May 2021

17 May 2021

РӮ НАОРАД БА ХОНИ КАСЕ СОҲИБҲУНАР...

Яке аз дастовардҳои беназири даврони соҳибистиқлолии кишварамон он аст, ки бо эҳтимоми Асосгузори сулҳу ваҳдати миллӣ - Пешвои муаззами миллат барои рушду такомули ҳунарҳои мардумӣ роҳи васеъ кушода шуд. Давоми чанд соли охир намудҳои гуногуни ҳунармандӣ аз байни халқ нумӯъ кардаву рушду равнақи бесобиқа ёфт.

ИДОМАИ ҲУНАРИ АҶДОДОН

Маркази таълимӣ-истеҳсолии ба номи Рассоми халқии Тоҷикистон Зулфия Баҳриддинова бо ибтикори бонуи ҳунарманд Мавҷуда Ҳакимова баҳри ҷалб намудани занону духтарон ба атласу адрасбофӣ таъсис дода шуд. - Номи ин ҳунарманд натанҳо байни мардуми шаҳри Хуҷанд, балки дар тамоми қаламрави кишвар ҳамчун бонуи соҳибистеъдод, ҳунарманди асил, рассоми мониқалам маъруф аст. Ва мо хостем, марказамон номи ин соҳибҳунари фарзонаро дошта бошаду аз ин макон садҳо бонувон ба худ ҳунару сарчашмаи ризқёбӣ пайдо кунанд,-мегӯяд сарвари марказ.

Устоди аввалини бонувон дар ин марказ бонуи пурҳунар Машҳура Орифова буданд, ки сирру асрори ҳунари волои хешро бо тамоми нозукиҳояш ба шавқмандон омӯзониданд. Ва дар муддати чанд сол аз маҳаллаҳои шаҳр занону духтарон ба ҳунаромӯзӣ ҷалб карда шуда, то ин вақт бештар аз 200 нафар ҳунари атласу адрасбофиро ёд гирифтанд. Имрӯз аксари онҳо дар хона ва ё ҳудуди маҳаллаашон сехи атласу адрасбофӣ ва дӯзандагӣ кушодаанд. Гулсара Каримова, Мушаррафа Турсунова, Муҳайё Юсуфова, инчунин Мухбира Ваҳҳобова аз деҳаи Кулангири ноҳияи Бобоҷон Ғафуров ва даҳҳо дигарон сех кушодаву алҳол ба омода намудани шогирд машғуланд.

МАРКАЗ-САРЧАШМАИ РИЗҚЁБИИ ОИЛАҲОИ ЭҲТИЁҶМАНД

-Агар қаблан ҳамаи бонувони хоҳишмандро ба омӯзиш ҷалб намоем, ҳоло бошад, бо назардошти шароити оилавиашон, яъне занони хонанишин, яккаву танҳо, маъюб, онҳоеро, ки шавҳаронашон дар муҳоҷирати меҳнатианду дар таъминоти рӯзгор азият мекашанд, ба кор мегирем.

-Соли гузашта,-мегӯяд Мавҷуда Ҳакимова,-бо сабаби паҳн гаштани бемории сироятии коронавирус дар марказ истеҳсоли маҳсулот назар ба дигар солҳо коҳиш ёфт. Зиёда аз 20 ҳазор метр атласу адрас бофта шуд. Ин миқдорро бо нишондиҳандаи имсола муқоиса намоем, давоми чаҳор моҳи соли 2021-ум зиёда аз 5 ҳазор метри тӯлонӣ атласу адрас бофта шуд. Алҳол дар марказ дар даҳ дастгоҳи бофандагӣ 12 нафар меҳнат мекунанд.

- Атласу адраси бофтаи бонувони мо бо обуранги ҷаззоби хеш, барҳақ, чашму дил мерабоянд, навъҳои балдоқ, қатра, пахта, мавҷи дарё, намозишоми сурх, дуранга, атласи зард, атласи зарду сурх, нозанин бар тани ҳар бону зебандаву ҳуснафзо аст.

–Бонувони мо баробари бофтани атласу адрас ҳамчунин аз ин матоъҳо курта, барои ҷавонон нимтана, френч ва барои армуғон сумкача ва болишт медӯзанд.

АШЁИ ХОМ-НАХИ ПИЛЛА ВА ПАХТА

Чуноне сарвари марказ иброз дошт, барои истеҳсолоти худ ашёи хомро аз коргоҳҳои саноатии «Нассоҷи Хуҷанд», «Олим-текстайлз»-и ноҳияи Мастчоҳ ва дигар корхонаҳо дастрас менамоянд. Алҳол матои атлас аз нахи абрешими сунъӣ ва матои адрас аз нахи пахта ва пилла тайёр карда мешавад.

-Баъди дастрас намудани ашёи хом онро корманди мо Иноятҷон Орифова бо сифати баланд рангубор медиҳанд. Ин бону дар касби хеш соҳибистеъдод буда, авлодонаш бо ин пеша машғул буданд. Ва бояд зикр кард, ки имрӯз таваҷҷуҳи харидорон ба матои аз нахи табии пахта ва пилла тайёршудаи адрас бештар аст ва ин матоъ ба ҷуз ба тани бонувон шинаму зебандагиаш ҳамчунин бароҳату шифоӣ низ аст,- мегӯяд ӯ.

