- Информация о материале
- Просмотров: 36
Дар Донишкадаи илмҳои дақиқ ва технологияҳои Тоҷикистон дар шаҳри Хуҷанд нишасти матбуотӣ баргузор гардид. Дар он натиҷаҳои фаъолияти муассиса дар нимсолаи аввали соли 2026-ум дастовардҳои соҳаи таълиму тарбия, омодасозии мутахассисон ва нақшаҳои минбаъда мавриди баррасӣ қарор гирифтанд.
Донишкадаи илмҳои дақиқ ва технологияҳои Тоҷикистон аз ҷумлаи муассисаҳои нисбатан ҷавони таҳсилоти олии кишвар ба ҳисоб меравад. Аз таъсиси он ҳамагӣ чор сол гузаштааст. Дар ин муддат муассиса тавонистааст марҳилаи муҳими фаъолияти худро тай намояд ва нахустин хатмкунандагони худро ба камол расонад.
Иттилоъ дода шуд, ки соли ҷорӣ 214 нафар донишҷӯ муассисаро хатм намуданд, ки ин барои як донишкадаи ҷавон натиҷаи муҳим ва оғози марҳилаи нави фаъолияти он ба шумор меравад.
Ба гуфти масъулон хатмкунандагон давоми таҳсил барномаҳои таълимиро аз худ намуда, донишҳои назариявӣ ва малакаҳои амалиро ба даст овардаанд. Дар баробари ин, то имрӯз 180 нафар аз хатмкардагони донишкада аллакай ба ҷойи кори доимӣ таъмин гардидаанд. Ин нишондиҳанда метавонад яке аз натиҷаҳои муҳими фаъолияти муассиса дар самти омодасозии кадрҳои ҷавобгӯ ба талаботи бозори меҳнат арзёбӣ гардад.
Ҳамчунин, 22 нафар донишҷӯёни донишкада пас аз хатми муассиса бо хоҳиши худ ба сафи Қувваҳои Мусаллаҳи Ҷумҳурии Тоҷикистон сафарбар шудаанд.
Бояд қайд намуд, ки дар ин донишкада таълим дар шуъбаи рӯзона аз рӯйи 26 ихтисос ва дар шаклҳои ғоибонаву фосилавӣ аз рӯйи 19 ихтисос ба роҳ монда шудааст. Ҳоло дар донишкада беш аз 3300 нафар донишҷӯ таҳсил менамоянд.
Зимни нишасти матбуотӣ Ректори Донишкадаи илмҳои дақиқ ва технологияҳои Тоҷикистон Раҳимҷон Назаров иброз дошт, ки барои соли таҳсили 2026–2027 бо иҷозаи Агентии назорат дар соҳаи маориф ва илми назди Президенти Ҷумҳурии Тоҷикистон ихтисосҳои «Ҳуқуқшиносӣ» ва «Таъминоти барномавии технологияи иттилоотӣ» низ ҷорӣ карда шудаанд. Ба ин васила, доираи ихтисосҳои пешниҳодшаванда васеъ гардида, барои довталабон имкониятҳои нави интихоби самти таҳсил фароҳам меоянд.
Дар нимсолаи аввали соли 2026 дар шуъбаи рӯзонаи донишкада 84 гурӯҳи академӣ фаъолият дошта, 53 гурӯҳ ба факултети фанҳои дақиқ ва технологияи инноватсионӣ ва 31 гурӯҳ ба факултети забонҳо ва ҷомеашиносӣ рост меояд. Дар шуъбаи ғоибона 53 гурӯҳи академӣ ташкил шудааст.
Теъдоди умумии донишҷӯёни донишкада дар соли таҳсили сипарӣ 3364 нафарро ташкил додааст. Аз ин шумора 2164 нафар дар шуъбаи рӯзона ва 1200 нафар дар шуъбаи ғоибона ва таҳсилоти фосилавӣ таҳсил менамоянд. Дар соли таҳсили 2025–2026 дар донишкада 158 нафар устодону омӯзгорон ва кормандон фаъолият доштаанд. Аз ин шумора 74 нафар кормандони асосӣ ва 84 нафар муштараквазифа мебошанд. Ба раванди таълиму тарбия 74 омӯзгор ҷалб гардида, дар байни онҳо як нафар доктори илм ва 12 нафар номзади илм, аз ҷумла 10 нафар дотсент, фаъолият мебаранд.
