January 2017

06 January 2017

Муштариёни «Ҳақиқати Суғд» ба беш аз 8 ҳазор нафар расид

Теъдоди муштариёни нашрияи Мақомоти иҷроияи ҳокимияти давлатии вилояти Суғд - рӯзномаи вилоятии «»Ҳақиқати Суғд» дар соли нави 2017 ба беш аз 8 ҳазор нафар расид, ки дар солҳои охир басо назаррас  аст. Зеро ду – се сол қабл теъдоди муштариёни рӯзномаи вилоятӣ 5-6 ҳазор нафарро ташкил медод.

Зиёд шудани теъдоди хонандагони нашрия бо дастгирии мақомоти иҷроияи ҳокимияти давлатии вилоят, шаҳру ноҳияҳо, кормандони КВД «Почтаи тоҷик» дар вилоят ва фаъолияти хуби аҳли эҷоди рӯзнома амалӣ гардид.

Ба рӯзномаи вилоятии «Ҳақиқати Суғд» бештар сокинони шаҳру ноҳияҳои Бобоҷон Ғафуров, Исфара, Хуҷанд, Ашт, Бӯстон, Гулистон, Истиқлол ва Айнӣ обуна гардиданд.

Тибқи иттилои сармуҳаррири рӯзнома Мухтори Абдулло алҳол нашрияи мазкур ҳафтае се маротиба нашр гардида, дар он наздик 30 нафар кормандони эҷодиву техникӣ фаъолият доранд. Ба хонандагони рӯзнома бештар саҳифаҳои махсуси «Минбари Шумо», «Сафинаи Сайҳун», «Меҳрпайванд», «Розу ниёзи мардум», «Чаманоро», «Ҳикмати Сино», «Рӯҳафзо» ва «Ҳунар беҳ аз симу зар» писанд аст.

Зикр бояд дошт, ки рӯзномаи вилоятии «Ҳақиқати Суғд» яке аз аввалин нашрияҳои ҷумҳурӣ маҳсуб ёфта, соли 1930 таъсис ёфтааст. Соли 2015 тибқи қарори Раиси вилояти Суғд Абдураҳмон Қодирӣ 85 – солагии таъсисёбии рӯзнома дар сатҳи баланд таҷлил гардида буд.

Хадамоти матбуоти
Раиси вилояти Суғд

Читать далее

Бетарафӣ ва ё бемасъулиятӣ?

Шаҳри Хуҷанд яке аз шаҳрҳои калонтарини кишвар ба ҳисоб меравад. Шаҳрест, ки ҳамарўза ҳазорҳо нафар сайёҳони хориҷиву дохилиро ба ҳузур мепазирад.

Бо вуҷуди он ҳама пешравиҳо ва тараққиётҳо ҷойҳоеро вохўрдан мумкин аст, ки ҳусни шаҳрро доғдор менамояд. Масалан, дар маркази шаҳр, воқеъ дар наздикии гузаргоҳи зеризаминии «Универмаг» ё худ кўчаи Раҳмон Набиев роҳравҳоеро вохўрдан мумкин аст, ки сафолакҳояшон шикаста, барои роҳравон халал ворид менамоянд.

Гуфтан ҷоиз аст, ки кўчаи мазкур дар марказ ҷойгир буда, аз як тараф сайёҳоне, ки барои тамошои Маҷмааи таърихию фарҳангии «Қалъаи Хуҷанд» мераванд, аз ҷониби дигар бошад, сокинон ва меҳмононе, ки мехоҳанд, барои тамошои консерт ва ё дигар намоишномаҳо ба Театри Камоли Хуҷандӣ ва «Маркази ҷавонон» - и ба номи Лоиқ Шералӣ раванд, аз ин кўча гузар менамоянд. Роҳрави мазкур чанд вақт инҷониб, дар ҳамин ҳолат қарор дорад.

Масъулин мебоист кайҳо аз пайи ислоҳ мешуданд, шояд аз ин макон гузар кардаву чашмонашон ба ин ҳолат наафтода бошанд? То имрўз ҳамон сафолакҳои шикаста ва чуқуриҳои ба чашм баръало намоён истодаанд.

Ҳолати дигареро қайд намудан лозим аст, ки дар ҷўйбори назди истгоҳи «Универмаг» бо баробари ифлосиҳои зиёд ҷамъ шудан аз худ ҳар гуна бўйҳои ғализро хориҷ мекунанд. Ин ҳолат табъи шаҳрвандонро тира мегардонад. Барои ислоҳи чунин камбудиҳо масъулинро мебояд, аз чунин ҳолатҳое, ки дар шаҳр мавҷуд аст, бохабар гардида, барои бартарафсозии он тадбирҳои саривақтӣ андешанд!

