- Информация о материале
- Просмотров: 21
Ҳамасола дар саросари кишвар 23-юми феврал ҳамчун рӯзи Артиши миллӣ таҷлил мегардад. Ин сана ҳамчун рамзи қудрат, иттиҳоду ҳамбастагӣ ва ҳифзи Истиқлолияти давлатии Ҷумҳурии Тоҷикистон шинохта мешавад. Артиши миллӣ, ки яке аз сутунҳои муҳими давлатдории кишвар ба шумор меравад, натанҳо барои ҳифзи марзу буми Ватан, балки барои таъмини суботу амнияти шаҳрвандон низ нақши калидӣ мебозад.
Хизмат ба Ватан, ҳифзу ҳимояи марзу буми он аз ҳар гуна таҷовузҳо ва таъмини ҳамешагии соҳибистиқлоливу пойдории он вазифаи умум ва шарафи бузург аст.
Бо дастгирии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Артиши миллӣ солҳои охир таҳким ёфта, бо техникаи муосир ва кадрҳои баландихтисос таъмин гардидааст. Имрӯз нерӯҳои мусаллаҳи кишвар қодир мебошанд, ки амният ва истиқлолияти Тоҷикистонро дар ҳар гуна шароит ҳифз намоянд.
Ба хизмати сарбозӣ рафтан, баҳри ҳифзи Ватан камар бастан барои ҳар як ҷавон фарз ва ҳам қарз аст.
Ҳар сол ҷавонони Тоҷикистон бо азму иродаи хеш барои хизмат дар сафи қувваҳои Артиши миллӣ бо хоҳиши худ ва содиқона дар сафҳои артиш хизмати Модар-Ватанро ба ҷо меоранд ва хизмат дар сафи Артиши миллӣ ва ҳифзи марзу буми Ватан барои ҳар як ҷавон вазифаи аввалиндараҷа мебошад.
Ҳар як афсару сарбози шуҷои кишвар ҳамчун сипари боэътимоди Ватан дар иҷрои вазифаҳои хизматиашон бояд ҳамеша ҳушёру зирак бошанд ва ҳаргиз фаромӯш накунанд, ки фазои орому осудаи имрӯзаи Тоҷикистони соҳибистиқлол бар ивази ҷони садҳо нафар ҷавонмардони бонангу номуси миллат ба даст омадааст. Қувваҳои Мусаллаҳи кишвар дар ҳақиқат сипари кишвар ва сулҳу ваҳдат дар ҷомеа мебошад.
Ҳар ҷавон бо хизмати содиқона бояд исбот намояд, ки Қувваҳои Мусаллаҳи кишвар дар ҳақиқат сипари боэътимоди давлат, ҳимоятгари сокинони кишвар ва сулҳу ваҳдат дар ҷомеа мебошад.
Ҳамеша ҳимоятгари Ватани хеш бошем ва сарфарозӣ аз он кунем, ки зодаи давлати соҳибистиқлол, ҳуқуқбунёд, дунявӣ ва ягона ҳастем.
Барно АБДУҒАФФОРОВА,
“Ҳақиқати Суғд”
- Информация о материале
- Просмотров: 70
Дар соли 2025 судҳои вилояти Суғд, дар маҷмӯъ, 36 ҳазору 895 парвандаи маданӣ, оилавӣ, ҷиноятӣ, ҳуқуқвайронкунии маъмурӣ, пешниҳод ва дархостҳоро моҳиятан баррасӣ кардаанд. Ин нишондиҳанда нисбат ба ҳамин давраи соли 2024 ба андозаи 8 ҳазору 176 парванда кам мебошад. Дар ин бора раиси Суди вилояти Суғд Суҳроб Рушанзода зимни нишасти хабарӣ иттилоъ дод.
