12 June 2019

РОҲИ ХУҶАНД - ПАЛОС МУМФАРШ МЕШАВАД

Мардуми маҳаллаи Чашмаи Арзанаи шаҳри Хуҷанд аз мумфарш шудани роҳи автомобилгарди маҳалли зисташон изҳори шодмонӣ доштанд. Наздик 3 километр роҳи автомобилгарди самти Чашмаи Арзанаи шаҳри Хуҷанд аз ҷониби ширкати Ҷамъияти дорои масъулияташ маҳдуди «Тоҷ - Роуд» мумфарш хоҳад шуд.

Директори ширкат Раҳмон Тӯйчиев иброз дошт, ки мумфаршкунии роҳи мазкур дар доираи корҳои ободониву созандагӣ ба истиқболи 30 - солагии Истиқлолияти давлатии Ҷумҳурии Тоҷикистон оғоз гардида, барои босифат ва саривақт мумфарш гардидани роҳ 5 мошини боркашон, 3 механизми асфалтхобонӣ, 4 асфалткӯбак, 2 таҷҳизоти ёрирасон, дар маҷмӯъ 20 адад мошин ба кор омодаанд. Барои бо сифати баланд ба анҷом расонидани корҳо 3 техникаи пуриқтидор аз давлати Олмон оварда шуда, тавассути он дар як рӯз беш аз 1 километр роҳ мумфарш хоҳад гашт.

- Боиси хурсандист, ки ширкати роҳсозии мо мумфаршкунии 2,8 километр роҳи самти Чашмаи Арзана, 12,3 километр роҳи автомобилгарди самти шаҳраки Палоси шаҳри Бӯстон то ба Боғи миллии «Ваҳдат» - и ноҳияи Бобоҷон Fафуров ва ҳамчунин 16,4 километр роҳ аз даромадгоҳи ноҳияи Деваштич то маркази ноҳияро ба уҳда гирифта, алҳол кор дар ин самт бомаром пеш меравад. Роҳсозон ҳамарӯза наздик 1 километр роҳро бо паҳноии 7 метр обод гардонида, барои ин аз асфалти истеҳсоли заводи ватанӣ, ки дар минтақаи «Рухак» - и ноҳияи Бобоҷон Fафуров қарор дорад, истифода мебаранд. Иқтидори завод дар як соат истеҳсоли то 320 тонна асфалт буда, сифати он ҷавобгӯи стандартҳои ҷаҳонист. Муми часпак, шағал, қум, хокаи минералӣ ва дигар компонентҳое, ки таркиби асфалтро фарогиранд, аз лиҳози сифатнокӣ дараҷаи баландро дороанд,- қайд намуд Раҳмон Тӯйчиев.

Зикр бояд кард, ки айни замон 15 нафар мутахассиси ширкати роҳсозии «Тоҷ - Роуд» механизаторон Зафар Норматов, Хуршед Аҳмадов, Нуриддин Ҷобиров, прорабҳо Абдулатиф Қаҳҳоров, Хурсанд Абдулхайров, роҳсозон Валиҷон Убайдуллоев, Нӯъмон Саидхоҷаев бо роҳбарии Акмал Усмонов кӯшиш бар он доранд, ки дар муддати кӯтоҳ корҳои мумфаршкуниро ба анҷом расонанд.

Тазаккур бояд дод, ки барои иҷрои корҳо аз ҳисоби буҷети Мақомоти иҷроияи ҳокимияти давлатии вилоят беш аз 10 миллиону 500 ҳазор сомонӣ маблағ ҷудо гардидааст.

Шоира САЛИМОВА,
«Ҳақиқати Суғд»

 

Читать далее

Назорати прокурорӣ дар амал!

Аз маълумоти оморӣ бармеояд, ки дар шаҳри Хуҷанд 47 муассисаи таҳсилоти миёнаи умумӣ ва асосӣ, 44 муассисаи томактабӣ фаъолият дошта, 40 728 нафар дар муассисаҳои таълимӣ бо таҳсил ва 9 398 нафар кӯдак дар боғчаҳо бо тарбия фарогиранд.

Таҳлилу мушоҳидаҳо нишон доданд, ки тайи солҳои охир аз тарафи муассисаҳои таълимӣ ҷиҳати баланд бардоштани сифати таълиму тарбия як қатор тадбирҳо андешида шуда, теъдоди зиёди хонандагон дар Олимпиадаҳо иштирок ва ҷойҳои сазоворро ишғол кардаанд.

