18 November 2020

МОДАРИ МИҶГОНАРО КУШТА ГУРОНДАНД…. (НАВОР)

Миҷгона ҳамроҳи модараш Мусулмонова Зебӣ дар ҷамоати деҳоти Ҳисор, деҳаи Ҳаёти нав зиндагии хурраму осоишта дошт.

Субҳи барвақт модари Миҷгона барои беҳтар гардонидани саломатиаш баҳри гузаронидани сӯзандору ба хонаи ҳамсояаш   Одинаев Маҳмурод, ки ҳамсари ӯ Ҳакимова Зубайда бе ваколатномаи махсус ба аҳолии деҳа ҳамчун ҳамшираи тиб дар хонааш хизматрасонӣ менамуд,  рафт.

Читать далее

Фармонҳои Президенти Ҷумҳурии Тоҷикистон

ФАРМОНИ
ПРЕЗИДЕНТИ ҶУМҲУРИИ ТОҶИКИСТОН

Дар бораи аз вазифаи директори Агентии назорати
маводи нашъаовари назди Президенти Ҷумҳурии Тоҷикистон
озод намудани Салимзода Ш.О.

Мутобиқи моддаи 69 Конститутсияи Ҷумҳурии Тоҷикистон фармон медиҳам:
Салимзода Шерхон Одина бо сабаби ба нафақа баромадан аз вазифаи директори Агентии назорати маводи нашъаовари назди Президенти Ҷумҳурии Тоҷикистон озод карда шавад.

Читать далее

ИСТИҚЛОЛИЯТ - ФАЙЗИ НУСРАТБОР

Неъмати муқаддаси ҳаётамонро гиромӣ медорем, - мегӯяд Тоҳир Қудратзода, раиси ноҳияи Ҷаббор Расулов

Мардуми заҳматпешаи ноҳияи Ҷаббор Расулов чун дигар сокинони мамлакат бо дарки баланди арзишҳои ватандорӣ ҷиҳати боз ҳам ободу зеботар намудани кишвари азизамон корҳои созандагиро тақвият бахшида, дар рушду нумуи диёри сарсабзи хеш саҳм мегузоранд. Сокинони сарбаланди ноҳия бо шукргузорӣ аз дастовардҳои беназири даврони Истиқлолияти давлатӣ беш аз ҳар вақти дигар дар татбиқи сиёсати бунёдгароёнаи Асосгузори сулҳу ваҳдати миллӣ – Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон, ки меҳвари асосии онро рушди бонизоми кишвар ташкил медиҳад, камари ҳиммат бастаанд. Ин аст, ки дар доираи ҳидоятҳои Сарвари давлат нишондиҳандаҳои иқтисодиву иҷтимоии ноҳия сол ба сол афзун гашта, сатҳу сифати зиндагии мардум беҳтар шуда истодааст.

Истиқлолият, бешубҳа, барои пешрафти кишвар ва баланд гаштани сатҳи зиндагии мардум мусоидат намуд. Имрӯз бо шарофати Истиқлолияти давлатии Тоҷикистон дар тамоми гӯшаву канори кишвар, бахусус дар ноҳияи Ҷаббор Расулов корҳои ободониву созандагӣ ва бунёдкорӣ бомаром идома доранд. Тавре дар суҳбат Қудратзода Тоҳир Толибӣ, раиси ноҳияи Ҷаббор Расулов зикр намуд, сокинони шарафманди ноҳия бо шукргузорӣ аз даврони озодӣ ва сулҳу ваҳдати комил, таҳти ливои музаффаронаи Пешвои муаззами миллат барои дар сатҳи баланди ташкилӣ ва бо дастовардҳои шоиста таҷлил намудани ҷашни фархундаи 30 - солагии Истиқлолияти давлатии Ҷумҳурии Тоҷикистон заҳмат кашида истодаанд.

Дар баробари ин, бо мақсади татбиқи Амри Президенти Ҷумҳурии Тоҷикистон «Дар бораи омодагӣ ба ҷашни 30 - солагии Истиқлолияти давлатии Ҷумҳурии Тоҷикистон» дар доираи нақшаи чорабиниҳои тасдиқгардида дар ноҳия корҳои таъмирию сохтмонӣ босуръат давом доранд.

Тибқи маълумоти оморӣ, масоҳати умумии ҳудуди ноҳия 32141 гектарро ташкил намуда, аҳолии он ба ҳолати якуми январи соли ҷорӣ 140828 нафар мебошанд.

Ноҳия Ҷамоати шаҳраки Меҳробод ва панҷ ҷамоати деҳот Ғӯлакандоз, Деҳмой, Сомониён, Ҳаёти нав, Гулхона ва 28 деҳаро дарбар мегирад.

Аз шумораи умумии корҳои созандагӣ ба истиқболи ҷашн то ин давра аз ҳисоби ташкилоту корхонаҳо ва соҳибкорони маҳаллӣ корҳои сохтмонӣ ва таъмирӣ дар 281 банд ба маблағи умумии 159 миллиону 593 ҳазор сомонӣ ба анҷом расонида шудаанд. Дар натиҷа 142 иншоот ба истифода дода шуда, зиёда аз 436 ҷойи нави корӣ таъсис ёфт, - қайд намуд Қудратзода Тоҳир Толибӣ.

Дар асоси дархосту пешниҳодҳо нақшаи чорабинии мақомоти иҷроияи ҳокимияти давлатии ноҳия иборат аз 394 банд тасдиқ шуда, аз 153 банди дар соли 2019 ба нақша гирифта 154 банд иҷро гардид ва аз 59 банди дар соли 2020 пешбинишуда 29 банд ба иҷро расидааст.

