зафаробод, Мастчоҳ ва Бобоҷон Ғафуров ба коргоҳ 3500 тонна пахта ворид гардид, ки нисбат ба соли пешин чорсад тонна зиёд мебошад.

Дар мавсими коркарди пахта 27 нафар дар ду баст фаъолият бурда, онон бо хӯроки гарм таъмин буданд. Аз ҳамон пахтаи воридшуда 1330 тонна нах, 1890 тонна чигит, 80 тонна тору пуд, 20 тонна равған ва 300 тонна кунҷора гирифта шуд.

Босуръат саноатикунонӣ - ба манфиати ҷомеа

Масъулини корхонаҳои коркард изҳор медоранд, ки дар Паёми навбатӣ Пешвои миллат муҳтарам Эмомалӣ Раҳмон барои корхонаҳои истеҳсолкунанда мораторий эълон карданд ва чунин имтиёз имкон медиҳад, ки мо фаъолияти хешро боз ҳам мукаммалтар гардонем.

- Тавре дар Паём омадааст, - изҳор медорад сардори Раёсати кишоварзии ноҳия Ҳомидҷон Ҳакимбоев, - соли 2018 соли дастоварди комёбиҳои таърихӣ буд. Ба истифода додани чархаи аввали Нерӯгоҳи барқи обии “Роғун”, то деҳаҳои кӯчактарин ва дурдасттарин бо қувваи барқ таъмин гардидан, бо ҳам омадани мардуми тоҷику ӯзбек ва кушода гардидани сарҳади байни Тоҷикистону Ӯзбекистон дастовардҳои шоиста мебошад. ҳамчунин босуръат саноатикунонии мамлакат ҳадафи минбаъдаи рушди кишвар маҳсуб меёбад.

Ҳамаи ин моро водор месозад, ки боз ҳам бештар меҳнат кунем ва 30 – солагии Истиқлолияти давлатии Тоҷикистонро бо туҳфаҳои сазовор ва арзанда истиқбол гирем.

Тавҳида ҶӮРАЕВА,
“Ҳақиқати Суғд” 

Читать далее

Муаммои об дар Ашт

Идораи давлатии беҳдошти замин ва обёрии ноҳияи Ашт дар соли 2018-ум ба хоҷагиҳои кишоварзӣ мувофиқи талаботу дархост оби полезӣ расонид. Аммо Идораи мазкур аз хоҷагиҳои кишоварзии ноҳия ба маблағи умумии 900 ҳазор сомонӣ қарздор мебошад. Чаро?

Арзиши давлатӣ бар зарари коргоҳ

Таҳлилҳо нишон медиҳанд, ки арзиши давлатии об барои хоҷагиҳои кишоварзии ноҳия 2 - дирамиро ташкил медиҳад. Гузашта аз он ин маблағ бо назардошти андози иловагӣ мебошад, ки 18 фоизро ташкил медиҳад. Аз ин ҷост, ки арзиши давлатии об ба 1,69 дирамӣ баробар аст.

Ин дар ҳолест, ки хароҷоти аслии хизматрасонии об барои 1 мукаабметр дар ноҳия 0,09 дирамиро ташкил медиҳад. Яъне Идораи обрасонӣ аз ҳар як мукаабметр об 7 - дирамӣ зарар мебинад.

Вобаста ба баланд кардани арзиши об барои хоҷагиҳои кишоварзӣ моҳи майи соли 2018-ум Қарори Ҳукумати ҷумҳурӣ ба тасвиб расида буд, ки мутобиқи он арзиши як мукаабметр об 4,72 дирамӣ муқаррар карда шудааст.

Барои ба хоҷагиҳои ноҳия фаҳмонидан Идораи обрасонӣ корбарӣ карда, муддати 20 рӯз вохӯрӣ доир намуда, моҳияти баланд бардоштани арзиши обрасонӣ фаҳмонида шуд. Ҳамаи хоҷагиҳои кишоварзии ноҳия бо ин арзиш розӣ буданд. Фосилаи байни обдиҳӣ беҳтар гардида, сифати хизматрасонӣ низ баланд бардошта шуд.

Ба маблағи 4,72 дирамӣ муқаррар намудани як мукаабметр об дар баъзе шаҳру ноҳияҳои вилоят дастгирӣ наёфтааст. Аз ин лиҳоз, арзиши як мукаабметр об барои хоҷагиҳои деҳқонӣ боз ба 2 - дирамӣ фароварда шуд.

Хоҷагиҳои ноҳия дар мавсим ба ҳисоби миёна як мукаабметр обро бо арзиши 2 - дирамӣ барои як гектар масалан, боғи зардолу аз 250 то 300 сомонӣ мегирад.

