05 August 2020

Норасоии кадр дар соҳаи фарҳанг

- Ҷиҳати ҷалби наврасону ҷавонон ба китобу китобхона аз ҷониби китобдорони шаҳру навоҳии вилоят корбарии хуб ба роҳ монда шудааст. Алҳол дар миқёси вилоят 362 китобхона фаъолият бурда истодааст.

Давоми шаш моҳи соли равон ба китобхонаи вилоят 709 нусха китоб ворид гардид. Бо мақсади дуруст ба роҳ мондани фаъолияти китобхонаҳои марказӣ, китобхона – филиалҳо, омӯзиши нигоҳдории ҳолати махзан, истифодаи босамари китобҳо, баланд бардоштани дараҷаи тахассусмандии китобдорон, беҳдошти маҳорати касбии китобдорону китобшиносон ва амсоли ин ҳамасола дар вилоят озмуни «Китобхонаи намунавии вилояти Суғд» доир мегардад, - иброз дошт зимни нишасти матбуотӣ ба рӯзноманигорон сардори Раёсати фарҳанги вилоят Бахтиёр Қосимов.

Алҳол дар вилоят 362 китобхона, 133 муассисаи клубӣ, 6 клуби сайёр, 95 қаср, кох ва хонаи фарҳанг, 6 хона – осорхона, 3 маҷмааи фарҳангӣ, 1 амфитеатр, 1 маркази фарҳангӣ - фароғатӣ, 5 театри халқӣ, 22 боғи фарҳангӣ - фароғатӣ, 7 театри касбӣ, 4 ансамбли тарона ва рақс, 2 филармонияи халқӣ, 30 мактаби бачагонаи санъат, мусиқӣ ва рассомӣ, 11 ансамбли “Шашмақом”, 2 гурӯҳи ҳаҷвӣ ва амсоли ин фаъолият дошта, 1190 ёдгории таърихӣ ба қайд гирифта шудаанд.

- Ҳамчунин, барои рушди соҳаи фарҳанг ва 25 муассисаи фарҳангӣ давоми соли 2014 - ум 421 ҳазору 186 сомонӣ маблағ ҷудо шуда бошад, соли 2020 - ум ин маблағ ба беш аз 26 миллион сомонӣ аз буҷаи вилоят ҷудо гардидааст. Ин то як андоза таваҷҷуҳи Ҳукумати ҷумҳурӣ ва роҳбарияти вилоятро нисбат ба соҳаи фарҳанг нишон медиҳад, - афзуд Бахтиёр Қосимов.

Имрӯз Раёсати фарҳанги вилоят аз он изҳори нигаронӣ мекунад, ки пас аз хатми донишгоҳ кадрҳои соҳибтахассус ба кор намеоянд, аз ин лиҳоз норасоии кадр дар ин соҳа баръало эҳсос мешавад. Барои дастгирӣ ва ҳавасмандгардонии кадрҳои ҷавону тахассусманд чораҳои зарурӣ андешида шуда истодаанд.

Доир ба бемории сироятии COVID – 19 гуфта шуд, ки оид ба пешгирӣ ва ҷиҳати амалӣ чораҳои пешгирикунандаи паҳншавии бемории сироятӣ тадбирҳои зарурӣ андешида шуданд. Дар шаҳру навоҳии вилоят ситоди соҳаи фарҳанг ташкил шуда, корбарӣ дар сатҳи зарурӣ ба роҳ монда шудааст.

Аз ҷониби ҳунармандони театрҳои касбӣ роликҳои тарғиботиву ташвиқотӣ таҳия ва тавассути телевизиону шабакаҳои интернетӣ пахш шуданд. Ба кормандони соҳа, ки ба бемории илтиҳоби шуш гирифтор шудаанд, кӯмаки моддӣ расонида шуд.

Дар нишасти матбуотӣ аз ҷониби рӯзноманигорон суолҳо бобати фаъолияти кунунии клубу китобхонаҳо, ташкили китобхонаҳои шахсӣ, тақдири Боғи навбунёди ба номи Абӯмаҳмуди Хуҷандӣ, таъминот бо китобҳои нав ва дастоварду камбудии соҳа пешниҳод шуд.

Шаҳбону ОЛИМОВА,

«Ҳақиқати Суғд»

Читать далее

Ифтитоҳи боз ду коргоҳи нав

Дар Минтақаи озоди иқтисодии «Суғд» бо иштироки муовини аввал Зикриёзода Сӯҳроб ва рӯзноманигорон нишасти матбуотӣ баргузор гардид.

