22 September 2020

Суханронии Пешвои миллат Эмомалӣ Раҳмон дар вохӯрии сатҳи баланди Маҷмаи Умумии СММ бахшида ба ҷашни 75-солагии таъсис ёфтани Созмони Милали Муттаҳид

21.09.2020, шаҳри Душанбе

Муҳтарам ҷаноби Раис,
Муҳтарам ҷаноби Дабири кулл,
Хонумҳо ва ҷанобон!

Имсол мо 75-солагии таъсис ёфтани Созмони Милали Муттаҳидро ҷашн мегирем.

Дар тӯли ин солҳо Созмони Милали Муттаҳид ҳамчун сохтори бонуфуз ва беназири байналмилалӣ тавонист ба як платформаи муҳимму фарогири ҳалли мушкилоти мубрами ҷаҳонӣ табдил ёбад.

Читать далее

Паёми видеоии Президенти Ҷумҳурии Тоҷикистон Эмомалӣ Раҳмон дар вохӯрии сатҳи баланди Маҷмаи Умумии СММ бахшида ба 75-солагии таъсис ёфтани Созмони Милали Муттаҳид

Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тариқи видеоконференсия дар вохӯрии сатҳи баланди Маҷмаи Умумии Созмони Милали Муттаҳид бахшида ба 75-солагии таъсис ёфтани Созмони Милали Муттаҳид суханронӣ намуданд.

Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон изҳор доштанд, ки дар тӯли ин солҳо Созмони Милали Муттаҳид ҳамчун сохтори бонуфуз ва беназири байналмилалӣ ташаккул ефта, тавонист ба як платформаи муҳимму фарогири ҳалли мушкилоти мубрами ҷаҳонӣ табдил ёбад.

Читать далее

Исфара: Омодагӣ ба интихоботи Президенти Ҷумҳурии Тоҷикистон дар сатҳи зарурӣ ҷараён дорад

Маҷмӯи тадбирҳои омодагӣ ва корҳои ташкилӣ барои муташаккилона гузаронидани интихоботи Президенти Ҷумҳурии Тоҷикистон дар шаҳри Исфара сари вақт амалӣ мегарданд.

Комиссияи ҳавзавии интихобот оид ба интихоботи Президенти Ҷумҳурии Тоҷикистон «Исфара», №27, ки тибқи талаботи Қонуни конститутсионии Ҷумҳурии Тоҷикистон «Дар бораи интихоботи Президенти Ҷумҳурии Тоҷикистон», бо қарори Комиссияи марказии интихобот ва раъйпурсии Ҷумҳурии Тоҷикистон таъсис дода шудаст, фаъолияти худро пайваста тақвият мебахшад.

Бино бар гуфти раиси комиссияи ҳавзавӣ Расулзода Дилшод Ҷабборӣ аз ҷониби Комиссияи марказии интихобот ва раъйпурсии Ҷумҳурии Тоҷикистон масъалаҳои ташкилӣ ва таъминоти моддии фаъолияти комиссияи ҳавзавӣ ва комиссияҳои участкавии интихобот оид ба интихоботи Президенти Ҷумҳурии Тоҷикистон ҳалли худро ёфтааст.

Аъзои комиссияи ҳавзавӣ фаъолияти худро тибқи Нақшаи тақвимии чорабиниҳои асосӣ оид ба тайёрӣ ва гузаронидани интихоботи Президенти Ҷумҳурии Тоҷикистон бо дарки масъулияти амиқ роҳандозӣ намуда, баҳри дар муҳлатҳои муқарраркардаи қонунгузорӣ амалӣ намудани чорабиниҳои нақшавӣ ҳамарӯза корбарӣ доранд.

Бо мақсади дар сатҳи баланди ташкилию сиёсӣ баргузор намудани ин маъракаи муҳими сиёсӣ 83 участкаи интихоботӣ таъсис дода шудааст.

Ҳудудҳо ва участкаҳои интихоботӣ номгузорӣ ва рақамгузорӣ шуда, рӯйхати участкаҳои интихоботӣ бо зикри ҳудудҳои онҳо вa шумораи интихобкунандагон дар рӯзномаи шаҳрии «Насими Исфара» ба нашр расидааст.

