14 January 2020

Сафари кории Сарвазири Ҷумҳурии Тоҷикистон Қоҳир Расулзода ба вилояти Суғд

13 январи соли 2020 Сарвазири Ҷумҳурии Тоҷикистон Қоҳир Расулзода ҷиҳати шиносоӣ бо ҷараёни корҳои ободониву созандагӣ  ба вилояти Суғд ташриф овард.

Зимни сафар Сарвазири мамлакат Қоҳир Расулзода ва Раиси вилояти Суғд Раҷаббой Аҳмадзода дар шаҳрҳои Исфара, Конибодом, Бӯстон, Хуҷанд ва ноҳияи Бобоҷон Ғафуров бо рафти бунёди иншооти гуногун шинос гардиданд.

Читать далее

ОМӮЗИШИ ФАНҲОИ ДАҚИҚ – ТАЛАБИ ЗАМОН

Барои ҳар як зиёии Ватани соҳибистиқлоламон, умуман мардуми кишвари азизамон – Тоҷикистони аз ҷиҳати иқтисодиву иҷтимоӣ рушдёфтаистода нуктаҳову муҳтавои Паёми Пешвои муаззами миллат муҳтарам Президентамон роҳнамо, чароғи фурӯзони саодат шинохта мешавад.

Махсусан, зикри суханони вусъатбахшу башоратовари Президенти Ҷумҳурии Тоҷикистон муҳтарам Эмомалӣ Раҳмон «Роҳбарону кормандони соҳаи маорифро зарур аст, ки дар баробари чунин дастгириҳои давлат ва афроди ватандӯст сатҳу сифати таълимро дар ҳар як муассисаи таълимӣ, сарфи назар аз шакли моликияти онҳо, дар ҳамаи зинаҳои таҳсилот баланд бардоранд».

Дар ҳақиқат мо, омӯзгорони макотиби миёна таваҷҷуҳу эътибори Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмонро ба соҳаи маорифи милливу муосир эҳсос менамоем, дар шуурамон зеҳннишин кардаву дар кори таълиму тарбияи насли ояндасоз аз онҳо бархурдор ҳастем.

Вобаста ба ин мо бояд аз пешрафти ҷомеа, тараққиёти илму техника ва технологияи муосир огаҳии комил дошта бошем ва барои баланд бардоштани сатҳи касбияти худ мунтазам кӯшиш намоем. Ҳаёт тақозо менамояд ва имтиҳоне пеш меоварад, агар мо, омӯзгорон сатҳи баланди касбият надошта бошем, ҳеҷ гоҳ ва бо ягон восита сифати таълиму тарбияро беҳтар карда наметавонем.

Омӯзгор тарбиятгар, устод асту роҳнамои насли наврас, бо маърифату маънавиёташ ҳаёту рӯзгорро равшану муайян месозад. Омӯзгор меҳнату заҳмати худашро ба хотири баланд бардоштани сатҳи маърифат ва тавсеаи ҷаҳонбинии наврасону ҷавонони илмдӯсту ташаббускор тақвият мебахшад.

Махсусан, мо – омӯзгоронро суханони пурҳикмати Пешвои миллат муҳтарам Эмомалӣ Раҳмон бобати тавсеаи тафаккури техникӣ, беҳтар омӯхтани илмҳои табиатшиносӣ, дақиқ ва риёзӣ барои насли наврас шоҳроҳи боз ҳам пурвусъати донишманду илмдӯст гардидан падид омад – солҳои 2020 – 2040 «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» эълон гардид, басо рӯҳбаланд ва уҳдадору вазифадор гардониданд.

Ин пешниҳоди Пешвои миллат дурнамои фаъолияти ҳар омӯзгор, корманди илму маориф буда, барои ба ҳадаф расидан азму субот металабад. Мо бояд ба истифодаи донишҳо, малакаҳо ва фаҳмиши хонандагон таваҷҷуҳ ва эътибор диҳем, биноан аз омӯзгор то падару модарон, хонандагон дар бораи мафҳуми таҳсил дар замони муосир як нигоҳи тоза дошта бошем.

