08 April 2020

Худ ва атрофиёнро аз сироят эҳтиёт намудан вазифаи ҳар сокин аст!

Бемории COVID-19 дар ҷаҳон хурӯҷ намуда, ҳазорҳо нафар ба ин бемории хавфнок олуда шуда, бар асари гирифторӣ ба ин вабо ҷон бохтаву чанде аз онҳо шифо ёфтаанд. Бо мақсади пурзӯр намудани чораҳои зиддиэпидемикӣ барои пешгирии бемории COVID-19 дар назди Мақомоти иҷроияи ҳокимияти давлатии вилоят бо роҳбарии Раиси вилоят ситод таъсис ва пайваста ҷаласа бо роҳбарону масъулон гузаронида шуда, корбарӣ идома дорад.

Доир ба пешгирӣ намудани вируси COVID-19 дар вилоят сардори шуъбаи Раёсати асноди ҳолати шаҳрвандии вилоят Лолахон Файззода иброз намуд, ки паҳн шудани бемории сироятии COVID-19 имрӯз дар ҷаҳон ташвишовар арзёбӣ гардида, боиси хушбахтист, ки ягон сокини минтақаи кишвар ба ин беморӣ гирифтор ва дар миқёси Ҷумҳурии Тоҷикистон ба қайд гирифта нашудааст. Айни замон дар назди Раёсат ситод оид ба пешгирии ин беморӣ амал намуда, баҳри пешгирӣ аз ин вирус дар биноҳои кории шуъбаву бахшҳо аз ҷониби мутахассисони Маркази санитарӣ - эпидемиологии вилоят корҳои безараргардонӣ гузаронида шуда истодааст.

Бояд қайд намуд, ки дар шуъбаҳои муассисаҳои сабти асноди ҳолати шаҳрвандии шаҳру навоҳии вилоят баҳри эмин доштан аз ин беморӣ бо ҳароратсанҷ, дастпӯшак, хлор, ниқоби яккарата, дока барои безараргардонии дастакҳои дари ҳуҷраҳо таъмин гардида, корҳои безараргардонӣ идома дорад.

Бо мақсади пурзӯр намудани чораҳои зиддиэпидемикӣ барои пешгирии интиқол ва паҳншавии сирояти бемории COVID-19 ва ҷиҳати роҳандозии назорати умумии чорабиниҳо аз ин сироят маводи безараргардонӣ, шӯянда ва маҳлули антисептикӣ низ дар муассисаҳо истифода бурда мешаванд. Айни замон оид ба пешгирии ин беморӣ бо Маркази санитарӣ - эпидемиологии вилоят ҳамкории зич ба роҳ монда шудааст.

- Бо мақсади пешгирӣ ва ҳифз намудани сокинон аз ин вирус бояд ҳар як сокини мамлакат дастаҷамъона корро ҷоннок намуда, нагузорем, ки ин беморӣ ба сарзамини мо ворид шавад, - иброз дошт Лолахон Файззода.

Шаҳноза ҲОМИДОВА,

“Ҳақиқати Суғд”

Читать далее

БА ДУРУҒУ ДАСИСАҲО БОВАР НАКУНЕД!

Бо мақсади пешгирӣ аз бемории сирояткунандаи вируси корона дар асоси вазифагузориҳои Кумитаи иҷроияи марказӣ ва вилоятии Ҳизби Халқии Демократии Тоҷикистон чорабиниҳои тарғиботию ташвиқотӣ дар ҳудуди шаҳри Хуҷанд бо ташаббуси кумиҷроияи шаҳрии  ҲХДТ вусъати тоза мегирад. Аксия зери унвони  “Худ ва дигаронро аз сирояти коронавирус ҳифз намоед” бо иштироки беш аз 1000 нафар дар ташвиқу тарғиб бо усули хона ба хона ҷиҳати пешгирӣ аз ин беморӣ гувоҳи гуфтаҳои болоианд.