Аз ҷониби раиси шаҳр, дар асоси пешниҳоди комиссияи ҳавзавии интихобот, ҳар як участкаи интихоботӣ барои гузарондани интихобот бо бино ройгон таъмин гардида, масъалаҳои таъмини нақлиёт, воситаҳои алоқа ва дигар масоили таъминоти моддӣ - техникии маъракаи интихоботӣ дар ҳавза ва участкаҳои интихоботӣ ҳал гардидааст.

Рӯихати интихобкунандагони участкаҳои интихоботӣ тартиб дода, биноҳои овоздиҳӣ, қуттиҳои шаффоф ва дигар таҷҳизоти интихоботӣ омода шудаанд.

Бояд тазаккур дод, ки мувофиқи ҳисоби пешакӣ, дар маъракаи интихоботӣ 162105 нафар сокини шаҳри Исфара ширкат меварзанд ва барои дар сатҳи баланди ташкилию сиёсӣ, озод ва шаффофу демократӣ баргузор шудани интихоботи Президенти Ҷумҳурии Тоҷикистон аз ҷониби роҳбарияти мақомоти иҷроияи ҳокимияти давлатии шаҳр тамоми шароиту имконоти зарурӣ фароҳам оварда шудааст.

Иқбол ТЕШАЕВ,

котиби матбуотии раиси шаҳри Исфара

Читать далее

Хуҷанд: Ба ояндаи кишвар бетараф нестем!

Участкаи интихоботии рақами 53 дар назди Муассисаи таълимии давлатии Хонандагони болаёқати шаҳри Хуҷанд воқеъ аст. Участкаи интихоботӣ дар асоси талаботи маъракаи интихоботи Президенти Ҷумҳурии Тоҷикистон ба маъракаи муҳими сиёсӣ ҳамаҷониба омода аст. Котиби участкаи интихоботӣ Марҳабохон Мансурова иттилоъ дод, ки ба участкаи номбурда як қисми сокинони хонаҳои баландошёнаи маҳаллаҳои Сано, Темурмалик (микроноҳияи ҳаштум), 80 – солагии Душанбе ва микроноҳияҳои 4 ва 5-ум дохил мешаванд.

Айни ҳол участкаи интихоботӣ тибқи дастуру супоришҳои ҳавзаи интихоботии «Хуҷанд - 26» фаъолият дошта, рӯйхати интихобкунандагон низ дар арафаи омодагист. То санаи 25 - уми сентябр бояд рӯйхати интихобкунандагон ба қайд гирифта шавад.

- Мутаассифона, дар маҳаллаҳои чорум ва панҷум, ки алҳол минтақаи навобод мебошад, баъзе хонавода ҳузур надоранд ва ё сохтмончиён машғули меҳнат буда, оид ба аъзои оилаи хонавода маълумот надоранд. Аз ин боис барои барӯйхатгирӣ аъзои участка пас аз шом ба маҳаллаҳои номбурда роҳсипор мешаванд. Рӯйхати эҳтимолии овоздиҳандагон 25 ҳазор нафарро ташкил мекунад, - зикр кард раиси участкаи интихоботӣ Муқаддас Азимова.

Дар участкаи интихоботӣ чор ҳуҷраи овоздиҳӣ омода буда, як ҳуҷраи он барои маҷруҳон пешбинӣ шудааст. Гӯшаи иттилоотӣ, овезаҳои тарғиботӣ, қуттӣ барои овоз додан ва қуттии сайёр, ки махсус барои овоздиҳандагони маъюб омода буда, тибқи рӯйхати пешниҳодгардида, аъзои участкаи интихоботӣ дар рӯзи маъракаи сиёсӣ ба хонаҳои шахсони маҷруҳ мераванд. Аз Комиссияи марказии интихобот ба участкаи интихоботӣ сандуқ, муҳр, гӯшаи иттилоотӣ ва дигар лавозимоти зарурӣ дастрас шудааст.

