ДЕВАШТИЧ: ИҚТИДОРИ «КӮҲАК» МЕАФЗОЯД

Подробности статьи

ҶДММ «Ҳаҷмис» коргоҳи хиштбарорӣ аз соли 2009 амал менамояд. Имрӯз маҳсулоти он на фақат дар ноҳия, балки берун аз он низ харидоргир аст. Алҳол дар ихтиёри ҷамъият коргоҳи истеҳсоли хишт ва сехи коркарди қуму шағал ба таври доимӣ фаъолият доранд. Дар рӯзҳои ташрифи Сарвари давлат ба шаҳру ноҳияҳои вилояти Суғд иқтидори «Ҳаҷмис» дар мавзеи «Куҳак» боз афзуд. Яъне як сехи дигари хиштбарорӣ ба кор оғоз кард, ки иқтидори истеҳсолии он дар як сол 3 миллион дона хишт мебошад.

Раиси ноҳия Сулаймон Зиёзода ҳангоми ифтитоҳи коргоҳ қайд кард, ки ба ҷашни 30 - солагии Истиқлолият зиёда аз 300 адад иншоотҳои гуногун дар нақша ҳаст, ки аллакай 220 - адади он мавриди истифода қарор гирифтанд. Рӯзҳои наздик дар ноҳия корхонаи коркарди шир, як қисмати фермаи мурғпарварӣ, чанд нуқтаҳои хизматрасонӣ ба истифода дода мешавад. Аз ҷумла, дирӯз дар гимназияи №3 чор синфхонаи иловагӣ мавриди истифода қарор гирифт.

Назар ба гуфти сарвари «Ҳаҷмис» соҳибкори ватандӯст Абдуҷамол Ҳусейнов, сехи мазкур дар масоҳати 20 гектар ҷой гирифтааст. Алҳол дар ин ҷо 50 нафар сокинони маҳаллӣ бо маоши хуб таъмин буда, бар замми ин хӯрду хӯрок ройгон аст. Самараи меҳнати коргарон дар як шабонарӯз то 15 ҳазор хишти хушсифати пухта мебошад. 12 нафар хиштчиндухтарони маҳаллӣ бо шуғли доимӣ таъмин гаштанд.

Умуман, дар коргоҳҳои ҶДММ «Ҳаҷмис» имрӯз то сад нафар бо кори фоиданок шуғл доранд ва самараи меҳнати солонаи аҳли заҳмат бо якҷоягии «Кӯҳак» ба 10 миллион дона хишт наздик аст.

Эгамназар СОҲИБНАЗАРОВ,

ноҳияи Деваштич

Сахопешагӣ – амали ҷавонмардон

Подробности статьи

Дар куҷое хонда будам: “Ҳастанд одамоне, ки даҳҳо сол умр ба сар мебаранду хизмате накарда, мисли кафки болои об нест шуда мераванд. Бархе бошанд, чунон “Кохи баланде” аз худ боқӣ мегузоранд, ки асрҳои аср ба ибораи Фирдавсӣ “аз боду борон газанд намеёбанд.” Чунин инсонҳо, чунин накӯкорон дар замони соҳибистиқлолии кишвар шукр, хеле зиёданд. Бо хайру иқдоми нафаре ва ё гурӯҳе маконе обод ва ё шароити оилае аз ҷиҳати иқтисодӣ беҳтар мегардад.

Бисёранд инсонҳое, ки дасти сахо дароз мекунанду аммо ному насаби хеш изҳор намедоранд. Аз рӯи иборае, ки аз қадим - ул - айём аксариятро роҳнамост, яъне дасти ростат некӣ кунад, дасти чапат нафаҳмад ва ё некӣ куну ба дарё парто.

Занги телефоние боис гардид, ки чунин ибораҳоро ба хотир оварам. Директори Мактаб – интернати санитарии рақами 40- и шаҳри Конибодом Раҳимҷон Раззоқов тавассути телефон хабар дод, ки нафаре аз ноҳияи Спитамен ба миқдори муаяйн себу шафтолу, кадую қаламфури булғорӣ, бодом, сабзию пиёз ва боқилаҷон дастрас намуда, боз ҳам чун пешин аз гуфтани ному насаби хеш худдорӣ намудааст. Ва ин дафъа аз боисрор пурсиданҳои Р. Раззоқов ӯ исму насаби хешро гуфтааст.