Кормандони кумиҷроия Муҳаббат Ӯрунбоева - муовини раиси КИ ҲХДТ, Эҳсон Исоев - мудири шуъбаи ташкилӣ ва иттилоот, Зарина Манонова - мудири шуъбаи кор бо занон ва Олимҷон Нурматов - мудири шуъбаи кор бо ҷавонони кумиҷроия дар ҳамкорӣ бо кормандони Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд бевосита бо сокинон дар маҳалла ва хонаи истиқоматии сокинон вохӯриҳо анҷом дода, дар баробари паҳни варақаҳо ҳамчунин ҳушдор доданд, ки ба қоидаҳои санитарӣ - гигиенӣ риоя карда, бештар аз издиҳом дурӣ ҷӯянд ва ҳатман ниқобҳои ҳимояткунанда истифода баранд. Қайд шуд, ки роҳандозии ин гуна чорабиниҳо ба хотири эмин мондан аз ин бемории сироятӣ гузаронида шуда, аз сокинон даъват ба амал оварда шуд, ки ба ҳар гуна овозаҳои беасос бовар накунанд. То имрӯз ягон ҳолати сироятёбӣ аз бемории коронавирус дар Ҷумҳурии Тоҷикистон ба қайд гирифта нашудааст. Овоза  ва  хабару гузоришҳои паҳнгардида, асоси воқеӣ надоранд. 13 нафаре, ки дар ноҳияи Ҷаббор Расулов ба карантин гирифта шудаанд, вазъи мӯътадил дошта, ташхис нишон дод, ки онҳо ба бемории коронавирус гирифтор нестанд.

 Кумитаи иҷроияи марказӣ
ва вилоятии Ҳизби Халқии Демократии
Тоҷикистон, шаҳри Хуҷанд

Читать далее

Исфара: АРТИШ - тарбияи садоқати ватандорӣ

Ҳамасола дар асоси Фармони Президенти Тоҷикистон аз санаи 1 - уми апрел дар манотиқи кишвар даъвати баҳории ҷавонон ба сафи Қувваҳои Мусаллаҳи кишвар оғоз мегардад.

Тайи чанд рӯз аст, ки дар миқёси вилояти Суғд даъвати ҷавонон идома дошта, аз ҳисоби ҷавонони матиниродаву ихтиёрӣ сафи Қувваҳои Мусаллаҳи кишвар пурра гардида истодааст.

Ҳисси баланди ватандӯстии ҷавонони Исфара буд, ки имрӯз ҷамоатҳои деҳоти Чоркӯҳ ва Ворух нақшаи даъвати баҳории ҷавонон ба сафи Қувваҳои Мусаллаҳи кишварро ба пуррагӣ таъмин намуданд. Ин амали онҳо боиси хушнудӣ ва болидарӯҳии дигар ҷавонони вилоят гардида, сафи ихтиёриён рӯз аз рӯз зиёд гардида истодааст. Ҷавонони қавииродаи Исфара бо ин амали худ cобит намуданд, ки баҳри ҳимояи марзу буми Ватан ҳамеша омода мебошанд.

Вобаста ба ташкил намудани корҳои тарғиботиву ташвиқотӣ комиссари ҳарбии шаҳри Исфара, полковник Амирҳамза Авазализода зикр намуд, ки аз ҳисоби пурзӯр намудани корҳои фаҳмондадиҳӣ ҷавонони ин ду ҷамоат бо хоҳиши худ дар рӯзҳои аввали даъвати баҳорӣ ба комиссариати ҳарбии шаҳр омада, ба хотири ҳимояи марзу буми Ватан худро номнавис намуданд.

Ба гуфти ҳамсуҳбати мо, даъвати баҳории ҷавонон ба сафи Қувваҳои Мусаллаҳ дар шаҳр хуб ҷараён дорад. Дар рӯзи аввали гусели наваскарон, ки бо иштироки Раиси вилоят дар маркази вилоят баргузор гардид, ки беш аз 70 нафар ҷавон аз ҷамоатҳои деҳоти Ворух ва Чоркӯҳ ихтиёрӣ шомили Артиши миллии кишвар гардиданд. Сафи ҷавонони ихтиёрӣ дар даъвати баҳории имсола нисбат ба солҳои гузашта зиёд гардида истодааст.

Бино ба иттилои масъулин, аз ҷониби кормандони комиссариати ҳарбии шаҳр ба хотири ҷалб намудани ҷавонон ба сафи Артиш пеш аз даъват дар қисмҳои низомӣ рӯзи “Дарҳои кушод” ба роҳ монда шуд. Дар ин рӯз ҷавонон бо шароити будубоши аскарон шинос гардида, ҳамчунин бобати шароитҳои муосири хизмат бо сарбозон саволу ҷавоб доир намуданд.

- Имрӯз дар миқёси шаҳр иҷрои нақшаи даъват ба 50 фоиз расидааст. Боиси хушнудӣ ва сарфарозист, ки садҳо ҷавонмарди далеру шуҷоъ ва қавииродаи баору баҳиммат бо амри виҷдон баҳри адо намудани қарзи фарзандиву шаҳрвандии худ ва ҳимояи манфиатҳои давлат барои хизмати Ватан - Модар ба сафи Қувваҳои Мусаллаҳ сафарбар шуда истодаанд, - иброз намуд номбурда.

