ҶАВҲАРИ СОҲИБИСТИҚЛОЛӢ

Подробности статьи

Эмомалӣ Раҳмон: Бовар дорам, ки то ҷашни муқаддасу бузурги миллиамон - 30 - солагии Истиқлолияти давлатӣ мо боз корҳои зиёди бунёдгаронаро амалӣ мекунем, тамоми захираву имкониятҳоро барои бунёди корхонаҳои хурду бузург сафарбар менамоем, барои ҳамватанонамон ҷойҳои нави корӣ муҳайё месозем ва сатҳи некӯаҳволии мардуми кишварамонро боз ҳам беҳтар мегардонем.

Панҷакенти бостон як порчаи Тоҷикистони азиз, сарзамини муқаддас, зодбуми бузургмардони миллат аст. Ин сарзамин ба олам Одамушшуаро Абӯабдуллоҳ Рӯдакиро дода, бо ҳамин миллати тоҷикро шӯҳраи дунё гардонидааст. Дар ин сарзамин Лоиқи бузургвор ба дунё омадаву бо каломи ноби худ қалби оламиёнро тасхир намудааст. Панҷакент бо ёдгории худ - шаҳри Саразм, ки нишонаи ибтидоии ташаккулёбии шаҳрсозии гузаштагонамон мебошад, байни ёдгориҳои аҳди қадим беназир аст.

Баҳри мардуми Панҷакент ҳамаи ин боиси сарбаландӣ, ифтихору шарафмандӣ аст ва ҳамзамон баҳри ҳар як сокини ин шаҳр қарзу вазифа аст, ки ба ин арзишҳои миллӣ арҷ гузоранду эҳтирому ҳифз намоянд.

Соҳибистиқлол гардидани мамлакатамон дар рӯзгори мардуми Панҷакент дигаргуниҳои куллӣ ба амал овард. Симои шаҳр тарҳ ва таровати тоза гирифт. Чунонки ба ҳамагон маълум аст, дар замони шӯравӣ қисмати бештари заминҳои обёришавандаи шаҳр ба кишти тамоку нигаронида шуда буд, ки ин зироат, албатта, ҷиҳатҳои хоси мусбӣ ва манфии худро дошт. Баҳри пешбурди рӯзгори сокинон мусоидат кунад ҳам, мушкилиҳои хешро дошта, ба саломатии мардум, пеш аз ҳама, таъсири манфӣ мегузошт.

 Бо ғамхориву дастгириҳои пайвастаи Пешвои муаззами миллат давоми солҳои соҳибистиқлолӣ дар шаҳр баҳри пешбурди соҳаҳои саноат, коркарди ашёи хоми саноатӣ, кишоварзӣ шароитҳои мусоид фароҳам оварда шуд. Даҳҳо муассисаҳои таълимӣ, нигаҳдории тандурустӣ, биноҳои истиқоматӣ, иншоотҳои таъиноти иҷтимоиву фарҳангӣ бунёд гардиданд.

Таъминот бо оби ошомиданӣ дар маҳаллаҳои шаҳр ва бахусус дар ҷамоатҳои деҳот сол аз сол рӯ ба беҳбудӣ оварда истодааст. Роҳҳои байнишаҳрӣ, дохилишаҳрӣ, байни ҷамоатҳои деҳот ва маҳаллаҳо торафт обод гардида истодаанд. Чанде қабл бо дастгирии Мақомоти иҷроияи ҳокимияти давлатии вилоят таъмиру азнавсозӣ гардидани пойгоҳҳои обкашӣ баҳри пешрафти зироаткории деҳқонон мусоидат намуда, боис бар он шуданд, ки ҳосили дастранҷи марди деҳқон афзун ва бозори истеъмолӣ фаровон гардад.

Омодагиҳо ба ҷашни фархундаи миллат - 30 - солагии Истиқлолияти давлатии Тоҷикистон ва ба ин муносибат эълон гардидани 1300 рӯзи ободонӣ ва бунёдкорӣ ба истиқболи 30 - солагии Истиқлолияти давлатии Тоҷикистон дар мамлакат бар он водор намуданд, ки баҳри истиқболи шоистаи ин санаи таърихӣ нақшаҳо мушаххас тарҳрезӣ гарданд. Дар раванди амалҳои созандагиву бунёдкорӣ баҳри бо армуғонҳои шоиста пешвоз гирифтани ҷашни ҳумоюнии кишвар бо назардошти рушди соҳаҳои иқтисодиёт, саноат, маориф, нигаҳдории тандурустӣ, кишоварзӣ, инфрасохтори иҷтимоӣ бунёди 405 иншооти таъиноти гуногун ба нақша гирифта шуд.

Пас аз эълон гардидани 1300 рӯзи меҳнати зарбдор ба муносибати 30-солагии ҷашни Истиқлолият ва ҳидоятҳои Пешвои муаззами миллат дар бобати дар ҳар шаҳру деҳот, деҳаҳои дурдаст бунёд кардани таълимгоҳ, кӯдакистон, варзишгоҳҳо, ҳаммом, кошонаи ҳусн, таъсиси гармхонаву сардхона, боғҳои интенсивӣ шаҳри Панҷакент ба як сохтмонгоҳи азим табдил ёфт.

Бо дастгирии Ҳукумати ҷумҳурӣ, Мақомоти иҷроияи ҳокимияти давлатии вилоят, соҳибкорони маҳаллӣ биноҳои баландошёнаи истиқоматӣ, таълимгоҳҳо, муассисаҳои табобатӣ, коргоҳҳои саноатӣ, дигар иншооти инфрасохторӣ бунёд ёфтанд.