Тавре иттилоъ доданд, участкаи интихоботӣ барои баргузории маъракаи сиёсӣ пурра омода буда, ҳуҷраи тиббӣ бо доруворӣ ва ҳамшираи шафқат, ҳуҷраи модару кӯдак бо бозиҳои гуногун таъмин гардидааст. Таҷҳизоти муосири техникӣ, ба монанди компутер бо тамоми таҷҳизоташ ва телевизор, мизу курсӣ барои меҳмонон - назоратчиёни байналимилалӣ муҳайёст.

Дар бобати риояи масофаи байни интихобкунандагон ва ҳамчунин тарзи баргузории маъракаи интихобот, қонуну қоидаҳои он варақаҳои ташвиқотию тарғиботӣ пешниҳод гардидааст. Инчунин, барои ҳифзи саломатӣ маҳлули тиббии антисептикӣ, дастпӯшак, ҳароратсанҷ ва ниқоб низ гузошта шудааст. Воқеан, ҳар рӯз ба участкаи интихоботии номбурда аз Комиссияи марказии интихобот ва ҳавзаи интихоботии «Хуҷанд - 26» намояндагон ташриф оварда, оид ба самти кори аъзои участка дастуру супоришҳои лозимиро баррасӣ менамоянд.

- Рӯзи интихоботи Президенти Ҷумҳурии Тоҷикистон маъракаи муҳими сиёсӣ буда, мо, нӯҳ нафар аъзои участкаи интихоботии рақами 53 аз ҳавзаи интихоботии «Хуҷанд – 26» кӯшиш ба харҷ медиҳем, ки овоздиҳандагон фаъолона ширкат варзанд, зеро мо ба ояндаи мамлакат, ба рушду тараққиёти кишвар бетараф нестем, - гуфт дар хотима М. Азимова.

Тавҳида ҶӮРАЕВА,

«Ҳақиқати Суғд»

Читать далее

ИНТИХОБИ НОМЗАДИ АРЗАНДА – КАФОЛАТИ РУШДИ БОСУБОТИ КИШВАР

Чуноне ки ҳамагон медонанд, тибқи қарори ҷаласаи якҷояи Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон аз 6 августи соли равон, санаи 11-уми октябри соли 2020 интихоботи навбатии Президенти мамлакат баргузор мешавад. Алҳол, 5 номзади ҳизбҳои сиёсӣ ва созмонҳои дигари ҷамъиятии дар ҳудуди кишвар амалкунанда, тибқи Қонуни конститутсионии Ҷумҳурии Тоҷикистон "Дар бораи интихоботи Президенти Ҷумҳурии Тоҷикистон", сабти ном карда шудаанд.

Дар Анҷумани ХIV ғайринавбатии ҲХДТ, ки санаи 3-юми сентябри соли равон баргузор гардид, номзадии Раиси муаззами ҳизб, Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон барои аз нав интихоб шудан ба ҳайси Президенти кишвар якдилона пешниҳод карда шуд.

Қаблан номзадии Эмомалӣ Раҳмонро барои интихоб гардидан ба ин мансаби воломақом анҷуманҳои Федератсияи Иттифоқҳои касабаи мустақили Тоҷикистон ва Иттифоқи ҷавонони Тоҷикистон низ пешниҳод карда буданд, ки ин далели боварии қавии ҳизбу ҳаракатҳои фаъоли кишвар ба иродаи созандаи Президенти кунунии мамлакат буда, дар ҳақиқат, ин фарди ҷонфидои миллат номзади беҳтарину арзанда ба мансаби Президенти Тоҷикистони соҳибистиқлол мебошанд.

Таърих гувоҳ аст, ки бо иқдомҳои дурандешонаи ин марди шариф Тоҷикистон аз вартаи нобудшавӣ наҷот дода шуда, агар беғазарона баҳо диҳем, давлати мо тӯли солҳои охир рӯ ба рушди босубот ниҳодааст.

Барои исботи ин гуфтаҳо ақидаҳои хешро мехоҳам, бо чанд шарҳу далелҳо иброз намоям.

