Оғози бунёди мактаби замонавӣ дар Сангтӯда

Сафари кории Раиси вилоят Раҷаббой Аҳмадзода ба шаҳри Исфара

9 - уми апрели соли равон Раиси вилояти Суғд Раҷаббой Аҳмадзода бо мақсади шиносоӣ бо вазъи зиндагии мардум ва ҷараёни корҳои ободониву созандагӣ, ҳалли масоили иҷтимоӣ ва мулоқот бо сокинон ба ҷамоатҳои деҳоти Ворух ва Чоркӯҳи шаҳри Исфара сафари корӣ намуд.

Нахуст Раиси вилоят ба маҳаллаи наздимарзии Сангтӯдаи Ҷамоати деҳоти Ворух ташриф оварда, ба корҳои сохтмонии мактаби нави замонавӣ ҳусни оғоз бахшид. Раҷаббой Аҳмадзода дар суҳбат бо сокинони маҳалла, омӯзгорон ва ҷавонони деҳот аз амалишавии ҳадафҳои инсонпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ҳамзамон аз ҷараёни корҳои созандагиву ободонӣ дар вилоят, дастовардҳои даврони соҳибистиқлолӣ ва татбиқи ҳадафҳои стратегии мамлакат ҳарф зад.

Раиси вилоят аз ҷумла изҳор дошт, ки тибқи дастуру супоришҳои Пешвои муаззами миллат алҳол ба рушди соҳаҳои илму маориф эътибори аввалиндараҷа дода шуда, мушкилоти мавҷудаи соҳа давра ба давра ҳаллу бартараф мегардад. Оғози бунёди мактаби нав дар деҳаи Сангтӯдаи Ҷамоати деҳоти Ворухи шаҳри Исфара дар заминаи дастуру супоришҳои роҳбарияти мамлакат ва бо маблағгузории Мақомоти иҷроияи ҳокимияти давлатии вилояти Суғд амалӣ мегардад.

Фармоишгари иншооти мазкур Идораи сохтмони асосии вилоят буда, лоиҳаи онро ҶДММ «Суғдшаҳрофар» таҳия намудааст. Тибқи лоиҳа бинои мактаб аз 3 ошёна, 12 синфхона иборат буда, барои таҳсили 720 нафар дар ду баст пешбинӣ гардидааст.

Раиси вилоят бо гузоштани санги асос ба сохтмони мактаби нав ҳусни оғоз бахшида, сохтмончиёнро муваззаф намуд, ки иншоотро бо сифати баланд ва мутобиқ бо талаботи стандарти давлатӣ ба роҳ монанд.

Ҳамзамон, Раиси вилоят бобати бунёди толори варзишӣ, чароғонкунӣ ва мумфарш намудани роҳи маҳаллаи мазкур ба масъулин дастур дод.

Мавриди зикр аст, ки бунёди мактаби нав мушкилоти беш аз 500 нафар толибилмеро, ки масофаи беш аз 5 километрро пиёда тай намуда, ба мактаби маҳаллаи дигар ба донишандӯзӣ мерафтанд, осон хоҳад кард. Омӯзгорон ва падару модарони мактабиён барои чунин ғамхорӣ миннатдории хешро ба Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси вилояти Суғд Раҷаббой Аҳмадзода иброз доштанд.

Мухтори Абдулло,
«Ҳақиқати Суғд»


Add comment


Security code
Refresh