Ҷоиз ба зикр аст, ки аз теъдоди 405 иншоот, ки бунёдашон то ҷашни 30 - солагии Истиқлолияти давлатии Ҷумҳурии Тоҷикистон ба нақша гирифта шудааст, соли 2018-ум 81 адад, соли 2019-ум 161 иншоот мавриди баҳрабардорӣ гашта, то имрӯз ҳамагӣ 277 адад иншооти мухталиф ба истифода дода шудаанд.

Мардуми Панҷакенти бостон тайи ду-се соли охир заҳмати садоқатмандонаю зарб- дорона доштанд, чунки ба ду ҷашни бошукӯҳ омодагӣ медиданд: 30 - солагии Истиқлолияти давлатии кишвар ва ҷашни 5500 - солагии Саразм. Арҷ гузоштан ба ин ёдгории беназири ниёгон ва таҷлили сазовору шоистаи 5500 - солагии Саразм аз панҷакентиён омодагии нуктасанҷона ва ҳамаҷонибаро тақозо менамуд. Зеро дар таҷлили ин ҷашн ширкати зумраи меҳмонони олиқадр – олимон, муҳаққиқон, муаррихони ёдгориҳои таърихӣ аз бисёр кишварҳои олам дар назар дошта шуда буд. Баҳри таҷлили сазовори ҷашни 5500-солагии Саразм нақша - чорабинии алоҳида тарҳрезӣ ва бунёди даҳҳо иншоот назардошт шуда буд.

Таҷлили бошукӯҳи ин ҷашн, ки рӯзи 12-уми сентябри соли равон бо иштироки Асосгузори сулҳу ваҳдати миллӣ- Пешвои муаззами миллат, Президенти мамлакат муҳтарам Эмомалӣ Раҳмон сурат гирифт ва ба корҳои созандагиву бунёдкории сокинони Панҷакент, ба ҳар як иншооти ин шаҳри бостонӣ баҳои баланд додани Ҷаноби Олӣ боиси рӯҳбаландиву ифтихормандии ҳар як шаҳрванди ин шаҳри куҳанбунёду тозаҷавон гардид. Албатта, ин нишонаи изҳори ризомандӣ ва сипосмандии беҳудуди сокинони шаҳр аз сиёсати мардумпарваронаи Пешвои муаззами миллат аст, ки баҳри пешрафту шукуфоии Ватану сарзамини хеш фидокорона заҳмат мекашанд.

Бояд гуфт, ки ҳар сафари кории Президенти мамлакат ба шаҳри Панҷакент пайки ободониву бунёдкорӣ оварда, ин навбат низ чандин корхонаҳои истеҳсолӣ, муассисаҳои соҳаҳои маориф, нигаҳдории тандурустӣ, инфрасохтори соҳаи сайёҳӣ мавриди баҳрабардорӣ қарор гирифтанд, ки коргоҳи ҶСП «Мармари Саразм», бинои иловагии Беморхонаи марказӣ бо 200 кат ва 180 ҷойи корӣ, меҳмонхонаи «Саразм-Плаза» аз ҷумлаи онҳоанд.

Эътибор ба рушди соҳаи афзалиятнок

Дар Панҷакент баробари сол ба сол бунёд намудани муассисаҳои нави таълимӣ ва ба ин васила шароити мусоид фароҳам овардан ба таҳсилоти насли наврас, бахусус дар деҳоти дурдаст ҳамчунин ба баланд бардоштани сатҳу сифати таълиму тадрис эътибори ҷиддӣ зоҳир карда мешавад. Ҳини сафари кории худ ва ширкат дар таҷлили ботантанаи ҷашни 5500-солагии шаҳри Саразм Пешвои муаззами миллат таълимгоҳи №72-ро мавриди баҳрабардории муҳассилон қарор дода, ба азму иродаи устодону омӯзгорони шаҳр ҷиҳати таълими фанҳои дақиқ баҳои баланд доданд. Ин қадршиносӣ омӯзгоронро, албатта, ба иҷрои пурмасъулияттари рисолати худ тақозо менамояд.

Дар радифи корҳои созандагии муассисаҳои таълимӣ давоми як-ду соли охир дар деҳаҳои Нофин, Марғузор, Ҳафтруди Ҷамоати деҳоти Шинг, деҳаҳои Артуч ва Яккахонаи Ҷамоати деҳоти Рӯдакӣ, деҳаи Пушти Қӯрғон ва Моғиёни Ҷамоати деҳоти Моғиён, шаҳраки Саразм, Ҷамоати деҳоти Хурмӣ мактабҳои нав бунёд ва ба истифода дода шуданд.

Феълан дар ҳудуди шаҳр ва ҷамоатҳо то ҷашни 30-солагии Истиқлолияти давлатии Тоҷикистон бунёди бинои мактаби нав дар таълимгоҳи №49 деҳаи Падруди Ҷамоати деҳоти Шинг, мактаби №113 деҳаи Тагоби Халқи Ҷамоати деҳоти Вору, мактаби №38-и деҳаи Яккасадаи Ҷамоати деҳоти Саразм, мактаби №116 деҳаи Рӯзиобноки Ҷамоати деҳоти Ёрӣ, сохтмони синфхонаҳои иловагӣ дар назди таълимгоҳҳои №60 деҳаи Рукнободи Ҷамоати деҳоти Вору, мактаби №94-и деҳаи Пушти Қӯрғони Ҷамоати деҳоти Моғиён ва назди мактаби №17 деҳаи Зебон давом дорад. Дар деҳаи Навободи Ҷамоати деҳоти Лоиқ Шералӣ аз ҳисоби мақомоти маҳаллӣ ва сокинони деҳа сохтмони муассисаи томактабӣ давом дорад.