Чор соли фаъолияти донишкада самараи худро дар рушди таълим, омодасозии нахустин мутахассисон, ҷорӣ намудани ихтисосҳои нав, таҳкими заминаи моддиву техникӣ ва фароҳам овардани шароити беҳтари таҳсилу зиндагии донишҷӯён нишон медиҳад.
Манзура БАХТИЁРЗОДА,
“Ҳақиқати Суғд”
- Информация о материале
- Просмотров: 12
Директори Донишкадаи иқтисод ва савдои Донишгоҳи давлатии тиҷорати Тоҷикистон дар шаҳри Хуҷанд Абдурашид Ҷалилзода дар нишасти матбуотӣ гуфт, дар соли 2026 Донишкадаро 757 нафар хатм кард, ки аз ин шумора дар шуъбаи рӯзона - 359 нафар, дар шуъбаи фосилавӣ – 359 нафар, дар зинаи магистратура - 39 нафар, бо дипломи аъло – 67 нафар хатм кард, ки 86 фисади хатмкунандагон бо ҷойи кори доимӣ таъмин шуданд.
- Донишкада дорои се факултет ва 12 кафедра буда, ҷараёни таълим дар чор бинои таълимӣ ба роҳ монда шудааст. Теъдоди умумии муҳассилин ба 4657 нафар баробар буда, аз онҳо 2995 нафар дар шуъбаи рӯзонаи зинаи бакалавр, 1569 нафар дар низоми таҳсилоти фосилавӣ, 90 нафар дар зинаи магистратура, дар зинаи докторантура PhD 3 нафар таҳсил доранд, - иттилоъ дод Абдурашид Ҷалилзода.
Гуфта шуд, ки Донишкадаи иқтисод ва савдои Донишгоҳи давлатии тиҷорати Тоҷикистон тибқи Иҷозатнома оид ба ҳуқуқи пешбурди фаъолияти таълимӣ дар зинаҳои бакалавриат аз рӯи 33 ихтисос, магистратура аз рӯи 9 ихтисос, докторантура PhD аз рӯи 4 ихтисос ва дар зинаи таҳсилоти олии дуюм аз рӯи 5 ихтисос мутахассисонро омода менамояд.
- Дар натиҷаи фаъолияти маркази ҳамкориҳои байналмилалӣ 15 омӯзгор барои такмили ихтисос ва табодули таҷриба ба муассисаҳои таҳсилоти олии хориҷӣ сафарбар гардида, 19 нафар донишҷӯ дар барномаҳои мубодилаи байналмилалӣ иштирок намуданд. Ҳамзамон, дар давраи ҳисоботӣ 27 нафар коршинос ва мутахассисони хориҷӣ ба Донишкада ташриф оварда, бо омӯзгорону донишҷӯён мулоқоту вохӯриҳои илмӣ ва таълимӣ баргузор намуданд.
Айни ҳол дар Донишкада 7 нафар донишҷӯи ятими кулл таҳсил намуда, тибқи қарори Шӯрои олимон онҳо аз пардохти маблағи таҳсил пурра озод мебошанд. Ҳамзамон, ба донишҷӯёни нимятим, дорои маъюбият ва аз оилаҳои ниёзманд тавассути ҳамкории Донишкада бо шарикони рушд ва ташкилоту муассисаҳои гуногун кӯмаки молиявӣ расонида мешавад, - илова кард директор.
Инчунин, зикр гардид, ки дар Донишкада се китобхона: анъанавӣ ва электронӣ, толори Интернет, озмоишгоҳҳои бонки таълимӣ, молшиносӣ ва муоинаи молҳои истеъмолӣ, криминалистика, синфхонаи компютерии тиҷорати электронӣ, синфхонаи компютерии инноватсионӣ барои омӯзиши барномаи 1С – корхонаҳо, синфхонаи компютерии таълимии омор, панҷ адад утоқи лингофонӣ мавҷуд аст.