Қайд шуд, ки давоми шаш моҳи соли равон маҷмӯи маҳсулоти саноатӣ ба 65,4 миллион сомонӣ баробар гардид, ки ин нишондиҳанда нисбат ба ҳамин давраи соли гузашта 3,2 миллион сомонӣ кам аст. Таҳлилҳо нишон доданд, ки дар ин вақт дар минтақа ҳаҷми хизматрасонӣ ба 1557,7 ҳазор сомонӣ расонида шудааст, ки нисбат ба шаш моҳи соли гузашта 87,9 ҳазор сомонӣ кам мебошад. Корҳои сохтмонӣ бошад, ба маблағи 257,1 ҳазор сомонӣ иҷро гардидааст.

Молу маҳсулоти субъектҳои Минтақаи озоди иқтисодӣ ба ғайр аз Тоҷикистон ба давлатҳои ҳамҷавори Қирғизистон, Ӯзбекистон ва Қазоқистон содирот шуда истодаанд, ки маблағи он зиёда аз 19,3 миллион сомониро ташкил дод, ки нисбат ба ҳамин давраи соли гузашта 0,1 миллион сомонӣ зиёд аст.

Дар МОИ «Суғд» миқдори умумии ҷойҳои корӣ аз оғози фаъолият ба 606 адад баробар гардид. Айни замон дар МОИ «Суғд» 29 субъект ба қайд гирифта шуда, мувофиқи ҳисоботи охирин, 13 адади онҳо бо фаъолияти истеҳсолӣ, хизматрасонӣ ва савдо, боқимонда бо корҳои сохтмонӣ, ободонӣ, ворид намудани таҷҳизот ва ба кор андохтани иқтидорҳои нав машғуланд.

Ёдовар мешавем, ки моҳи марти соли равон бо иштироки Пешвои миллат муҳтарам Эмомалӣ Раҳмон коргоҳҳои истеҳсолии ҶДММ «Корхонаи муштараки тоҷикӣ-туркии «Афранг Пластик» ва филиали ширкати кандагии «Хантана Канада», ки ба истеҳсоли профилҳои пластикӣ ва коркард, бандубаст ва содироти асал машғул ҳастанд, ифтитоҳ ёфтанд.

Бо сабаби паҳншавии бемории сироятии коронавирус дар саросари дунё фаъолияти доираи соҳибкориву сармоягузорӣ суст гардида, пешниҳодҳои лоиҳаҳои ҳамкорӣ бо МОИ «Суғд» низ бамаротиб коҳиш ёфт.

Маъмурият тамоми кӯшиши худро баҳри ҷалби сармоягузорӣ равона менамояд.

Ҳаҷми сармоягузории мустақим дар ин давра ба маблағи 8,8 миллион сомонӣ ва аз оғози фаъолияти минтақа зиёда аз 89 миллион сомонӣ таъмин гардид.

Дар давраи ҳисоботӣ ба буҷаи давлат аз ҳисоби субъектҳои МОИ «Суғд» ба маблағи 974,4 ҳазор сомонӣ андози иҷтимоӣ, 868,4 ҳазор сомонӣ андоз аз даромади шахсони воқеӣ ва 7799,4 ҳазор сомонӣ пардохтҳои гумрукӣ таъмин шуд.

Яке аз мушкилиҳои ҳалталаби рӯз ин норасоии нерӯи барқ ҷиҳати таъмини эҳтиёҷи субъектҳои МОИ «Суғд» бо ҳаҷми басандаи нерӯи барқ мебошад, ки масъалаи барқароркунии зеристгоҳи барқии «Fарбӣ»-ро дар ҳудуди минтақа ба миён меорад.

Гулҷаҳон Турсунзода,

«Ҳақиқати Суғд»

Читать далее

Беш аз 5 ҳазор китоб харида шуд

Дар маҷлисгоҳи Донишкадаи кӯҳӣ-металлургии Тоҷикистон бо иштироки васеи роҳбарият, устодону кормандон ва намояндагони васоити ахбори омма нишасти матбуотӣ баргузор гардид.

Ректори донишкада Мухтор Фозилзода оид ба фаъолияти нимсолаи аввали донишкада маълумот дода, афзуд ки теъдоди умумии кормандони штатӣ 243 нафарро ташкил намуда, аз инҳо 153 нафар корманди илмӣ, педагогӣ аз ҷумла профессорон, 48 номзади илм, дотсент, 44 нафар муаллими калон ва 56 ассистент фаъолият доранд. Алҳол донишкада тибқи иҷозатномаи Вазорати маориф ва илми Ҷумҳурии Тоҷикистон аз рӯи 18 ихтисоси равияи кӯҳӣ – металлургӣ мутахассисон омода карда, дар се факултаи он аз рӯи 18 ихтисос ҳамагӣ 3200 донишҷӯву магистратон ва аспирантону доктарантон таҳсил намуданд.

