04 February 2020

Пешвои миллат Эмомалӣ Раҳмон дар як қатор вазорату идораҳо таъиноти кадрӣ ба амал оварданд

Имрӯз дар Қасри миллат Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон кадрҳоеро, ки дар вазоратҳои маориф ва илм, рушди иқтисод ва савдо, сохторҳои ҳифзи ҳуқуқу тартибот, сарҳадот, Дастгоҳи иҷроияи Президент ва зерсохторҳои он ба вазифаҳои роҳбарӣ таъин гардиданд, барои сӯҳбат ба ҳузур пазируфтанд.

Бо Фармонҳои Президенти Ҷумҳурии Тоҷикистон Шоҳиён Абдусаттор аз вазифаи муовини Фармондеҳи Қӯшунҳои сарҳадии Кумитаи давлатии амнияти миллии Ҷумҳурии Тоҷикистон оид ба корҳои сиёсӣ-тарбиявӣ озод ва ба ин вазифа Мирзозода Сафаралӣ Раҳим, ки дар вазифаи муовини Прокурори генералӣ-Сарпрокурори ҳарбии Ҷумҳурии Тоҷикистон фаъолият дошт, таъин гардид. Бо Қарори Ҳукумати Ҷумҳурии Тоҷикистон Шоҳиён Абдусаттор муовини Вазири мудофиаи Ҷумҳурии Тоҷикистон таъин гардид.

Читать далее

ҶАББОР РАСУЛОВ: Истифодаи босамари замини наздиҳавлигӣ

Тайи чанд сол инҷониб мардуми меҳнатдӯсти Ҷамоати деҳоти Деҳмойи ноҳияи Ҷаббор Расулов заминҳои наздиҳавлигии худро самаранок истифода бурда, дар он барои парвариши сабзавоти барвақтӣ бунёди гармхонаҳои хурдро ба роҳ монда, ба ин васила дар баробари бозори дохилӣ дигар шаҳру манотиқи кишварро низ бо сабзавоти тару тоза таъмин менамоянд.

Имсол дар ҳамаи шаклҳои хоҷагидории ноҳия дар майдони 2,62 гектар гармхона ташкил карда шудааст, ки аз он 13 адад типи хитойӣ мебошад.

Дар суҳбат сокини Ҷамоат Ҳошимҷон Раҳмонбердиев гуфт, ки дар қитъаи наздиҳавлигӣ шаш гармхонаи хурд, ки ҳар кадомаш аз 1 то 6 сотихӣ мебошад, бунёд ва кишти сабзавоти барвақтиро ба роҳ мондаанд. Тавре мо худ шоҳид гаштем, айни ҳол кашничу укроп, сирпиёз ва дигар намуди сабзавот кишт шудааст. Ба гуфти хоҷагидор баъди ба фурӯш баровардани сабзавот боз дигар зироат кишт карда мешавад. Соли гузашта ӯ дар ин гармхона карам, бодиринг, қаланфури булғорӣ ва дигар намуди сабзавотро парвариш намуда, ҳосили хуб гирифт.

- Маҳсулоти гармхонаро асосан ба бозори “Панҷшанбе” - и маркази вилоят ба фурӯш мебарорем, зеро он ҷо харидори зиёд дорад. Таъсиси гармхона боиси афзоиши даромад, фаровонии рӯзгорамон гардид, - гуфт ҳини суҳбат Ҳ. Раҳмонбердиев. Имсол низ ният дорем, майдони гармхонаро зиёд карда, кишти сабзавоти барвақтиро ба роҳ монда, бозорҳои шаҳру навоҳиро таъмин намоем.

Ҳамчунин, Абдурасул Ғаффорзода, раиси Ҷамоати деҳоти Деҳмой зикр дошт, ки сокинони маҳал заминҳои наздиҳавлигиашонро самаранок истифода бурда, аз ҳар як замин то се – чор маротиба ҳосил ба даст меоранд. Зикр кардан бамаврид аст, ки имсол бори аввал дар майдони як гектар кишти картошкаи барвақтиро зери плёнка ба роҳ монданд, ки ҳосили он то миёнаҳои моҳи май пухта мерасад. Заминҳои аҳолии Ҷамоат бештар аз 260 гектарро ташкил медиҳад ва имрӯзҳо сокинони минтақа дар парвариши сабзавоти барвақтӣ шуҳратманд гардидаанд.

