January 2017

10 January 2017

Меҳри диёр аз накӯкорӣ афзун шавад!

Дар урфият “то мусофир не, мусулмон не” ва ё “дар сахтиҳо обутоб ёфтааст” мегўянд, ки ҳақ асту рост. Раҳматулло ҳам тўли беш аз се сол дар шаҳри Москваи Федератсияи Русия заҳри мусофирӣ чашид ва ҳамин мушкилотро дар симои ҳамшаҳриёнаш низ эҳсос кард ва ба худ аҳд кард: - Ман вақте андаке маблағ ба даст овардам, албатта, ба Ватан баргашта, аз пайи ободонии диёр, беҳтар сохтани вазъи иҷтимоии оилаи худ ва ҳамшаҳриёнам хоҳам шуд. Ва дар ҳамин мусофират кор омўхт, аз пастию баландии ҳаёт огоҳ гардид, инсонҳои гуногунандешро дид ва аз неку бади ҷаҳон воқиф гашт.

Инсоне, ки дасту дили пок дорад, албатта, аз чашми ҳамагон пинҳон нахоҳад монд. Ҳамин хислати ҳамидаву Худоди ўро сарвари яке аз марказҳои савдои шаҳри Москва низ мушоҳида намуд ва чанд нуқтаи савдояшро ба ихтиёри ин марди тоҷикистонӣ вогузошт. Роҳбари маркази савдо ўро чун бародари худ хонд ва ҳамаи нозукиҳои касби соҳибкориро омўзонд. Ва ҳамин шуғл самти минбаъдаи риштаи ҳаёташ дар зодгоҳаш гардид ва зиндагии аксари ҳамшаҳриёнашро низ ба куллӣ тағйир дод.

Дурӣ аз Ватан ўро ҳамчунин ба зиндагии бонизоми бо меҳнат тавъам ворид сохт. Бо он маблағе, ки тавассути меҳнати шабонарўзиаш дар мусофират ба даст оварда буд, нахуст дар Ҷамоати деҳоти Калининобод молбозори аз хотирҳо фаромўшгаштаро обод кард. Минбаъд ҳамдеҳагонаш барои хариди чорво на ба маркази ноҳия ва ё дигар деҳа мерафтанд, балки дар зодгоҳи худ мушкилоти хешро ҳал менамуданд. Ба ин васила чанд нафар ҳамдиёронаш ризқи ҳамешагии худ дарёфтанд.

Сабақи андўхтааш дар мусофират ўро ба тозакориҳо, навҷўиҳо водор сохт. Ў ба хотир овард, ки ҳанўз дар айёми кўдакиву наврасиаш бобову бибӣ ва волидайнаш паси дастгоҳи бофандагӣ нишаста, ба бофтани алоча машғул буданд. Ва пас аз дастуру супориши Асосгузори сулҳу Ваҳдати миллӣ – Пешвои миллат, Президенти мамлакат, мўҳтарам Эмомалӣ Раҳмон ва ҷонибдории Раиси вилояти Суғд Абдураҳмон Қодирӣ соҳибкори ҷавон ҳамон шуғли авлодии хешро дар Ҷамоати деҳоти Калининободи ноҳияи Деваштич аз нав эҳё кард.

Минбаъд Раҳматуллои ҷавон, вале аллакай аз баду неки ҷаҳон огоҳ, ҳамсараш Хайринисо Маҳкамоваро низ баҳри касбомўзӣ ба Маркази таълимӣ - истеҳсолии деҳаи Кулангири ноҳияи Бобоҷон Ғафуров роҳсипор сохт ва ин хонадон боз як ҳунари дигари аҷдодии тоҷиконро аз бар намуд. Дар маркази бозомўзӣ Хайринисо аз ҳунармандони хуҷандӣ касби дигар – атласу адрасбофиро аз бар намуд.

Раҳматулло ба ҷуз аз бар намудани касбҳои зикргардида, инчунин ду нуқтаи маркази савдо низ таъсис дод. Ба кадом хотир? Танҳо ба хотири он ки дар ҳамин нуқтаҳо адрасу алочаи омода сохтаашонро, ки беш аз 15 намуд мебошад, пешкаши ҳамдеҳагонаш намоянд. Дилбохтагони ин матоъҳои рангобаранг дар деҳааш афзуданд. Орзую омоли занону духтаракони меҳнатқарину зебопараст на танҳо бар тани худ дидани чунин матоъҳои чашмрабо, балки ҳисси кунҷкобии онон рўз аз рўз зиёд мегашт, то ин ки худ низ чунин ҳунарро аз бар намоянд. Ин оилаи тифоқ бо фотеҳаи падари хирадманду модари дуогўяшон боз сехи бофандагӣ таъсис доданд.

Аз лутфу карами Пешвои миллат барои рушди сехи бофандагӣ ва омўзонидани дилбохтагони касби аҷдодӣ соҳиби 30 ҳазор сомонӣ Гранти Президентӣ ва панҷ ҳазор сомонӣ Гранти Раиси вилояти Суғд гардид. Раҳматуллои чашмикордон маблағи ба дастовардаашро самаранок истифода бурд.

Тавре Асосгузори сулҳу Ваҳдати миллӣ - Пешвои миллат дар бораи занону духтаронро соҳибкасб гардондан, то ин ки ба иқтисодиёти хонаводагиаш кўмаке карда тавонад, инчунин бо мақсади бекор намондани бонувон борҳо таъкид намуда буданд, Раҳматуллои инсонпарвару меҳнатқарин ва дардошно ҳалли ин масъаларо низ дарёфт. Тавре ёдовар гаштем, баҳри ба пуррагӣ аз бар намудани асрори адрасбофӣ дар Маркази таълимӣ-истеҳсолии деҳаи Кулангири ноҳияи Бобоҷон Ғафуров арўси ин хонадон Хайринисо касби адрасбофиро аз худ намуд. Пасон ба зодгоҳ баргашта, дигаронро низ ба ин ҳунари авлодӣ ҷалб сохт. Тавассути роҳнамоии қиблагоҳиаш ҳамроҳи ҳамсараш Хайринисо дар се гурўҳ, дар ҳар кадоме 22-нафарӣ 66 нафар гулдухтару бонувонро бо касби авлодӣ - адрасбофӣ ошно сохт.

Ў худро хушбахт меҳисобад, зеро аз ҳамин деҳаи дурдаст тавонист, ки дар озмуни вилоятии “Атласу адрас -2015” ширкат варзида, адраси истеҳсолнамудаашро бо номи “Барги сабз” ба ҳакамон муаррифӣ сохта, соҳиби панҷ ҳазор сомонӣ ва Дипломи дараҷаи дуюм гардад ва соли 2016-ум бошад, дар озмуни ноҳиявӣ бо адраси бофтааш - “Адраси тоҷик” мақоми аввал ва дар озмуни вилоятӣ ҷойи сеюмро ишғол намояд. Дар озмуни ноҳиявии “Оилаи беҳтарин” бошад, мақоми аввалро сазовор гардид.

- Ба як мард чил ҳунар кам аст, - мегўянд. Ин оилаи дастгири ҳамешагии пиру барно сехи дўзандагӣ низ ташкил карданд. Модари фариштахўи Раҳматулло - Қаноат Насруллоева аз он масрур буд, ки писараш бо арўси хонадонаш Хайринисо касби хешро тақвият бахшида, дигаронро низ ба он ҷалб намуда истодаанд. Модари маслиҳатгараш аз айёми ҷавонии хеш ҷигарбандонашро тез-тез ёдовар мегашт:

- Солҳои қаблӣ оё чунин фаровонӣ буд? Ман дар ёд дорам, дар паси сандалии бобоӣ ҳамроҳи модарам чанд нафар бонувон менишастанду яке рўймолу дигаре курта, сўзаниву қуроқ медўхтанд ва зери лаб сурудеро зам - зама менамуданд ва ё ҳикояву қиссаеро ёдовар мегаштанд. Ва баъди меҳнати шабонарўзӣ, баъди сўзанзаниҳову бедорхобиҳову нури чашм равонданҳо соҳиби андаке маблағ мегардиданд, ки бо он иқтисодиёти хонаводагиашонро беҳтар сохтан хеле мушкил буд. Ҳоло, шукри Худо, ин қадар фаровонӣ. Аз як нон чандин навъаш, хўрокҳои пурлаззат, меваҳои шаҳдбор дастархони тоҷикро зеб медиҳанд. Биҳишти ин замон ҳамин будагист-дия, – гуфт бо шукргузорӣ холаи Қаноат.

