13 July 2020

Қарори Ҳукумати Ҷумҳурии Тоҷикистон Оид ба тадбирҳои амалисозии фармони Президенти Ҷумҳурии Тоҷикистон аз 5 июни соли 2020, №1544 «Дар бораи пешгирии таъсири бемории сироятии СOVID-19 ба соҳаҳои иҷтимоию иқтисодии Ҷумҳурии Тоҷикистон»

ҲУКУМАТИ ҶУМҲУРИИ ТОҶИКИСТОН
ҚАРОР

аз 11 июли соли 2020 №401
ш. Душанбе

Оид ба тадбирҳои амалисозии фармони Президенти
Ҷумҳурии Тоҷикистон аз 5 июни соли 2020, №1544 «Дар бораи
пешгирии таъсири бемории сироятии СOVID-19 ба соҳаҳои
иҷтимоию иқтисодии Ҷумҳурии Тоҷикистон»

Мутобиқи моддаи 16 Қонуни конститутсионии Ҷумҳурии Тоҷикистон «Дар бораи Ҳукумати Ҷумҳурии Тоҷикистон» ва бо мақсади амалӣ намудани фармони Президенти Ҷумҳурии Тоҷикистон аз 5 июни соли 2020, №1544 «Дар бораи пешгирии таъсири бемории сироятии СOVID-19 ба соҳаҳои иҷтимоию иқтисодии Ҷумҳурии Тоҷикистон», Ҳукумати Ҷумҳурии Тоҷикистон қарор мекунад:

Читать далее

Пешвои миллат Эмомалӣ Раҳмон дар як қатор мақомоти қудратӣ ва давлатӣ тағйироти кадрӣ ба амал оварданд

Дирӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо содир намудани фармону амрҳо ва қарорҳои Ҳукумати Ҷумҳурии Тоҷикистон дар ҳайати фармондеҳии Қӯшунҳои сарҳадии Кумитаи давлатии амнияти миллии Ҷумҳурии Тоҷикистон, роҳбарони воҳидҳои сохтори Дастгоҳи иҷроияи Президент ва дигар мақомоти давлатӣ тағйироти кадрӣ ба амал оварданд.

Бо Фармонҳои Президенти Ҷумҳурии Тоҷикистон Пиракзода Ҳикматулло аз вазифаи муовини якуми Фармондеҳи Қӯшунҳои сарҳадӣ — сардори Сарситоди Қӯшунҳои сарҳадии Кумитаи давлатии амнияти миллии Ҷумҳурии Тоҷикистон озод ва Насимҷон Раҷабзода ба ин вазифа таъйин гардид.

Читать далее

Саҳм дар татбиқи ҳадафи стратегии кишвар

Муждаи нек тез байни мардум паҳн мешавад. Коргоҳи дӯзандагии ҶДММ «Суғдиён» дар шаҳри Хуҷанд дубора ба кор оғоз карда, беш аз яксаду панҷоҳ нафар духтарони маҳаллиро бо ҷойи корӣ таъмин намуд.

Санаи дуюми июли соли равон Асосгузори сулҳу ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон бо фаъолияти корхона ошно гардида, ҷиҳати дӯхти босифати либос, пурра таъмин намудани бозори дохилӣ бо маҳсулоти ватанӣ ва коҳиш додани воридоти он аз хориҷи кишвар дастуру супоришҳо доданд.

Ба таърихи коргоҳ назар медӯзем. Он ҳанӯз соли 1992 ба фаъолият оғоз карда, масоҳати умумии он 4,26 гектарро фарогир ва ҳамагӣ 15 нафар бо меҳнат машғул буданд. Мутаассифона, бо мурури замон он аз кор бозмонд ва дар баробари ин мутахассисони соҳаи муҳандисию техникӣ низ бекор монданд.

Соҳибистиқлолии мамлакат, рушди вазъи иқтисодии кишвар ва омода сохтани мутахассисони гуногунҷабҳа дар макотиби олӣ боис гардиданд, ки корхонаҳои истеҳсолӣ пас аз таҷдиду азнавсозӣ мутобиқи талаботи замон дубора ба кор шуруъ намоянд.