- Хоҳиш дорам, тавассути саҳифаи рӯзнома арзи сипоси толибилмон ва омӯзгорону мураббиёнро ба ин шахси накӯкор бирасонед, - гуфт сарвари мактаб.

Марди сахопеша раиси хоҷагии деҳқонии Кооперативи истеҳсолии моҳипарварии ба номи «Генерал Қаноатов»-и ноҳияи Спитамен Рустам Каримов мебошад, ки соле ду маротиба ба толибилмони ин даргоҳ маҳсулоти кишоварзӣ дастрас менамояд.

Воқеан, тавре ёдовар шудем, дар ҷомеа инсонҳои саховатпеша, соҳибкорон ва оилаҳое ҳастанд, ки на танҳо дар арафаи иду айём, балки дар дигар рӯзҳо ҳам ба аёдати пиронсолону шахсони яккаву танҳо, мактабу беморхонаҳо ва хонаҳои пиронсолону кӯдакон бо туҳфаю маводи хӯрока ва маблағ кӯмак мерасонанд.

Бо вуҷуди он ки сарпарастони доимии мактаби номбурда Корхонаи Фаръии «Заводи таъмири қатораҳои Маҳрам» бо роҳбарии Хушвақт Ҷабборов ва Донишгоҳи куҳӣ – металлургии Тоҷикистон воқеъ дар шаҳри Бӯстон дар ҳар иду айём ва дар ҳолатҳои зарурӣ дабистонро бо маводҳои озуқаворӣ таъмин менамоянд, аммо назару эътибори дигар нафарон низ онҳоро масрур мегардонад.

- Воқеан, шукри замон, шукри даврони истиқлол, ки нафарони саховатманд хеле зиёданд, гоҳо маҳсулоти биринҷ, нахӯд, марҷумак, равғани пахта ва шириниҳою дигар маводи хӯрданӣ меоранд, вале, мутаассифона, аз гуфтани ному насаби хеш худдорӣ менамоянд.

Дар Мактаб – интернати санитарии рақами 40 - ум 94 нафар гирифторони бемории сил табобат ва таълим мегиранд, ки аз он 36 нафар духтарон мебошад. Таълим ва табобат дар ин мавзеъ ду сол идома дошта, 22 нафар, аз ҷумла як нафар духтур, ду нафар ҳамшираи шафқат, чор нафар кормандони техникӣ шабонарӯз дар хизмати толибилмонанд.

Собиқадорони арсаи меҳнат омӯзгор Муродҷон Худойдодов, Санавбар Раҳимова, мудири хоҷагӣ Ортиқбой Сафаров, ки солҳои сол дар ҳамин боргоҳ фаъолият мебаранд, нисбати толибилмон – табобатгирандагон ғамхории ҳамаҷониба зоҳир намуда, кӯшиш ба харҷ медиҳанд, ки ҳар як нафари ба ин ҷо ташрифоварда саривақт муолиҷа гирифта, ба макони хеш биравад.

Имрӯз дар Мактаб – интернати санитарии рақами 40-и шаҳри Конибодом мутахассисони ҷавон, ба монанди Машҳура Худойбердиева, Гулнора Фозилова, Умеда Сатторова ва дигарон фаъолият мебаранд ва кӯшиш ба харҷ медиҳанд, ки аз омӯзгорони собиқадор нозукиҳои касбро омӯхта, баҳри солимии ҷомеа саҳми арзанда гузоранд.

- Калонсолон барои мо, ҷавонон роҳнамоянд. Нафарони ба ин боргоҳ муроҷиаткарда дили шикаста доранд, тавре моро собиқадорон панди зиндагӣ медиҳанд, нисбати чунин шахсони ранҷур набояд бетарафӣ зоҳир намоем. Инчунин сахопешагоне, ки дари ин дабистонро мекӯбанд, моро водор месозад, ки вазифаи хешро сидқидилона ва самимӣ иҷро намоем, - изҳор дошт зимни суҳбат Умеда Сатторова.