Истамҷони НАҶМИДДИН,

"Ҳақиқати Суғд"

Читать далее

Суғд: то 6 апрел зиёда аз 800 нафар аз карантин рухсат шуда, 1086 нафар зери назорати он қарор доранд

Дар вилояти Суғд баҳри пешгирии паҳншавии сирояти “коронавирус”, ки имрӯзҳо ҷомеаи ҷаҳониро ба мушкилоти зиёд рӯ ба рӯ кардааст, тадбирҳои мушаххас андешида мешаванд. Аз ҷумла, ба карантин фаро гирифтани шаҳрвандоне, ки дар хориҷи мамлакат қарор доштанд. То 6 апрел, дар маҷмӯъ зиёда аз 800 нафар аз карантин ҷавоб шуда, боқӣ 1086 нафар зери назорати он қарор доранд. Бештари бистаришудагон мардон мебошанд.

Дар ин бора сардори Раёсати Хадамоти назорати давлатии тандурустӣ ва ҳифзи иҷтимоии аҳолии Ҷумҳурии Тоҷикистон дар вилояти Суғд Илҳом Пӯлодзода хабар дод.

Тибқи иттилои номбурда, бо мақсади омода будан ба ҳолати эҳтимолии хуруҷи ин сироят дар вилоят 1030 кат дар шуъбаҳои сироятии беморхонаҳои марказии шаҳру навоҳии вилоят ва 3 беморхонаи сироятӣ бо 1700 кати захиравии карантинӣ ташкил карда шудаанд.

«Барои пешгирӣ аз паҳншавии бемориҳои сироятӣ дар муассисаҳои тиббии шаҳру ноҳияҳо ва муассисаҳои тиббии маркази вилоят дорувориҳои зиддивирусӣ ба миқдори 44500 дона (4450 конвалюта), маҳлулҳои безараргардонӣ (дезинтоксикатсионӣ) зиёда аз 11000 шиша, маводи муҳофизӣ, ба монанди ниқоб - 152000 дона, респиратор - 5000 дона, айнак - 600 адад, пойпӯшаки яккарата - 5000 дона, корҷомаҳои яккарата ва бисёркарата - 4000 адад ва дастпӯшакҳои яккаратаву бисёркарата ба миқдори зиёда аз 120 000 ҷуфт захира гардидааст», - афзуд номбурда.

Илҳом Пӯлодзода инчунин иттилоъ дод, ки дар гузаргоҳҳои сарҳадӣ нуқтаҳои санитарию карантинӣ амал мекунанд. Мутахассисони эпидемиолог ва сироятшинос бо дастгоҳҳои ҳароратсанҷи фосилавӣ ҳар як шаҳрванди аз сарҳад гузаштаро дақиқ месанҷанд. Қариб 2000 шаҳрванди Ҷумҳурии Тоҷикистон ва хориҷӣ, ки аз гузаргоҳҳои сарҳадӣ гузаштаанд, ба муассисаҳои тиббии вилоят тавассути нақлиёти махсуси тиббӣ интиқол ёфта, бистарӣ шудаанд.

АМИТ «Ховар»

Читать далее

ДАЛЕРУ ШУҶОЪВУ ВАТАНПАРВАРЕМ...

Ҷавонони бонангу номуси мо хуб дарк мекунанд, ки хизмат ба Ватан барои онҳо қарзи муқаддаси фарзандӣ ва рисолати мардонагист. Насли ҷавон дар сафи Қувваҳои Мусаллаҳи мамлакат хизмат намуда, муҳимтарин мактаби обутоби ҳаётро паси сар мекунанд. Маҳз, дар ҳамин ҷо ҷавонписарон дарси шуҷоату мардонагӣ омӯхта, муҳофизат кардани хоки поки Ватанро меомӯзанд. Хизмати ҳарбӣ нишонаи равшани эҳсоси ватандӯстӣ, дарки зарурат ва аҳамияти ҳимояи манфиатҳои давлат ва халқи Тоҷикистон мебошад.

Чун анъана дар мавсими баҳор ва тирамоҳ даъвати ҷавонон ба сафи Қувваҳои Мусаллаҳи Ҷумҳурии Тоҷикистон баргузор мегардад. Бо Фармони Президенти кишвар Эмомалӣ Раҳмон ва қарори Раиси вилоят Раҷаббой Аҳмадзода дар ҳамаи шаҳру навоҳии вилоят маъракаи сиёсии даъвати ҷавонон ба сафи Қувваҳои Мусаллаҳи кишвар баргузор мегардад. Алҳол даъвати баҳорона оғоз гардидааст, ки ҷавонони далеру шуҷои Ватан бо рӯҳияи баланди ватандӯстӣ ва ифтихор барои ҳимояи Ватан раҳсипор гардиданд.

