26 June 2020

Имрӯз дар Душанбе иҷлосияи дуюми Маҷлиси миллии Маҷлиси Олии Ҷумҳурии Тоҷикистон даъвати шашум баргузор гардид

Имрӯз дар шаҳри Душанбе таҳти раёсати Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ иҷлосияи дуюми Маҷлиси миллии Маҷлиси Олии Ҷумҳурии Тоҷикистон даъвати шашум баргузор гардид.

Тавре АМИТ «Ховар» бо истинод ба дастгоҳи Маҷлиси миллии Маҷлиси Олии Ҷумҳурии Тоҷикистон хабар медиҳад, аъзои Маҷлиси миллӣ бо интихоби котибот ва тасдиқи рӯзномаи иҷлосия 30 масъалаи дар рӯзнома пешбинишударо баррасӣ намуданд.

Тибқи рӯзномаи иҷлосия аъзои Маҷлиси миллӣ бо хулоса аз гузоришҳои раисони кумитаҳои Маҷлиси миллии Маҷлиси Олии Ҷумҳурии Тоҷикистон Дилшод Раҳмон, Маҳмадшоҳ Гулзода, Фарҳод Раҳимӣ ва Шарифҷон Ҷумъазода як қонуни мукаммал — Қонуни Ҷумҳурии Тоҷикистон «Дар бораи ёрии ҳуқуқӣ» ва қонунҳои Ҷумҳурии Тоҷикистон «Дар бораи ворид намудани иловаҳо ба Кодекси мурофиаи ҳуқуқвайронкунии маъмурии Ҷумҳурии Тоҷикистон», «Дар бораи ворид намудани иловаҳо ба Кодекси мурофиавии ҷиноятии Ҷумҳурии Тоҷикистон», «Дар бораи ворид намудани иловаҳо ба Кодекси мурофиавии граждании Ҷумҳурии Тоҷикистон», «Дар бораи ворид намудани тағйиру илова ба Кодекси ҷиноятии Ҷумҳурии Тоҷикистон» ва «Дар бораи ворид намудани тағйир ба Кодекси андози Ҷумҳурии Тоҷикистон»-ро мавриди муҳокимаи амиқ қарор дода, ҷонибдорӣ намуданд.

Инчунин, аз ҷониби аъзои Маҷлиси миллӣ масъалаҳо оид ба ворид намудани тағйиру иловаҳо ба як зумра қонунҳо, аз ҷумла қонунҳои Ҷумҳурии Тоҷикистон «Оид ба ворид намудани тағйироту илова ба Қонуни Ҷумҳурии Тоҷикистон «Дар бораи адвокатура ва фаъолияти адвокатӣ», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи нафақаҳои суғуртавӣ ва давлатӣ», «Оид ба  ворид намудани тағйиру иловаҳо ба Қонуни Ҷумҳурии Тоҷикистон «Дар бораи бақайдгирии давлатии асноди ҳолати шаҳрвандӣ», «Оид ба  ворид намудани тағйироту илова ба Қонуни Ҷумҳурии Тоҷикистон «Дар бораи кино», «Оид ба ворид намудани тағйирот ба Қонуни Ҷумҳурии Тоҷикистон «Дар бораи боҷи давлатӣ», «Оид ба  ворид намудани тағйиру иловаҳо ба Қонуни Ҷумҳурии Тоҷикистон «Дар бораи иҷозатномадиҳӣ ба баъзе намудҳои фаъолият» ва «Оид ба ворид намудани тағйироту иловаҳо ба Қонуни Ҷумҳурии Тоҷикистон «Дар бораи гаравхона (ломбард)», ки бо мақсади такмилу мукаммалгардонӣ ва мутобиқсозии онҳо ба санадҳои меъёрии ҳуқуқии дар Ҷумҳурии Тоҷикистон амалкунанда ба Маҷлиси миллӣ пешниҳод гардиданд, мавриди баррасии ҳамаҷониба қарор гирифта, ҷонибдорӣ ёфтанд.

Тибқи пешниҳодҳои Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон ва бо қарорҳои дахлдори Маҷлиси миллии Маҷлиси Олии Ҷумҳурии Тоҷикистон судяҳои Суди Олии Ҷумҳурии Тоҷикистон Вазирзода Гулнора Насрин, Қуватзода Турон Давлат ва Ҷуразода Насиба Ёрмад аз вазифа бозхонд карда шуда, ба муҳлатҳои нав судяҳои Суди Олии Ҷумҳурии Тоҷикистон интихоб гардиданд.

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ аз судяҳои навинтихобшуда даъват ба амал оварданд, ки баробари шарафёб гардидан ба боварии Сарвари давлат баҳри таъмини адолати судӣ ва ҳифзи ҳуқуқу озодиҳои инсон ва шаҳрванд содиқона хизмат намоянд.

Ҳамчунин, дар иҷлосия машваратчиёни халқии Суди Олии Ҷумҳурии Тоҷикистон барои солҳои 2020-2025 ва Намояндаи Маҷлиси миллии Маҷлиси Олии Ҷумҳурии Тоҷикистон дар Суди конститутсионии Ҷумҳурии Тоҷикистон интихоб гардиданд.

Сипас, бо тартиби муқарраргардида қарорҳои Маҷлиси миллии Маҷлиси Олии Ҷумҳурии Тоҷикистон «Дар бораи Нақшаи амали Маҷлиси миллӣ барои солҳои 2020-2025 дар партави муроҷиат ва роҳнамоиҳои Президенти Ҷумҳурии Тоҷикистон дар иҷлосияи якуми Маҷлиси миллии Маҷлиси Олии Ҷумҳурии Тоҷикистон даъвати шашум аз 17 апрели соли 2020» ва «Оид ба тасдиқи Низомнома дар бораи шаҳодатнома ва нишони сарисинагии узви Маҷлиси миллии Маҷлиси Олии Ҷумҳурии Тоҷикистон, намуна ва тавсифи онҳо» қабул карда шуданд.

Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ дар маърӯзаи худ дар назди кумитаҳо, комиссия ва Дастгоҳи Маҷлиси миллӣ вазифагузорӣ намуданд.

Таъкид гардид, ки бинобар пандемияи коронавирус дар ҷаҳон, таъсир ва оқибатҳои иҷтимоӣ ва иқтисодии он дар Ҷумҳурии Тоҷикистон низ баръало мушоҳида мегардад. Дар натиҷаи тадбирҳои сари вақт андешидаи Ҳукумати Ҷумҳурии Тоҷикистон вазъи эпидемиологӣ ва табобати беморон тадриҷан рӯ ба беҳбудӣ меорад.

Аз ин рӯ дастур дода шуд, ки санадҳои меъёрии ҳуқуқии соҳаи тандурустӣ, аз ҷумла дар бахшҳои беҳдоштӣ, сироятшиносию вирусологии он такмил дода шаванд.

Барои рушди устувору бемайлони иқтисодиёти кишвар зарурати таҳия ва пешниҳоди лоиҳаи қонунҳо дар самти афзоиши сармоягузорӣ, дастгирии давлатии соҳибкорӣ, фаъолияти зиддиинҳисорӣ, иқтисодиёти рақамӣ, истифодаи оқилонаи замин ва канданиҳои фоиданок таъкид карда шуд.

Таваҷҷуҳи аъзои Маҷлиси миллӣ ба масъалаи такмил додани фаъолияти қонунгузорӣ ба хотири баланд бардоштани сифати қонунҳо ва ба манфиати халқ хизмат намудани онҳо, инчунин таъмини ҳифзи ҳуқуқу манфиатҳои қонунии муҳоҷирони меҳнатӣ равона гардида, дастур дода шуд, ки дар муҳлати кӯтоҳ масъалаи таҳияи Консепсияи рушди муносибатҳои байнипарламентии Маҷлиси миллии Маҷлиси Олӣ, дар назди Маҷлиси миллӣ таъсис додани Шӯрои машваратии коршиносон, таҳлили санадҳои меъёрии ҳуқуқии соҳавии Маҷлиси миллӣ мавриди баррасӣ қарор дода шаванд.

Дар фарҷом, Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустами Эмомалӣ аъзои Маҷлиси миллиро ба вусъати корҳои ободонию бунёдкорӣ ва дар муҳлати пешбинишуда бо сифати баланд ба истифода додани иншоотҳо бахшида ба 30-солагии Истиқлолияти давлатии Ҷумҳурии Тоҷикистон ҳидоят карда, ҳамзамон кулли сокинони кишвар, инчунин ҳамватанони бурунмарзиро бо ҷашни Рӯзи Ваҳдати миллӣ табрик намуданд.

Читать далее

Дирӯз маҷлиси навбатии Ҳукумати Ҷумҳурии Тоҷикистон баргузор гардид

Дирӯз таҳти раёсати Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси Ҳукумати мамлакат муҳтарам Эмомалӣ Раҳмон маҷлиси навбатии Ҳукумати Ҷумҳурии Тоҷикистон баргузор гардид.

Дар кори маҷлис нахуст масъалаи вобаста ба Нақшаи кори Ҳукумати Ҷумҳурии Тоҷикистон барои нимсолаи дуюми соли 2020 мавриди баррасӣ қарор дода шуд.

Оид ба ҷараёни иҷрои қарори Ҳукумати Ҷумҳурии Тоҷикистон аз 26 ноябри соли 2016 «Дар бораи Барномаи давлатии мусоидат ба содирот ва воридотивазкунии Ҷумҳурии Тоҷикистон барои солҳои 2016-2020» вазири рушди иқтисод ва савдо Завқӣ Завқизода ҳисобот дод.

Читать далее

Тақдими стипендия ба донишҷӯён

23-юми июни соли 2020 дар толори Мақомоти иҷроияи ҳокимияти давлатии шаҳри Бӯстон маросими супоридани стипендияи раиси шаҳр сурат гирифт. Дар чорабинӣ, раиси шаҳри Бӯстон Раъно Ҳошимзода, муовинон ва роҳбари дастгоҳи раиси шаҳр, мудирони шуъбаву бахшҳои дахлдори мақомоти иҷроия, ректори Донишкадаи куҳӣ-металлургии Тоҷикистон, директори Мактаби Президентӣ барои хонандагони болаёқат ва сарварони муассисаҳои таълимии шаҳр ширкат намуданд.

Ҷамъомад бо сухани ифтитоҳии мудири бахши кор бо ҷавонон ва варзиши шаҳри Бӯстон Хусравшоҳ Исмоилзода оғоз гардид.

Баъдан, раиси шаҳри Бӯстон Раъно Ҳошимзода оид ба танинандозии сулҳу ваҳдати миллӣ дар мамлакат, дастгирии давлатии ҷавонон дар замони соҳибистиқлолии кишвар зери роҳбарии бевоситаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва муҳайё гардидани имконоти мусоиди кору таҳсил ва зиндагии шоиста ба ин қишри ҷомеа ибрози назар намуд.

Гуфта шуд, ки Истиқлолият, Ваҳдат, осудагиву амният ва тинҷиву осоиштагӣ арзишҳои ниҳоят муҳим ва муқаддас буда, баҳри таҳким, густариш ва ҳифзи ин арзишҳо бояд ҳар як фарди ҷомеа бо эҳсоси масъулияти том ҷаҳду талош намояд.

Баъдан роҳбари шаҳр зикр дошт, ки дар шаҳри Бӯстон бо мақсади амалӣ намудани сиёсати ҷавонпарваронаи Президенти Ҷумҳурии Тоҷикистон муҳтарам Эмомалӣ Раҳмон баҳри ҳавасмандгардонии ҷавонони соҳибмаърифату болаёқат иқдомҳои наҷиб роҳандозӣ гардида, пайваста ташаббусҳои неку созандаи онҳо пуштибонӣ меёбад.