Алҳол дар назди 44 мактаби таҳсилоти умумӣ Маркази инкишофи кӯдак таъсис дода шудааст, ки 880 кӯдакро фарогир буда, таҳсилоташ ғайрианъанавӣ аст.

Дар муассисаҳои таълимии шаҳр 139 синфхонаҳои компутерӣ мавҷуд буда, дорои 1571 адад компутер мебошанд. Давоми нӯҳ моҳи соли 2020-ум 21 адад компутери нав харидорӣ гардид

Соли равон муҳассилони макотиби шаҳр дар олимпиада ва озмунҳои вилоятиву ҷумҳуриявӣ иштирок намуда, хонандаи мактаби №15 шаҳр соҳиби медали тилло, ду нафар хонандаи мактаби №6 соҳиби медали нуқра ва ду нафар муҳассили мактаби №15 соҳиби медали биринҷӣ гардиданд. Ҳамчунин, 10 нафар хонандагони макотиби шаҳр дар озмуни ҷумҳуриявии «Фурӯғи субҳи доноӣ...» соҳиби ҷойҳои ифтихорӣ гардиданд.

Саноатикунонии босуръати мамлакат - ҳадафи чоруми миллӣ

Шаҳри бостонии Панҷакент потенсиали бойи ташкил намудани коргоҳҳои саноатиро дорост. Бо ибтикори Асосгузори сулҳу ваҳдати миллӣ-Пешвои муаззами миллат саноатикунонии босуръати мамлакат ҳадафи чоруми миллӣ эълон гардиду дар доираи амалҳои созандаву бунёдкорона таъсиси коргоҳҳои нав ба нави саноатӣ шурӯъ гардид. Шоистаи зикр аст, ки бахусус аз ҷониби соҳибкорони маҳаллӣ иродаи бунёди коргоҳҳои саноатӣ сар зад. Тавре мудири шӯъбаи иқтисод ва савдои мақомоти иҷроияи ҳокимияти давлатии шаҳри Панҷакент Фарҳод Ҳамзаев иброз дошт, танҳо давоми соли 2018-ум дар ҳудуди шаҳр 12 коргоҳи саноатӣ таъсис гашт. Ҳамин тавр соли 2019 низ 12 адад корхонаи саноатӣ ба фаъолият шурӯъ кард. Коргоҳи истеҳсоли хиштҳои сементӣ ва қуму шағали «Маҳмадқул Меликов», ки бо иқдоми соҳибкори маҳаллӣ Маҳмадқул Меликов таъсис ёфт ва корхонаи ҶДММ «Маҳсул», ки сару либоси мактабӣ истеҳсол менамояд ва бо ибтикори соҳибкор Асатилло Муродиллоев бунёд ёфтааст, аз ҷумлаи онҳост.

Давоми нӯҳ моҳи соли равон ҳашт корхонаи саноатӣ ба фаъолият шурӯъ намуд, ки корхонаи коркарди қуму шағал (бо иқдоми соҳибкор Фаррух Камолов), корхонаи истеҳсоли ширу қаймоқ (таъсисгар соҳибкор Аслам Эшназаров), корхонаи банду-басти меваи хушк аз ҷониби соҳибкор Ҳоҷӣ Ғайрат Бойалиев аз зумраи онҳост. То охири сол боз таъсис додани шаш адад корхонаи саноатӣ дар назар аст.

Панҷакент – хазинаи тиллоии тамаддуни ниёгон

Шаҳри Панҷакент чун яке аз марказҳои фарҳангии Тоҷикистони азиз бо ёдгориҳои беназири таърихӣ, шаҳраки бостонии Саразм, Панҷакенти қадим, оромгоҳи устод Абӯабдуллоҳ Рӯдакӣ, кӯҳҳои Фон ва дар маҷмӯъ беш аз 352 ёдгориҳои таърихӣ, манзараҳои нотакрори табиӣ, мавзеъҳои истироҳативу сайёҳии Кӯли Калон ва Ҳафткӯл кайҳост, ки мавриди таваҷҷӯҳи сайёҳони ҷаҳон қарор гирифтааст.

Дар шаҳри Панҷакент 22 ширкати сайёҳӣ, ташкилоти ҷамъиятии шӯрои «Зарафшон» оид ба сайёҳӣ, 4 маркази иттилоотии сайёҳӣ, даҳ адад меҳмонхона, 22 хонаҳои меҳмонқабулкунӣ, пойгоҳи кӯҳнавардиву сайёҳии Артуч, пойгоҳи сайёҳии Марғузор воқеъ дар соҳили кӯли шашуми силсилакӯлҳои Ҳафткӯл фаъолият бурда, барои саёҳату истироҳати сайёҳони дохиливу хориҷӣ дар онҳо шароит фароҳам оварда шудааст.

Ширкатҳои сайёҳии «Кӯҳандиз», «Саёҳати Саразм» ва « Саёҳати кӯҳҳои Помир» соли равон дар Намоишгоҳи байналмилалии сайёҳии «ФИТУР» и шаҳри Мадриди мамлакати Испания иштирок намуда, Ҷумҳурии Тоҷикистонро дар сатҳи ҷаҳон муаррифӣ намуданд.

Рушди ҳунарҳои мардумӣ – идомаи анъанаҳои ниёгон

Мардуми шаҳри Панҷакент бо ҳунармандии худ дар арсаи олам маъруфу машҳур гаштаанд. Байни сокинони шаҳр бештар аз 200 намуди ҳунармандии миллӣ равнақу ривоҷ ёфтааст. Бахусус, бо эҳтимоми Асосгузори сулҳу ваҳдати миллӣ - Пешвои муаззами миллат роҳ кушодан ба рушду такомули ҳунармандии миллӣ баҳри сокинони ин шаҳри бостонӣ шароитҳои васеъ фароҳам овард.