Тавре иттилоъ доданд, Донишкада бо зиёда аз 300 корхона, ширкат, бонк, муассисаю ташкилот, мақомоти ҳифзи ҳуқуқ ва мақомоти идоракунии маҳаллию давлатӣ шартномаҳои тарафайн дорад. Ин имкон фароҳам меорад, ки сифати таҳсил беҳтар аз пештар гардида, табодули таҷриба афзуда, имкониятҳои бештар пайдо шавад.
Файзуллохон ОБИДОВ,
“Ҳақиқати Суғд”
- Информация о материале
- Просмотров: 25
- Раёсати маорифи вилояти Суғд дар нимсолаи аввали соли 2026 фаъолияти худро дар асоси дастуру супоришҳо ва ҳидоятҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, супоришҳои Вазорати маориф ва илми Ҷумҳурии Тоҷикистон, Мақомоти иҷроияи ҳокимияти давлатии вилоят ва санадҳои меъёрию ҳуқуқии амалкунандаи марбут ба соҳа ба роҳ монда, дар ин давра корҳои муайянро ба иҷро расонид, - гуфт зимни нишасти матбуотӣ ба рӯзноманигорон сардори Раёсати маорифи вилоят Гулсара Мирзозода.
Иттилоъ дода шуд, ки дар миқёси вилоят 315 муассисаи таҳсилоти томактабӣ фаъолият доранд, ки аз ин шумора 236 муассисаи таҳсилоти томактабӣ тобеи раёсату шуъбаҳои маориф, 67 муассисаи таҳсилоти томактабии хусусӣ ва 12 муассисаи таҳсилоти томактабии тобеи ташкилоту корхонаҳо мебошанд.
- Информация о материале
- Просмотров: 21
Дар вилояти Суғд 362 китобхона мавҷуд мебошад. Аз ин шумора 38 китобхона таъмирталаб буда, 5 китобхонаи дигар дар шаҳру ноҳияҳои Истаравшан, Гулистон, Кӯҳистони Мастчоҳ, Зафаробод ва Конибодом дар ҳолати садамавӣ қарор доранд. Дар ин бора сардори тозатаъйини Раёсати фарҳанги вилояти Суғд Мунира Мансурӣ зимни нишасти матбуотӣ иттилоъ дод.
Дар ҷараёни баргузории нишасти матбуотӣ директори Китобхонаи вилоятии оммавии ба номи Тошхӯҷа Асирӣ Баҳром Мирсаидов аз оғози татбиқи Барномаи рушди китобхонаҳои деҳот дар Ҷумҳурии Тоҷикистон барои солҳои 2027–2031 мужда дод. Ба гуфтаи ӯ, барнома ба таҳкими заминаи моддию техникии китобхонаҳо, ҷорӣ намудани технологияҳои муосир, ғанӣ гардонидани фонди китобҳо ва баланд бардоштани сатҳи хизматрасонӣ нигаронида шудааст.
Зикр гардид, ки дар доираи татбиқи ин барнома дар шаҳри Хуҷанд бунёди як китобхонаи муосир ба нақша гирифта шудааст. Китобхонаи нав бо толорҳои барҳавои мутолиа, захираи электронии китобҳо, маркази иттилоотӣ ва шароити мусоид барои хонандагони тамоми синну сол муҷаҳҳаз хоҳад шуд.
Ба таъкиди масъулон, татбиқи чунин лоиҳаҳо барои баланд бардоштани фарҳанги китобхонӣ, ҷалби бештари наврасону ҷавонон ба мутолиа ва мутобиқ намудани фаъолияти китобхонаҳо ба талаботи замони муосир мусоидат хоҳад кард.