Истамҷони НАҶМИДДИН,
"Ҳақиқати Суғд"

Читать далее

Ба ҳар духтару зан зебанда атласу адрас

Чанд сол қабл тақозои вазифа бо Сафири Иёлоти Муттаҳидаи Амрико дар Тоҷикистон Стэнли Эскудеро муҳовара оростам. Сафир соати вохўриро муайян намуд, вале чун ҳозир шудам, ў набуд. Гуфтанд, ҳозир омада мемонад.

Сафир омад ва боиси дермониашро шарҳ дода гуфт, барои дастрас намудани сўзанӣ намунаи ҳунари миллии тоҷикон рафта буд ва бо як ҳисси шодмониву эҳтироси баланд онро кушода, ба ман нишон, дод: -Сўзанӣ бо нақшу нигори хуҷандӣ, дар ҳаҷми 1х1 метр бо эъҷози дастони бонуи маъруфи ҳунарманд Зулфия Баҳриддинова офарида шуда буд. Ҳарчанд дар рў ба рўи мани, як ҷурналисти оддӣ сафири мамлакати ИМА менишаст, вуҷудам бо эҳсоси ифтихор аз тоҷик будан, аз он, ки мардуми мо соҳиби чунин ҳунарҳои воло аст, лабрез гашт. Минбаъд шоҳиди он гардидам, ҳамсари сафир, ки ба ҳайси устоди Донишгоҳи миллии Тоҷикистон дар сарзамини мо фаъолият мекард, доимо дар бар пероҳан аз атласи рангобаранги тоҷикӣ дошт…

Чун огаҳ шудам, Стэнли Эскудеро зодаи штати Калифорнияи Иёлоти Амрико аст, ду фарзандаш-духтараш дар иёлоти Мичиган ва писараш дар зодгоҳаш Калифорния зиндагӣ доранд. Вай сиёсатмадор, мухлис ва донандаи хуби фарҳанг ва забони форсӣ буда, муддати даҳ сол сафири ИМА дар Ҷумҳурии Исломии Эрон буд.

… Аз байн муддати зиёде нагузашта буд, ки бо дастуру супориши Президенти мамлакат, бо ибтикори Раиси вилоят ба ҳунарҳои миллии мардумамон арҷ гузошта, ба рушду такомули он роҳи васеъ кушода шуд. Инак, имрўз зебу ҳусни шаҳру деҳот, хиёбону гулгаштҳо, кўчаву маҳаллаҳои вилоятамон занону духтарони атласу адрас ба баранд!

Меҳмононе, ки дар соли ҷашн, дар рўзҳои ҷашн ба сарзамини мо меомаданд, на танҳо аз ободиву бунёдкориҳо, балки аз тобишу ҷилои атласу адраси дар бари бонувонбуда низ мафтун мешуданд. Ба қавле, қуллаи баландтарини намоиши эъҷози дастони бонувони ҳунарманди вилоят ин баргузории Фестивали вилоятии «Атласу адраси Суғд-2016» буд, ки охири моҳи октябр доир гардид. Ба ин чорабинӣ бонувони гулдаст тамоми ҳунари худро намоиш дода, нақшу нигорҳои атласу адраси қадима, дуранга, ҳафтранг, ҳамчунин либосҳои идона, рўзмарра, расмӣ, бачагона аз матои атласу адрасро бо истифода аз дизайни либосороӣ, тобиш ва обуранг, истифодаи ҳунарҳои гулдўзӣ, қуроқдўзӣ, интихоби ашёи ороиш ва пардозро пешкаши бинандагон намуданд. Меҳмонон аз мамолики Ҳиндустон, Эрон, Амрико, Покистон, Арабистон, Канада ва дигар кишварҳои олам ба ҳунари дастони бонувони тоҷик аҳсан хонданду вола гаштанд.

Роҳи васеъ кушодан баҳри рушду такомули ин ҳунарҳо имкон фароҳам овард, ки дар тамоми шаҳру навоҳии вилоят Марказҳои ҳунаромўзӣ таъсис ва бонувони хонашин бо ҷойи кор фаро гирифта шаванд. Феълан дар вилоят 159 марказҳои таълимӣ-истеҳсолӣ фаъолият бурда, дар бештар аз 490 дастгоҳи бофандагӣ занону духтарон ҳунар меомўзанд. 248 нафар бонувони гулдаст ба 1196 нафар шогирдон ҳунари худро ёд медиҳанд. Дар ин марказҳо ба ҷуз атласу адрас беқасаб, чит, карбос, қолин ва пойандоз низ бофта мешавад. То ин дам бештар аз 29,5 ҳазор метр адрасу атлас бофта, аз он 14,5 ҳазор метр ба фурўш бароварда шудааст. Натиҷаи бо ҳунаромўзӣ фарогирии бонувон ва бо маош таъмин гаштани онон аст, ки дар вилоят соли 2016-ум нисбат ба ҳамин давраи соли 2015-ум 4407 нафар занон кам ба муҳоҷирати меҳнатӣ рафтанд.