Тавҳида ҶӮРАЕВА,

«Ҳақиқати Суғд»

Истиқлол: Дастони эъҷозофари бонувон

Подробности статьи

Имрӯз сокинони вилояти Суғд ҷиҳати дар амал татбиқ намудани дастуру супоришҳои хирадмандона ва ояндабинонаи Сарвари давлат оид ба захира намудани маҳсулоти ғизоӣ барои 2 соли ояндаро ба хубӣ дарк карда, дар ин самт ҳамарӯза амалан корбарӣ доранд. Зеро ин тадбири оқилона дар таъмини амнияти озукавории мамлакат ва беҳдошти сатҳи зиндагии мардум нақши муҳим мебозад.

Дар ин замина бошандагони шаҳри Истиқлол низ ҳамарӯза барои захира намудани маҳсулот ҷаҳд менамояд. Бо вуҷуди он ки аксар сокинон дар биноҳои баландошёна зиндагӣ мекунанд, аз заминҳои наздиҳавлигӣ ё аз мағозаву бозорҳо намудҳои гуногуни полезиро ба даст оварда, маҳсулоти кишоварзиро барои зимистонгузаронӣ дар зарфҳои шишагӣ ба намуди шарбату мураббо захира менамоянд. Ҳоло бо истифода аз ҳавои мусоид дар ҳар хонадон бонувони ҳунарманд ба омода намудани хуришҳо машғуланд.

- Самаранок истифода бурдани ҳар як ваҷаб замин ин шиори сокинони биноҳои баландошёнаи шаҳр аст ва бо истифода аз маҳсулоти рӯёнидаи худ барои зимистонгузаронӣ омодагӣ мебинем. Алҳол мо аз заминҳои наздиҳавлигӣ истифода бурда, барои зимистон захираи зиёде кардаем, - гуфт сокини шаҳр Дилрабо Шукурова.

То имрӯз ӯ зиёда аз 100 банка консерва ва мураббо захира кардааст. Захираи зимистонаи ӯ аз ҳисоби рӯёнидани сабзавоту меваҷот аз заминҳои наздиҳавлигиаш мебошад. Имрӯз бошад, бо истифода аз помидор хуриши зимистона бо ном адҷикаро тайёр мекунад.

Дилрабо Шукурова мегӯяд, ки барои тайёр кардани адҷика 22 кило помидор, 4 кило сабзӣ, 0,5 кило пиёз, 6 кило қаланфури булғории сурх, як кило сирпиёз ва намаку маҳсулоти хушбӯйкунанда лозим аст.

- Аввалан, тамоми маҳсулотро дар оби тоза мешӯем. Сониян, помидорро аз гӯштқимакунак мегузаронем, дигар маҳсулотро бошад, ба таври хурд – хурд реза мекунем. Баъд дегро тасфонида ба даруни он 0,5 литр равғани офтобпарастро меандозем. Сониян, пиёзи резашударо бирён намуда, сабзиро андохта, тафт медиҳем. Баъд аз 10 дақиқа қаланфури булғорӣ, помидор ва сирпиёзро ҳамроҳ карда, ҳамаашро дар дег тақрибан 40 – 45 дақиқа мепазем. Вақте оби помидор кам шуда, намуди маҳсулоти дардегбуда сурхи равшан ва бӯяш хуш мешавад, ба он баргҳои хушбӯйкунандаро ҳамроҳ мекунем.

Пас аз 5 дақиқа адҷика барои ба даруни зарфҳои шишагии безараргардонидашуда андохтан омода мешавад. Барои хуриши тайёршуда тақрибан 11 - 12 - то зарф лозим аст, - гуфт ин зани соҳибтаҷриба.

Ба гуфти Дилрабо Шукурова, захиракунии маҳсулот анъанаи хуби тоҷикон буда, бояд ҳар оила бо истифода аз имконоти худ маҳсулоти барои рӯзғор заруриро нигаҳдорӣ намояд. Зимни консерва намудан бонувон бояд диққати асосиро ба тозагӣ ва безараргардонии зарфе, ки дар он маҳсулот захира мешавад, равона намоянд.

- Чанд сол инҷониб бо омода кардани захираи зимистона сарукор дорам, ҳатто хешону пайвандонам барои омода кардани хуришҳои гуногун ва шарбату афшураҳо ба ман муроҷиат мекунанд. Ин барои мо - занон анъанаи хубе шудааст, зеро дар баробари омода кардани захираи зимистона мо ба духтарони ҷавон низ тарзи омода кардани онро меомӯзонем, - гуфт Д.Шукурова.