Эмомалӣ Раҳмон дар Иҷлосияи ХVl таърихии Шӯрои Олии Ҷумҳурии Тоҷикистон (соли 1992) новобаста аз ниҳоят ҷавониашон (ҳамагӣ 40-сола буданд) ва вазъияти хеле шадиди буҳрони сиёсию иқтисодии кишвар зимоми идоракунии давлатро ба уҳда гирифта, ба вакилону иштирокчиёни иҷлосия ва мардуми Тоҷикистон қавл дода буданд, ки пеши роҳи ҷанги шаҳрвандиро қотеъона гирифта, ҳамаи гурезагонро ба Ватан бармегардонанд ва ин фарди дурандешу соҳибхирад ба қавли додаашон пурра вафо карданд.

Собиқ дабири кулли Созмони Миллали Муттаҳид Кофе Аннан ин хизматҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон Эмомалӣ Раҳмонро таъкид карда гуфтааст:

«Тоҷикистон барои бисёр мамлакатҳои дигар дар ҳалли муноқишаҳои дохилӣ ва пойдории сулҳу ваҳдат сабақи беназир дорад ва дар ин раванд, нақши Эмомалӣ Раҳмон калидӣ аст».

Дар тӯли ин солҳо бо заҳматҳои шабонарӯзии Сарвари давлат ва дастгирии мардум кишвари ҷангзадаи мо ба як минтақаи тинҷу ороми сайёра табдил ёфта, муаммоҳои мавҷудаи иқтисодию иҷтимоӣ зина ба зина ҳалли худро ёфта истодааст.

Ҷоизи зикр аст, ки дар муддати на чандон тӯлонии ҷанги шаҳрвандӣ (солҳои 1992-1997) ба давлати тоҷикон хеле зарарҳои ҷиддии моддию маънавӣ расонида шуда, душманони миллати мо нақшаи аз харитаи сиёсӣ нест кардани Тоҷикистонро таҳрезӣ карда буданд, ки хушбахтона, қарори ниҳоят муҳиму таърихии вакилони Иҷлосияи ХVl Шӯрои Олии Ҷумҳурии Тоҷикистон бобати ба ҳайси Раиси Шӯрои Олии ҷумҳурӣ (Сардори давлат) интихоб намудани як чеҳраи нави сиёсӣ, шахси ватанпарасту роҳбари дар иҷрои қавлҳои додааш устувор, инсони мардумсолор, босабру таҳаммул ва шахсияти барои халқу миллаташ ҷонфидо, Президенти кунунии кишвар Эмомалӣ Раҳмон, барои то ба дараҷаи имрӯза дар арсаи ҷаҳонӣ мусбӣ муаррифӣ гардидани Тоҷикистони азизи мо, замина гузошт.

Дар тули ин солҳо Эмомалӣ Раҳмон тавонистанд, ки кулли мардуми кишварро баҳри тақвият бахшидани корҳои ободонию созандагӣ дар атрофи Ҳукумат сарҷамъ намуда, пас аз ба даст овардани оромии сиёсӣ ва ҷилавгирӣ намудан аз қонуншиканиҳои бесобиқа дар як қатор минтақаҳои кишвар бе истифодаи яроқҳои оташфишон ба ҳалли масъалаҳои рушди босуботи иқтисодию иҷтимоии мамлакат эътибори махсус дода шуда истодааст.

Дар бораи амалигардонии тадбирҳои рушди иқтисодию иҷтимоии кишвар, сиёсати дохилию хориҷии Ҳукумат дар паёмҳои ҳарсолаи Президенти Ҷумҳурии Тоҷикистон ба Маҷлиси Олии мамлакат муфассал маълумот дода мешавад ва дар Паёми навбатӣ Эмомалӣ Раҳмон вобаста ба раванди иҷрои барномаи пешазинтихоботиашон дар давраи солҳои 2013 – 2020 ахбороти хеле ҷолибро пешниҳод карданд.

Қабл аз дар ин бобат овардани баъзе маълумотҳои оморӣ мехостам, таъкид намоям, ки ҷанги шаҳрвандии дар кишвари мо солҳои 90 – уми асри гузашта баамаломада ба иқтисодиёти давлати тоҷикон бештар аз 10 млрд. доллари ИМА зарари молиявӣ расонида буд.