«Дугонаҳо» Маркази омодасозии ҳунармандони касбӣ аст, ки дар он аз шаҳру навоҳии вилоят 300 нафар, аз вилояти Хатлон 130 нафар, ҳамчунин аз Вилояти Мухтори Кўҳистони Бадахшон, ноҳияи Рашт, шаҳри Душанбе, дигар навоҳии кишвар бонувон адрасу атласбофӣ омўхтаанд.

Бо мақсади рушди ҳунарҳои миллӣ ва бо ҷойи корӣ фаро гирифтани бонувон, дастгирии ҳунарҳои дастӣ ва меҳнати хонагӣ - қолинбофӣ, кешбофӣ, сўзанидўзӣ, зардўзӣ, тоқидўзӣ, мўҳрабофӣ, сабадбофӣ, гаҳворасозӣ, сандуқсозӣ, косибӣ, гулпарварӣ низ ба роҳ монда, дар ин самт грантҳои Раиси вилоят, мўҳтарам Абдураҳмон Қодирӣ таъсис дода шуданд, ки соли 2016 аз 61 лоиҳаи пешниҳодгардида 30 нафар бонувон соҳиби гранти Раиси вилоят, ба маблағи 200 ҳазор сомонӣ гардиданд. Ин грантҳо имконият фароҳам меоваранд, ки боз марказҳои нави ҳунаромўзӣ, сехҳои нави атласу адрасбофӣ ба фаъолият шурўъ кунанд.

Ба шарафи ҷашни 25-солагии Истиқлолияти давлатӣ озмуни «Адрасбофи беҳтарин» доир гардид, ки дар номинатсияи бофандаи моҳир Мамлакат Ҳоҷиева аз ноҳияи Бобоҷон Ғафуров, Мунира Охунова аз шаҳри Исфара ва Хайринисо Маҳкамова аз ноҳияи Деваштич ғолиб гаштанд. Аз рўи номинатсияи сифати беҳтарин Саломат Азизова аз ноҳияи Мастчоҳ, Наргис Умматқулова аз ноҳияи Спитамен ва Наргис Ҷумъаева аз Истаравшан ғолиб омаданд. Нақши беҳтарин бошад, маҳсули дасти Назокат Ҳоҷиева аз шаҳри Хуҷанд, Барно Шехсаидова аз ноҳияи Зафаробод ва Каромат Турсунова аз шаҳри Панҷакент дониста шуд. Муҳайё Юсуфова аз ноҳияи Бобоҷон Ғафуров дар ин озмун соҳиби Шоҳҷоиза гардид. Ҳамчунин, дар ҷамъбасти озмун аз ҷониби Раиси вилоят ба 30 нафар бонувони ҳунарманд дастгоҳҳои адрасбофӣ бо ашёи хоми нимтайёр инъом гардиданд.

Тавре дар Паёми Пешвои миллат, Президенти мамлакат, Ҷаноби Олӣ Эмомалӣ Раҳмон зикр гардид, минбаъд барои баланд бардоштани сатҳи касбомўзӣ, мутобиқ гардондани сатҳи касбият ба талаботи бозори меҳнат аз ҷониби Ҳукумати мамлакат чораҷўӣ карда мешавад. Амалигардонии ин тадбирҳо, бахусус ба бонувон имкон фароҳам меорад, ки ҳунармандӣ, меҳнати хонагӣ, соҳибкориашонро рушду сайқал бахшанд ва ба ин васила дар ҷомеа мавқеашонро устувор, рўзгорашонро обод намоянд.

Рафоат МЎЪМИНОВА,
“Ҳақиқати Суғд”

Читать далее

05 January 2017

Ҷавонон мавқеи дурусти сиёсӣ дошта бошанд!

Дар шароити ҷомеаи зудтағйирёбанда зарур аст, ки мазмуну мўҳтавои афкори омма ҳамеша мавриди омўзиш, ташаккули он дар радифи равандҳои рушди ҷомеа дар мадди назар бошад.