М.Фозилзода оид ба вазъияти пешгирии бемории сироятии коронавирус иттилоъ дода, иброз дошт, ки дар ин давра чораҳои дахлдор андешида шуда, аз ҷониби кормандони бунгоҳи тиббии донишкада дар якҷоягӣ бо масъулини шуъбаву сохторҳои он дар байни донишҷӯёну устодон баҳри пешгирии паҳншавии ин беморӣ, риоя намудани гигиенаи шахсӣ дар ҷойҳои ҷамъиятӣ вохӯрию суҳбатҳои муфид ва корҳои фаҳмондадиҳӣ гузаронида шудааст.

 - Донишкада ба таҳсили имсола пурра омода буда, дар ин раванд соли равон системаи обтаъминкунии он, ки солҳо инҷониб кӯҳнаву фарсуда шуда буд, таъмир шуда, инчунин синфхонаҳои бинои асосии таълимӣ ва бинои таълимии №1, озмоишгоҳҳо, хобгоҳҳо таъмиру тармим гардида, ноқилҳои барқтаъминкунанда ва таҷҳизоти барқӣ пурра азнавсозӣ шудааст, -изҳор дошт ректори донишкада.

Ҳамзамон, донишкада ба мавсими сармои имсола низ омодагии ҳамаҷониба дида, аз ҷумла барои зимистонгузаронӣ дар анборҳо беш аз 53 тонна ангиштсанг ва ба андозаи зарурӣ ҳезум захира кардааст.

Бино ба иттилои масъулин, бобати дастуру супоришоти Пешвои миллат оид ба таъсис ва муҷаҳҳазонидани китобхонаҳо бо адабиёти мухталиф, дар донишкада низ чораандешӣ гардида, соли равон беш 5 ҳазор китоби таълимиву соҳавӣ ва бадеӣ харида ба донишҷӯёну устодон пешниҳод шудааст.

Маъмурахон САМАДОВА,

“Ҳақиқати Суғд”

Читать далее

Дар таъмини волоияти қонун

Дар нишасти матбуотии Суди вилояти Суғд натиҷаи фаъолияти суди шаҳру ноҳияҳои вилоят дар нимсолаи аввали соли 2020 баррасӣ шуд.

Дар нишасти матбуотӣ намояндаи Мақомоти иҷроияи ҳокимияти давлатии вилояти Суғд, судяҳо ва кормандони масъули дастгоҳи суди вилоят ва рӯзноманигорон иштирок доштанд.

Сароғоз раиси Суди вилояти Суғд Оқилзода Бахтиёр Даврон оид ба натиҷаи фаъолияти судҳои вилоят ва шаҳру ноҳияҳо дар давоми нимсолаи аввали соли 2020 ҳисобот дод.

 Қайд гардид, ки дар нимсолаи аввали соли 2020 аз ҷониби суди вилоят ва судҳои шаҳру ноҳияҳо дар марҳалаҳои якум, кассатсионӣ ва назоратӣ 17 232 парвандаи граҷданӣ, оилавӣ, ҷиноятӣ, маъмурӣ, дархостҳои мақомоти тафтишоти пешакӣ ва пешниҳодҳои муассисаҳои ислоҳӣ баррасӣ гардидаанд.

 Аз ин шумора 1393 парвандаи ҷиноятӣ, 2238 парвандаи граҷданӣ, 5359 парвандаи оилавӣ ва 5752 парвандаи ҳуқуқвайронкунии маъмурӣ мебошанд.

Ҳамзамон, дар ин давра дар коллегияҳои судии суди вилоят 170 парвандаи ҷиноятӣ, 142 парвандаи граҷданӣ, 193 парвандаи оилавӣ ва 35 адад парвандаи маъмурӣ баррасӣ гардидаанд.

Зикр шуд, ки вобаста ба вайрон кардани талаботи Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» аз ҷониби судҳои вилоят 97 парванда баррасӣ гардида, нисбат ба 94 шахс ҷазои ҷарима ба маблағи 536 020 сомонӣ таъин шудааст.

 Инчунин, дар давраи ҳисоботӣ ҷиҳати риоя накардани Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» 1535 парвандаи ҳуқуқвайронкунии маъмурӣ баррасӣ гардидааст. Дар натиҷаи баррасӣ нисбат ба 689 шахс огоҳӣ ва нисбат ба 752 нафар ба маблағи 129 389 сомонӣ ҷарима таъин шудааст.