 Рушди иқтисодию иҷтимоии Тоҷикистонро дар зарфи 29 соли охир ё худ танҳо 7 соли давраи интихоботи гузашта беғаразона таҳлил намоем, хуб дарк мекунем, ки тӯли ин солҳо таҳти Сарварии Эмомалӣ Раҳмон давлати мо ба дастовардҳои ниҳоят бузург ноил гардидааст.

 Масалан, соли 2019 суръати афзоиши воқеии маҷмӯи маҳсулоти дохилии Ҷумҳурии Тоҷикистон 7,5 фоизро ташкил дода, ин нишондиҳанда аз ҳисоби зиёд шудани ҳаҷми истеҳсоли маҳсулоти саноатӣ ба андозаи 13,4 фоиз, маҳсулоти кишоварзӣ 7,1 фоиз, гардиши савдо 8 фоиз ва хизматрасониҳои пулакӣ 1,6 фоиз таъмин карда шуд.

 Дар ҳафт соли охир рушди иқтисодиёти кишвар ҳамасола ба ҳисоби миёна дар сатҳи 7 фоиз таъмин гардида, маҷмӯи маҳсулоти дохилӣ аз 45,6 миллиард сомонӣ то ба 78 миллиард сомонӣ афзоиш ёфт.

 Дар ин давра, ҳаҷми умумии даромади буҷет қариб ду баробар афзуда, аз 12 миллиард сомонии соли 2013 ба 23 миллиард сомонӣ баробар шуд.

 Тайи солҳои зикршуда даромади пулии аҳолӣ беш аз ду баробар ва музди меҳнати миёнаи як корманд 2,4 баробар афзоиш пайдо кард. Бақияи пасандозҳо дар низоми бонкии кишвар соли 2019 беш аз 9,5 миллиард сомониро ташкил дода, дар ҳафт соли охир 45 фоиз зиёд гардид.

 Сатҳи камбизоатӣ то ба 27,5 фоиз паст шуда, синни дарозумрии миёнаи шаҳрвандон то 75 сол боло рафт. Ҳамзамон бо ин, тибқи таҳлилҳо, дар замони соҳибистиқлолӣ нишондиҳандаи умумии фавт қариб ду баробар, аз ҷумла фавти кӯдакони синни то панҷсола 3,2 баробар кам шудааст.

 Дар ин давра аҳолии Тоҷикистон аз панҷуним миллион қариб ба 9,5 миллион нафар расида, беш аз 70 фоиз афзудааст.

 Саҳми бахши хусусӣ дар маҷмӯи маҳсулоти дохилӣ соли 2013-ум 54 фоиз буд ва ин нишондиҳанда соли 2019 ба 70 фоиз расонида шуд.

 Рақамҳои зикргардида аз он шаҳодат медиҳанд, ки барномаи дар соли 2013 пешниҳоднамудаи Президенти кишвар Эмомалӣ Раҳмон барои 7 соли қаблӣ дар маҷмӯъ пурра иҷро гардидааст.

 Дар тӯли ин солҳо муносибатҳои хориҷии давлати мо аз рӯи принсипи «Сиёсати дарҳои кушод» бо тамоми давлатҳои наздику дур ба роҳ монда шуда, бо ташаббуси Пешвои миллат бисёр чорабиниҳои сатҳи байналмилалӣ дар Тоҷикистон гузаронида мешаванд ва дар ин бобат низ давлати тоҷикон дар арсаи байналхалқӣ нек муаррифӣ шуда истодааст.

Ҳар як сокини кишвари мо огаҳӣ дорад, ки пас аз қабул гардидани ҳадафи чоруми стратегии Ҳукумати Ҷумҳурии Тоҷикистон бобати саноатикунонии устувори иқтисодиёти кишвар, Сарвари давлат ба ҳар шаҳру ноҳияҳое, ки сафар намоянд, ба масъалаи рафти иҷрои барномаҳои таъсисдиҳии корхонаҳои саноатӣ бештар эътибор дода, дар маросими баистофодабарӣ додани корхонаҳои хурду бузурги саноатӣ бевосита иштирок меварзанд.

