Паёми табрикии Раиси вилоят Раҷаббой Аҳмадзода бахшида ба муносибати Рӯзи Парчами давлатии Ҷумҳурии Тоҷикистон

Фарорасии санаи фархундаву таърихии Рӯзи Парчами давлатии Ҷумҳурии Тоҷикистонро ба сокинони шарафманду сарбаланди вилоят табрик гуфта, орзу мекунам, ки ин рамзи муҳими давлатдории миллӣ ҳамчун сарчашмаи ифтихор дар фазои орому осудаи Ватани маҳбубамон абадан парафшон бошад.

Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вобаста ба нақши Парчами давлатӣ дар муаррифии халқи соҳибтамаддуну куҳанбунёди тоҷик ва давлату миллат, аз ҷумла таъкид намудаанд: «Парчами давлатӣ муаррифгари тоҷикон дар арсаи байналмилалӣ ва мояи ифтихори мо ҳамчун узви комилҳуқуқи ҷомеаи ҷаҳон мебошад».

Воқеан ҳам, Парчами давлатӣ нишони соҳибдавлатию соҳибихтиёрӣ, ифодакунандаи таъриху фарҳанги бостонии миллати тоҷик буда, ҳар як фарди ватандӯсту меҳанпарвари кишварро вазифадор менамояд, ки нисбат ба ин рамзи муқаддаси миллӣ эҳтиром ва арҷгузор бошад.

Боиси таъкид аст, ки Парчами давлатӣ яке аз муҳимтарин омилҳои муайянкунандаи ҳувияти миллӣ, таҳкимбахши ифтихори ватандорӣ дар зеҳну шуури аҳли ҷомеа ба ҳисоб рафта, дар марҳалаҳои душвори бунёди давлати соҳибистиқлоламон таҳти роҳнамоии Пешвои муаззами миллат муҳтарам Эмомалӣ Раҳмон неруҳои ба халқу Ватан содиқи миллат зери парафшонии он сарҷамъ гардида, ба ваҳдати миллӣ ва суботи сиёсӣ асос гузоштаанд.

Соли равон тантанаҳои таҷлили Рӯзи Парчами давлатӣ ба соли ҷашни бошукӯҳи сиюмин солгарди Истиқлоли давлатии Ҷумҳурии Тоҷикистон рост омад. Таҷлили ин ҷашни пуршукӯҳи миллӣ, ки сокинони вилоят низ ин санаи фархундаи таърихи миллатро бо иштироки Пешвои муаззами миллат муҳтарам Эмомалӣ Раҳмон ва дастовардҳои арзандаи меҳнатӣ сазовор истиқбол гирифтанд, ба мардуми шарафманду сарбаланди Ватани маҳбубамон рӯҳу илҳоми тоза эҳдо намуда, барои расидан ба қуллаҳои боз ҳам баландтари шукуфоӣ ва пешрафт заминаҳои мустаҳкам гузошт.

Дар шароити имрӯза, ки тағйироту таҳаввулоти ғайриинтизори ҷаҳони муосир ва бархӯрди манфиати қудратҳои сиёсии ҷаҳон ба вусъат ёфтани хатару таҳдидҳои нав ва тавсеаи фаъолияти гурӯҳҳои террористию экстремистӣ шароит фароҳам меоварад, ҳифзу ҳимояи манфиатҳои миллӣ, давлату давлатдорӣ ва фазои орому осудаи кишвари азизамон Тоҷикистон беш аз пеш аҳамият пайдо менамояд. Аз ин лиҳоз, ҳар яки мо ва бахусус ҷавонони номбардори миллатро зарур аст, ки таҳти сиёсати ояндабинона ва бунёдкоронаи Пешвои муаззами миллат муҳтарам Эмомалӣ Раҳмон ва парафшонии Парчами давлатӣ муттаҳиду сарҷамъ гардида, арзишҳои давлату миллат ва дастовардҳои даврони истиқлоламонро сарбаландона ҳифз намоянд.

Чунонки Пешвои муаззами миллат пайваста таъкид менамоянд, парафшонии Парчами давлатии Тоҷикистон дар саросари олам нишони мардуми сулҳхоҳу тамаддунсоз ва кишвари дар ҳалли масоили сиёсӣ муваффақи мо мебошад. Қарзи фарзандӣ ва вазифаи шаҳрвандии мост, ки бо риояи суннати деринаи парчамдории гузаштагони пурифтихорамон ба ин рамзи истиқлолу озодӣ, иттиҳоду сарҷамъӣ, ватандорию ватанпарастӣ ва ҳувияти миллӣ ҳамеша эҳтиром гузорем.

Таманно мекунем, ки Парчами давлатии Тоҷикистон бар фарози орому осудаи Тоҷикистони азизамон ва мардуми он ҳамеша парафшон бошад!

Рӯзи Парчами давлатии Ҷумҳурии Тоҷикистон муборак, ҳамдиёрони азиз!

Add comment


Security code
Refresh