Дар ҳолати аз мадди назар дур кардани ин падидаи муҳим мо имконияти таъсиррасониро ба вазъи ҳаёти ҷамъиятӣ аз даст медиҳем ва ҷомеа ба ҳолатҳои номатлуб, ба мисли костагии ҳаёти маънавӣ, хоса дар байни ҷавонон, пешорў меояд. Вобаста ба ин бояд тазаккур дод, ки афкори омма падидаи хеле рангоранг, зиддиятнок ва мураккаб буда, ташаккули он ба омилҳои зиёди сиёсӣ, иҷтимоиву фарҳангӣ вобаста мебошад. Аксари муҳаққиқон бар ин ақидаанд, ки афкори омма зери муаммоҳои ҳаёти рўзмарраи одамон, фаъолият ва бурду бохти онҳо ташаккул ёфта, ба шуури ҷамъиятӣ таъсири бевоситаи худро мерасонад. Инъикоси воқеият дар ин сатҳи ҷаҳонфаҳмӣ то андозае бенизом ва стихиявӣ буда, он ба сатҳи маърифатнокӣ, таълиму тарбия ва таҷрибаи ҳаётӣ вобаста мебошад. Албатта, дар баъзе мавридҳо мо фаъолии афкори оммаро нисбати дигар падидаҳо бештар мушоҳида менамоем, чунки дар раванди дигаргуниҳои иҷтимову сиёсӣ ба мисли озодандешӣ, демократия, то чӣ андоза ҳуқуқбунёд будани ҷомеа ақидаҳои гуногун баён мегарданд ва дар атрофи онҳо муколамаҳои доманадор сурат мегиранд.

Баъзе самтҳои афкори омма ба ҷомеа хатарҳои зиёде ба бор оварданаш мумкин аст. Масалан, тавассути воситаҳои ахбори умум суханпардозӣ намудани мубаллиғони гурўҳҳо ва ҳаракатҳои тундгаро ва иғвоангез, ба мисли “Салафия”, “Ансоруллоҳ”, “ҳаракати Исломии Ўзбекистон”, “Ҳизб-ут-таҳрир” “Ҷамоати таблиғ”, ДИИШ ва ғайраҳо ин кўшишест ҷиҳати таъсир расондан ба афкори омма, кўшишест аз ҳолати мутавозинӣ берун кашидани ҷомеаи Тоҷикистон. Ин мубаллиғон кўшиш ба он доранд, ки тавассути паҳн намудани ҳар гуна овозаҳои бардурўғ мардумро фиреб дода, ба низоъҳои иҷтимоӣ кашанд.

Ҷараёни эҳсоси воқеият, дарк ва мавриди андеша, таҳлил, баррасӣ ва хулосабарорӣ маданияти баланди инсонро тақозо менамояд. ҳодисаҳои моҳи сентябри соли 2015 дар Тоҷикистон, фоҷиаҳои мансуб ба терроризми байналмилалӣ дар дигар нуқоти олам, нишонгари он аст, ки тағйир додани афкори омма, яъне ба раванди нодуруст равон намудани он барои ҷомеа хеле хатарнок аст. Аз ҷониби зубдагони ҳизби мамнўъи Наҳзати ислом талқинкунии сабабҳои мамнўъ гаштани ҳизбашон исботи ҳамин фикр аст. Онҳо айби худро надида, айбдоронро дар дигар ҷой меҷўянд, мекўшанд, ки дар афкори омма ақидаҳои бардурўғро ҷой диҳанд. Аммо, имрўз мардуми мо хеле зирак шудаанд, онҳо ба қадри сулҳу Ваҳдати миллӣ мерасанд. Магар душманони миллати тоҷик намебинанд, ки дар давоми 25 соли сиёсати сулҳофарин ва Ваҳдати миллӣ Тоҷикистони ҷавони соҳибистиқлол роҳеро тай намуд, ки он ба асрҳо баробар аст. Таърих собит месозад, ки ягон халқу миллат нест, ки гирифтори ҷанги шаҳрвандӣ гашта, дар чунин муддати кўтоҳ аз он бурун омада, сиёсати сулҳофаринӣ ва бунёдкоронаро пеша карда бошад.