Тавре ӯ гуфт, дар давраи ҳисоботӣ ба судҳо, дар маҷмӯъ, 3 ҳазору 887 парвандаи ҷиноятӣ ворид гардида, аз он 3 ҳазору 701 адад он моҳиятан баррасӣ шудааст, ки ин нишондиҳанда нисбат ба соли 2024 193 парванда зиёд мебошад.
- Аз 3 ҳазору 963 маҳкумшуда нисбат ба 3 нафар ҷазои якумра маҳрум сохтан аз озодӣ ва нисбат ба 1 ҳазору 283 нафар ҷазои маҳрум сохтан аз озодӣ таъин гардид, ки аз ин шумора 39 нафар ноболиғ ва 93 нафар зан мебошанд, - афзуд раиси Суди вилоят.
Илова бар ин, нисбат ба 1 ҳазору 979 нафар ҷазои ҷарима татбиқ шуда, аз маблағи умумии ҷаримаҳои таъингардида 39 миллиону 628 ҳазору 554 сомонӣ ба фоидаи давлат рӯёнида шудааст. Ҳамзамон, судҳои вилоят 10 ҳазору 259 парвандаи ҳуқуқвайронкунии маъмуриро баррасӣ намуда, нисбат ба 9 ҳазору 223 нафар ҷазоҳои маъмурӣ татбиқ кардаанд. Аз ин шумора ба 8 ҳазору 584 нафар ҷазои ҷарима таъин шуда, аз маблағи умумии ҷаримаҳои таъиншуда 14 миллиону 936 ҳазору 447 сомонӣ ба буҷети давлатӣ пардохт гардидааст, - илова кард раиси Суди вилоят.
Дар идомаи нишасти матбуотӣ раиси Суди иқтисодии вилояти Суғд Парвиз Мирзозода гуфт, ки дар соли 2025 дар суди иқтисодӣ 745 парванда ба маблағи 90 179 576,52 сомонӣ мавриди баррасӣ қарор гирифт, ки нисбат ба соли 2024 146 парванда зиёд мебошад. Тибқи нишондод ӯ, дар 626 ҳолати баррасии парвандаҳо ҳалномаҳои судӣ қабул гардида, аризаҳои даъвогӣ ба маблағи 82 095 872,65 сомонӣ қонеъ гардонида шуданд.
- Аз ҳисоби парвандаҳои баррасишуда рӯёнидани маблағи истифодаи нерӯи барқ ва об низ амалӣ шуд. Аз ҷумла, ҳаҷми рӯёнидани маблағи ҳаққи истифодаи нерӯи барқ ба 26 922 064,98 сомонӣ ва хизмати обрасонӣ ба 2 933 834,37 сомонӣ баробар шуд, - изҳор дошт Парвиз Мирзозода.
Файзуллохон ОБИДОВ,
“Ҳақиқати Суғд”
- Информация о материале
- Просмотров: 63
Дар нишасти матбуотии Раёсати адлияи вилояти Суғд натиҷаҳои фаъолияти ин ниҳод дар соли 2025 баррасӣ шуданд. Сардори Раёсат Оятулло Раҳматзода доир ба барҳам додани ташкилотҳои ҷамъиятии қонуншикан ва афзоиши воридоти боҷи давлатӣ аз ҳисоби амалиётҳои нотариалӣ ва гузоштани апостил ба хабарнигорон маълумоти муфассал дод.
Иттилоъ дода шуд, ки дар давоми соли 2025 фаъолияти 11 ташкилоти ҷамъиятӣ мавриди санҷиш қарор дода шуд. Бинобар сари вақт пешниҳод накардани ҳисобот оид ба фаъолият ва риоя накардани муқаррароти Қонуни Ҷумҳурии Тоҷикистон “Дар бораи иттиҳодияҳои ҷамъиятӣ” нисбати 6 адад ташкилоти ҷамъиятӣ аризаҳои даъвогӣ ба судҳои шаҳру навоҳии Хуҷанд, Панҷакент, Конибодом ва Бобоҷон Ғафуров ҷиҳати барҳам додан пешниҳод гардид. Дар асоси аризаҳои даъвогии пешниҳодгардида 6 ташкилоти ҷамъиятӣ бо ҳалномаҳои суд барҳам дода шуданд.
