June 2020

24 June 2020

РИЗҚИ ДЕҲҚОН ДАР ЗАМИН

Аҳли оилаи иҷоракор Гулрухсор Обидова соли гузашта дар 2,5 гектар пахтаи навъи «Ориёӣ» кишта, аз ҳар гектар 27-сентнерӣ, қариб ҳафт тонна ҳосили хушсифат рӯёниданд. Соли равон пунбаи навъи «Хуҷанд – 67» кишт намуда, ният доранд, наздик ҳашт тонна «тиллои сафед» ба даст оранд.

Гулрухсор аз соли 1999 дар хонаи саломатии деҳаи Ғалчамулло чун ҳамшираи тибби оилавӣ фаъолият дорад. Аммо муҳаббат ба замин ӯро водор намуд, ки ин шуғлро идома бахшад. Дар оилаи шавҳараш Ҳакимҷон Обидов ҳама луқмаи хеш аз замин мерӯёниданд. Аҳли оила қарор доданд, 2,5 гектар заминро аз ҷамъияти саҳҳомии ба номи Энаҷон Бойматова ба иҷора гирифта, бо кишоварзӣ машғул шаванд.

- Дар 70 садяк замини иловагӣ 55 бех ниҳоли зардолуҳои хушсифат дорем ва ҳамасола зери он барои таъмини рӯзгор маҳсулоти полезӣ низ кишт менамоем. Замин ҳаргиз инсонро бенасиб намемонад. Гандуму мошу лӯбиё, помидору бодиринг ва боимҷони хушсифату лазиз барои захираи зимистон низ кифоят мекунад.

- Аз оилаи мо касе ба муҳоҷират намеравад, рӯзиамонро аз замин меёбем. Дар ҳоле ки бисёре аз атрофиён бекоранд, дарёфти коргарони кироя мавсими ягонакуниву ғунучини ҳосил амри маҳол аст. Бо вуҷуди оне ки музди меҳнаташонро саривақт ба даст мегиранд, майли коркунӣ надоранд, - мегӯяд Гулрухсор.

Чӣ хуб мешуд, он занони хонашин, ки тамоми бори зиндагиро бар дӯши мардон партофтаанд, ин ҳикматро ҳалқаи гӯш мекарданд:

Рӯзӣ насиби кас ба

нишастан намешавад,

Бояд чу осиё зи пайи

обу дона рафт.

Фирӯзаи АБДУЛАЗИЗ,

шаҳри Конибодом

Читать далее

ПОЙДОРИИ СУБОТИ ҶОМЕА АЗ ВАҲДАТ АСТ!

Бинои кӯҳнаи идораи рӯзномаи «Ҳақиқати Суғд». 27-уми июни соли ҳазору нӯҳсаду наваду ҳафт. Ҳама қаламкашон интизор нишастаем. Мо, кормандони рӯзнома натиҷаи ҷаласаеро, ки дар Маскав бо иштироки Президенти мамлакат муҳтарам Эмомалӣ Раҳмон ва гурӯҳи мухолифин баргузор шуда истодааст, нигаронем. Саҳифаи аввали рӯзномаро низ бо ҳамин мақсад боздоштаем. Он замон як толори на он қадар калоне доштем, ки ба номи яке аз журналистони соҳибқалам Қурбон Баҳлулзода номгузорӣ шуда буд.

Эҷодкорон дар ҳамин толор масъалаи мазкурро муҳокима дорем. Пас аз нисфирӯзии он замон котиби масъули рӯзнома, шодравон Исроилҷон Исмоилов «Ҳой, хушхабар! Ҳой, хушхабар! Шодиёнаро омода созед!» - гӯён вориди толор шуданд ва мо низ баробари он кас хурсандӣ намудем. Зеро ин ҳам аз зумраи мулоқотҳое буданд, ки Сарвари давлат бо гурӯҳи мухолифин дар кишварҳои дигар меоростанд. Мо ҳама натиҷаи онро чашминтизор будем. Инак, он соат фаро расид…

Инак, бисту се сол аст, ки дар фазои сулҳу амонӣ ва ваҳдату ҳамдигарфаҳмӣ умр ба сар мебарем. Тӯли ин солҳо ба бисёр комёбиву дастовардҳо ноил гардидем.

Албатта, ҳамаи ин дастоварду муваффақиятҳо ба осонӣ ба даст наомадааст. Дар ин муддат буданд солҳову моҳҳое, ки мо шабонарӯз дар навбати нон меистодем, ки дар байнамон калонсолону ҳомиладорон низ буданд.

