February 2020

18 February 2020

Иродаи комили ҳамгироӣ

Дар раванди омодагӣ ба маъракаи муҳими сиёсӣ - интихоботи даъвати нави вакилон ба Маҷлиси намояндагони Маҷлиси Олии Ҷумҳурии Тоҷикистон ва маҷлисҳои маҳаллии вакилони халқ, ки 1 марти соли равон баргузор мегардад, дар шаҳри Исфара низ тадбирҳои мушаххас бо низоми муайян пеш мераванд.

Мутобиқ ба муқаррароти комиссияи Марказии интихобот ва раъйпурсии Ҷумҳурии Тоҷикистон, ҳамагӣ 79 участкаи интихоботӣ ташкил гардида, 64 адади он дар ҳудуди макотиби шаҳр ҷойгир шудаанд. Дар тамоми участкаҳо шароити мусоиди овоздиҳӣ муҳайё карда шудааст. Тибқи иттилои Саидхоҷа Бақоев - раиси комиссияи ҳавзаи «Исфара», №20 оид ба интихоботи Маҷлиси намояндагони Маҷлиси Олии Ҷумҳурии Тоҷикистон, рӯихати интихобкунандагон тартиб дода шуда, ҳамаи участкаҳои интихоботӣ бо кабинаҳои овоздиҳӣ, қуттиҳои махсус, дастуру ҳуҷҷатҳои зарурӣ таъмин мебошанд.

- Дар маҷмӯъ, дар ҳавзаи якмандатӣ 160 ҳазору 126 интихобкунанда ба қайд гирифта шуда, аз он 9 ҳазор нафар бори аввал дар интихобот иштирок хоҳанд намуд. Мутаассифона, дар мо шумораи онҳое, ки дар муҳоҷират қарор доранд, 33 ҳазору 804 нафар, қариб 22 фоизро ташкил мекунад, вале аз рӯи таҳлилҳо, ҳамасола то моҳи март қариб 10 ҳазор сокини шаҳр аз муҳоҷират бармегарданд - иброз дошт мавсуф.

Масъулин қайд намуданд, ки участкаҳои калонтарин зиёда аз 2 ҳазор интихобкунанда дорад ва тибқи талабот, ба 500 нафар як кабина гузошта шавад. Ҳангоми ташкили кабинаҳо ҳатман бояд барои ашхоси имконоти маҳдуддошта шароити махсус оғоз аз даромадгоҳ барои бемамониатии онҳо ба эътибор гирифта шавад. Ҳамчунин, имсол дар ҳавзаҳои интихоботӣ, тибқи талабот, хонаи модару кӯдак, нуқтаи тиббӣ бо шароити хуби зарурӣ фароҳам оварда шудааст. Барои маъюбони гурӯҳи якум қуттиҳои сайёр омода шуда, рӯзи интихобот намояндагони участкаҳои интихоботӣ ба манзили истиқоматии онҳо мераванд.

- Алҳол корҳои фаҳмондадиҳӣ, шиносоиву вохӯриҳои вакилон бо мардум ҳамарӯза, тибқи реҷа, гузаронида шуда истодааст. Пеш аз муҳлат барӯихатгирии аҳолӣ ба итмом расонида шуд. Хабарномаҳо пурра омода шуда, ба мардум дастрас намуда истодаем, - гуфт раиси комиссияи участкавии Қасри фарҳанги «Кимёгарон» - и шаҳр Салимҷон Усмонов.

Чуноне зимни шиносоӣ дар маркази шаҳри Исфара фароҳам будани шароит ва фазои мусоиди тадбирҳои сиёсию пешазинтихоботӣ шаҳодат аз онанд, ки масъулин дар ин самт омодагии ҳамаҷониба дидаанд. Аз ҷумла, дар ҳама ҷойҳои намоёни кӯчаҳои шаҳр шиору овезаҳо пурра насб гардидаву дар мақомоту сохторҳои мухталиф, биноҳои баландошёнаву марказҳои тиҷоратӣ, муассисоти таълимиву тандурустӣ, бонкҳо ва дар маҷмӯъ, дар маҳалҳои серодами ҷамъиятӣ шиорҳои даъвативу иттилоотӣ бобати интихобот насб карда шудаанд. Ин ҳама шаҳодати онанд, ки роҳбарону масъулон маъракаи муҳими сиёсиро дар сатҳи баланд ва вазъияти ҳамгироӣ баргузор менамоянд.

Маъмурахон САМАДОВА,

«Ҳақиқати Суғд»

Читать далее

Китоби нав: "Навҳаи доркӯб"

Интишороти "Орван" дар шаҳри Теҳрон, нахустин маҷмуъаи ҳикояҳои Фирдавси Аъзамро бо номи "Навҳаи доркӯб" мунташир кард.