ПЕРОҲАНИ АТЛАСУ АДРАС - ЗЕБИ БОНУВОНИ ТОҶИК

Байни мардуми шаҳри бостонии Хуҷанд мақоле ҳаст, ки мегӯяд «зардолу мехӯронад, тут ва пахта мепӯшонад». Яъне, ин мақол аз он дарак медиҳад, ки сокинони шаҳр аз қадимулайём бо парвариши ин меваҳои биҳиштӣ ва зироат машғул буда, дар давраҳои мушкилтарин низ аз гуруснагӣ эмин мондаанд. Бо барги дарахти тут кирмак парвариш мекарданду аз пиллаи он абрешими хом тайёр намуданд. Ба ин гуфтаҳо рӯзгори модари шодравонамро мисол оварда метавонам, ки дар айёми Ҷанги Бузурги Ватанӣ онҳо дар сандуқи калоне қоқ захира карда буданду гуруснагӣ накашиданд. Модарам, духтараки шонздаҳсола дар дӯконашон шабонгоҳҳо атлас мебофтанд, рӯзона бошад, дар коргоҳи «Хуҷандатлас», ки дар маҳаллаи Раззоқ ҷойгир буд, кор мекарданд. Модарам мегуфтанд, нақшҳои атласу адрасро бонувони шаҳри кӯҳан аз ҳафтранги рангинкамон, ки дар мавҷҳои оби рӯди Сир ҷилва мекард, бардошта, офаридаанд ва он тайи асрҳо зеби тани занону духтарони тоҷик аст.

МУАММОҲОИ ПЕШОМАДА ВА РОҲҲОИ ҲАЛЛИ ОН

-Соли равон аз аввали сол бо баланд рафтани нархҳо арзиши ашёи хом боло рафт. Ва нархи фурӯши маҳсулот арзиши аслиро намепӯшонад. Агар арзиши матоъ ва ё маҳсулоти истеҳсол-намудаамонро қимат кунем, харидор онро намехарад, бо вуҷуди он ки дар тамоми дунё арзиши маҳсулоти истеҳсоли дастӣ баланд аст,- мегӯяд роҳбари марказ.- Вале чӣ бояд кард? Илоҷи чора бояд ҷуст, маоши кормандон бояд пардохт.

 Барои ин мо ба роҳбарияти мақомоти иҷроияи ҳокимияти давлатии шаҳр, кумитаи бонувон ва кор бо оила муроҷиат намудем. Дар ин самт ин мақомот моро хеле дастгирӣ намуданд. Яъне, бештари маҳсулоти мо ба фурӯш рафт, ҳини гузаронидани чорабиниҳо барои бонувон, баргузории озмунҳои гуногун. Роҳи дигари ҳалли ин муаммо-фурӯши маҳсулотамонро тариқи шабакаҳои иттилоотӣ ба роҳ мондем. Мо нусхаҳои атласу адраси истеҳсолнамудаамонро ба шабакаҳои иҷтимоӣ гузоштем ва ба ин васила низ харидор дарёфт намудем.

Ҷоиз ба зикр аст, ки занону духтарон бо азхуд намудани ҳунарҳои атласу адрасбофӣ устодони касби хеш гаштанд, чандин нафарашон дар озмун барои гирифтани грантҳои Раиси вилоят ва раиси шаҳр ғолиб омаданд, ки ин низ барои рушду такомули фаъолияташон мусоидат кард. Яъне мошини дарздӯзӣ, йӯрмадӯзӣ хариданд, ҳудуди сехашонро васеъ, теъдоди шогирдонро афзун намуданд.

-Чуноне медонем, ҳар як халқияту миллат дар ин дунё тарзи либоспӯшии хеш, либоси миллии худро дорад. Ва мо мардуми сарбаланду саодатмандем, ки либоси миллии барои мардуми тамоми дунё манзури худ - атласу адрасро дорем. Ва аз кадом гӯшаи олам ба сарзамини мо меҳмон ояд, мафтуни ҷилои ҳафтранги атлас мешавад,-мегӯяд сарвари марказ,- ниятҳои мо калонанд. Ба истиқболи ҷашни фархундаи мамлакат-30-солагии Истиқлолияти давлатии кишварамон коргоҳамонро васеътар, теъдоди кормандонро афзун гардонида, аз ин ҳисоб баҳри беҳтаршавии сатҳи рӯзгори чандин оилаҳо мусоидат карданием.

Рафоат МӮЪМИНОВА,

«Ҳақиқати Суғд»

Читать далее

ЧЕҲРАИ БОНУВОН ДАР ОИНАИ ҲАЁТ

Ҳанӯз соли 1999 ба тасвиб расидани Фармони Асосгузори сулҳу ваҳдати миллӣ Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон «Дар бораи баланд бардоштани мақоми зан дар ҷомеа», қабули Стратегия ва Барномаҳои давлатӣ марҳалаи тозаеро дар ҳаёти сиёсии мамлакат ва бештар намудани ҷалби занон ба ҳаёти ҷамъиятӣ боз намуд.

Боиси қайд аст, ки маҳз қабули фармони мазкур барои дар соҳаҳои мухталифи иқтисодиву иҷтимоӣ, тандурустиву маориф, фарҳанг ва дигар самтҳои кишвар нақши муҳим мебозанд. Алҳол, занон дар зинаҳои баланди давлатдорӣ мақоми худро соҳиб шудаанд. Имрӯз 20 ҳазор нафар дар мақоми роҳбарикунанда фаъолият доранд, ки аз онҳо 1167 нафар хизматчии давлатӣ мебошанд. Аз ҳисоби занони вилоят 3 нафар узви Маҷлиси миллии Маҷлиси Олии Ҷумҳурии Тоҷикистон, 5 нафар вакили Маҷлиси намояндагони Маҷлиси Олии Ҷумҳурии Тоҷикистон, 22 нафар вакилони Маҷлиси вакилони халқи вилояти Суғд, 186 нафар вакили Маҷлиси вакилони халқи шаҳру ноҳияҳо ва 650 вакили халқи ҷамоатҳо интихоб гардиданд ва ин рақам нисбат ба давраи гузашта зиёд аст.