Натиҷаи ҳамин буд, ки дар ҳаҷми умумии маҷмӯи маҳсулоти дохилӣ ҳиссаи маҳсулоти саноатӣ рӯз ба рӯз афзуда истодааст ва ин тарзи корбарӣ дар ҳамаи сатҳҳои ҳокимият, бешубҳа, баҳри ҳарчи зудтар аз мамлакати аграрӣ-саноатӣ ба давлати индустриалӣ-аграрӣ табдил ёфтани Тоҷикистон мусоидат хоҳад намуд.

 Ҳамаи мо шоҳиди он будем, ки санаҳои 12-16 сентябри соли равон ҳангоми сафари кории хеш ба вилояти Суғд Пешвои миллат муҳтарам Эмомалӣ Раҳмон дар шаҳрҳои Панҷакенту Хуҷанд ва ноҳияҳои Айнӣ, Зафаробод, Мастчоҳ, Ашт, Бобоҷон Ғафуров, Ҷаббор Расулов як қатор корхонаҳои саноатӣ, бинои мактабҳои замонавӣ, иншооти иҷтимоию фарҳангӣ ва маъмуриро ба истифода дода, дар чорабиниҳои ҷашни 5500 – солагии шаҳраки Саразм ширкат варзида, бо раванди корҳои ободонию созандагӣ, сатҳи зиндагии мардум ва рафти иҷрои дастуру супоришҳои қаблан додаашон дар маҳалҳо бевосита шинос шуданд.

Вале, новобаста аз комёбию бурдбориҳои беназири дар ҳама сатҳҳои рушди иқтисодию иҷтимоии мамлакат тӯли солҳои Истиқлолият ба даст овардашуда, ки ҷиҳати ҳарчи зудтар ноил шудан ба ҳадафи олии Ҳукумат - «Таъмини зиндагии шоистаи ҳар сокини кишвар» мусоидат карда истодааст, ҳоло ҳам як қатор муаммоҳои ҳалталаб вуҷуд доранд, ки дар аксар ҳолатҳо баъзе ашхоси ғаразгӯю душманситез аз ин камбудиҳо сӯйистифода мекунанд.

Масалан, аз тарафи бархе аз масъулин сари вақт ё худ пурра амалӣ нагардонидани дастуру супоришҳои Сарвари давлат, вайрон карда шудани одоби хизмати давлатӣ, нисбати корафтодагон беэътиноӣ кардани эшон, роҳ додани баъзе роҳбарони вазорату идораҳои ҷумҳуриявӣ ва мақомоти дигари идоракунии давлатӣ ба беадолатиҳо нисбати ҷобаҷогузории кадрҳо, тарбияи мутахассисони ҷавону соҳибтаҷриба, даст задани онҳо ба амалҳои хешутаборчигию коррупсионӣ, сарфи назар кардани адолати иҷтимоӣ, роҳ додан ба фориғболию дағалмуомилагиҳо нисбати зердастону дигар шаҳрвандон ва дигар омилҳо боиси коста шудани боварии мардум ба мақомотҳои давлатӣ мегардаду аз ин фурсатҳо мухолифони давлату Ҳукумат истифода бурда, тавассути шабакаҳои иҷтимоию дигар воситаҳо ба бадномкунии сарварони давлату Ҳукумати кишвар даст мезананд.

Агар хушбинона назар афканем, Пешвои миллат ҳамеша ҳангоми ба мансабҳои воломақом таъин намудани кадрҳо таъкид менамоянд, ки вазифаи ҳар як роҳбари мақомоти давлатӣ шунидани арзу ниёзи мардум буда, мову Шумо хизматгори халқ ҳастем ва ҳар як роҳбару масъулини бо дасту нияти пок фаъолиятдошта ҳатман сазовори обрӯю эътибори хоса хоҳад шуд.

Дар ҳақиқат, ҳангоми аз тарафи кулли роҳбарону хизматчиёни давлатӣ дар фаъолияти хеш ба инобат гирифтани ин насиҳатҳои падаронаи Пешвои миллат ҳалли тамоми муаммоҳои ҷойдошта бароямон осон гардида, ба рушди бонизоми ҷомеаи шаҳрвандӣ ноил мегардем ва ғаразгӯиҳои мухолифони сарсахти давлати мо куллан коҳиш меёбад.