Дар нақшаи чорабинии мазкур сохтмону таъмири мактабу синфхонаҳои иловагӣ, боғчаҳои бачагона, бунгоҳҳои тиббӣ ва марказҳои саломатӣ, таъмири марказҳои фарҳангӣ ва китобхонаҳо, майдончаҳои варзишӣ, толори варзишӣ, нуқтаи хатнаи кӯдакон, дорухона, сартарошхона, ҳаммом, кошонаи ҳусн, марказҳои савдо ва хизматрасонӣ, мумфаршкунии 16 километр роҳ, 11 коргоҳи истеҳсолӣ дар назар дошта шудааст.

Санаи 20 - уми марти соли ҷорӣ бо иштироки намояндаи Ҳукумати Ҷумҳурии Тоҷикистон Фирдавс Ҳаётзода, инчунин намояндаи Мақомоти иҷроияи ҳокимияти давлати вилоят С.Рустамзода дар баробари ҷашн гирифтани Наврӯзи Аҷам дар варзишгоҳи марказии Ҷамоати деҳоти Ғӯлакандоз як толори варзишӣ мавриди баҳрабардорӣ қарор дода шуд.

Дар баробари вусъати корҳои созандагию бунёдкорӣ, ҳамзамон тадбирҳои маънавию фарҳангӣ вобаста ба мазмун ва моҳияти Истиқлолияти давлатӣ, озодию соҳибихтиёрӣ, ваҳдати миллӣ, хизматҳои Пешвои муаззами миллат муҳтарам Эмомалӣ Раҳмон дар ободию шукуфоии Ватан тавассути баргузории “Рӯзҳои ягонаи ахбор”, таълифу нашри мақолаҳои илмию оммавӣ, ташкили конфронсу семинарҳо, озмунҳо, мусобиқаҳои варзишӣ ва дигар корҳои фаҳмондадиҳӣ ба роҳ монда шуда истодаанд.

Ҳамчунин, санаи 3 – юми апрели соли равон бо иштироки роҳбари гурӯҳи кории Ҳукумати ҷумҳурӣ Ҳасанзода Гулнора Кенҷа рафти сохтмони иншооте, ки дар соли 2020 ба истифода дода мешаванд, мавриди азназаргузаронӣ қарор дода шуд. Зимни боздид аз тарафи роҳбари гурӯҳ ҷиҳати дар сатҳи баланд ва саривақт иҷро намудани корҳои сохтмонӣ дастуру супоришҳо дода шуд.

Қудуми мубораки Пешвои миллат

Аз қадимулайём мегӯянд, ки подшоҳ қудуми муборак дорад ва ин ҳикмати мардумӣ беасос нест. Мо дар мисоли ташрифи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ноҳияи Ҷаббор Расулов бори дигар ба воқеияти он шоҳид шудем. Зимни сафарашон Пешвои миллат ба оғози фаъолияти якчанд иншооти ҳаётан муҳим оғоз бахшиданд, ки мӯҷиби пешрафту тараққиёти соҳоти хоҷагии халқ ва дар ин замина, беҳдошти рӯзгори мардуми ноҳия хоҳанд гардид.

Баробари ба истифода додани пойгоҳи обкашии «Деҳмой - 1» дар деҳоти Деҳмой, ки бо дастгирии Ҳукумати Ҷумҳурии Тоҷикистон пурра таъмиру таҷдид гардид, мушкилоти норасоии об дар деҳоти Гулхона, Сомониён, Ғӯлакандоз, қисман заминҳои деҳаи Ҳаёти нав аз байн рафт. Акнун тавассути ин пойгоҳ 7885 гектар замини кишоварзӣ бо оби полезӣ таъмин мешавад. Ҳар як муҳаррики нави насбшуда, ки то 20 фоиз қувваи барқро сарфа менамояд, дар як сония то 1300 литр оби полезӣ интиқол медиҳад. Ҳамчунин, таъминоти оби полезӣ дар мавзеи Рухак беҳтар гардид. Дар он ҷо 400 гектар замини корам ва 210 гектар замини ноҳияи Бобоҷон Ғафуров, ки қаблан аз сабаби норасоии об қисман кишт мешуданд, шодоб гардиданд.

Ташрифи Пешвои миллатро аъзои Хоҷагии деҳқонии «Холмат» бесаброна интизор буданд. Баҳои баланди Пешвои миллат ба заҳмати аъзои хоҷагӣ, ки 4,3 гектар замин доранд ва ҳар ваҷаби онро самаранок истифода мебаранд, онҳоро басо рӯҳбаланд кард. Бояд гуфт, ки дар хоҷагӣ кишти такрориро хуб ба роҳ мондаанд. Аз ҷумла, дар 1 гектар бодиринг, 0,50 гектар помидор ва 0,50 гектар карам кишт намудаанд. Саҳмдорони хоҷагӣ қаблан дар масоҳати 1,5 гектар картошка ва 0,50 гектар карам кишт намуда, ҳосили фаровон ба даст оварда буданд. Ҳосили картошка аз кишти асосӣ ба 35 ва карам ба 25 сентнерӣ расидааст, ки ин нишондиҳанда ба талаботи соҳа дар иқлими ноҳия мутобиқ аст.

Саноатикунонии кишвар – ҳадафи чоруми миллӣ

Тавре Сарвари давлат муҳтарам Эмомалӣ Раҳмон зикр намуданд, бо дарназардошти тағйирёбии вазъи талаботи бозори ҷаҳонӣ ва таъмини рушди устувори иқтисодӣ тараққӣ додани соҳаи саноат ва коркарди маҳсулоти он то ҳадди ниҳоӣ аз ҷумлаи вазифаҳои муҳимтарин мебошанд.

Саноат яке аз соҳаҳои афзалиятноки хоҷагии халқ дар кишвар ба ҳисоб рафта, рушди ҷомеа бе пешравии он ғайриимкон мебошад. Дар ин самт мақомоти иҷроияи ҳокимияти давлатии ноҳияи Ҷаббор Расулов, тибқи дастуру супоришҳои Пешвои миллат, ҷиҳати таъсис додани корхонаҳои нави истеҳсолӣ, ворид намудани технологияҳои нави муосир вобаста ба талаботи замон ва рушди минбаъдаи он аҳамияти ҷиддӣ зоҳир менамояд.