Ҳоло бошад, дар бозорҳо нонҳои болаззату орди навъҳои гуногун фаровонанд ва заводу сехҳои ордбарорӣ соле тоннаҳои зиёди ордро пешкаши мардуми тоҷик мегардонанд.

Мо, кормандони эҷодии нашрияҳои маркази вилоят дар ҳар гӯша манзил гирифта будем. Алҳол аз соли ду ҳазору ёздаҳум инҷониб бо фотеҳаи Пешвои муаззами миллат дар ин Кохи боҳашамат муттаҳид гашта, ба эҷод машғулем.

Ҳамчунин, аксар биноҳои муассисаҳои табобатӣ ва таълимӣ фарсудаву дар баъзе деҳоти ноҳияҳо толибилмон дар хонаҳои истиқоматӣ таҳсил доштанд, яъне хонаҳои истиқоматӣ бинои муассисаҳои таълимиро иваз мекарданд. Бо мурури замон он ҳам бартараф гардид. Алҳол дар ҳудуди вилоят 547 ҳазору 925 толиб-илм дар 929 муассисаҳои таълимии дорои шароити муосир таҳсил доранд.

Чунин иқдоми шоиста дар муассисаҳои табобатӣ низ сурат гирифт. Метавон гуфт, то солҳои дуҳазорум аксар гирифторони бемории вазнин ва ба ҷарроҳӣ ниёздошта ба табобатгоҳҳои бурунмарзӣ муроҷиат менамуданд ва бо сарфи маблағҳои зиёд саломатии хешро барқарор месохтанд. Бо ҷонибдории Ҳукумати Ҷумҳурии Тоҷикистон ва Асосгузори сулҳу ваҳдати миллӣ ин масъала низ то қадри имкон ҳалли худро ёфт.

Аксар биноҳои табобатӣ дар шаҳру навоҳии вилоят навбунёданд ва ё қомат афрохта, бо таҷҳизоти муосири табобатӣ муҷаҳҳаз гардида истодаанд. Имрӯз ҷарроҳиҳои мушкил дар шуъбаҳои беморхонаҳои ҷумҳурӣ сурат гирифта, мутахассисони варзида бо маҳорати хоса амалиётро анҷом медиҳанд.

Солҳои аввали соҳибистиқлолӣ на танҳо соҳаҳо футур рафта буданд, инчунин аксари биноҳо, новобаста аз мансубият ба соҳаҳо ва ҳавлиҳои истиқоматӣ низ ҳолати садамавӣ доштанд ва ё умуман ба хок яксон гардида буданд. Бо гузашти айём биноҳои замонавии дорои хусусияти гуногун қомат афрохта, ба ин васила тарҳи шаҳру ноҳияҳо ба куллӣ тағйир ёфт. Дар қатори дигар иншоот майдони Парчами давлатӣ дар аксар шаҳру навоҳии вилоят қомат афрохта, бори дигар инсониятро ба сулҳу дӯстӣ, ваҳдату ҳамдигарфаҳмӣ ҳидоят менамояд. Чанде пас сохтмони майдони Парчами давлатӣ дар даромадгоҳи Ҷамоати деҳоти Хистеварзи ноҳияи Бобоҷон Ғафуров ба анҷом хоҳад расид, ки масоҳати он 0,45 гектарро фаро гирифта, баландии пояи Парчам 50 метрро дар бар мегирад. Дар ҳамин мавзеъ инчунин бо ташаббуси соҳибкори маҳаллӣ Абдусамеъ Раҳмонов дар масоҳати 0,30 гектар Маркази хизматрасонӣ ба истифода дода хоҳад шуд, ки он аз чор ошёна иборат аст. Умуман, ба истиқболи ҷашни бузурги тоҷикон - Ваҳдати миллӣ ва 30-солагии Истиқлолияти давлатӣ дар як деҳаи Хистеварзи ноҳияи Бобоҷон Ғафуров беш аз сад иншооти таъиноташ гуногун ба истифода дода хоҳад шуд, ки қисме аз он аз ҷониби соҳибкорони маҳаллӣ ва ё бо қувваи сокинон бунёд мегарданд.

