16 March 2019

Куштор набояд бе ҷазо монад!

Имрӯз дар расонаҳои хабарӣ муноқиша ва баҳсҳои зиёд бобати ҳодисаи нохуши байни ду давлати ба ҳам наздик - Тоҷикистону Қирғизистон рафта истодааст. Тавре огаҳ ҳастем, дар деҳаҳои Хоҷаи Аъло ва Ворухи Исфара тирпарронии марзбонони қирғиз дар дохили маҳаллаи тоҷикон ба вуқӯъ пайвастааст. Дар натиҷа ду шаҳрванди Ҷумҳурии Тоҷикистон ба ҳалокат расида, 20 нафар ҷароҳат бардоштаанд.

Дар шабакаҳои интернетӣ омадааст, ки марзбонони тоҷик шаҳрвандони Қирғизистонро айбдор карданд, ки ба сохтани роҳи баҳсии Кӯктош-Оқсой - Тамдиқ оғоз карда, ба муноқиша роҳ додаанд. Марзбонони тоҷик раиси деҳаи Оқсой Роза Усароваро айбдор карданд, ки “аз муташанниҷ гардидани муносибатҳои Тоҷикистону Қирғизистон манфиатдор буда, мунтазам ба барангехтани низои миллӣ миёни мардуми қирғизу тоҷик машғул мебошад.” Як нафарро айбдор кардану ба хотири сухани гуфташуда яроқ ба даст гирифтан мантиқ надорад. Беҳуда «Зери коса нимкоса» намегӯянд, зеро аз рӯи баҳсҳо ҳар инсони равшанфикр огаҳ мегардад, ки дар паси ин бедодгариҳо шахсоне ҳастанд, ки манфиати худро аз манфиатҳои кишвар боло дониста, барои ба вуҷуд овардани нофаҳмӣ ва халалдор сохтани сулҳу осоиштагии мардуми тоҷик саҳм доранд. Чунин шахсонро «ВАТАНФУРӮШ» ва «ХОИН» меноманд. Аз тарафи дигар, чаро кишвари ҳамсоя ба тирпарронӣ ҷуръат кард? Шояд барои онҳо қонуну қарор, иззату эҳтиром ва дӯстию бародарӣ маъние надошта бошад?!   

Кӣ ба онҳо ҳуқуқи ба асир гирифтану махкам кардани роҳро додааст? Бе супориши махсус ва бе нақша ин кор амалӣ намегардид!    

Аслан, куштор ва захмӣ кардани шаҳрвандони Тоҷикистон ва баҳсу талоши онҳо мантиқан кори хатост, зеро бо яроқу аслиҳа наметавон муаммои ба вуҷудомадаро ҳал кард! Бо вуҷуди ин набояд фаромӯш кард, ки ба даст яроқ гирифтану ба ҳар сухани гуфташуда тир парронидан ҷавобгариро тақозо мекунад.  

Имрӯз замоне омада, ки мо, тоҷикон, марзи худро аз чунин бедодгариҳо эмин созем. Нафароне, ки дар ин амали номардона даст доранд, бояд дар назди қонун ҷавоб гӯянд! Набояд хуни ноҳақ рехташуда бе ҷавоб монад! Агар имрӯз ба ин амали «ҳамсояҳо» чашм пӯшем, фардо боз даҳҳо нафари дигарро асир мегиранду мепаронанд.  

Пурмоҳи ОЛИМӢ

Читать далее

Амалҳои зишти марзбонони қирғизро маҳкум менамоем!

Воқеаҳои мудҳишу ноороми рӯзҳои охир дар марзи деҳаҳои Ворухи шаҳри Исфара ва Оқсойи вилояти Боткенти Ҷумҳурии Қирғизистон баамаломада  моро чун фарди кишвари соҳибистиқлоли хеш басо дар шигифт мондаву аҳли ҷомеаи бонангу номуси кишварро бетараф гузошта наметавонад. Бино ба изҳороти марзбонони тоҷик ҷониби Қирғизистон якҷониба ба сохтани роҳи баҳсии Кӯктош-Оқсой -Тамдиқ оғоз карда, бо ин амали хеш боиси сар задани муноқиша гаштанд. ҳамчунин маълум гардид, ки  раиси деҳаи Оқсойи Ҷумҳурии Қирғизистон  Роза Усарова “аз муташанниҷ гардидани муносибатҳои Тоҷикистону Қирғизистон манфиатдор буда, мунтазам ба барангехтани низои миллӣ миёни мардуми қирғизу тоҷик машғул мебошад.”