Баъди ин хотироти модар арўси хонадон сехи дўзандагӣ низ таъсис дод ва куртаву пойҷомаву тоқиву сумкаву гарданбанду дигар лавозимоти арўсӣ ва куртаҳои рўзмарраву идонаро омода сохтанд, ки он ҳам харидорони хешро ёфт.

Аз Раҳматулло пурсон шудам:

- Дар ин деҳаи дурдаст чунин мўдҳои гуногунро аз куҷо меёбанд?

Ин ҷавони серғайрат, дар ҳақиқат, аз ҳар дақиқаи умраш самаранок истифода мебурдааст. Тўли се соли мусофират на танҳо бо савдо машғул гардидааст, инчунин аз истифодаи таҷҳизоти замонавии компутер бо сомонаҳои ҷаҳонӣ кор карданро низ омўхта будааст.

- Дўзандагони мо агар имрўз чунин мўдро дўхта пешниҳод намоянд, пагоҳ дигар навъашро, ки тавассути сомонаҳои электронӣ дарёфт намуда будам, хоси миллати тоҷик намуда, омода месозем. Чунин мўд ва дўхтҳои гуногун писанди мизоҷон низ ҳаст. Аз деҳаҳои ҳамсоя ҳам баҳри дарёфти матоъ ва ё дўхти тозае меоянд.

Ҳоло дар ин хонадон 20 набераи холаи Қаноат ва панҷ нафар ҷигарбандонаш ҳамаи он касбҳои аҷдодиро аз бар намудаанд.

Воқеан, Раҳматуллоро метавон эҷодкор номид, зеро ў ният дорад, сехи қаннодие, ки фаъолият дорад, васеъ намуда, боз нафарони зиёдеро ба меҳнат ҷалб созад.

Гулбоғи ман аст дашту саҳрои Ватан,

Дунёи ман аст рўи зебои Ватан.

Дар як кунҷи диёри офтобрўяи сарзамини биҳиштосои Тоҷикистон - деҳаи Қалъаи Дўсти Ҷамоати деҳоти Ваҳдати ноҳияи Деваштич Раҳматулло Нуруллоев ҳамроҳи аъзои оилааш: падар – Ғайбулло Нуруллоев, модар – Қаноат Нуруллоева, ҳамсараш Хайринисо Маҳкамова ва ҳафт нафар фарзандаш ширкати ҶДММ “Раҳматулло” таъсис дода, вазъи зиндагии 18 нафар ҳамдеҳаашро беҳтар намуда, боз ният дорад, дар оянда номгўи истеҳсоли коргоҳашро афзун гардонад.

Шиори зодаи деҳаи Қалъаи Дўсти Ҷамоати деҳоти Ваҳдати ноҳияи Деваштич Раҳматулло Нуруллоев дар зиндагӣ порае аз абёти шоири зиндаёд Лоиқ аст, ки гуфтааст:

То ман зи ту, эй чархи фалак, ком нагирам,

Аз сўхтану сохтан ором нагирам.

Бас бо дили равшан бифурўзам дили шабҳо,

То домони субҳе зи паи шом нагирам.

Тавҳида ҶЎРАЕВА,
“Ҳақиқати Суғд”

Читать далее

Раҳнамои зиндагии шоиста!

Паёми Асосгузори сулҳу Ваҳдати миллӣ - Пешвои миллат, мўҳтарам Эмомалӣ Раҳмон, ки дар рўҳияи баланди созандагӣ, бунёдкорӣ ва даъвати ҷомеаи кишвар ба сохтмони давлати миллӣ ҷараён гирифт, муҳимтарин самтҳои сиёсати дохилӣ ва хориҷӣ, инчунин ҳадафҳои давлати соҳибистиқлоли Тоҷикистонро барои оянда ба шоистагӣ муқаррар намуд. Муҳимтарин рўйдоди нодир, ки бевосита дар рўзи пешниҳод гардидани Паёми навбатии Пешвои миллат аён гардид, ташаббуси Роҳбари давлат дар Созмони Милали Муттаҳид истиқбол ёфта, даҳсолаи дувуми амалиёти «Об-барои рушди устувор» пазируфта шуд, ки ин мояи ифтихори мардуми Тоҷикистон маҳсуб мешавад.

Пешвои миллат, мўҳтарам Эмомалӣ Раҳмон дар баробари шарҳи муҳимтарин падидаҳои сиёсати дохиливу хориҷӣ дар Паёми хеш мавқеи ҷавононро назаррас унвон намуда, соли 2017-ро дар Ҷумҳурии Тоҷикистон Соли ҷавонон эълон карданд.

Худи ҳамон рўз аллакай ҷавонон ин иқдоми Пешвои миллатро самимона истиқбол намуданд ва мо бовар дорем, ки ҷавонони мо аз ин иқдоми Пешвои миллат, рўҳу илҳоми тоза гирифта, баҳри шукуфоии Ватани азизамон ҷидду ҷаҳд менамоянд. Зеро 70 фоизи аҳолии Тоҷикистонро ҷавонон ташкил менамоянд ва ин нерўи бузург метавонад, дар таъмини ояндаи босуботи кишвар саҳми муассир гузорад.

Дар Паёми имсола Сарвари давлат оид ба таъмиру азнавсозии муассисаҳои типпи нав мулоҳизаронӣ намуда, аз ҷумла қайд карданд, ки “Фақат соли 2016 аз ҳисоби ҳамаи сарчашмаҳо 201 бинои таълимӣ ба маблағи 540 миллион сомонӣ бунёд ва азнавсозӣ гардида, 39 ҳазор ҷойи нишаст муҳайё карда шуд.”

Дар баробари таҳлили амиқи самтҳои гуногуни хоҷагии халқ, иқтисодиёт, иҷтимоиёт, маорифу фарҳанг, тандурустӣ, ҷавонон, коҳиши сатҳи ҷинояткорӣ дар ҷомеа дурнамои пешрафтҳои кишвар аз ҳар ҷиҳат муайян шуда, таъкид гардид, ки дар сурати истифодаи дуруст ва босамари захираву имкониятҳои мавҷуда мамлакати мо метавонад, ба сўи музаффариятҳои нав ба нав қадам гузошта, дар тамоми бахшҳо ба муваффақиятҳои назаррас ноил гардад. Ҷои хушҳолӣ ва саодатмандист, ки Сарвари давлат дар Паёми хеш роҳбарони вазоратҳои маориф ва илм, рушди иқтисод ва савдо, инчунин ректорони муассисаҳои таҳсилоти олиро вазифадор намуданд, ки ҷиҳати таъмини муассисаҳои таълимӣ бо муаллимони баландихтисос тадбирҳои амалӣ андешида, доир ба ҳалли масъалаи норасоии омўзгорон, махсусан аз фанҳои дақиқ ва забонҳои хориҷӣ, инчунин, бо кадрҳои дорои таҳсилоти олии касбӣ таъмин намудани мактабҳои деҳот тадбирҳои зарурӣ андешида, то соли 2019 масъалаи норасоии кадрҳои омўзгориро дар мамлакат пурра бартараф намоянд.

Аз ин таъкидоти муҳим ва саривақтии Пешвои миллат Эмомалӣ Раҳмон бармеояд, ки дар ҳақиқат пешбарандаи ҷомеаи мо, пеш аз ҳама, омўзгор маҳсуб меёбад. То он вақте ки муаллим чароғи маърифатро ҳифз менамояд, давлат дар мақоми рушду нумўъ қарор мегирад. Бо таҳкими савод ва маънавиёт дар вуҷуди одамон меҳру муҳаббат, самимият, ихлос, некӣ, адолат, хештаншиносӣ ва ватандўстӣ пайдо мегардад. Замони имрўзи мо ҳақиқатан тавассути заҳматҳои созандаи устодон ва иқдомоти таълиму тадриси омўзгорон тараққӣ менамояд ва бояд ҳар як шаҳрванди кишвар ба қадри меҳнати муаллим ва маҳсули донишҳои вай бирасад.

 Мўсобек Мироватов,
раиси Кумитаи иттифоқи касабаи
 маориф ва илми вилояти Суғд

Читать далее

Арҷгузорӣ ба арзишҳои миллӣ

Соҳиб шудан ба Истиқлолият бо роҳи осоишта ба амал омад, ки ин падидаи беҳтарин дар ҳаёти сиёсию ҷамъиятӣ буд. Мавриди зикр аст, ки баъд аз ноил гардидан ба мустақилӣ кишвари моро ҷанги шаҳрвандии бемаънӣ ва таҳмилӣ фаро гирифт. Дар лонаи навсохтаи миллат оташи кинаю ғараз забона зад. Парокандагӣ, гурезагӣ, дур аз Ватан ҷон додану дар ғарибӣ зистан, вайронии хонаву дар ва фалаҷшавии иқтисоду талафоти ҷонӣ - чунин буд натиҷаи ин ҷанги бемаънӣ.