Наздик се даҳсолае, ки даврони соҳибистиқлолии кишварро мо паси сар карда истодаем, ба бисёр дастовардҳо ноил гардида, чанд Барномаҳои миллии бахши гуногун таҳия ва амалӣ шуда, чор ҳадафи стратегии миллӣ нишонрас гардида, аз шаш ду агрегати Неругоҳи барқи обии «Роғун» ба истифода дода шуд, ки «он орзуи чандинсолаи мардуми шарифу заҳматқарини тоҷик» буда, «қадами устувору бузурги кишвари мо дар самти расидан ба ҳадафи якуми стратегии миллӣ – истиқлолияти энергетикӣ» мебошад.

Ҳамаи ин ва дигар дастовардҳо боиси ифтихор ва сарбаландӣ буда, эҳсоси ватандории мо - тоҷиконро бори дигар собит месозад. Чанде пеш масъалае, ки тӯли беш аз ду даҳсола мушкиливу муаммоҳои худро доштанд, ҳалли худро ёфт. Рӯйдоди таърихие, ки барои ҳаёти иҷтимоиву иқтисодӣ ва маънавии мардуми тоҷику ӯзбек муҳим буд, ин ба имзо расидани созишномаи шарикии стратегии байни кишварҳои Тоҷикистону Ӯзбекистон мебошад.

Дар ин радиф оид ба ободонӣ ва сарсабзии диёр, беҳ гардидани вазъи иҷтимоиву иқтисодии давлат мисолҳо зиёданд, ки наметавон ҳамаи онро дар як пора мавод овард. Аммо тавре Пешвои муаззами миллат таъкид медоранд: «Мо ба мақсадҳои олии худ - таҳкими дастовардҳои Истиқлолияти кишвар, таъмини рушду нумӯи давлатдории миллӣ, амнияти давлат ва миллат, пойдории сулҳу субот, пешрафти иқтисодиёту татбиқи ҳадафҳои марҳалаи созандагӣ, беҳбуди зиндагии мардум ва ҳалли даҳҳо масъалаҳои дигари ҳаётӣ танҳо бо роҳи сулҳу ваҳдату дӯстӣ расида метавонем».

Тавҳида ҶӮРАЕВА,

«Ҳақиқати Суғд»

Читать далее

23 June 2020

Таджикистан в семь раз увеличил экспорт драгметаллов и камней

Таджикистан увеличил экспорт драгоценных и полудрагоценных камней и металлов с начала текущего года.

Читать далее

22 June 2020

Муроҷиатномаи Раиси вилоят вобаста ба масъалаҳои пешгирӣ аз интиқолу паҳншавии бемории сироятии COVID – 19

Ҳамдиёрони азиз!

Бо назардошти ба эътидол омадани вазъияти паҳншавӣ ва интиқоли бемории сироятии коронавирус, тибқи қарори ҷаласаи Ситоди ҷумҳуриявӣ аз санаи 17-уми июни соли равон, оид ба пурзӯр намудани чораҳои зиддиэпидемиявӣ ва пешгирӣ аз интиқолу паҳншавии бемории сироятии COVID – 19 аз 20-уми июни соли 2020 дар ҷумҳурӣ барои гузаронидани тӯйи хонадоршавӣ муваққатан дар доираи то сад нафар даъватшуда ва танҳо як маърака дар маҳалли истиқомат ё дигар муассисаҳои хизматрасонӣ, аз ҷумла тарабхонаю ошхонаҳо, тӯйхона ва чойхона бо риояи ҳатмии қоидаҳои санитарию гигиенӣ иҷозат дода мешавад.

Читать далее

Думбардории ташкилоти ифротиву иғовагару бӯҳтонсоз

Дирӯз тариқи яке аз сомонаҳои иҷтимоӣ навиштаҳои Муҳаммадиқболи Садриддинро мутолиа намуда, басо дар шигифт шудам. Пеш аз ҳама аз номи мардуми меҳанпарвару меҳнатқарини ноҳияи Мастчоҳ овардани суханҳояш нафрати маро боло бурд. Ҳамагон огаҳем, ки сокинони сарбаланди ноҳия қарнҳои қарн бо ҳисси матонату мардонагӣ, заҳматкашиву меҳнатдӯстии хеш доимо дар сафи аввали майдони корзору ободиву созандагии диёр буданду ҳастанд. Бо тақозои касби хеш соле чанд маротиба озими ноҳия гаштаву ҳар навбат рӯз аз рӯз аз ободониву бунёдшавии иншооту мавзеъҳои мухталифи он меболам. Дар суҳбатҳо бо мардуми оддиву пирони рӯзгордида, роҳбарону масъулини сохторҳои мухталиф бо як овоз бо чашми сар медидам, ки хурду бузурги ноҳия аз пешрафту рушди соҳоти гуногун бо болидагиву изҳори қаноатмандӣ ҳарф мезананду ифтихору шукрона аз даврони осоиштагӣ менамоянд.

