August 2020

11 August 2020

Кӯмакпулии ҳармоҳа пешбинӣ гардидааст

Ҷамъбасти фаъолияти шашмоҳаи аввали соли 2020, шуъбаи ҳифзи иҷтимоии аҳолии Мақомоти иҷроияи ҳокимияти давлатии вилоят бо иштироки намояндагони соҳа ва рӯзноманигорони ватаниву хориҷӣ баргузор гардид. Дар он оид ба натиҷаҳои фаъолият давоми давраи муайянгардида маълумот дода шуд.

Қайд гардид, ки давоми шашмоҳаи аввал барои моҳҳои январ-апрели соли 2020 аз ҷониби комиссияҳои 9 шаҳру ноҳияи вилоят ба Вазорати молияи Ҷумҳурии Тоҷикистон барои 27988 оила ва шаҳрвандони камбизоат дархости молиявӣ фиристода шуда, 4 миллиону 249 ҳазору 355 сомонӣ маблағи ҷуброни барқ пардохт шудааст. Ба ҳолати 1-уми июли ҳамин сол 34061 оила аз кӯмаки унвонии иҷтимоӣ бархурдор шудаанд. Дар ин давра кӯмакпулӣ ба маблағи 5 миллиону 464 ҳазору 200 сомонӣ пардохт гардид. То имрӯз дар вилояти Суғд ҳамагӣ 62049 оила ва шаҳрвандон ҳамчун оилаҳо ва шаҳрвандони камбизоат ба қайд гирифта шудаанд.

Дар ин раванд давоми нимсолаи аввал аз ҷониби шуъба ба 20 нафар ва аз ҷониби мақомоти иҷроияи ҳокимияти давлатии шаҳру ноҳияҳо ва соҳибкорон ба 41 нафар, аз ҷумла ба 61 нафар маъюби эҳтиёҷманд аробачаи маъюбӣ, 12 нафар бо асо, 6 нафар бо асобағал, 2 нафар бо роҳравак, 13 нафар бо асои оринҷӣ, 300 нафар бо пойафзоли махсус ва ортопедӣ, 73 нафар бо протез таъмин гардиданд, ки дар маҷмуъ ба 600 маъюб хизмат расонда шуд.

Боиси қайд аст, ки дар Муассисаи давлатии «Хона-интернати пиронсолон ва маъюбон дар шаҳри Панҷакент» 67 нафар, дар муассисаи давлатии «Хона – интернати беморони руҳӣ дар ноҳияи Ҷаббор Расулов» 288 нафар дар таъминоти давлатӣ қарор доранд. Дар Марказҳои минтақавии хизматрасонии иҷтимоӣ ба пиронсолон ва маъюбон дар шаҳрҳои Хуҷанд, Конибодом, Истаравшан ва ноҳияи Деваштич 180 нафар пиронсолу маъюбон будубош доранд. Ҳамчунин, дар 14 шаҳру навоҳӣ шуъбаҳои хизматрасонии иҷтимоӣ дар хона фаъолият дошта, 225 корманди иҷтимоӣ ба 1850 нафар шахсони яккаву танҳо, пиронсолон ва маъюбон хизмат мерасонанд.

Дар асоси қарорҳои Раиси вилоят аз 6-уми январи соли 2020 ба иштирокчиён ва маъюбони Ҷанги Бузурги Ватанӣ, маъюбони амалиёти ҷангӣ дар қаламрави давлатҳои дигар, маъюбони барқароркунии сохти конститутсионӣ дар Ҷумҳурии Тоҷикистон, аъзои оилаҳои ҷанговарони дар ин ҷангҳо ҳалокгардида ҳар моҳ ба андозаи 100 сомонӣ, ба шахсоне, ки дар давраи Ҷанги Бузурги Ватании солҳои 1941-1945 дар ақибгоҳ меҳнат намуда, дар таъмини Ғалаба саҳми арзанда гузоштаанд, ҳар моҳ ба андозаи 80 сомонӣ, ба маъюбони Артиши Шӯравӣ ҳар моҳ ба андозаи 100 сомонӣ, ба маъюбони бартарафкунии садамаи Нерӯгоҳи барқӣ-атомии Чернобил кӯмакпулии ҳармоҳа ба андозаи 80 сомонӣ пешбинӣ гардида, барои моҳи январ – июни соли 2020 ба маблағи 736 ҳазору 300 сомонӣ кӯмакпулӣ пардохт гардид. Ҳамчунин, давоми нимсолаи аввал ба 159 нафар гирандагони нафақа барои хизматҳои махсус дар назди Ҷумҳурии Тоҷикистон ба маблағи 184440 сомонӣ ҷубронпулӣ ворид ва пардохт шуд.

Саволу ҷавоб бо рӯзноманигорон анҷомбахши нишасти матбуотӣ буд.

Шоира САЛИМОВА,

«Ҳақиқати Суғд»

Читать далее

Нишондиҳанда ва бурду бохти чор сохтори муҳим

Дар толори Кумитаи идораи замини вилоят нишасти матбуотии чор сохтор, аз ҷумла Кумитаи идораи замини вилоят, Раёсати беҳдошти замин ва обёрӣ дар вилоят, Раёсати ҳифзи муҳити зисти вилоят ва Сарраёсати идораи кишоварзии вилоят доир гардид.

Дар оғоз Ҷамшед Умарзода, раиси Кумитаи идораи замини вилоят доир ба натиҷаҳои фаъолияти кумита дар шаш моҳи соли ҷорӣ маълумот дод. Номбурда гуфт, ки дар ин давра аз тарафи нозирони кумитаҳои идораи замини шаҳру ноҳияҳои вилоят 2 ҳазору 742 ҳолати вайронкунии қонунгузории замин дар майдони 1562,51 гектар муайян карда шуда, ба ҳамаи онҳо оид ба бартарафкунии қонуншиканиҳо дастур дода шудаанд.

Нисбат ба 2 ҳазору 638 адад қонуншикании ҷойдошта протокол ва қарорҳои маъмурӣ тартиб дода, ба маблағи умумии 1 миллиону 210 ҳазору 326 сомонӣ ҷарима ҳисоб карда шуд, ки аз он 925 ҳазору 803 сомонӣ ба суратҳисоби махсуси кумитаҳои идораи замини шаҳру ноҳияҳо пардохт шуд.