Хонандагони форсизабон то кунун Фирдавси Аъзамро ба унвони шоир мешинохтанд, акнун аз тариқи ҳикоёти  ӯ бо андеша ва афкори шоир дар қолаби наср ошно хоҳанд шуд.

 Дар китоби аввалини нависандаи ҷавон шаш достони ӯ – "Сафар", "Тоблу", "Ҷудоӣ", "Рақси кабӯтар", "Навҳаи доркӯб" ва "Афсонаи гунҷишкҳо" ҷой дода шудаанд ва дар онҳо нависанда масоили мубрами рӯзгори моро аз манзари як нависандаи кунҷков ҷӯё шудааст.

Абдуқодири Рустам, нависандаи саршиноси тоҷик, дар  пешгуфтори китоб қайд мекунад, ки: "Дар аввалин маҷмуъаи достонҳои кӯтоҳи Фирдавси Аъзам диди шоирона авлавият дорад, чунонки шоир эҳсосоту андешаи худро, ки чун дурахши барқ ҳосили ҷарақаи лаҳзае дар қалбу мағзи ӯст, дар қолиби воҷаҳо мутаваққиф мекунад ва зиндагии ҷовидонӣ мебахшад".

Дар матни пушти ҷилди китоб чунин  омадааст:» Ӯ дар "Сафар" мусибати адиби ростгӯро баён мекунад. Дар "Рақси кабӯтар" моро бо зани бадбахте ошно месозад, ки дар тасаввурамон ӯ хушбахтарин маликаи замин аст, дар "Ҷудоӣ" мавзӯъи фироқро тарсим менамояд. Дар "Тоблу" фоҷиаеро ба риштаи тасвир мекашад ва "Навҳаи доркӯб" бонгест, ки моро ҳушдор медиҳад: ҳой Инсон, суннатро фаромӯш накун. Аз "Афсонаи гунҷишкҳо" намегӯем, беҳтар аст онро худ бихонед ва бибинед чи дарду андӯҳе аз дили шоир фаварон мезанад».

Сурайё ҲАКИМОВА,

«Ҳақиқати Суғд»

Читать далее

17 February 2020

Футбол дар вилоят ояндаи нек дорад!

Ҷаласаи Федератсияи футболи вилояти Суғд


Санаи 15 - уми феврали соли равон дар маҷлисгоҳи меҳмонхонаи «Суғдиён» - и маркази вилоят таҳти раёсати Раиси вилояти Суғд Раҷаббой Аҳмадзода ҷаласаи Федератсияи футболи вилоят баргузор гардид, ки дар он муовинони Раиси вилоят, роҳбари дастгоҳи Раиси вилоят, раисони шаҳру навоҳӣ, аъзоёни Федератсияи футболи вилоят, сардорони дастаҳои футболи вилоят, мураббиён, варзишгарон ва ҷавонони фаъол ширкат варзиданд.

Ҷаласаро Раиси вилоят, Раиси Федератсияи футболи вилоят Раҷаббой Аҳмадзода ифтитоҳ намуда, роҷеъ ба дастгириҳои Ҳукумати мамлакат, бахусус Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бобати рушди варзиш ҳарф зада, таъкид намуд, ки дар вилоят ба хотири рушди варзиш, аз ҷумла футбол тадбирҳои муассир роҳандозӣ шуда, шароитҳои зарурӣ барои варзишгарон муҳайё мегардад.

Читать далее

САРСАБЗИИ ДИЁР РИСОЛАТИ ҲАР ИНСОН АСТ!

Дар ярмарка беш аз 1 миллиону 500 ҳазор бех ниҳол ва гулу буттаҳои ороишӣ пешниҳод гардид.

Чорабинии калони кишоварзону боғдорон ва сокинони вилоят ярмарка – фурӯши ниҳол, тухмӣ ва гулу буттаҳои ороишиву ҳамешасабз бо иқдоми Мақомоти иҷроияи ҳокимияти давлатии вилоят санаи 15 - уми феврали соли 2020 дар назди Театри мазҳакаи мусиқии ба номи Камоли Хуҷандии маркази вилоят баргузор гардид.

Раиси вилоят Раҷаббой Аҳмадзода нахуст бо рафти ярмарка аз наздик шинос шуда, ба раисони шаҳру ноҳияҳо, аз ҷумла Хуҷанд, Гулистон, Бӯстон, Конибодом, Панҷакент, Бобоҷон Ғафуров барои ободу зебо намудани кӯчаву хиёбон ва боғу гулгаштҳои марказӣ супориш дод. Дастур дода шуд, ки аз гулу буттаҳои деҳқонон ва сокинони вилоят, ки ба фурӯш баровардаанд, пурсамар истифода бурда шавад.

