РАҶАББОЙ АҲМАДЗОДА: Ҷавонони соҳибназару ватандӯст барои таҳкими нуфуз ва эътибори Ватани маҳбубамон саҳми босазои хешро мегузоранд

Шоми 23 май дар Маҷмааи таърихию фарҳангии “Истиқлол” бо ширкати ҳазорҳо нафар ҷавонони вилояти Суғд чорабинии марказии Рӯзи ҷавонони Тоҷикистон баргузор шуд.

Тантанаҳои идона ба муносибати Рӯзи ҷавонон бо раҳпайпоии ҷавонони саодатманд таҳти унвони “Ҷавонон – пайрави Пешвои миллат” оғоз ёфт.

Раиси вилояти Суғд Раҷаббой Аҳмадзода зимни суханронии худ   ҷавонони сарбаланди вилоятро бахшида ба Рӯзи ҷавонон табрик гуфта, ба онҳо саломативу саодати рўзгор, тансиҳативу хонаободӣ, иқболи баланд ва дар амалӣ намудани мақсаду ниятҳои нек муваффақиятҳои  беназир таманно кард.

Раиси вилоят иброз дошт, ки бо ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар замони соҳибистиқлолии мамлакат дар самти дастгирии ҷавонон тадбирҳои ҳадафманд андешида шуда, ба ин қишри ҷомеа таваҷҷуҳи хоса зоҳир мегардад.

- Қабул гардидани Қонуни Ҷумҳурии Тоҷикистон «Дар бораи ҷавонон ва сиёсати давлатии ҷавонон», Фармонҳои Президенти Ҷумҳурии Тоҷикистон  «Дар бораи таъсис додани Ҷоизаи давлатии ба номи Исмоили Сомонӣ» барои олимон ва муҳаққиқони ҷавоне, ки дар соҳаи илму техника корҳои намоён анҷом додаанд, «Дар бораи таъсиси стипендияҳои Президенти Ҷумҳурии Тоҷикистон барои хонандагони мактабҳои таҳсилоти ҳамагонӣ, литсейҳо, гимназияҳо, омўзишгоҳҳои касбӣ-техникӣ, техникумҳо ва коллеҷҳо», инчунин қарорҳои Ҳукумати Ҷумҳурии Тоҷикистон “Дар бораи таъсиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон», “Барномаи миллии рушди иҷтимоии ҷавонон дар Ҷумҳурии Тоҷикистон барои солҳои 2016 - 2018”, “Барномаи маҷмааи тарбияи ҷисмонӣ ва варзиш дар Ҷумҳурии Тоҷикистон барои солҳои 2017 - 2021”, “Барномаи рушди футбол дар Ҷумҳурии Тоҷикистон” ва амсоли ин собит сохт, ки Ҳукумат дар сиёсати худ ба ҷавонон такя карда, тарбия намудан ва ба камол расонидани насли ҷавону созандаро яке аз вазифаҳои аввалиндараҷаи худ медонад. Илова бар ин, ҷиҳати расидан ба ҳадафҳои олӣ аз ҷониби Ҳукумати Ҷумҳурии Тоҷикистон як қатор барномаву стратегияҳои давлатӣ доир ба дастгирии ҷавонон, баланд бардоштани мақоми онҳо дар ҷомеа, беҳтар намудани вазъи иҷтимоии ҷавонон қабул ва босамар амалӣ гардида истодааст, - таъкид дошт Раиси вилоят.

Зикр гардид, ки Мақомоти иҷроияи ҳокимияти давлатии вилоят низ дар навбати худ бо мақсади баланд бардоштани самаранокии сиёсати давлатӣ нисбат ба дастгирии ҷавонон ва ҷалби онҳо ба низоми давлатдорӣ тадбирҳои судманд меандешад. Дар ин радиф, ҳамасола бо мақсади дастгирии иҷтимоии ҷавонони боистеъдод барои донишҷўён, магистрантон, аспирантони муассисаҳои таҳсилоти олӣ ва миёнаи касбӣ ва варзишгарон стипендияи Раиси вилоят муқаррар шуда, барои ба ҷавонон фароҳам овардани шароитҳои ба талаботи замон ҷавобгў тадбирҳои зарурӣ андешида мешаванд.