Аз ҷумла соли равон шумораи гирандагони стипендияи раиси шаҳр аз 22 ба 30 адад расонида шуда, андозаи маблағи он аз 19 ҳазору 80 сомонӣ ба 27 ҳазор сомонӣ расонида шуд.

Баъдан ба 30 нафар ҷавонони фаъоли шаҳр, донишҷӯёни Донишкадаи куҳӣ-металлургии Тоҷикистон, хонандагони Мактаби Президентӣ барои хонандагони болаёқат ва муассисаҳои таълимӣ стипендия ба ҳар кадоме ба андозаи 900 сомонӣ ва шаҳодатнома тақдим карда шуд.

Дар интиҳо Ҷасур Шуҳратзода хонандаи Мактаби Президентӣ барои хонандагони болаёқат дар шаҳри Бӯстон, Меҳрангез Ҷалолова хонандаи литсеи 1 ва Сабрина Мӯъминова хонандаи Гимназияи 2-юм ба Пешвои муаззами миллат муҳтарам Эмомалӣ Раҳмон ва роҳбари шаҳр изҳори сипосмандии хешро ҷиҳати дастгирии давлатии ҷавонон баён ва изҳор доштанд, ки бо баҳои хубу аъло таҳсил намуда, баҳри шукуфоии Тоҷикистони азиз саҳмгузор хоҳанд шуд.

Мамнур НУРЗОДА,

шаҳри Бӯстон 

Читать далее

Мир Вашему дому…

Завтра - 27 июня таджикистанцы с чувством гордости за страну отмечают всенародный, ставший государственным праздником – День национального единства в Республике Таджикистан, который знаменует окончание братоубийственной войны в стране. 

Читать далее

ВАҲДАТРО ПОЯНДА ДОШТАН ҚАРЗИ МОСТ!

Имрӯз ҳар як сокини кишвари азизро таассуроти гуворо аз тадбирҳои омодагӣ ба истиқболи 23 – юмин солгарди Рӯзи Ваҳдати миллӣ фаро гирифтааст. Ин рӯзи таърихӣ ва ба ҳаёти халқи тоҷик тақдирсозро ҳар нафари бедордилу меҳанпараст хуб медонад ва дар ин ҷода баҳри пойдор мондани Ваҳдати миллӣ ҳамаҷониба кӯшиш ба харҷ медиҳад. Аз рӯзҳои баргузории Иҷлосияи Шӯрои Олӣ ва барпо гардидани Ваҳдати миллӣ шоҳидон ва иштирокчиёни бевоситаи он рӯзҳо бо чашмони пуроб ёдовар мешаванд, зеро баҳри расидан ба Ваҳдату ягонагӣ ва сулҳу осоиштагӣ ҳазорон нафар ҷон бохтаанд.

Дар бобати рӯзҳои мушкили паси сар кардаи халқи тоҷик ва ба даст овардани истиқрори сулҳ ва ризоияти миллӣ раиси Шӯрои куҳансолони ҳаракати ҷамъиятии Ваҳдати миллӣ ва эҳёи Тоҷикистон дар шаҳри Бӯстон Орифҷон Содиқов, собиқ корманди мақомоти амнияти Ҷумҳурии Тоҷикистон як ба як саҳифаи онро варақгардон кард, ки фишурдаи онро манзури Шумо - хонандагон менамоем.

Иҷлосия ниҳоли дарахти Ваҳдат аст…

- Дар бобати сулҳи тоҷикон, Истиқлолият ва Ваҳдат, ки неъмати нотакрор аст, бароям сухан кардан душвор аст, зеро он рӯзҳо фаромӯшношуданист… Ҳамон вақт дар шаҳри Душанбе барои таъмини амнияти ҷомеа масъулият доштам. Хадамоти ҷосусие, ки дар хориҷи кишвар кор мекарданд, ба мақсади худ наздик шуда буданд. Аввалан, барои пош кардани Иттифоқи Советӣ ва, сониян, баҳри несту нобуд кардани миллати тоҷик кӯшиш карданд. Ният доштанд бесарусомониро дар Осиёи Миёна, алахусус дар Тоҷикистон оғоз кунанд. Инак, оҳиста - оҳиста он ҷомеае, ки камтар захмдида буд, мардумро ба гурӯҳ ҷудо кард. Соли 1992 нофаҳмию бесарусомонӣ торафт зиёд шуд. Роҳбарон маҷбур буданд, ки ҳукумати муросоро ташкил кунанд. Теъдоде ҳамроҳ шуда ба ҳукумат омаданд, вале вазъиятро чунон душвор карданд, ки ҷануби Тоҷикистон ғарқи хун гашт. Ғарқи оташ шуд, ин қадар ҷаҳолат дар мардуми тоҷик аз куҷо сар зад, касе фаҳмида наметавонист, - гуфт мавсуф.

Яке аз саркардагон дар китоби худ паҳн карданд, ки Тоҷикистон ва халқи тоҷик «дорулкуфр», яъне кишвари кофирон аст, ки дар он ҷо «худобехабарон» ҳукуматро идора мекунанд ва куштори коммунистону пайравони онҳо, роҳбарону ҳукуматдорон савоб аст. Мусодираи молу мулки онҳо низ савоб аст. Мутаассифона, ин гуфтор аз забони нафаре, ки худро тоҷик меҳисобаду миллаташ ҳам тоҷик аст, гуфта шудааст. Ӯро хоҷагони хориҷиаш аз ҳар ҷиҳат дастгирӣ ва бо аслиҳаву яроқ таъмин мекарданд. Онҳо чизеро, ки фармуданд, инҳо ба иҷро мерасонданд. Чунон пиндоштанд, ки бо яроқу аслиҳа метавон ба мақсади ниҳоии худ расид ва ё молу пули зиёд қодир аст, чизеро ҳал кунад.