Сохторҳои марбутаи мақомоти иҷроияи ҳокимияти давлатии ноҳия ва саноатчиён диққати асосиро барои зиёд намудани ҳаҷми истеҳсоли маҳсулоти саноатӣ, таъсиси ҷойҳои нави корӣ, ҷалби мутахассисон ба кор, рушди соҳибкории хурду миёна, ҷалби бештари сармоягузорӣ, коркарди ашёи хоми маҳаллӣ ва истифодаи иқтидорҳои бозистода равона намуданд.

Зикр кардан бамаврид аст, ки айни замон дар ноҳия 26 корхонаи саноатӣ, аз қабили ҶСК “Суғд стандарт коттон”, ҶДММ “Манзилоро”, ҶДММ “Ш.Бародарон”, ҶДММ “Ғаллаи Суғд”, ҶДММ “Органик Ян” ва ВМ ҶДММ “Нури Истиқлол” фаъолияти хуб доранд.

Корхонаҳои саноатии ноҳия дар нӯҳ моҳи соли ҷорӣ ҳаҷми истеҳсоли маҳсулоти саноатиро ба маблағи 207 миллиону 943,1 ҳазор сомонӣ расониданд, ки нисбат ба ҳамин давраи соли 2019-ум 77 миллиону 683,9 ҳазор сомонӣ зиёд буда, 159,6 фоизро ташкил медиҳад.

Баҳри дар амал татбиқ намудани ҳадафи чоруми миллӣ – саноатикунонии босуръати кишвар аз тарафи масъулини ноҳия тадбирҳои мушаххас андешида шуда истодааст.

Роҳи обод – башорати зиндагии шоиста

Боиси қайд аст, ки давоми чанд соли охир дар ноҳияи Ҷаббор Расулов чандин километр роҳҳои маҳаллӣ пурра мумфарш шуданд.

Тибқи нақша, дар соли 2019 таъмири роҳҳои автомобилгарди ноҳия ҳамагӣ 94,7 километрро ташкил медиҳад, ки аз он 22,5 километр таъмири асосӣ, 28,1 километр таъмири ҷорӣ бо асфалт ва 44,1 километр роҳ шағалпӯш мешуд. Иҷроиши он ҳамагӣ 98,1 километрро ташкил дод, ки аз таъмири асосӣ 16,5 километр, таъмири ҷорӣ 32 километр ва шағалпӯш 49,6 километр мебошад.

Ҳамчунин, дар соли 2020 бошад, нақшаи таъмири роҳҳои ноҳия ҳамагӣ 92,8 километрро ташкил медиҳад, ки аз он 6,5 километр таъмири асосӣ, 35,7 километр таъмири ҷорӣ бо асфалт ва 50,6 километр роҳ шағалпӯш карда мешуд. Иҷрои он бошад, 93 километрро ташкил медиҳад, ки аз он 4,5 километр таъмири асосӣ, 36,3 километр таъмири ҷорӣ ва 51,9 километр шағалпӯш шудааст.

Қайд кардан лозим аст, ки дар доираи сафари кориашон Президенти кишвар муҳтарам Эмомалӣ Раҳмон моҳи октябри соли 2018 дар ноҳияи Ҷаббор Расулов қитъаи роҳи автомобилгарди «Деҳмой – Меҳробод - Маданият» - ро пас аз навсозии пурра мавриди баҳрабардорӣ қарор доданд.

Қитъаи мазкур дар доираи Лоиҳаи «Рушди роҳҳои алоқа дар Осиёи Марказӣ» (таҷдиди роҳи мошингарди Хуҷанд – Исфара - 67,7 километр) навсозӣ шудааст. Масофаи умумии қитъаи роҳи мошингарди «Деҳмой – Меҳробод - Маданият» 16,9 километрро дарбар мегирад.

Барои Лоиҳаи “Рушди роҳҳои алоқа дар Осиёи Марказӣ - РАОМ-2” (таҷдиди роҳи автомобилгарди Хуҷанд - Исфара) аз ҷониби Бонки Умумиҷаҳонӣ дар ҳаҷми 45,0 миллион доллари ИМА ва Ҳукумати Ҷумҳурии Тоҷикистон дар ҳаҷми 9,0 миллион доллари ИМА – ро ташкил медиҳад, маблағгузорӣ гардид.

Дар асоси Созишномаи грантӣ оид ба лоиҳаи «Беҳтар намудани таҷҳизот барои нигоҳдории роҳ дар вилояти Суғд» байни Вазорати нақлиёти Ҷумҳурии Тоҷикистон ва Агентии Ҷопон оид ба рушди байналмилалӣ ЛСА моҳи декабри соли 2018 ба МДНРА-и ноҳия ду техника, як адад манипулятори борбардорӣ, як адад боркунаки фронталӣ ва шаш адад механизм ва таҷҳизоти роҳсозӣ ворид шудаанд.