Дар Ҷамоати мазкур наздик 200 хоҷагӣ бо чунин усул парвариши сабзавоти барвақтиро ба роҳ монда, даромади хуб ба даст меоранд.

Абдуманнон Эгамов низ дар замини наздиҳавлигии худ бо ташкили ризоманд гармхонаҳои хурд парвариши сабзавотро ба роҳ мондааст. Ӯ хурсанд аз он аст, ки маҳсулоти кишткардааш дар бозори шаҳри Хуҷанд ба фурӯш рафта, аксари фурӯшандаҳо ӯро мешиносанду эҳтиром мекунанд. Ҳангоми суҳбат зикр сохт, ки имрӯз аз ин ҳисоб зиндагиашро пеш бурда истодаасту бо ин васила саҳми худро дар таъмини бозор бо маҳсулоти худӣ мегузорад.

- Агар идораҳои масъул ба хоҷагиҳо баҳри таъмин бо навъҳои беҳтари тухмӣ ва кӯчатҳо шароити мусоид фароҳам созанд,  барои пешрафти соҳа қадами ҷиддие хоҳад буд. Имрӯзҳо сабзавоти тару тоза аз ҳисоби маҳсулоти гармхонаҳо дар бозорҳои ноҳия фаровон аст. Тавассути сари вақт таъмин гардидани фурӯшгоҳҳои ноҳия бо маҳсулоти гармхонаҳо нархи сабзавот муътадил аст. Айни замон  дар фурӯшгоҳҳои ноҳия нисбат ба минтақаҳои дигари вилоят сабзавот хеле арзон буда, сифаташҳои беҳтар аст, - мегӯяд раиси Кумитаи маҳаллаи деҳаи Деҳмой Ҳомидҷон Эгамов.

Бино ба гуфти масъулини идораи кишоварзии ноҳия то имрӯз кишоварзон 56 тонна маҳсулот истеҳсол намуданд, ки аз он 22,4 тоннааш лимӯ, 7 тонна бодиринг, 12 тонна помидор ва 13,1 тонна дигар навъи сабзавот аст.

Қобили зикр аст, ки истифодаи босамари ҳар ваҷаб замин ва рӯёнидани ҳосили дилхоҳ омили асосии таъмини амнияти озуқавории мамлакат ба ҳисоб меравад.

Воқеан ҳам имкони соҳиби замин гардидану шароити мустақилона зироат кишт намудан ва фоида ба даст овардан барои кишоварзону сокинони мамлакат дар солҳои соҳибистиқлолии ҷумҳурӣ фароҳам омад. Махсусан таъкидҳои пайвастаи Пешвои муаззами миллат ва қабули Барномаҳои рушди соҳа боиси пешрафти бахши кишоварзии мамлакат гардид.

Деҳқонону кишоварзони ноҳияи Ҷаббор Расулов дастуру супоришҳои Сарвари давлатро сармашқи кори худ карда, баҳри рӯёнидани ду - се ҳосил аз як замин аз ҳамаи имкониятҳои мавҷуда мақсаднок истифода менамоянд. Чун деҳқонон дар фаъолияти хоҷагидорӣ мустақил мебошанд, аз ин лиҳоз бештар ҳамон зироатҳоеро кишту парвариш менамоянд, ки фоидаи хуб диҳад.

Роҳандозии фаъолияти гармхонаҳои хурд ва парвариши зироат дар зери плёнка дар фасли зимистон барои таъмини амнияти озуқаворӣ, истифодаи  самараноку оқилонаи замин дар мавриди гирифтани чанд намуд ҳосил аз як майдон ба рушди иқтисодиёти сокинон нақши муҳим дорад.