Моҳи ноябри соли 1992 Иҷлосияи сарнавиштсоз дар қасри Арбоб ба кор шуруъ намуд. Дар иҷлосия 33 нафар сарвару қумондони боэътимоди яроқбадаст иштирок карданд. Дар ин асно онҳо шоҳид шуданд, ки Тоҷикистон сохти конститутсиониашро барқарор кард. Баробари ин намояндагони дигар давлатҳо ба анҷом расидани кори иҷлосияро назорат мекарданд. Идоракунии давлат парламентӣ шуд. Дар натиҷаи ҷангу ҷидол наздик 180 ҳазор нафар сокинони бегуноҳ дар натиҷаи бесарусомониҳо ҷон доданд. Деҳаю шаҳр, роҳҳои ободро валангору мамлакатро ба харобазор табдил доданд. Иқтисодиёти давлат, ки аллакай коста гашта буд, наздик 10 миллиард доллари амрикоӣ зарар дид. Аз роҳи инсонӣ баромадани афродеро дида, худ фикр мекардам, ки кай ин ба анҷом мерасида бошад, зеро дар шаҳри Душанбе агар соли 1992 наздик 600 ҳазор нафар истиқомат дошта бошанд, пас дар нимаи дуюми сол аллакай шумораи онҳо аз як миллион зиёд шуд, зеро мардум аз навоҳии ҷангзада ба Душанбе гурехта омаданд. Он давра барои сокинон озуқа намерасид.

Иҷлосия қонуну қарорҳои дахлдорро қабул кард, пас дарк кардам, ки ниҳоли дарахти Ваҳдат зери гуфтори Раиси Шӯрои Маҷлиси Олии тозаинтихоби тоҷикон Эмомалӣ Раҳмон «То ба Ватанам сулҳ наорам, ором намешавам ва агар лозим шавад, дар ин роҳ ҷони худро нисор мекунам» буд. Он 33 нафар саркарда дарк карданд, ки давлати қонунӣ барқарор шуд, сохти парламентӣ гирифт ва он намояндагоне, ки дар он ҷо буданд, пазируфтанд. Мебоист ором мешуданд, лекин пас аз якуним моҳи ба анҷом расидани кори Иҷлосия мухолифин ва саркардагон ба таҳлука афтоданд. Қариб 1500 километр сарҳади Тоҷикистон бе ҳимоя монда буд, қувваҳоро ҷамъ карданд, шаҳраки Ғарм (ҳозира Рашт) - ро пойтахти давлати исломӣ эълон карда, ба болои боми маъмурии ҳукумати қонунӣ байрақи исломиро гузошта, бо шиддати баланд ҷангро оғоз карданд. Барои ором кардани ҷанги бародаркуш давлатҳои дӯсту бародар Тоҷикистонро дастгирӣ карданд. Аввал гуфтушунид дар шаҳри Табошар (ҳозира Истиқлол) ва Қайроққум (ҳозира Гулистон) баргузор шуд.

Дар он давра Тоҷикистон имконияти саркӯб кардани хоинони миллатро дошт. Он вақт метавонистем, яроқро гирифта, мубориза барем ва саркардагонро бо хоки сияҳ яксон созем, лекин агар ба осори ниёгон назар андозем, аён мешавад, ки сулҳ аз ҷанг беҳтар аст.

Саъдии Шерозӣ дар бораи ҷангу сулҳ навиштааст:

Ҳарчанд ки интиқом зи душман ҳаром нест,

Дар авф лаззатест, ки дар интиқом нест.

Сарвари давлат ба суханони «Ман сулҳ меоварам» вафодору содиқ монданд ва барои саркӯб кардани душмани миллат нагузоштанд.

 Ҷонбозиҳои содиқони Ватан бенатиҷа намонд…

Комиссияи давлатӣ оид ба тайёр кардани ҳуҷҷатҳои ризоияти миллӣ ба кор сар кард. Олими шинохтаи тоҷик Муҳаммад Осимӣ комиссияро роҳбарӣ мекарданд. Мутаассифона, дар муҳорибаҳои ҷангӣ тиру тӯп он касро захмӣ сохт, зеро 60 фоизи танашон сӯхт. Шаш моҳ дар беморхона табобат гирифта, боз ба кори худ шуруъ карданд. Вале ҷоҳилон он касро ором нагузошта, дар шаҳри Душанбе ба қатл расониданд. Мавлон Олимов - депутати Шӯрои Олӣ, ки он вақт муовини сардори гумруки Тоҷикистон буда, ваҳшиёна кушта шуд. Нурулло Ҳувайдуллоев - Прокурори генералиро хостанд, ки ба зону шинонанд, вале ӯ рад кард. Ба тани ӯ 30 тир заданд, ки 27 - тои он ба ҳадаф расид. Ваҳдат ба осонӣ ба даст наомад.

Моҳи декабри соли 1994 дар шаҳри Москва барои гуфтушунид роҳбарони давлатҳои мустақил сарҷамъ шуданд. Онҳо тақдири минбаъдаи Тоҷикистонро муҳокима намуданд. Чунин гуфтушунидҳои тақдирсоз 8 маротиба дар хориҷи кишвар баргузор шуд. Натиҷаи гуфтушунид буд, ки санаи 27 - уми июн созишнома ба имзо расид. Бояд таъкид кард, ки 1171 рӯз гуфтушуниди байни тоҷикону мухолифон дар дохил баргузор шуд.

Миллати азиятдида ба сулҳ расид…

Мардуми тоҷик, ки ташнаи тинҷию оромӣ буд, аз оби ҷонбахш нӯшида, ташнагиашро шикаст. Ҳамон ниҳоли дарахти Ваҳдат, ки дар Қасри таърихии Арбоб шинонида шуда буд, самар дод. Оромиву осудагӣ, фурӯ нишонидани алангаи ҷанги бародаркуш сарзамини тоҷиконро фаро гирифт. Вақте Ваҳдати тоҷикон ба даст омад, Кофи Анан - собиқ Дабири кулли СММ дар баромадаш дар Ансамблеяи генералӣ гуфт, ки «Президенти Ҷумҳурии Тоҷикистон дар байни мо ягона сарвар аст, зеро барои оромӣ бахшидан ба мардумаш, таъмин кардани сулҳу салоҳ мухолифини яроқдорро бо яроқу аслиҳааш ба назди худ хонд ва ба мансабҳои баландпояи ҳукуматӣ таъин кард. Ин таҷрибаро омӯхтан лозим аст. Касе, ки наомӯхт, миллату давлаташро бой медиҳад.