Қарзи пардохти музди меҳнат

Идораи об то соли 2018 - ум 50 фоизи маблағи пардохти музди меҳнатро аз ҳисоби буҷети ҷумҳуриявӣ мегирифт. Бо сабаби қарздор будани идора аз пардохти маблағи хизматрасонии барқ нисфи маблағи пардохти музди меҳнат, ки аз ҳисоби буҷети ҷумҳуриявӣ амалӣ мегардид, нигоҳ дошта шуд. Ин ба афзудани қарзи музди меҳнати корхона дар назди кормандонаш боис гардид.

Барои кӯмак намудан ба фаъолияти Идораи оби ноҳия аз тарафи Раиси вилояти Суғд Раҷаббой Аҳмадзода ба андозаи 300 ҳазор сомонӣ маблағ ҷудо карда шуд.

Афзоиши талабот ва хароҷот

Дар самти хизматрасонии идора тӯли се соли охир беш аз 3 ҳазор гектар замин, ки сӣ сол инҷониб бекор хобида буд, мавриди истифода қарор дода шуд.

Масъулини идора чанд соли охир кори худро беҳтар карданд, ки ин майли мардумро ба коркарди замин зиёд гардонид. Аммо бо сабаби даҳҳо маротиба афзудани арзиши қисмҳои эҳтиётӣ, маводи сӯзишворӣ ва равғанҳои молиданӣ хароҷоти фаъолияти идораи обрасонӣ афзуд.

Ба гуфти Иброҳимҷон Воҳидов - сардори Идораи давлатии беҳдошти замин ва обёрии ноҳия дар коргоҳ 300 нафар фаъолият дошта, музди маоши миёнаи онҳо 700 сомониро ташкил медиҳад. Коргоҳ иқтидор надорад, ки дар ҳаҷми пурра маоши кормандонро пардохт намояд.

Боқимонда қисмати қарзи маоши кормандон пардохт нагардида, моҳ ба моҳ ҷамъ шуда истодааст. Бо сабаби норасоии маош мутахассисони соҳа аз кор мераванд, ки минбаъд ба коҳишёбии самти кадрӣ оварда расонданаш мумкин аст.

Пойгоҳҳои обкашии ноҳия обро зина ба зина тавассути ҳавзҳо боло мекашад ва баъд ба заминҳо тақсим мешавад. Аммо дар сурати боришот ва лойқа омадани оби дарё таҳшинҳо дар ҳавзҳо ҷамъ мешаванд. Пойгоҳҳо оби лойқаи регомехтаро мекашанд, ки аз ин таҷҳизоти обкашӣ хӯрда мешавад ва барқарор кардани воситаҳо маблағи зиёдро талаб мекунад. Илова бар ин ҳавзҳо бо лой пур мешаванд ва зарурати тоза кардани онҳо ба миён меояд. Агар ҳавзҳо тоза набошанд, онҳо обро қабул карда наметавонанд. Аммо мутахассисон ба қитъаҳо сафарбар шуда, бо захираву имкониятҳои мавҷуда то метавонанд кор карда истодаанд.

Ҳарчанд идора дар ҳолати ногувори иқтисодӣ ва техникӣ қарор дорад, дар ин ҷо 2 механизми боркунанда, 4 нақлиёти боркашон ва як булдозер машғули кор аст. Дар як рӯз зиёда аз 600 мукааб лойқа бароварда шуда истодааст.

Механизмҳои фарсудаи пойгоҳҳои обкашӣ бо рехтаҳои чӯянӣ иваз карда мешаванд. Пойгоҳҳои обкашӣ то якуми март бояд омодаи кор шаванд.

Ба гуфти кормандони соҳа агар маблағузорӣ аз буҷети вилоят ё маҳаллӣ нашавад, сол то сол бо фарсуда шудани дастгоҳҳои обкашӣ, баланд будани арзиши барқарор намудани иншооту дастгоҳҳо ва зиёд шудани талаботи аҳолӣ барои оби полезӣ вазъи обрасонӣ дар ноҳия вазнин боқӣ мемонад.

Инчунин, аз тарафи мутахассисон ду роҳи ҳалли масъала пешниҳод карда шуд: яке зиёд кардани маблағи ҳаққи хизматрасонии об барои кишоварзон; дигаре ҷуброн намудани қарзи коргоҳ. Ҳар ду роҳи ҳалли проблема аз ташкилотҳои дахлдори давлатӣ вобаста буда, Идораи давлатии беҳдошти замин ва обёрӣ дар ноҳияи Ашт онро мустақилона ҳал карда наметавонад.

Пас, сари масъала бояд андешид.