Сайёҳӣ ва рушди он

Бояд гуфт, ки маркази ноҳия сол аз сол ободу зебо гардида истодааст ва дар доираи “Солҳои рушди деҳот, сайёҳӣ ва ҳунарҳои мардумӣ” корҳои ободониву созандагии ҷамоатҳои деҳоти ноҳия хуб ба роҳ монда шудааст. Ҳангоми мушоҳидаҳо дар Ҷамоати деҳоти Гулхона аён гардид, ки барои сазовор пешвоз гирифтани ҷашни Истиқлолияти давлатии кишвар корҳои созандагиву ободонӣ бомаром идома доранд. Дар ёздаҳ деҳаи ҷамоат иншооти гуногуни иҷтимоӣ ва хизматрасонии маишӣ барои сокинон сохта шуда, он ҷараён доранд. Тибқи маълумоти масъулин, дар асоси дастуру супоришҳои Раиси вилоят Раҷаббой Аҳмадзода дар ҳар як деҳа майдончаи варзишӣ сохта мешавад. Имрӯз ин иқдоми наҷибро соҳибкорон хуб пазируфтаанд. Аз ҷониби соҳибкори маҳаллӣ Далер Каримов дар деҳаи Гулхона як майдончаи варзишӣ сохта, мавриди истифода қарор гирифт. Ҳамчунин, дар ҳудуди ҷамоат таъмиру мумфаршкунии роҳҳои маҳаллӣ бо маром идома дошта, алҳол беш аз як километр роҳи марказии ҷамоат аз ҷониби соҳибкорону саховатмандон ба пуррагӣ мумфарш карда шуд. Ноҳияи Ҷаббор Расулов асосан дар фасли баҳор диққати сайёҳонро ба худ ҷалб менамояд. Дар фаслҳои баҳору тобистон шаҳрвандон аз шаҳру ноҳияҳои атроф барои сайри лола меоянд ва дар ноҳия баҳри истироҳати бофароғат дар табиат шароит муҳайё шудааст. Дар ноҳия як меҳмонхона бо номи «Салимбек» фаъолият менамояд, ки дар шаҳраки Меҳробод ҷойгир аст.

Ҳамчунин, ду истироҳатгоҳ – осоишгоҳ мавҷуд буда, аз он ҷумла «Истироҳатгоҳи солимгардонии кӯдакони ба номи 20 - солагии Истиқлолият» ва ҶДММ «Гиппократ» ва ду осорхона, хона - осорхонаи Бобохон Ҳамдамов дар Ҷамоати деҳоти Сомониён ва осорхонаи таърихӣ-кишваршиносӣ дар Ҷамоати деҳоти Ғӯлакандоз мавҷуд аст.

Дар ноҳия як адад ширкати сайёҳи ҶДММ «Роҳи сафед» фаъолият намуда, 22 ёдгории таърихӣ - фарҳангӣ, зиёратгоҳҳо, инчунин боғи фарҳангӣ - фароғатӣ дар шаҳраки Меҳробод фаъолият менамояд.

Дар ноҳия тарабхонаҳои замонавӣ ва марказҳои хизматрасонӣ мавҷуд буда, барои қабул дар сатҳи баланди хизматрасонӣ ба сайёҳон омода мебошанд.

Соли ҷорӣ гардиши маблағи умумии соҳаи сайёҳӣ аз хизматрасонии меҳмонхона, тарабхона ва ошхона 600,9 ҳазор сомониро ташкил дода, нисбат ба ҳамин давраи соли гузашта  2 миллиону 276,6 ҳазор сомонӣ кам ё ин ки 26,3 фоизро ташкил медиҳад, ки сабаби асосии он паҳншавии бемории коронавирус ва аз ин боис коҳиш ёфтани ташрифи сайёҳон мебошад.

Дар маҷмӯъ, сокинони ноҳияи Ҷаббор Расулов тибқи дастуру ҳидоятҳои созандаи Пешвои муаззами миллат муҳтарам Эмомалӣ Раҳмон фаъолият бурда, минбаъд низ бо меҳнати ҳалолу садоқатмандона ба Ватан содиқона хизмат мекунанд. Мекӯшанд, ки нишондиҳандаҳои иқтисодиву иҷтимоиро баланд бардоранд, то ҳаёти осудаву осоишта ва дастархони пурнозу неъмати сокинон таъмин бошад.

Нодир ТУРСУНЗОДА,

 «Ҳақиқати Суғд»,

Аксбардор

Инъомҷон РАБИЕВ

Читать далее

ҶАВОНОН ДАР РОҲИ ТАТБИҚИ БАРНОМАҲОИ ДАВЛАТСОЗИИ МИЛЛӢ

Ташаккули давлатдории Тоҷикистон дар даҳсолаи аввали ҳазораи нав барои равнақи рӯзафзун, ташаккули бахшҳои мухталифи хоҷагии халқи мамлакат ва муҳимтар аз ҳама роҳ кушодан барои мутобиқати зиндагонӣ ва фаъолият бар ниёзҳои ҷомеаи муосир заминаҳои муҳим ва муассиреро фароҳам оварда истодааст. Ба таври воқеӣ метавон изҳор дошт, ки аз оғози асри нав Тоҷикистон ба як марҳалаи сифатан нави рушду тараққиёти хеш ворид гардида, амалкарди чанд барномаи муҳими давлатиро барои расидан ба ҳадафҳои аслии дурнамои рушди мамлакат аз сар гирифт, ки имрӯз мо метавонем, аз ҷамъбаст ва дар ҳадди зарурӣ аз анҷоми муваффақонаи ин барномаҳои пешрафта, ки ба сивумин солгарди Истиқлолияти давлатии Ҷумҳурии Тоҷикистон моро наздик месозанд, ҳарф занем.

Таваҷҷуҳ ба татбиқи муваффақонаи сиёсати давлатии ҷавонон ва дар ин миён истифода аз нерӯҳои зеҳнии насли ояндасоз низ дар шумори муҳимтарин равандҳои дурнамои рушди давлат, дар даҳсолаҳои минбаъда қарор гирифт ва баргузории мулоқоти Асосгузори сулҳу ваҳдати миллӣ – Пешвои миллат, Президенти Ҷумҳурии