Дар ҳақиқат, дар шароити ташаккул ва рушди эҳтимолияти равандҳои сиёсӣ ҳар як узви ҷомеа бояд дарк намояд, ки мақсади ниҳоии ҳар муборизаи мафкуравӣ ин ноил шудан ба даст кашидан аз ҳуввияти миллии хеш ва қабули мафкураи дигар мебошад. Ин роҳест инсонро ба парастиши ғояи дигар, таърихи дигар ва фарҳанги дигар равона менамояд. Масалан, барои Амрико ё ягон давлати дигари Аврупо муҳим нест, ки дар Тоҷикистон чӣ гуна низоми иҷтимоиву сиёсӣ ё фарҳангӣ барқарор мешавад, муҳим он аст, ки тоҷикон аз решаҳои таърихии худ дур гашта ”худии худ”-ро фаромўш созанд. Ва дар ин роҳ онҳо ягон чизро, аз ҷумла сарфу харҷи моддӣ, маблағгузориро дареғ намедоранд. Барои чӣ давлатҳои абарқудрат, ба мисли ИМА, Канада ва дигарон бар зидди “Ал-қоида”, “Бародарони ислом”, Давлати исломӣ” дар Сурия мубориза мебаранду нисбат ба фаъолияти иғвогаронаи “Салафия”, “Ансоруллоҳ”, “Ҳаракати исломии Ўзбекистон”, “Ҳизб-ут-таҳрир”, “Ҷамоати таблиғ” дар Осиёи Марказӣ, аз ҷумла дар Тоҷикистон бефарқ ҳастанд? Ба фикри мо, инҳо зуҳури моҳияти сиёсати худхоҳонаи абарқудратҳост, ки мехоҳанд, бо дасти ин гурўҳҳои иҷтимоию сиёсӣ ҷомеаи моро ноором гардонанд ва ҷараёни худшиносиву худогоҳии миллати моро халалдор созанд. Ба ақидаи мо, ин масъалаи хеле ҷиддист, зеро на ҳар як шаҳрванди оддӣ дар сатҳи шуури муқаррарӣ ба моҳияти ин масъалаҳо сарфаҳм меравад. Бо таассуф бояд зикр намуд, ки маҳдудияти ҷаҳонбинӣ, донишҳои сиёсӣ ва таҷрибаи нокифояи зист дар ҷомеаи демократию ҳуқуқбунёд на ба ҳар як шаҳрванди Тоҷикистон, хусусан ба ҷавонон имконияти интихоби дурусти мавқеи сиёсиро медиҳад. Аксар вақт онҳо фирефтаи суханпардозиҳо, ваъдаҳои бардурўғи ба ном “ҷиҳод барои тозагии Ислом” мегарданд. Аз ин рў, дар ин ҷо назди ниҳодҳои иҷтимоӣ, қабл аз ҳама дар назди мактабу маориф, низоми таҳсилоти олии касбӣ вазифаҳои басо муҳими умумимиллидошта меистад.

Кори тарбия ҳамон вақт самаранок мегардад, ки агар ҳар як омўзгор, новобаста аз тахассусаш ҳам дар гуфтор ва ҳам дар рафтор намунаи ибрати ҷавонон бошад.

 Р.СОЛИҶОНОВ,
доктори илмҳои фалсафа,
устоди Донишкадаи иқтисод ва
 савдои Донишгоҳи давлатии
тиҷорати Тоҷикистон

Читать далее

Густариши ҳамкорӣ бо мардум

Гуфтугўи мустақими радиоии Расулзода Дилшод Ҷабборӣ – раиси шаҳри Исфара мақбули аҳли эҷод ва ҳам сўҳбати самимонаи мардум бо шаҳрдори Исфара гардид.

Зимнан, беш аз 100 арзу муроҷиат, мактубу дархост, номаҳои сипосу муборакбодӣ дар натиҷаи эълони пешакӣ оид ба баргузории гуфтугўи мустақим бо сокинон сурат гирифт. Гуфтугўи мустақим арзи дили 46 нафар сокинони шаҳру деҳоти Исфара ва ҳам зодагони Исфарамарзро аз кишварҳои хориҷ фаро гирифт.

Ҳадаф аз баргузорсозии ин тадбир таъмини амалигашти дастуру супоришҳои Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон Эмомалӣ Раҳмон ҷиҳати густариши ҳамкории мақомоти иҷроияи ҳокимияти давлатии шаҳр бо сокинон ва тарҳрезии нақшаҳои фаъолият барои соли 2017, дар маҷмўъ дарёфти роҳҳои беҳбудсозии рўзгори сокинон ва боз ҳам ободу зеботар гардонидани Исфараи бостонӣ буд.

Самтҳои афзалиятноки фаъолияти мақомоти иҷроияи ҳокимияти давлатии шаҳр, сабабҳои воқеии пурра иҷро нагардидани нақшаи даромади андозҳои давлатӣ, зарурати пешгирии санҷишҳои пайдарпайи фаъолияти соҳибкорон аз ҷониби мақомоти назоратӣ, масъалаи ҷудо намудани қитъаҳои замини наздиҳавлигӣ, бунёди инфрасохтори зарурӣ дар маҳалҳои нави аҳолинишини 11, 12, 13, 14, Сомониён ва шаҳраки Моҳпарӣ, алалхусус ҷиҳати таъминот бо нерўи барқ ва оби нўшокӣ, ба низом овардани ҳолати ҳудуди бозори марказӣ ва роҳҳои атрофи он, расонидани кўмакҳои иловагӣ ба осебдидагони офати табиии моҳи августи соли гузашта рухдода, сохтмони Нерўгоҳи ҳароратии Шўроб, ба анҷом расонидани азнавсозии бинои таълимии дар ҳолати садамавӣ қарордоштаи мактаби миёнаи №52, ҷудо намудани қитъаи замин барои чойхонаи муосир дар маркази шаҳр, беҳдошти ҳолату сифати хизматрасониҳои тиббӣ, роҳандозии суғуртаи тиббӣ, бознигарӣ ва аз нав мураттабсозии рўихати шахсони камбизоати шаҳру деҳот, вусъати раванди корҳои созандагию бунёдкорӣ, роҳу тариқи саҳмгузории шаҳрвандон дар азнавсозии Гулбоғи Сайфи Исфарангӣ аз ҷумлаи масъалаҳое буданд, ки зимни гуфтугў мавриди баррасӣ қарор дода шуданд.