Ҳамчунин, нисбат ба 101 адад ташкилоти ҷамъиятӣ ҷиҳати пешниҳоди саривақтии ҳисоботҳои фаъолияти оинномавӣ огоҳинома ирсол карда шуд. Дар ин давра 6 ташкилоти ҷамъиятӣ аз нав ба қайди давлатӣ гирифта шуда, 24 адад ташкилоти ҷамъиятӣ бо муроҷиати бевоситаи худи онҳо ва 3 адад филиалу намояндагиҳои иттиҳодияҳои ҷамъиятӣ барҳам дода шуданд. Инчунин ду филиалу намояндагиҳои ташкилоти ҷамъиятӣ аз қайди баҳисобгирӣ гузаронида шуд.
Дар давраи ҳисоботӣ ба раёсат 511 адад ариза оид ба гузоштани апостил ворид гардид. Ин нишондиҳанда нисбат ба ҳамин давраи соли 2024 – ум 255 адад зиёд мебошад. Вобаста ба он ба маблағи 40435,60 сомонӣ боҷи давлатӣ рӯёнида шуд ва ин рақам нисбат ба ҳамин давраи соли сипаришуда 77 фоиз зиёд мебошад. Дар соли 2025 аз ҷониби нотариусони давлатии идораи нотариалии давлатии шаҳру ноҳияҳои вилояти Суғд 202 543 адад амалиёти нотариалӣ ба ҷо оварда шуд. Вобаста ба ин амалиётҳо 28,6 миллион сомонӣ боҷи давлатӣ рӯёнида шуд, ки нисбат ба ҳамин давраи соли 2024 – ум 15 фоиз зиёд мебошад.
Доир ба самти сабти асноди ҳолати шаҳрвандӣ гуфта шуд, ки дар соли 2025 – ум 113692 адад сабти асноди ҳолати шаҳрвандӣ аз қайд гузаронида шуда ва вобаста ба он 7,9 миллион сомонӣ боҷи давлатӣ ситонида шуд. Дар маҷмуъ ба Раёсат 1105 нафар шахсони воқеӣ ва ҳуқуқӣ муроҷиат карданд. Аз ин шумора 904 адад муроҷиати хаттӣ, 77 адад муроҷиати шифоҳӣ, 19 адад муроҷиати электронӣ ва 105 адад муроҷиати алоқаи телефониро ташкил додааст. Муроҷиати шаҳрвандон нисбат ба ҳамин давраи соли сипарӣ 108 адад кам мебошад.
Дар анҷоми нишасти матбуотӣ роҳбарияти Раёсати адлия ва масъулини соҳа ба саволҳои рӯзноманигорон доир ба паҳлуҳои мухталифи фаъолияти соҳавӣ посухҳои мушаххас доданд.
Шаҳбону ОЛИМОВА,
“Ҳақиқати Суғд”
- Информация о материале
- Просмотров: 64
Бино ба гуфти сардори Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Суғд Сафар Салимзода дар умум 228 нафар ба содир намудани ҷиноятҳои коррупсионӣ даст заданд. Тибқи иттилои роҳбарияти ин ниҳод давоми соли 2025-ум 403 ҳолати коррупсионӣ ва иқтисодии хусусияти коррупсионидошта ошкор гардидааст. Аз ин шумора 141 ҳолат ба ҷиноятҳои вазнин мансуб дониста мешавад.
Ин нишондиҳанда гувоҳи он аст, ки сатҳи ҷалби шахсони мансабдор ба амалҳои ғайриқонунӣ то ҳол нигаронкунанда боқӣ мондааст.