Мудири бахши ҳунармандии миллӣ А.Сафиев мегӯяд: Дар бисту ду маҳаллаи шаҳр тамоми намудҳои ҳунармандии миллӣ ривоҷ ёфта, эъҷози дастони ҳунармандон дар намоишгоҳҳо, чорабиниҳои фарҳангӣ намоиш дода мешавад. Мардуми Ҷамоати деҳоти Чинор дар алочабофӣ, намадбофӣ, бофтани қолини дастӣ ҳамто надоранд. Сокинони 22 деҳаи Ҷамоати деҳоти Саразм, ки бештар аз 38 ҳазор аҳолӣ дорад ва калонтарин ҷамоати деҳот маҳсуб меёбад, бо ҳунарҳои дӯхтани ҷомаву тоқии миллӣ, гилембофӣ, яккабанддӯзӣ, зардӯзӣ, кулолгарӣ, оҳангарӣ, сӯзанидӯзӣ машғул буда, маҳсули дастранҷи ҳунармандони ин ҷамоат на танҳо дар қаламрави мамлакатамон, балки дар мамолики хориҷа низ харидоргир аст. Мардуми Ҷамоати деҳоти Хурмӣ ҳам аҷаб пурҳунаранд ва бо кулолгарӣ, оҳангарӣ, сабадбофӣ, қуроқдӯзӣ машғуланд.

Дар назди Мактаби санъати бачагонаи шаҳр Маркази таълимӣ - истеҳсолӣ фаъолият дорад, ки дар он насли наврас бо омӯзиши намудҳои гуногуни ҳунармандии миллӣ, аз ҷумла наққошӣ, кундалнигорӣ ва дигарҳо фаро гирифта шудаанд.

Сокинони шаҳри Панҷакент имрӯз бо шукрона аз рӯзгори осоишта, сулҳу суботи кишвар баҳри саҳм гузоштан ба пешрафту шукуфоии Ватани азизамон заҳмати фидокорона доранд.

Рафоат МӮЪМИНОВА,

“Ҳақиқати Суғд”

БАРОЯТ, ЭЙ ВАТАН, ҶОНАМ ФИДО БОД, - мегӯяд сержанти калон Абдуҷалил Ёқубҷонов

Подробности статьи

Ҳар як шахс Ватан дорад ва дар он худ ба камол мерасад. Аз ҳамин ҷост, ки Ватанро Модар мегӯянд. Чӣ хеле ки Модар барои инсон азиз аст, Ватан низ барои ҳар як шахс мӯътабар аст. Муҳофизати Ватан бошад, қарзи инсонии ҳар як шахс мебошад. Давоми солҳои соҳибистиқлолӣ Артиши миллии кишвар чунон нерӯманд шуд, ки тавонист, якпорчагии кишвар, сарҳад ва сулҳу суботро дар мамлакат ҳифз намояд. Бешак, ҳамаи ин аз хизмати софдилонаи ҷавонони бонангу номуси мамлакат аст.

Абдуҷалил Ёқубҷонов ба наздикӣ аз хизмати Модар - Ватан омадааст. Ҷавонписар ихтиёрӣ дар қисми ҳарбии 0121, комендатураи алоҳидаи сарҳади махсуси фармондиҳии ротаи комендантии Қӯшунҳои сарҳадии Кумитаи давлатии амнияти миллии Ҷумҳурии Тоҷикистон адои хизмат намудааст.

- Хизмати Ватан – Модар дар ҳақиқат мактаби мардонагӣ будааст. Давоми ду соли хизмати ҳарбӣ тавонистам, аз як тараф, қарзи шаҳрвандиамро ба ҷо орам, аз тарафи дигар дарси шуҷоату мардонагӣ, ватандӯстиву меҳанпарастӣ омӯхта, аз сарбози қаторӣ то ба рутбаи сержанти калон расам. Командири ротаи қисми ҳарбӣ Тоҳир Абдураҳмонов ҳамеша даъватшудагонро ҳушдор медоданд, ки хизмат дар сафи Қувваҳои Мусаллаҳи мамлакат мактаби обутоби ҳаёт асту ҷавонон бояд ҳар лаҳза барои дифои марзу буми Ватани худ омода бошанд. Ман низ дар қатори даҳҳо ҷавонмарди шаҳру ноҳияҳои мамлакат бо эҳсоси баланди ватандӯстӣ мегӯям, ки «бароят, эй Ватан, ҷонам фидо бод!».

Дар машғулиятҳои тирандозию норинҷакандозӣ, сафороӣ тирандозӣ ва омӯзиши пулемёт мо тавонистем, мактаби ҳарбиро пурра омӯхта, барои дифои Ватан омода шавем. Дар баробари ин одобу рафтор, кирдору гуфтор, ҷаҳонбинии ману ҳамхизматонам куллан дигар шуд. Дӯст доштани Ватан, падару модар, ёру дӯст, наздикону пайвандонро маҳз ҳангоми дар хизмати ҳарбӣ буданам ба маънои томаш дарк кардам.

Умед дорам, ки соли минбаъда ба шуъбаи рӯзноманигории Донишгоҳи давлатии Хуҷанд ба номи академик Бобоҷон Ғафуров дохил шуда, ба қуллаҳои баланди дониш расам, - гуфт сержант Ёқубҷонов.

Командири взводи Қӯшунҳои сарҳадии Кумитаи давлатии амнияти миллии Ҷумҳурии Тоҷикистон Самандар Амиршоев иброз медорад, ки шароити будубоши аскарон дар қисмҳои ҳарбӣ хуб буда, онҳо аз тамоми имкониятҳои замонавии муосир бархурдоранд. Баъди итмоми машғулиятҳои таълимӣ аскарон аз китобхона, толори варзишӣ ва истироҳатгоҳи замонавии дорои таҷҳизоти техникӣ васеъ истифода мебаранд.