Дар баробари ин, боиси таассуф аст, ки 17 - уми апрели соли равон бо кормандони соҳаи маорифи шаҳр ва масъулини кумитаҳои падару модарон расман вохӯрӣ баргузор ва онҳоро огоҳ намуда буданд, ки ба ҳолатҳои ғайриқонунӣ, аз ҷумла бо ҳар баҳона ба ҷамъоварии маблағҳо роҳ надиҳанд. Онҳо хулосаи зарурӣ набароварда, талаби қонунии прокурорро сарфи назар карда, моҳи майи соли ҷорӣ ғайриқонунӣ барои таъмир аз 60 то 80 сомонӣ ҷамъоварӣ кардаанд ва дар ин хусус волидайн тариқи шифоҳӣ ба прокурори шаҳр муроҷиат намуданд.

Аз ин рӯ, бо назардошти вазъи ташвишовари бамиёномада ва рӯз аз рӯз афзудани норозигии волидайн аз ҳолатҳои бемаврид ҷамъ намудани маблағ аз хонандагон ва тарбиятгирандагон рӯзи 27 - уми май бо даъвати масъулини мақомоти иҷроияи ҳокимияти давлатии шаҳри Хуҷанд, масъулини шуъбаи маориф, сарварони муассисаҳои таълимӣ ва мудирони боғчаҳо, кумитаҳои падару модарон, ҷамъ бо иштироки зиёда аз 200 нафар вохӯрӣ баргузор гардид.

Аз шахсони масъул қатъиян талаб карда шуд, ки ба поймол намудани ҳуқуқу манфиатҳои қонунан ҳифзшавандаи хонандагон, тарбиятгирандагон ва волидайни онҳо таъҷилан хотима дода, маблағҳои ғайриқонунӣ ҷамъоварда фавран ба волидайн баргардонида шавад.

Ҳамчунин, аз масъулини кумитаҳои падару модарон, ки дар вохӯрӣ иштирок доштанд, талаб карда шуд, ки ба масъалаи бо ҳар баҳона дар якҷоягӣ бо директорони муассисаҳои таълимӣ ва мудирони боғчаҳо аз волидайн ҷамъ намудани маблағ нуқта гузошта, минбаъд ба ин кор умуман роҳ дода нашавад.

Дар маҷмӯъ, натиҷаи корбарии мақомоти прокуратураи шаҳр дар ин самт ва зоҳир намудани принсипнокӣ ҳамин шуд, ки аз тарафи муассисаҳои таълимии шаҳр зиёда аз 258000 сомонӣ маблағи қаблан ғайриқонунӣ барои таъмир ҷамъоварда ба волидайн расман бо тартиб додани ҳуҷҷатҳо тариқи нақдӣ баргардонда шуд.

Ба ғайр аз ин, дар натиҷаи андешидани корҳои профилактикӣ бо ташаббуси прокуратураи шаҳр аз тарафи масъулини Муассисаи давлатии «Кӯдакистони Президентӣ» низ зиёда аз 74000 сомонӣ маблағҳои ғайриқонунӣ бо баҳонаи таъмир ҷамъоварда бозпас ба волидайн баргардонида шуд.

Инчунин, аз роҳбарияти Муассисаи давлатии «Кӯдакистони Президентӣ» қатъиян талаб карда шуд, ки минбаъд ба чунин ҳолатҳои ғайриқонунӣ ҷамъоварӣ намудани маблағҳо бо баҳонаи таъмир аз волидайн хотима дода, фаъолият дар доираи талаботи қонун ба роҳ монда шавад.

Масъалаи мазкур зери назорати қатъӣ ва доимии мақомоти прокуратураи шаҳр қарор дошта, минбаъд низ тамоми чораҳо ҷиҳати пешгирии чунин амалҳои номатлуб аз тарафи масъулини соҳаи маориф дар ҳудуди шаҳри Хуҷанд андешида хоҳад шуд.

А.НАЗАРЗОДА,
прокурори шаҳри Хуҷанд,
мушовири адлияи дараҷаи I

Читать далее

Ҳаёт бо орзуҳо ширину рангин аст!