Ӯ мегӯяд, ки меваҷоту сабзавот маҳсулоти пурарзиши парҳезӣ ба шумор мераванд. Дар таркиби онҳо тамоми унсурҳоеро, ки барои организми инсон зарур ва ҳатмӣ мебошанд, пайдо намудан мумкин аст. Хусусан, дар фасли зимистон, ки организм ба маҳсулоти витаминдор ниёз дорад, истеъмоли чунин маводи захиракардашуда фоидаовар аст.

Ҳамчунин, Дилрабо Шукурова барои фасли зимистон мураббо аз меваҳои зардолу, олуча, анҷир, марминҷон ва қулфинай, афшураҳои олу, олуча зардолу ва шафтолу омода карда, дар баробари адҷика шакароб низ захира кардааст. Ӯ изҳор дошт, ки маҳсулоти захиракардааш барои хешону пайвандон ва дӯстон низ басанда аст.

Баробари Дилрабо Шукурова дигар ҳамсояҳои ӯ низ бо истифода аз фаровонии маҳсулоти кишоварзӣ аз меваю сабзавот шарбату хуришҳо омода намуда, маҳсулоти консервагиро барои фасли зимистон захира карда истодаанд.

Шаҳбону ОЛИМОВА,

«Ҳақиқати Суғд»,

Хуҷанд – Истиқлол – Хуҷанд

Боздиди Раиси вилоят аз Ҷамъияти дорои масъулияти маҳдуди “Нассоҷии Хуҷанд” ва корхонаи “Суғдиён”

Подробности статьи

Имрӯз, 20 октябр Раиси вилояти Суғд Раҷаббой Аҳмадзода дар шаҳри Хуҷанд бо фаъолияти Ҷамъияти дорои масъулияти маҳдуди “Нассоҷии Хуҷанд” шинос гардид.

Ёдовар бояд шуд, ки чанд моҳ қабл дар рӯзҳои таҷлили Истиқлолияти давлатии Ҷумҳурии Тоҷикистон коргоҳи нави дӯзандагӣ дар назди Ҷамъияти дорои масъулияти маҳдуди “Нассоҷии Хуҷанд”  бо иштироки Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мавриди баҳрабардорӣ қарор гирифта, имрӯз фаъолияти муназзам дорад.

Ифтитоҳи маркази хизматрасонӣ ва чойхонаи “Роҳат” дар ноҳияи Спитамен

Подробности статьи

19 октябр Раиси вилояти Суғд Раҷаббой Аҳмадзода ҷиҳати шиносоӣ бо ҷараёни корҳои ободониву созандагӣ ба ноҳияи Спитамен сафари корӣ анҷом дод.

Нахуст бо иштироки Раиси вилоят дар Ҷамоати деҳоти Сарбанд маркази хизматрасонӣ ва чойхонаи “Роҳат” мавриди истифода қарор гирифт. Иншооти мазкур дар доираи омодагиҳо ба ҷашни 30-солагии Истиқлолияти давлатии Ҷумҳурии Тоҷикистон сохта шуда, аз ду ошёна иборат аст. Маркази хизматрасонӣ ва чойхонаи “Роҳат” аз тарафи соҳибкор Ҷамшед Бозоров бо харҷи беш аз як миллион сомонӣ бунёд гардида, он ба сокинону меҳмонони ноҳия хизмат мерасонад.

ХИЗМАТ БА ВАТАН ОИНИ ҶАВОНМАРДИСТ

Подробности статьи

Ҷавонони бонангу номуси мо хуб дарк мекунанд, ки хизмат ба Ватан барои онҳо қарзи муқаддаси фарзандӣ ва рисолати мардонагист. Насли ҷавон дар сафи Қувваҳои Мусаллаҳи мамлакат хизмат намуда, муҳимтарин мактаби обутоби ҳаётро паси сар мекунанд. Маҳз, дар ҳамин ҷо ҷавонписарон дарси шуҷоату мардонагӣ омӯхта, муҳофизат кардани хоки поки Ватанро ёд мегиранд. Хизмати ҳарбӣ нишонаи равшани эҳсоси ватандӯстӣ, дарки зарурат ва аҳамияти ҳимояи манфиатҳои давлат ва халқи Тоҷикистон мебошад.

Алҳол маъракаи даъвати тирамоҳӣ ҷараён дорад, ки ҷавонони далеру шуҷои Ватан бо руҳияи баланди ватандӯстӣ, ихтиёрӣ имрӯз барои хизмати Модар - Ватан раҳсипор гардида истодаанд.