Ҳамзамон, аз ҳисоби занони вилоят як нафар муовини Раиси вилоят, як нафар роҳбари дастгоҳи Раиси вилоят, як нафар раиси шаҳр, 15 нафар ҳамчун муовини раисони шаҳру ноҳия иҷрои вазифа менамоянд. Боиси қайд аст, ки барои дастгирии занону бонувон аз ҷониби Ҳукумати мамлакат барномаҳои мухталиф таҳия гардида истодаанд. Барномаи давлатии «Тарбия, интихоб ва ҷобаҷогузории кадрҳои роҳбарикунандаи Ҷумҳурии Тоҷикистон аз ҳисоби занону духтарони лаёқатманд барои солҳои 2017-2022» бо мақсади тарбияи кадрҳои соҳибтахассус таҳия гардида, дар ин раванд доир ба иҷрои талаботи барномаи мазкур дар вилоят корҳои назаррас ба анҷом расонида шуданд. - Мақсади асосии қабули Барномаи мазкур муайян кардани сиёсати дарозмуддати давлатӣ оид ба таъмини ҳуқуқҳо ва имкониятҳо доир ба тарбия, интихоб ва ҷобаҷогузории кадрҳои роҳбарикунандаи кишвар аз ҳисоби занону духтарони лаёқатманд, таъмини ҳуқуқи баробари марду зан ҳангоми пешниҳод ва таъин намудан ба вазифаҳои роҳбарикунанда, таъмини шароити ҳаматарафаи таълимӣ, ҷалби бештари духтарон ба таҳсил дар синфҳои 10 - 11, фароҳам овардани шароит, дастрасӣ ва ҳимояи иҷтимоии занони деҳот арзёбӣ мегардад, - гуфт сардори Раёсати кор бо занон ва оилаи вилояти Суғд Хуршедахон Хоҷазода.

Ҳамчунин, иттилоъ дода шуд, ки барои ҷобаҷогузории дурусти кадрҳо ва пур кардани мансабҳои холии маъмурии хизмати давлатӣ, зиёд кардани шумораи занон ва ҷавонон дар хизмати давлатӣ, таъин намудани онҳо ба вазифаҳои роҳбарикунанда аз тарафи Мақомоти иҷроияи ҳокимия-ти давлатии вилоят ва шаҳру ноҳияҳо, тибқи санадҳои меъёрии ҳуқуқӣ, корбарӣ мунтазам ҷараён дорад.

- Бояд зикр кард, ки дар ҷамоатҳои шаҳраку деҳоти шаҳру ноҳияҳои Спитамен, Бӯстон, Исфара, Зафаробод, Конибодом, Айнӣ, Ашт, Ҷаббор Расулов, Деваштич ва Мастчоҳ барои занону духтарони лаёқатманд силсилаи маҳфилу курсҳо ва семинарҳои омӯзишӣ оид ба мавзӯъҳои «Зан - роҳбар», «Мақоми зан дар ҷомеа», «Рушди соҳибкории занон», «Зан ва замин» ва «Зан ва сиёсат» гузаронида шуданд, - гуфт Хуршедахон Хоҷазода.

Боиси қайд аст, ки фаъолияти занону бонувон дар соҳаи маориф ва илм басо назаррас аст. Алҳол дар муассисаҳои таҳсилоти олӣ ва миёнаи касбии вилоят 12 доктори илм ва 336 номзади илм аз ҳисоби занон фаъолият дошта, аз 26 ҳазору 106 нафар зан, ки дар соҳаи маориф кор мекунанд, 2887 нафар роҳбар, 713 нафар Аълочии маорифи Ҷумҳурии Тоҷикистон мебошанд. Тавре Хуршедахон Хоҷазода таъкид кард, барои дастгирии духтароне, ки дар деҳаҳои дурдаст зиндагӣ ва таҳсил доранд, Квотаи Президентӣ ташкил шудааст. Аз 40 ҳазор духтар, ки дар муассисаҳои таҳсилоти олӣ ва миёнаи касбии вилоят таҳсил менамоянд, 488 нафар тибқи Квотаи Президенти Ҷумҳурии Тоҷикистон машғули омӯзиш буда, 52 нафар гирандаи стипендияи Президенти Ҷумҳурии Тоҷикистон ва 61 нафар гирандаи стипендияи Раиси вилоят ҳастанд.

Дар самти Барнома «Дар бораи баланд бардоштани мақоми зан дар ҷомеа» дар шаҳри Истиқлол низ корҳои зиёде ба сомон расидаанд. Алҳол аз 18046- нафараи аҳолии шаҳр 9094 нафарашон занон ҳастанд. Дар муассисаҳои таълимӣ 182 омӯзгор фаъолият мебаранд, ки аз онҳо 135 зан ҳас-танд. Аз 66 нафар хизматчии давлатӣ 33 нафар зан ҳастанд. Инчунин, сарварии 2 муассисаи таълимӣ ва 2 боғчаи бачагонаро занон ба уҳда доранд. Мудири бахши кор бо занон ва оилаи шаҳр Азиза Аҳмадзода гуфт, ки бахши кор бо занон дар якҷоягӣ бо бахши Агентии меҳнат ва шуғли аҳолии шаҳр 35 бонуи хонашинро ба курсҳои кӯтоҳмуддат, аз ҷумла кешбофӣ ҷалб кард.

- Баҳри андешидани чораҳои зарурӣ ҷиҳати пешгирии оилаҳои ҷавон аз ҷудошавӣ, омода намудани ҷавонон ба ҳаёти мустақилона, ҷиҳати баланд бардоштани маърифати оиладорӣ, сӯиқасд ба ҷони худ ва даст ба худкушӣ задани занону духтарон, аз байн бурдани бегонапарастӣ, тақлидкориву тар-ғиби сарулибос ва анъанаҳои номатлуб дар байни занон, хусусан қишрҳои осебпазир, аз ҷумла, занони хонашин ва аз муҳоҷирати меҳнатӣ баргашта кӯшиш ба харҷ медиҳанд, - гуфт номбурда. Шуъбаи кор бо занон ва оилаи мақомоти иҷроияи ҳокимияти давлатии шаҳри Истаравшан инчунин супоришҳои мақомоти болоиро дар ҳамкорӣ бо дигар воҳидҳои сохтории дахлдор ба роҳ монда, силсилаи чорабиниҳоро амалӣ менамояд.