Улуғбек ХУДОЙБЕРДИЕВ,
 «Ҳақиқати Суғд»,
Хуҷанд - Ашт – Хуҷанд

Читать далее

Исфара: Буҷет бори аввал 100,1 фоиз иҷро гардид

Давоми чор соли охир маротибаи аввал иҷрои нақшаи қисми даромади буҷет 100,1 фоиз таъмин ва ба буҷет 91349 сомонӣ зиёд маблағ ворид гардид. Ин нуктаро раиси шаҳр Сиҷоуддин  Саломзода дар нишасти матбуотӣ доир ба натиҷаҳои соли 2018 ба намояндагони ВАО иброз дошт.

Дар ҷараёни нишаст, гуфта шуд, ки яке аз масъалаҳои асосӣ набудани макони хубе, ки имкониятҳои сайёҳии шаҳрро ба таври шоиста, хоса барои сайёҳони хориҷӣ муаррифӣ созад, маҳсуб меёбад. Барои шаҳри Исфара ташкили чунини марказ масъалаи аввалиндараҷа буда дар назар аст, ки дар «Солҳои рушди деҳот, сайёҳӣ ва ҳунарҳои мардумӣ» ҳалли худро хоҳад ёфт. Тибқи маълумоти мавҷуда давоми соли гузашта ба шаҳри Исфара аз минтақаҳои дигари кишвар 26 787 нафар ва аз давлатҳои хориҷ ҳудуди 665 нафар, дар маҷмӯъ 27452 нафар бо мақсади боздид аз ҷойҳои таърихӣ ва истироҳату табобат ташриф овардаанд.

Ба истиқболи сазовори ҷашни 30-солагии Истиқлолияти давлатии Ҷумҳурии Тоҷикистон бунёду навсозии иншооти ниёзи аҳолӣ аз қабили беморхонаву мактаб, кӯдакистону марказҳои фарҳанг, таъмири роҳҳо ва ғайра ба нақша гирифта шудааст. Боиси зикр аст, ки дар шаҳр аҳолӣ ва соҳибкорони маҳаллӣ низ дар корҳои ободонӣ саҳми назаррас доранд. Ба гуфти Сиҷоуддин Саломзода кам будани шумораи кӯдакистон низ, яке аз масъалаҳои аввалиндараҷа ба ҳисоб рафта, то охири сол як кудакистони хусусӣ ба фаъолият оғоз хоҳад кард.

Қайд кардан бамаврид аст, ки дар 30 муассисаи таҳсилоти томактабӣ 3172 нафар кӯдак ба таълиму тарбия фаро гирифта шудаанд ва дар назди 51 муассисаҳои таълими шаҳр 72 гурӯҳи "Маркази инкишофи кӯдак» бо фарогирии 1535 нафар кӯдакони синни томактабӣ ба тарбия фаро гирифта шудаанд.

Рустамбек АҲМАДЗОДА

Читать далее

Иштироки Пешвои миллат Эмомалӣ Раҳмон дар Маҷлиси васеи Кумитаи Иҷроияи Марказии Ҳизби Халқии Демократии Тоҷикистон

7 феврал дар Китобхонаи миллӣ Маҷлиси Кумитаи Иҷроияи Марказии Ҳизби Халқии Демократии Тоҷикистон баргузор гардид, ки дар кори он Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси Ҳизби Халқии Демократии Тоҷикистон муҳтарам Эмомалӣ Раҳмон иштирок ва суханронӣ намуданд.

Дар маҷлис натиҷаҳои фаъолияти Дастгоҳи Кумитаи иҷроияи марказии ҳизб ва кумитаҳои иҷроияи вилоят ва шаҳру ноҳияҳои кишвар дар соли 2018 мавриди баррасӣ қарор гирифта, нақшаи фаъолият барои соли 2019 муайян карда шуд.

Читать далее

07 February 2019

Хабари Маркази матбуотии Суди Олии Ҷумҳурии Тоҷикистон

Маркази матбуотии Суди Олии Ҷумҳурии Тоҷикистон хабар медиҳад, ки Коллегияи судӣ оид ба парвандаҳои ҷиноятии Суди Олии ҶТ

Читать далее

Д.НАЗИРОВ: ТАБАДДУЛОТИ КАБИРӢ БАРОИ МАНСАБИ РАИСИ ҲИЗБ (Ё ЧАРО МУРТАДГӮИРО АЗ НАҲЗАТ ОМӮХТЕМ)

Мусоҳибаи  Давлатхӯҷа Назиров, доктори илмхои фалсафа, аъзои Иттифоки нависандагон ва журналистони Точикистон, сармухаррири газетаи «Щит» ба паҳлӯҳои норавшани раҳбарияти наҳзат ва даст доштани Кабирӣ дар табаддулоти даруниҳизбӣ равшанӣмеандозад.

Читать далее