Маросими ҷоизасупории Федератсияи футболи вилоят дар соли 2019

17 декабри соли 2019 дар Кохи фарҳанги “Суғдиён”-и маркази вилоят бо иштироки Раиси вилояти Суғд, Раиси Федератсияи футболи вилоят Раҷаббой Аҳмадзода маросими ҷоизасупории Федератсияи футболи вилоят дар соли 2019 баргузор гардид.

Раиси вилоят зимни суханронии худ иброз дошт, ки дар заминаи дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамасола аз ҷониби роҳбарияти вилоят фаъолияти футболбозон, мураббиён ва кормандони соҳа натиҷабардорӣ ва қадршиносӣ карда мешаванд.

Таъкид гардид, ки имсол барои футболи тоҷик соли пурбарор буд, зеро пас аз таваққуфи тўлонӣ мунтахаби наврасони то 17-солаи мамлакат дар чемпионати ҷаҳон дар давлати Бразилия иштирок ва баромад намуданд.

Инчунин дастаи мунтахаби футболбозони то 16-солаи кишварамон ба марҳилаи ниҳоии чемпионати Осиё роҳ ёфтанд ва дастаи яккачини футболбозони 19-солаи Тоҷикистон  дар бозиҳои интихобӣ бар ҳарифони пурзўр ғолиб омада, соҳиби роҳхат ба чемпионати Осиё шуданд. Лозим ба таъкид аст, ки  ҳамаи ин дастовардҳои футболбозони мамлакат дар партави роҳнамоӣ ва дастгирии бевоситаи Федератсияи футболи Тоҷикистон ба даст оварда шудааст.

Соли равон барои дастаҳои футболи вилоят низ соли пурбарор буд, зеро дастаи “Хуҷанд” дар Чемпионати Тоҷикистон байни дастаҳои Лигаи олии мамлакат сазовори ҷои дуюм гардида, ҳаққи иштирок дар бозиҳои Ҷоми Конфедератсияи футболи Осиёро ба даст овард. Ҳайати ҷавонони дастаи мазкур бошад, соҳиби медалҳои биринҷӣ шуда, дастаи “Истаравшан” пас аз баргаштан ба Лигаи олӣ соҳиби мақоми панҷум гардид.

Дар мусобиқоти Лигаи якум бошад, дастаҳои “Эсхата” ва “Парвоз” мутаносибан ҷойҳои чорум ва панҷумро соҳиб гаштанд.

Дар бозиҳои мусобиқоти Лигаи футболи Тоҷикистон байни дастаҳои Лигаи дуюм аз минтақаи Суғд соли равон 8 даста иштирок намуданд, ки дар он дастаҳои “Равшан”-и ноҳияи Зафаробод, “Гулистон”-и шаҳри Гулистон ва “Суғдиён”-и шаҳри Бӯстон ғолибият ба даст оварданд.

Имсол ҳамчунин дастаи “Мастчоҳ” соҳиби Ҷоми вилоят, дастаи “Суғдиён”-и шаҳри Бўстон соҳиби Ҷоми Федератсияи футболи вилоят ва дастаи “Гулистон” сазовори Ҷоми Раиси вилоят гардиданд.

-Вазъияти  орому осудаи имрӯза, ки самараи заҳматҳои беназири Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон мебошад, аз футболбозону мураббиён, кормандони соҳа ва кулли масъулон талаб менамояд, ки ба масъалаи рушди футбол  ва оммавияти он дар вилоят таваҷҷўҳи хоса зоҳир намоем ва дар ин самти фаъолият ба муваффақиятҳои бештар ноил гардем, - афзуд Раиси вилоят.

Сипас, дар вазъияти тантанавӣ ба 36 нафар беҳтаринҳои футболи вилоят, собиқадорону футболбозони наврас ҷоизаҳо супорида шуда, Федератсияи футболи Ашт беҳтарин федератсияи футболи минтақавӣ дониста шуд.

Хадамоти матбуоти
Раиси вилояти Суғд

Add comment


Security code
Refresh