Боздиди Раиси вилоят аз Таваллудхонаи вилоятии вилояти Суғд

30 ноябр Раиси вилояти Суғд Раҷаббой Аҳмадзода бо мақсади шиносоӣ бо сатҳу сифати хизматрасонии тиббӣ аз Таваллудхонаи вилоятии вилояти Суғд боздид намуд.

Тавре дар аснои боздид иттилоъ дода шуд, бо дастгириҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бинои таваллудхона ба таъмири кулли фаро гирифта шуда, 68 навъи таҷҳизоти зарурӣ таъмин гардида буд. Ғамхориҳои пайвастаи давлату Ҳукумат кори табибонро осон намуда, барои беҳтар шудани хизматрасонии тиббӣ такони ҷиддӣ бахшид. Бо дастгириҳои роҳбарияти вилоят томографияи магнитии рақамии резонансӣ, ки солҳои охир таъмирталаб шуда буд, аз нав фаъол гардонида шуд.

Дар таваллудхонаи вилоятӣ беш аз 350 нафар кормандони соҳаи тиб фаъолият дошта, ба ин муассиса аз тамоми шаҳру ноҳияҳои вилоят ниёзмандон ташриф меоранд.

Раиси вилоят таъкид дошт, ки барои кор бо ин таҷҳизот ва истифодаю нигоҳубини дурусти он кадрҳои соҳибтахассус бояд ҷалб карда шаванд, то ки дастгоҳҳои гаронарзиш солҳои зиёд хизмат кунад. Ҳамзамон барои боз ҳам беҳтар намудани сифати хизматрасонии тиббӣ ба занони ҳомила, то қадри имкон пешгирӣ намудани фавти модару кӯдак, коҳиш додани теъдоди бурриши қайсарӣ ва ба роҳ мондани гиёҳдармонӣ ба табибон тавсияҳо дода шуд.

Дар идома Раиси вилоят аз таваллудхонаи шаҳрӣ низ дидан намуд ва ҷиҳати таъмири берунии бино ба масъулин супоришҳо дод. Иттилоъ дода шуд, ки таваллудхонаи шаҳрӣ дорои 8 шуъба буда, дар як сол беш аз 4000 нафар занони ҳомиларо қабул менамояд.

Хадамоти матбуоти
Раиси вилояти Суғд

Add comment


Security code
Refresh