- Илова карданиям, ки Ватан муқаддас аст. Дифои он бошад, муқаддастар. Ҳар фарде, ки ифтихори ватандорӣ дорад, бояд дар ҳама ҳолат баҳри ҳифзи диёр омода бошад. Ҷавонписарони далеру шуҷои кишварро мебояд, ки бо дарки баланди масъулиятшиносӣ ва дӯстдории марзу буми хеш ҳимоятгари Ватан бошанд, - иброз дошт Самандар Амиршоев.

Ш.КАРИМЗОДА,

«Ҳақиқати Суғд»

“Паёми Суғд” 25-сола шуд

Подробности статьи

Сирдарёи сухан аст…

Маҷаллаи адабӣ ва илмию оммавии «Паёми Суғд», ки муассисаш Мақомоти иҷроияи ҳокимияти давалтии вилояти Суғд мебошад, 25 сола шуд. Ба ин муносибат дар толори меҳмонхонаи «Суғдиён» - и маркази вилоят маҳфили хотирмон доир гардид, ки дар он намояндагони Мақомоти иҷроияи ҳокимияти давлатии вилоят, аҳли илму адаб ва кормандони маҷалла ширкат варзиданд.

Маҳфилро бо сухани ифтитоҳӣ сармуҳаррири маҷалла, Шоири халқии Тоҷикистон Толиб Карими Озарахш ифтитоҳ намуда, аз нақши шоистаи эҷодкорони маҷалла дар таҳкими ҳаёти адабии Суғдзамин ҳарф зад. Муовини Раиси вилоят Баҳоваддин Баҳодурзода дар чорабинӣ ширкат варзида, аҳли эҷоди ин маҷаллаи бонуфузро аз номи роҳбарияти вилоят сидқан табрик намуд ва паёми муборакбодии Раиси вилояти Суғд Раҷаббой Аҳмадзодаро ба самъи ҳозирин расонид.

Дар Паёми табрики Раиси вилоят аз ҷумла зикр гардидааст, ки «Маҷаллаи «Паёми Суғд» зодаи даврони соҳибистиқлолӣ буда, дар душвортарин лаҳзаҳои барои ҷумҳурӣ тақдирсоз арзи ҳастӣ кард ва дар бисту панҷ соли мавҷудияташ тавонист, ки бо нашри асарҳои тозаэҷоди адибон ва олимон дар тарғиби ғояҳои ватандӯстӣ, якпорчагии кишвар, сулҳу ваҳдат саҳми арзанда гузорад ва тарғибгари сиёсати хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бошад».

Дар маҳфил раиси бахши вилоятии Иттифоқи нависандагони Тоҷикистон, Шоири халқии Тоҷикистон Аҳмадҷони Раҳматзод, сармуҳаррири маҷаллаи «Ноҳид», нависанда Додохони Эгамзод, сармуҳаррирони рӯзномаҳои вилоятии «Ҳақиқати Суғд» Мухтор Абдуллоев ва «Согдийская правда» Исҳоқҷон Зокиров, корманди маҷалла, Аълочии матбуоти Ҷумҳурии Тоҷикистон Мавлуда Шарифова ва дигарон суханронӣ намуда, аҳли эҷоди маҷалларо шодбош гуфтанд.

Мавриди зикр аст, ки маҷаллаи «Паёми Суғд» бо дастгирии молиявии Мақомоти иҷроияи ҳокимияти давлатии вилоят моҳе як маротиба интишор шуда, дар он чакидаҳои қалами эҷодкорони вилоят ва ҷумҳурӣ ба табъ мерасанд.

Дар маҷалла устодони каломи кишвар Аъзам Сидқӣ, Атахон Сайфуллоев, Неъмат Оташ, Фарзона, Озарахш, Муҳаммад Субҳон, Анвар Олим, Адиба, Гулноз, Маҳваш, Матлуба Ёрмирзоева, Мавлуда Шарифова ва дигарон кору эҷод кардаанд ва имрӯз низ фаъолияти пурсамар доранд.

Мухтори Абдулло,

«Ҳақиқати Суғд»

ДАСТРАНҶИ ДЕҲҚОН БА ДАСТАРХОНИ СОКИНОН

Подробности статьи

Ярмарка - фурӯши маҳсулоти кишоварзӣ

Дар асоси дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва бо иқдоми Мақомоти иҷроияи ҳокимияти давлатии вилояти Суғд санаи 24 - уми октябри соли 2020 дар назди Театри мазҳакаи мусиқии ба номи Камоли Хуҷандии шаҳри Хуҷанд ярмарка - фурӯши маҳсулоти кишоварзӣ баргузор гардид. Дар ярмарка аз ҷониби намояндагони навоҳии кишоварзии вилоят анвои гуногуни маҳсулот бо нархҳои аз 20 то 30 фоиз аз бозор арзонтар пешниҳоди сокинон шуд.

Раиси вилоят Раҷаббой Аҳмадзода аз рафти ярмарка боздид намуда, ба масъулини дахлдор ҷиҳати боз ҳам фаровонтар намудани номгӯи маҳсулот супориш дода, таъкид дошт, ки бояд нархи маҳсулот аз бозор арзон бошад.

Қадршиносии пахтакорони зафарманд

Подробности статьи

Ҷамъбасти бистрӯзаи дуюми мавсими пахтачинӣ

24 октябри соли 2020 дар майдони «Ситораҳои Хуҷанд» маросими мутантани ҷамъбасти бистрӯзаи дуюми мавсими пахтачинӣ дар соли равон байни шаҳру навоҳии пахтакор ва хоҷагиҳои кишоварзӣ баргузор гардид, ки дар он Раиси вилояти Суғд Раҷаббой Аҳмадзода иштирок ва суханронӣ намуд.

