Машварати омӯзишию амалӣ оид ба муаррифии навъҳои гуногуни гулҳои зимистона

Дар қаламрави вилоят ба муносибати ҷашнҳои бузурги миллӣ корҳои ободониву созандагӣ вусъати тоза пайдо мекунанд.

Чун яке аз шартҳои зебову тамошобоб гардонидани маҳалли зист ин сабзу хуррам ва гулкорӣ намудани муҳити атроф мебошад, дирӯз дар Маҷмааи таърихию фарҳангии “Қалъаи Хуҷанд” бо иштироки Раиси вилоят Абдураҳмон Қодирӣ машварати омӯзишию амалӣ оид ба муаррифии навъҳои гуногуни гулҳои зимистона ва тарзу усули истифодаи онҳо баргузор гардид.

Дар чорабинӣ муовинони раисони шаҳру навоҳӣ ва роҳбарони хоҷагиҳои манзилию коммуналии шаҳру навоҳие, ки минтақаҳои сайёҳӣ ба ҳисоб мераванд, аз қабили Хуҷанду Бобоҷон Ғафуров, Исфараю Истаравшан, Бӯстону Гулистон ва Панҷакенту Конибодом ҷиҳати шиносоӣ бо навъҳои  гулҳои зимистона ширкат варзиданд. Раиси вилоят таъкид намуд, ки бо истифода аз имкониятҳои мавҷуда, масъулини шаҳру навоҳӣ бояд маъракаи гулшинониро саривақт ба анҷом расонанд, то ки дар мавсими тирамоҳу зимистон низ ҳудуди вилоят сабзу хуррам ва назаррабо боқӣ монад. Тибқи хулосаи мутахассисони соҳаи гулпарварӣ, мавсими шинонидани гулҳои зимистона аз охири моҳи август оғоз ёфта, то нимаи аввали моҳи сентябр идома меёбад. Аз намунаи гулҳои пешниҳодшуда, асосан чор навъи гулкарам, навъҳои  сенариум, тагес, виола ва календула барои шинонидан тавсия дода шуд. Зеро ин намуди гулҳо ба сардиҳои фасли зимистон тобовар буда, то мавсими баҳорон шукуфон хоҳанд монд.

Дар баробари шиносоӣ бо намуди гулҳо, ҳамзамон барои иштирокчиёни чорабини тарзу усули шинонидани гулҳо дар мавзеъҳои пешбинишуда ба таври амалӣ аз ҷониби мутахассисон намоиш дода шуд.

Раиси вилоят тавсия дод, ки ҳангоми парвариши гулҳои зимистона, мутасаддиён бояд қоидаҳои ғизодиҳӣ ва коркарди кимиёвиро ҳатман риоя намоянд, то ки онҳо аз ҳашароти зараррасон ва таъсироти дигари муҳити атроф ҳифз карда шаванд.

Барои иҷрои нақшаи гулзоркунӣ масъулин даҳ рӯз муҳлат гирифтанд. Метавон умед кард, ки иқдоми мазкур барои таъмини муҳити тозаву озода  ва саломатибахш заминаи мусоид фароҳам хоҳад овард.

Аз ҷониби дигар, вилояти Суғд минтақаи сайёҳӣ ба ҳисоб рафта, ҳусни назаррабои он ба сайёҳони ватаниву хориҷӣ таассуроти хуб боқӣ хоҳад гузошт.

Хадамоти матбуоти
Раиси вилояти Суғд

Add comment


Security code
Refresh