Мегӯянд, ки хонандагони имрӯза донишмандону аҳли зиё ва қувваи кори соҳибкасбу соҳибдониши фардо мебошанд. Хонандагон дар асри ХХI дар муҳити технологӣ зиндагӣ мекунанд. Вобаста ба ин барои такмилу малака ва маҷмӯи донишу салоҳиятҳои омӯзгорӣ дар фаъолияти ҳамарӯза муҳим аст ва ин рисолатро мо аз Паёми саодатбори Пешвои миллат бароямон роҳнамо медонем.

Мӯҳсина РАҲМАТҶОНОВА,
омӯзгори МТМУ №17,
шаҳри Хуҷанд

Читать далее

Зиндагии шоиста - ҳадафи асосӣ

Паёми навбатии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистонро сокинони ваҳдатшиори мамлакат бо ифтихори бузург ва шукргузории афзун аз давлату давлатдории миллӣ истиқбол намуданд.

Сарвари давлат зимни таҳлил аз бурду бохти соҳаҳои гуногун, аз баланд рафтани вазъи иҷтимоӣ, сатҳи некӯаҳволии халқ ва зиёд шудани давомнокии умр, инчунин коҳиш ёфтани фавти кӯдак изҳори қаноатмандӣ намуданд. Зикр гардид, ки омили муҳими пешрафти тамоми соҳаҳо ин дастгирии соҳибкории хурду миёна аст ва мақомоти тафтишотиро ба фаъолияти содиқона даъват намуданд.

Қайд шуд, ки монеаҳои мавҷуда дар самти дастгирии соҳибкории хурду миёна пурра аз байн бурда шавад. Ҳамчунин, барои коркарди маҳсулоти ниҳоӣ аз тамоми имконияту воситаҳо истифода бояд бурд. Зеро мутобиқ ба маълумоти оморӣ 90 дарсади ашёи содиротшаванда аз дохили мамлакат ин маҳсулоти хом аст. Президент дар ин самт дастур доданд, ки бояд бонкҳои ҷумҳурӣ дастгири молистеҳсолкунандаҳо бошанд, ба онҳо қарзҳои имтиёзнок пешниҳод намоянд.

Пешвои муаззами миллат аз дастовардҳои соҳаҳои энергетика, роҳу нақлиёт ёдовар шуда, зикр намуданд, ки дар баробари рушди босуръати Неругоҳи барқи обии «Роғун», ҳамчунин барои таҷдиду азнавбарқароркунии дигар неругоҳҳо, амсоли «Қайроққум» - у «Норак» Ҳукумати Ҷумҳурии Тоҷикистон кӯшишҳои зиёд ба харҷ дода истодааст. Роҳбари давлат аз саховатмандию ифтихори баланди соҳибкорону саховатмандон ёдовар шуда, саҳми онҳоро дар пешбурди соҳаҳои маориф, тандурустӣ, пешрафти иҷтимоиёт ва маънавиёт нек арзёбӣ намуданд.

Дар ин росто, ҳамчунин қайд шуд, ки давоми чанд соли охир барои 1 миллиону 400 ҳазор оилаҳои сокинони кишвар қитъаҳои замини наздиҳавлигӣ ҷудо гардид. Президент аз сокинони кишвар даъват ба амал оварданд, ки мутобиқ ба талаботи меъёрҳо манзилҳояшонро бунёд намоянд, то ин ки иншоотҳо даҳсолаҳо ба ояндагон хизмат намоянд.

Пешвои миллат аз ташаббуси навбатии кишвари мо дар самти гиромидошти неъмати бузурги табиӣ – об, фарҳанги истифодабарии он дар рӯзгор ёдовар шуда, аз аҳли кишвар даъват ба амал оварданд, ки ба қадри об бояд расем.

Аз ҷониби Сарвари давлат самти кишоварзӣ низ мӯшикофона таҳлил шуда, аз як замин гирифтани 3 – 4 ҳосилро омили пешрафти ҳар як хонавода донистанд.

Бо назардошти тақвияти дониши техникӣ, рӯ овардани ҷавонон ба илмҳои равияи техникӣ ва дақиқ «Солҳои 2020 – 2040 солҳои омӯзиш ва рушди илмҳои табиатшиносӣ, дақиқ ва риёзӣ» эълон гардид.