Тоҷикистон муҳтарам Эмомалӣ Раҳмон бо намояндагони ҷавонони мамлакат дар моҳи майи соли 2005 ба таври воқеӣ дурнамои як давраи мукаммали рушду нумӯи фаъолияти ҷавонон ва рисолати аслии эшонро дар ин марҳалаи навини таърихӣ муқаррар намуда буд, ки имрӯз воқеан мо аз он ҳидоятномаи Сарвари давлат барои ҷавонон дар ин фосила натиҷаҳои шоён ва боэътимодеро дар ин росто ҷамъбаст мекунем, ки баробари атои қаноатмандии хоса дар ин амр моро ба оғози боз як давраи нави зуҳури корномаҳо мерасонанд. Танҳо ба як нишондоди оморӣ, ки ба соҳаи маориф марбут аст, метавон руҷӯъ намуда, тибқи он маҳсули пешрафтҳои кишварро дар дарозои ҳафт сол натиҷагӣ кард, ки дар мулоқоти қаблии Сарвари давлат бо ҷавонон ба он ишорат шуда буд. Дар суханронии Сарвари давлат он ҷо таъкид гардида буд, ки «дар буҷети давлатии соли 2005 барои таъмини соҳаи маориф 250 миллион сомонӣ ҷудо гардидааст, ки нисбат ба соли гузашта 90 миллион сомонӣ ё 55 фоиз зиёд мебошад». Ин рақам барои соли 2013 аз ду миллиард сомонӣ убур кардааст, ки нисбат ба соли 2005 беш аз ҳафт маротиба зиёд мебошад. Барои муқоисаи соҳаи маорифро ба он хотир интихоб намудем, ки имрӯз намояндагони ҷавонони мамлакат бештар аз пештар ба ин бахши муҳим ва меҳварии давлат пайвасти ногустатанӣ доранд. Ва ин пешрафти чашмрас метавонад, барои беҳдошти шароити таҳсил ва фардои ҷавонон таъсири пурфайзе гузорад. Аз сӯи дигар, тамоюлҳои пешқадам ва пешрафтҳои босуръат дар низоми маорифи кишвар боис бар он гардид, ки доираи имкониятҳои таҳсили ҷавонон чи дар кишвар ва чи берун аз он беҳтару хубтар гардида, дар аксари донишгоҳҳои олии мамлакат вобаста ба талаботи Тоҷикистон ва мутобиқат ба меъёрҳои ҷаҳонии таҳсил ихтисосҳои наву замонавӣ ифтитоҳ гардида, ҷалби ҷавонон ба таҳсил аз рӯи иқтизои ихтисосҳои хоҷагии халқи кишвар нуфузи шоиста дарёфт.

Марҳала ба марҳала даврони истиқлол дар ҳаёти ҷавонони кишвар дигаргуниҳои тозае ворид намуда, барои рӯи кор омадани дастовардҳои наву корномаҳои ҷолиб миёни онҳо мусоидат намуд. Мулоқоти пайвастаи Пешвои миллат муҳтарам Эмомалӣ Раҳмон ба ҷавонони кишвар ва дар партави ин мулоқот ба созандагиву бунёдкориҳо рӯй овардани ҷавонони мамлакат саҳифаҳои дурахшони ҳаёти ҷавононро дар раҳгузори истиқлол муаррифӣ намуд. 23-юми май ҳамчун рӯзи ҷавонони Тоҷикистон эълон гардид, ки онро метавон муҳимтарин падидаи даврони истиқлоли кишвар нисбат ба ҳаёти ҷавонон номид. Таъсиси Ҷоизаи давлатии ба номи Исмоили Сомонӣ дар соҳаи илм дар байни ҷавонон, ки бо Фармони Президенти мамлакат таъсис ёфт, рамзи тақдири заҳматҳои ҷавонон дар ҷодаи таҳқиқ ва шинохту маърифати арзишҳои фикрӣ гардид. Дар баробари ин ҳамасола тақдими ҷавонони эҷодкор бо ҷоизаҳои махсуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар риштаҳои адабиёт, ҳунар, рӯзноманигорӣ ба татбиқи муваффақонаи сиёсати давлатии ҷавонон дар самти дастгирии ҷавонони болаёқат ишорат мефармояд. Баробари ин, эълон гардидани соли 2017 ҳамчун “Соли ҷавонон” аз ҷониби Пешвои миллат таваҷҷуҳи махсуси Сарвари давлатро ба қудрати маънавӣ ва зеҳнии ҷавонон бозгӯӣ мекунад.

Ҳамасола барои тарбияи маънавии ҷавонон дар соҳаҳои мухталифи хоҷагии халқ тадбирҳои зарурӣ андешида мешаванд. Ташкили озмунҳои гуногун истеъдодҳои навро кашф карда, барои ояндаи шукуфои онҳо раҳ мекушояд. Конфронси олимони ҷавони кишвар тозатарин чеҳраҳои маърифатиро муаррифӣ карда, ба сӯи кашфиётҳои нав ба нав ҳидоят менамояд. Озмуни шашмақомсароёни ҷавон, барои эҳёи санъати миллӣ ва тарбияи ҳунарварони меҳанпараст ва арҷгузории мусиқии суннатӣ зербинои мустаҳкам мегузорад. Баргузории озмунҳои ҷумҳуриявии “Фурӯғи субҳи доноӣ китоб аст” ва “Тоҷикистон - Ватани азизи ман” низ ҷавонони зиёди огоҳ, ҳунарманд ва соҳибмарифату аҳли китобро муаррифӣ намуд, ки ин ҳам ба тадбирҳои муҳими давлатӣ дар самти дастгирии ҷавонон аст.

Дар маҷмӯъ, ҳамаи ин дастовардҳои бузурги ҷавонони қарни ХХI-и кишварро бо эътимоди комил метавон меваи истиқлол номид, ки аз баракати ин марҳалаи сарнавиштсози кишвар барояшон муяссар гардидааст. Боварӣ ва эътимоди Пешвои миллат ба нерӯи ҷавонон ва пайрави асили Пешвои миллат шудани тамоми ҷавонони кишвар имрӯз ба мақоми шоёни насли ояндасоз ва фардоофарин ишорат мекунад. Аз ин рӯ, мо - ҷавононро зарур аст, ки ҷавобан ба ин ғамхориҳо бо хониши хубу аъло ва таҳсилоти шоён ҳамчун мутахассисони шоистаи замон ба камол расида, дар татбиқи сиёсати давлат, ҳифзу ҳимояи манфиатҳои миллӣ ва истиқболу амалкарди ғояҳои нотакрори Пешвои муаззами миллати хеш саҳми муносиб гузорем.