- Агар толеи мо баланд намешуд, агар Сарвари давлат сари мизи гуфтушунид намешуданд, шояд мо ба ин рӯз намерасидем, мо давлатро бой дода, аллакай Ҷумҳурии Тоҷикистон аз харита рафтанаш аз имкон дур набуд. Вале бояд ба қадри ин неъмат расид, тарбияи ҷавононро хуб ба роҳ монда, аз таъриху тамаддуни халқи тоҷик огоҳ созем. Беҳуда нест, ки Пешвои муаззами миллат муҳтарам Эмомалӣ Раҳмон солҳои 2019 – 2021-ро «Солҳои рушди деҳот, сайёҳӣ ва ҳунарҳои мардумӣ» эълон доштанд, зеро нафаре, ки соҳиби илму ҳунар аст, метавонад, дар рушди минбаъдаи кишвар саҳмгузор бошаду барои поянда нигоҳ доштани Ваҳдати миллӣ кӯшиш намояд.

Имрӯз бо боварии том метавон гуфт, ки барои тамоми қишрҳои ҷомеа шароити хуб муҳайё аст, зеро сохтмони иншооти азим, бунёди мактабу кӯдакистонҳо, беморхонаву марказҳои саломатӣ ва фаъолияти коллеҷу донишкада ва донишгоҳҳои олӣ ҳама самараи Ваҳдат аст.

Шаҳбону ОЛИМОВА,

«Ҳақиқати Суғд»

 

 

 

Читать далее

САМАРАИ ДАСТОВАРДҲО АЗ СУЛҲУ СУБОТ АСТ!

Имрӯз Ваҳдати миллӣ ва сулҳи бадастовардаи Тоҷикистонро аксарияти кишварҳои олам ҷонибдорӣ намуда, мавқеъ ва мақоми кишвари мо дар миқёси ҷаҳон овозадор гаштааст. Аз ин лиҳоз, имрӯз иттифоқ ва ҳамдигарфаҳмии мардумони тоҷикро созмонҳо ва ташкилоти бонуфузи олам мавриди омӯзиши худ қарор додаанд.

Доир ба мафҳуми Ваҳдати миллӣ ва дастоварҳои он дар кишвари соҳибистиқлолу ваҳдатсаро – Тоҷикистон бо номзади илмҳои сиёсӣ, дотсент, мудири кафедраи сиёсатшиносии Донишгоҳи давлатии ҳуқуқ, бизнес ва сиёсати Тоҷикистон Шӯҳрат Саидзода суҳбат намудем, ки манзури хонандагон месозем.

- Ваҳдати миллӣ ба пешрафту шукуфоии кишвар мусоидат намуд. Дар ин бора фикру андешаҳои худро баён менамудед?

- Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барҳақ қайд намуданд, ки «Ваҳдати миллӣ барои мо дастоварди ниҳоят пурарзиш, шарти асосии некӯаҳволии халқамон ва таҳкурсии боэътимоди пешрафту ободии Ватани маҳбубамон мебошад. Аз ин лиҳоз, вазифаи ҳар шахси худшиносу худогоҳ, ватандӯсту ватанпарвар аз он иборат аст, ки Ваҳдати миллиро чун гавҳари бебаҳо ва дастоварди ниҳоят азиз ҳифз намояд ва онро дар радифи дигар муқаддасоти миллиамон пос ва гиромӣ дорад».

Ба даст омадани Ваҳдати миллӣ, тарғиби идеяи сулҳу ваҳдат аз ҷониби Пешвои миллат муҳтарам Эмомалӣ Раҳмон дар замони нооромии кишвар кори осон набуд. Пешвои миллат зери мафҳуми Ваҳдат тавонистанд, тамом сокиноне, ки гуреза буданд, ба Ватан баргардонанд. Сиёсати ҳамонвақтаи пешгирифтаи Сарвари давлат хеле равшан намоён буд, ки масъалаи ҳифзи сулҳу субот ва Ваҳдати миллиро дар бар мегирифт.

Дар ҳақиқат, Ваҳдати миллӣ барои мо, тоҷикон дар ҳифз ва нигоҳ доштани Истиқлолияти комили давлатӣ заминаи устувор гузошт. Танҳо бо роҳи ба даст овардани Ваҳдат тавонистем, шукуфоии давлату миллати худро бо роҳбарии Сарвари хирадмандамон нигоҳ дорем.

Ваҳдат буд, ки дар Тоҷикистони азизи мо ҷашнҳои бузурги умумиҷаҳонӣ, аз ҷумла, соли 2009 таҷлили 1310 - солагии мавлуди Имоми Аъзам баргузор гардид ва ташрифи олимони шинохтаи кишварҳои ҷаҳони Ислом басо саривақтӣ буд.

Ҳамчунин, дар сатҳи ҷаҳонӣ масъалаи глобалии таъминоти аҳолӣ бо оби тозаи нӯшокӣ маҳз аз ҷониби Пешвои миллат рӯи кор омад, ки дар кишвари мо чандин форумҳои сиёсии сатҳи ҷаҳонӣ доир гардид. Ҳамаи ин аз шарофати ба даст омадани Ваҳдати миллӣ аст.

- Пас аз ба даст омадан ва пойдории Ваҳдати миллӣ дар саросари Ҷумҳурии Тоҷикистон дигаргуниҳои куллие ба амал омада истодаанд. Мехостем фикри шуморо ҳамчун як сокини кишвар бобати ин пешравиҳо фаҳмем.