- Айни ҳол тибқи Квотаи Президентӣ дар мактабҳои олии гуногуни кишвар 32 духтари болаёқат таҳсил намуда истодаанд. Ҳамасола аз тарафи масъулини шаҳр вохӯриҳо бо донишҷӯён ташкил гардида, ба ҳамаи онҳо аз ҷониби раиси шаҳр кӯмаки молиявӣ ва моддӣ расонида мешавад, - гуфт мудири шӯъбаи кор бо занон ва оилаи шаҳр Фирӯза Мӯъминова.

Тавре иттилоъ дода шуд, 21 нафар занону духтарон хизматчиёни давлатӣ ва 1709 зан дар мақоми роҳбарикунанда фаъолият доранд. Ҷоиз ба қайд аст, ки бо иқдом ва дастгириҳои бевоситаи Сарвари давлат ҳунарҳои мардумӣ дар вилоят аз нав эҳё гардида, дар ин раванд Мақомоти иҷроияи ҳокимияти давлатии вилояти Суғд бо мақсади эҳё намудани ҳунарҳои миллии ниёгон, бо ҷойи кор таъмин намудани занону духтарон, дастгирии ҳунарҳои дастӣ ва меҳнати хонагӣ Марказҳои таълимӣ - истеҳсолӣ таъсис додаанд, ки шумораи онҳо ба 282 адад расидааст.

Дар марказҳои таълимӣ - истеҳсолии атласу адрасбофӣ зиёда аз 654 дастгоҳи атласу адрасбофӣ насб гардида, 24 ҳазору 844 нафар занону духтарони хонашин ба ҳунармандӣ ҷалб шудаанд. - Бо ҷойи корӣ таъмин намудани занону духтарон дар меҳвари сиёсати имрӯзаи Пешвои миллат муҳтарам Эмомалӣ Раҳмон қарор дода шуда, дар ин самт таъсиси Грантҳои Президентӣ ва гранти Раиси вилоят баҳри фароҳам овардани ҷойҳои корӣ барои занону духтарон ва дастгирии рушди фаъолияти соҳибкории онҳо иқдоми назаррас аст, - гуфт Хуршедахон Хоҷазода. Қайд гардид, ки ҷиҳати дар амал татбиқ намудани дастуру супоришҳои Пешвои муаззами миллат вобаста ба таъмини занону духтарон бо ҷойи корӣ соли 2020 - ум 18 нафар зани ҳунарманд соҳиби Гранти Президентӣ гардиданд. Инчунин, аз ҷониби Раиси вилоят ба 60 зани ҳунарманд ба маблағи 420 ҳазор сомонӣ грант супорида шуда, ин иқдом дар соли 2021 низ идома хоҳад ёфт.

Шаҳбону ОЛИМОВА,

“Ҳақиқати Суғд”

Читать далее

ҚАДРИ ЗАҲМАТУ ТАЛОШ ВА ГИРОМИДОШТ

Дар доираи чорабиниҳои идона бахшида ба 76-умин солгарди Ғалабаи халқи шӯравӣ аз болои Германияи фашистӣ дар маркази вилояти Суғд-шаҳри Хуҷанд яке аз кӯчаҳои марказии маҳаллаи 12-уми шаҳр ба номи вакили Шӯрои Олии Ҷумҳурии Тоҷикистон, даъватҳои 3-4-5-6-7-8-9, иштирокчии Ҷанги Бузурги Ватанӣ ва ходими давлатӣ Усмон Қосимов номгузорӣ шуд.

Ба ин муносибат дар саргаҳи кӯча ҷамъомади тантанавӣ баргузор гардид, ки дар он собиқадорони хизмати давлатӣ, ходимони ҷамъиятӣ, аҳли илму адаб ҳузур доштанд. Чорабиниро бо сухани муқаддимавӣ раиси шаҳри Хуҷанд Фирдавс Шарифзода ҳусни ифтитоҳ бахшида, аз зиндагинома ва хидматҳои шоис-таи Усмон Қосимов ёдовар шуд. Қайд гардид, ки фаъолияти ҷамъиятию сиёсии зиндаёд У.Қосимов баъди сарбаландона баргаштанаш аз набардгоҳ соли 1946 дар кумитаи партиявии шаҳри Ӯротеппа (Истаравшан) оғоз шудааст.

Бештари солҳои роҳбариаш дар водии Вахш сипарӣ шуда, ноҳияҳои Шаҳртузу Кӯйбишев (Абдураҳмони Ҷомӣ), Колхозободу (Ҷалолиддини Балхӣ) Панҷ-ро сарбаландона роҳбарӣ кардааст. Усмон Қосимович 7 даъват вакили халқ дар Шӯрои Олии Ҷумҳурии Тоҷикистон буд, ки ба ҳайси намояндаи халқ дар органи олии қонунбарори мамлакат низ хизматҳои арзандаву шоиста баҳри пешрафти зиндагии мардум ба ҷо овард.

-Соли 1970 вилоятҳои ҷумҳурӣ бо қарори Президиуми Совети Олии СССР аз нав барқарор шуданд,-нақл кард хотираҳои худро собиқ котиби комиҷроияи вилояти Ленинобод Баҳриддин Аҳмадов,- Бюрои ташкилӣ Рифъат Ҳоҷиевро, ки то ин дам котиби якуми кумитаи партиявии шаҳри Ленинобод буд, котиби якуми кумитаи вилоятии партия ва Усмон Қосимовро раиси комиҷроияи вилоят интихоб кард. Насиб будааст, бо устод Усмон Қосимович 8 сол, то дами вопасини умрашон ҳамроҳ кор кардем ва аз он кас бисёр сабақи кору зиндагӣ омӯхтем. Вилояти аз нав ташкилёфта дар давраи роҳбарии ин ду нафар басо пеш рафту тараққӣ кард. Ҳарду ҳам барои халқу Ватан хизматҳои шоиста карданд. –