 Раиси шаҳр бо истифодаи Интернет бо зиёда аз 20 соҳибкори зодаи Исфара дар Русияву Қазоқистон, Олмону Норвегия, Шветсия ва дар Амрикову Зеландияи Нав тариқи онлайн дар тамос шуд. Дар ҷараёни ин мулоқот байни мақомоти иҷроияи ҳокимияти давлатии шаҳри Исфара ва соҳибкорон 5 ёддошти ҳамкорӣ ба маблағи 4,2 миллион сомонӣ низ ба имзо расид.

Иқбол Илёсзода

Читать далее

Фаъолият тақвият меёбад

Дирўз дар толори КВДК «Кохи матбуот» бо иштироки муовини аввали Раиси вилоят Раҳматзода Рустам Мирзо ҷаласаи Шўрои ҷамъиятии вилояти Суғд баргузор гардид. Аз рўи масъалаи якум ахбори сардори Раёсати минтақавии рушди иқтисод ва савдои вилоят Шарифулло Абдуллозода «Дар бораи Барномаи рушди иқтисодию иҷтимоии вилояти Суғд барои солҳои 2016-2020» шунида шуд.

Мавсуф дар бораи рушди соҳаҳои хоҷагии халқи вилоят, хосатан, маорифу тандурустӣ, саноат, кишоварзӣ ва ҳунармандӣ изҳори андеша кард. Тибқи барнома, барои ноил шудан ба паст кардани сатҳи камбизоатӣ ва фавти модару кўдак, оид ба саноат, кишоварзӣ, нақлиёт, алоқа ва роҳ, азхудкунии мавзеъҳо, хариди таҷҳизоти тиббӣ, умуман баҳри ҳифзи иҷтимоии аҳолӣ лоиҳаҳои мушаххас пешниҳод гардид, ки он дар тўли панҷ соли оянда бояд амалӣ гардад. Ш.Абдуллозода инчунин оиди аз ҷониби 190 давлати ҷаҳон дастгирӣ ёфтани пешниҳоди Асосгузори сулҳу Ваҳдати миллӣ – Пешвои миллат, Президенти мамлакат, мўҳтарам Эмомалӣ Раҳмон оид ба «Даҳсолаи байналмилалии амал «Об-барои рушди устувор, солҳои 2018-2028» изҳори шодмонӣ кард.

Муовини сардори Раёсати маорифи вилоят Сайфулло Раҳматов оид ба Паёми навбатии Пешвои миллат, ислоҳоти соҳа, таъмини иҷрои Барномаи мазкур дар солҳои минбаъда ва раиси ҳизби Сотсиалистии Тоҷикистон дар вилоят Маъруф Юсуфов оид ба рушди соҳаи кишоварзӣ музокира намуданд.

Зимни суханронӣ муовини аввали Раиси вилоят Раҳматзода Рустам Мирзо дар бораи баррасии маълумот, Паёми Сарвари давлат, самтҳои он, вазифагузориҳо ва дастовардҳо, дастгирии мардуми ҷаҳон оид ба пешниҳоди Президенти мамлакати Тоҷикистон дар бораи «Даҳсолаи байналмилалии амал «Об-барои рушди устувор, солҳои 2018-2028» баён дошт.

Дар ҷамъбаст, ҳамзамон лоиҳаи қарори Шўрои ҷамъиятии вилояти Суғд дар бораи амалӣ намудани таклифу пешниҳодҳо, тақвият бахшидани фаъолият ва баланд бардоштани мақоми Шўро, ҳамкорӣ бо Мақомоти иҷроияи ҳокимияти давлатии вилоят ва ғайра баррасӣ гардиданд.