Дар ин давра пахтакорони ноҳияҳои Спитамен, Мастчоҳ ва Ҷамоати деҳоти Ғулакандози ноҳияи Ҷаббор Расулов ғолибият ба даст оварда, соҳиби мукофоти пулӣ гардиданд. Ҳамзамон, ба механизатор ва чинакчиёни беҳтарин, роҳбарони хоҷагиҳои пешқадам маблағи пулӣ ва туҳфаҳо тақдим карда шуд.

Боздиди​ Раиси вилояти Суғд Раҷаббой Аҳмадзода аз корхонаи коркарди равғани ҶДММ "ЗирвЭко"

Подробности статьи

23 октябр Раиси вилояти Суғд Раҷаббой Аҳмадзода дар шаҳри Хуҷанд бо фаъолияти корхонаи коркарди равғани ҶДММ "ЗирвЭко" шинос гардид.

Иттилоъ дода шуд, ки корхонаи мазкур аз тарафи соҳибкори маҳаллӣ Абдумубин Абдушукуров таъсис дода шуда, дар он дар як шабонарӯз то 20 тонна равғани растанӣ коркард мешавад. Равғани хоми офтобпараст, пахта, рапс ва соя аз корхонаҳои равғанкашии ватанӣ ва инчунин аз хориҷи мамлакат ба ин корхона дастрас гардида, бо истифода аз дастгоҳу таҷҳизоти ҳозиразамон дар 7 марҳила ва дар шароити пӯшида поксозӣ карда мешавад. Дар натиҷаи полоиши чандкарата равғани баландсифат ва ҷавобгӯ ба стандарти байналмилалӣ омода карда мешавад. Дар корхонаи муосири ҶДММ "ЗирвЭко" 40 нафар сокини маҳалӣ бо ҷои кори доимӣ таъмин гардидаанд. Маоши кормандон ба ҳисоби миёна 1500 сомониро ташкил медиҳад.

Сафари кории Раиси вилоят Раҷаббой Аҳмадзода ба ноҳияи Зафаробод

Подробности статьи

22 октябр Раиси вилояти Суғд Раҷаббой Аҳмадзода ҷиҳати шиносоӣ бо раванди корҳои саҳроӣ ва ҷамъоварии пахта ба ноҳияи Зафаробод сафари корӣ анҷом дод.

Нахуст Раиси вилоят ҳолати кунунии пойгоҳи обкашии “Мирзочӯл-1”-ро мавриди назар қарор дод. Пойгоҳи обкашии мазкур аз шаш агрегат иборат буда, тавассути он заминҳои беканори ноҳияи Зафаробод обёрӣ карда мешавад. Айни замон аз тарафи мутахассисони идораи беҳдошти замин ва обёрии ноҳия таъмири пойгоҳ идома дошта, он барои соли оянда омода мегардад.

COVID - 19 ТАНҲО МУШКИЛОТИ ТОҶИКИСТОН НЕСТ

Подробности статьи

Пайдоиш ва паҳн гардидани пандемияи COVID-19 барои тамоми ҷомеаи башарӣ баробари чанд хатарҳои ҷаҳонӣ таъсири бузурги ҷониву молиро пеш овард.

Аз хатари ин беморӣ ягон кишвар дар канор намонд ва ҳамаи давлатҳо барои пешгирии паҳншавӣ ва табобатии бемории COVID-19 чораҳои зарурӣ андешиданд. Дар ҷаҳон шумораи гирифторон ва аз сабаби бемории мазкур фавтидагон рӯз аз рӯз, зиёд мешавад. Мутобиқи баъзе сарчашмаҳо, шумораи мубталоён ба ин беморӣ дар Россия дар як шабонарӯзи охир аз понздаҳ ҳазор бештар мебошад. Хулоса, давраи дуюми паҳншавии беморӣ барвақт муайян шуда буд.

Дар Тоҷикистон баъди пайдо гардидани ин беморӣ Ситоди ҷумҳуриявӣ таъсис дода шуд ва он таҳти роҳбарии Сарвазири ҷумҳурӣ мунтазам фаъолияти худро идома медиҳад. Ҷиҳати пешгирии бемории мазкур аз ҷониби Cитоди ҷумҳуриявӣ, Вазорати тандурустӣ ва дигар мақомотҳо пайваста тадбирҳои зарурӣ андешида мешаванд. Роҳбари давлат дар ҳар баромаду мулоқоти худ бо сокинони шаҳру ноҳияҳои ҷумҳурӣ таъкид менамоянд, ки: «нисбати бемории COVID-19 набояд шӯхӣ кард, зеро ҳар нафар метавонад, ба ин беморӣ гирифтор шуда, ҳаёти хеш ва атрофиёнро зери хатар гузорад».

Ҳукумати Тоҷикистон аз рӯзҳои аввали ба қайд гирифтани мавҷудияти бемории мазкур ба таври қатъӣ аз тамоми сокинон даъват намуд, ки талаботи заруриро ҷиҳати пешгирӣ риоя намоянд. Ҳамин тавр, тамоми сохтору мақомотҳои давлативу ҷамъиятӣ барои риояи чораҳои пешгирикунанда корҳои назаррас анҷом дода истодаанд.