Лозим ба қайд аст, ки нисбат ба ҳамин давраи соли сипаришудаи 2019 маблағи ҷаримаҳои басташуда 118 ҳазору 76 сомонӣ ва воридоти он 30 ҳазору 688 сомонӣ зиёд мебошад.

Аминҷон Абдуллозода, сардори Раёсати беҳдошти замин ва обёрӣ дар вилоят зимни баромади худ зикр намуд, ки ҷиҳати сари вақт ба мавсими обёрӣ омода намудани пойгоҳҳои обкашӣ ва иншооти обрасон бо таваҷҷуҳ ва дастгирии бевоситаи Раиси вилоят аз ҳисоби буҷети вилоят 4,2 миллион сомонӣ маблағ ҷудо гардид, ки аз он ноҳияҳои Зафаробод - 1,9 миллион сомонӣ, Мастчоҳ - 300 ҳазор сомонӣ, Ашт - 1 миллион сомонӣ, Ҷаббор Расулов - 300 ҳазор сомонӣ, Бобоҷон Ғафуров - 500 ҳазор сомонӣ ва барои корҳои лоиҳавӣ дар мавзеи Рухак 200 ҳазор сомонӣ дастрас шуд.

Маблағҳои воридшуда барои омода намудани пойгоҳҳои обкашии «Деҳмой – 4» ва «Родник – 2» - и ноҳияи Ҷаббор Расулов ва пойгоҳҳои обкашии «Рухак – 1» - и ба номи Исмоил Қоҳиров, «Рухак – 2», «Фарҳод -3», «Юбилейнқй – 1» ва «Юбилейнқй – 2» равона шуд, ки ба гардиши кишоварзӣ ворид намудани мавзеи Рухаки ноҳияи Бобоҷон Ғафуров ва Ҷаббор Расулов мусоидат менамояд.

Дар ноҳияи Ашт маблағҳои ҷудошуда барои аз лойқа тоза намудани ҳавзҳои пойгоҳҳои обкашии АНС-1, АНС-3, АНС-4 ва харидорӣ намудани қисмҳои эҳтиётӣ ва равғанҳои молиданӣ барои таъмири дастгоҳҳои обкашии ноҳия равона шудааст. Инчунин, барои бартараф намудани садамаи дар пойгоҳи обкашии АНС-1, ки санаи 18-уми апрели соли ҷорӣ бо қатъ гардидани барқ боиси зери об мондани дастгоҳҳои обкашии пуриқтидор гардид, сарф шуд.

Дар ноҳияи Мастчоҳ маблағи ҷудошуда барои харидорӣ наму- дани қисмҳои эҳтиётӣ ва равғанҳои молиданӣ барои таъмири дастгоҳҳои обкашии пойгоҳҳои обкашии «Дилварзин-1», «Дилварзин-2», «Дилварзин-3» ва силсилаи пойгоҳҳои обкашии «Янтоқ»-и ноҳия равона шудааст, ки барои таъминоти оби полезии ноҳия мусоидат менамояд. Лоиҳаи миллии идоракунии захираҳои обӣ, ки бо дастгирии ташкилоти «Хелвитас», «Ҳамкории Олмон» ва «Актед» дар ҳавзаи дарёи Сир амалӣ гардида, дар таъминоти минтақа бо оби полезӣ мусоидат намуда истодааст.

Тибқи ин лоиҳа, дар пойгоҳи обкашии «Деҳмой-1»-и ноҳияи Ҷаббор Расулов ду дастгоҳи фарсудашуда ба дастгоҳҳои нави обкашӣ бо муҳаррикҳои барқии каммасрафи самаранокиашон баланд аст бо маблағгузории лоиҳа иваз шуд, ки барои таъминоти оби полезии минтақаи Деҳмой мусоидат намуд.

Инчунин, Абдуаҳад Ҳакимзода, сардори Раёсати ҳифзи муҳити зисти вилоят зимни баромади худ қайд намуд, ки раёсат ва шуъбаю бахшҳои зертобеъ дар шаҳру ноҳияҳо ҷиҳати пешбурди назорати давлатӣ баҳри иҷрои қарори Ҳукумати Ҷумҳурии Тоҷикистон «Дар бораи тадбирҳо оид ба ташкил намудани системаи безараргардонии ҷамъоварӣ, нигоҳдорӣ, интиқол ва коркарди лампаҳои симобдор» бо мақсади таъмини назорати давлатӣ дар самти ҷамъоварӣ, безараргардонӣ, нигоҳдорӣ, интиқол ва коркарди лампаҳои симобдор корҳои муаянеро иҷро намуданд. Дар ин давра 69 санҷиши соҳавию амалиёт гузаронида, барои бартараф намудани камбудиҳои ошкоргашта ба роҳбарони корхонаю муассисаҳо, соҳибкорон ва шаҳрвандон 82 пешниҳоди хаттӣ дода, то айни замон бо назардошти пешниҳодҳои қаблӣ 78 ададаш иҷро гашт. Нисбат ба 14 нафар қонунвайронкунанда протоколи ҳуқуқвайронкунии маъмурӣ тартиб дода, ба маблағи 2146 сомонӣ ҷаримабандӣ намуда, аз он то ин дам 1450 сомонӣ ситонида шуд.

Доир ба фаъолияти шашмоҳаи соҳаи кишоварзии вилоят Абдуазиз Маҳмудзода, сардори шуъбаи истеҳсолии Сарраёсати кишоварзии вилояти Суғд ҳисобот дода, зикр дошт, ки тибқи маълумоти оморӣ, ба ҳолати 1-уми июли соли равон ҳаҷми умумии истеҳсоли маҳсулот дар ҳамаи шаклҳои хоҷагидории вилоят наздик ба 2,1 миллиард сомонӣ расид, ки дар муқоиса нисбат ба ҳамин давраи соли гузашта 108,5 фоизро ташкил мекунад. Аз ҷумла нисбат ба ҳамин давраи соли гузашта ҳаҷми умумии истеҳсоли маҳсулоти соҳаи растанипарварӣ 999 миллион сомонӣ ё 104,5 фоиз ва соҳаи чорводорӣ 1,1 миллиард сомонӣ ё 112,4 фоиз таъмин шуд.