Чӣ тавре ки Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмон он замон иброз дошта буданд: «Таърих баъд аз ҳазор сол моро водор месозад, ки аз таҷрибаи талхи ниёгони худ сабақ гирем, манфиати давлату миллатро аз ҳама боло шуморем, ба қадри давлату давлатдорӣ ва Ватани аҷдодӣ бирасем, кишварро аз парокандагӣ, миллатро аз нобудшавӣ нигоҳ дорем. Танҳо Ваҳдати миллӣ ва Истиқлолияти мардуми Тоҷикистон, меҳнати ҳалолу бунёдкорона ва дўстиву ҳамкориҳои судманд бо мамлакатҳои пешқадам моро ба ояндаи пурсаодат мерасонад».

Оре, ҳақ ба ҷониби Сарвари хирадманду адолатгустари мо, ки Истиқлолияту Ваҳдатро ҳамчун номаи тақдири миллат, омили рушду босуботи мамлакат, кафили иқболу саодати халқу ҷамъият тафсир кардаанд.

Зикр кардан бамаврид аст, ки замоне узви Палатаи мушовирони парлумони Ҷопон Таэдзо Такэми ба сиёсати давлатдории Президенти Ҷумҳуриии Тоҷикистон, мўҳтарам Эмомалӣ Раҳмон баҳои баланд дода, зимнан қайд намудааст, ки «Ман сиёсати Президенти Ҷумҳурии Тоҷикистонро хеле баланд арзёбӣ мекунам. Оштии миллӣ ва демократикунонии ҳаёти мамлакат дар минтақа ибратомўз аст».

Барҳақ, агар бунёди давлати миллӣ яке аз арзишмандтарин дастовардҳои мо, тоҷикон дар замони соҳибистиқлолӣ маҳсуб ёбад, пас Ваҳдати комили миллӣ ҳамчун кишвари сулҳофарин ва тарғибгари сулҳ эътироф шудани Ҷумҳурии Тоҷикистон дастоварди дигари замони соҳибистиқлолии мост.

Ба андешаи сиёсатмадорони дунё сулҳ дар Тоҷикистон вазъияти мўътадили минтақаро, ки ба он экстремизми динӣ ва терроризми байналхалқӣ ҷиддӣ таҳдид менамуд, устувор сохт.

Аз ин рў, ба охир расидани ҷанги шаҳрвандӣ обрўи Тоҷикистонро дар арсаи байналмилалӣ боло бардошт.

Сарвари давлат ҳамеша таъкид бар он мекунанд, ки ба бегонапарастӣ хотима бахшем, аз арзишҳои миллии худ хуб истифода барем. Занону духтарон либосҳои миллӣ ба бар намоянд, ки ин ба бонувони тоҷик зебанда аст.

Ҳамзамон, чуноне Президенти кишвар таъкид менамоянд, дар ташаккули рафтору хислатҳои фарзанд, оянда роҳи дурусти зиндагиро интихоб намудани ў, ба падидаҳои номатлуб фирефта нагаштани онҳо нақши падару модар калидӣ аст.

Ўғулой Умаралиева,
дотсент, сармутахассиси шўъбаи тарбияи
Донишгоҳи давлатии Хуҷанд
 ба номи академик Бобоҷон Ғафуров

Читать далее

Дастур барои таъмини пешрафт

Дар маҷлиси ташкилоти собиқадорони вилоят фаъолияти Шўрои собиқадорони вилоят дар соли 2016 ҷамъбаст ва вазифаҳо, ки аз Паёми Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмон ба Маҷлиси Олии ҷумҳурӣ бармеояд, баррасӣ гардид.

Муовини раиси Шўро Шавкат Алиев зикр намуд, ки собиқадорони ҷангу меҳнати вилоят Паёми Президенти мамлакатро бо рўҳбаландӣ ва қаноатмандии бузург пазируфтанд. Зеро Паём ба таъмини рушди устувори иқтисоди миллӣ, амалӣ намудани ҳадафҳои стратегии давлат ва ҳалли масъалаҳои иҷтимоӣ нигаронида шудааст.

Шўрои собиқадорони вилоят 18 ташкилоти собиқадорони шаҳру ноҳияҳо, ташкилояти собиқадорони Раёсати корҳои дохилӣ, хизматчиёни ҳарбӣ ва Кумитаи давлатии амнияти миллии Ҷумҳурии Тоҷикистонро дар вилояти Суғд, ҷамъ 309 созмони ибтидоии собиқадоронро муттаҳид кардааст.

Дар соли 2016 дар ҷаласаҳои Шўро 38 масъалаи ҳаёти созмони собиқадорон баррасӣ ва барои баланд бардоштани нақши ташкилотҳои собиқадорон дар ҷомеа ва мавқеи онҳо, беҳтар намудани хизматрасонии иҷтимоӣ ва тиббӣ ба онҳо тадбирҳои мушаххас андешида шудааст.

Маҷлисро раиси Шўрои собиқадорони ҷангу меҳнати вилоят Мўҳсин Раҳимов ҷамъбаст карда афзуд, ки Шўрои собиқадорони вилоят баҳри баланд бардоштани масъулияти коркунони дастгоҳи Шўро, сари вақт ба иҷро расондани нақша ва нақша-чорабиниҳои алоҳида минбаъд низ кўшида, намегузорад, ки ягон ариза ё муроҷиати шифоҳии собиқадорон аз мадди назар дур монад.

Дар муҳокимаи масъала масъулони ташкилоти собиқадорон Мўъмин Орифӣ, Мўҳсин Ҷабборов, Инъомҷон Тўраев, Мавлуда Қаландарова, Шуҷоат ҳасанова ва Сулаймон Асрорқулов иштирок карда, ҷиҳати таъмини самаранокии фаъолияти Шўрои собиқадорони ҷангу меҳнати вилоят маслиҳату пешниҳодҳои муфид доданд.

Мирзоғанӣ ВАЛИЕВ,
 узви Шўрои собиқадорон

Читать далее

09 January 2017

Рўҳбаланд аз дастгирии бонувон

Дар радифи тамоми сокинони кишвар бонувони ноҳияи мо имрўзҳо бо таассуроти амиқ аз Паёми рўҳбахши Пешвои миллат, Президенти кишвар Эмомалӣ Раҳмон дар андешаи амалигардонии реҷаву ниятҳои тоза ба тоза ҳастанд. Хеле хуб шуд, ки бо ибтикори Пешвои миллат ба эҳё ва рушду такомули ҳунарҳои мардумии тоҷик роҳи васеъ кушода шуд.

Дар ноҳияи мо низ дар ин раванд дар ҳар ҷамоат марказҳои касбу ҳунаромўзӣ таъсис дода шудаанд. Аз ҷумла дар Ҷамоати деҳоти Понғоз бо сарварии бонуи ҳунарманд Ҳамроҳбибӣ Масолиева занону духтарон ҳунари атласу адрасбофиро азхуд мекунанд. Ин бонуи пурҳунар дар соли 2016-ум бо дастранҷи ҳунари хеш соҳиби дастгоҳи атласбофӣ, Сипоснома ва гранти Раиси вилоят ба маблағи 10 ҳазор сомонӣ гардид. Бо ин маблағ ният дорад, сехи истеҳсолии худро васеъ ва даҳҳо бонувонро бо ҷойи кор таъмин намояд.

Дар Ҷамоатҳои деҳоти Ифтихор, Ориён, Шодоба, Пунук, Ашт, Шайдон низ марказҳои ҳунаромўзӣ бо чандин адад дастгоҳи бофандагӣ фаъолият бурда, ба бонувон касбу ҳунарҳои атласу адрасбофӣ, қолинбофиро меомўзонанд. Марказҳои ҳунаромўзии «Дугонаҳо», сехҳои деҳаҳои Пахтакор ва Қалам, Меҳробод ва дигарҳо ба макони тайёркунандагони ҳунармандони асил табдил ёфтааст. Садҳо занону духтарон дар марказҳо бо ҳунаромўзӣ фаро гирифта шуда, бо эъҷози дастони худ на танҳо дар ноҳия, балки дар қаламрави вилоят номдор шуданд. Мафтуна Ҷўраева, Машҳура Абдураҳимова, Замира Расулова, Зиёда Расулова ва дигарон имрўз устодони касби хеш гардида, ба шогирдон ҳунар меомўзонанд. Соли 2016-ум умуман дар ноҳия бештар аз 200 нафар бонувон ба ҳунаромўзӣ ҷалб карда шуда, соҳиби ҷойи кор гаштанд.