М.Садриддин дар навиштаҳояш дар бобати масъалаҳои гуногун, аз ҷумла, сироятёбии бемории коронавирус, маблағи барқу андоз, кушодашавии як иншоот басо муҷмалу бе овардани далел бӯҳтонҳое овардааст, ки гумон мекунам, аксари он асоси воқеӣ надоранд.

Агар дар бобати масъалаи сироятёбӣ аз бемории коронавирус гирем, ҳамагон огаҳанд, ки беш аз 6 моҳ аст, ки ин беморӣ тамоми давлатҳои ҷаҳонро фаро гирифтаву басо оқибатҳои нохушро рӯй овард. Охири моҳҳои апрелу май ин беморӣ дар кишвари мо низ доман паҳн кард. Қайд кардан бамаврид аст, ки аз рӯзҳои оғози пандемия таҳти сарварии Пешвои муаззами миллат ва роҳбарияти вилоят табибону масъулини соҳаи тандурустӣ бо эҳсоси масъулияти баланди касбӣ барои ташхис ва табобат малакаву маҳорати хешро нишон доданд. Албатта, ба ҳамаи ин нигоҳ накарда, пайомадҳои фоҷиабор низ буданд, вале ин офатест, ки ҷойи гурез нест ва инро касе намехосту дар хоби даҳшатовар низ надида буд. Дар он рӯзҳо бо ташаббус ва дастгирии саривақтии Пешвои муаззами миллат бо мақсади дастгирии иҷтимоию иқтисодии табибон ва нафароне, ки ба бемории нави коронавирус «COVID-19» гирифтор шудаанд, кӯмакҳои моддӣ иборат аз 140 мошини пурбор ба шаҳру ноҳияҳои вилояти Суғд дастрас карда шуд. Дар ин замина ба кулли кормандони соҳаи тандурустии ноҳияи Мастчоҳ низ кӯмакҳои яквақтаи Пешвои муаззами миллат аз қабили маводи хӯрокворӣ - равған, биринҷ, шакар, мош, нахӯд, сабзӣ, картошка, пиёз ва маҷмӯи беҳдошти тиббиву маводҳои доруворӣ дастрас шуданд, ки онро нодида гирифтан нашояд. Дар баробари ин соҳибкорони ватанӣ ва ҳамзамон ҳар як сокини кишвар бо масъулияти том ин рузҳоро паси сар карда истодаанд. Шукрона, ки алҳол таъсири ин беморӣ нисбат ба рӯзҳои аввали сар задани он камтар шудаву ҳар фард дар кардааст, ки пайомади он аз худи шахс вобаста аст.    

Воқеан, Тоҷикистони соҳибистиқлол, ки соли оянда ҷашни миллии 30 солагии худро қайд хоҳад кард, дар таърихи худ басо рӯзҳои вазину фоҷиаборро аз сар гузаронид. Мардуми ноҳия дар ин набардҳои нохалафон ва набардҳои мухталифи зиндагӣ ҳамеша бо шуҷоатмандиву садоқатмандии худ дастболо буд.

Мастчоҳиёни боғуруру сарбаланд барои ҳифзи дастовардҳои Истиқлолият ҳеҷ чизро дареғ намедоранд. Дар пайи ободии зодгоҳ ва Ватани худ ҳастанд, дар роҳи таҳкими Ваҳдату ҳамбастагӣ сидқан саъю талош меварзанд. Бо Пешвои худ ифтихор доранд ва қадри заҳматҳои нотакрору таърихофарини ин марди бузургро медонанд. Даҳсолаҳост, ки баъзе аз давлатҳои ҷаҳон, аз қабили Сурия, Ливия ва дигар аз вартаи ҷангу ҷаҳолат раҳоӣ ёфта наметавонанд. Яке аз дастовардҳои намоёни Пешвои миллат сулҳи тоҷикон аст, ки худ аз худ ба даст наомадаст.  

Аз тарафи Суди Олии Ҷумҳурии Тоҷикистон фаъолияти ташкилоти террористиву экстремистии ҳизби наҳзати ислом дар қаламрави кишвар манъ карда шудааст. Вале фаъолону пайравон, думбардорони ин ташкилоти ифротиву иғовагару бӯҳтонсоз дар хориҷа истода, ба қавле «ғарқшудаистода аз коҳу хас халосӣ меҷӯяд» дастовардҳои замони соҳибистиқлолии Ватанамонро дида натавониста, ҳар гуна тӯҳмату иғвоҳои ноодамӣ, ғайриинсониро дар вуҷуди худ мебинанду мегӯянд, ки носипосиву кӯрнамакии маҳз аст.