Тавҳида ҶЎРАЕВА,
«Ҳақиқати Суғд»

Читать далее

Иқдоми башардӯстона ва сиёсати муваффақи Пешвои миллат дар арсаи байналмилалӣ

Дар иртибот ба қабул шудани қатъномаи Маҷмаи Умумии Созмони Милали Муттаҳид «Даҳсолаи байналмилалии амал «Об барои рушди устувор, 2018-2028», ки бо пешниҳоди навбатии Асосгузори сулҳу ваҳдати миллӣ- Пешвои миллат мӯҳтарам Эмомалӣ Раҳмон рӯи кор омадааст, дар Донишкадаи политехникии Донишгоҳи техникии Тоҷикистон дар шаҳри Хуҷанд конференсияи илмӣ - назариявӣ доир гардид. 

Хуршед Мақсудов, муовини директор оид ба таълими донишкада чорабиниро ҳусни ифтитоҳ бахшида, иқдоми навбатии Сарвари давлатро оид ба ҳифзу нигаҳдошти бебаҳотарин неъмати табиат дар миқёси олам бесобиқа унвон кард. Маҳз бепарво набудан ба хатарҳои глобалии ҷаҳонӣ Пешвои миллатро водор сохт, то бо пешниҳодҳои башардӯстонаи худ амсоли эълон шудани соли 2003 Даҳсолаи байналмилалии амал «Об барои ҳаёт», солҳои 2005-2015, Соли байналмилалии ҳамкорӣ дар соҳаи об  ва ниҳоят қатъномаи мазкур ҷаҳониёнро дар атрофи ин мавзӯи муҳим сарҷамъ намуд.

Зафар Қаюмзода, прокурори калони Прокуратураи вилояти Суғд таъкид намуд, ки ҳанӯз 22 марти соли 1993 Рӯзи умумиҷаҳонии об аз ҷониби Созмони Милали Муттаҳид ҷашн гирифта шуда буд. Мақсад аз эълон доштани ин рӯз баланд бардоштани маърифати мардум оид ба муҳимияти манбаҳои об, зарурияти истифодаи сарфакоронаи он, инчунин равона сохтани таваҷҷӯҳи ҳукуматдорон, рохбарони ташкилоту корхонаҳо, омма барои андешидани чораҳои фаъолона ҷиҳати ҳифз ва барқарор намудани захираҳои об мебошад.

Анвар ҳоҷиев, номзади илмҳои техникӣ дар мавзӯи «Об сарчашмаи рушди усувори энергетики Точикистон», Толмас Сайфуллоев, номзади илмҳои кишоварзӣ дар мавзӯи «Истифодаи оқилонаи захираҳои обӣ вазифаи муҳим», Абдуллоҷон Насруллоев, номзади илмҳои техникаӣ дар мавзӯи  «Ташаббусҳои умумибашарии Тоҷикистон оид ба об» маърӯзаҳо намуда, қайд намуданд, ки қабули Даҳсолаи «Об барои рушди устувор» аз сиёсати муваффақи Президенти Тоҷикистон дар арсаи байналмилалӣ шаҳодат медиҳад.

Абдусабури АБДУВАҲҲОБ

Читать далее

Маҳдудияти рӯзонаи барқ дар саросари кишвар барҳам дода шуд

Шурӯъ аз имрӯз, 5 январи соли равон дар саросари мамлакат маҳдудияти рӯзонаи барқ пурра аз байн бардошта шуд.

Ба иттилои ШСХК «Барқи тоҷик» аз 5 январи соли равон дар қаламрави ҷумҳурӣ интиқоли неруи барқ зиёд шуда, аз соати 5-и субҳ то 22-и шаб дар тамоми кишвар ба таври доимӣ неруи барқ интиқол дода мешавад.

Ба иттилои ширкат, акнун сокинони навоҳии кишвар ба ҷои 12 соат неруи барқи пешина 17 соат бо барқ таъмин мешаванд.

Зимнан ШСХК «Барқи Тоҷик» аз муштариён эҳтиромона хоҳиш менамояд, ки неруи барқро самараноку сарфакорона истифода намуда, ҳаққи онро сари вақт пардозанд.

Читать далее

04 January 2017

Арҷгузорӣ ба таърихи пурифтихор

Дар ҳаёти ҷамъиятии давлати тозаистиқлоли мо бо ҳидояти Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмон чун нишони арҷгузорӣ ба гузаштаи пурифтихор ва фарзандони фарзонаи миллат, ки бобати озодиву шукуфоии халқ талошу ҷонбозиҳо кардаанд, таваҷҷўҳи хоса зоҳир мегардад.