Зикр кардан ҷоиз аст, ки дар ноҳия ба ҷуз атласу адрасбофӣ бонувон ҳамчунин ба заргарӣ, қолинбофӣ, кешбофӣ, сўзанидўзӣ, тоқидўзӣ, ҷомадўзӣ, сабадбофӣ машғул мешаванд. Ҳунари қолинбофии намуди қоқма дар ноҳия рушд ёфта, имрўз харидорони он на танҳо дар бозори дохилӣ, балки дигар ҷумҳуриҳои ҳамсоя низ бисёранд. Яке аз марказҳои истеҳсоли ин намуди қолин коргоҳи хурди «Ҳусноро»-и Ҷамоати шаҳраки Шайдон аст. Соли равон дар озмуни ноҳиявии беҳтарин қолинбоф бонуи соҳибҳунар Ризқӣ Мўсоева соҳиби ҷойи аввал гашт. Сўзаниҳои хушдўхту ҷаззоби Зўҳро Каримова бошад, дар озмуни ин намуди ҳунар сазовори ҷойи аввал гардид.

Аз самтҳои муҳимтарини фаъолияти Ҳукумати Тоҷикистон ин таъсиси ҷойҳои нави корӣ барои мардуми кишвар мебошад. «Бо ин мақсад бахши хусусӣ, соҳибкории хурду миёна, бахусус соҳибкорони истеҳсолиро ҳамаҷониба дастгирӣ карда, касбҳои мардумӣ, ҳунарҳои дастӣ ва кори хонагиро инкишоф медиҳем, аз шаклҳои мавсимии шуғл самаранок истифода мебарем…» - таъкид гардид дар Паёми Пешвои миллат, Президенти кишвар Эмомалӣ Раҳмон ба Маҷлиси Олии мамлакат. Ин суханони Сарвари давлат моро баҳри он рўҳбаланд менамояд, ки минбаъд низ ҳарчи бештар занони хонашин ва духтаронро ба ҳунаромўзӣ, соҳибкории хурду миёна ҷалб намоем, то ки онҳо бо ҷомеа пайваста, соҳиби ҷойи кор гарданд ва инчунин, маблағ барои пешбурди рўзгор ба даст оваранд. Бояд гўям, ки сол то сол дар ноҳия сафи бонувони бо кор фарогирифташуда рў ба афзунӣ дорад. Зеро дар қаламрави ноҳия бештар гардидани боғоти мева ва токзор имкон фароҳам меорад, меваҳои шаҳдбори Тоҷикистони азизамон ба хориҷа содирот карда шавад ва аз ин рў, бонувон ба корҳои мавсимии корхонаҳои коркард, аз ҷумла, ғунучини ҳосили мева, бандубасти хушкмева, ҷамъоварии ҳосили пахта ва дигар шуғлҳо фаро гирифта шаванд.

Обода АШЎРОВА,
мудири бахши кор бо занон ва
оилаи ноҳияи Ашт

Читать далее

Муқовимат бо терроризм ва экстремизм

Танҳо дар нимаи дуюми асри ХХ ва ибтидои асри ХХI дар қатори дигар проблемаҳо терроризм ва экстремизм ба проблемаи глобалии ҷаҳонӣ табдил ёфт. Терроризм аз рўи хусусияташ гуногун буда, дар давраи ҳозира дорои шаклу намудҳои гуногун мебошад. Таркиш, оташ задан, вайрону валангор кардани объектҳои махсусан муҳим, манзилгоҳҳо, куштор ва қасдан расонидани зарар ба саломатии шахсони алоҳида, рабудани одамон ва ба гаравгон гирифтан, таҳдиди куштан ва нобуд кардан, нисбати ходимони давлатӣ ва сиёсӣ, ташвиқоти терроризм, созмон додани ташкилотҳои террористӣ, кўмак кардан ба ташкилотҳои террористӣ ва ғайра аз зумраи шаклу намудҳои ин падидаҳои номатлуби ҷомеа мебошанд.

Ташвиқоти терроризм ва экстремизм, ки имрўз тариқи ҳама гуна васоити ахбори террористон, сомонаҳои интернетии ифротӣ, шабакаҳои иҷтимоӣ, рўзномаву маҷалла ва варақаву дастурҳои иғвоангез ва ба ҳамин монанд сурат мегиранд, сафи аъзоёни созмону гурўҳҳои террористӣ, аз ҷумла гурўҳи террористии бо ном “Давлати исломии Ироқу Шом”-ро афзудааст. Аз аксари шаҳрвандони давлатҳои дунё онҳо маҳз бо ҳамин роҳ сафи ҷангҷўёни хешро афзуда, ба як созмони махсусан ҷиноятпешаи хавфнок табдил ёфтанд.

Мутаассифона, зиёда аз 1100 нафар шаҳрвандони Тоҷикистон низ (бисёриашон бо зану фарзандони хеш) фирефтаи ана ҳамин таблиғоти онҳо гардида, сарсону саргардон дар мамлакатҳои бегонаанд.

Ҳодисаи кушта шудани як шаҳрванди Тоҷикистони муқими вилояти Хатлон, ки бо 7 фарзанд, ҳамсар ва хоҳару шавҳари хоҳараш озими Сурия гашта, баъди се моҳи ҷангиданаш дар ҳайати гурўҳи террористии “Давлати исломӣ” нобуд шудааст, барои мардуми мо бисёр нанговар мебошад. Ин рўйдодро расонаҳои хабарӣ таҳти мақолаи “Яке барои Ватан қурбон шуд, дигаре моро қурбон кард” ба нашр расонида, андешаҳои падари пиронсоли ўро аз кушташавии ду фарзандаш, ки яке дар муҳорибаҳои солҳои ҷанги шаҳрвандии Тоҷикистон дар ҳайати қувваҳои барқарорсозии сохти конститутсионӣ кушта шуда, дигаре дар ҷанги Сурия нобуд гаштааст, баён медорад. Андешаи “ҳоли духтару домод ва келину ҳафт набераам чӣ шуда бошад?” мўйсафедро ба бемории қалб гирифтор сохтааст.

Ин аст оқибати шомил шудан ба ин гуна гурўҳҳо ва фирефта гардидан ба афкору андешаи бегона! Пас чаро мо бар зидди ин падидаҳои нафратангез ва номатлуби замона мубориза набарем?

Имрўз дар Тоҷикистон тамоми имконот ва вазъияти муқовимат бо терроризм ва экстремизм фароҳам бурда, аз ҷомеаи шаҳрвандии мо онро тақозо менамояд, ки муборизаро бо ҳамаи имконот - чи бо қувва ва чи бо ақлу иродаи қавӣ бар ин зуҳуроти даҳшатафкан пурзўр намоем. Танҳо дар ҳолати дастаҷамъӣ, якдигарфаҳмӣ, Ваҳдату ягонагии миллӣ мо метавонем, амнияту осоиштагии хонадонамонро аз вуруди ғояҳои бегона ва ифротӣ, шомилшавии ҷавонон ба ҳизбу ҳаракатҳои террористиву экстремистӣ, гаравидани онҳо ба ин зуҳурот ҳифз ва дар амон нигоҳ дорем.

Каёнуш КАЛОНОВ,
омўзгори кафедраи
ҷомеашиносии ДИС ДДТТ

Читать далее

Ҳадаф: Ҳифзи саломатии модару кӯдак

Дар даврони соҳибистиқлолии кишвар соҳаи ҳифзи тандурустӣ низ рушд ёфта, сол аз сол шумораи муассисаҳои табобативу беморхонаҳо зиёд ва шароиту сатҳи хизматрасонии тиббӣ ба маротиб беҳтар гардидааст.

Чуноне огаҳӣ дорем, соли 2016 дар вилоят бо иқдоми Раиси вилоят Абдураҳмон Қодирӣ “Соли фарди солим” эълон гашта, баҳри дастгирии соҳаи беҳдошти сиҳатии омма чи аз ҷиҳати моддӣ ва ҳам таъминот бо таҷҳизоти техникӣ як қатор тадбирҳо амалӣ гардиданд.