М.Ҳалимзода

«Ҳақиқати Суғд»

Читать далее

Амалишавии ҳадафҳо - таҳкимбахши рӯзгори шоиста

 

Истиқлолият ва ваҳдати миллӣ роҳи ҷомеаи муосиру миллати тамаддунсози тоҷикро ҳамчун машъал дар партави сиёсати хирадмандонаи Пешвои миллат, Президенти маҳбубамон муҳтарам Эмомалӣ Раҳмон мунаввару сафобахш гардонда, хадафҳои имрӯзу ояндаи миллат ва пешрафти минбаъдаи кишвари азизамонро ба сӯи ҷомеаи демократӣ, ҳуқуқбунёд ва дунявӣ устувору башоратовар намуд.

Нишондиҳандаҳои иқтисодӣ, иҷтимоӣ, фарҳангии кишварамон пайваста аз сиёсати оқилонаву мардумпарваронаи пешвои муаззам сарчашма мегиранд. Биноан нуктаву муҳтавои Паёми ҳарсолаи Пешвои миллат ҳамчун оинаи барқаду гӯё роҳу равиш, ҳар иқдому муваффақиятҳоро равшану ҷаззоб бозгӯй мегардад. Аз ин лиҳоз факту рақамҳои бунёдии паёми навбатии Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон моро уҳдадор менамоянд, ки самтҳои ҷадиду дурнамои ҳаёти ҷомеаи муосирамонро бо дили поку ақли солим эҳсос намоем, ба роҳбарии фаъолияти ҳаррӯзаи ҳадафманд бигирем.

Аз ҷумла, Пешвои муаззами миллат дар Паёми саодатбори навбатиамон таъкид доштанд, ки  дар ҳафт соли охир рушди иқтисодиёти кишвар ҳамасола ба ҳисоби миёна дар сатҳи 7 фоиз таъмин гардида, маҷмӯи маҳсулоти дохилӣ аз 45,6 миллиард сомонӣ ба 78 миллиард сомонӣ афзоиш ёфтааст.

ҳамзамон, дар ин давр ҳаҷми умумии даромади буҷет қариб ду баробар афзуда, аз 12 миллиард сомонии соли 2013 ба 23 миллиард сомонӣ баробар гардидааст.

Тайи солҳои зикршуда даромади пулии аҳолӣ беш аз ду баробар ва музди меҳнати миёнаи як корманд 2,4 баробар афзоиш пайдо кард.

Сатҳи камбизоатӣ ба 27,5 фоиз паст шуда, дарозумрии миёнаи шаҳрвандон то 75 сол боло рафт.

Ҳамзамон, бо ин, тибқи таҳлилҳо дар замони соҳибистиқлолӣ нишондиҳандаи умумии фавт қариб ду баробар, аз ҷумла фавти кӯдакони синни то панҷсола 3,2 баробар кам шудааст. Дар давоми 7 соли охир аҳолии Тоҷикистон аз панҷуним миллион қариб ба 9,5 миллион нафар расида, беш аз 70 фоиз афзудааст.

Саҳми бахши хусусӣ дар маҷмӯи маҳсулоти дохилӣ соли 2013-ум 54 фоиз буд ва ин нишондиҳанда соли 2019 ба 70 фоиз расонида шуд. Яъне нишондиҳандаҳои дар соли 2013 пешбининамудаи барномаи номзад ба Президенти кишвар барои 7 сол, дар маҷмӯъ, иҷро гардидаанд.

Пешвои муаззами миллат муҳтарам Эмомалӣ Раҳмон зимни ироаи Паёми навбатӣ ба Маҷлиси Олии Ҷумҳурии Тоҷикистон ҳукумати кишварро вазифадор намуданд, ки минбаъд ба ҷанбаҳои сифатии рушди иқтисоди миллӣ, тақвияти нерӯи инсонӣ, бо истифода аз технологияҳои муосир ва ҷорӣ намудани инноватсия вусъат додани истеҳсоли маҳсулоти ниҳоӣ, баланд бардоштани фаъолнокии иқтисодии аҳолӣ, такмили низоми дастгирии соҳибкориву сармоягузорӣ ва тавсеаи иқтисодиёти рақамӣ диққати аввалиндараҷа диҳад.