- Дар ҳақиқат, пас аз ба даст омадани Истиқлолияту Ваҳдати миллӣ дар кишвар дигаргуниҳои ҷиддиро мушоҳида намудан мумкин аст. Ҳамаи ин комёбиҳои Ватани азизамон, ки ҳамарӯза шоҳидаш ҳастем, маҳз дар заминаи Ваҳдати миллӣ ба даст омадааст. Бесабаб коршиносон марҳалаи рушди Тоҷикистонро баъди солҳои 2000 - ум унвон накардаанд. Зеро то ин давра тамоми нерӯи Ҳукумати кишвар асосан барои масъалаи таъмини суботу оромӣ равона шуда буд. Хушбахтона, имрӯз ҳамаи мо шоҳиди он ҳастем, ки Тоҷикистон бо гузашти 23 сол аз замони ба даст омадани сулҳ ба натиҷаҳои назаррас ноил гардид. Чор стратегияи давлатӣ: баромадан аз бунбасти коммуникатсионӣ, расидан ба истиқлолияти энергетикӣ, таъмини амнияти озуқаворӣ ва аз давлати аграрии индустриалӣ гузаштан ба кишвари саноатию аграрӣ муқаррар карда шуд. Вобаста ба се стратегия корҳои бисёр бузург анҷом дода шуданд. Хоса ба истифода дода шудани ду чархи НБО-и «Роғун» дар амалӣ намудани стратегияи расидан ба истиқлолияти энергетикӣ ва умуман барои кишвар рӯйдоди бисёр ҳам муҳими таърихӣ ба ҳисоб меравад. Дар ин кор бояд ҳам ба хизмати таърихии Пешвои миллат ва ҳам ба пуштибонии мардуми шарифи кишвар аҳсант хонд. Маҳз, иродаву ҷасорати Роҳбари кишвар буд, ки мамлакат аз бунбасти коммуникатсионӣ бароварда шуд, Тоҷикистон ба истиқлолияти энергетикӣ расид. Ҷудо гардидани даҳҳои ҳазор гектар замин ба аҳолӣ ва сол аз сол зиёд гардидани боғу киштзорҳо, бешубҳа, корҳои чашмрас ба ҳисоб рафта, он дар таъмини амнияти озуқаворӣ нақши муассир дорад.

Воқеан, дар як муддати кӯтоҳ Ҷумҳурии Тоҷикистон тавонист, дар арсаи ҷаҳонӣ бо шарофати талошҳои шабонарӯзии Роҳбари давлат Эмомалӣ Раҳмон ва иқдомҳои наҷиб ҳамчун давлати ташаббускор ва миллати тамаддунсоз муаррифӣ гардад. Соле қабл аз ҷониби Конфронси генералии ЮНЕСКО қабул гардидани қарор доир ба баргузории ҷашнҳои 5500-солагии Саразми бостонӣ ва 700 – солагии шоири барҷастаи тоҷик Камоли Хуҷандӣ мисоли равшани ин гуфтаҳо мебошад.

Мехоҳам, ҳар як шаҳрванд масъулияти хешро дар пойдории сулҳу субот эҳсос намояд.

- Ташаккур барои суҳбат!

Суҳбаторо

Истамҷони НАҶМИДДИН,

«Ҳақиқати Суғд»

Читать далее

ПЕШВОИ МИЛЛАТ – БУНЁДГУЗОРИ НБО «РОҒУН»

Ваҳдат – ободии хонадони мо!

Мардуми диёри арҷманду пурганҷи мо – хурду бузургсол бо дили гарму иродаи пок дар фазои гуворои ваҳдат, ягонагӣ, эътиқод ба ягонагӣ хушҳолу фархунда зиндагӣ мекунанд, кору пайкорро ривоҷ дода, дастовардҳои замони соҳибистиқлолӣ, комёбиҳои соҳаҳои ҷомеаро устувору афзун мегардонанд. Дар ин радиф Ҳаким Низомӣ гуфтааст: «Обод бар он, ки гӯяд обод…

Ваҳдат ин сарҷамъӣ ва ҳамгироӣ аст, ки ба мардуми шарифи кишварамон насиб гардидааст. Ваҳдати миллии мо ваҳид аст, ягонаву беназир, бемислу монанд аст. Фазои ваҳдатро ободкориҳову созандагиҳо нуру сафо медиҳанд. Чаро ки миллати мо созанда буда, мардуми мо билкулл ҳунарманду ободкоранд. Мавлоно Ҷомӣ гуфтааст: «Яке ҷӯй, Ҷомӣ, дуҷӯӣ макун, Ба майдони ваҳдат дугӯӣ макун». Мулку сарзамин, манзилу маконро ободу пероста ва хушу гуворо сохтан ин рисолати бузурги мардуми созандаи кишвари маҳбубамон – Тоҷикистон мебошад.

Ба истиқболи 30 – солагии Истиқлоли Ватани маҳбуб дар қаламрави ҷумҳурӣ, аз ҷумла вилояти Суғд бунёди ҳазорҳо иншооти ҷашнӣ ба нақша гирифта шуда, имрӯз дар меҳвари 1300 рӯзи меҳнати зарбдор ба шарафи ҷашни таърихии миллӣ корҳои қиёснопазир ба сомон расонида, даҳҳо ва садҳо иншоот мавриди истифода қарор мегиранд. Бунёдкорони рисолатманд имрӯз, бино ба гуфтаи мутафаккир Муизӣ, «Аз ҳунармандони аср ӯро касе монанд нест, З-он ки ҳаст ӯ аз ҳунармандӣ ба аср – андар ваҳид» шинохта шудаанду ҷойгоҳи ободонии хешро доранд.