 Усмон Қосимовро яке аз поягузорони азхудкунии водии Вахш номидан мумкин аст,-гуфт раиси Шӯрои собиқадорони ҷангу меҳнати вилоят Турсунбой Раҳматов,- устод аз зумраи пешвоёни водӣ буданд, ки дар ҳаллу фасли умдатарин масъалаҳо роҳбарияти ҷумҳурӣ фикру мулоҳизаи эшонро ба инобат мегирифт. Бинобар он Усмон Қосимовичро раиси комиҷроияи яке аз вилоят-ҳои калонтарини ҷумҳурӣ-Ленинобод - Суғди имрӯза таъин карданд. Зиндагӣ ва фаъолияти роҳбарии Усмон Қосимов барои насли дирӯзу имрӯз ва фардои кишвар бешакку шубҳа намунаи ибрат аст... Хидматҳои шоистаи Усмон Қосимов бо орденҳои Ленин, «Инқилоби Октябр», ду ордени «Нишони Фахрӣ» ва якчанд Ифтихорномаҳои Президиуми Шӯрои Олии Ҷумҳурии Тоҷикистон қадршиносӣ шудааст.

Аз номи пайвандони Усмон Қосимов наберааш, сардори ШКД шаҳри Хуҷанд, полковники милитсия Илҳом Қосимов барои пос доштани хотираи неки бобояш ва абадӣ гардонидани номи ӯ арзи сипос кард.

Маъмурахон САМАДОВА,

“Ҳақиқати Суғд”

Читать далее

Баргузории Дави миллӣ дар Суғд

Субҳи дирўз дар доираи чорабиниҳои Рӯзи ҷавонон ва бо мақсади тарғиби тарзи ҳаёти солим дар тамоми шаҳру ноҳияҳои вилоят Дави миллӣ доир шуд.

Аз ҷумла, дар шаҳри Хуҷанд беш аз 12 ҳазор сокинони касбу кори гуногуни маркази вилояти Суғд дар чорабинии варзишӣ ширкат варзиданд.

Раиси вилояти Суғд Раҷаббой Аҳмадзода, роҳбарони як қатор идораву ташкилотҳои вилоятиву шаҳрӣ ва сокинони касбу кори гуногун дар ин маъракаи варзишӣ фаъолона иштирок намуданд.

Читать далее

Боздиди Раиси вилоят Раҷаббой Аҳмадзода аз ноҳияи Ашт

Раиси вилояти Суғд Раҷаббой Аҳмадзода дар ноҳияи Ашт бо рафти корҳои бартарафкунии оқибатҳои сел шинос шуд.

Тавре иттилоъ дода шуд,  пайомадҳои сел дар ноҳия бартараф гардида,  то имрӯз бо ҷалби техникаҳо ва ҳашари дастаҷамъона селроҳаҳо ва роҳҳои маҳаллӣ тоза карда шуд.

Аз ҷумла, дар Ҷамоати деҳоти Ашт масоҳати 900 метр селроҳа ва дар Ҷамоати деҳоти Ошоба 500 метр роҳ барқарор карда шуд.

Читать далее

14 May 2021

"Мо бо шумоем, мардуми Хатлонзамин!" Ирсоли кӯмакҳо ба сокинони зарардидаи шаҳру ноҳияҳои минтақаи Кӯлоб

Дар доираи роҳнамоиҳо ва ҳидоятҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз номи сокинони вилояти Суғд ба оилаҳои бар асари офатҳои табии рӯзҳои охир зарардидаи шаҳру ноҳияҳои минтақаи Кӯлоби вилояти Хатлон кӯмакҳо расонида шуд.

Кӯмакҳо аз орд, равған, шакар, макарон, биринҷ, картошка, сабзӣ, пиёз, гӯшти гов, гӯшти мурғ, мош, нахӯд, марҷумак, нон, оби нӯшокӣ, кӯрпаву кӯрпача, болишт, рахти хоб, чойник пиёла, обдаста ва дигар ҷиҳози зарурии рӯзгору масолеҳи сохтмонӣ иборат буда, он ба зарардидагон дастрас гардид.

Читать далее

САЙҚАЛИ ДОНИШ ВА МАЛАКАИ ЗАБОНДОНӢ

Дар шароити имрӯза яке аз ҳадафҳои муҳими низоми таҳсилоти олии кишвар, аз ҷумла Донишгоҳи давлатии ҳуқуқ, бизнес ва сиёсати Тоҷикистонро ворид шудан ба фазои байналхалқии таҳсилот ва омода намудани мутахассисони ҷавобгӯ ба талаботи бозори меҳнат ташкил медиҳад. Дар ин самт ба роҳ мондани ҳамкорӣ бо муассисаҳо ва ниҳодҳои илмию таълимии кишварҳои хориҷ муҳим дониста мешавад. Донишгоҳи мо низ дар самтҳои мухталиф ҳамкориҳои самаранок ва манфиатбахшро бо муассисаҳои олии таълимии кишварҳои дигар ба роҳ мондааст. Аз он ҷумла, соли 2019 донишгоҳи мо ҳамкориро дар доираи Барномаи табодули байналмилалии Эразмус + бо Коллеҷи Минтақаи Ҷанубу Шарқии Ирландияи Шимолӣ (Британияи Кабир) ба роҳ монд.

Дар доираи ҳамкорӣ бо Коллеҷи мазкур ректори Донишгоҳи давлатии ҳуқуқ, бизнес ва сиёсати Тоҷикистон, профессор М.М.Шарифзода ва ҳамоҳангсози лоиҳа А.Ҷӯраев чунин тасмим гирифтанд, ки бо ҷалби омӯзгори ботаҷрибаи ин муассисаи таълимӣ Деклан Флейнаган курси омӯзишии онлайниро барои омӯзгорони дарсдиҳанда дар гурӯҳҳои академии таҳсилоташон бо забони англисӣ ташкил намоянд.