Ин вазифаҳои муҳим низ дар баробари амалишавии ҳадафҳои стратегии мамлакат татбиқ гардида, боварӣ дорем, ки Тоҷикистони азизи мо боз ҳам ободтар ва сатҳи зиндагии мардуми кишвари соҳибистиқлоламон баландтар мегардад.

Ин ҳама дастоварду комёбиҳои давлату миллат, беҳтар шудани сатҳи зиндагии мардумро нодида гирифтан, шукри осоиштагӣ ва тинҷиву амонӣ накардани баъзе ашхос аз ғаразу носипосӣ ба ин миллату сарзамин буда, нишони курдилӣ ва душманӣ бо худу бо миллати хеш аст!...

 Мухтори Абдулло,
сармуҳаррири рӯзномаи вилоятии
«Ҳақиқати Суғд» 

 

Читать далее

ЗАБОН БА БАД НАСПАРЕМ

Тариқи сомонаи интернетии фейсбук паҳн гардидани навиштаҳои Муҳаммадиқболи Садриддин, ки «Масчоба мурам» унвон дорад, ба гумонам ҳар нафари худогоҳи миллатро бетараф гузошта наметавонад. Зеро аз хориҷи кишвар истода садо баланд кардани нафаре, ки дур аз Ватан қарор дошта, бар хилофи меҳану миллати худ сухан мегӯяд, ноҳурматӣ ба Ватан аст.

Мо бояд донаем, ки мафҳумҳои миллат, Ватан, муқаддасоти миллӣ, арзиши зеҳнӣ, фарҳанги миллӣ, осор, хотира ва расму ойини таърихӣ, Ваҳдату Истиқлолият арзишҳои олии миллати мо мебошанд. Ва ҳамагонро лозим аст, ки ба ин арзишҳо эҳтиром гузоранд. Таърихи тамаддуни башарӣ шаҳодат медиҳад, ки худшиносӣ ва ифтихори миллии аҳли кишвар, бахусус, ҷавонон пойдевор ва асли бақои миллат аст.

 Мардуми мамлакат ва махсусан ҷавонон ояндаи миллат ва кишвари азизамон Тоҷикистонанд, аз ин рӯ, бояд афкору андешаи солим дошта бошанду дар азхуд кардани илму дониш бикӯшанд ва нерӯи худро баҳри рушду нумӯи меҳани худ масраф намоянд.

Хушбахтона, имрӯз дар кишварамон тинҷиву осудагӣ ва сулҳу субот ҳукмфармо буда, дастовардҳои мамлакат барои кулли мардум аз ҷонашон ҳам азизтар аст.

Агар тоифае аз мардум дар мисоли Муҳаммадиқболи Садриддин воқеан миллатдӯсту ватанпарвар мебуданд, бо назардошти риояи маърифати баланди гузаштагонамон дар як кишвари бегона истода, боз забон ба бадномкунии ҳамватанони хеш намекушоданд.

Бешак, онҳо боз нияти пиёда кардани нақшаҳои навбатии худро доранд, ки ин нақшаҳояшон, ки дар ҳамкорӣ бо душманони хориҷии миллату мамлакатамон тарҳрезӣ шудаанд, ба миллату Ватан ба ҷуз бадбахтӣ чизе намеоваранд.

Шоира Салимова,
Ҳақиқати Суғд

Читать далее

СУХАНИ ДУРӮҒ БА ХОТИРИ ЧИСТ?!

Имрӯз шабакаҳои интернетӣ, алалхусус, фейсбук барои баъзе нафарон минбари озоди «бадномкунӣ» гардидааст. Оё нафаре, ки имрӯз Ватани худро бо суханҳои бардурӯғ олуда месозад ба халқ заррае манфиат меорад?

Ин гуна ашхос танҳо аз ҷойи нишасти худ метавонад бо суханҳои бофтаву хаёлӣ ҳарф зананд. Аввалан, мебояд ба тарзи дурусти навишт ва саводи онҳо аҳамият дод. Дувум ин аст, ки имрӯз на танҳо Ҷумҳурии Тоҷикистон, балки тамоми ҷаҳонро вабо бо номи «коронавирус» фаро гирифтаасту ҳама ба таври зарурӣ пеши роҳи онро ҷуста истодаанд.