Президент дар мавриди гиромидошти забон, рӯ ба китобу китобхонӣ овардани ҳамаи қишрҳои ҷомеа, огоҳ будан аз гузаштаи пурғановати таърихи тоҷикон сухан карданд. Изҳор доштанд, ки “Мо миллати фарҳангӣ, тамаддунсоз ва аз насли ориёӣ буда, бояд ба таърихи гузаштаамон ҳарчӣ бештар рӯ оварем ва дар қалби фарзандонамон меҳри китобхонӣ ва ҷустуҷӯи илму донишро ҷой кунем”. Дар ин радиф Сарвари давлат таъкид доштанд, ки ҳар хонадони тоҷик бояд китоби арзишманд – «Тоҷикон» - и Бобоҷон Ғафуровро дошта бошад. Ин ҳадя аз ҷониби Пешвои муаззами миллат дар муддати кӯтоҳ ба ҳар хонадон тақдим мегардад.

Соҳаи маориф ҳамчун самти афзалиятнок дар сиёсати маърифатпарваронаи Пешвои миллат мақоми махсус дорад. “Дар марҳалаи кунунии пешрафти Тоҷикистон ба соҳаҳои илму маориф афзалияти аввалиндараҷа дода мешавад, зеро онҳо дар таҳкими пояҳои давлати демократӣ ва ҳуқуқбунёду дунявӣ нақши калидӣ мебозанд”. Ин суханони Сарвари давлат дар Паёми навбатиашон мо, кормандони соҳаи маорифро барои пешбурди фаъолият боз ҳам дилгарм ва масъулиятамонро дар роҳи иҷрои вазифа афзунтар мекунад.

Чизи дигаре, ки аз таваҷҷуҳ ва ғамхории ҳамешагии Президенти мамлакат ба соҳаи маориф башорат медиҳад, ин таъкиди Ҷаноби Олӣ дар мавриди ҳавасмандсозии хонандагони муассисаҳои таҳсилоти умумӣ ҷиҳати иштирок дар озмуну олимпиадаҳои сатҳи байналмилаливу ҷумҳуриявӣ аст. Хушбахтона, дар ин бобат дар вилоятамон таҷрибаи ибратбахш ҳосил шудааст ва аз ҷониби Раиси вилоят муҳтарам Раҷаббой Аҳмадзода ҳамасола ғолибони олимпиадаҳои ҷумҳуриявию байналмилалӣ ва ҳамчунин устодони онҳо бо мукофотҳои арзандаи молиявӣ тақдир карда мешаванд.

Кӯдакон фардои ин миллати босаодатанд ва роҳбарону масъулин дастур гирифтанд, ки дар муддати кӯтоҳ дар деҳот муассисаҳои таълимии томактабӣ, майдончаҳои варзишӣ бунёд намоянд. Дар Паём таъкид гардид, ки то ҷашни 30 - солагии Истиқлолияти давлатӣ 128 муассисаи томактабӣ ва 338 муассисаи таҳсилоти миёнаи умумӣ бунёд гардида, дар маҷмуъ 1332 муассисаи таълимӣ ва томактабӣ таъмиру таҷдид карда мешаванд. Ин башоратест, ки аз ояндаи дурахшони соҳаи муассисаҳои томактабӣ дарак медиҳад ва маорифчиёнро рӯҳбаланду сарфароз мегардонад.

Роҳбари давлат аз ҳамаи сокинон даъват ба амал оварданд, ки бо меҳнати ҳалол барои ободӣ ва муаррифии шоистаи мамлакат дар арсаи байналмилалӣ кӯшиш намоянд. Ин даъвати шӯълавар аз ҷониби маорифчиён ҳамовозии гарму ҷӯшон ба амал овард ва онҳо бо дасту дилу гарм ва азму талошҳои нав дар татбиқи ин ҳидояти созанда саъю талош меварзанд.

Хуллас, Паёми навбатии Пешвои муаззами миллат ифодагари пешрафти соҳаҳои илму маориф, тандурустӣ, ҳифзи иҷтимоии аҳолӣ, фарҳанг, татбиқи сиёсати ҷавонон, занон ва оила, рушди варзиш буда, барои кормандони ҳама соҳаҳои хоҷагии халқи мамлакат ба ҳайси раҳнамо ва дастури фаъолият хизмат хоҳад кард.