Албатта, дар шароити имрӯза ба роҳ мондани таҳсилот бо забони англисӣ як қадами хеле муҳим дар самти воридшавӣ ба фазои таҳсилоти ҷаҳонӣ шинохта мешавад. Раёсати донишгоҳ кӯшиш ба харҷ дода истодааст, ки тадриҷан вазъи таҳсилу омӯзиш дар гурӯҳҳои академии бо забони англисӣ беҳтар гардонида шавад. Аз ин рӯ, ин иқдоми раёсати донишгоҳ аз ҷониби мо – омӯзгорони дарсдиҳанда дар гурӯҳҳои забони англисӣ бо хушнудӣ пазируфта шуд, зеро дарвоқеъ, ба таҳким бахшидан ва беҳтар намудани савияи дониши хеш дар самти академии забони англисӣ ниёз доштем. Курси онлайнӣ дар ҳаҷми 40 соат гузаронида шуд, ки қариб 3 моҳ идома ёфт. Воқеан, курси онлайнии баргузоршуда барои мо омӯзгорон дорои аҳамияти назаррасе буд. Зикр намудан зарур аст, ки дар доираи курси мазкур мо танҳо ба омӯзиши забони англисии академӣ маҳдуд нагаштем ва мӯҳтавои курси баргузоршуда хеле фарогир буд. Дар доираи курси онлайнӣ ба ду самти муҳим – навиштани академӣ дар забони англисӣ ва усули фаъоли таълим таваҷҷуҳ карда мешуд. Аз ин рӯ, мо – омӯзгорон на танҳо бо шеваҳои навишти академӣ дар забони англисӣ, балки бо дигар паҳлӯҳои таълиму омӯзиш дар низоми таҳсилоти олӣ шинос гардидем. Зикр намудан зарур аст, ки курси мазкур на танҳо омӯзиши забони англисии академӣ, балки ғолибан курси такмили ихтисоси омӯзгорони таълимдиҳанда бо забони англисӣ буд. Ҳамоҳангсози барнома устод Абдураҳим Ҷӯраев аз аввали шурӯи курси онлайнӣ кӯшиш намуд, ки самти он бештар ба эҳтиёҷоти омӯзгороне, ки фанҳои гуногунро бо забони англисӣ дарс мегӯянд, мувофиқ бошад. Аз ин рӯ, дар ташкили мӯҳтавои курс аз дидгоҳи ниёзҳои омӯзгорон ба паҳлӯҳои мухталифи таълиму омӯзиш дар мактаби олӣ бархӯрд карда шуд.

Хусусан, ба усулҳои педагогӣ ва методикаи таълим таваҷҷуҳи хоса дода мешуд. Дар самти навишти академӣ бо забони англисӣ истифодаи тарҳҳои мухталифи грамматикӣ, дақиқияти навишти матни академӣ, ибораҳо ва иборасозии академӣ, иҷрои машқҳо вобаста ба паҳлӯҳои мухталифи навишти академӣ, ислоҳи матнҳо, калимаву ибораҳои маҷозӣ ва истифодаи онҳо дар навишти академӣ, намунаҳои иқтибосоварӣ, роҳ надодан ба плагиаризм ва дигар мавзӯъҳои муҳим таваҷҷуҳ карда шуд. Дар доираи курси онлайнӣ ҳамчунин усулҳои мухталифи таълим ва масъалаҳои муҳими раванди омӯзиш мавриди баррасӣ қарор дода шуданд. Хусусан, дар доираи курси онлайнӣ ба дидгоҳҳои мубодилавии омӯзиши забон, фалсафаи омӯзиш ва парвариш, тақвияти ангезаи донишҷӯён ба таҳсил, шеваҳои ҷалби донишҷӯён ба омӯзиши фаъол, мусоидат ба ҳамкории донишҷӯён дар таҳсил, интихоби дурусти маводҳо, усулҳои арзёбӣ, баҳогузорӣ ва додани тавсияҳо ба донишҷӯён, намунаҳои баҳогузорӣ ва арзёбии муосир, шеваҳои пайвандӣ миёни хондан ва навиштан, намунаҳои хуби омӯзгорӣ, усулҳои маърӯза намудан бо истифода аз василаҳои мухталифи омӯзишӣ, ташкили кори гурӯҳӣ, омӯзиши лоиҳавӣ ва масъалавӣ, фикрронии интиқодӣ, таҷрибаи бақайдгирии нуктаҳои муҳокимаронӣ аз ҷониби донишҷӯён ва дигар паҳлӯҳои раванди таълиму омӯзиш таваҷҷуҳи хоса дода шуд.

Дар раванди машғулиятҳо аслҳои омӯзиши самаранок ва муносибати мусоидаткунанда ба таҳсил мавриди баррасӣ қарор гирифтанд. Дар умум зикр намудан бамаврид аст, ки паҳлӯҳои мухталифи усулҳои фаъоли таълим ва омӯзиш дар доираи курси онлайнӣ мавриди баррасӣ қарор дода шуданд, ки на танҳо дониши забонӣ, балки ҳамчунин малакаи таълимии омӯзгоронро тақвият бахшид. Дар муҳити курси онлайнӣ, ки аз ҷониби омӯзгори соҳибзабон баргузор карда шуд, мо – омӯзгорон бо ҷиҳатҳои муҳими таълим бо забони англисӣ, истифодаи ибораҳои зарурӣ ҳангоми баргузории машғулият, тарзи маърӯза намудан бо ин забон, омода намудани матнҳои академӣ бо забони англисӣ ва дигар малакаҳои муҳими навишти академӣ ва таълим ошно гардидем.