Барои табобат кардани беморӣ на танҳо ҳукумат, балки тамоми мардум вазифадор аст, зеро агар дақиқ назар афканем бароямон равшан мешавад, ки на ҳама сокинони кишвар риояи беҳдошти санитарию гигиениро ба ҷо меоранд. Баъзеҳо дидаву дониста дар ҷойҳои ҷамъиятӣ, алалхусус, бозору мағозаҳо ва мавзеъҳои фароғатӣ бидуни ниқоб ва маҳлулҳои антисептикӣ гаштугузор мекунанд. Дар ин ҷода киро мо бояд гунаҳкор созем? Ҳукумат ва ё шахсе, ки саломатии худ ва дигаронро зери хатар мегузорад?

Дар бобати табобати беморони гирифторӣ ба коронавирус ҳаминро бояд таъкид кард, ки дар вилоят он ба таври зарурӣ ба роҳ монда шудаасту беморон шифо ёфта, ба манзилҳои худ баргашта истодаанд. Агар ба суханони бардурӯғи иғвогарон аҳамият диҳем пас метавонем тинҷиву оромиро аз даст диҳем! Дар ин радиф меҳнати шабонарӯзии роҳбарияти вилояту шаҳр ва кормандони тибро қадр кард. Нафаре, ки ба коронавирус гирифтор шудааст ҳатман ба беморхона ҷойгир карда мешавад. Танҳо он нафароне, ки ба зукоми мавсимӣ ё дигар бемории сабук гирифтор шудаанд, барои сироятнаёфтан дар манзилҳояшон табобат гирифта истодаанду аз вазъи саломатии чунин ашхос ҳамарӯза кормандони тиб огоҳ мешаванд.

Дар расонаи иҷтимоӣ Муҳаммадиқболи Садриддин дар мавзуи «Мастчоҳба мурам…» дарҷ кардааст, ки дар он шаъну шарафи роҳбарият ва халқи сарбаланди ин ноҳия сухан рафтааст. Боиси таассуф аст, ки дар он суханҳои бофтаву хаёлӣ ва бардурӯғи фитнаангез гуфта шудааст. Мардуми меҳнатқарини ноҳия мекӯшанд, диёри хешро аз ҳар ҷиҳат ободу зебо гардонида, барои сокинонаш шароити хуби зиндагониву кориро муҳайё намоянд. Муаллиф то андозае «суханбозӣ» кардааст, ки кас пас аз хондани маводи чопшуда ноҳияи Мастчоҳро ба макони ноободу хароб ва аз назарҳо дурмонда тасаввур мекунанд, ки ин хатои маҳз аст! 

Чанд боре, ки ба ин ноҳия сафар кардам, боре рӯҳафтодагии мардум ба чашм нарасид. Баръакс онҳо ҳама баробар баҳри пешрафт ва гулгулшукуфоии макони зист камари ҳиммат бастаанд. Қомат афрохтани хонаҳои истиқоматӣ, марказҳои савдову тарабхона ва дигар иншооти ҳаётан муҳим бори дигар собит месозад, ки ҳама бо дили поку нияти нек шарафмандона меҳнат карда истодаанд.    

Имрӯз дар Ҷумҳурии Тоҷикистон иншооти мухталиф сохта ба истифода дода мешавад.  Ҳама соҳа, мактабу кӯдакистон, беморхонаву марказҳои саломатӣ, марказҳои савдо ва тарабхонаву дигар иншооти зарурии хурду бузург барои сокинони кишвар хидмат мекунад.

Ш. СИДДИҚ,

«Ҳақиқати Суғд»

Читать далее

РУШДИ БОСУБОТ АЗ ВАҲДАТ АСТ!

Ваҳдат чун рукни басо муҳими сиёсати давлатӣ шинохта шудааст. Аз ин рӯ, бояд дар муҳтавои маводи таълим ваҳдати миллӣ мавқеи устувор пайдо намояд. Ваҳдат дар саҳнаи ташаккули ормонҳои миллӣ ва давлатдорӣ нақши асосиро мебозад. Ваҳдат беҳтарин василаест барои баланд бардоштани ҳисси ватандорӣ, ватанпарастӣ, худшиносӣ, арҷ гузоштан ба суннатҳои миллӣ. Халқи куҳанфарҳанги тоҷик ҳамеша тарафдори сулҳу ваҳдат буданд ва хоҳанд монд. Шукронаи даврони Истиқлолият ва Ваҳдати миллӣ, ки дар Тоҷикистон сулҳу ободӣ пойдору мамлакат шукуфон аст.