Боиси таассуф аст, ки як гурӯҳ ҳамватанони мо, ки худро «ватанпараст» меҳисобанду дар ҳар мавридҳои барояшон қулай Тоҷикистон ва роҳбарияти онро бадном карданӣ мешаванд, наздикшавии маъракаҳои интихоботии парлумону президентиро мавриди хеле беҳтари амалигардонии ғаразҳои сиёсиашон меҳисобанд.

Масалан, мушоҳидаҳои шахсии банда аз он шаҳодат медиҳанд, ки дар арафаи чандин интихоботҳои қаблӣ бо пешоварди ҳар хел баҳонаҳо ҲСДТ аз ширкат намудан дар интихобот даст мекашад, вале роҳбарону аъзоёни он боре ҳам ба худ савол намедиҳанд, ки ҳизби онҳо барои ҷомеа чӣ хизмате кардаасту дар асл чӣ қадар аъзою чанд нафар тарафдори ҳақиқӣ доранд.

 Аслан ҳизбе, ки танҳо дар арафаи интихоботҳо бо бадномкунии давлату дигар ҳизбҳо ё худ Сарвари давлат аз мавҷудияти хеш хабар медиҳад, ҳеҷ гоҳ ба дастгирии мардуми оқил ноил нахоҳад шуд.

 Ё худ дар оғози паҳншавии бемории сироятии коронавирус хоинону душманони миллати тоҷик аз хориҷи кишвар истода ҳадс мезаданд, ки Ҳукумати Тоҷикистон дар мубориза ба ин вабои аср омода нест ва оқибатҳои ин беморӣ барои халқи тоҷик хеле даҳшатбор хоҳад буд.

 Вале он ҳамватанони гумроҳшудаи мо ва хоҷагони хориҷии онҳо бехабар монданд, ки дар мавридҳои мушкил мардуми тоҷик ваҳдатсолору муттаҳид шуда, бо якҷоягии давлату Ҳукумат пеши роҳи ҳама гуна хатарҳоро мегиранд ва намегузоранд, ки сокинони кишвари азизашон хору залил гарданд. Таъкид намудани он низ бамаврид мебошад, ки ба ин вабои аср ягон давлати абарқудрати дунё ҳам пешакӣ омодагӣ надидааст ва бадномкунию таъназании гурӯҳе аз хоинони миллати мо худ нишони бехирадии онон буд.

Дар мавриди интихоби номзадҳо ба мансаби Президенти кишвар гуфтаниам, ки ҳамаи онҳое, ки расман аз тарафи Комиссияи марказии интихобот ва раъйпурсии Ҷумҳурии Тоҷикистон номнавис карда шудаанд, фарзандони ин халқу миллат мебошанд ва мехоҳанд, барномаҳои хешро баҳри беҳтар намудани сатҳу сифати зиндагии мардум, дар арсаи байналмилалӣ баланд бардоштани обрӯю нуфузи Тоҷикистон ва ҳалли муаммоҳои мавҷудаи иқтисодию иҷтимоии мамлакат амалӣ гардонанд.

Ба сокинони кишвари мо зарур аст, ки лаёқати ҳар як номзадро ҳаматарафа омӯхта, дар арсаи байналхалқӣ доштани обрӯи нуфузи хосаи онҳоро ба инобат гирифта, имкониятҳои аслии ононро ҷиҳати ҷилавгирӣ намудан аз хатари оқибатҳои буҳронҳои иқтисодию сиёсии вобаста ба протсессҳои ҷаҳонишавӣ ва таъсири манфии ин вабои аср – бемории сироятии коронавирус пайдошаванда дақиқ таҳлил намуда, пас овозашонро ба номзади беҳтарину арзанда диҳанд ва бо ин амал қарзи шаҳрвандии хешро баҳри мустаҳкам намудани пояҳои давлатдории кишвари соҳибистиқлоламон иҷро намоянд.

 Карамулло Одилов,

 собиқадори хизмати давлатӣ,

 Корманди шоистаи Тоҷикистон,

 Аълочии молияи Иттиҳоди Шӯравӣ

 ва Ҷумҳурии Тоҷикистон, узви ИЖТ

Читать далее