Дар доираи дастуру супоришҳои Президенти мамлакат ва Мақомоти иҷроияи ҳокимияти давлатии вилоят бо мақсади расидан ба ҳадафи чоруми миллӣ – саноатикунонии босуръати мамлакат дар қатори дигар коргоҳҳо корхонаи дӯзандагии ҶДММ «Суғдиён» баъди таҷдиду азнавсозӣ ба кор оғоз кард. Зимни пурсиш директори коргоҳ Шаҳло Латифова изҳор дошт, ки он бо ҷалби сармояи дохилӣ аз ҷониби Ҷамъияти саҳҳомии пӯшидаи «Корпоратсияи Сомон Суғд» пурра азнавсозӣ гардида, дастгоҳу таҷҳизоти муосири истеҳсоли Ҷумҳурии Хитой насб шудааст. Айни замон дӯзандагон ба дӯхтани сару либоси бачагона, занонаю мардона машғуланд. Дар ҳолати пурра ба кор даромадани коргоҳ шумораи кормандон то ба яксаду ҳафтод нафар хоҳад расид. Иқтидори истеҳсолии корхона дар як сол чорсад ҳазор дона маҳсулоти дӯхта мебошад.

Ҳар як корхонаи истеҳсолӣ кӯшиш ба харҷ медиҳад, маҳсулоти хешро ба бозори ҷаҳонӣ муаррифӣ намояд. Коргоҳи мазкур низ чандест, ки бо ширкати шуҳрати ҷаҳонидоштаи «Текстил - трейд» -и Федератсияи Русия шартномаи ҳамкорӣ ба имзо расонида, чанд моҳ қабл беш аз шаш ҳазор дона нимшими ҷинсии мардонаро интиқол сохт. Ҳоло аз рӯи иттилоъ бо ширкати «Бил Бом Бо» -и Ҷумҳурии Белорусия низ шартномаи ҳамкорӣ ба имзо расидааст ва тибқи стандартҳои ҷаҳонӣ минбаъд либосҳои занона ва мардонаро хоҳанд дӯхт.

Бо ширкатҳо ва соҳибкорони ватанӣ низ ҳамкорӣ хуб ба роҳ монда шудааст. Дар масъалаи дӯхтани либоси мактабӣ бо чанде аз мактабҳои маркази вилоят шартнома баста шудааст.

Аз рӯи иттилои Шаҳло Латифова дӯзандагони коргоҳ, ки духтарони маҳаллӣ мебошанд, дар як баст фаъолият дошта, тибқи муроҷиати коргоҳҳо ва муассисаҳои тандурустӣ истеҳсоли ниқоб ва либоси муҳофизатии тиббиро ба роҳ мондаанд. Дар асоси дархости ҶДММ «Ҷавонӣ» ва ҶДММ «Сатн» беш аз сад ҳазор дона ниқоб омода гардид.

Дар асоси талаботи муассисаҳои тандурустӣ бошад, чорсад дона либоси муҳофизатии тиббӣ истеҳсол шуда, айни ҳол кор дар ин самт идома дорад.

Дар корхонаи дӯзандагии ҶДММ “Суғдиён” корҳои таъмиру тармим идома дорад, - қайд кард А. Раҳматзода, муовини раиси шаҳри Хуҷанд, - ҳангоми ба истифода додани сехҳои шустушӯю пардоздиҳӣ ва рангуборкунӣ, ки он ҳам ба таври замонавӣ омода хоҳад шуд, фаъолият дар ин самт шабонарӯзӣ ба роҳ монда, боз дусад нафарро бо ҷойи корӣ таъмин месозад.

Тавҳида ҶӮРАЕВА,

“Ҳақиқати Суғд”

Читать далее

Тозагии маҳал – фараҳи қалбҳо

Дар доираи эълон гардидани “1300 рӯзи меҳнати зарбдор” дар раванди омодагӣ ба ҷашнҳои таърихии миллат, аз ҷумла 30 - солагии Истиқлолияти ҷумҳурӣ тадбирҳои шоиста роҳандозӣ мегарданд.

Ҳамчунин, аз ҷониби масъулини Раёсати ҳифзи муҳити зисти вилоят баҳри дар амал татбиқ намудани дастуру супоришҳои Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон ҷиҳати вусъат бахшидан ба корҳои ободонию кабудизоркунӣ, тозаю озода нигоҳ доштани муҳити зист, безараргардонии кӯчаву маҳалла, деҳа, ҷамоатҳои шаҳрак ва деҳот аксияи “Тозагии маҳал” эълон гаштаву дар ин раванд маъракаи ободонӣ вусъати тоза мегирад.