Сипас, намояндагони васоити ахбори ҷумҳуриявӣ, вилоятӣ ба пурсишҳои худ вобаста ба бурду бохти фаъолияти чор сохтори муҳими вилоятӣ посухҳои мушаххас гирифтанд.

Нодир ТУРСУНЗОДА,

«Ҳақиқати Суғд»

Читать далее

Санҷиши паҳлуҳои фаъолият

Бо иштироки роҳбарони чор сохтори вилоятӣ ва рӯзноманигорони вилоят нишасти матбуотӣ баргузор гардид. Аз рӯи маълумоти Сарраёсати Агентии омори назди Президенти Ҷумҳурии Тоҷикистон дар вилоят, тибқи Фармони Президенти кишвар аз 1 то 15 - уми октябри соли равон дар мамлакат барӯйхатгирии аҳолӣ ва фонди манзил гузаронида мешавад, ки барои ин маъракаи муҳим аз буҷети маҳаллӣ 1 миллиону 322 ҳазор сомонӣ ҷудо гардид.

Дар ин давра 6,6 ҳазор адад корҳои оморӣ дар муҳлати муайян иҷро ва инчунин ҳамагӣ дар 126 корхонаву ташкилот санҷишҳои мукаммал гузаронида шуданд. Нисбат ба 148 нафар масъулони субъектҳои ҳисоботсупор парвандаҳои ҳуқуқвайронкунии маъмурӣ тартиб дода, дар маҷмӯъ ба маблағи 55,4 ҳазор сомонӣ ҷарима татбиқ гардид, ки аз он ба буҷаи ҷумҳуриявӣ 49,3 ҳазор сомонӣ ворид шудааст.

–Шумораи субъектони бақайдгирифташуда ба 118,4 ҳазор адад расидааст, ки ин 36 фоизи сатҳи ҷумҳуриро ташкил медиҳад. Шахсони ҳуқуқии фаъолияткунанда 8,2 ҳазор, филиалу намояндагиҳои шахсони ҳуқуқии хориҷӣ 43 ва соҳибкорони инфиродӣ 110,1 ҳазорро ташкил дода, аз он хоҷагиҳои деҳқонӣ ба 63,3 ҳазор расидааст, ки ҳиссаи он дар сатҳи ҷумҳурӣ 39,9 фоизро ташкил медиҳад, – афзуд сардори Сарраёсати Агентии омор дар вилоят Ҳокимбек Накҳатзода.

Ҷараёни корҳои баанҷомрасида, фаъолияти раёсату шуъбаҳои омори Сарраёсат ва зерсохторҳои шаҳрию ноҳиявии он бештар дар маводи иттилоотию маърифатӣ тавассути сомонаи мақомоти омор ва шабакаҳои иҷтимоӣ инъикос гардидааст.

Дар ҳисоботи Раёсати минтақавии рушди иқтисод ва савдои вилоят оварда шудааст, ки ҳаҷми маҷмӯи маҳсулоти минтақавии вилоят ба 7,9 миллиард сомонӣ ва суръати афзоиши он ба 103, 1 фоиз расонида шуда, ҳиссаи он дар сохтори маҷмӯи маҳсулоти дохилии ҷумҳурӣ 24,3 фоизро ташкил намуд. Ҳаҷми истеҳсоли маҳсулоти саноатӣ ба 6576,8 миллион сомонӣ расонида шуда, суръати афзоиш 114,4 фоиз таъмин гардид. Кишоварзони вилоят ҳаҷми истеҳсоли маҳсулотро дар ҳамаи шаклҳои хоҷагидории вилоят ба 2114,5 миллион сомонӣ расониданд. Дар самти сохтмони иншооти соҳаҳои иҷтимоию фарҳангӣ ва истеҳсолӣ пешравиҳо назаррасанд. Маблағгузорӣ ба сармояи асосӣ ба 598,3 миллион сомонӣ азхуд карда шудааст.

Ҷиҳати таҳкими корҳои ободониву созандагӣ якчанд иншооти ҷашнӣ мавриди истифода қарор гирифта, сохтмони иншооти дигар бомаром идома дорад. Дар вилоят бунёд ва таъмиру азнавсозии 7111 иншооти таъйиноти истеҳсолию иҷтимоӣ пешбинӣ гардидааст. Ҷиҳати беҳтар намудани таъминоти аҳолии вилоят бо молҳои аввалиндараҷа, рушди бозори истеъмолӣ, баланд бардоштани самаранокии фаъолияти корхонаҳои соҳаи савдо ва хизматрасонӣ тадбирҳои зарурӣ андешида шуданд.

Ҳаҷми гардиши савдои хориҷии вилоят ба 811,6 миллион доллари амрикоӣ баробар шуда, суръати афзоиш нисбат ба ҳамин давраи соли гузашта 80,2 фоиз таъмин гардидааст. Ҳаҷми воридот 638,8 миллион доллари амрикоӣ буда, 80,2 миллион доллар ё 18,9 фоиз коҳиш ёфтааст. Содироти маҳсулоти кишоварзӣ афзоиш ёфтааст.

Рафти татбиқи «Барномаи миёнамуҳлати рушди иҷтимоию иқтисодии вилояти Суғд барои солҳои 2016–2020» таҳти назорати доимии раёсат қарор дошта, амалишавии 192 лоиҳа ба маблағи 7864,8 миллион сомонӣ пешбинӣ гардидааст.

Тибқи маълумоти Сарраёсати молия дар вилоят, давоми шаш моҳи соли гузашта истеҳсоли маҳсулоти саноатӣ, кишоварзӣ ва баистифодадиҳии фондҳои асосӣ нисбат ба ҳамин давраи соли гузашта афзудааст. Сарфи назар аз афзоиш суръати рушд дар баъзе соҳаҳои иқтисодиёти вилоят бо сабабҳои вазъи имрӯза нисбат ба ҳамин давраи соли гузашта коҳиш ёфтааст. Нақшаи қисми даромади буҷети вилоят ба маблағи 252,6 миллион сомонӣ, аз ҷумла нақшаи даромад ва хароҷоти буҷети маҳаллӣ ба маблағи 132,7 миллион сомонӣ дар ин давра кам карда шуд. Нақшаи даромади буҷет ба андозаи 100,8 фоиз иҷро гардида, ба буҷети давлатӣ 1084,2 миллион сомонӣ маблағ ворид гардид, ки нисбат ба нақша 9 миллион сомонӣ зиёд аст.