Аз рӯи мушоҳидаю таҳлилҳо маълум мегардад, ки дар гармхонаҳои хурди наздиҳавлигии дар ноҳия мавҷудбуда, ба бозори вилоят маҳсулоти тару тоза  ворид карда мешавад. Таҷрибаҳо собит сохтаанд, ки бо ташкили гармхонаҳои хурд ва оқилона ба роҳ мондани парвариши сабзавот метавон ҳам манфиати хуби иқтисодӣ бардошту ҳам ба таъсиси ҷойҳои нави корӣ муваффақ шуд. Ин аз марди деҳқон масъулиятшиносӣ ва ҳавасмандиву меҳнатро тақозо дорад.

Нодир ТУРСУНЗОДА,

“Ҳақиқати Суғд"

 

Читать далее

Ғами зимистонро дар баҳор бояд хӯрд!...

Охири фасли тирамоҳ ва зимистон дар шароити иқлими мо мавсими сард аст. Аз ин лиҳоз, барои фаъолияти муътадили ҳамаи соҳаҳои ҳаёти иҷтимоӣ ҳанӯз аз тобистон омодагӣ оғоз меёбад. Чун дар урфият мегӯянд: «Ғами зимистонро дар баҳор бояд хӯрд».

Дар якчанд мисолҳо мо шоҳиди он гардидем, ки новобаста аз ҳисоботе, ки соҳаҳои иҷтимоӣ оид ба омода буданашон барои гузаронидани фасли тирамоҳу зимистони солҳои 2019-2020 медиҳанд, воқеан на ҳама сохторҳо ба мавсими сармо пурра омода мебошанд.

Гуфтори масъулин ва воқеият

Ҳангоми дидани муассисаи таълимии миёнаи умумии №9 - и шаҳраки Бӯстони ноҳияи Мастчоҳ мушоҳида намудем, ки дар ҳар як синфхона печҳои бо ангишт ва ҳезум гармкунанда гузошта шуда, бо сабаби сард будани синфхонаҳо ҳамаи хонандагони дабистон бо либоси зимистонаи болоӣ дарс меомӯзанд. Директори муассисаи таълимии мазкур Гулбаҳор Гиёева иброз намуд, ки вазъи зимистонгузаронӣ дар мактаб хуб аст ва ба муассиса 9 тоннаю 677 килограмм ангишт харида шуда, захираи ҳезум 2 метри кубиро ташкил медиҳад. Ангишти аз тарафи ҶДММ «Барз» дастрасшуда хока мебошад.

Аммо агар сардии синфхонаҳо ва бо либоси ғафс дар дарс ширкат кардани хонандагону устодонро ба назар гирем, боварибахш будани суханони директори мактаб эътибори худро гум мекунад.

Дар муассиса 657 нафар хонанда, аз ҷумла 355 нафар духтар дар синфҳои аз 1 то 10 бо забонҳои тоҷикӣ ва ӯзбекӣ таълим мегиранд.

Захираи барзиёд ва сардии синфхонаҳо

Муассисаи таълимии миёнаи умумии №16-и шаҳраки Бӯстон низ бо печҳои аловӣ ва гармкунакҳои барқӣ таъмин шудааст.

Дар суҳбат ба мо директори муассиса Насиба Шарифова баён дошт, ки барои зимистонгузаронии муассиса 12 тоннаю 272 килограмм ангишт захира шудааст.

Ҳамчунин, ӯ иброз дошт, ки соли гузашта муассиса 4 метри мукааб ҳезум захира намудааст, ки ин ба гуфти директори муассиса, барзиёд мебошад. 10 синфи ибтидоӣ бо печҳои аловӣ ва 13 синфи болоӣ бо печҳои барқӣ гарм мешаванд.