Агарчанде дар рӯзҳои аввали машғулият, бинобар сабабҳои техникӣ ва таҷрибаи кофӣ надоштан дар онлайн‐курсҳо мо ба мушкилоти муайян мувоҷеҳ гардидем, аммо тадриҷан ба муҳити курси онлайнӣ одат кардем. Аз ин рӯ, бо иштирок намудан дар курси мазкур мо бо таҷрибаи баргузории онлайн‐машғулиятҳо низ шинос гардидем. Албатта, ин як таҷрибаи хеле муҳим мебошад, ки ба мо дар оянда имкон медиҳад, дар чорабиниҳои мухталифи сатҳи байналхалқӣ иштирок ва маърӯза намоем. Таҷрибаи андӯхта аз ин курси онлайнӣ қадами муҳиме барои ворид шудан ба фазои ҷаҳонии таҳсилот мебошад. Ҷиҳати дигари муҳими ин курси онлайнӣ аз он иборат буд, ки омӯзгор Деклан Флейнаган маводи зиёди таълимиро ба мо пешниҳод намуд, ки барои дар минбаъда такмил бахшидани забони англисии академӣ ва беҳтар намудани усули таълим дар мактаби олӣ зарур мебошанд. Маводи пешниҳодшуда ҳамчунин, барои донишҷӯёни мо, ки дар гурӯҳҳои таҳсилоташ бо забони англисӣ таълим мегиранд, метавонад муфид бошад.

Аз натиҷаҳои курси омӯхташуда мо – омӯзгорон он ҷиҳатро дарк намудем, ки дар муҳити таҳсилоти олӣ роҳи якнавохти таълим ва омӯзиш чандон самаранок нест ва нахоҳад буд. Омӯзиши курси мазкур ба мо имкон дод, ки бори дигар перомуни ҷиҳатҳои мухталифи раванди таълим дар муассисаҳои олӣ биандешем.

Шарофиддин СОЛИЕВ,
муаллими калони кафедраи сиёсатшиносии Донишгоҳи
давлатии ҳуқуқ, бизнес ва сиёсати Тоҷикистон

Читать далее

ТАБИАТ - ОМЎЗГОР ВА МУРАББИИ ҶОМЕА

Инсон муъҷизаи олитарини табиат маҳсуб ёфта, ҳаёти ӯ бо табиат тавъам аст. Дар аввалҳо муносибати инсон бо табиат хусусияти истеъмолӣ дошт, алҳол давраи гузариш ба фарҳанги экологӣ фаро расидааст. Ҳифзи табиат ҳаёти ояндаи насли муосир ва кулли организмҳои зиндаи сайёраро тақозо менамояд. Бинобар ин, давраҳои охири асри ХХ ва оғози асри ХХI давраи хеле муҳиму мураккаби ташаккули муносибати ғамхорона ба табиатро дар бар мегирад ва фарҳанги экологии фарди алоҳида ва ҷомеа дар умум муҳимияти хосаро касб менамояд.

Фарҳанги экологӣ заминаи боэътимоди ташаккули маърифати экологии аҳолӣ дар замони муосир буда, дар нигоҳдошти захираҳои табиӣ ва таъмини истифодаи оқилонаи онҳо мавқеи ҳалкунандаро дорост. Тағйирёбии асосҳои муносибати инсон ба табиат инъикосгари фарҳанги экологии ҷомеа буда, аз хусусиятҳои таркибие иборат аст, ки давоми таҳқиқот муайян гардидаанд.

Ҳамоҳангсозии ҳаёти инсон бо табиат новобаста аз муфидӣ, дасткашӣ аз сохтори иерархии олам ва фаҳмиши узвҳои низоми ягона будани онҳо, таъсири мутақобилаи инсон ва табиат бо қонеъсозии талаботи кулли ҷамоаҳои табиӣ, халалдор насохтани мувозинаи табиӣ ва ғайра сатҳу сифати фарҳанги экологиро нишон медиҳанд. Риояи ҳатмии шартҳои асосии ҳифзи табиат дар шакли тарбия ва тартиботи оммавӣ самти асосии ташаккули фарҳанги экологӣ мебошад. Паҳннамоии маълумоти экологӣ байни табақаҳои мухталифи ҷомеа бояд самтҳои серҷабҳаро дарбар гирифта бошад.

Хусусан, таъмини дастрасии бевоситаи аҳолӣ ба махзани маълумот оид ба вазъи муҳити зист, нишондодҳои сифатӣ, тағйирёбии онҳо бо муайян кардани сабабу оқибатҳо, нашри адабиёти ҷолиби диққат дар равияи рангорангӣ вобаста ба синну сол, сатҳи маълумот ва ғайра хеле муҳим буда, таъмини меъёрҳои ҳуқуқии бехатарии ҳаётро ифода менамояд. Масъалаи маърифати экологии аҳолӣ дар сиёсати экологии Ҳукумати Ҷумҳурии Тоҷикистон самти асосӣ маҳсуб ёфта, баҳри таъмини ташаккули маърифати экологӣ дар даврони Истиқлолияти давлатӣ тадбирҳои сершумор амалӣ шудаанд. Таҳия ва татбиқи барномаҳои давлатии комплексии рушди тарбия ва маърифати экологии аҳолии Ҷумҳурии Тоҷикистон барои солҳои 2001‐2010 ва то давраи соли 2020 имкон фароҳам овард, ки дар сатҳи муассисаҳои томактабӣ, миёнаи умумӣ, миёнаи махсус ва таҳсилоти олӣ омӯзиши муаммоҳои ҳифзи табиат тавассути ҷорӣ намудани фанҳои мухталифи ҳатмӣ ба роҳ монда шавад. Эҳтимол меравад, ки дар муҳлати наздик дар самти рушди фарҳанги экологӣ ҳамчун ҷузъи таркибии маърифати экологии аҳолӣ Барномаи давлатии махсус қабул мегардад, ки заминаи боэътимоди рушди тарбияи экологӣ шуда метавонад. Зеро, тарбия ва фарҳанги экологии аҳолӣ ҳалқаҳои занҷирии маърифати экологӣ буда, барои ташаккули шахсиятҳои табиатдӯст хеле зарур ва муҳим ба шумор меравад.