–Бо мақсади таъмини саривақтии маблағгузории музди меҳнати кормандони соҳаҳои буҷетӣ ва пешгирии пайдоиши қарздориҳо тадбирҳои мушаххас андешида, музди меҳнат ва маблағҷудокунӣ барои эҳтиёҷоти иҷтимоии ташкилоту муассисаҳои буҷетӣ, инчунин маблағи рухсатии омӯзгорон пурра маблағгузорӣ гардида, аз ҳисоби пардохтҳои зикршуда қарздорӣ ё қафомонӣ вуҷуд надорад,–гуфт сардори Сарраёсати молия дар вилоят Анвар Мирзозода. Раёсати сармоягузорӣ ва идораи амволи давлатии вилоят дар ин давра аз рӯи иҷрои қонунҳои мавҷуда фаъолият бурда, як қатор корҳоро ба анҷом расониданд.

Фурӯши амволи давлатӣ тавассути Бирҷаи молу мулки вилоят тариқи музояда амалӣ гардида, дар натиҷа дар ду музояда 2 адад объекти хурду миёна ба маблағи умумии 163646 сомонӣ ва 4 адад воситаи нақлиётӣ ба маблағи 5019 сомонӣ фурӯхта шуда, 100 фоиз ба буҷаҳои дахлдор ворид карда шуд. Аз ҷониби комиссияҳои фурӯши амволи давлатии шаҳру ноҳияҳо 10 объекти хурду миёна ба маблағи умумии 137513 сомонӣ фурӯхта шуданд.

Мутобиқи маълумот, дар давраи ҳисобтӣ ҳамагӣ 969 адад шартномаи иҷора бо шахсони воқеию ҳуқуқӣ баста шуда, аз ин ҳисоб ба буҷети давлатӣ 16911349,81 сомонӣ маблағ ворид гардид. Аз эътибор соқит намудани воситаҳои асосии фарсудаю корношоями корхонаю ташкилотҳои давлатӣ ва аз мувозина ба мувозинаи дитгар гузаронидани бино, иншоот ва таҷҳизоти давлатии моликияти коммуналӣ, тибқи тартиби муқарраргардида, корбарӣ шуда истодааст.

Дар охир ҷурналистон ба суолҳои худ посухҳои амиқ гирифтанд.

Гулҷаҳон Турсунзода,

«Ҳақиқати Суғд»

Читать далее

РУШДИ САНОАТ- ТАҚОЗОИ АЙЁМ

Нуктаи ҷолибтарин дар Паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ин буд, ки солҳои 2019 - 2021 «Солҳои рушди деҳот, сайёҳӣ ва ҳунарҳои мардумӣ» эълон гардид. Ин аз он далолат медиҳад, ки Пешвои миллат ба хотири боз ҳам обод кардани Тоҷикистон ва ҳалли масъалаҳои иҷтимоии аҳолӣ, бобати эҳё намудани ҳунарҳои миллии ниёгон, баланд бардоштани ифтихори миллӣ, арҷгузорӣ ба фарҳанги воло, тарбияи зебоипарастӣ, тарғибу ташвиқи либоси миллӣ, таъсиси ҷойҳои корӣ, ба касбомӯзӣ ҷалб кардани занону духтарони хонашин ва ба насли оянда пешкаш кардани ҳунари аҷдодӣ аст.

Ҳамчунин, паст кардани сатҳи камбизоатӣ ва коҳиш додани сафи муҳоҷирон аз тарафи Роҳбари давлат пайваста дастгирӣ гардида, қадам ба қадам ҳунарҳои аҷдодии миллӣ аз нав эҳё шуда истодаанд. Маҳсулоти корхонаҳои саноатии шаҳр дар бозори ҷаҳонӣ рақобатпазир дониста, муаррифӣ шудааст. Таъсис ва фаъолият бурдани корхонаҳои муштараки саноатӣ низ баҳри пешрафти соҳаи саноати сабук дар мамлакат қадами устуворе аст.

Чунончӣ, бахшида ба солгарди Истиқлолияти давлатии Ҷумҳурии Тоҷикистон санаи 24-уми августи соли 2019-ум зимни сафари корӣ Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Хуҷанд корхонаи коркарди санги хоро ва мармари ҶДММ "Хорои Хуҷанд" - ро ифтитоҳ ва аз рафти кор дидан намудаанд. Ин корхонаи азими саноатӣ дар маҳаллаи "Ваҳдат" - и шаҳри Хуҷанд дар майдони 9288 метри мураббаъ замини ғайрикишоварзӣ ва бекорхобида бунёд гардида, самти фаъолияти он ба истихроҷ ва коркарди сангҳои табиӣ нигаронида шудааст. Бояд афзуд, ки 93 фоизи Ҷумҳурии Тоҷикистонро кӯҳ ташкил медиҳад, ки он имконияти фарохи истихроҷ ва коркарди захираҳои табиӣ, аз ҷумла сангҳои табиӣ ва истифодаи самараноку оқилонаи он муҳим мебошад.

Бо назардошти ин ва ҳамзамон зиёд будани талабот ба чунин навъи маҳсулот дар мамлакат Пешвои миллат муҳтарам Эмомалӣ Раҳмон ба масъулони ҶДММ "Хорои Хуҷанд" ҷиҳати боз ҳам бештар намудани ҳаҷми истеҳсолот, таъмини пурраи талаботи аҳолӣ бо ин намуди маҳсулот ва ба роҳ мондани содироти маҳсулоти аз санг омодашуда дастуру ҳидоятҳо додаанд.

Барои истеҳсоли масолеҳ дар ин корхона дар қитъаи "Хорокон" - и ноҳияи Бобоҷон Ғафуров ва қитъаи "Ровакон" - и ноҳияи Ашт сангҳои табиӣ истихроҷ ва дастрас мешавад. Захираи ашёи хом дар ин конҳо барои беш аз 50 сол кофӣ мебошад. Ҳаҷми истихроҷи хоросанг дар корхонаи мазкур дар як моҳ аз 60 то 120 метри мукаабро ташкил медиҳад. Бо истифода аз ин дар корхона тахтасанг, панҷара, фаввора, мизу курсӣ, таҷҳизоти ошхона, гулдон, инчунин монеаҳо барои роҳрав, сафолакҳо, пардаовез, сутунпояҳо ва дигар номгӯи маҳсулот бо шакл, ҳаҷм, миқдор ва ороиши гуногун истеҳсол мешаванд.