Осим КАРИМЗОДА,
сардори Раёсати
маорифи вилоят, доктори илмҳои таърих, профессор

Читать далее

ДУРНАМОИ РУШДИ УСТУВОРИ МАМЛАКАТ

Паёми навбатии Пешвои миллат, Президенти кишвар муҳтарам Эмомалӣ Раҳмон ба Маҷлиси Олии Ҷумҳурии Тоҷикистон барномаву ҳадаф ва самтҳои асосиву меҳварии фаъолияти мардуми кишварро барои боз як соли дигар ва дар умум, барои солҳои минбаъда низ дақиқу мушаххас менамояд.

Рамзи саодати халқи тоҷик аст, ки дар доираи манзур гардидани Паёмҳои фардоафрӯзи Президенти мамлакат ҳамасола тахайюлҳои муҳими зиндагии шоиста ва чигунагии равишҳои шарафёб гардидан ба комёбиҳои нав ба нав тарҳрезӣ шудаанд.

Дигаргунӣ ва пешравиҳое, ки халқи тоҷик имрӯз ба онҳо комёб гаштааст, дар саросари кишвар ба назар мерасанд. Ин худ натиҷаи сулҳу салоҳ ва оромӣ, заҳмати бунёдкоронаи халқи азизамон ва натиҷаи сиёсати дурбинона ва ватанпарваронаи Президенти кишвар Эмомалӣ Раҳмон мебошад.

Маҳз, таъмини сулҳу оромӣ аст, ки дар фазои осудаю офияти иҷтимоӣ зиндагӣ ва ормонҳои мардум амалӣ мешаванд.

Боиси ифтихору сарфарозист, ки бо шарофати ташаббусҳои бевоситаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон иншооти зиёди фароғатию варзишӣ ва маишӣ, корхонаҳои хурду бузурги истеҳсолӣ, биноҳои истиқоматӣ, муассисаҳои таълимӣ, шифохонаҳо, нақбу роҳҳо ва ғайра сохта, ба истифода дода шуданд.

Санаи 9 - уми сентябри соли 2019 бо иштироки Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба истифода додани агрегати дуюми НБО «Роғун» ғалаба дар рушди энергетика ва амалӣ гардидани ҳадафи истиқлолияти энергетикии мамлакат мебошад. Ин ҳама ба ташаббусу ҷасорати Пешвои муаззами миллат Эмомалӣ Раҳмон маҳсуб аст.

Дар ҳафт соли охир рушди иқтисодиёти кишвар ҳамасола ба ҳисоби миёна дар сатҳи 7 фоиз таъмин гардида, маҷмӯи маҳсулоти дохилӣ аз 45,8 миллиард ба 78 миллиард сомонӣ афзоиш ёфт. Дар ин давра ҳаҷми умумии даромади буҷет қариб ду баробар афзуда, аз 12 миллиард сомонии соли 2013 ба 23 миллиард сомонӣ баробар шуд.

Тайи солҳои зикршуда даромади пулии аҳолӣ беш аз ду баробар ва музди меҳнати миёнаи як корманд 2,4 баробар афзоиш ёфтааст.

Собиқадорони ҷангу меҳнат, ташкилоти собиқадорони вилояти Суғд Паёми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистонро бо рӯҳбаландӣ ва қаноатмандии бузург пазируфтанд.

 Ҳукумати ҷумҳурӣ баҳри баланд бардоштани сатҳу сифати зиндагии мардум, бахусус нафақагирон, муттасил ғамхорӣ зоҳир менамояд. Сол аз сол андозаи нафақаи иштирокчиён ва маъюбони ҷанг, ҳамсарони саробонашон дар Ҷанги Бузурги Ватанӣ ҳалокшуда, собиқадорони ақибгоҳи солҳои ҷанг ва нафақагирон мутаносибан меафзояд.

Собиқадорони ҷангу меҳнат ва нафақахӯрони вилоят аз 1 сентябри соли 2020 ба андозаи 15 фоиз баланд бардошта шудани ҳаҷми нафақаро бо хушнудӣ пазируфта, ба Президенти Ҷумҳурии Тоҷикистон муҳтарам Эмомалӣ Раҳмон арзи сипос менамоянд.