Ёдовар мешавем, ки субҳи санаи 4-уми август дар таҳхонаи Китобхонаи вилоятии оммавии ба номи Тошхӯҷа Асирӣ мағозаҳои лавозимоти хониш сӯхтор сар зад ва дар натиҷаи ин ҳодиса садҳо китоб низ нобуд гардиданд. Ин ҳолат зарурати таъмини бехатарӣ ва навсозии инфрасохтори китобхонаҳоро боз ҳам бештар менамояд.
Ҳарчанд бар асари ин ҳодиса ба фаъолияти умумии китобхона халали ҷиддӣ ворид нашуд, аммо масъалаи фароҳам овардани шароити муосир ва ҷавобгӯ ба талаботи имрӯз бори дигар дар мадди назар қарор гирифт.
Масъулони соҳа таъкид мекунанд, ки бунёди китобхонаҳои нав ва таҷдиди муассисаҳои мавҷуда на танҳо ба беҳтар шудани шароити хизматрасонӣ, балки ба ҳифзи дурусти ганҷинаи маънавӣ — китобҳо ва дигар сарчашмаҳои иттилоотӣ низ мусоидат мекунад.
Дар ҳамин замина, татбиқи Барномаи рушди китобхонаҳои деҳот барои солҳои 2027–2031 ва бунёди китобхонаи муосир дар шаҳри Хуҷанд ҳамчун як қадами муҳим дар самти рушди соҳаи китобдорӣ арзёбӣ мешавад.
Манзур БАХТИЁРЗОДА,
“Ҳақиқати Суғд”
- Информация о материале
- Просмотров: 17
Дар Донишгоҳи давлатии ҳуқуқ, бизнес ва сиёсати Тоҷикистон бо иштироки намояндагони васоити ахбори омма оид ба натиҷаҳои фаъолияти донишгоҳ давоми шаш моҳи соли ҷорӣ нишасти матбуотӣ баргузор гардид. Нахуст намояндагони ВАО аз “Маркази фарҳанг ва рушди технологияҳои инноватсионӣ”, ки 29-уми марти соли ҷорӣ бо иштироки Пешвои миллат муҳтарам Эмомалӣ Раҳмон мавриди баҳрабардорӣ қарор гирифт, боздид намуданд. Иттилоъ дода шуда, ки марказ аз толори маҷлис барои 720 нафар, толори шӯрои диссертатсионӣ, осорхона, намоишгоҳи ҳунарҳои мардумӣ, толори омӯзиши рақс, маркази зеҳни сунъӣ ва IT Park иборат аст. Дар IT Park барномаи миллии KhiradAI фаъол аст, ки ба василаи он метавон сатҳи донишомӯзӣ ва азхудкунии донишҷӯёнро баҳогузорӣ кард.
Сипас, ректори донишгоҳ Шероз Мӯминзода оид ба раванди таълиму тарбия, ҷалби довталабон, шароити мавҷуда ва дигар нуктаҳои муҳимми фаъолияти донишгоҳ маълумоти муфассал дод. Гуфта шуд, ки нақшаи қабули донишҷӯён барои соли таҳсили 2026-2027, дар даври асосии тақсимоти Маркази миллии тестӣ 97,3 фоиз ё худ 2778 нафарро ташкил дод. Ин аз дуруст ба роҳ мондани корҳои тарғиботӣ-ташвиқотӣ миёни хатмкунандагон дарак медиҳад.
-Айни замон дар донишгоҳ 325 нафар омӯзгор, аз ҷумла 22 нафар доктори илм ва профессор ва 148 нафар номзади илм ва дотсент фаъолият мекунанд. Ҳамзамон, 244 нафар магистрант ва 63 нафар унвонҷӯю докторант (PhD) ба таҳқиқу пажӯҳиш машғуланд. Дар соли таҳсили 2025-2026 22 нафар омӯзгори донишгоҳ рисолаи илмӣ ҳимоя намуданд, ки аз ин 6 рисолаи докторӣ, 13 рисолаи номзадӣ ва 3 рисола барои дарёфти дараҷаи илмии доктори фалсафа (PhD)-доктор аз рӯйи ихтисос мебошад,-гуфт Шероз Мӯминзода. Ҳамзамон, таъкид кард, ки дар ин давра аз ҷониби олимону муҳаққиқони донишгоҳ 12 монография, 177 мақола дар маҷаллаҳои тақризшавандаи КОА ва 21 мақола дар маҷаллаҳои тақризшавандаи хориҷӣ ба табъ расид.