Барои истихроҷ ва коркарди санги хоро дастгоҳу таҷҳизоти муосир насб гардидааст ва раванди истеҳсолот тавассути компютер идора ва назорат мешавад. Бештари дастгоҳу таҷҳизоти корхона, аз ҷумла дастгоҳи суфтакунӣ бори нахуст ба ҷумҳурӣ ворид шудааст.

Санги мармар бошад, дар ҶДММ "Хорои Хуҷанд" мутобиқ ба фармоиши мизоҷон аз ширкатҳои истихроҷкунандаи ватанӣ дастрас ва коркард мегардад.

Дар корхонаи мазкур 58 нафар сокини маҳаллӣ бо ҷои кори доимӣ ва маоши аз 1500 то 2000 сомонӣ таъмин гардидаанд. Масъулон нақша доранд, то ҷашни 30-солагии Истиқлолияти давлатии Ҷумҳурии Тоҷикистон доираи фаъолияти корхонаро васеъ намуда, дар ҳамин замина боз 30 ҷойи нави корӣ таъсис диҳанд.

Ифтитоҳи ин корхонаи нави истеҳсолӣ дар шаҳри Хуҷанд дар амалӣ гардидани ҳадафи чоруми миллӣ - саноатикунонии босуръати мамлакат, афзоиши ҳаҷми маҳсулоти воридотивазкунанда ва коҳиш додани ҳаҷми маҳсулоти воридотӣ заминаи устувор мегузорад.

Ҳамчунин, дар шаҳраки Шайдони ноҳияи Ашт корхонаи коркарди санги ҶДММ «Меҳри Хуҷанд» фаъолият дошта, сокинони маҳал бо ҷойи кор ва маоши хуб таъминанд. Гуфта мешавад, корхона бо маблағи лоиҳавии 1 миллиону 400 ҳазор сомонӣ аз ҷониби соҳибкор Абдулҳақ Бобоҷонов сохта шуда, моҳи июни соли 2018 ба истифода дода шуд.

Корхонаи мазкур дар 1 сол то 3000 м2 санги хороро коркард ва истеҳсол менамояд. Захираи ашёи хом зиёда аз 158 ҳазор метри мукааб мебошад. Таҷҳизоти замонавии коргоҳ аз Ҷумҳурии Мардумии Чин ворид ва насб гардидааст. Раиси вилоят Раҷаббой Аҳмадзода ифтитоҳи коргоҳи мазкурро барои сокинони ноҳия дар арафаи Рӯзи ваҳдати миллӣ туҳфаи хуб арзёбӣ намуда, ба роҳбарияти корхона дастур дод, ки доираи фаъолиятро марҳала ба марҳала васеъ намуда, барои ташкили ҷойҳои кории иловагӣ тадбирҳои зарурӣ амалӣ намоянд.

Қайд кардан бамаврид аст, ки ҷиҳати дар амал татбиқ намудани дастуру супоришҳои Асосгузори сулҳу Ваҳдати миллӣ, Президенти Ҷумҳурии Тоҷикистон муҳтарам Эмомалӣ Раҳмон солҳои 2019-2021 «Солҳои рушди деҳот, сайёҳӣ ва ҳунарҳои мардумӣ» эълон гардида, бо дастуру супориши Раиси вилояти Суғд муҳтарам Раҷаббой Аҳмадзода ҳамасола фестивали вилоятии ҳунарҳои мардумӣ ва фурӯши маҳсулоти ҳунармандӣ, эҳё намудани анъанаи ниёгон, ба танзим даровардани фурӯши маҳсулотҳои қадима ва таърихӣ, маҳсулоти миллӣ, сарҷамъ намудани мутахассисон ва нигоҳдорандагони ашёҳои қадимаю таърихӣ, бозёфт ва харидории ашёҳо аҳамияти таърихидошта аст. Дар фестивалозмун маҳсулоти ҳунармандони касбӣ ва маҳаллӣ, аз қабили кашидадӯзӣ, йурмадӯзӣ қолинбофӣ, сабадбофӣ, қуроқдӯзӣ, устоҳои шонасоз кордсоз, оҳангар, сангтарош пешкаш мегардад, ки ҳунармандон сазовори мақоми ифтихорӣ мегарданд.

Усто Исмоилхӯҷаи сангтарош аз шаҳри Исфара хушнудӣ аз он дорад, ки бо иқдоми некбинонаи Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон ва Раиси вилоят муҳтарам Раҷаббой Аҳмадзода соҳаи ҳунармандӣ дар ҳама ҷода рушд ёфта, дар мадди назари ҷомеа қарор дорад.

Мо, ҳунармандон барои эҳёи ҳунарҳои аҷдодӣ тавонистем, пеш аз ҳама, руҳи гузаштагонро шод гардонем, маҳсули дастони онҳоро аз нав зинда гардонида, барои имрӯзиён муаррифӣ намоем ва насли навинро аз нозукиҳои ҳунарҳои ниёгон бохабар созем. ҳамчунин, номи неки худро дар симои садҳо шогирду ҳунаромӯзон ва пайвандони хеш бубинем.

Шукри давлати соҳибистиқлол мекунем, ки барои давом додани касби аҷдодӣ, хосатан сангтарошӣ шароит муҳайё гашту насли навин метавонад, бо ин ҳунари ниёгон ошно шавад ва барои худ шуғли доимӣ пайдо намояду дараҷаи некӯаҳволи хонаводаашонро баланд бардоранд.