Дар доираи амалӣ намудани дастуру супоришҳое, ки аз Паёми навбатии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бармеоянд, бахшида ба ҷашни таърихии миллиамон дар вилоят, маркази шаҳру ноҳияҳои он, ҷамоату шаҳракҳо, минтақаҳои аҳолинишини сарзаминамон, бо истифода аз имкониятҳои молиявӣ, дастгирӣ ва ҳамкориҳои шарафмандонаи соҳибкорони маҳаллӣ, сокинони ҳимматбаланд қатор – қатор иншоот – мактабу бунгоҳҳои тиббӣ, дигар муассисаҳои таълимӣ ва томактабӣ, қасрҳои фарҳанг, варзишгоҳҳо, таъмиру тармими роҳҳо, кашидани хатҳои оби нӯшиданӣ, ҳаммому кошонаҳои ҳусн, сартарошхонаҳо, умуман, он чӣ ки ба мардум даркор асту барои мардум хизмат мерасонад, сохта ба истифода дода шуда, айни замон корҳо дар ин самт ҷараён доранд. Шоири шаҳир Мушфиқӣ гуфтааст: «То ғам нахӯрад кас, нашавад манзиле обод». Яъне ки бино бар талқини Аҳмади Дониш, «Дар асри ӯ доим фарохӣ ва арзонӣ буд, вуфури неъмат ва ободонӣ».

Ваҳдат ободонӣ ва маъмур сохтани ҳаёту рӯзгор, симои кишвар ва пешрафти ҷомеа аст, зеро иқдоми наҷиб ба сӯи ободбум, сарзамини ободон, мулки маъмур, ба тартиб овардан, оростан ва таҷҳизонидан ҳаме нигаронида шудааст.

Дар фазои кишвари аҷдодиамон – Тоҷикистон ҳиссиёти ҳимматбаландӣ, ахлоқу одоби созандагӣ қабат – қабат ба ҷилва меоянду фидокориҳо авҷ мегиранд. Ин ҳама ҳосили Ваҳдати миллӣ ва Истиқлолияти давлатӣ маҳсуб мешаванд.

Ваҳдати миллӣ ва Истиқлолияти давлатӣ ба мисоли як байти ғазали сулҳ ва ҳамдилӣ буда, дар вуҷуди ҳар фард эҳсоси худшиносӣ зам мекунанд, ба имрӯзу ояндаи кишварамон меҳр меоваранд, муҳаббат мебахшанд.

Мардуми худогоҳу сарбаланди тоҷик дарозои бисту се соли Ваҳдати вуҷуду комил ба дастовардҳои беназири иқтисодӣ, иҷтимоӣ, фарҳангиву ватандорӣ комёб гардиданд. Алалхусус, баъди ба даст овардани сулҳ ва ризоияти миллӣ, новобаста аз мушкилот, дар партави сиёсати оқилонаву хирадмандонаи Пешвои муаззами миллат муҳтарам Эмомалӣ Раҳмон мамлакатамон ба марҳала, даври нави рушд ворид шуд.

Ҳадафҳои стратегӣ, мақсадҳои неку башоратовар – таъмини истиқлолияти энергетикӣ, раҳоӣ аз бунбасти коммуникатсионӣ, ҳифзи амнияти озуқаворӣ ба арсаи ҳаёти муосир омаданд, амалӣ гардиданд, ки имрӯз Тоҷикистони азизамон ин неъматҳоро дорост. Ва кунун ҳадафи навбатии чорум – саноатикунонии босуръат пеш меравад, то иқтисодиёти мамлакат боз ҳам рушд ёбад, сатҳи зиндагии шоистаи мардум боло равад.

Рушди саноат, албатта, ба таъкиди мутахассисон ва олимони кишвар, ба нерӯи барқ – энергетика алоқамандии зич дорад. Бинобар он Пешвои муаззами миллат ба бунёд сохтану ба истифода додани неругоҳҳои барқи обӣ дар кишварамон авлавият дода, ҳидоятҳои бунёдӣ намудаанд. Аз ин рӯ, имрӯз ифодаи «Пешвои миллат – Бунёдгузори НБО «Роғун» дар қалбҳоямон чун машъал нурборон аст.

Як лаҳза ба таърих рӯ меоварем: ба шарофати Истиқлолияти давлатӣ ва ба сифати Президенти Ҷумҳурии Тоҷикистон интихоб гардидани шахсияти ватанхоҳу ватандӯст ва худогоҳу худшинос муҳтарам Эмомалӣ Раҳмон масъалаи ҳувияти миллӣ ва эҳё гардидани таърихи куҳан ба ҷойи аввал баромад. Агар ба оинаи таърих назар намоем, равшан таҷаллӣ мешавад: бунёди «Роғун» - соли ҳазору нӯҳсаду сиюм нахустмарҳалаи тарҳрезӣ, солҳои ҳазору нӯҳсаду ҳафтоду чор – тасдиқи лоиҳаи техникӣ аз ҷониби ташкилоти давлатии сохтмони Иттиҳоди Шӯравӣ, ҳафтоду шаш – оғози корҳои омодагӣ, моҳи сентябри соли ҳафтоду шаш оғози бунёд буданд. Ҳамин минвол соли ҳазору нӯҳсаду ҳаштоду ҳафт – оғози бунёди сарбанд, бисту ҳафтуми декабри ҳамон сол бастани маҷрои дарёи Вахш ва соли ҳазору нӯҳсаду наваду се – ба чиҳил метр расонидани баландии сарбанд ва кандани бисту як километри нақб сабт гардидааст.

Ниҳоят, бо иқдом ва ташаббуси Пешвои муаззами миллат муҳтарам Эмомалӣ Раҳмон бисту шашуми сентябри соли дуҳазору панҷ оғози расмии корҳои барқарорсозии НБО «Роғун» дар саҳифаи ҳаёти Тоҷикистони соҳибистиқлол сабт шуд. Барои ба ҳадаф расидан ва иҷрои мақсадҳои наҷиб бар манфиати халқу давлат Президенти маҳбубамон борҳо ба Роғун рафтанд. Аз ҷумла, сиюми майи соли дуҳазору ҳашт сафари кории Сарвари давлат муҳтарам Эмомалӣ Раҳмон ба шаҳри Роғун ба вуқӯъ пайваст ва Пешвои муаззам бо коргарони «Роғун» мулоқот намуданд. Ва инчунин бисту ҳаштуми октябри соли дуҳазору нӯҳ сафари навбатии Сарвари давлат ба шаҳри Роғун ва шиносоӣ бо рафти корҳои сохтмонӣ, суҳбат бо бинокорони неругоҳ доир гардид.