Дар доираи сиёсати “Дарҳои кушод”, барномаҳои табодули академӣ, ҳамкории илмӣ ва лоиҳаҳои грантӣ Донишгоҳи давлатии ҳуқуқ, бизнес ва сиёсати Тоҷикистон бо 158 муассиса созишномаи ҳамкорӣ ба имзо расонид, ки аз он 137 созишнома бо шарикони хориҷӣ ва 21 созишнома бо муассисаҳои ватанӣ мебошад. Дар давраи ҳисоботӣ 10 созишномаи нав бо донишгоҳҳои Ҷумҳурии Мардумии Чин, Ӯзбекистон, Чехия, Корея, Россия ва Қирғизистон ба имзо расид.
Дар қисмати саволу ҷавоб ба суоли хабарнигори рӯзномаи “Ҳақиқати Суғд” дар мавриди дастгирии олимону муҳаққиқони ҷавон ва табодули академии донишҷӯён иттилоъ дода шуд, ки раёсати донишгоҳ барои дастгирии олимони ҷавон ҳамеша омода аст. Ҳанӯз аз зинаи магистратура ва докторантура ба онҳо таваҷҷуҳи амиқ зоҳир мегардад ва ҷиҳати нашри мақолаҳои илмӣ мусоидат карда мешавад.
-Ҳамаи он олимону муҳаққиқон, ки рисолаҳои номзадӣ ва доктории худро ҳимоя мекунанд, аз ҷониби донишгоҳ ҳавасманд карда мешаванд. Аз ҷумла, ба маоши вазифавии онҳо иловапулӣ ҳамроҳ мегардад. Ғайр аз ин, барои такмили ихтисоси онҳо ҳам дар дохил ва ҳам дар хориҷи кишвар мусоидат карда мешавад,-гуфт ректор. Ҳамзамон, илова кард, ки дар давраи ҳисоботӣ 37 нафар омӯзгори донишгоҳ дар чорабиниҳои илмӣ ва таълимии байналмилалӣ, аз ҷумла конфронсҳо, сипозиумҳо ва форумҳо ширкат варзидаанд.
Дар хусуси табодули академии донишҷӯён иттилоъ дода шуд, ки 16 нафар ба Донишгоҳи давлатии Гдански Ҷумҳурии Полша, 12 нафар ба Донишгоҳи миллии Авруосиё ба номи Л.Н.Гумилёв дар Ҷумҳурии Қазоқистон ва 2 нафар ба Донишгоҳи таҳсилоти байналмилалии Сиани Ҷумҳурии Мардумии Чин фиристода шуданд. Ҳамзамон, 12 нафар ба Донишгоҳи ҳуқуқшиносии Тошканд, 10 нафар ба Донишгоҳи давлатии иқтисодии Тошканд, 7 нафар ба Донишгоҳи технологияҳои иттилоотии Тошканд ба номи Муҳаммад ал-Хоразмӣ, 5 нафар ба Донишгоҳи миллии Ӯзбекистон ба номи Мирзо Улуғбек ва 3 нафар ба Донишгоҳи давлатии забонҳои ҷаҳонии Тошканд ҷалб гардиданд.
Ба суоли намояндагони ВАО дар бораи пардохти кӯмакпулӣ ба ятимону бепарасторон, истифодаи оқилонаи зеҳни сунъӣ, таъсиси факултетҳои муштарак, шумораи донишҷӯёни хориҷӣ, бунёди IT Park, муносибатҳои байналмилалӣ, бунёди хобгоҳ барои омӯзгорон, ҳамкориҳои муштарак бо корхонаҳо посухҳои мушаххас дода шуд.
Амони МУҲАММАД,
“Ҳақиқати Суғд”