Шаҳноза ҲОМИДОВА,

«Ҳақиқати Суғд»

Читать далее

ҶАВҲАРИ СИЁСИИ КАБИРӢ ХИЁНАТ АСТ

 Ð¢Ð¾Ñ‡Ð¸ÐºÑ„илм Хиёнат - Филми тоҷики

Тайи чанд моҳи охир ҳангоми муошират бо дӯстону ошноён, инчунин мутолиаи бевоситаи маводи таҳлилӣ дар торнамои интернети байналмилалӣ ба чунин натиҷа расидам, ки шукри Худо, ҳар он чи, ки дар шароити пандемия дар кишвари мо Тоҷикистон рух медиҳад, таҳаммулпазир аст. Аз ҷумла, дар муқоиса бо дигарон, агар чунин қиёс бо дигарон, ҳатто кишварҳои рушдёфта, ки қудратҳои азими иқтисодӣ номгузорӣ ва дар ҳаёти сиёсӣ низ бунёдгузори мӯд мебошанд, раво бошад.

Читать далее

ЛИЧНАЯ И ПОЛИТИЧЕСКАЯ СУЩНОСТЬ КАБИРИ – ПРЕДАТЕЛЬСТВО

 

 

 

Точикфилм Хиёнат - Филми тоҷики

В последние месяцы моего общения с друзьями и знакомыми, а также непосредственного чтения аналитических материалов в международной интернет-паутине пришёл к выводу, что всё, что происходит у нас в Таджикистане в условиях пандемии коронавируса является, слава Богу, терпимым.

Читать далее

10 August 2020

Табрикоти Раиси вилояти Суғд Раҷаббой Аҳмадзода ба муносибати Рӯзи варзишгарон

Варзишгарони арҷманд, муҳтарам кормандони соҳаи варзиш!

Боиси ифтихор аст, ки ҳамасола дар кишвари азизи мо санаи 10 - уми август Рӯзи варзишгарон мутантан таҷлил мешавад. Иқдоми мазкур   самараи неки сулҳ ва суботи сиёсӣ буда, аз ҷониби дигар далел аз таваҷҷуҳи Ҳукумати мамлакат ба соҳаи варзиш маҳсуб меёбад.

Бо истифода аз фурсати муносибат аз номи Мақомоти иҷроияи ҳокимияти давлатии вилояти Суғд Шумо, варзишгарон -муаррифгарони Ватанро табрик намуда, ба шумоён саломатӣ, сарбаландӣ ва саодату комёбӣ таманно мекунем.

Читать далее

Фаъолияти муташаккилонаи маорифчиён

- Дар назди раёсату шуъбаҳои маорифи муассисаҳои таълимии вилоят баҳри пешгирии бемории сироятии коронавирус ситод таъсис ёфта, дар ҳамкорӣ бо Маркази санитарӣ – эпидемиологии шаҳру ноҳияҳо маводи безараргардонӣ захира шуданд.

Боиси қайд аст, ки оид ба ҳолатҳои баамаломада дар маҳал омодагӣ ба ҳолатҳои фавқулодда риояи қоидаҳои санитарию гигиенаи шахсӣ ва ҷамъиятӣ корҳои фаҳмондадиҳию омӯзишӣ гузаронида шудааст.

Аз санаи 27 – уми апрели соли 2020, тибқи қарори Ситоди ҷумҳуриявӣ, баҳри гузаронидани чораҳои зиддиэпидемикӣ дар ҳамаи муассисаҳои таълимии Ҷумҳурии Тоҷикистон дарсу машғулиятҳо қатъ гардида, хонандагон ба таътил фаро гирифта шуданд, - иброз дошт сардори Раёсати маорифи вилоят Осим Каримзода дар нишасти матбуотӣ бо рӯзноманигорони васоити ахбори омма.

Қайд шуд, ки соли таҳсили 2019 – 2020 дар вилоят 929 муассисаи таҳсилоти умумӣ фаъолият дошта, дар онҳо 547 ҳазору 925 нафар, аз ҷумла 267 ҳазору 888 нафар духтар ба таълиму тарбия фаро гирифта шуданд.

Дар ҳудуди вилоят 13 муассисаи таълимии типи мактаб – интернат фаъолият доранд. Дар муассисаҳои номбурда теъдоди тарбиятгирандагон як ҳазору 227 нафар буда, аз ин миқдор 35 нафар ятим, 136 нафар бепадар, 58 нафар бемодар, 96 нафар тарбиятгирандае, ки муассисаи таълимӣ аз ҷои зисташон дур ҳастанд ва 902 нафар кӯдаки маъюб ва нуқсондор мебошанд.

Аз рӯи натиҷаҳои ҷамъбасти аттестатсияҳои хатми муассисаҳои таҳсилоти миёнаи умумӣ аз муассисаҳои таълимии шаҳру ноҳияҳои вилоят ва Мактаби Президентии шаҳри Бӯстон барои дарёфти медалҳои тилло ва нуқра ҳуҷҷатҳои 21 нафар довталаб ба комиссияи Вазорати маориф ва илми Ҷумҳурии Тоҷикистон пешниҳод гардида, аз онҳо 12 нафар ба дарёфти медали тилло, 3 нафар ба гирифтани медали нуқра мушарраф гардиданд. Шаш нафари дигар бо Ифтихорномаи Вазорати маориф ва илми Ҷумҳурии Тоҷикистон сарфароз шуданд.

Дар фарҷом рӯзноманигорон ба суолҳои худ ҷавобҳои мушаххас гирифтанд.

Шоира САЛИМОВА,

«Ҳақиқати Суғд»

Читать далее

Соҳилмустаҳкамкунӣ ба анҷом расид

- Дар нимсолаи аввали соли 2020 дар ҳудуди вилоят 260 ҳодисаи фавқулоддаи хусусияти гуногундошта ба қайд гирифта шуд, ки бар асари он 64 нафар ба ҳалокат расидаанд. Маблағи зарар 42 миллиону 986 ҳазору 544 сомониро ташкил дод.

Ҳамчунин, 4 ҳодисаи фавқулоддаи хусусияти табиидошта ба қайд гирифта шуд, ки зарари он 41 миллиону 256 ҳазору 698 сомониро ташкил намуд. Аз ин маблағ 38 миллиону 787 ҳазору 300 сомонӣ зарари соҳаи кишоварзӣ мебошад. Дар натиҷаи офати табиӣ 2 нафар ба ҳалокат расидаанд, - гуфт зимни нишасти матбуотӣ муовини аввали раиси Раёсати Кумитаи ҳолатҳои фавқулодда ва мудофиаи граҷданӣ дар вилояти Суғд Анвар Қосимов.