Эҳсоси ватандӯстонаи чанде аз ҷавононеро, ки дар рафти суҳбат баён намуданд, манзури хонандагони рӯзнома мегардонем.

Алишер Рауфов аз ноҳияи Спитамен буда, иброз намуд, ки ҳифзи марзу буми кишвар яке аз вазифаҳои муҳимтарини ҳар як сокини мамлакат ба ҳисоб меравад. Имрӯз ҷавонони бонангу номуси мо хуб дарк намуданд, ки хизмат ба Ватан шараф ва номуси ҷавонмардӣ ба ҳисоб меравад.

Ҷавонони далеру шуҷои Ватан хизмат ба халқу миллатро пешаи худ қарор доданд. Худ ҳангоми рӯзи дарҳои кушод, ки дар қисмҳои низомӣ баргузор гардида буд, шоҳиди он гардидам, ки шароити хизмат дар қисмҳои низомии ҷузъу томҳои Қувваҳои Мусаллаҳи кишвар беҳтар аст.

Шокир Абдуллоев - даъватшаванда аз ноҳияи Деваштич дар суҳбат гуфт, ки бо ихтиёри худ ба хизмати Ватан – Модар раҳсипор шудам, зеро Ватани азизамро дӯст медорам. Мо бояд ҳама суханҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмонро дарк намуда, ба боварии он кас бештар сазовор гардем. Нагузорем, ки осудагиву оромии кишвари моро касе халалдор намояд. Хизмат дар сафи Артиш на танҳо қарзи фарзандӣ, балки ифтихор ва шарафи бузург аст. Ҷавонони матиниродаи миллати тоҷик бояд бо хоҳиши худ баҳри ҳимояи Ватан - Модар раванд. Аз хизмати Ватан саркашӣ накунанд. Хизмат худ мактаби ҷасорату матонат ва худшиносиву ходогоҳӣ мебошад. Ваъда медиҳам, ки бо сари баланд хизмати Ватанро адо намуда, назди падару модари худ бармегардам.

Ҳусейнбой Ҷабборов - даъватшаванда аз ноҳияи Бобоҷон Ғафуров дар сӯҳбат гуфт, ки баъди хатми мактаби миёна ихтиёран худ ба хизмати Ватан – Модар раҳсипор шудаам, зеро Ватани азизамро дӯст медорам ва хизмат намудан, ҳифз намудани марзу буми миллати куҳанбунёди хешро барои худ шараф медонам.

Номбурда мегӯяд, ки дигар ҷавонон низ ба Ватан содиқона хизмат кунанд ва ба ҷавононе, ки аз хизмати ҳарбӣ саркашӣ мекунанд, муроҷиат карданист, ки хизмат намудан ба Ватан қарзи инсонии ҳар шаҳрванди Тоҷикистон аст. Зеро ҷавонони чусту чолоки худамон бояд Ватанамонро ҳимоя ва обод кунанд. Имрӯз агар мо - ҷавонони саодатманд Ватани худро дар ҳифзу ҳимояи худ нигоҳ надорем, оромиву осудагии мардумро каси дигар таъмин наменамояд.

Боиси хушнудист, ки имрӯзҳо садҳо ҷавонмардони баору номуси диёрамон бо амри дил баҳри ҳимояи манфиатҳои давлат, таҳкими Истиқлолият ва иқтидори мудофиавии он барои хизмати содиқона ба Ватан- Модар ба сафи Қувваҳои Мусаллаҳи ҷумҳурӣ сафарбар шуда истодаанд. Онҳо хуб медонанд, ки дӯст доштани Ватан дӯст доштани модар аст ва бо дарки чунин масъулият омоданд, ки қарзи ҷавонмардии худро иҷро намоянд.

Барои ҷавонон хизмат дар сафи Қувваҳои Мусаллаҳ мактаби обутоби зиндагӣ ба ҳисоб меравад. Аз ҷониби Ҳукумати Ҷумҳурии Тоҷикистон ва Вазорати мудофиаи кишвар баҳри хидмати сарбозон дар қисмҳои низомӣ тамоми шароит муҳайё гардидааст, ки аскарон метавонанд, бе ягон мамониат хизматро ба ҷо оранд. Бинобар ин ҳамаи ҷавононро зарур аст, ки аз хизмат намудан ба Ватан - Модар саркашӣ нанамуда, баръакс барои дифо намудани он ҳамеша омода бошанд.