Созмони Милали Муттаҳид 12 - уми июнро ҳамчун Рӯзи умумиҷаҳонии мубориза бо меҳнати кӯдак муайян намудааст ва дар саросари дунё онро бо гузаронидани чорабиниҳои иттилоотӣ таҷлил менамоянд. Ҳар сол аз ҷониби Ташкилоти Байналмилалии Меҳнат вобаста ба ин сана мавзӯи асосӣ интихоб мегардад. Вазъи имрӯзаи ҳассоси ҳаёти ҷомеаро ба инобат гирифта, шиори соли 2019 “Кӯдакон набояд дар саҳро кор кунанд, онҳо бояд рӯйи орзуҳои худ амал намоянд” эълон гардидааст.

Тоҷикистон дорои сохтори аҳолии ҷавон ва ояндадор буда давлат мавқеи худро нисбат ба ҳуқуқи кӯдак муайян кардааст. Ҳукумати Ҷумҳурии Тоҷикистон як қатор ҳуҷҷатҳои ҳуқуқии байналмилалӣ ва санадҳои меъёрии ҳуқуқиро ба тасвиб расонида, тибқи онҳо ҷиҳати барҳам додани шаклҳои бадтарини меҳнати кӯдак дар сатҳи миллӣ ва маҳаллӣ тадбирҳои амалӣ меандешад.

Бино ба иттилои Вазорати меҳнат ва шуғли аҳолии Ҷумҳурии Тоҷикистон таваҷҷуҳ ба масъалаи мазкур аз Конститутсияи Ҷумҳурии Тоҷикистон, муқаррароти Кодекси меҳнати Ҷумҳурии Тоҷикистон, Конвенсияи СММ дар бораи ҳуқуқи кӯдак, Конвенсияҳои Ташкилоти Байналмилалии Меҳнат № 138 “Оиди ҳадди ақали синну сол барои ба кор қабул кардан”, № 29 “Дар бораи меҳнати маҷбурӣ ё ҳатмӣ” ва №182 “Оиди манъ кардан ва аз байн бурдани шаклҳои бадтарини меҳнати кӯдак” ва Тавсияномаи ТБМ №190 “Оиди манъ намудан ва чораҳои зарурӣ андешидан ҷиҳати барҳам додани шаклҳои бадтарини меҳнати ноболиғон” сарчашма мегирад.

Дар ин радиф қарорҳои Ҳукумати Ҷумҳурии Тоҷикистон аз 4 - уми марти соли 2014, таҳти №169 “Рӯйхати корҳои шароиташон номусоид ва зараровар, ки истифодаи меҳнати ашхоси аз 18 - сола хурд иҷозат дода намешавад ва ҳадди меъёрҳо ҳангоми дастӣ бардоштан ва кашонидани борҳо”, аз 31 - уми октябри соли 2014, таҳти № 690 “Дар бораи Барномаи миллӣ оид ба барҳамдиҳии шаклҳои бадтарини меҳнати кӯдакон дар Ҷумҳурии Тоҷикистон барои солҳои 2015 - 2020” тасдиқ гардидаанд.

Соли ҷорӣ Ташкилоти Байналмилалии Меҳнат 100 - солагии таъсисёби худ ва дар ин росто пешбурди адолати иҷтимоӣ ва таъмини меҳнати арзандаро ҷашн мегирад.

Шиори соли 2019 бахшида ба Рӯзи умумиҷаҳонии мубориза бо меҳнати кӯдакон ин: “Кӯдакон набояд дар саҳро кор кунанд, онҳо бояд рӯйи орзуҳои худ амал намоянд” мебошад. Тибқи маълумот, дар ҷаҳон 152 миллион кӯдак меҳнат мекунанд. Меҳнати кӯдакон амалан дар ҳамаи бахшҳо ба назар мерасад, аммо аз 10 нафар кӯдакон 7 нафарашон дар соҳаи кишоварзӣ кор мекунанд.

Мубориза бо меҳнати кӯдак масъалаи рушд аст ва мутобиқи қонунгузории ҷорӣ яке аз вазифаҳои асосии давлат маҳсуб дониста ва барои аз байн бурдани он пайваста чораҳои зарурӣ андешида мешаванд.

Болоравии иқтисодиёти кишвар, баландшавии сатҳи некӯаҳволии мардум ва пайгирии уҳдадориҳои Ҳукумати Ҷумҳурии Тоҷикистон имкон медиҳанд, ки дар барҳам додани меҳнати кӯдак, ҳифзи меҳнати коргарҷавонон, ташкили ҷойҳои кории арзанда барои насли наврас мақомоти иҷроияи маҳаллии ҳокимияти давлатӣ дар ҳамкорӣ бо шарикони иҷтимоӣ, ҷомеаи шаҳрвандӣ ва ташкилотҳои байналмилалӣ ба пешравиҳо ноил гардем.