 Судҳои вилоят дар нимсолаи аввали соли 2020 аз рӯи маблағҳои боҷи давлатӣ, ҷарима, мусодираи амвол ба тариқи маблағҳои пулӣ, товони зарари аз тасарруфи амволи давлатӣ ва зарари аз дигар ҷиноятҳо расонидашуда, инчунин аз рӯи даъвоҳои прокурорҳо ва аз рӯи навиштаҷоти иҷроишии мақомоти гуногуни давлатӣ, маблағи умумии 6 054 053 сомонӣ амалан ба буҷети ҷумҳурӣ рӯёнидаанд.

 Роҳбарияти суди вилояти Суғд ҷиҳати иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, дар рӯзҳои шанбе 120 нафар шаҳрвандро қабул намуда, арзу шикоятҳои онҳоро мавриди баррасӣ қарор додааст.

Дар интиҳо бо рӯзноманигорон суолу ҷавоб доир шуд.

Сурайё ҲАКИМОВА

«Ҳакиқати Суғд»

Читать далее

Фармони Президенти Ҷумҳурии Тоҷикистон дар бораи тадбирҳои тақвият бахшидани сатҳи ҳифзи иҷтимоии аҳолӣ ва зиёд намудани маоши амалкунандаи вазифавии хизматчиёни давлатӣ, кормандони ташкилоту муассисаҳои буҷетӣ, андозаи нафақа ва стипендия

ФАРМОНИ
ПРЕЗИДЕНТИ ҶУМҲУРИИ ТОҶИКИСТОН

Дар бораи тадбирҳои тақвият бахшидани сатҳи ҳифзи
иҷтимоии аҳолӣ ва зиёд намудани маоши амалкунандаи
вазифавии хизматчиёни давлатӣ, кормандони ташкилоту
муассисаҳои буҷетӣ, андозаи нафақа ва стипендия

Бо мақсади баланд бардоштани сатҳи некуаҳволӣ ва таъмини ҳифзи иҷтимоии аҳолӣ, мутобиқи моддаҳои 147 ва 149 Кодекси меҳнати Ҷумҳурии Тоҷикистон, моддаи 36 Қонуни Ҷумҳурии Тоҷикистон «Дар бораи хизмати давлатӣ», моддаи 16 Қонуни Ҷумҳурии Тоҷикистон «Дар бораи таъмини нафақаи шаҳрвандони Ҷумҳурии Тоҷикистон» ва моддаи 12 Қонуни Ҷумҳурии Тоҷикистон «Дар бораи нафақаҳои суғуртавӣ ва давлатӣ» фармон медиҳам:

Читать далее

Президенти Ҷумҳурии Тоҷикистон Эмомалӣ Раҳмон рамзи таҷлили ҷашни 700-солагии шоири бузурги тоҷик Камоли Хуҷандиро тасдиқ намуданд

Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон рамзи таҷлили ҷашни 700-солагии шоири бузурги тоҷик Камоли Хуҷандиро интихоб карданд.

Рамзи мазкур аз ҷониби Академияи мусаввирии Тоҷикистон, Иттифоқи рассомон ва Донишкадаи санъати тасвирӣ ва дизайн омода гардида, бо иштироки мутахассисони Академияи миллии илмҳо дар бахши ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа мавриди баррасӣ қарор гирифт.

Читать далее

ГУЗАШТАН АЗ ТЕСТИ COVID - 19 РОЙГОН АСТ!

Дар маркази вилоят шаҳри Хуҷанд барои пешгирӣ аз паҳншавии бемории КОВИД-19 дастур шудааст, ки арӯсу домод ва иштирокдорони дигари тӯй бояд пеш аз маросим аз ташхиси коронавируси нав гузаранд. Дар ин бора дафтари матбуоти шаҳри Хуҷанд иттилоъ дод. Ин тасмим дар ҳоле гирифта шудааст, ки аз руи нишондоди «таҳлили даҳрӯзаи охир теъдоди беморони илтиҳоби шуш ва короновирус рӯ ба афзоиш ниҳодааст».

Дар нишасти Ситоди COVID-19 дар маркази вилоят аз он нигаронӣ шудааст, ки дар баъзе аз марказҳои савдову бозорҳо ва ошхонаҳо чораҳои пешгирӣ аз бемории ҳамагир риоя намешавад. Ва аз ҷониби Раиси шаҳр Маъруф Муҳаммадзода зикр гаштааст, ки «дар сурати иҷро нагардидани чораҳо, фаъолияти ин марказҳои савдо бе огоҳӣ қатъ карда мешавад, зеро саломатии шаҳрвандон аз ҳама манфиатҳо боло меистад».