Истамҷони НАҶМИДДИН,

“Ҳақиқати Суғд”

Захираи озуқа - анъанаи миллӣ

Подробности статьи

Анъанаи неки тоҷикон, ки аз рӯзгори бостон барои мо мондааст, захира кардани маҳсулоти барои рӯзгор зарурист. Захираи озуқа ҳама вақт барои оянда нигоҳдорӣ шуда, вақти эҳтиёҷ аз он истифода мебаранд. Дар солномаҳои таърихӣ маълумот дар бораи захираи неъматҳо хеле зиёд ба назар мерасад. Дар китоби «Тоҷикон»-и Бобоҷон Ғафуров маълумоте оварда шудааст, ки дар Суғди Самарқанд бинобар хеле фаровон будани ангур шароби бисёре дар ҳавлиҳои боён солҳо нигоҳ дошта мешуд.

Дар давраи ҳукмронии Хохоманишиҳо бошад, захираи гандуму дигар ғалладонагиҳо аз ҳисоби аҳолӣ ҷамъоварӣ шуда, дар анбор нигоҳдорӣ мешуд. Дар хонаи рамзии Хоҷа Камоли Хуҷандӣ, ки воқеъ дар шаҳри Хуҷанд аст, дар яке аз хонаҳо чор хуми калон ҳаст, ки дар онҳо гандум, шолӣ, равған ва об нигаҳдорӣ шудааст. Намунаи захираи маҳсулоти гӯштӣ: хушконидану дар равған бирён кардани гӯшти қоқи намакин, ғалладонагиҳо, аз қабили мошу лӯбиё, нахӯд, ҷуворимакка ва нони хушк неъматҳоеанд, ки дар хонадони мардум нигаҳдорӣ мешуданд.

Барои равшанӣ андохтан ба ин масъала ва ҷавоб додан ба суоли «Оё захира доред?» ба сокинони шаҳру навоҳӣ муроҷиат намудем.

Бисолеҳа Махсумова - сокини ноҳияи Кӯҳистони Мастчоҳ:

- Аз рӯзе, ки худро мешиносам, медонам, ки падару модарам барои зимистонгузаронӣ ҳанӯз аз оғози фасли баҳор омодагӣ медиданд. Дар ёд дорам, ки азбаски таҳхона надоштем, захираи анвои хӯрданиро падарам чуқурии калоне кофта, дар хумҳо ҷо дода, болояшро бо хок мепӯшониданд. Он то дер нигоҳ дошта шуда, сифаташ тағйир намеёфт. Захираи озуқаи мо то аввалҳои фасли тобистон, айёми пухтарасии ҳосили нав бемалол мерасид. Мо аз бозор танҳо қанду набот, намаку боз чанде маҳсулоти ниёзи аввал мегирифтему халос. Дар оила нӯҳ фарзанд – чаҳор писару панҷ духтар будем. Албатта, хӯрондану пӯшондани оилаи калон барои падару модарам мушкил буд. Бо вуҷуди ин ҳамеша дар хонаамон захира буд. Сақфи ду хона, ки хонаи «меваҳо»-ю хонаи «ангурдор» мегуфтем, аз захираи себу нок, анору ангур пур буд. Падарам ҳангоми ҳосилғундорӣ таъкид мекарданд, ки ҳамаи меваҳоро албатта, бо чӯбакаш аз дарахт канем. Баъди ба навъҳо ҷудо кардан ба чӯбаки меваҳо ресмон баста, онро ба сақфи хона, ки аз мехчаҳо пур буд, меовехтем ва осуда будем, ки мо гурусна нахоҳем монд. Ин анъанаи падару модарамро ман ҳамеша дар ёд нигоҳ медоштам ва имрӯз онро идома медиҳам. Зеро захира кардан, аз як тараф, барои дилпурӣ бошад, аз тарафи дигар, тамоми сол анвои хӯрданӣ дар хонадон муҳайёст.