Ҳангоми аз назар гузаронидани синфхонаҳо маълум гашт, ки печҳои аловиро саҳар як маротиба оташ гиронда, минбаъд ба он ангишт андохта мешавад. Синфхонаҳо каме сард буда, шахс бе либоси гарми болоӣ бевосита хунукиро эҳсос менамояд. Дар синфхонаҳое, ки бо асбобҳои барқӣ гарм карда мешаванд, танҳо як асбоби гармкунӣ гузошта шуда, иқтидори гармидиҳии он ба ҳаҷми синфхона рост намеояд. Бо сабаби сардии синфхонаҳо дар ин муассиса ҳам хонандагон ва ҳам омӯзгорон бо либоси гарми зимистона дарс мехонданд.

Шинохти масъулият

Ин ду мисоли овардашуда ба таври кофӣ омода набудани муассисаҳои таълимии ноҳияро ба зимистонгузаронии солҳои 2019 - 2020 аён месозад. Боиси қайд аст, ки муассисаи давлатии таълимии томактабии №1 шаҳраки Бӯстон пурра ва ба таври воқеӣ ба фасли сармо омода шудааст.

Ба гуфти директори ин муассиса Садорат Сафарова дар кӯдакистон 12 тонна ангишт ва 5 метри кубӣ ҳезум захира гардида, тирезаҳои муассиса пурра шишабандӣ шудаанд. Дар кӯдакистон 250 нафар кӯдак дар 10 гурӯҳ тарбия ва таълим мегиранд.

Дарвоқеъ, синфхонаҳо, ҷои хоби кӯдакон ва дигар ҳуҷраҳои муассисаи давлатии таълимии томактабии №1 гарм буда, кӯдакон худро бароҳат эҳсос мекарданд. Шароити хуби кӯдакистон боиси хушнудии мо низ гардид, зеро «саломатии кӯдак ин саломатии миллат аст».

«Басанда», норасоӣ ва «100 фоиз»

Масъули шуъбаи маорифи мақомоти иҷроияи ҳокимияти давлатии ноҳияи Мастчоҳ қайд намуд, ки «баҳри самаранок гузаронидани давраи тирамоҳу зимистони соли таҳсили 2019-2020 дар муассисаҳои таълимии ноҳия як зумра корҳо ба сомон расонида шуданд».

Дар ҳисоботи шуъба оварда шудааст, ки эҳтиёҷоти муассисаҳои таълимӣ барои гузаронидани мавсими тирамоҳу зимистони соли таҳсили 2019-2020 харидории 563868 килограмм ангишт буда, бақияи ангишт аз соли гузашта 97500 килограммро ташкил медиҳад. Аз тарафи соҳибкорон ва кумитаи падару модарон ба анборҳои муассисаҳои таълимӣ 16700 килограмм ва аз ҶДММ «Барз» 424000 килограмм ангиштсанг харида шудааст.

Ҳамчунин, масъулин чунин мешуморанд, ки ин миқдор ангишт, яъне дар ҷамъ 440700 килограмм ангиштсанг барои гузаронидани мавсими тирамоҳу зимистони соли таҳсили 2019 - 2020 басанда аст.

Тақози эҳтиёҷот ва миқдори ангишти захирашуда дар муассисаҳои таълимии ноҳия ошкор менамояд, ки норасоии ангиштсанг дар муассисаҳои соҳаи маориф 123168 килограммро ташкил медиҳад. Новобаста аз ин шуъбаи маорифи ноҳия ба хулоса омадааст, ки миқдори ангишти захирашуда кифоя мебошад. Аниқ маълум нест, ки ин хулосаи маорифчиён ба чӣ асос ёфтааст? Шояд аз ҳамин хулосаи «басанда будани захираи ангиштсанг» бошад, ки печҳои аловии муассисаҳои таълимӣ танҳо саҳар як маротиба оташ дода, минбаъд ангишт андохта мешаванду халос. Ва натиҷаи ин гуна «гармидиҳӣ» аст, ки синфхонаҳо ба таври кофӣ гарм намешаванд.