Ба иттилои расмӣ, аз охири моҳи апрел то санаи 3-юми август дар Тоҷикистон, беш аз 7500 нафар ба бемории коронавируси нав гирифтор шуда, зиёда аз 6300 нафар шифо ёфтаанд ва 61 ҳолати фавт ба қайд гирифта шудааст.

Дар ситод аз он изҳори нигаронӣ шудааст, ки бо вуҷуди андешидани тадбирҳои пешгирӣ ва роҳандозии корҳои тарғиботиву ташвиқотӣ риоя нагардидани тавсияҳои Созмони умумиҷаҳонии тандурустӣ ва Вазорати тандурустӣ ва ҳифзи иҷтимоии аҳолии Ҷумҳурии Тоҷикистон аз ҷониби шаҳрвандон ва марказҳои савдою хизматрасонӣ ба чашм мерасад.

Муовини сардори Раёсати тандурустии вилоят Маъруф Ҳоҷибоев иттилоъ дод, ки ҳодисаҳои шиддати зиёди мавҷи дуюми ин бемории сироятӣ дар кишварҳои ҳамсоя моро ором гузошта наметавонад. Таҳлили даҳрӯзаи охир собит менамояд, ки теъдоди беморони илтиҳоби шуш ва короновирус рӯ ба афзоиш ниҳодааст. Мутаассифона, ин беморӣ бидуни нишона зуҳур намудааст, ки ташвишовар гардидааст. Бо вуҷуди бурдани корҳои тарғиботӣ гигиенияи ҷамъиятӣ риоя намешавад, мардум бениқоб дар ҷойҳои ҷамъиятӣ ҳузур доранд. То ҳол оқибатҳои гирифторӣ ба бемории коронавирус «Covid-19»-ро дуруст дарк накардаанд.

Раиси шаҳри Хуҷанд Маъруф Муҳаммадзода ба масъулини дахлдор дастур додааст, ки шаҳрвандоне ки тӯйи хонадоршавӣ мегузаронанд, бояд иштирокчиёни маърака аз тести муайяннамоии коронавирус гузаранд ва ин тадбир баҳри пешгирии сирояти дигар нафарон амалӣ карда мешавад.

Доир ба масъалаи гузаштан аз тест мутахассиси Маркази назорати давлатии санитарӣ - эпидемиологии вилоят Насиб Икромов гуфт, ки гузаштан аз тест барои муайян кардани бемории сироятии коронавирус пурра ройгон мебошад. Тест дар марказҳои саломатии минтақавӣ гузаронида мешавад. Агар шахс дар беморхона бошад, дар ҳамон ҷо аз тест гузашта, ба Маркази назорати давлатии санитарӣ - эпидемиологӣ пешниҳод мекунад. Идораву ташкилот бошад, расман тариқи мактуб муроҷиат мекунанд ва ба таври мутамарказ гузаронида мешавад.

- Дар тани инсон мавҷуд будан ё набудани вируси «Covid-19» дар давоми 8 соат муайян карда мешавад. Барои шахси солим он як маротиба ва барои шахси бемор се маротиба гузаронида мешавад. Нафароне, ки аз ташхис гузаштанду дар худ вирусро пайдо накарданд аз гаштугузор дар ҷойҳои ҷамъиятӣ худдорӣ кунанд. Вобаста ба роҳҳои гузариш ва пешгирии сироятёбӣ ба коронавирус аз ҷониби Маркази ташаккули тарзи ҳаёти солим, кормандони Маркази назорати давлатии санитарӣ – эпидемиологии шаҳру навоҳии вилоят дар вақти гузаронидани санҷиш, рейдҳои муштарак ва вохӯриҳо ба аҳолӣ корҳои фаҳмондадиҳӣ гузаронида шуда истодааст, - гуфт Насиб Икромов. 

Боиси қайд аст, ки оид ба гузаронидани тести муайянкунандаи вируси сироятии «Covid - 19»  дар ҳама соҳаҳо ва ташкилоту идораҳо, ҳамчунин бозору мағоза ва ошхонаҳо аз ҷониби масъулини дахлдор, алалхусус мақомоти иҷроияи ҳоқимияти давлатии шаҳри Хуҷанд чораҳои зарурӣ роҳандозӣ шуда истодааст.

Шаҳбону ОЛИМОВА,

«Ҳақиқати Суғд»

Читать далее