Воқеаи басо хотирмону таърихӣ рух дод: соли дуҳазору даҳ шартномаи байни Ҷумҳурии Тоҷикистон ва Бонки ҷаҳонӣ барои ташхиси байналмилалии лоиҳаи НБО «Роғун» ба имзо расид. Дар саҳифаҳои таърихи Тоҷикистони соҳибистиқлолу ваҳдатобод рӯзҳое навишта шудаанд, ки эътимод ба ояндаи дурахшон мебахшанд. Даҳуми июли соли дуҳазору дувоздаҳ сафари кории Президенти маҳбубамон ба шаҳри Роғун доир шуд ва Пешвои миллат аз НБО «Роғун» боздид ба амал оварданд. Баъдан, рӯзи понздаҳуми июли соли дуҳазору понздаҳ сафари навбатии Пешвои миллат ба шаҳри Роғун ба вуқӯъ пайваст ва Президенти мамлакат бо ҷараёни корҳои сохтмонӣ шинос шуданд.

Санаи чоруми августи соли дуҳазору шонздаҳ Сарвари давлат муҳтарам Эмомалӣ Раҳмон бо сафари корӣ дар шаҳри Роғун қарор дошта, бо рафти корҳо, ҷараёни бунёду сохтмонии НБО «Роғун» шиносоӣ пайдо намуданд.

Рӯзи дигар - панҷуми августи ҳамон сол Пешвои миллатамон аз мавзеи сохтмон боздид намуда, бо бунёдгарони неругоҳ вохӯрӣ доир карданд, ки басо хотирмону воқеан ҳам таърихӣ буд. Боз дар тақдири миллату мардуми тоҷик меваҳои Истиқлолу Ваҳдати миллӣ шаҳд бахшиданд. Рӯзи таърихӣ ва лаҳзаҳои тақдирсоз пеш омаданд: бисту нӯҳуми октябри соли дуҳазору шонздаҳ бастани пеши дарёи Вахш ва оғози бунёди сарбанд бо иштироки Пешвои миллат муҳтарам Эмомалӣ Раҳмон басо пуршукӯҳу ифтихормандона амалӣ шуд ва ин манзара воқеан ҳам чун шаҳодати худшиносиву ватандорӣ нақш дошт.

Саҳифаҳои таърихи замони соҳибистиқлолиро равшану меҳрбор мехонем: даҳуми маи соли дуҳазору ҳафтдаҳ сафари кории Сарвари давлатамон ба «Роғун» ва мулоқоташон бо бунёдкорон, шиносоиашон бо ҷараёни корҳои сохтмонӣ ҳаққо, ки саодатовару файзбахшу ҳувияту фурӯғбахш буданд. Ҳамин тавр, сафари кории навбатии Сарвари давлат муҳтарам Эмомалӣ Раҳмон рӯзи бисту шашуми июли соли дуҳазору ҳаҷдаҳ низ ба «Роғун» ва мулоқоташон бо бинокорон ва шиносоиашон бо ҷараёни корҳои сохтмонӣ чунин манзару чунин маънӣ дошт.

Рӯзҳои сенздаҳ ва чордаҳуми ноябри соли дуҳазору ҳаҷдаҳ маросими супурдани мукофотҳои Бунёдгузори НБО «Роғун» муҳтарам Эмомалӣ Раҳмон ба бисту ду ҳазор бунёдкори «Роғун» доир шуд, ки аз ҷониби Сарвари давлат тақдим гардиданд.

Мегӯянд, ки «аз дил хуш аст меваи сабру таҳаммулро чашидан». Рӯзи мубораку неку бахосият фаро расид: - шонздаҳуми ноябри соли дуҳазору ҳаҷдаҳ воқеан ҳам таърихӣ буд, агрегати аввалини Неругоҳи барқи обии «Роғун» бо иштироки Пешвои муаззаму маҳбубамон тантанавор, пурнусрату пурсурур ба истифода дода шуд.

Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар маросими оғози кори агрегати якуми Неругоҳи барқи обии «Роғун» суханронӣ намуданд. Аз ҷумла изҳор намуданд: «Мо амиқан дарк мекардем, ки «Роғун» омили муҳимтарини пешрафти иқтисодиву иҷтимоии кишвар, зиндагии осудаи мардум, яъне ояндаи ободи Тоҷикистони маҳбубамон мебошад».

Оре, «Роғун» бо истифода аз манбаи таҷдидшавандаи истеҳсоли неру ва барқи аз лиҳози экологӣ тозаи худ ба ҳамаи кишварҳои минтақа хизмат карда, обанбори он барои танзими захираи об, хусусан, дар солҳои камобиву хушксолӣ нақши бузург мегузорад.

Неругоҳи «Роғун» кохи бузурги нури миллат аст. Санаи 9-уми октябри соли 2019 Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади иштирок дар маросими ба кор даровардани агрегати дуюми Неругоҳи барқи обии «Роғун» ба шаҳри Роғун ташриф оварданд. Сарвари давлатамон дар маросими ифтитоҳи агрегати дуюми НБО «Роғун» суханронӣ намуданд.

Аз ҷумла, зимни суханронӣ Пешвои муаззами миллат таъкид намуданд: «Роғун» ояндаи ободи халқи тоҷик, сари баланду рӯи сурхи ҳар фарди Ватан ва кафили болоравии нуфузу обрӯи давлати озоду соҳибихтиёри тоҷикон аст».

Тоҷикистони биҳиштосои мо роҳи сафеду иқболи баланд дорад. Ва «Роғун» барои мардуми шарафманди Тоҷикистон сохтмони сарнавиштсоз, майдони нангу номус ва ҷабҳаи заҳмати ҷавонмардона мебошад. Дар радифи ин сулҳу оромӣ, суботи сиёсӣ ва Ваҳдати миллӣ дар Ватани маҳбубамон – Тоҷикистон пояндаву абадӣ бод!

Мухтори АБДУЛЛО,

Файзулло АТОХОҶАЕВ,

«Ҳақиқати Суғд»

Читать далее