Мутасаддиёни маорифи ноҳия тибқи нақша эҳтиёҷоти муассисаҳои таълимиро ба ҳезуми сахт ба миқдори 230 метри мукааб ва шишабандиро дар ҳаҷми 92 метри мураббаъ ва сӯзишвории дизелӣ дар ҳаҷми 150 литр, бино ба гуфти масъулин, «100 фоиз» иҷро кардаанд. Маълумоти овардашуда, албатта, аз рӯи ҳисоботи шуъбаи маорифи ноҳия дар коғаз аст.

Давраи тирамоҳу зимистон аз мутасаддиёни ҳамаи соҳаҳои иҷтимоӣ, бахусус маориф тақозо менамояд, ки дар фаъолият ҳисси баланди масъулиятшиносӣ зоҳир намоянд ва ҳисобот на танҳо дар коғаз, балки дар амал бояд ба иҷро расад. ҳамчунин, кӯшиши масъулин дар иҷрои вазифа бевосита бо саломатии кӯдакону наврасон, яъне ояндаи миллат вобаста буда, масоили зимистонгузаронӣ бояд ҳамарӯза мадди эътибори ашхоси масъул қарор дода шавад. Чунки таълиму тарбия дар муассисаҳои таълимӣ танҳо дар он вақт имконпазир аст, ки муассисаҳо дар фасли сармо бо шароити кофӣ таъмин бошанд.

Гулҷаҳон МАҲКАМОВА,
Улуғбек ХУДОЙБЕРДИЕВ,
«Ҳақиқати Суғд»

Читать далее

ЧАРОҒАКИ РОҲНАМО ЗАРУР!

Зиёдшавии воситаҳои нақлиёт нишонаи некӯаҳволии мардум аст. Имрӯз дар роҳҳои мамлакат намудҳои гуногуни мошинҳои хориҷиро дучор мешавем. Ҳар боре ба маркази вилоят - шаҳри Хуҷанд меоям, назди чорроҳаи автовокзали «Роҳи Абрешим» ҳаракати беисти ҳама гуна нақлиётро дида, ба худ меандешам, ки то ин сафари навбатиам, албатта, дар ҳамин ҷо шояд чароғаки роҳнамо насб кунанд.

Ронандагон баъзан дар ин макон «даступо мехӯранд». Ҳолат дар ин ҷо як мусобиқаи эълоннашудаеро мемонад. Аз як тараф, автобусҳо, аз дигар тараф, мусофирбарҳои хатсайрӣ, таксию нақлиёти шахсӣ ҳамеша садои гӯшхароши ҳушдоркунанда (сигнал) - и баланд доранд. Ба замми ин доду фарёди маблағчини хатсайрҳо дучанд мегардад. Ҳолатҳое ҳам рух медиҳанд, ки бархе ронандаҳо ба якдигар чунон суханҳои қабеҳ мегӯянд, ки «дар бел намеистад». Онҳо андешаи атрофиёнро надоранд.

Беморхонаҳои клиникии вилоятӣ, касалиҳои чашм низ дар ҳамин ҷо ҷойгир шудаанд. Ин мавзеъ ҳамеша серодам ва сернақлиёт аст. Баҳри пешгирии ҳолатҳои нохуш ва рух надодани садамаҳои нақлиётӣ ва асабӣ нагардидани мусофирону ронандагон дар ин ҷо гузоштани чароғаки роҳнамо тақозои ҳалли мушкилот аст.

Ин сатрҳоро навишта, боварии комил дорам, ки доди мо ба гӯши кормандони Бозрасии давлатии автомобилии шаҳри Хуҷанд ва ҳам вилоят расида, то сафари навбатӣ дар ин ҷо чароғак мегузоранд. Дигар ба ҷои доду фарёд ва суханҳои қабеҳ оромӣ дар яке аз дарвозаҳои шаҳр (Автовокзал) барқарор мегардад.

Ҳама аз субҳ бо табъи болида, яке аз пайи хизмату тиҷорат, дигаре барои донишомӯзӣ ва аёдати бемору гирифтани табобат мешаванд.

Раҳим ҚОБИЛОВ,
ноҳияи Ашт

Читать далее