Чунин дастовардҳои рӯзафзунро дар даврони Истиқлолият ва Ваҳдати миллӣ дар ноҳияи Ҷаббор Расулов низ мушиҳида намудан мумкин аст. Бино ба гуфти мудири шуъбаи рушди иҷтимоӣ ва робита бо ҷомеаи дастгоҳи Раиси ноҳия Султонзода Бахтиёр Султон, дар ноҳия корҳои бунёдкориву созандагӣ, чароғонкунию мумфаршкунӣ, азнавсозӣ ва кабудизоркунӣ бо маром идома доранд. Дар давоми ду соли охир дар ҳудуди ноҳия ва ҷамоатҳои шаҳраку деҳот, кӯчаву маҳаллаҳо мунтазам мумфарш ва чароғон гардиданд. Ҳамчунин, кушодашавии толорҳо ва майдончаҳои варзишӣ бо дастгирии мақомоти иҷроияи ҳокимияти давлатии ноҳия, шахсони саховатпеша ва сокинони маҳаллаву деҳаҳо дида мешавад. Бисту се сол инҷониб дар Тоҷикистони соҳибистиқлол сулҳу сафо ҳукм меронад, хуршеди оламоро сарзамини тоҷикони ваҳдатсарову сулҳофарро нурборон мекунад.

Боиси зикр аст, ки дар давоми солҳои 2018-2019 дар ноҳия якчанд коргоҳу корхонаҳо ва кӯдакистону мактаб таъсис ёфта, таъмини шуғли пурмаҳсул тавассути таъсиси ҷойҳои нави корӣ мутобиқ ба стандартҳои ҷаҳонӣ роҳандозӣ шуд.

Дастовардҳои мардуми кишвар дар давраи соҳибистиқлолӣ, алалхусус, баъди таъмини сулҳу оромӣ ва суботи сиёсӣ, ҳамдигарфаҳмӣ ва Ваҳдати миллӣ хеле назаррас буда, дар ин солҳои Истиқлолият халқи заҳматкаши тоҷик, аз ҷумла мардуми ноҳия ба хотири ободиву пешрафти давлати соҳибихтиёри худ ва сарзамини биҳиштосои хеш талош ва ғайрати дучанд зоҳир менамоянд. Ба хотири таҳкиму тақвияти истиқлолу озодӣ ва Ваҳдати миллӣ ҳамчун арзишҳои нодири миллӣ тамоми мардуми баору номус, худогоҳу худшинос ва ватандӯсту ватанпарасти миллат саъю талош доранд.

 Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба бошандагони ноҳияи овозадори Ҷаббор Расулов таваҷҷуҳи хоса доранд, ки аз ҳар мулоқоти судманду суҳбатҳои самимиашон, ки дар сафарҳои кориашон ба вуқӯъ мепайванданд эҳсос мешавад.

Боиси хушнудист, ки ҳар сол ташрифи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ноҳия сурат мегирад, ки ин сарбаландии ҳар мардуми ноҳия аст. Ҳамчунин, қомат афрохтани Нишони давлатӣ бо баландии 24 метр ва Парчами давлатии Ҷумҳурии Тоҷикистон бо баландии 50 метр нишони возеҳи арҷгузорӣ ба муқаддасоти миллӣ буда, дар замири насли имрӯзу оянда ҳисси ватандӯстӣ ва ифтихори миллиро бедор месозад.

Шаҳноза Ҳомидова,
«Ҳақиқати Суғд»

Читать далее

Президенти мамлакат Эмомалӣ Раҳмон дар ҳайати роҳбарикунандаи Палатаи ҳисоби Ҷумҳурии Тоҷикистон тағйироти кадрӣ ба амал оварданд

Дирӯз Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳайати роҳбарикунандаи Палатаи ҳисоби Ҷумҳурии Тоҷикистон тағйироти кадрӣ ба амал оварданд.

Мутобиқи моддаи 14-уми Қонуни Ҷумҳурии Тоҷикистон «Дар бораи Палатаи ҳисоби Ҷумҳурии Тоҷикистон» пешниҳод «Дар бораи аз вазифаи муовини раиси Палатаи ҳисоби Ҷумҳурии Тоҷикистон озод намудани Азимӣ Заъфар Исмоил бо сабаби ба кори дигар гузаштанаш», мутобиқи моддаи 15-уми Қонуни мазкур пешниҳод «Дар бораи аз вазифаи сараудиторони Палатаи ҳисоб озод намудани Аҳмадзода Файзалӣ, Салимзода Собир ва Давроншоҳиён Рамеш» ба Маҷлиси намояндагони Маҷлиси Олии Ҷумҳурии Тоҷикистон ирсол карда шуд.

Читать далее