Имрӯз нисбат ба соли 2011 нафақаи маъюби ҷанг ба 359 сомонӣ, иштирокчии ҷанг 339 сомонӣ, собиқадорони ақибгоҳи солҳои ҷанг 246 сомонӣ ва нафақаи миёнаи вилоят ба 116 сомонӣ зиёд гардид.

Бо назардошти ҳифзи иҷтимоии собиқадорони ҷангу ақибгоҳи солҳои ҷанг ва беҳдошти вазъи зисту зиндагӣ, хизмати маишӣ ва мадании онҳо 19 сол мешавад, ки аз Мақомоти иҷроияи ҳокимияти давлатии вилоят ба иштирокчиёни Ҷанги Бузурги Ватанӣ, ҳамсарони саробонашон дар ҷангҳо ҳалокшуда, маъюб - ҷанговарони қаламрави давлатҳои дигар, собиқадорони ақибгоҳи солҳои ҷанг, маъюбони рафъи офати экологии НБА «Чернобил», маъюбони муборизаи барқароркунии сохти конститутсионӣ кӯмакпулии ҳармоҳа муқаррар карда шудааст.

Аз моҳи апрели соли 2017 ба маъюбони Артиши Шӯравӣ ҳар моҳ 100 сомонӣ кӯмакпулӣ муқаррар ва пардохт карда мешавад. Соли 2019 ба 197 маъюби Артиши Шӯравӣ 243400 сомонӣ маблағ пардохта шуд. Соли 2020 низ чунин кӯмакпулиҳо пардохта мешаванд.

Дар вилоят 189 нафар собиқадорони гирандаи нафақаи аҳамияти вилоятӣ зиндагӣ мекунанд, ки айни ҳол аз мақомоти иҷроияи ҳокимияти давлатии шаҳру ноҳияҳои вилоят ба андозаи 50 - 100 сомонӣ ба нафақаашон иловапулӣ пардохта мешавад. Соли 2019 барои иловапулиҳо 246720 сомонӣ маблағ пардохта шуд.

Мақомоти иҷроияи ҳокимияти давлатии вилоят баҳри баланд бардоштани сатҳи хизматрасонии тиббии собиқадорони ҷангу меҳнат чораҳои амалӣ меандешад. Соли 2019 дар вилоят барои хизматрасонии тиббии собиқадорони ҷангу меҳнат 176261 сомонӣ маблағ ҷудо ва эҳтиёҷи собиқадорон ба аробачаҳои маъюбӣ, дастгоҳи шунавоӣ ва дигар лавозимоти тиббӣ қонеъ гардонида шуданд.

17 сол мешавад, ки аз Мақомоти иҷроияи ҳокимияти давлатии вилоят барои харидани роҳхатҳои имтиёзноки осоишгоҳ барои собиқадорони ҷангу меҳнат маблағгузорӣ карда мешавад.

Ташкилотҳои собиқадорони вилоят, шаҳру ноҳияҳо дар ҳамкорӣ бо мақомоти маҳаллии ҳокимияти давлатӣ ва дигар ташкилотҳои ҷамъиятӣ барои таблиғу фаҳмондадиҳии мазмуну муҳтавои Паёми Роҳбари давлат дар байни собиқадорон, нафақахӯрон ва аҳолӣ корбарӣ доранд.

Мо, собиқадорон, вазифадорем, ки ин ҳуҷҷати роҳнаморо тарғиб намоем, аз мазмуну муҳтаво, хулосаҳои он дар фаъолияти худ истифода барем, барои амалӣ гардидани ташаббусҳои ҷолиби созандагию бунёдкорона, ки дар Паём баён шудаанд, мусоидат намоем.

Имрӯз мо дар арафаи ҷашнҳои бузургу бошукӯҳ - 75 - солагии Ғалаба дар Ҷанги Бузурги Ватании солҳои 1941 - 1945 ва 30 - солагии Истиқлолияти давлатии Ҷумҳурии Тоҷикистон қарор дорем.

Собиқадорони ҷангу меҳнат, ташкилоти собиқадорони вилояти Суғд барои сазовор истиқбол гирифтани ҷашнҳои бузурги миллат чораҳои мушаххас меандешанд, аз воситаю имкониятҳои мусоид сари вақт истифода менамоянд.

Турсунбой РАҲМАТОВ,
раиси Шӯрои собиқадорони
вилояти Суғд

Читать далее