Яке аз ҳадафҳои эълон доштани “Соли фарди солим” ин таъмиру тармими муассисаҳои табобатӣ маҳсуб меёфт. Ин буд, ки бо дастгирии роҳбарияти вилоят, аз ҷумла барои мутамарказонидани системаи гармидиҳии таваллудхонаи вилоятӣ ба миқдори 500 ҳазор сомонӣ маблағ ҷудо гардид. Соле қабл агар ҳамаи утоқҳои таваллудхона бо таҷҳизоти барқӣ гарм карда мешуд, алҳол бинои асосии шӯъбаи 2-юм, ки ба он таваллудгоҳ, ҳуҷраҳои пасазтаваллудӣ, шӯъбаи эҳёи навзодон, шӯъбаи эҳёи калонсолон ва амалиётхонаҳо дохил мешаванд, пурра ба системаи гармидиҳии марказонидашуда гузаронида шуданд.

Тибқи нақша, ин иқдом идома ёфта, шӯъбаҳои дигар низ марҳала ба марҳала ба ин намуди гармидиҳӣ насб карда шаванд.

Муовини сардухтур Наима Раҳимбоева оид ба ҷараёни рафти зимистонгузаронӣ ҳарф зада, изҳор дошт, ки дар таваллудхона ҳамаҷониба ба зимистонгузаронӣ омодагӣ дида, аз ҷумла генераторҳои пуршиддати муосир ҳамеша дар ҳолати омодагии фаврӣ қарор дорад. Аз оғози фасли сармо барои дастрас намудани ангишти хушсифат бо “Соҳибкори инфиродӣ Ахмедов” шартнома баста, ба миқдори зарурӣ ангишт, ҳамчунин ҳезум захира шудааст.

Воқеан, зимни азназаргузаронии шароити гармидиҳии шӯъбаҳои дар боло зикр шуда аён гардид, ки ҳамаи ҳуҷраҳои шӯъбаи дуюм ҳарорати гармии мӯътадил дошта, занону кӯдакон дар шароити хубу гарм зери назорати духтурон мебошанд.

Дар сӯҳбат ҷавонзани навтаваллудкарда Заррина Икромова арз дошт, ки 5 сол қабл барои таваллуди фарзанди нахустинаш ба ин муассисаи тиббӣ омада будааст:

- Солҳои пеш бинои ин муассиса бисёр ҳоли фарсуда дошту барои гарм кардани ҳуҷраҳо асосан аз таҷҳизоти барқӣ истифода бурда мешуд, ки на ҳама вақт дар фасли сармо гармии заруриро таъмин карда метавонист. Алҳол, шукр, бо амри тақдир, барои таваллуди духтарчаам боз ба ин макон омадам. Ободкориҳову шароити имрӯзаи таваллудхонаро дида, дар ҳайрат мондам. Бинои шӯъбаи асосии рақами 2-юм ва ҳуҷраҳо ҳарорати мӯътадил дошта, шароити беҳтарин барои занони ҳомила ва ҳам таваллудкунандагон муҳайё шудааст.

- Албатта, ҳамаи ин шароиту имконот самараи даврони соҳибистиқлолӣ буда, аз дастгирии Асосгузори сулҳу Ваҳдати миллӣ - Пешвои миллат, Президенти кишвар, мӯҳтарам Эмомалӣ Раҳмон маншаъ мегирад. Дар навбати худ мо, масъулину кормандони соҳа, ҷавобан ба ҳамаи ин дастгириҳо тамоми нерӯ ва малакаи худро баҳри солимии модару кӯдак, беҳтар намудани сифати хизматрасонии тиббӣ равона намудаем, - изҳор дошт Наима Раҳимбоева.

Лозим ба ёдоварист, ки таи ду сол инҷониб бо иқдоми неки Раиси вилоят Абдураҳмон Қодирӣ муассисаҳои тандурустӣ марҳала ба марҳала ба шабакаҳои гармидиҳии мутамарказонида гузаронида шуда истодааст. Аз ҷумла, дар давраи тирамоҳу зимистони солҳои 2015-2016 ба пуррагӣ дар Беморхонаи клиникавии бачагонаи вилоят чунин шабака аз нав барқарор гардид. Соли гузашта низ ин иқдом пайгирӣ шуда, гармитаъминкунии боз ду муассисаи тандурустӣ-Маркази микроҷарроҳии чашми вилоят ба пуррагӣ ва таваллудхонаи вилоятӣ қисман тариқи шабакаи гармидиҳии марказонидашуда сурат гирифт.

Мутахассисон изҳор доштанд, ки чунин тарзи гармидиҳӣ аз ҷиҳати иқтисодӣ ба сарфаи нерӯи барқ мусоидат намуда, аз ҷониби дигар, тарзи истифодабарии он бисёр қулай ва бехатар аст.

Бино ба гуфти Ҷаъфар Маматов –сармутахассиси Раёсати тандурустии вилоят, баҳри иҷрои қарори марбутаи Раиси вилоят Абдураҳмон Қодирӣ, фармоиши Вазорати тандурустӣ муассисоти тандурустӣ дар сатҳи кофӣ ба мавсими сармо омода шуда, нақшаи зимистонгузаронӣ 107 фисад таъмин гардидааст.

Ҷоизи қайд аст, ки таваллудхонаи вилоятӣ соли 1936 бунёд гардида, дорои 210 кати беморӣ мебошад. Соли 2013 бо дастгирии Пешвои миллат, Сарвари давлат Эмомалӣ Раҳмон ва роҳбарияти вилоят аз таъмири куллӣ бароварда, бо таҷҳизоти муосири тиббӣ ва ҷарроҳӣ муҷаҳҳаз гардонида шудааст.

Маъмурахон САМАДОВА,
“Ҳақиқати Суғд”

Читать далее

Ғояи муқаддаси миллӣ

Аз рӯзномаи "Ҳақиқати Суғд" матни Паёми Президенти Ҷумҳурии Тоҷикистон, Пешвои миллат, мӯҳтарам Эмомалӣ Раҳмон ба Маҷлиси Олии Ҷумҳурии Тоҷикистон, яъне ҳуҷҷати бароямон дастоварди бузургтарин ва ғояи муқаддаси миллиро бо шавқу ҳавсалаи том хонда баромадем. Паёми навбатии Сарвари давлат аз паёмҳои қаблӣ сарчашма гирифта, мазмуну мӯҳтаво ва раванди пешрафти ҷомеаи муосири моро дар марҳалаи нави рушд бозгӯй аст.

Агар ба мундариҷаи Паёми 20-уми январи соли 2016 ироашуда зеҳн монем, равшан эҳсос мегардад, ки он барои тамоми мардуми тоҷик соли ҳадафҳои олӣ, соли таъмину таҳкими рушди сиёсиву иқтисодӣ ва иҷтимоиву фарҳангии кишвар, соли сабақтакроркунии корҳои таблиғоту ташвиқот, соли азназаргузарониҳои бозёфтҳои маънавӣ гардид. Паёми навини 22-уми декабри соли 2016 бошад, ин самтҳои тозаву нотакрори пешрафти босуботи иқтисодиёт, беҳтар намудани сатҳи зиндагии мардум, суръат бахшидани корҳои бунёдкориву созандагӣ, татбиқи ислоҳоти фарогир дар ҳамаи соҳаҳо, ҳимоя ва пойдору устувор мондани Истиқлолияти давлатии кишвар, маънавиёти ҷомеа ва пурбақо нигоҳ доштани пояҳои Ваҳдати миллӣ, зиракиву ҳушёрии сиёсии мардумони Тоҷикистонро раҳнамун ва роҳбалад мегардад. Ҳар кас дар пеши оинаи ҳаёти имрӯз дастуру ҳидоятҳои Пешвои миллат худро месанҷад, ҳусн ва қубҳи хешро боз як бори дигар муайян мекунад ва яқин медонад, то ки нерӯи дили худро афзун намояд ва он ҳуснеро, ки ба ӯ ҳаёти соҳибистиқлолӣ ва халқи тоҷик додааст, афзун намояд. 

Ҳамаи он кору пайкорҳо, азму талошҳо ва нияту орзуҳои нек як бори дигар тасдиқ карданд, ки миллати тоҷик дар роҳи сиёсати оқилонаву хирадмандонаи Пешвои миллат, дар роҳи шӯълаи Паёми Президенти Ҷумҳурии Тоҷикистон боз ҳам равшангардидаи ҳаёти мо бо имони комил раҳсипор аст. Аммо бо вуҷуди ин қайд карда шуд, ки навбати саъю талошҳои нави созандагӣ ва ҳадафҳои афзалиятноки мо расидааст. Ҳадафҳо сифату мазмуни ҷадид касб карда, асоси онҳоро гузаштан аз таъмини истиқлолияти энергетикӣ ба истифодаи самарабахши нерӯи барқ, аз бунбасти коммуникатсионӣ баромада, ба кишвари транзитӣ табдил ёфтан ва таъмин намудани амнияти озуқавориву дастрасии аҳолӣ ба ғизои хушсифат ташкил медиҳад.