Дар чунин шароит, мутаассифона, боз ҳам душманони миллату давлат мехоҳанд, бо ҳар баҳона номи кишварро сиёҳ кунанд. Баҳонаи охирини онҳо ин аст, ки гӯё як моҳ пеш, баргузор шудани интихоботи президентӣ дар Тоҷикистон сабаби паҳн гардидани бемории COVID-19 мешуда бошад. Кӣ ба ин суханҳо бовар мекунад? Охир, имрӯз дар Тоҷикистон тамоми муассисаҳои давлативу ҷамъиятӣ фаъолият доранд ва шаҳрвандон бо риояи ниқоб ва дигар чораҳои антисептикӣ корҳои худро пеш бурда истодаанд. Бинобар ин бо риояи чораҳои пешгирикунандаи COVID-19 баргузор шудани интихоботи президентӣ барои паҳншавии бемории мазкур ягон асос шуда наметавонад.

Мо хуб медонем, ки барои пешрафти Тоҷикистон, пеш аз ҳама, таҳкими суботи сиёсӣ ва амнияти миллӣ масъалаи асосӣ ба ҳисоб меравад. Дар чунин шароити ҳассоси геополитикии ҷаҳон таъмини сулҳу ваҳдати миллӣ ва муттаҳидии мардуми кишвар барои дар оянда пеш рафтани Тоҷикистон заминаи асосӣ ба ҳисоб меравад.

Шӯҳрат САИДЗОДА,
устоди Донишгоҳи давлатии ҳуқуқ, бизнес ва сиёсати Тоҷикистон

РУШДИ СИНАМО ДАР ДАВРАИ СОҲИБИСТИҚЛОЛӢ

Подробности статьи

Дар чодари хаёл оғози асри ХХ пайдо шудани тасвири синамо барои миллати тоҷик рӯйдоди муҳими таърихӣ буд. Зеро дар баробари ташаккули давлатдории тоҷикон филмноманависӣ ва банаворгирии он рушд карда, аз соли 1929 инҷониб садҳо филмҳои мустанаду бадеӣ ба навор гирифта шуданд.

Дар даврони Истиқлолияти давлатӣ бо дастгирии бевоситаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон насли нави филмбардорон дар симои муассисаи давлатии “Суғдсинамо ба номи Комил Ёрматов” тавонистанд, кинои тоҷикро на танҳо дар як минтақаи Тоҷикистон, балки дар арсаи олам муаррифӣ намоянд.

Ҳукумати Ҷумҳурии Тоҷикистон ҷиҳати таҳким бахшидани соҳа «Барномаи рушди кинои Ҷумҳурии Тоҷикистон барои солҳои 2018 – 2022»-ро қабул намудааст. Ин барнома самтҳои афзалиятнок, вазифа ва механизми татбиқи сиёсати давлатиро дар соҳаи кино муқаррар намуда, барои баланд бардоштани сифати истеҳсол ва намоиши филмҳо шароит фароҳам меорад.

Баргузории кинофестивалҳои миллии «Дидор», “Навсоз”, “Лолаи заррин”, “Душанбе” фазои синамои миллиро дар даврони Истиқлолияти давлатӣ пурра мекунад ва фестивалҳои кинои мустанад, ки дар гӯшаву канори ҷаҳон гузаронида мешаванд, дар муаррифии миллат дорои мақоми махсус ва афзалиятҳои алоҳида мебошанд. Синамои мустанади асил, ҳақиқатҷӯ, баландпоя бояд ҳатман зери ҳимояву дифои давлат, ҷомеа, мардум ва аҳли башар бошад. Миллате, ки чунин кино дорад, миллати пешқадам аст.

Муҳимияти масъалаи мазкурро ба инобат гирифта, зимни пешниҳоди Паёми худ ба Маҷлиси Олии Ҷумҳурии Тоҷикистон (соли 2015) Пешвои миллат муҳтарам Эмомалӣ Раҳмон чунин гуфта буданд: «Кинои тоҷик ба рушди ҷиддӣ ниёз дошта, филмҳои ҳозиразамони мустанаду бадеӣ, ки гузаштаву имрӯзро воқеъбинона инъикос намуда, масъалаҳои муҳими ҳаёти ҷомеаро тасвир созанд ва ахлоқи ҳамидаву анъанаҳои неки халқамонро тарғиб кунанд, кам ба назар мерасанд. Бинобар ин, Вазорати фарҳанг, Кумитаи телевизион ва радиои назди Ҳукумати Ҷумҳурии Тоҷикистон ва иттифоқҳои эҷодӣ вазифадор карда мешаванд, ки бо мақсади таблиғи ғояҳои миллӣ, тарбияи зебоипарастӣ ва ҳифзи мероси таърихиву фарҳангӣ ҷиҳати таҳияи асарҳои нави саҳнавӣ ва филмномаҳои таърихӣ тадбирҳои зарурӣ андешанд».

Таъкидҳои Пешвои миллат оид ба масъалаи мавриди назар асоси воқеӣ дошта, ҳарчи зудтар амалӣ шуданашон муҳим, саривақтӣ ва заруру ногузир аст. Зеро дар шароити кунунӣ, ки бархӯрди манфиатҳо ба авҷи аълои худ расидаву гурӯҳҳои ифротгаро пайи ҷалби ҷавонон «камари ҳиммат» бастаанд, таблиғи ғояҳои миллӣ, тарбияи зебоипарастӣ ва ҳифзи мероси таърихиву фарҳангӣ ба воситаи асарҳои нави саҳнавӣ ва филмномаҳои таърихӣ амри муҳиму зарурӣ ба шумор меравад.

Тими эҷодии “Суғдсинамо” давоми 5 соли мавҷудияти худ 10 филми ҳунарию мустанадро офарид, ки аз байни онҳо филмҳои ҳунарии “Коса” ва “Тангно”, филмҳои мустанади “Духтари Сайҳун” ва “Умар-ако” дар кинофестивалҳои миллию байналмилалӣ соҳиби ҷоиза гардиданд. Ба тозагӣ таҳияи филми ҳунарии “Пайроҳаи мураббӣ” дар ҳамкорӣ бо кинематографистони Осиёи Марказӣ ва Федератсияи Россия анҷом ёфт, ки нахустнамоиши он бо беҳтар шудани авзои тандурустӣ - пандемияи коронавирус дар тамоми кинотеатрҳои Осиёи Марказӣ ва Россия дар назар аст.