- Фаъолияти гурӯҳи мазкур аз санаи 27 – уми апрел оғоз шуда, то ба имрӯз дар биноҳои баландошёна, хонаҳои истиқоматӣ, ташкилоту идораҳо ва дигар иншооти шаҳру ноҳияҳои Хуҷанд, Бӯстон, Гулистон, Бобоҷон Ғафуров ва Айнӣ дар масоҳати умумии 609 ҳазору 694 метри мураббаъ корҳои безараргардонӣ бо истифода аз маҳлули гипохлориди натрий гузаронида шуд, - гуфт Анвар Қосимов.

Бо мақсади пешгирӣ намудани ҳолатҳои фавқулодда дар шаҳру ноҳияҳои Ашт, Айнӣ, Гулистон, Шаҳристон, Спитамен, Ҷаббор Расулов, Кӯҳистони Мастчоҳ, Панҷакент, Конибодом ва Исфара корҳои соҳилмустаҳкамкунӣ ва тоза кардани селроҳаҳои хавфнок ба анҷом расонида шуд.                    

Ҳамчунин, А.Қосимов доир ба ҳодисаи ғарқшавӣ гуфт, ки яке аз масъалаҳои нигароникунанда ба шумор меравад, аз ин рӯ бо мақсади пешгирии ҳодисаи ғарқшавӣ аз оғози мавсими оббозӣ наҷотдиҳандагони Дастаи махсуси зудамали наҷотдиҳии вилоят барои пешгирии ҳодисаҳои ғарқшавии аҳолӣ дар «Баҳри Тоҷик» - и шаҳри Гулистон ва дарёи Сири шаҳри Хуҷанд сафарбар шуданд ва мавзеъҳое, ки бештар аҳолӣ ба оббозӣ машғул мешаванд, зери назорат қарор доранд.

Дар нимсолаи якуми соли 2020 – ум 11 ҳолати ғарқшавӣ бо сабабҳои гуногун дар кӯлу дарё ва обанборҳои шаҳру ноҳияҳои вилоят ба қайд гирифта шуд. 4 нафар аз тарафи наҷотдиҳандагон наҷот дода шуда, ҷасади 7 нафар аз об бароварда шуд.

Дар анҷоми нишасти матбуотӣ доир ба фаъолияти Раёсат аз ҷониби рӯзноманигорон суолҳои мухталиф дода шуд.

Шаҳбону ОЛИМОВА,

«Ҳақиқати Суғд»

Читать далее

ҶДММ “САТН”: БЕШ АЗ 100 НАМУДИ МАҲСУЛОТ БА ХОРИҶИ КИШВАР СОДИРОТ МЕГАРДАД

Саноати сабук соҳаи ҳаётан муҳими кишвар маҳсуб меёбад, зеро дар ҳамаи давру замон давлатро маҳз саноати сабук аз бӯҳрони иқтисодӣ бароварда метавонаду бас. Бо назардошти ин, ки саҳми соҳаи саноати сабук дар ғанӣ гардонидани буҷети давлатӣ бузург арзёбӣ мегардад, давлату Ҳукумати кишвар ва Мақомоти иҷроияи ҳокимияти давлатии вилоят баҳри рушду такомули соҳа ва дастгириву ғамхорӣ нисбат ба заҳматкашони соҳа таваҷҷуҳи бештар зоҳир мекунанд. Маълум аст, ки соҳаи саноати сабук дар вилоят рӯ ба тараққӣ ниҳодааст ва дар муддати 29 соли давраи Истиқлолият дар ин самт дастовардҳои назаррас ба даст оварда шудааст.

Директори генералии ҶДММ “САТН” Илҳом Бобоев ҷиҳати вазъи кунунӣ ва раванди ташкилу шароити кори заҳматкашони коргоҳ ҳарф зада, иброз дошт, ки аз соли 2002 насбу васли таҷҳизоти коркарди пахта оғоз гардида, аз соли 2003 бахши ресандагии коргоҳ ба фаъолият оғоз кард. Дар асоси супоришоти ширкатҳои маҳаллӣ маҳсулот истеҳсол мегардид. Аз соли 2004 фаъолияти корхона пурра ба роҳ монда шуда, аз коркарди пахта, омода намудани ришта то маҳсулоти тайёр, яъне маҳсулоти пӯшокаи ҷавобгӯй ба стандартҳои ҷаҳонӣ истеҳсол мекунад. Шарикон, яъне супоришгарони асосии маҳсулоти истеҳсолии коргоҳ Ширкати амрикоии «CAҚҚӮҚA SPA” буда, дар ҳамкорӣ бо шарикони амрикоиву итолиёвӣ фаъолиятро ба роҳ мондааст.

Ҷоизи қайд аст, ки ашёи хом барои истеҳсоли маҳсулоти коргоҳ пахта буда, чуноне роҳбарият изҳор намуданд, фаъолият тибқи дастури Асосгузори сулҳу ваҳдати миллӣ - Пешвои муаззами миллат муҳтарам Эмомалӣ Раҳмон ба роҳ монда шуда, корхонаи ҶДММ “САТН” низ ашёи хомро дар дохили кишвар коркард намуда, барои таъмини талаботи истеҳсолкунандагони ватаниву хориҷӣ роҳандозӣ гардидааст. Феълан коргоҳ аз истеҳсолоти ресандагӣ, бофандагӣ, минтақаи Денӣ, яъне коркарди матоъ, шустушӯй, дарзмолкунӣ, пардоздиҳӣ ва истеҳсолоти буррандагиву дӯзандагӣ иборат аст. Агар солҳои қаблӣ ашёи хом баҳри истеҳсоли маҳсулоти коргоҳ пурра аз нахи пахта ба роҳ монда шуда бошад, алҳол бо назардошти талаботи бозори ҷаҳонӣ дар раванди истеҳсолот на танҳо аз нахи пахта, ҳамчунин аз нахи сунъӣ низ истифода бурда мешавад.

Чун ҳамагон медонанд, бӯҳрони шадиди иқтисодии солҳои 2011 - 2014 дар соҳоти мухталиф ва тамоми ҷаҳон осори худро монд, ки ин, албатта, ба фаъолияти коргоҳ низ бе таъсир намонд.