Дар маҷмӯъ, ин ифодаҳоро се ҳадафи стратегии миллӣ аз ҷиҳати мазмун ғанӣ мегардонад.

Сиёсати иҷтимоии оқилонаи Пешвои миллат барои баланд бардоштани самаранокии истифодаи захираву имкониятҳо дар ҳамаи соҳаҳои ҳаёти иқтисодиву иҷтимоӣ роҳандозӣ мешавад, ки инкишофи устувори кишварро дар шакли индустриалӣ ва инноватсионӣ дар худ таҷассум менамояд. Ин дар навбати худ чун сарчашмаи таҳкими иқтисоди миллии Тоҷикистон зуҳур меёбад. Ин муваффақият, ин пешрафти шоистаи даврон, ки паси ҳар як рақам, дар паси ҳар як иншоот, дар паси ҳар як навигарии диёрамон, аз он ҷумла вилояти Суғд истодааст, шаҳодати шуури баланди мардуми ҳар манотиқи кишвар, шаҳодати ҳадафҳои стратегии ҷомеаи муосири мо мебошад.

Имрӯз ҳар як сокини кишварамон аз ташаббуси Ҳукумати Тоҷикистон ва пешниҳоди Президенти Ҷумҳурии Тоҷикистон, Пешвои миллат, мӯҳтарам Эмомалӣ Раҳмон дар бораи «Даҳсолаи нави байналмилалии амал «Об-барои рушди устувор, 2018-2028», ки аз ҷониби Маҷмааи Умумии Созмони Милали Муттаҳид қабул гардидааст, фараҳманду сарбаланд мебошад. Бо ифтихори ҳаққонӣ гуфта метавонад, ки дар иҷрои ин вазифаи муҳими давраи наздик бо масъулияти том саҳм мегузорад. Кору пайкори хешро дар ин маҷро ҳамроҳ намудан аз ҳар ҷиҳат шоиста медонад, зеро ба қадри ин ҳадафи бузурги сиёсиву иҷтимоӣ тавонистанд бирасанд, ба шарафи он тавонистанд ҷону дили худро мувофиқ бикунанд, ба даъвати аслӣ тавонистанд пеш раванд.

Ҳамин тавр, раванди «Даҳсолаи байналмилалии амал «Об – барои рушди устувор, 2018-2028» дар дил ва дар мазмуни ҳаёти онҳост!

Дар Паёми Сарвари давлат ҳадафҳои олии халқи тоҷик ҳамчун пойдевори ҷомеаи муосири миллат баён гардиданд, ки маънои дастуру супоришҳои имрӯзаро бозгӯй менамояд. Ҳар сатр, ҳар нуктаи Паём, пеш аз ҳама, ба ҳифзи сулҳу субот, Ваҳдати миллӣ, ҳимояи Истиқлолияти давлатӣ ва дастовардҳои миллати тоҷик равона гардида, вазифаҳои навбатиро мушаххас менамояд. Паёми навбатӣ- ин паёми миллӣ, ин машъали ибрат ва намунаи хизмат мебошад. Пас месазад, ки ҳар фарди дилогоҳу худшинос ва соҳибмаърифат онро ҳамаҷониба биомӯзад, дар роҳи кору пайкораш, иҷрои вазифаҳои хизматиаш такя бар он бинамояд. Паём таҳкимбахши серию пурӣ ва осудаҳолӣ, воситаи хушбахтӣ ва илму маданият, ахлоқу тарбият аст.

Пешвои миллат таъкид намуданд ва супориш доданд, ки омӯзиши ҳатмии Конститутсияи Ҷумҳурии Тоҷикистон ва ҳамчунин, қонунҳои Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» ва «Дар бораи масъулияти падару модар дар таълиму тарбияи фарзанд» бояд дар барномаҳои муассисаҳои таълимӣ ба роҳ монда шавад. Конститутсия ин қутбнамои давлат ва миллат буда, нишон аз соҳибдавлатист. Дар даврони соҳибистиқлолӣ ду қонуни соф миллӣ ба арсаи ҳаёт ворид гардид. Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» ин қонуни миллӣ буда, ба раванди манфиати мардум нигаронида шудааст, мизони иҷтимоиёт, ҳаёти босаодат ва рӯзгори шавқафзо таҷассум ёфтаанд. Қонуни дигари миллии Тоҷикистони соҳибистиқлол ин «Дар бораи масъулияти падару модар дар таълиму тарбияи фарзанд» маъруфият пайдо кардааст. Ҳар нуктаи он ахлоқи ҳамида, одоби пурмаънӣ, одамият, ҳамият ва маъсулияту шарафмандиро талқин менамояд. Аз ин лиҳоз, омӯзиши ҳамин се ҳуҷҷати барҷаставу муҳим барои ҳар як аъзои ҷомеаи имрӯз ҳам шарт асту ҳам фарз.

Мегӯянд, ки ободонии манзилу макон, дар маҷмӯъ тамоми кишвар ҳам, пеш аз ҳама, вобаста ба сабзиши худи маҳал ва одамони он аст, ки муваффақияти калону хурди иқтисодии он бо худ ба ин диёр хонаи нав, боғи нав ва даҳҳо сохтмони нави замонавии дигар меорад. Ба туфайли раванди созандагӣ ва ободонӣ, ташаббусҳои нав ба нав, ки ҳама бар манфиати ҷомеа ва шаҳрвандонанд, рӯзгори ҳар сокини кишвари азизи тоҷикон рӯз аз рӯз зеботар, фаровонтар, ободтару сурурбахштар шуда истодааст.

Ба маркази вилоят, марказҳои шаҳру ноҳияҳо, ҷамоату шаҳракҳо агар як назар афканем, равшан бо чашми дил мебинем: дар гирду атрофи ҳамон мавзеъҳо қариб ҳар рӯз як сохтмони наве сар бардошта, ҷойҳои холию ноободи он маҳалҳоро пур карда истодааст. Дар ин самт аз Паёми Пешвои миллат илҳоми тозае эҳсос менамоем: «Ҳоло бо сармояи давлатӣ ва шарикони рушд беш аз 70 лоиҳа дар ҳаҷми 22 миллиард сомонӣ дар соҳаҳои гуногуни иқтисодиёт ва 7 лоиҳа бо ҷалби сармояи мустақими ватаниву хориҷӣ ба маблағи зиёда аз 11 миллиард сомонӣ барои сохтмону таҷдиди 12 корхонаи саноатӣ амалӣ карда шуда истодааст».

Паёми Президенти Ҷумҳурии Тоҷикистон, Пешвои миллат, мӯҳтарам Эмомалӣ Раҳмон дар пешвоз ва дар остонаи ҷашнҳои дигари миллиамон – 20-солагии Ваҳдати миллӣ ва баъди таҷлил гардидани 25 –солагии Истиқлолияти давлатӣ ба самъи мардумонамон расонида шуд, ки ин файзу баракат ва худшиносиву худогоҳии чи хурдсолу чи бузургсолро ба бор меоварад. Ифодаҳои «Ваҳдат» ва «Истиқлолият» дар ҳаёти меҳнатӣ ва мадании мардуми тоҷик тарғибгару ташвиқгари беҳтарине гардидаанд, ки мислу монандашро дар миёни ахборотчиён ёфтан амри маҳол аст. Онҳо ҳам ифодаҳои миллианд, дар хатти пешрафти кишвар ва мардумон дар давоми ҳамин қадар сол на танҳо ягон бор нашикастааст, балки ягон бор хам ҳам нагардида, муттасил ба боло нигарон асту боло меравад. Ваҳдат ва Истиқлолият сарчашмаи ҳидоятҳои Пешвои миллат, раҳнамо ва қутбнамои ҳаёти босаодатанд, ки дар партави онҳо фидокорӣ накардан айб аст, ҷасорат ва ғайрат нишон надодан, бемуболиға, гунаҳ аст. Моро сатрҳои Паём нерӯмандии хоса мебахшанд: «Зеро озодиву Истиқлолият бароямон дастоварди бузургтарин ва ғояи муқаддаси миллӣ буда, мо бо вуҷуди мушкилоти ҷойдошта барои ҳимоя ва пойдору устувор мондани он минбаъд низ тамоми саъю талоши худро равона месозем ва ин неъмати бузурги миллатамонро чун гавҳараки чашм эҳтиёту ҳифз мекунем».