Мо - аҳли ҳунар медонем, ки барои корзори кинои тоҷик маводи ва инъикоси кулли рӯйдодҳои ҷомеаи муосир саршор аст. Зиндагиномаи қаҳрамонони миллати тоҷик худ маводест барои сабти филмҳои ҷолиби мустанаду бадеӣ. Ин ҳама моро водор месозад, ки дар рушди синамои миллӣ масъулияти томро эҳсос намоем. Ба анъанаи идона тими “Суғдсинамо” содиқ монда, ба шарафи Рӯзи кинои тоҷик ва 90 - солагии “Тоҷикфилм” ҳамчун ҳадя филми ҳунарии “Тангно” - ро баҳри тамошобинон дар шабакаи Ютубканали “Суғдсинамо” тақдим намудем.

Муҳиддини МУЗАФФАР,

директори муассисаи

давлатии “Суғдсинамо”

МАҲСУЛОТИ ВАТАНӢ БА ДАСТАРХОНИ МАРДУМ

Подробности статьи

«Роҳбарони вилоятҳо ва шаҳру ноҳияҳо вазифадоранд, ҷиҳати зиёд кардани майдони зироатҳо, ташкили гармхонаву сардхонаҳо ва беҳтар намудани таъминоти бозори истеъмолӣ бо маҳсулоти хушсифати ватании аз лиҳози экологӣ тоза, коркарди маҳсулоти соҳа ва афзоиш додани ҳаҷми содирот чораҳои қатъӣ андешанд»,- таъкид намуданд Пешвои муаззами миллат дар Паёми навбатии худ.

Дастуру ҳидоятҳои Асосгузори сулҳу ваҳдати миллӣ - Пешвои муаззами миллат, Президенти мамлакат муҳтарам Эмомалӣ Раҳмон ҷиҳати рушди соҳаи кишоварзӣ тақозо мекунанд, ки тадбирҳои мушаххас дар ин самт амалӣ гардонида шаванд. Аз ҷумла соли равон дар тамоми шаклҳои хоҷагидорӣ дар шаҳри Панҷакент дар майдони умумии 28152 гектар кишти зироатҳо гузаронида шуд.

Аз ин миқдор 13 788 гектараш ғалладона, аз ҷумла 4255 га гандум, 1771 га шолӣ, 5015 га ҷав, 677 га ҷуворимакка барои дон ва 1217 гектар зироатҳои техникӣ - офтобпарасту зағир мебошанд. Дар 6623 гектар кишти картошка, 2126 гектар сабзавот, аз ҷумла 533 га пиёз, 398 га сабзӣ,147 га бодиринг, 107 га карам, 381 га помидор ва дар 560 гектар дигар намуди сабзавот гузаронида шудааст.

Соли равон истеҳсоли ғалладонагиҳо - гандум нисбат ба порсола 726 тонна, ҷав 843 тонна, ҷуворимакка 30 тонна ва сабзавот 5344 тонна зиёд гардид. Ҷоиз ба зикр аст, ки давоми 5-6 соли охир аз ҳисоби соҳилмустаҳкамкунӣ ва кушодани заминҳои нав майдони кишти картошка, ғалладонагиҳо, бахусус шолӣ садҳо гектар афзун гардид. Айни замон 73 612 тонна картошка ҷамъоварӣ шуда, ғунучин давом дорад. То имрӯз 95 фоизи майдони шолӣ дарав карда шуда, ҳосили назардошт 64 - сентнерӣ аст ва бештар аз 10 800 тонна шолӣ ба даст оварданием. Ҷамъоварии шолӣ алҳол бо истифода аз ҳавои бебориш босуръат идома дорад.

- Панҷакент бо боғоти меваҳои хушлаззат ва токзорони ангури баландсифаташ низ маъруф аст, - мегӯяд муовини сардори идораи кишоварзии шаҳр Фирӯз Ёров. - Себи хубонӣ, мавизҳои аз ангури кишмишии сиёҳу сафед тайёркардаи панҷакентиён натанҳо дар кишварамон, балки берун аз он низ харидорони зиёд дошт. Имрӯз дар Ҷамоатҳои деҳоти Фароб, Шинг, Моғиён, Рӯдакӣ, Вору анвои гуногуни себ парвариш карда мешавад.

Дар Панҷакент соҳаи чорвопарварӣ низ дар сатҳи зарурӣ ба роҳ монда шуда, давоми ҳашт моҳ 2068 тонна гӯшт, 14 845 тонна шир ба даст оварда шуд. Дар ҳудуди шаҳр ду коргоҳи паррандапарварӣ фаъолият бурда, то кунун ба миқдори 1 миллиону 980 ҳазор дона тухм ба даст оварда шудааст. Бо ба фаъолият шуруъ кардани ин ду корхона сатҳи таъминоти сокинон бо тухми хушсифат беҳтар гардида, дар назар аст, ки соли оянда боз як коргоҳи паррандапарварӣ ба кор андохта шавад.

Дар маҷмуъ, кишоварзони шарафманди Панҷакент баҳри ба амал татбиқ намудани ҳидоятҳои Пешвои муаззами миллат фидокорона заҳмат кашида, азм доранд, ҷашни фархундаи 30 - солагии Истиқлолияти давлатии Ҷумҳурии Тоҷикистонро бо дастовардҳои арзанда истиқбол намоянд.

Рафоат МӮЪМИНОВА,

«Ҳақиқати Суғд»