Гуфта шуд, ки имрӯзҳо дар вилоят беш аз 813 ҳазор нафар ҷавонони синни аз 14 то 30-сола умр ба сар мебаранд, ки аз ин миқдор зиёда аз 405 ҳазор нафари онҳо духтарон  мебошанд. Ҷавонон дар тамоми соҳаҳо - хизмати давлатӣ, маорифу тандурустӣ, тиҷорату иқтисод, кишоварзиву саноат кору фаъолият намуда, барои пешрафти Тоҷикистони соҳибистиқлол саҳми арзандаи худро мегузоранд. Аз ҷумла, 656 нафар ҷавонон ҳамчун хизматчии давлатӣ дар вазифаҳои гуногун фаъолият намуда истодаанд, ки 30,9%-и хизматчиёни давлатиро ташкил дода, аз онҳо 109 нафар дар мансабҳои роҳбарикунанда фаъолияти пурсамар мебаранд. 102 нафар ҷавонони пешқадам вакилони мақомоти маҳаллии намояндагӣ, аз ҷумла 93 нафар вакилони ҷамоатҳои шаҳраку деҳот, 9 нафар вакилони Маҷлиси вакилони халқи шаҳру ноҳияҳо мебошанд.

Раиси вилоят аз иштироки ҷавонони вилоят дар мусобиқаҳои варзишии сатҳи байналмилалӣ ва озмуну олимпиадаҳо низ ёдовар шуд ва иброз намуд, ки варзишгарони ҷавони вилоят танҳо дар 5 моҳи соли 2018-ум дар мусобиқаҳои ҷумҳуриявӣ 97 медали тилло, 85 нуқра ва 116 медали биринҷӣ, ва дар мусобиқаҳои сатҳи байналмилалӣ бошад, 14 медали тилло, 12 нуқра ва 12 медали биринҷӣ ба даст овардаву шарафи Тоҷикистони соҳибистиқлолро баланд бардоштанд.

Раҷаббой Аҳмадзода бо ишора ба зуҳуроти номатлуби ҷаҳони муосир аз қабили терроризм ва экстремизм таъкид кард, ки ҷавонони бонангу номуси вилоят бояд дар мубориза бар зидди шомилшавии баъзе ашхоси роҳгумзада ба ҳизбу ҳаракатҳои тундрав, пешгирии густариши фаъолияти ҳизбу ҳаракатҳои иртиҷоӣ фаъолона ширкат варзанд ва ҷиҳати баланд бардоштани маърифати ҳуқуқии хеш кўшиш намуда, моҳияти муқаррароти Конститутсияи Ҷумҳурии Тоҷикистон, Қонунҳои Ҷумҳурии Тоҷикистон «Дар бораи масъулияти падару модар дар таълиму тарбияи фарзанд», «Дар бораи танзими анъана ва ҷашну маросим дар Ҷумҳурии Тоҷикистон» ва дигар санадҳои меъёрии ҳуқуқиро хуб омўзанду сармашқи кори худ қарор диҳанд.

-Асосгузори сулҳу ваҳдати миллӣ– Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар мулоқот бо намояндагони аҳли ҷомеаи кишвар, ки санаи 12 майи соли равон дар пойтахти кишвари азизамон шаҳри Душанбе баргузор гардид, изҳор доштанд, ки фарзандони бонангу номуси миллат ва кулли шаҳрвандони кишвар вазифадоранд, ки бо шукргузорӣ аз давлати соҳибистиқлол ва Ватани соҳибихтиёрамон ба хотири ҳимояи истиқлолияту озодӣ, таҳкими суботи сиёсӣ, ваҳдати миллӣ ва ҳифзи манфиатҳои миллату давлат саъю талош намоянд, - илова намуд Раиси вилоят.

Изҳори боварӣ карда шуд, ки ҷавонони соҳибназару ватандўст чун ворисони арзандаи ниёгони шарафманди хеш ва фарзандони асили Ватан баҳри пешрафту шукуфоии Тоҷикистони азизамон садоқатмандона хидмат намуда, бо ташаббусҳои наҷиб, талошҳои пайгирона, дастовардҳои фикриву эҷодӣ ва варзишӣ ҳамчун насли нави ояндасози тоҷик барои таҳкими нуфуз ва эътибори Ватани маҳбубамон саҳми босазои хешро мегузоранд.

Дар идомаи чорабинӣ аз ҷониби аҳли санъати вилоят барномаи ҷолиби фарҳангӣ пешниҳод гардид, ва ҷавонон дар фазои орому осуда ва зери осмони софи Ватани маҳбуб то дергоҳ рақсу бозӣ намуданд. Мушакпаронии  идона ба чорабинӣ шукуҳи тоза бахшид.

Хадамоти матбуоти
Раиси вилояти Суғд


Add comment


Security code
Refresh