- Тибқи дастуру супоришҳои роҳбарияти вилоят дар шаҳру ноҳияҳои вилоят корҳои сохтмонию ободонӣ, таъмири биною иншоот, тоза намудани гирду атрофи идораҳо, иншооти иҷтимоию кӯчаю хиёбонҳо, обод намудани гулгаштҳо, боғҳои истироҳатию фароғатӣ, кашонидан ва ҷойгиронии партовҳо аз кӯчаҳои ҷамоат ва тоза намудани ҳудуди манбаъҳои обӣ, насби шиору овезаҳо ба иҷро расонида шудаанд. Ҳамчунин, дар доираи ҳамин чорабиниҳо ба тартиб даровардани дарахтон, бинову иншоот ва партовгоҳҳо рангубор карда шуданд. Дар шаш моҳи соли равон 202 маротиба аксияи мазкур баргузор гардида, дар доираи он дар шаҳру ноҳияҳои вилоят шанбегиҳо гузаронида, наздик 300 ҳазор кормандони ташкилоту муассисаҳо, аҳолии ҷамоатҳои шаҳрак ва деҳот, хонандагон ва донишҷӯёни муассисаи таълимию тандурустӣ фаъолона иштирок доштанд. Зимни баргузории чунин аксияҳо корҳои зиёде, аз қабили тоза намудани ҷӯйбор, заҳбуру заҳкаш ба масофаи беш аз 270 ҳазор метр, дусад ҳазор метр қадди роҳҳо аз партовҳо тоза ва беш аз 1 миллиону 167 ҳазор метри мураббаъ партов ба партовгоҳҳои расмӣ бурда шуданд, - иброз дошт масъули маркази иттилоотии Раёсати мазкур.

Масъулин оид ба чораҷӯиҳои вобаста ба пешгирӣ аз паҳн нагаштани касалиҳои сироятӣ, аз ҷумла COVID-19 ҷиҳати тоза нигоҳ доштани муҳити зист, безараргардонии кӯчаву маҳалла, деҳа, ҷамоату шаҳрак ва деҳот, хусусан дар нуқта ва қуттиҳои махсус ҷамъоварии муваққатии партовҳо, партовгоҳҳо, соҳилҳои манбаъҳои обӣ ташкил ва гузаронида шуд, ки дар он беш аз 15 ҳазор нафар ҷомеаи меҳнатии корхонаҳо, ташкилоту муассиса, хоҷагиҳо ва шаҳрвандон фаъолона иштирок доштанд. Дар ин рӯз ба тамоми иштирокчиёни чорабинии мазкур, шаҳрвандон, эҳтиёҷмандон дастпӯшакҳои резинӣ, ниқобу маводҳои антисептикӣ тариқи ройгон дастрас гардид.

Ҳамчунин, аз ҷониби сохторҳои дахлдор бо мақсади пешгирӣ аз бемории сироятӣ ва таъмини солимии сокинон ва меҳмонони вилоят тадбирҳои безараргардониро пурзӯр намуда, барои тамоман нест намудани ин вабои аср ҳамагон сафарбар шуданд.

Бо мақсади амалигардонии нақшаи чорабиниҳо дар самти корҳои ташвиқотӣ ва тарғиботӣ вобаста ба баланд бардоштани сатҳи маърифати экологии аҳолӣ, гузаронидани ҳашарҳои оммавӣ корҳои тарғиботӣ беҳтару бештар гардонида шуда, минбаъд низ баҳри ободонии кишвар, беҳдошти муҳити гирду атроф корҳоро ҷоннок хоҳем кард, - изҳор доштанд масъулин.

Баргузории чунин аксияву шанбегиҳо боз ҳам ҷиҳати тозагии муҳити гирду атроф ва пешгирии ҳар гуна бемориҳои сироятӣ мусоидат хоҳад намуд, ки ба чунин корҳои тозагию ободонӣ набояд ягон афроди ҷомеа бетараф бошад.

Маъмурахон САМАДОВА,

“Ҳақиқати Суғд”

Читать далее

Нодира ЮСУФОВА: Риояи ҳатмии дастурҳо аз беморӣ эмин медорад...

Имрӯзҳо дар бештари мамолики дунё мавҷи нави бемории коронавирус аз нав доман паҳн карда, сокинони кураи арзро ба ташвиш овардааст. Ҳарчанд дар бархе кишварҳо аз ҷониби олимон подзаҳр, яъне дору бар зидди ин беморӣ дарёфт карда шудаву алҳол дар истифода аст, боз ҳам ин беморӣ чун вабои аср барои ҳаёти инсонҳо хатарнок боқӣ мондааст.