Дар рӯзи аввали гусели наваскарон, ки ботантана дар маркази вилоят, шаҳри Хуҷанд доир шуд, ҷавонон бо ҳисси баланди масъулиятшиносӣ озими қисмҳои ҳарбӣ гардиданд. Дар ин рӯз бо чанде аз онҳо ҳамсуҳбат шудем.

Сардор Раҷабов, навдаъватшаванда аз ноҳияи Спитамен, имрӯз бо амри дилу виҷдон омодааст, то қарзи бар дӯш доштаи худро ҳарчи зудтар ба анҷом расонад. Ӯ мегӯяд, ки ҳифзи марзу буми меҳан яке аз вазифаҳои муҳимтарини ҳар сокини диёр аст. Ҷавононро зарур аст, ки бо сарҷамъиву якдилӣ баҳри ҳимояи Ватан хизматро дар мадди аввал гузоранд. Зеро хизмат дар сафи артиш мактаби ҳаёт аст.

Дар ҳақиқат, имрӯз ҷавонони далеру шуҷои Ватан, ки дар рӯзи аввал ихтиёран ба хизмати халқу миллат равонаанд, ҳама ҳастии худро барои Ватан бахшидаанд. Зеро имрӯз мо тавассути телевизионҳо огоҳ ҳастем, шароити хизмат дар ҳамаи қисмҳои низомии ҷузъу томҳои Қувваҳои Мусаллаҳи кишвар рӯз аз рӯз беҳтар гардидааст, - мегӯяд наваскар.

Давлатмурод Муродов, наваскар аз шаҳри Панҷакент гуфт, ки бояд ҳар ҷавони бонангу номуси кишвар барои ҳимояи шаъну шараф ва марзу буми Ватани азизи хеш содиқона хизмат намояд, Ватани аҷдодии худро бо тамоми ҳастияш аз дилу ҷон дӯст дошта, ба ҳимояи он доимо тайёр бошад. Зеро хизмати Ватан – Модар қарзи шаҳрвандии ҳар як ҷавонмарди кишвар ба ҳисоб меравад. Ояндаи Ватани азизамон дар дасти ҷавонон аст.

Абдуҷалил Сироҷиддинов, даъватшаванда аз шаҳри Исфара дар суҳбат зикр намуд, ки ихтиёран барои ҳимояи кишвари азизаш омодааст.

- Мо, ҷавонон бояд ҳама суханҳои Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дарк намуда, ба боварии он кас бештар сазовор гардем. Зеро имрӯз шароити будубош дар қисмҳои низомӣ мисли солҳои қаблӣ нест. Ҳар як ҷавони бедордилу ватандӯст бояд омада, хизмати Ватан – Модарро ба ҷо орад. Осудагиву оромии кишвари худро қадр намуда, нагузорад, ки касе онро халалдор намояд. Хизмат дар сафи артиш на танҳо қарз, балки ифтихор ва шарафи бузург аст. Ҷавонони матиниродаи тоҷик бояд бо хоҳиши худ баҳри ҳимояи Ватан раванд.Саркашӣ аз хизматро ба худ раво надида, баръакс ба ҷавонони синни даъватӣ таблиғгар бошанд, то онҳо низ хизмати Ватанро пешаи худ қарор диҳанд, - иброз дошт Абдуҷалил.

Садбарг Раҷабова, модари наваскар аз ноҳияи Зафаробод буда, аз номи худ ҳамаи ҷавононеро, ки ихтиёран ба хизмати Модар – Ватан раҳсипоранд, табрик намуд. Гуфт, ки имрӯз фарзандаш низ бо хоҳиши худ ба комиссариати ҳарбии ноҳия омада, худро номнавис намуд ва дар қатори дигар ҷавонмардон, роҳи хизматро пеш гирифтааст. Ӯ мехоҳад, дигар ҷавонон низ ба Ватан содиқона хизмат кунанд, марзу буми кишвари аҷдодии худро пос доранд, нагузоранд, нохалафе суботу оромии кишвари моро халалдор намояд.