Бино ба гуфти Илҳом Бобоев, баҳри баромадан аз вазъияти бамиёномада, ба талаботи ҷаҳонӣ ҷавобгӯ будани маҳсулот таҷдиди техникӣ гузаронида шуда, бештар ба кор даровардани хатҳои нави истеҳсолӣ, муҷаҳҳазгардонӣ бо технологияи навтарин дар коргоҳ ҷорӣ карда шуд.

Инчунин, дар ҳамкорӣ бо шарикони итолиёвӣ - амрикоӣ истеҳсоли маҳсулот бо тарҳу мӯди дигар, ки талаботи давр тақозо дошт, оғоз гардид. Агар солҳои пешин танҳо модели тарҳи классикӣ истеҳсол гардад, се соли охир зиёда аз 100 намуди либоси мардонаву занона ва кӯдакона бо истифода аз нахи пахта ва нахи сунъии спандекс ба роҳ монда шуд. Тибқи шартномаи ҳамкории тарафайн, ҳар сол дар мавсими тобистону зимистон бо назардошти талаботи бозори ҷаҳонӣ намуди истеҳсоли либосҳо таҷдиди назар карда мешавад, зеро қариб 95 фисади маҳсулоти тайёр ба кишварҳои Аврупо содирот мегардад.

Бояд қайд кард, ки ҳаҷми истеҳсоли маҳсулоти тайёр дар корхонаи номбурда дар як рӯз 3 - 4 ҳазор донаро ташкил медиҳад. Боиси зикр аст, ки корхона ба талаботи харидорон ва бозори имрӯза пурра мувофиқ гашта, аз соли 2003 то имрӯз фаъолияти бомаром дорад.

Ҳамчунин, барои дастрасӣ ва фурӯши маҳсулоти тайёр барои харидорони ватанӣ дар назди корхона воқеъ дар шаҳри Хуҷанд ва маркази шаҳри Душанбе мағозаҳои махсус, молу маҳсулоти ҶДММ «САТН», ҳамчунин ширкати овозадори “CAҚҚӮҚA SPA”, аз қабили шим, курта, костюми занона, мардона ва кӯдаконаро ба харидорон бо нархҳои аз 60 то 120 сомонӣ пешкаш мекунанд.

Феълан коргоҳ ба нишондиҳандаҳои хуби истеҳсолӣ ноил гардидааст. Агар дар соли 2019 ба маблағи қариб 33 миллиону 166 ҳазор сомонӣ маҳсулот истеҳсол гардида бошад, дар 6 моҳи соли 2020 ба маблағи беш аз 48 миллиону 422 ҳазор сомонӣ маҳсулоти тайёр омода карда шуд, ки ин 146 фисади нақша мебошад.

Бояд зикр намуд, ки аз сабаби паҳн гардидани бемории сироятии COVID – 19 фармоиши ниқобҳои муҳофизатиро ба роҳ монда, то имрӯз зиёда аз 1 миллиону 340 ҳазор дона ё ба маблағи 14 миллиону 985 ҳазор сомонӣ ин намуди маҳсулотро истеҳсол ва содирот намудааст. Айни замон дар ҶДММ «САТН» 541 нафар кормандону мутахассисон дар се баст фаъолият намуда, агар соли қаблӣ музди маоши миёнаи онҳо зиёда аз 2 ҳазор сомониро ташкил медод, алҳол он ба беш аз 2 ҳазору 400 сомонӣ расидааст.

Чун аз ҳудуди биноҳои коргоҳ дидан намудем, ҳама ҷоро озодаву ободон дарёфтем. Дар ошхонаи коргоҳ ҳамаи шароити хӯрду хӯрок муҳайё гардонида, аз ҷиҳату намуд ва нархи хӯрокаҳо ҳам бисёр дастрас мебошанд.

Дар рафти азназаргузаронии шароити корӣ бо чанде аз кормандон ҳамсуҳбат гардидем, ки аксар изҳори қаноатмандӣ доштанд. Онҳо бо шукргузорӣ иброз намуданд, ки роҳбарияти коргоҳ ҳамеша дар бобати табобат ва истироҳату фароғати заҳматкашони коргоҳ пайваста ғамхорӣ менамояд.

Аз ҷумла, дар бобати дастгирии ниёзмандон низ кӯмаки моддӣ расонида мешавад. Баҳри ҳавасмандкунии саноатчиён дар ҳамаи идҳои миллӣ дастархони идона ороста, собиқадорону пешсафони коргоҳ аз ҷониби роҳбарият аз ҷониби моддӣ дастгирӣ карда мешаванд.

Сол аз сол ба соҳаи саноат, аз ҷумла саноати сабук чун яке аз самтҳои афзалиятноки кишвар аз ҷониби Сарвари давлат муҳтарам Эмомалӣ Раҳмон ғамхориву дастгириҳо афзун мегардад. Қайд кардан бамаврид аст, ки бо ибтикори Президенти кишвар ба Қонуни Ҷумҳурии Тоҷикистон “Дар бораи буҷети давлатии Ҷумҳурии Тоҷикистон барои соли 2016” тағйиру иловаҳо ворид гардида, тибқи яке аз бандҳои он ҳисоб ва пардохти андоз аз фурӯши нахи пахта бекор карда шуда, бар ивази он боҷи содиротӣ барои нахи пахта ба андозаи 10 фоиз аз арзиши гумрукии нахи пахтаи содиротшаванда муқаррар карда шуд. Албатта, ин омил низ шаҳодати дастгирии роҳбарияти кишвар буда, барои беҳтару бештар ба роҳ монда фаъолияти соҳа мусоидат менамояд.

Имрӯз маҳсулоти ҶДММ “САТН” дар арсаи олам муаррифӣ гашта, дар бозори ҷаҳонӣ рақобатпазир дониста шудааст, ки дар он саҳми роҳбари коргоҳ - фарди оқилу соҳибфазилат, мутахассиси кордон Илҳом Бобоев шоиста аст.

 Албатта, таъсис ва фаъолият бурдани корхонаҳои муштарак низ баҳри пешрафти соҳаи саноати сабук дар мамлакат қадами устувор дошта, нақши он дар рушди иқтисодиёт ва дар ин радиф беҳдошти сатҳи иҷтимоиву иқтисодии аҳолии вилоят мусоидат менамояд.

Нодир ТУРСУНЗОДА,

“Ҳақиқати Суғд”

Читать далее