Мухбирамон бо духтури оилавии Маркази саломатии шаҳрии рақами 1-и шаҳри Хуҷанд Нодира Юсуфова ҳамсӯҳбат гардида, атрофи ин мавзуъ, яъне нишонаҳо ва сарчашмаи гирифторшавӣ ба ин беморӣ ва роҳҳои пешгирӣ аз он пурсон шуд:

- Ҳарчанд дар соҳаи нигаҳдории тандурустӣ, дар маркази саломатии мазкур ба сифати табиби оилавӣ бист сол инҷониб фаъолият дорам, бо чунин навъи бемории сироятии зудпаҳншаванда ва бо оқибати фаврии леталӣ - бемории сироятии коронавирус дар таҷрибаи кориам бори аввал рӯ ба рӯ гардидам. Вақте дар кишвари мо охирҳои моҳи апрел ва аввали моҳи май гирифторшавии сокинон ба ин касалӣ ба қайд гирифта шуд, рӯз аз рӯз ба муассисаи табобатии мо муроҷиати беморон афзудан гирифт. Бемуҳобот, чаҳор-панҷ маротиба аз пештара муроҷиати беморон зиёд гардид. Бо ибтикори роҳбарияти муассиса ба меъёри кории бистучаҳорсоата, яъне шабонарӯзӣ гузаштем. Ба кор аз соати ҳашти субҳ омада, то соати 9-и шаб дар хизмати беморон будем. Давоми шаб бошад, духтурону ҳамширагони шафқат бонавбат ба навбатдорӣ меистодем. Табибону ҳамширагони шафқат, кормандони хурди тиббӣ, ягон нафар корманд дар ин давра – яъне хурӯҷи пандемия истироҳат накарданд, ба рухсатӣ набаромаданд. Аз шаш минтақа ва бисту чаҳор кӯчаи ҳудуди хизматрасонии марказ, ҳатто аз дигар минтақаҳои шаҳр ҳар рӯз сокинони зиёд ба мо муроҷиат мекарданд. Сокинон асосан бо нишонаи илтиҳоби шадиди қисми поёнии шушҳо, таби баланд, бархе бо бемадорӣ, сулфаи сахт муроҷиат менамуданд.

Ман, ки донишгоҳи тиббиро бо ихтисоси пизишки бемориҳои дарунӣ, яъне терапевт хатм кардаам, пас аз гӯш карда дидани шушҳо аз рӯзҳои нахуст ба беморон доруҳои левофлоксатсин ва сефтраксонро таъин намудам, ки ин препаратҳо барои илтиҳоби музмини шуш таъин гардидааст. Мушоҳида менамудам, ки ҳолати беморон тадриҷан беҳтар мегардаду давоми се-чаҳор рӯзи қабули ин доруҳо ба по мехезанд. Тадриҷан ба аксари беморон ин доруҳо, ҳамчунин арбидолро таъин мекардагӣ шудем.

Тавре дар раванди табобати коронавирус аён гашт, хусусияти хосаи ин беморӣ дар он будааст, ки ҷараёни ин беморӣ дар рагҳои хунгузари шуш трамбоза, яъне қуюқшавии хунро ба миён меорад ва бо ин сабаб гардиши хун суст мегардад ва ё бозмемонад, ки сабаби фавти бемор мегардад. Яъне аз гирифторӣ ба беморӣ неву аз оризаи он (ослоҷнение) дил аз кор мемонад. Аз ин сабаб мо ба беморон баробари дигар дорувор барои суюқшавии хун малҳами гепаринро тавсия додем.

Ҷоиз ба зикр аст, ки шахсе, ки бемории музмин дорад, аз ҷумла касалии диабети қанд, фишорбаландӣ ё касе, ки сактаи дил ва ё сактаи майнаи сарро аз сар гузаронида бошад, бемориро вазнин мегузаронад. Он шахсоне, ки бемории асабоният (невроз) ва ё камхунӣ доранд, инчунин шахсони иммунитеташон паст, яъне қобилияти ба беморӣ муқобилистии организмашон суст бо нишони пайдоиши ваҳму ҳарос ба беморӣ гирифтор гардиданд. Чунин ҳолат пас аз тамошои телевизион, мутолиаи рӯзномаҳо, аз шабакаҳои иттилоотӣ аз раванди хурӯҷи беморӣ дар ҷаҳон огоҳ гардидан ба амал омадааст.