Бигузор, чашми ақл ва дидаи дили пурҳарорат бубинад, ки ҳамаи кору пайкори мардуми тоҷик дастҷамъона, аҳлу тифоқона, дар фазои ҳамдигарфаҳмӣ корҳо ба хотири таҳкими пояҳои Истиқлолияти давлатӣ ва Ваҳдати миллӣ анҷом дода мешаванд.       

Паёми Пешвои миллат, ки ҳар сатру нуктаи он саршор аз ҳадафҳои афзалиятноку олист, ба сони дарёест, ки обаш ширину мусаффост. Ҳар он касе, ки эътимоди қавӣ ба кору манфиати умум ва ҷомеа дорад ва аз он бо нерӯи ақлонии хеш дурри мақсуд мечинад, қувваи тоза мебахшад. Паём бозгӯй аз нишони давлату давлатдории миллӣ ва ҳастии миллати ободкору тозакор аст. Ҳар сатр ва нуктаҳои саршор аз ҳидоятҳои олии дар Паём сабт ва ифодагардида мисли марҷоне мебошанд, ки ҳар донаи он қимати ҳаёти босаодат, рӯзгори пурсафост. Чунонки дар Паём зикр шудааст: «Музди миёнаи меҳнат дар 20 соли охир 60 баробар ва андозаи миёнаи нафақа 85 баробар афзуд. Ҳамаи ин боиси се баробар паст шудани сатҳи камбизоатӣ гардид».

Биёед, як дақиқа тасаввур кунем, ки дар даврони соҳибистиқлолӣ кишвари тоҷикон борҳо ба марҳалаҳои мушкилу сангин пеш омад, онҳоро паси сар намуд, аз ҳолатҳои хеле вазнин сарбаландона баромад. Бо азму ғайрати беҳамто ва нерӯмандии халқпарварии Пешвои миллат хатари нестшавии давлат ва пароканда гардидани миллат бартараф карда шуд, ки ин неъмати миллӣ барои ҳар сокини мамлакат ба ҳисоб меравад.

Нақшаҳои неку созанда ва дастуру ҳидоятҳои Сарвари давлатамон моро рӯҳу нерӯи тоза мебахшанд. Меҳнати якҷоя, тартиби хирадмандонаи кору пайкор, зисту зиндагонӣ дар даврони соҳибистиқлолӣ имконият дод, ки мардум фаъолу боибтикор шинохта шаванд.

Маҳз, самараи Паёми Пешвои миллат, сиёсати оқилона ва ҳидоятҳои бунёдии Сарвари давлатамон мебошанд, ки ташаббусҳои нав ба нави мардуми ободкори диёрамон меваҳои назарбин меоваранд, аҳамияти таърихӣ пайдо мекунанд, орзуҳои ширини хурдсолону бузургсолон ба парвоз меоянд.

Масъалаи дигар. Дар Паёми худ Пешвои миллат зикр намуданд, ки «тибқи Барномаи рушди боғу токпарварӣ майдони боғу токзори мамлакат ба 180 ҳазор гектар расонида шуд, ки нисбат ба соли 1991-ум қариб 100 ҳазор гектар ё 2 баробар зиёд буда, дар ҳифзи амнияти озуқавории кишвар, рушди содирот ва таъмини саноати коркард бо ашёи хом нақши арзишманд гузошт».

Дар ин раванд ба хотир меоварем: боғи интенсивии ниҳолони мевагии шаҳраки бунёдшудаистодаи Сайҳун дар мавзеи дашти Сомғор низ аз он шаҳодат медиҳад, ки муроду мақсади фарзанди инсон охир надорад. Бо ҳидояту роҳнамоии Пешвои миллат Эмомалӣ Раҳмон, ташаббус ва иқдоми бевоситаи Раиси вилоят Абдураҳмон Қодирӣ шаҳраки Сайҳун дар харитаи ҷуғрофии кишвар мавқеъ ва ҷойи худро бигирифт. Боғи он дар тобистони соли 2016 ҳосил ба бор овард, дарахтони зардолуву шафтолуяш меваҳои шаҳдрез доданд, дар замини зери қаторҳои дарахтонаш тарбузҳои алвониву шаккарин рӯиданд. Корҳои нек вобаста ба дараҷаи маданияту маърифати инсон пеш мераванд. Дар инҷо фарҳангу маърифати созандагӣ, ободкорӣ, аз замин ҳосилгирӣ, ҷорӣ шудану сафобахшии оби Сирдарё дар Сайҳун ҳамдам ва ҳамқадам мебошанд, парвози орзуҳо муназзаманд. Дар мавзеи Сайҳун ва боғи он аз сарчашмаҳои об орзуву ниятҳои нек меоянд, оби ҳаёт ба маҷрои амал равон аст. Бигузор, вай ҳаёт диҳад, пешрафти иқтисодӣ, илмӣ-маърифатӣ ва фарҳангии мардум маҷро дошта бошад.

Оташи муҳаббат дар қалби мардуми бунёдкори мо пурҳарорат, фурӯзон ва мунтазам аст. Бинобар ҳамин интизор шуда нишастани мо, ки аз ягон ҷойи дигар одамон биёянду созандагиву ободгарӣ кунанд, ба мо ҳаргиз намезебад. Мардуми тоҷик аз қадим меҳнатӣ буду имрӯз ҳам чунин аст. Дар дилу ният ва орзуву ҳаваси онҳо меҳнати созандаву ободкор бо тамоми хислатҳои наҷибаш реша давондааст. Онҳо барои меҳнатобод, ҳуснобод кардани ҳар минтақаву мавзеи кишвари худ пайваста камар мебанданд. Мардуми тоҷикро пояҳои устувори Истиқлолияти давлатӣ, ки неъмати муқаддастарин ва бузургтарин мебошад, барои ноил гардидан ба дастовардҳои нав ба нав нерӯмандӣ ва Паёми Пешвои миллат ба сарчашмаи ташаббус, созандагиву бунёдкорӣ қудрат мебахшад.

Паём нақшаи хирадмандона аст, рӯзгорамонро обод, маданӣ, пурфараҳ мегардонад, ҳамасола ҳаётамонро боз ҳам мувофиқтар месозад. Миллати тоҷик ватандорони ин кишвар ҳастанд, обод кардани диёр ба зиммаи мардуми худогоҳи кулли Тоҷикистон аст. Ҳар яки мо дар ин кори хайр худро бояд ҷавобгар ҳис намоем!

Аҳрорҷон УБАЙДУЛЛОЕВ,
устоди кафедраи педагогикаи умумии Донишгоҳи давлатии Хуҷанд ба
номи академик Бобоҷон Fафуров.
Файзулло АТОХОҶАЕВ,
Аълочии матбуоти Тоҷикистон.

Читать далее

06 January 2017

Эътимоди қавӣ ва қадамҳои устувор

Дар арафаи Соли нави мелодӣ ироа гардидани Паёми Пешвои миллат, Президенти мамлакат, Ҷаноби Олӣ, мўҳтарам Эмомалӣ Раҳмон ба Маҷлиси Олии Ҷумҳурии Тоҷикистон басо рамзист. Паёми Пешвои миллат як навъ ҷамъбасти роҳи тайкардаи мардуми шарифи Тоҷикистон дар давоми бисту панҷ соли соҳибистиқлолӣ ва муайян намудани самтҳои минбаъдаи рушду нумўи кишварамон мебошад.

Рушду такомули соҳаҳои калидии иқтисодиёт ва иҷтимоиёти мамлакат бо фаъолияти мақомоти молия вобастагии бевосита дорад. Рисолати асосии кормандони мақомоти молия пешбурди сиёсати молиявӣ дар маҳал, дар асоси дурнамои рушди иқтисодиву иҷтимоии вилоят ва маҳал таҳия намудани дурнамои буҷету андоз ва лоиҳаи буҷет барои соли навбатии молиявӣ, баҳисобгирии ҳамаи манбаъҳои мавҷудаи даромади буҷет, саривақт маблағгузорӣ намудани хароҷотҳои дар буҷет пешбинишуда, назорати риояи интизоми молиявӣ ва истифодаи самараноки маблағҳои буҷетӣ дар ташкилоту муассисаҳое, ки аз буҷетҳои маҳаллӣ маблағгузорӣ мешаванд ва дигарҳо иборат аст. Соли 2016 бо вуҷуди он, ки вазъи иқтисодӣ дар бисёр кишварҳои олам ноустувор гардида, ин вазъ ба иқтисодиёти мамлакати мо низ бетаъсир намондааст, амалигардонии Барномаву чорабиниҳои зиддибўҳронии қабулнамудаи Ҳукумати ҷумҳурӣ имкон дод, ки дар қаламрави вилоят таъсири бўҳрони молиявию иқтисодӣ то андозае коҳиш дода шуда, нишондиҳандаҳои асосии макроиқтисодӣ дар сатҳи мўътадил қарор гиранд. Аз ҷумла, дар вилоят ҳаҷми истеҳсоли маҳсулоти саноатӣ, кишоварзӣ, гардиши савдои чакана ва дигарҳо нисбат ба ҳамин давраи соли гузашта афзоиш ёфтанд. Дар натиҷаи ҳамоҳангсозии фаъолияти мақомотҳои молия, андоз ва дигар сохторҳои иқтисодии вилоят нақшаи пешбинишудаи қисми даромади буҷети умумии вилоят нисбат ба соли сипарӣ зиёд таъмин гардид.