Андар Раҳмонӣ,

муҳаррири сомонаи расмии

Мақомоти иҷроияи ҳокимияти

давлатии вилояти Суғд

Читать далее

Савганди Пешвои миллат савганди мо, ҷавонон

Дар факултети биология ва химияи Донишгоҳи давлатии Хуҷанд ба номи академик Бобоҷон Ғафуров чорабинии илмӣ бахшида ба “Рӯзи Президент” баргузор шуд.

Чорабиниро муовини декан оид ба корҳои тарбия оғоз намуда, қайд кард, ки дар ҳар давру замон барои рушду пешрафти ҳар миллат фарзандони барӯманду фарзона нақши мондагоре аз хеш боқӣ мегузоранд. Бақои миллат, пешравии давлат аз роҳбари миллатдӯст, ваҳдатсоз ва ташкилотчӣ вобаста аст. Боиси хушбахтии халқи бузурги тоҷик аст, ки чунин роҳбарро дар шахсияти Асосгузори сулҳу ваҳдати миллӣ-Пешвои муаззами миллат, Президенти Ҷумҳурии Тоҷикистон, муҳтарам Эмомалӣ Раҳмон пайдо кардааст.

Маҳз, бо заҳмату талошҳои пайгиронаи Пешвои миллат Тоҷикистон дар интиҳои асри ХХ аз фоҷиаи миллӣ раҳоӣ ёфта, Истиқлолияти давлатии худро таҳким бахшид ва миллати тоҷик баъд аз ҳазор сол дар роҳи эҳёи давлатдории миллӣ ба дастовардҳои бузурги таърихӣ ноил гардид ва имрӯз ба сӯи ояндаи нек устуворона қадам мегузорад.

Раиси ҷамъияти илмии донишҷӯён Шерозҷон Шарофов доир ба саҳми Пешвои миллат дар самти дастгирии ҷавонон ибрози андеша намуд.

Мавсуф зикр дошт, ки ғамхории Пешвои миллат нисбат ба ҷавонон рӯз аз рӯз зиёд гашта, шароитҳои беҳтарин дар ҳар як донишгоҳу донишкадаҳо ва омӯзишгоҳҳову колеҷҳо фароҳам  шудааст. Ҷавонон имкон доранд, ки дар донишгоҳҳои олии мамлакат ва ё дар хориҷ таҳсили илм намоянд.

Ҷавонони зодаи Истиқлолият барои ободии диёр ва боло рафтани обрӯю нуфузи он дар ҷаҳони муосир аз фарзанди фарзонаи Тоҷикистон Пешвои миллат муҳтарам Эмомалӣ Раҳмон ибрат гирифта, барои рушду нумӯи кишвари хеш кор ва фаъолият намоем.

Сипас, донишҷӯи соли 2-юми ихтисоси биология Шаҳодат Обидова оид ба “Нақши Пешвои миллат дар рушди мамлакат” маърӯза намуд. Ӯ қайд кард, ки дар поёни садаи бистум тоҷикон Истиқлолияти давлатӣ ба даст оварданд ва дар харитаи сиёсии ҷаҳон давлати мустақиле бо номи Ҷумҳурии Тоҷикистон арзи ҳастӣ кард. Дар ҷумҳурӣ мухолифатҳои дохилӣ рӯи кор омаданду оташи ҷанги шаҳрвандӣ аланга зад. Хушбахтона дар чунин лаҳзаҳои мудҳиш марде давлатро ба даст гирифт, ки тамоми сифатҳои хуби инсониро дар худ дошт. Ин мард, албатта, Эмомалӣ Раҳмон буданд.

Дар анҷоми чорабинӣ муовини декан оид ба корҳои тарбия  Мушарраф Саид бори дигар ҳамагонро ба ин рӯзи таърихӣ табрику таҳният гуфт.

САИДЗОДА МУШАРРАФ САИД, муовини декан
 оид ба корҳои тарбияи факултети биология ва химияи 
Донишгоҳи давлатии Хуҷаед ба номи академик Бобоҷон Ғафуров
    ШЕРОЗҶОН ШАРОФОВ
раиси ҷамъияти илмии донишҷӯёни факултет

Читать далее

ЁДГОРИҲОИ ТАЪРИХИИ ГУЗАРГОҲИ СИРДАРЁ

Тоҷикон таъриху тамаддуни ғанӣ дошта, меросбарони саодатманди ниёгони хеш ҳастанд. Имрӯз шаҳрҳои бостонии Тоҷикистон дар шумори куҳантарин мавзеъҳои Осиёи Миёна шинохта шудаанд. Арҷгузорӣ ба тамаддуну таърихи гузаштагони хеш, шинохти арзишҳои миллӣ моро дар рӯҳияи худогоҳиву худшиносӣ, миллатдӯстиву меҳанпарастӣ тарбия менамояд.

Дар ин росто эълон шудани солҳои 2019-2021 чун «Солҳои рушди деҳот, сайёҳӣ ва ҳунарҳои мардумӣ» ҳисси ифтихори миллӣ ва масъулиятшиносии моро бештар сохт, зеро вазифаи ҷонии ҳар фарди бонангу ор аст, ки барои ояндагони хеш ин меросҳои таърихиву меъмориро бегазанд боқӣ гузорад.

Дар шумори бисёр шаҳрҳои таърихии кишвари азизамон-Тоҷикистони соҳибистиқлол Конибодом низ дар сарчашмаҳои таърихӣ ва маъхазҳои пурарзиши илмӣ ба ҳайси яке аз шаҳрҳои қадимаи Осиёи Марказӣ зикр шудаанд.

 Айни ҳол дар ҳудуди шаҳри Конибодом 88 ёдгории таърихию фарҳангӣ ва меъморӣ ба қайд гирифта шудааст.