Ниёзӣ Сайёд Шоҳмирзо, наваскар аз ноҳияи Кӯҳистони Мастчоҳ дар суҳбат чунин зикр намуд, ки хизмат ба Ватан амри фархундаву шоиста аст. Ватан моро парвариду ба камол расонид. Ман пас аз хатми Донишкадаи тарбияи ҷисмонии Тоҷикистон дар назди худ нақша гузоштам, ки бояд хизмати Ватанро ба ҷо орам. Ифтихор мекунам, ки дар қатори ҷавонони бонангу номус ва ватандӯст ба хизмат раҳсипорам. Бояд ҳар як фарди соҳибақл ин маъниро дарк намуда, барои ҳимояи марзу буми кишвараш тайёр бошад. Зеро имрӯз агар мо, ҷавонони саодатманд Ватани худро дар ҳифзу ҳимояи худ нигоҳ надорем, оромиву осудагии мардумро каси дигар халалдор менамояд.

Алишер Абдуллоев, сокини ноҳияи Шаҳристон, ки фарзандаш имрӯз барои адо намудани қарзи фарзандии хеш ба хизмати Ватан меравад, зикр дошт, ки бояд фарзанди ҳар як соҳибватан хизмат намояд. Хонаву дари худро пос дорад. Бояд фарзандони мову Шумо сазовори номи ҷавонмардӣ гардида, бо сари баланду номи нек ба назди мо баргарданд.

Барои ҷавонон хизмат дар сафи Қувваҳои Мусаллаҳ мактаби обутоби зиндагӣ ба ҳисоб меравад. Дар ҳамин давра ҷавонписарон шуҷоату мардонагиро омӯхта, ҳифз намудани марзу буми Ватани аҷдодиамонро низ аз худ мекунанд. Аз ҷониби Ҳукумати Ҷумҳурии Тоҷикистон ва Вазорати мудофиаи кишвар баҳри хидмати сарбозон дар қисмҳои низомӣ тамоми шароит муҳайё гардидааст, ки аскарон метавонанд, бе ягон мамоният баҳри дифоъ тайёрӣ бинанд. Бинобар ҳамаи ҷавононро зарур аст, ки аз хизмати Ватан - Модар саркашӣ нанамуда, баръакс барои дифоъ намудани он ҳамеша омода бошанд.

Истамҷони НАҶМИДДИН,

 “Ҳақиқати Суғд”

Читать далее

Аксияи тарғиботӣ бар зидди коронавирус

Бо ибтикори Кумитаи иҷроияи Ҳизби Халқии Демократии Тоҷикистон дар шаҳри Хуҷанд, бо ҷалби аъзои ТҶҶ «Созандагони Ватан” маҳфили “Пайравони Пешвои миллат”-и Донишгоҳи давлатии Хуҷанд ба номи академик Бобоҷон Ғафуров дар кӯчаву хиёбонҳои маркази вилоят аксияи тарғиботӣ таҳти унвони “Худ ва дигаронро аз сирояти коронавирус ҳифз намоед!” баргузор гардид.

Аз ҷониби ҷавонон ба аҳолӣ наздикии 5000 адад варақаи иттилоотӣ дастрас ва дар ҷойҳои ҷамъиятӣ насб шуданд. Дар оғози чорабинӣ мудири шуъбаи ташкилӣ ва иттилооти кумиҷроия Эҳсонҷон Исоев, мудири шуъбаи кор бо ҷавонони кумиҷроияи шаҳрӣ Олимҷон Норматов ва роҳбари маҳфили “Пайравони Пешвои миллат” Муталиб Маҳмудов дар бораи паҳншавии ин беморӣ, ки имрӯз ҷаҳониёнро ба ташвиш овардааст, сухан карданд. Яке аз сабабҳои сироятёбии шумораи зиёди одамон ин риоя накардани одоби муошират ва гаштугузори оммавӣ мебошад.

Таъкид гардид, ки хушбахтона, дар Тоҷикистон коронавирус ба қайд гирифта нашудааст. Аз ин лиҳоз, ҳар нафарро зарур аст, то ба овозаҳои беасос бовар накарда, барои пешгирии ҳама гуна бемориҳои сироятӣ ба гигиенаи шахсӣ ва тозагии маҳал риоя намоянд.

Тавсия дода шуд, ки ҳангоми баланд шудани ҳарорати бадан, дарди гулӯ, мушкилии нафаскашӣ ва ё дигар нишонаҳои бемории зуком ба худмуолиҷакунӣ роҳ надода, ҳатман ба духтурони оилавӣ муроҷиат намоянд.