Бояд гӯям, ки алҳол ин беморӣ пурра аз байн нарафтааст ва хавфи гирифтор шудан то ҳол боқист. Ва мо, ҳар як сокини кишварро зарур аст, ки ба қоидаҳои беҳдоштӣ ҳатман риоя намоем, бе ниқоб ба кӯча набароем, аз рафтан ба ҷойҳои серодам худдорӣ намоем, манзиламонро зуд-зуд бо маҳлулҳои безараргардонанда коркард намоем, аз маҳлули антисептикӣ истифода намоем ва тез-тез дастонро бо собун шуста истем.

Барои пешгирӣ аз беморӣ бошад, витаминҳои синк, аскорбиновая кислота, дорувори оромкунандаи асаб истеъмол намоем. Аз ғизоҳо бошад, бояд зикр намоям, ки Тоҷикистони офтобрӯяи мо аз меваҳои шаҳдбор бой аст ва ҳамаи меваҳои сарзамини мо тамоми намудҳои витаминро дороанд. Ҳоло, ки айёми пухта расидани меваҳост, аз меваву сабзавот, нӯшобаҳо аз меваи табиӣ ба таври фаровон истеъмол кунанд. Вале аз истеъмоли нӯшокиҳои газнок ва хунук, инчунин нишастан дар хонае, ки бо кондитсионер хунук карда мешавад, ҳатман худдорӣ кунанд.

Ҳамчунин, баҳри баланд бардоштани қобилияти муқобилистии ҷисм ба бемориҳо ба дили наҳор истеъмоли як қошуқ асал ва як қошуқ равғани седона хеле баманфиат аст.

Рафоат МӮЪМИНОВА,

«Ҳақиқати Суғд»

Читать далее

ҶҲАТ: таваҷҷуҳ ба кӯмаки башардӯстона ва беғаразона

Дар бинои Кумитаи иҷроияи ҳизби Халқии Демократии Тоҷикистон дар шаҳри Бӯстон ҷаласаи ҷамъбастии фаъолияти Бахши Ҷамъияти Ҳилоли Аҳмари Тоҷикистон (ҶҲАТ) дар вилояти Суғд дар нимсолаи аввали соли 2020 баргузор гардид. Дар ҷаласа котиби генералии Ҷамъияти Ҳилоли Аҳмари Тоҷикистон Б. Қурбониён, раиси озоди ҳудудии Ҷамъияти Ҳилоли Аҳмари Тоҷикистон дар вилоят Қ.Мирзоева, котиби иҷроияи бахши ҶҲАТ дар вилояти Суғд Парвиз Ҷабборзода иштирок намуданд.

Парвиз Ҷабборзода оид ба фаъолияти бахши Ҷамъияти Ҳилоли Аҳмари Тоҷикистон дар вилояти Суғд дар нимсолаи аввали соли 2020 ҳисобот дода, иброз дошт, ки бахши вилоятии ҶҲАТ дар ин давра бо истифода аз тамоми имкониятҳо ва нақшаи кории қаблан тасдиқгардида амал намуда, фаъолияти худро мувофиқи супоришҳои Котиби генералии Ҷамъияти Ҳилоли Аҳмари Тоҷикистон Б. Қурбониён ба роҳ монд.

Қайд кард, ки якҷоя бо чаҳордаҳ нафар котиби иҷроияи бахшҳои Ҷамъияти Ҳилоли Аҳмари Тоҷикистон дар шаҳру ноҳияҳои вилояти Суғд корҳои фаҳмондадиҳиро байни аҳолӣ пурзӯр намуда, пайваста гузаронидани вохӯриҳо, чорабинии гуногуни иҷтимоию фарҳангӣ ва варзишӣ, баромад тавассути радио ва телевизион, чопи мақолаҳо дар рӯзномаҳои вилоятиву маҳаллӣ ба роҳ монда шудааст.

Дар миқёси вилояти Суғд дар санаи 1-уми июли соли 2020-ум 322 ташкилоти ибтидоӣ фаъолият доранд, ки шумораи он нисбат ба нимсолаи аввали соли гузашта шаш адад зиёд аст. Шумораи аъзои Ҷамъияти Ҳилоли Аҳмари Тоҷикистон дар миқёси вилоят ба 5 821 нафар расида, нисбат ба соли сипаригардида нӯҳ фоиз зиёд гардидааст. Дар назди Бахши ҶҲАТ дар вилояти Суғд нӯҳ лоиҳа ё худ барномаи манфиатовар барои шаҳрвандони вилоят амал менамояд, ки кормандони лоиҳавӣ бо сифати баланди меҳнатӣ ва дастовардҳои назаррас дар татбиқи онҳо саҳм мегузоранд.