Гулҷаҳон МАҲКАМОВА,
“Ҳақиқати Суғд”

Читать далее

Мушкилоти дарёфти ҷои кор?

Яке аз қишрҳои фаъоли ҷомеа, ки наздики 70 фоизи аҳолии кишварро ташкил медиҳанд, ҷавонон ба шумор рафта, давомдиҳандаи кору фаъолияти насли калонсол, нерӯи созанда ва иқтидори воқеии пешрафти ҷомеа, ояндаи миллат ва давлат мебошанд.

Имрӯз таҳти сиёсати хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мақому мавқеи ҷавонон дар ҷомеа бамаротиб баланд гардида, ҷалби бештари онҳо ба корҳои ҷамъиятиву идоракунӣ саҳми ин қишри фаъоли ҷамъиятро дар пешрафту ободии мамлакат бештар намуданд.

Ҳамин аст, ки имрӯз дар сатҳи вазорату идораҳои давлатӣ ва корҳои муҳими ҷамъиятӣ ҷавонон нақши пешбар доранд. Маҳз, ҷавонон марзу буми кишварро аз ҳар гуна хавфу хатарҳо эмин нигоҳ дошта, Ватанро посбонӣ менамоянд.

Аз ин рӯ, Сарвари давлат дар ҳар як Паёму суханрониҳояшон пайваста таъкид менамоянд, ки ҷавонони мо нерӯи пешбаранда, ворисони асилу арзандаи миллату давлат ва созандагони имрӯзу фардои Тоҷикистони соҳибистиқлол мебошанд.

Дар баробари ин ҳама аксари ҷавонони кишварро мушкилиҳои дигар дунболагирӣ менамоянд, ки аз ҷумлаи онҳо дарёфти ҷои кор ба шумор меравад. Имрӯз барои бархе ҷавонон пас аз хатми донишгоҳ мушкилии дарёфти ҷои кор оғоз мешавад. Ба ин мушкилӣ бештар ҷавононе, ки ихтисоси ғайриомӯзгорӣ доранд, дучор мешаванд.

Шервоншоҳ Ҳусейнов - хатмкардаи Коллеҷи омӯзгории шаҳри Панҷакент, истиқоматкунандаи ноҳияи Айнӣ мегӯяд: "Ҷавонон пас аз хатми донишгоҳ мехоҳанд, ки аз рӯи ихтисоси худ кор кунанд, аммо ба ин муваффақ намешаванд, зеро аз набудани маблағ танқисӣ мекашанд. Маҷбур мешаванд, ки барои таъмини рӯзгор рӯ ба муҳоҷирати меҳнатӣ оранд.

Баробари ин ҳастанд ҷавононе, ки бо донишу заковати худ соҳиби ҷои кор мешаванд, аммо дертар. Байни мардум ақидае ҳаст, шахси боақлу босавод ҳеҷ бекор намемонад.

Хатмкардаи Донишгоҳи давлатии Хуҷанд ба номи академик Бобоҷон Ғафуров Шаҳноза Маҳмудова чунин гуфт: "Ман зиëда аз шаш моҳ бо муассисае ҳамкорӣ кардам. Пас аз хатми донишгоҳ назди роҳбари он рафтам, то маро ба ҳайси коргари штатӣ қабул намояд. Аммо бо ҳар баҳона ба кор қабул накарданд.

Гуфтанд, ки вазъи иқтисодиамон на он қадар хуб аст. Ин аст дастгирии баъзе аз роҳбарияти корхонаву муассисаҳои мо".

Мо дар як шабакаи иҷтимоӣ бо чунин савол “Барои соҳиби кор шудан ба мо чӣ лозим аст? А) дониш, Б) пул, В) “тағо” пурсише гузаронидем, ки аксарият ҷонибдори ҳарсеи он буданд.

Азму талош ва кӯшишҳои ҷавонони лаёқатманду фаъол, ватандӯсту меҳанпарвар дар тамоми соҳаҳо нақши ҳалкунанда дорад.

Барои ин дастгирии мақомот ва роҳбарияти ин ë он муассисаҳо зарур аст, то ки ҷавонон ба онҳо такя намуда, дар пешравӣ ва тараққиёти давлати хеш ҳиссагузор бошанд.

 Ҳафиза БЕГОВА,
Рӯзноманигор

Читать далее