Чанде пеш бо мақсади таъмини иҷрои талаботи Қонуни Ҷумҳурии Тоҷикистон «Дар бораи ҳифз ва истифодаи объектҳои мероси таърихию фарҳангӣ» баҳри гиромидошту ҳифзи мероси фарҳангию таърихии ҳудуди шаҳру деҳоти Конибодом ёдгориҳои таърихию фарҳангӣ ва меъмории шаҳр аз нав ба қайд гирифта шуданд.

 Аз рӯйи дараҷабандӣ ин ёдгориҳои таърихӣ ба ду даста – умумиҷумҳуриявӣ ва маҳаллӣ шомил мебошанд. Аз ёдгориҳои таърихии шаҳри Конибодом чаҳор ёдгории таърихӣ ба гурӯҳи умумиҷумҳуриявӣ дохил мешаванд, ки Мадрасаи «Мирраҷаб Додхоҳ», Мадрасаи «Оим», манораи «Норчабой» ва мақбараи «Лангари Бобо» аз он ҷумлаанд.

Бино ба гуфти нозири ҷойҳои таърихиву меъмории шаҳр Шаҳноза Хидирова, ёдгориҳои таърихии ин мавзеъ аз рӯйи сохти меъморӣ ба ёдгориҳои таърихӣ – меъморӣ, бостонӣ ва таърихӣ – монументалӣ ҷудо мешаванд. Дар шаҳри Конибодом чилу чаҳор адад масҷиду мадраса ва мазор ба гурӯҳи ёдгориҳои таърихӣ – меъморӣ ва чилу чаҳор адади дигар ба гурӯҳи ёдгориҳои таърихӣ - монументалӣ тақсимбандӣ шудаанд.

Бояд гуфт, ки миёни ин ёдгориҳои таърихӣ мадрасаҳои «Оим» ва «Мирраҷаб Додхоҳ» бештар мавриди таваҷҷуҳи сайёҳони дохиливу хориҷӣ қарор гирифтааст.

«Мадрасаи Оим» ёдгории таърихию меъмории асри ХIХ буда, дар сари роҳи қадимаи Конибодом-Қӯқанд, самти роҳи Патар воқеъ аст. Аз рӯи маълумот бинои мадраса соли 1825 аз ҷониби яке аз шогирдони мадраса Қорӣ Исмати Ҷамол мавриди истифода қарор дода шудааст. Мадрасаро Мулло Миролим ном донишманде сохта, ба номи духтараш Бибӣ Оим гузоштааст.

Ёдовар мешавем, ки ин мадраса нахустин маркази илмию таълимӣ барои занону духтарон дар Тоҷикистони Шимолӣ маҳсуб меёбад. Он ҳамчун ёдгории таърихии аҳамияти ҷумҳуриявидошта ба қайд гирифта шуда, соли 2015 дар шаҳри Алма-Ато дар қатори чаҳор ёдгории дигари таърихию фарҳангӣ ва меъморӣ - Шайх Муслиҳиддин, Қалъаи Хуҷанд, тасвирҳои рӯйисангӣ ва ёдгориҳои бостонии атрофи шаҳри Хуҷанд ва ноҳияи Ашт, маҷмааи меъмории «Мирраҷаб Додхоҳ», «Мадрасаи Оим» низ ба силсилаҷоизаи Шоҳроҳи Бузурги Абрешим номнавис шуд.

Ин иншоот ба гузаргоҳи Фарғона — Сирдарё тааллуқ дорад. Ҳамчунин, «Мадрасаи Оим» чун ёдгории таърихии аҳамияти ҷумҳуриявидошта ба қайд гирифта шуда, соли 2015 аз ҷониби ЮНЕСКО ба феҳристи силсилаи ёдгориҳои таърихию меъмории ҳавзаи дарёи Сир шомил шудааст. Воқеан, ин нукта аз он шаҳодат медиҳад, ки ҷомеаи ҷаҳонӣ ба таъриху фарҳанги миллати тоҷик таваҷҷуҳи хоса зоҳир менамояд.

Бояд ёдовар шуд, ки «Мадрасаи Оим» соли 2019 бо ташаббуси мақомоти иҷроияи ҳокимяти давлатии шаҳр дар ҳамкорӣ бо Ташкилоти ғайридавлатии «Имдод Ғайрат» ва бо маблағгузории Сафорати ИМА дар Тоҷикистон ба маблағи 77 ҳазор доллари амрикоӣ таъмиру таҷдид шудааст.

 Мадрасаи «Мирраҷаб Додхоҳ» бошад, аз соли 1983 инҷониб ҳамчун Осорхонаи таърихию кишваршиносӣ мавриди истифода қарор дода шуда, меъмории таърихию фарҳангии нимаи дуюми асри ХVII ба шумор меравад.

Бинои осорхона солҳои 2013 – 2014 бо маблағгузории Сафорати Иёлоти Муттаҳидаи Амрико қисман таъмиру тармим гардидааст ва чуноне ки масъулони соҳа мегӯянд, оид ба идомаи корҳо бо сафоратхонаи мазкур корбарӣ идома дорад.

 Дар осорхонаи таърихию кишваршиносӣ, ки дар Мадрасаи «Мирраҷаб Додхоҳ» ҷойгир аст, ҳамагӣ 6580 адад нигора маҳфузанд, ки аз он 4990 адад нигораи фонди асосӣ ва 1590 адад нигораи фонди ёрирасон маҳсуб мешаванд.

Таъкид намудан зарур аст, ки оид ба осорхона ва «Мадрасаи Оим» аз ҷониби роҳбарияти осорхона маълумотномаҳои махсус (буклетҳо) таҳия гардида, дастраси меҳмонон мешаванд.

Мадрасаи «Мирраҷаб Додхоҳ» низ аз ҷониби ташкилоти ЮНЕСКО ба феҳрасти силсилаҷоизаи Шоҳроҳи Бузурги Абрешим дар гузаргоҳи Сирдарё ворид шудааст.

