Раҷаббой Аҳмадзода ба ҷонибдории номзади арзанда ба мансаби Президенти Ҷумҳурии Тоҷикистон овоз дод

Субҳи рӯзи 11 октябр Раиси вилояти Суғд Раҷаббой Аҳмадзода ба участкаи интихоботии "Хуҷанд №27" ташриф оварда, ба ҷонибдории номзади арзанда ба мансаби Президенти Ҷумҳурии Тоҷикистон раъй дод.

Дар вилояти Суғд барои дар сатҳи баланд гузаронидани маъракаи муҳими сиёсӣ – интихоботи Президенти Ҷумҳурии Тоҷикистон тамоми шароити зарурӣ фароҳам оварда шуда, интихобкунандагон бо эҳсоси баланди масъулият дар участкаҳои интихоботӣ барои овоздиҳӣ ҳозир гардида истодаанд.

Бо қарори Комиссияи марказии интихобот ва раъйпурсии Ҷумҳурии Тоҷикистон барои гузаронидани интихоботи Президенти Ҷумҳурии Тоҷикистон бо дарназардошти ҳудудҳои шаҳру ноҳияҳои ҷумҳурӣ 68 ҳавзаи интихоботӣ, аз ҷумла дар вилояти Суғд 18 ҳавзаи интихоботӣ ташкил карда шуд.

Барои интихобкунандагон дар ҳавзаҳои интихоботӣ ва 971 участкаи интихоботии ҳудуди вилоят бо назардошти риоя намудани қоидаҳои беҳдоштиву санитарӣ ҳуҷраҳо барои овоздиҳии пинҳонӣ, ҳуҷраи овоздиҳӣ барои шахсони имконияташон маҳдуд, ҳуҷраи модару кӯдак, нуқтаи тиббӣ, ҷои нишасти мушоҳидони миллӣ, байналмиллалӣ, ҷои нишасти котибот ташкил карда шуда, қуттиҳои овоздиҳӣ дар ҷойҳои намоён ва дастрас гузошта шудаанд.

Тибқи маълумоти мавҷуда дар вилояти Суғд беш аз 1 миллиону 550 ҳазор интихобкунанда ба қайд гирифта шуда, зиёда аз 30 ҳазор нафари онҳо бори аввал дар чунин маъракаи сиёсӣ раъй медиҳанд.

Ёдовар бояд шуд, ки номзадҳо ба мансаби Президенти Ҷумҳурии Тоҷикистон Латифзода Рустам Барот, Ғаффорзода Абдуҳалим Розиқ, Эмомалӣ Раҳмон, Раҳматзода Рустам ва Абдуллоев Мироҷ Санонович мебошанд.

Хадамоти матбуоти
Раиси вилояти Суғд

Add comment


Security code
Refresh