Читать далее

Раҷаббой Аҳмадзода барқарқароркунандагони сохти конститусиониро аёдат намуд

Дар заминаи дастуру ҳидоятҳои Асосгузори сулҳу ваҳдати миллӣ - Пешвои миллат, Президенти мамлакат муҳтарам Эмомалӣ Раҳмон дар ноҳияи Спитамен Раиси вилояти Суғд Раҷаббой Аҳмадзода се нафар собиқадорони меҳнат, иштирокчиёни барқарорсозии сохти конститутсиониро аёдат намуд.

Саидакрам Ахмедов собиқадори мақомоти милитсия буда, солҳои зиёд дар мақомоти ҳифзи ҳуқуқ кору фаъолият намудааст. Номбурда дар барқарор намудани сохти конститутсионӣ ширкат варзидааст. Раиси вилоят саҳми чунин нафаронро дар пойдории сулҳу Ваҳдат муҳим арзёбӣ намуд. Ба номбурда кӯмакҳои моддӣ дастрас карда шуд.

Читать далее

БУНЁДКОРИҲО ШАҲОМАТИ ҶАШНИ ТАЪРИХИАНД!

Сафари кории Раиси вилоят Раҷаббой Аҳмадзода ба ноҳияи Спитамен

Дар асоси дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва бо мақсади саҳм гузоштан дар татбиқи ҳадафи чоруми миллӣ, яъне саноатикунонии босуръати кишвар дар вилояти Суғд ба фаъолияти корхонаҳои саноатӣ таваҷҷуҳи бештар равона шудааст.

Соли 2019 дар вилояти Суғд ба маблағи 12 миллиарду 888,3 миллион сомонӣ маҳсулоти саноатӣ истеҳсол гардида, суръати афзоиш бо назардошти индекси нархҳо ба 112,9 фоиз таъмин шудааст. Ҷамъияти дорои масъулияти маҳдуди «Спитамен - текстайл» яке аз корхонаҳои бузурги ноҳияи Спитамен ба шумор рафта, ба истеҳсоли маҳсулоти нахи пахта машғул мебошад.

Читать далее

Хуҷанд: Раҷаббой Аҳмадзода собиқадорони меҳнатро аёдат намуд

Дар партави дастуру супоришҳои Асосгузори сулҳу ваҳдати миллӣ - Пешвои миллат Президенти мамлакат муҳтарам Эмомалӣ Раҳмон аз ҷониби Раиси вилояти Суғд Раҷаббой Аҳмадзода ва раиси шаҳри Хуҷанд Маъруф Муҳаммадзода имрӯз якчанд собиқадорони меҳнат аёдат карда шуданд.

Раиси вилоят ба манзили собиқадори соҳаи маориф, профессор Шарифҷон Аҳмадов ташриф оварда, аҳволпурсӣ намуд.

Читать далее

ШУҲРАТИ ПЕШИНА БОЯД БАРҚАРОР ШАВАД!

Шиносии Раиси вилоят аз фаъолияти корхонаи «Садаф»

Раиси вилояти Суғд Раҷаббой Аҳмадзода бо мақсади огоҳӣ аз фаъолияти КВД “Садаф” ба Минтақаи саноатии шимолу шарқии шаҳри Хуҷанд ташриф оварда, бо вазъи ин корхонаи дар гузашта номдор ошноӣ пайдо намуд.

Иттилоъ дода шуд, ки Корхонаи воҳиди давлатии «Садаф» ҳанӯз соли 1979 дар асоси корхонаи «Радиосвяз» - и шаҳри Ростови Федератсияи Россия таъсис ёфтааст.

Читать далее

Донишкадаи кӯҳӣ-металлургии Тоҷикистон ба Чин ниқоб фиристод

Донишкадаи кӯҳӣ - металлургии Тоҷикистон ба ҳампаймони худ - Донишгоҳи нафти Ҷумҳурии Халқии Хитой ҷиҳати мусоидат ба пешгирии коновирус дар байни аҳолии ин кишвар бо нишони башардӯстӣ  лавозимоти заруррии тиббӣ, аз ҷумла 3000 ниқоб (рӯйпӯш) фиристод.