Нозири ҷойҳои таърихиву меъмории шаҳр Шаҳноза Хидирова қайд мекунад, ки ҷиҳати тарғибу ташвиқ ва рушди сайёҳии дохилӣ ба воситаи ду шабакаи телевизиони маҳаллӣ, радиои маҳаллӣ ва рӯзномаи шаҳрии «Садои Конибодом» барномаҳои доимӣ таҳти унвони солҳои 2019-2021-«Солҳои рушди деҳот, сайёҳӣ ва ҳунарҳои мардумӣ» ва «Ҳунар – беҳтар аз зар» таҳия шуда, ҳар ҳафта пешкаши бинандагону шунавандагон гардонида мешавад.

Сурайё ҲАКИМОВА,

«Ҳақиқати Суғд»

Читать далее

Деваштич: Омодагии ҳамаҷониба

Дар ноҳияи Деваштич 77 муассисаи таълимӣ мавҷуд буда, 65 муассисаи таҳсилоти миёнаи умумӣ ва се гимназия, инчунин ҳашт кӯдакистон ва як Маркази таҳсилоти иловагӣ фаъолият мебаранд.

Дар соли таҳсили имсола дар муассисаҳои таълимии ноҳия 38905 нафар хонанда, аз он 19 ҳазору 87 нафар духтар таҳсил мекунанд. Аз 2425 нафар хатмкунанда, ки 1201 нафар духтар мебошанд, 999 нафар (328 нафар духтар) донишҷӯи донишгоҳҳои олии кишвар, аз онҳо 21 нафар тариқи квотаи Президентӣ (11 нафараш духтар) ва 273 нафар (151 нафар духтар) толибилми муассисаҳои таълимии миёнаи касбӣ гардиданд. 13 нафар хатмкунандаи муассисаҳои таълимии ноҳия бошанд, дар донишгоҳҳои олии хориҷи кишвар таҳсили хешро идома дода истодаанд.

Зимни пурсиш оид ба омодагӣ ба мавсими зимистонгузаронӣ дар муассисаҳои таълимӣ ва кӯдакистонҳо иқтисодчии шуъбаи маорифи ноҳия Нурангез Зикруллоева қайд кард, ки дар соли хониши 2020 – 2021 омодагии муассисаҳои таълимӣ ба мавсими зимистонгузаронӣ хуб ба роҳ монда шудааст. Дар ҳамаи муассисаҳои таълимӣ ва кӯдакистонҳо омодагӣ ба мавсими зимистонгузаронӣ хуб мебошад.

Дар асоси шартномаи тарафайн корхонаи ҶДММ «Саноат ва сохтмон»-и шаҳри Истиқлол муассисаҳои таълимӣ ва кӯдакистонҳои ноҳияро сари вақт бо маводи сӯхти хушсифат таъмин намуд. Имсол ба муассисаҳои таълимӣ ба миқдори як ҳазору 240 тонна (нақша як ҳазору 95 тонна) ангиштсанг, яъне 113 фоиз ва ба ҷойи 511 метри мукааб 614 метри мукааб ҳезум ворид гардид, ки ин 120 фоизи нақша мебошад.

Баъди ба тасвиб расидани қарори Раиси вилоят оид ба омодагӣ ба мавсими зимистонгузаронӣ дар муассисаҳои таълимӣ ва кӯдакистонҳо ба миқдори 385 литр сӯзишвории дизелӣ захира гардид, ки он пурра ҷавобгӯи талабот мебошад.

Дар масъалаи оинабандӣ бошад, ба андозаи 290 метри мураббаъ тирезаҳои муассисаҳои таълимӣ бо селофан маҳкам карда шуд.

Дар муассисаҳои таълимии ноҳия 63 адад генератор мавҷуд буда, онҳо дар ҳолати корӣ қарор доранд.

Дар 24 таълимгоҳ системаи ягонаи гармидиҳӣ мавҷуд мебошад, ки танҳо ёздаҳтоаш дар ҳолати корӣ қарор доранд. Нурангез Зикруллоева оид ба масъалаи генератор дар муассисаҳои таълимӣ иброз дошт, ки 13 адади он дар замони Иттиҳоди Шӯравӣ васл гардида буд, бинобар ин дубора таъмир намудан ғайриимкон аст. Аз рӯи нишондодҳои мутахассисон, барои барқароркунии як дегхонаи даврони шӯравӣ метавон дар ду муассисаи таълимӣ системаи ягонаи гармидиҳии замонавиро васл кард, ки айни ҳол он ба нақша гирифта шудааст.

Барои зимистонгузаронӣ дар муассисаҳои таълимӣ 326 адад гармкунаки барқӣ ва 1394 адад печи бухорӣ васл гардидааст.

Ба суоли мо оид ба дар ҳолати набудани қувваи барқ дар бархе муассисаҳои таълимие, ки тариқи системаи ягонаи гармидиҳӣ фаъолият доранд, мудири шуъбаи маорифи ноҳия Барот Расулов гуфт, ки муассисаҳои таълимии рақамҳои 1, 6, 22, 29, 35, 53 ва 60, инчунин Гимназияи 1 ва кӯдакистонҳои рақамҳои 1 ва 8 бо ёрии ангиштсанг ва танҳо дар муассисаҳои таълимии рақамҳои 37 ва 40 гармидиҳӣ бо қувваи барқ сурат мегирад.

Дар ин бобат тавре мутасаддиёни соҳаи нерӯи барқи ноҳия иттилоъ доданд, рӯзҳои наздик муассисаҳои таълимӣ ва кӯдакистонҳо пурра бо қувваи барқ таъмин хоҳанд шуд.

Метавон гуфт, имсол ҳам чун солҳои қаблӣ муассисаҳои таълимии ноҳия ба давраи зимистонгузаронӣ омодаанд.

Тавҳида ҶӮРАЕВА,

«Ҳақиқати Суғд»

Читать далее