Абдукарим Абдуқаюмов – нонво аз ноҳияи Бобоҷон Ғафуров:

- Нон. Баробари ба забон овардани ин калима дар пеши назари мо неъмати қиматтарини дунё падидор мешавад, зеро онро аз замонҳои қадим одамон, аз ҷумла аҷдодони мо азиз медоштанд. Нон неъмати муқаддас аст. Бе нон на хушбахтӣ ҳасту на ҳаёт. Имрӯз истеъмолкунандагон нону кулчаҳои гуногунро аз дӯкону мағоза ва бозорҳо харида, ҳатто баъзе намедонанд, ки то ба дасти онҳо расидан ин неъмати зиндагӣ чӣ қадар роҳи душворро тай мекунад. Бо азобҳои зиёде нон шоҳи дастархон шудааст. Мутаассифона, баъзеҳо аксар вақт фаромӯш мекунанд, ки нон бо чӣ гуна душвориҳо ба даст меояд. Онро аз миқдори зарурӣ зиёд мехаранд, нонрезаро ба партовқуттӣ мепартоянд, ба чорво медиҳанд. Азбаски аҳли оила нонво ҳастем, бештар нонҳои обаш гурехтаро, ки ба фурӯш намераванд, бозпас мегирем. Онро ба қисмҳои хурд-хурд бурида, хушк мекунем ва барои оянда нигоҳ медорем. Охир, аз нони қоқ хуришҳои гуногун тайёр кардан мумкин аст. Ҳамсарам барои фарзандон махсусан дар фасли зимистон пироги себдор, кулчаи панирӣ, кулчаи тухмдор, нони бирён бо панир, хуриши картошкагӣ бо нон ва дигар намуди таомҳоро омода месозад. Модарам мегӯянд, ки агар дар хона орду равған бошад, ҳеҷ гоҳ гурусна нахоҳӣ монд. Бинобар он ин намуди маҳсулотро ҳамеша захира менамоям.

Соҷида Миркамолова – соҳибхоназан аз ноҳияи Конибодом:

- Тобистону тирамоҳ фаслҳоест, ки тамоми меваю сабзавот мепазанду дастархони мардум ба шарофати он хеле обод мегардад. Хушбахтона, Тоҷикистон кишварест, ки бо тамоми нозу неъматҳояш машҳури ҷаҳониён гаштааст. Таъми меваҳои шаҳдбору сабзавоти сервитамини онро дар ҳамаи фаслҳои сол чашидан мумкин аст. Барои ин кадбонуҳои моҳирро мебояд, ки захира намоянд.

Рафҳои таҳхонаи ҳавлии мо аллакай бо намудҳои гуногуни консерва пур аст. Зеро аз оғози фасли тобистон мо ҳамроҳи арӯсону духтарон барои захира кардани меваю сабзавот ва дигар полезиҳо тариқи консерва ҳаракат менамоем. Шарбату мураббои зардолую олуча, шафтолую марминҷон, ангуру себ, гелосу шоҳтут ва дигар мевагиҳоро дар зарфҳо захира намудаем. Инчунин, помидору бодиринг, караму қаламфури булғорӣ, ки тариқи консерва нигоҳдорӣ мешаванд, аз як тараф, агар ҳамчун хуриш истифода шавад, аз тарафи дигар, ҳар яке дар алоҳидагӣ хусусиятҳои давогӣ дошта, барои организми инсон муфид аст. Боқило сабзавотест, ки тамоми фаслҳои сол онро истеъмол кардан муфид аст, агар дар зарфҳо консерва шуда бошад. Хуриши хушлаззате, ки аз боқилою сабзӣ, помидору қаланфури булғорӣ, равғану лӯбиё омода мешавад, таоми тайёрест ҳангоми зарурат.

Эркин Бойбӯтаев – иҷоракори Хоҷагии деҳқонии ба номи Абдураҳим Ҷумъаеви ноҳияи Бобоҷон Ғафуров:

- Азбаски деҳқонзода ҳастам, ҳамеша дар ҳавлиамон барои эҳтиёҷоти аҳли оила захираи шолиро нигоҳ медорам. Аз оғози фасли тобистон ҳамсарам ҳамроҳи фарзандонам аз тамоми мевагиҳо ва сабзавоту полезиҳо дар зарфҳои шишагӣ консерва мекунанд. Агар онҳо барои истеъмоли ҳаррӯза дар фасли сармо истифода шаванд, захираи шолӣ сарфи эҳтиёҷоти дигари рӯзгор мешавад. Зеро аз як тонна шолӣ 650 - 700 килограмм биринҷ ба даст овардан мумкин аст. Дар ҳолатҳои зарурӣ биринҷро ба бозор бароварда, аз маблағи бадастомада чизҳои барои рӯзгор лозимаро харидан мумкин аст.