 Кумитаи иҷроияи ҳизби Халқии
Демократии Тоҷикистон, шаҳри Хуҷанд

Читать далее

Корҳои вусъатпазир дар иншооти ҷашнӣ

Дар доираи корҳои ободонию созандагӣ ва идомаи босуръати иқдомҳои бунёдкоронаи роҳбарияти давлату Ҳукумати мамлакат дар шаҳри Конибодом бахшида ба ҷашни 30 – солагии Истиқлолияти давлатии Ҷумҳурии Тоҷикистон сохтмони иншооти таъиноти гуногун вусъат меёбад. Ду - се соли охир дар ҳудуди шаҳр барои муҳайё кардани шароити мусоиди кору хизматрасонӣ ва идомаи босуръати корҳои ободонию созандагӣ даҳҳо иншооти наву замонавӣ, аз ҷумла марказҳои саломатӣ, мактабу синфхонаҳои иловагӣ, корхонаҳои хурду миёна ва биноҳои хуштарҳи истиқоматию хизматрасонӣ бунёд ва мавриди истифода қарор гирифтанд.

Сокинони меҳнатдӯсти шаҳри Конибодом ва соҳибкорону саховатмандони маҳал дастуру супоришҳои Асосгузори сулҳу ваҳдати миллӣ – Пешвои муаззами миллат муҳтарам Эмомалӣ Раҳмонро сармашқи кору фаъолияти худ намуда, кӯшиш ба харҷ медиҳанд, ки ҷашни миллиро бо меҳнати шоиста ва дастовардҳои арзанда истиқбол гиранд.

Дар ин самт соҳибкорон бо ҳисси баланди ватандӯстӣ ва саҳмгузорӣ дар корҳои ободонӣ фаъолона ширкат намуда, то имрӯз чандин иншооти замонавиро сохта, ба истифода супориданд. Айни замон сохтмони иншооти гуногун дар шаҳр идома дошта, баъди ба истифода додани иншоот сокинон бо ҷойи корӣ таъмин хоҳанд шуд.

Баҳри ободу зебо ва гулзор намудани кӯчаву хиёбонҳои шаҳр низ аз ҷониби кормандони идораи хоҷагии манзилию коммуналии шаҳр як қатор корҳо ба сомон расонида шуданд. Ҳангоми ба шаҳр ворид шудан эҳсос мегардад, ки кӯчаҳо тозаву озода буда, ҷӯйборҳо, саҳни мактабу боғча ва муассисаву ташкилот ободу гулзоранд. Дар канори кӯчаҳои шаҳр дарахтони ҳамешасабз шинонида шуда, рӯҳияи мардум бо меҳнати созанда ва эҳсоси шаҳрдорӣ болидаву афзун аст.

Бо мақсади баланд бардоштани маданияти шаҳрдорӣ, ободу зебо гардонидани гирду атроф ва дар ҳудуди шаҳру ҷамоатҳои деҳот, ташкилоту муассисаҳо ниҳолҳои сояафкан, ҳамешасабзу ороишӣ, мевадиҳанда, гулу гулбуттаҳо шинониданд.

Директори корхонаи давлатии фаръии хоҷагии манзилию коммуналии шаҳр Аъзамҷон Ҷӯраев гуфт, ки имсол зиёда аз ҳазор бех ниҳоли ороишиву ҳамешасабз, 25 ҳазор тухми гули канна ва зиёда аз 5 ҳазор гули мавсимӣ шинонида шуданд.

Бо назардошти беҳтар намудани вазъи таълиму тарбия ва баланд бардоштани сатҳу сифати таълим дар шаҳр якчанд иншооти соҳаи маориф бунёду навсозӣ мегарданд.

Қомат афрохтани иншооти замонавӣ дар маркази шаҳр ва деҳот боиси фараҳмандӣ ва хушҳолии сокинон гардидааст. Зеро ин ҳама тадбирҳои ободонӣ барои беҳтар шудани шароити кору зиндагии мардум пешбинӣ шудаанд. Сокинони шаҳр, хусусан соҳибкорону саховатмандон ба истиқболи ҷашни 30 - солагии Истиқлолияти давлатии Ҷумҳурии Тоҷикистон камари ҳиммат баста, мехоҳанд, дар ободонии Ватан саҳми худро гузоранд.

Нодир ТУРСУНЗОДА,

«Ҳақиқати Суғд»

Читать далее

Созандагӣ ва ободкорӣ ҳадафи мост!