Аз манбаъҳои мӯътамад бармеояд, ки дар натиҷаи тирпарронии марзбонони қирғиз ва сангпартоии сокинон он ду нафар ба ҳалокат расида, беш аз 20 нафари дигар ҷароҳат бардоштанд.

ҳамагон огаҳанд, ки аз давраҳои пеш сокинони ин маҳалҳо дар ҳамҷоягиву ҳамсоягӣ ва риштаҳои хешутаборӣ аҳлона зиндагӣ доштанд. Вале дар даврони соҳибистиқлолии кишварҳо масъалаи марзии ин минтақаҳо солҳост роҳи ҳалли хешро наёфта буду  чанд сол қабл бинобар гуфтушунидҳои сулҳҷӯёнаи тарафайнии роҳбарони давлатҳо  “Созишномаи истифодаи роҳҳои мошингарди наздисарҳадӣ” ба имзо расида буд. Чанд рӯз инҷониб дар ҳайрат ҳастам, ки чаро  ҳоло мардуми  қирғиз он риштаи дӯстиву рафоқатро ба инобат нагирифтаву чун душмани ғаддор  ба чунин амалҳои ноадолатона даст мезананд.

Паси ҳамаи ин бадхоҳиҳои чанд тани манфиатҷӯ ҳаёти ҳазорҳо мардуми осоишта меистад, ки ин амалро мо маҳкум менамоем.

М.Самадова,
ноҳияи Бобоҷон Ғафуров

Читать далее

Ҷумъабой Сангинов: Куҷое моҷарое буд, Усарова ҳозир буд…

Андешаҳои Ҷумъабой Сангинов, собиқ муовини раиси вилояти Суғд, собиқ раиси ҳайати ҳукуматӣ дар гуфтушунид бо ҷониби Қирғизистон.

— Устод, айни замон дар сарҳади Тоҷикистону Кирғизистон боз муноқиша авҷ гирифтааст ва ба қавли маркази матбуоти Қушунҳои сарҳадии КДАМ аз чониби Қирғизистон ба он Роза Усарова ном зан, вакили махаллӣ, роҳбарӣ мекунад. Шумо замоне муовини раиси вилояти Суғд будед ва ҳайати Тоҷикистонро дар вохӯрӣ бо Қирғизистон роҳбарӣ мекардед. Шумо ин занро мешинохтед?

— Дар бораи шахсияти ӯ чизе намедонам. Як бор дар ҷараёни корбарӣ бо номбурда вохӯрда будем. Медонистам, ки ҳама вақт агар ягон муносибат, ягон моҷаро дар ягон гӯшаи сарҳад бо Қирғизистон пайдо мешуд, дар он ҷо Роза ҳозир буд.

— Яъне, роҳбарӣ мекард?

— Гуфтан мушкил аст, ки роҳбарӣ мекунад. Ман инро дақиқ гуфта наметавонам, вале ҳамеша дар ҳамон ҷо ҳозир буд. Як шахсияте буд, ки ҷавҳари конструктивии камтар дорад. Ҷавҳари муътадилсозии  вазъиятро камтар дорад. Зиёдтар ҷавҳари хурӯҷу авҷ додани ҳамин гуна низоъҳо барои вай муҳимтар аст.

Ҳангомасозиро гуё дӯст медорад, вале ӯро аз наздик намедонам, чун зарурати омӯхтани шахсияти вай барои ман зарурат надошт. Дар вақти кор кардани мо ӯ нафаре набуд, ки мо ба вай таваҷҷуҳи ҷиддӣ кунем. Лекин хама вақт дар кадом деҳае, ки низоъ ба амал меомад, Роза Усарова дар ҳамон ҷо пайдо мешуд.

— Шояд ин на танҳо ҳангомаҷӯӣ бошад? Мумкин дар паси ин амали вай манфиате бошад?

— Ман  ҳеч чиз гуфтан наметавонам. Худатон медонед, дар ҳаёт бисёр нафароне пайдо мешаванд, ки ҳангомаҷӯянд. Ин ҳангома мумкин манфиатҳои муайян дошта бошад.

— Ташаккур, устод.

Суҳбати Сабрина Ғафурдухт, МТЖТ, махсус барои Суғднюс

Читать далее