Бо назардошти пурраву барзиёд таъмин гардидани нақшаи қисми даромади буҷетҳои маҳаллӣ дар вилоят солҳои охир корҳои созандагиву ободонӣ дар партави дастуру ҳидоятҳои Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмон вусъати тоза гирифтанд. Танҳо дар соли ҷашнгирии 25-солагии Истиқлолияти давлатии Ҷумҳурии Тоҷикистон даҳҳо муассисаҳои маъмурӣ, маориф, нигаҳдории тандурустӣ, фарҳанг ва дигарҳо аз ҳисоби маблағи Мақомоти иҷроияи ҳокимияти давлатии вилоят сохта, ба истифода дода шуданд.

Дар Паёми хеш Президенти мамлакат ҷиҳати таъмин намудани рушди минбаъдаи кишвар, иҷрои афзалиятҳои миллӣ ва дар ин асос баланд бардоштани сатҳу сифати зиндагии мардум барои давраҳои миёнамўҳлат ва дарозмуддат ва қабул гардидани «Стратегияи миллии рушди Ҷумҳурии Тоҷикистон барои давраи то соли 2030» таъкид доштанд.

Дар радифи дастуру ҳидоятҳои Президенти кишвар кормандони мақомоти молияи вилоят бо шинохти эҳсоси масъулият дастоварди бузурги даврони соҳибистиқлолӣ - давлатсозӣ ва давлатдории муосири миллӣ, таъмини сулҳу суботи комил ва Ваҳдати пойдори миллӣ, рушди устувори иқтисодиву иҷтимоӣ дар тарғибу пешбурди ин сиёсат ҳамқадами замон ҳастанд ва шукрона аз ин муқаддасоти ҷовидона намуда, онро монанди гавҳараки чашм ҳифз менамоянд.

Ҳоло ки Соли нави мелодии 2017 фаро расидааст, аз фурсати муносиб истифода бурда, мардуми шарифи вилоятро аз номи мақомоти молияи вилоят бо Соли нав табрику муборакбод намуда, ба ҳар як хонадони вилоят дастархони пурфайзу бобаракат, саодати рўзгор, бахту иқболи баланд таманно менамоям. Бигузор, Соли нави мелодӣ ба ҳар оила хурсандӣ, шодмонӣ ва барору комёбиҳо орад.

Анвар МИРЗОЗОДА,
сардори Сарраёсати молияи вилояти Суғд,
Аълочии молияи Ҷумҳурии Тоҷикистон

Читать далее

Боварии комил дар таҳкими саломатӣ

Чанд рўз аст, ки соли 2016 дар саҳифаи таърих сабт гардид. Соли пурбор, ки буд, дар ҳаёти мардум, ҷомеаи меҳнатӣ нақше гузоштааст носутурданӣ. Дар ин замина аз сўҳбат бо сардухтури Беморхонаи клиникавии вилоят, Аълочии тандурустии Тоҷикистон Собирҷон Собиров дарёфтем, ки ҷомеаи табибони ин шифохона соли рафтаро бо нишондиҳандаҳои арзандаи меҳнатӣ ҷамъбаст намудаанд. Собирҷон Собиров чунин ибрози назар кард:

- Ман бо камоли боварӣ гуфта метавонам, ки соли сипаришудаи 2016-ум дар ҳаёти ҷомеаи меҳнатии мо нақши муассир гузошт. Хусусан, ки соли 2016-ум бо иқдоми Раиси вилоят, мўҳтарам Абдураҳмон Қодирӣ Соли фарди солим эълон шуда буд. Агар суханамро дар асоси рақамҳо ва нишондиҳандаҳои касбӣ шарҳу эзоҳ диҳам, пас мо давоми сол зиёда аз 20 ҳазор беморонро барои табобат қабул кардем. Наздик 7 ҳазор нафар беморонро ҷарроҳони соҳибкасби мо бомуваффақият ҷарроҳӣ намуда, ба дардашон шифо бахшиданд.

Яке аз бандҳои асосии Барномаи Соли фарди солим таъмини муассисаҳои табобатӣ бо таҷҳизоти муосири тиббӣ буд, ки бо дастгирии Мақомоти иҷроияи ҳокимияти давлатии вилоят ба мо муяссар гардид, ба маблағи зиёда 570 ҳазор сомонӣ таҷҳизоти ҳозиразамони ҷавобгўй ба талаботи ҷаҳон харидем, ки он ба беҳтаршавии ташхису табобат аз ҳар ҷиҳат мусоидат кард.

Ҳамчунин, дар доираи татбиқи Барномаи зикргардида як қатор корҳои таъмиру тармим ба ҷо оварда шуданд. Дар ин самт 2 млн. 950 ҳазор сомонӣ маблағ сарф гардид, ки ба ободии мавзеи беморхона ва шўъбаҳо мусоидат кард. Ихтисоси худро баланд бардоштани 24 нафар табибону ҳамшираҳои шафқат ба беҳтаршавии корҳои табобатӣ таҳким бахшид.

Ногуфта намонад, ки Паёми Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмонро ҷомеаи табибону кормандони миёнаи тиббӣ дар маҷлисгоҳи беморхона тавассути оинаи нилгун тамошо карданду шуниданд. Ба фикри ман, ироаи Паём аз ҷониби Пешвои миллатамон як андоза ҷамъбасти фаъолияти соҳаҳои хоҷагии халқи мамлакат дар соли 2016 ва дастуру ҳидоятҳои созанда барои Соли нави 2017 буд.

Дуруст аст, ки дар Паёми хеш Сарвари давлат марбут ба фаъолияти мо-табибон низ фикру мулоҳизаҳои таҳлилии худро баён доштанд. Аз ҷумла, изҳори нигаронӣ кардани Пешвои миллат аз «ворид шудани маводи дорувории қалбакӣ ва ба талабот ҷавобгўй набудани он на танҳо дар Тоҷикистон, балки дар бисёре аз кишварҳои дунё мавриди нигаронӣ қарор дорад», беасос нестанд. Боиси тазаккур аст, ки дар вилоят Раёсати Хадамоти назорати давлатии фаъолияти фармасевтӣ амал мекунад ва мутахассисони соҳибтаҷрибаи он баҳри пешгирӣ намудани воридшавии дорувориҳои қалбакӣ чораҳои мушаххас меандешанд. Лекин дар навбати худ мо-табибонро низ зарур аст, ки нисбати ислоҳи ин вазъият дастаҷамъона корбарӣ кунем, то ки амнияту саломатии мардум таъмин гардад.

Ниҳоятан, баробари ҷамъбасти самараноки Соли фарди солим дар соли 2017 мо аҳд кардем, ки бо пайравӣ ба ташаббусу иқдомҳои созандаи Пешвои миллат ва Раиси вилоят тамоми чораҳоро меандешем, то ки рисолати азалии худ-таъмини саломатии мардумро сарбаландона ба анҷом расонем.

Дар ин самт ҳамчун духтур аз иқдоми навбатии Пешвои миллат оид ба Даҳсолаи нави байналмилалии амал «Об – барои рушди устувор, солҳои 2018-2028» ва дар ин замина ташаббуси бунёдии Раиси вилоят дар хусуси соли 2017 дар вилоят эълон гардидани «Соли дастрасии аҳолӣ ба оби тозаи нўшокӣ» илҳоми касбӣ гирифтам, зеро об ин зиндагӣ, шукуфоии ҳаёт ва саодатмандии мардум аст.

Бо истифода аз фурсати муносиб аз номи табибони вилоят кулли ҳамватанонро бо фарорасии Соли нави мелодии 2017 табрику таҳният гуфта, хоҳони саломатӣ, бахту саодат ва барору комёбиҳояшон ҳастам.

 Мусоҳиб
Абдуғафур Аминзода,
“Ҳақиқати Суғд”

Читать далее