Таҳлилҳои масъулин нишон медиҳад, ки тамоюли зиёдшавии ҷиноятҳо ғайр аз шаҳри Панҷакент ва ноҳияи Кӯҳистони Мастчоҳ дар ҳамаи шаҳру ноҳияҳо ба назар мерасад. Масалан, дар шаҳри Конибодом 88 ҳолати ҷинояткорӣ ба қайд гирифта шудааст, ки нисбат ба соли гузашта 77 ҳолат зиёд аст. Дар ноҳияи Бобоҷон Ғафуров низ 56 ҳолати ҷинояткорӣ ошкор гардидааст, ки дар муқоиса ба соли гузашта 18 ҳолат афзоиш ёфтааст.
Муфаттишони Раёсат муайян карданд, ки қисме аз ҷинояткориҳо марбут ба хариду фурӯши ғайриқонунии қитъаҳои замин, гирифтани пора, пинҳонкорӣ ва воридоти ғайриқонунии маҳсулот тариқи қочоқ мебошад.
Ҳамзамон зикр гардид, ки аз рӯи таҳлилҳои сохторӣ соҳаи маориф ва тандурустӣ аз нигоҳи шумораи ошкоршудаи ҳолатҳои фасод дар ҷойи аввал қарор дорад, ки ин омил зарурати пурзӯр намудани назорат ва шаффофиятро дар муассисаҳои таълимӣ тақозо мекунад.
Ёдовар шуд, ки кормандони Раёсат баҳри баланд бардоштани фарҳанги ҳуқуқии аҳолӣ дар давраи ахборотӣ бо аҳолӣ ва намояндагони ташкилоту муассисаҳои давлатӣ 176 суҳбату вохӯриҳо гузаронида, 34 маротиба тавассути радио ва телевизион баромад карда, 15 мақола дар нашрияҳои вилоятӣ ба нашр расониданд.
Манзура БАХТИЁРЗОДА,
“Ҳақиқати Суғд”
- Информация о материале
- Просмотров: 100
Дар маҷлисгоҳи Прокуратураи вилоят бо иштироки васеи рӯзноманигорони ватаниву хориҷӣ нишасти матбуотӣ доир гардид.
Прокурори вилоят Ҳусейн Давлатзода дар бораи натиҷаҳои фаъолияти мақомоти прокуратураи вилоят дар соли 2025 ба ҳозирин маълумот дод.
Мавсуф таъкид намуд, ки Прокуратураи вилоят ҳолати иҷрои қонунҳоро дар бораи мақомоти маҳаллии ҳокимияти давлатӣ ва буҷети давлатӣ, андозу гумрук, фаъолияти иқтисодӣ ва соҳибкорӣ, ҳифзи амволи давлатӣ ва ҷамъиятӣ, замин, ҳуқуқҳои меҳнатии кормандон, муроҷиатҳои шахсони воқеӣ ва ҳуқуқӣ, ҳимояи ҳуқуқи истеъмолкунандагон, маорифу тандурустӣ ва ҳифзи иҷтимоӣ, ҳифзи муҳити зист ва ғайраҳо дар фаъолияти мақомоту муассисаҳо, корхонаҳо ва хоҷагиҳои кишоварзӣ, инчунин дар иттиҳодияҳои ҷамъиятӣ беш аз 1864 маротиба мавриди санҷиш қарор додааст.
Ҳамзамон, изҳор гардид, ки дар раванди санҷишҳои прокурорӣ ҳамагӣ 37450 қонунвайронкунӣ ошкор карда шуда, ҷиҳати бартараф сохтани онҳо ва барқарор намудани ҳуқуқу манфиатҳои поймолгардидаи шаҳрвандон, корхонаҳо ва давлат дар маҷмуъ 7266 амр, 4395 эътироз ва 3502 пешниҳод бароварда, 1365 адад парвандаи ҷиноятӣ оғоз шудааст.