Таассурот пас аз сафари кории Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба вилояти Суғд

Шӯҳрат Саидзода – устоди Донишгоҳи давлатии ҳуқуқ, бизнес ва сиёсати Тоҷикистон:

- Боиси сарфарозист, ки бо сарварии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар муддати кӯтоҳи даврони соҳибистиқлолӣ дар кишвар фазои сулҳу оромӣ таъмин карда шуд ва ҳамзамон, тоҷикон дар арсаи ҷаҳонӣ ҳамчун миллати ташаббускор муаррифӣ гардиданд. Ташаббусҳои байналмилалии Пешвои муаззами миллат дар масъалаҳои мухталифи умумибашарӣ, аз ҷумла ҳалли муаммои об ва пуштибонии онҳо аз ҷониби ҷомеаи ҷаҳонӣ аз соҳибтамаддун ва созандаву бунёдкор будани ин миллати куҳанбунёд, ки таърихи беш аз 5500 - сола дорад, шаҳодат медиҳад.

Дар баробари ин, пешниҳоди истифодаи таҷрибаи сулҳофаринии тоҷикон, дифои дини мубини Ислом аз терроризму экстремизм, ташаббусҳо оид ба ҳалли дигар масъалаҳои глобалӣ барои таъмини сулҳ ва амнияти байналмилалӣ аз сиёсати оқилонаи Президенти мамлакатамон дар самти сиёсати дохилӣ ва хориҷии кишвар башорат медиҳад.

Итминон дорам, ки пуштибонии чунин сиёсати хирадмандона аз ҷониби олимон ва паҷӯҳишгарони ҷавони кишвар ҷавоб ба ҳамон таъкиди Сарвари давлат, ки ҳанӯз соли 1994 дар нахустин Анҷумани ҷавонони Тоҷикистон гуфт буданд: «Ҷавонон аз хатогиҳои гузашта сабақ омӯзанд, дар раванди минбаъдаи таърих муттаҳиду мутаффиқ бошанд, ваҳдату якдилиро пеша намоянд», маншаъ мегирад.

Дар сафари навбатии худ Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба вилояти Суғд якчанд иншооти муҳими иҷтимоиву иқтисодиро ифтитоҳ намуда, дар мулоқотҳои самимиашон бо мардум бобати ҳифзи арзишҳои миллӣ, таҳкими дастовардҳои Истиқлолият, илмомӯзӣ ва ҳушёрию зиракии ҷавонон ва ғайраҳо ҳарф заданд.

Мутмаинам, ки мо – ҷавонони огоҳу соҳибмаърифати кишвар бо роҳи илмомӯзӣ ва хислатҳои неки ҷавонмардӣ аз мактаби давлатдории Пешвои муаззами миллат сабақ гирифта, нисбати падидаҳои номатлуби замон ҷиддан мубориза мебарем ва баҳри таҳкими суботу амният ва рушди Ватани азизамон саҳм хоҳем гузошт.

Абдуҳабиб Охунҷонов – корманди илмии филиали Институти боғпарварию сабзавоткории Академияи илмҳои кишоварзии Тоҷикистон дар вилояти Суғд:

- Сафари Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар рӯзҳои мубораки наврӯзӣ ба вилояти Суғд, аз ҷумла ноҳияи Бобоҷон Fафуров басо хотирмон ва пурсамар буд. Бахусус, сафари кории Пешвои муаззами миллат мо, кишоварзонро рӯҳбаланд намуд.

Воқеан ҳам ташаббусҳои хайру наҷиби Пешвои муаззами миллат, аз ҷумла дар соҳаи кишоварзӣ боис шуданд, ки бештари қувваи меҳнат дар деҳот ба соҳаи кишоварзӣ равона гардида, муносибати оқилона ба замин ва имконияти васеъ барои паст гардидани муҳоҷирати меҳнатии шаҳрвандон ба хориҷи кишвар таъмин гардад.

Ман ҳамчун олими ҷавон дар соҳаи боғдорӣ ҷиҳати бо ниҳолҳои ба шароити хоку иқлими минтақа мувофиқ корбарӣ намуда, ҳоло бо мутахассисони соҳа парвариши ниҳолҳои паканаро ба роҳ мондаем, ки минбаъд барои ташкили боғҳои интенсивӣ мусоидат мекунанд.

Заминҳои тӯли солҳои зиёд бекорхобида ва ташналаби мавзеи Рухаки Ҷамоати деҳоти Fозиён барои парвариши навъҳои гуногуни меваҷот мувофиқ буда, тибқи дастуру тавсияҳои Пешвои миллат айни ҳол дар ин минтақа наздик 700 гектар анорзор, бодомзор ва майдони хучу гелос ба гардиши кишоварзӣ дароварда мешаванд, ки дар ояндаи наздик ба таъмини бозорҳои дохилӣ ва хориҷӣ бо маҳсулоти босифати соҳа мусоидат менамоянд.