Дар заминаи чунин иқдомҳои шоиста дар Донишгоҳи давлатии ҳуқуқ, бизнес ва сиёсати Тоҷикистон низ силсилаи чорабиниҳои илмӣ, таълимӣ, тарбиявӣ ба нақша гирифта шудаанд. Ташкилу баргузории моҳномаи «Қаҳрамони Тоҷикистон» аз қисматҳои муҳими ин қабил иқдомҳои наҷиб ба ҳисоб меравад. Чорабиниҳо тибқи нақшаи кории лоиҳаи моҳномаи «Қаҳрамони Тоҷикистон» аз 8-уми январи соли 2016 ҷараён гирифта, ҳадафи он шинос намудани донишҷўён бо ҳаёт ва фаъолияти симоҳои барҷаста, инсонҳое мебошад, ки дар марҳилаҳои муҳиму ҳассоси таърихи миллат барои муаррифӣ ва пойдории он талош варзидаанд.

То ин дам аҳли донишгоҳ бо баргузории моҳномаҳо бо кору пайкори Қаҳрамонони Тоҷикистон – сардафтари адабиёти навини тоҷик Садриддин Айнӣ, академик Бобоҷон Ғафуров, Асосгузори сулҳу ваҳдати миллӣ – Пешвои миллат, мўҳтарам Эмомалӣ Раҳмон, вассофи сулҳу дўстӣ, шоири шўҳратёр Мирзо Турсунзода бори дигар аз наздик шинос гардиданд. Моҳи декабри соли 2016 моҳномаи Қаҳрамонони Тоҷикистон Нусратулло Махсум ва Шириншоҳ Шоҳтемур баргузор гардид ва ташкили конференсияи илмӣ ҷамъбасти мантиқии он маҳсуб меёфт.

Конференсияи илмӣ санаи 27-уми декабри соли 2016 дар толори маҷлиси бинои дуюми таълимӣ ҷараён гирифт. Муовини ректор оид ба корҳои илм ва инноватсия, номзади илмҳои иқтисодӣ, дотсент А. Орифов конференсияи илмиро ҳусни ифтитоҳ бахшид.

Дар назди ҳозирин ректори донишгоҳ, доктори илмҳои таърих, профессор Ҷ.Ҷўразода дар мавзўи «Моҳномаи Қаҳрамонони Тоҷикистон ёдкарди корномаи фарзандони фарзонаи миллат», мудири кафедраи таърихи халқи тоҷик, номзади илмҳои таърих, дотсент Ҷ. Исомитдинов дар мавзўи «Нусратулло Махсум ва саҳифаҳои тақдирсози миллати тоҷик», мудири шўъбаи табъу нашр, дотсент И. Раҳимов дар мавзўи «Назаре ба ҳаёту корномаҳои Қаҳрамони

Тоҷикистон – Шириншоҳ Шоҳтемур», доктори илмҳои филологӣ, профессор А. Сайфуллоев дар мавзўи «Зиндагиномаи Қаҳрамонони Тоҷикистон – ибрати насли фардои миллат» суханронӣ намуданд.

Муҳимтарин масъалаҳое, ки дар маърўзаҳои устодон таъкид гардид, дарки моҳияти Истиқлолияти давлатӣ аз ҷониби ҷавонон, гиромидошт ва эҳтироми арзишҳои миллӣ, боло бурдани маънавият ва шуури миллӣ, ифтихори Ватану ватандорӣ, тамаддун, забони модарӣ, ҳимояи марзу буми кишвар ва огоҳ будани ҷавонон аз таъриху фарҳанги миллат буд.

Садоқат Шарифова,
мутахассиси шўъбаи таҳлил
ва робита бо ҷомеа

Читать далее

Таваҷҷӯҳи навбатӣ ба мактабиён

Дар давраи таътили зимистонаи мактабиён бо иқдоми Раёсати маорифи вилояти Суғд ба истироҳатгоҳи солимгардонии кӯдакон, наврасон ва ҷавонон ба номи «20-солагии Истиқлолияти Ҷумҳурии Тоҷикистон 800» нафар мактабиён ҷалб карда мешаванд.

Ба иттилои Раёсати маорифи вилояти Суғд шурӯъ аз санаи 2 январ аллакай 300 нафар хонандагон дар ин ҷо истироҳат карда истодаанд. Даври дуюм аз санаи 12 январ оғоз ёфта, то санаи 20 январ идома хоҳад кард. Дар даври сеюм, ки санаи 22 январ оғоз меёбад, 100 нафар хонандагони ятиму бепарастор ва аз оилаҳои камбизоат, ҳамчунин 100 нафар хонандагони болаёқат, ғолибони олимпиадаҳо ва академияҳо бо дастгирии Мақомоти иҷроияи ҳокимияти давлатии вилояти Суғд ройгон ба истироҳат фаро гирифта мешаванд.

Дар истироҳатгоҳ барои фароғату фаъолияти хонандагон маҳфилҳои гуногун амал карда, дар назар аст, ки чорабиниҳои фарҳангию фароғатӣ низ тӯли як моҳ доир мегардад.     

Абдусабур АБДУВАҲҲОБОВ

Читать далее