Дар асоси санадҳои эътиноии прокурорӣ ҳуқуқу манфиатҳои беш аз 39900 нафар шаҳрвандон, аз ҷумла 241 нафар ноболиғ барқарор гардида, зиёда аз 20900 нафар шахсони мансабдор ва шаҳрвандон барои содир намудани ҳар гуна қонунвайронкунӣ ба ҷавобгариҳои интизомӣ, моддӣ, маъмурӣ ва ҷиноятӣ кашида шудаанд. Дар маҷмуъ, 418,4 миллион сомонӣ маблағҳои зарар барқарор гардида, аз онҳо 307,1 миллион сомонӣ ба буҷети давлат ва ташкилоту корхонаҳои давлатӣ, 10,5 миллион сомонӣ ба манфиати ташкилоту корхонаҳои ғайридавлатӣ ва 100,4 миллион сомонӣ ба манфиати шахсони воқеӣ рост меояд.
Ғайр аз ин, 41 гектар қитъаҳои замини дар истифодаи ғайриқонунӣ қарордошта ба ҳолати аввала баргардонида ва ҳамзамон 1265 сар чорво ба тариқи аслӣ барқарор шудааст. Ба 546 қарори ғайриқонунии раисони шаҳру ноҳияҳо ва 62 қарори раисони ҷамоатҳои шаҳраку деҳот, ба 383 қарори роҳбарони мақомоти корҳои дохилӣ, ба 327 қарори роҳбарони мақомоти андоз ва 933 қарори дигар мақомоти назоратӣ эътирозҳои назоратӣ оварда шуда, дар асоси онҳо аксарияти қарорҳои мазкур бекор карда, қисмати дигар ба талаботи қонунҳо мутобиқ гардонида шудааст.
Саҳми мақомоти прокуратура дар таъмини иҷрои қисми даромади буҷети давлатӣ аз ҳисоби андозҳо низ назаррас гардида, дар асоси санадҳои эътиноии прокурорӣ ба буҷети давлатӣ зиёда аз 154,8 миллион сомонӣ андозҳои қаблан пинҳонгардида ворид шудаанд. Ҳангоми санҷишҳои прокурорӣ 87 ҳолати тасарруфи маблағҳои давлатӣ ба миқдори беш 6,1 миллион сомонӣ ошкор ва тафтиш гардида, дар давраи тафтишоти пешакӣ 2,7 миллион сомонӣ ё 44,2 фоизи зарари расонидашуда барқарор шудааст.
Дар самти назорати қонунгузории барқ 45 парвандаи ҷиноятӣ оғоз шудааст ва дар доираи онҳо зарари расонидашуда ба миқдори 3,6 миллион сомонӣ муайян сохта, аз онҳо 1,6 миллион сомонӣ ё беш аз 44,4 фоиз дар асоси санадҳои прокурорӣ барқарор шудааст.
Ҳамзамон, прокурори вилоят дар бораи ҷинояткорӣ дар миқёси вилоят, дар маҷмӯъ 7106 (6406) ҷиноят ба қайд гирифта шудааст, ки нисбат ба соли қаблӣ 700 адад ё 10,9 фоиз зиёд мебошанд, кушодашавии онҳо 88,06 (87,83) фоизро ташкил додааст, ки нисбат ба давраи қиёсӣ каме беҳтар мебошад.
Таъкид гардид, ки аз тарафи мақомоти прокуратураи вилоят ҳамагӣ 3462 муроҷиати шахсони воқеӣ ва 114 муроҷиати шахсони ҳуқуқӣ баррасӣ гардида, мутобиқан 935 адад ё 27 фоизи муроҷиатҳои шахсони воқеӣ ва 35 адад ё 30,7 фоиз муроҷиатҳои шахсони ҳуқуқӣ қонеъ гардонида, ҳуқуқу манфиатҳои 1015 нафар шаҳрвандон ва 34 шахсони ҳуқуқӣ барқарор шудааст.
Дар охир рӯзноманигорон ба суолҳои худ посух гирифтанд.
Гулҷаҳон МАХКАМОВА,
“Ҳақиқати Суғд”