Нигоранда

Шоира САЛИМОВА,

«Ҳақиқати Суғд»

Спитамен: Истифодаи оқилонаи замин омили беҳдошти зиндагӣ

Подробности статьи

Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон доимо таъкид месозанд, ки ба самаранок истифода бурдани замин ва рӯёнидани на кам аз ду ва се ҳосили дилхоҳ кӯшиш ба харҷ диҳем ва ҳар як ваҷаб заминро оқилона истифода барем.

Рӯёнидани на кам аз се ҳосил дар як сол, инчунин, баланд бардоштани ҳосилнокии ҳама намуди зироатҳои кишоварзӣ дар ҳамаи ҷамоатҳои шаҳраку деҳоти ноҳияи Спитамен хуб ба роҳ монда шудааст.

Шукронаи сулҳу ваҳдати миллӣ, Истиқлолияти давлатӣ, ки барои дастгирии соҳаи кишоварзӣ таваҷҷуҳ сол аз сол меафзояд.

Сокини Ҷамоати деҳоти Тағояк, собиқадори меҳнат Эркин Маъмуров замини наздиҳавлигии худро, ки 7 садяк аст, самаранок истифода менамояд ва аз ин ҳосили баланд мерӯёнад.

- Ман омӯзгор будам. Баъди ба нафақа баромадан бо аҳли оила дар замини наздиҳавлигии худ меҳнат менамоям, - гуфт номбурда.

Дар замини наздиҳавлигӣ сабзавот ва меваҷоту дигар навъи зироатҳои хоҷагии қишлоқ, аз ҷумла зардолу, олу, шафтолу, себ, анор, гелос, биҳӣ, анҷир, чормағз, инчунин лимӯ низ парвариш карда мешавад, ки аз он оила даромади хуб мегирад.

Дар қатори ин меваҷот, инчунин зироатҳои мавсимӣ, аз қабили картошка, пиёз, помидор, каду, қаланфури булғорӣ, сабзӣ, бодиринг, турб, шалғам, райҳон, гулҳои мавсимӣ кишт карда, аз зироатҳо ду-се ҳосил гирифта мешавад.

П. ПИРОВ,

ноҳияи Спитамен

ТАЪСИСИ ШУЪБАИ ТАБОБАТИ НУРӢ: МУСОИДАТ БА БЕҲДОШТИ СОЛИМӢ

Подробности статьи

Дар шаҳри Хуҷанд дар назди Маркази саратоншиносии вилоят шуъбаи табобати нурӣ мавриди баҳрабардорӣ қарор гирифт, ки дар он Ёрдамчии Президенти Ҷумҳурии Тоҷикистон Абдуҷаббор Раҳмонзода ва Раиси вилояти Суғд Раҷаббой Аҳмадзода иштирок доштанд.

Дар шуъбаи навтаъсис дастгоҳу таҷҳизоти муосири тиббӣ аз кишварҳои тараққикардаи ҷаҳон дастрас ва васлу насб шудааст, ки асосан барои ташхис ва табобати бемориҳои саратон пешбинӣ гардидааст.

ИСТЕҲСОЛИ МАҲСУЛОТИ РАҚОБАТПАЗИР – ИҚДОМИ НЕК

Подробности статьи

Дар доираи сафари кории Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Минтақаи саноатии шаҳри Гулистон корхонаи истеҳсоли маҳсулоти коғазӣ бо шаклу андоза ва бастаҳои гуногун ифтитоҳ гардид.

Дар маросими ифтитоҳи он Ёрдамчии Президенти Ҷумҳурии Тоҷикистон Абдуҷаббор Раҳмонзода ва Раиси вилояти Суғд Раҷаббой Аҳмадзода иштирок доштанд. Корхонаи нави саноатии хурд дар заминаи татбиқи ҳадафи чоруми миллӣ – саноатикунонии босуръати кишвар ва сазовор истиқбол гирифтани ҷашни 30 – солагии Истиқлолияти давлатии Ҷумҳурии Тоҷикистон аз тарафи соҳибкори ватандӯст Насимҷон Саидов таъсис дода шудааст.