Бахши мазкур дар вилояти Суғд ҷиҳати пешгирӣ аз ворид ва паҳншавии бемории сирояткунандаи коронавирус – COVID-19 чораву тадбирҳои саривақтӣ ва зарурӣ андешид. Волонтёрон дар шаҳру ноҳияҳои Хуҷанд, Исфара, Бобоҷон Ғафуров, Ҷаббор Расулов ва Спитамен аз 18-уми март то ба 30-юми июни соли 2020 чорабиниҳои мақсадноки иттилоотӣ, корҳои ташвиқотиро барои шаҳрвандони касбу кор ва синну соли мухталиф дар корхонаву идораҳо, муассисаву ташкилот, мағозаву марказҳои савдо, бозору ошхонаҳо, дохили нақлиёти мусофиркашон, кӯдакистону мактабҳои миёна ва донишкадаву донишгоҳҳо (то эълон шудани таътил) доир намуданд. Дар маҷмӯъ, то ба санаи 30-юми июни соли 2020-ум 252 ҳазору 699 нафар, аз ҷумла 153 ҳазору 463 нафар мактаббача ба корҳои фаҳмондадиҳӣ фаро гирифта шуданд. Бо кӯмаки ДИ КМ ҶҲАТ дар ҳамкорӣ бо созмони Иттиҳоди Аврупо, ЮНИСЕФ, Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба чор муассисаи тиббии шаҳру ноҳияи вилояти Суғд: Исфара, Истаравшан, Панҷакент ва Кӯҳистони Мастчоҳ таҷҳизоти нафасдиҳии сунъӣ (ИВЛ)-ро ҳамчун кӯмаки бебозгашт пешниҳод намуд.

Ҳамзамон, аз ҷониби ДИ КМ ҶҲАТ бо дастгирии ҒSAID тақсимоти 500 адад бастаи маводи гигиенӣ ба муассисаҳои ташхисию табобатии 5 шаҳру ноҳияи мақсадноки вилояти Суғд: Хуҷанд, Исфара, Бобоҷон Ғафуров, Ҷаббор Расулов ва Спитамен (100-ададӣ ба ҳар шаҳру ноҳия) ба роҳ монда шуд. КМ ҶҲАТ дар якҷоягӣ бо Салиби Сурхи Олмон (ССО) бо ҳадафи дастгирии оилаҳои ниёзманд, ашхоси яккаву танҳо, маъюбону бепарасторон ва беморон дар намуди маводи хӯрока ва маводи гигиенӣ кӯмаки башардӯстона расонд. Тақсимоти мавод дар доираи Лоиҳаи байнисарҳадӣ ба 800 оилаи ниёзманд: 400 оила аз шаҳри Исфара ва 400 оила аз ноҳияи Ҷаббор Расулов (шаҳру ноҳияи мақсадноки вилояти Суғд) ба роҳ монда шуд.

Б. Қурбониён дар баромади хеш иброз дошт, ки новобаста ба мушкилоти бамиёномада, яъне интиқол ва паҳншавии бемории сироятии коронавирус дар Тоҷикистон ҳар як корманд, аъзо ва волонтёри Ҷамъияти Ҳилоли Аҳмари Тоҷикистон бояд фаъолияти хешро дар асоси Оиннома ва Низомномаи ҶҲАТ ба роҳ монад. Бахусус, ба фаъолияти башардӯстона ва беғаразона таваҷҷуҳи бештар равона шавад. Чун соли 2021 – соли ҷашни бузургу таърихии миллат - 30-солагии Истиқлолияти давлатии Ҷумҳурии Тоҷикистон аст, бояд онро бо нишондиҳандаҳои хуби меҳнатӣ ва дастовардҳои назаррас таҷлил намоем.

Дар фарҷом ба ҳамкорони доимии Бахши Ҷамъияти Ҳилоли Аҳмари Тоҷикистон дар вилояти Суғд – ҶДММ “Афзали Суғд”, ҶДММ “Орди фатир” ва волонтёрони фаъол – З. Хоҷаева ва М. Бутаева Сипосномаи бахш ва ба 10 нафар шаҳрванд Шаҳодатномаи аъзогӣ супурда шуд.

Шаҳноза ҲОМИДОВА,

"Ҳақиқати Суғд”

Читать далее