Бино ба иттилои муовини ректор оид ба илм, инноватсия ва робитаҳои байналмилалии Донишкадаи кӯҳӣ-металлургии Тоҷикистон Замониддин Зайниддини Насриддин ҳайати устодону донишҷӯёни ин муассисаи олии касбӣ аз паҳншавии вируси нав дар Ҷумҳурии Халқии Хитой амиқан нигарон буда, чунин иқдомро ба хотири ҳифзи муносибатҳои дӯстона ва як навъ изҳори ҳамдардӣ ба шарикони чинии худ рӯи даст гирифтаанд. Зимнан, ректори донишкада М. Фозилзода бо ирсоли номае ба ректори Донишгоҳи нафти Ҷумҳурии Халқии Чин академик Хао Фанг дар шахси роҳбарият ва ҳайати устодону донишҷӯёни ин боргоҳи таълимӣ ба кулли мардуми ба мо дӯсти Чин дар мубориза бо ин вируси ҳалокатбор бурдбориву пирӯзӣ таманно кардааст.

Гуфта мешавад, ки 3000 ниқоби рӯпӯш барои донишҷӯёни  Донишгоҳи нафти Ҷумҳурии Халқии Чин тариқи ширкати «EMS- International Express mail system» ирсол шудааст.

 Сурайё ҲАКИМОВА,
«Ҳақиқати Суғд»

Читать далее

Барои дарёфти Ҷоизаи журналистони вилоят ба номи Ҳоҷӣ Содиқ

Раёсати вилоятии Иттифоқи журналистони Тоҷикистон тибқи қарори Раиси вилояти Суғд аз 12 феврали соли 2020, № 69 «Дар бораи таҷлили Рӯзи матбуоти тоҷик» барои дарёфти Ҷоизаи журналистони вилояти Суғд ба номи Ҳоҷӣ Содиқ озмун эълон менамояд.

Ба озмун кормандони васоити ахбори омма, ки узви Иттифоқи журналистони Тоҷикистон буда, камаш панҷ сол ба аъзогӣ шомил ҳастанд ва дар расонаҳои хабарии маҳаллӣ фаъолият доранд ё аз нашрияҳои марказӣ ва хориҷӣ дар вилоят намояндагӣ мекунанд, метавонанд ширкат варзанд.

Ба озмун маводи муаллиф (муаллифон), ки дар жанрҳои очерк, публитсистика, мақолаҳои таҳлилӣ ва жанрҳои бадеӣ, аз ҷумла силсилаи ҳикояву ҳаҷвияҳо, ҳазлу мутоиба дар матбуоти даврии қаламрави вилоят ва  ҷумҳурӣ дар соли 2019-ум чоп шудаанд, пешниҳод карда шаванд.

Маводи журналистон, ки дар озмуни вилоятии рӯзноманигорон таҳти унвони «Хомаи созанда – 2019» пешниҳод шуда, ғолиб дониста нашудааст, барои баррасӣ қабул карда намешавад.

Барои иштирок дар озмуни вилоятии журналистон довталаб (довталабон) бояд ба созмони аввалияи журналистӣ бо ариза муроҷиат намояд. Котибони созмонҳои ибтидоӣ баъди баррасии масъала дар маҷлиси созмони аввалияи рӯзноманигорон қарори дахлдор қабул карда, бо мактуби расмӣ ба номи раиси созмони вилоятиии Иттифоқи журналистони Тоҷикистон пешниҳод мекунанд.

Дар ин замина, ҳамчунин камаш 10 маводи беҳтарин (нусхаи аслии дар нашрия чопшуда), ариза ва шарҳи ҳоли мухтасари довталаб, хислатнома аз ҷои кор, агар нафақагир бошад, аз созмони аввалияи журналистон, бояд то 1-уми марти соли 2020, соати 17.00 ба Раёсати созмони вилоятии ИЖ Тоҷикистон (шаҳри Хуҷанд, маҳаллаи 20-ум, бинои КВДК “Кохи матбуот”, ошёнаи 5-ум) ва бинои мақомоти иҷроияи ҳокимияти давлатии вилоят, утоқи 307, ба котиби масъули созмони вилоятии журналистон, бо ишораи "Ба озмуни вилоятии журналистон ба номи Ҳоҷӣ Содиқ" пешниҳод карда шаванд. Аризае, ки баъди ин мӯҳлат ворид мегардад, қабул ва баррасӣ намешавад.

Ҷоизаи журналистони вилоят ба номи Ҳоҷӣ Содиқ дар рӯзи таҷлили ҷашни матбуоти тоҷик ба ғолиби (ғолибони)  озмун супурда мешавад.

Барои гирифтани маълумоти иловагӣ бо телефонҳои

(92)-777-63-29, (92)-778-16-85, 4-66-05, 2-71-13 тамос гирифтан мумкин аст.

Раёсати созмони
вилоятии Иттифоқи
журналистони Тоҷикистон

Читать далее