Мо - мутахассисони соҳа, деҳқонону кишоварзон аз нуктаҳои муҳим ва саривақтии Паёми навбатии Пешвои миллат, дастуру супоришҳое, ки ҳангоми сафари корӣ ба вилоят доданд, хулосаҳои зарурӣ бароварда, аз ҷумла оид ба рӯёнидани се - чор ҳосил аз ҳар як қитъаи замин пурсамар истифода мебарем, бо руҳу илҳоми тоза ва меҳнати сидқидилона аз заминҳо ҳосили фаровон рӯёнида, дастархони мардумро пурфайз мегардонем.

Бобоҷон Ғафуров – донишҷӯи Донишкадаи иқтисод ва савдои Донишгоҳи давлатии тиҷорати Тоҷикистон:

- Чун ҷавонони даврони соҳибистиқлол аз ғамхориву меҳрубониҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бархурдор ҳастам. Вақте ман тавлид шудам, бобоям, ки устокалони деҳа буданд, бо умеди ояндаи нек маро Бобоҷон номгузорӣ карданд, ки мисли аллома Бобоҷон Ғафуров шӯҳрати тоҷикону тоҷикистониёнро ба оламиён муаррифӣ намоям. Маҳз, бо ҳамин умед ман ба факултаи иқтисодӣ дохил шуда, асрори иқтисодиёти ҷаҳонро омӯхта истодаам. Ният дорам, сатҳи донишамро баланд бардошта, дар пешбурди илми ҷаҳонӣ саҳм гузорам. Ин буд, ки соли 2019 маро мушарраф гардид, ки давоми соли таҳсил дар Донишкадаи байналмилалии Ҷийянги Ҷумҳурии Мардумии Чин таҳсиламро идома диҳам. Дастуру супоришҳои Ҷаноби Олӣ буданд, ки забонҳои русӣ, англисӣ ва хитоиро омӯхта, сирри илми иқтисодиёти ҷаҳониро азхуд намудам ва минбаъд ният дорам, ҳамчун мутахассиси арзанда ба воя расида, дар рушди кишвари азизамон саҳми амиқ гузорам.

Боиси қаноатмандист, ки ҳини сафари навбатии худ ба вилояти Суғд Пешвои муаззами миллат, аз ҷумла ноҳияи Бобоҷон Ғафуров ва шаҳри Бӯстон, якчанд иншооти муҳим - корхонаҳои истеҳсолӣ ва марказҳои хизматрасониро мавриди истифода қарор доданд. Ба ин коргоҳҳо мутахассисоне заруранд, ки соҳиби дониши муосир буда, бо технологияи навтарин кор карда тавонанд. Зеро маҳсулоти истеҳсолкардаи ин корхонаҳо бояд ба талаботи стандарти ҷаҳонӣ мутобиқ бошад ва минбаъд он содирот карда шавад.

Мо – ҷавонон кӯшиш менамоем, ки хамчун ояндасозони давлату миллат, қувваи пешбаранда ва неруи ҳаракатдиҳандаи ҷомеаи имрӯза ҷидду ҷаҳд намуда, пайваста талош меварзем, ки дониш андӯзем, забон омӯзем ва баҳри ободӣ ва шукуфоии Ватани азизамон саҳми худро гузорем.

Хабарнигори

“Ҳақиқати Суғд”

Читать далее

Афзоиши ҳаҷми истеҳсоли маҳсулот дар корхонаи муштараки “Зарафшон”

Дар се моҳи аввали соли 2020 дар корхонаи муштараки “Зарафшон” ба маблағи 850,3 миллион сомонӣ маҳсулот истеҳсол карда шуд, ки дар қиёс ба ҳамин давраи соли гузашта 286,5 миллион сомонӣ зиёд мебошад.

Ин нукта имрӯз, 7 апрел зимни мулоқоти Раиси вилояти Суғд Раҷаббой Аҳмадзода бо роҳбари корхонаи муштараки “Зарафшон” Жан Яомин таъкид шуд.

Ҷонибҳо зимни мулоқот дурнамои ҳамкорӣ, зиёд намудани ҳаҷми истеҳсолот дар корхонаи муштараки “Зарафшон”, иҷрои уҳдадориҳои корхона, ташкили ҷойҳои нави корӣ ва бунёди боз як корхонаи металлургии коркарди мисро баррасӣ намуданд.

Читать далее