Аслан, мебояд дарк намуд, ки фарҳанги экологӣ марҳалаи олии экологикунонии шуур мебошад ва алоқаманд ба сатҳи малакаи муносибати ҷомеа ба табиат аст. Табодули андешаи инсон ба табиат, яъне гузариш аз фаҳмиши манбаи моддӣ будани табиат ба фаҳмиши манбаи маънавӣ дар заминаи ҳамоҳангсозии раванди рушди табиат ва башарият ғояҳои мафкуравӣ маҳсуб меёбад. Дар ин радиф метавон зикр намуд, ки моҳияти маърифати экологӣ бо мутаносибии шуур–тафаккур–дониш–фаъолият инъикоси воқеӣ ёфта бошанд, низоми арзиш–муносибат–ахлоқ–масъулият асоси тарбияи экологиро инъикос медиҳад.

Зеро дар натиҷаи таъсири мақсаднок ба рӯҳу маънавияти шахс тарбияи экологӣ ҷараён гирифта, дар умум ба ташаккули сатҳи муайяни фарҳанги экологӣ мусоидат менамояд. Боиси тазаккур аст, ки ташаккули фарҳанги экологӣ дар натиҷаи тарбияи экологӣ раванди мураккаби муттасил буда, ба омилҳои сершумори маънавӣ рӯҳӣ ва физиологӣ такя менамояд. Масалан, гузоштани хиштҳои аввали таҳкурсии тарбияи экологӣ дар кӯдакистонҳо ва муассисаҳои томактабӣ пойдевори дониши экологӣ дар синфҳои ибтидоӣ мешавад. Чунин замина бо инкишофи рӯҳӣ ҷисмонии кӯдак ва таҷрибаҳои шахсии ӯ дар асоси мушоҳидаҳои муҳити атроф тавъам буда, мебояд бо таҳлили волидайн, омӯзгор сурат гирад ва ҳисси кунҷкобии кӯдак пурра қонеъ шавад. Дар ин раванд масъулияти омӯзгор ё худ мураббӣ хеле баланд аст ва ӯ мебояд ҳамеша дар ҷустуҷӯи роҳҳои самараноки таълим ва тарбияи экологӣ бошад, ки дар ниҳоди кӯдак бедор намудани ҳисси табиатдӯстиро имконпазир гардонад. Ташаккули фарҳанги экологӣ бо тарбияи экологии кӯдак тавассути кашидани расми гулу барг, расми момохолаку шабпарак ва ғайра дар ин раванд муҳим мебошад. Аниқ, ки ташаккули фаҳмиши аҳамияти барг дар ҳаёти растанӣ кӯдакро аз кандани барг бозмедорад ва ӯ танҳо дар фасли тирамоҳ ба барги афтодаи наботот, чун объекти зебоӣ, лекин ғайризинда назар мекунад. Аллакай кӯдак ба шинонидани дарахт, нигоҳубину парвариши гулу буттаҳои хонагӣ шавқ пайдо менамояд. Кӯдаке, ки бо дастони худ гуле парвариш кардааст, ҳеҷ гоҳ гули кӯчаву хиёбонҳоро намеканад ва баръакс, дар нашъунамо ва гулпӯш намудани мавзеъҳои ҷамъиятӣ талош менамояд. Исбот шудааст, ки тарбияи экологии кӯдак аз давраи аввали инкишоф боиси рушди зебоипарастӣ ва қадрдонии заҳмати дигар фард мешавад. Яъне, метавон қайд намуд, ки тарбияи экологӣ ҷузъи муҳими ташаккули кӯдак дар рӯҳияи ватандӯстӣ, ҳифзи зебоӣ ё худ фарҳанги инфиродии кӯдак мешавад.

Фаҳмидан ва донистани асрори табиат тавассути иштироки бевоситаи кӯдак дар ин раванд имкон медиҳад, ки дар ӯ тасаввуроти комил оид ба мавҷудоти зиндаи олам ташаккул меёбад. Хусусан, дар зинаҳои минбаъдаи таҳсилот рушди тарбияи экологии кӯдак боиси ташаккули сатҳи баланди фарҳанги экологӣ ва ба воя расидани фарди табиатдӯсти соҳибфарҳанг мегардад. Тарбияи экологӣ якҷоя бо пайдо намудани муносибати некӣ, меҳрубонӣ нисбат ба намояндагони олами ҳайвонот ва наботот барои ташаккули фарҳанги инсонӣ, аз он ҷумла фарҳанги экологӣ мусоидат менамояд. Ҷоиз ба қайд аст, ки раванди тарбияи экологӣ аз давраи хурдсолӣ то балоғат ва шаҳрвандии комилҳуқуқӣ мебояд муттасил ҷараён ёбад. Зеро, канда шудани ҳалқае аз ин занҷир боиси номукаммалии фарҳанги экологӣ ё худ пайдо гаштани рӯҳияи бепарвоӣ, бефарқӣ ба табиат шуда, дар оянда рафтору муносибати фард ба табиат эҳтиёткорона набошад. Барои ин, хусусан дар муассисаҳои томактабӣ ва синфҳои ибтидоии муассисаҳои таҳсилоти миёнаи умумӣ мебояд алоқамандии намояндагони олами набототу ҳайвонот, манзили истиқоматӣ, мактаб, ҳавлӣ, маҳалла, деҳа ҳам дар ҳолати алоҳидагӣ ва ҳам дар ҳамбастагӣ мавриди омӯзиш қарор дода шавад.

Алалхусус, таъмини алоқаи муассир бо экосистемаҳои муҳити зисти худи кӯдак, унсурҳои муҳити иҷтимоӣ дар алоқамандӣ бо табиат хеле муҳим аст. Зеро фарде, ки дорои тарбияи экологӣ мебошаду сатҳи баланди фарҳанги экологиаш ташаккул ёфтааст, дар оянда шахсияти ғамхори ҷомеа ба воя расида, ба масоили экологии ҷомеа бефарқ буда наметавонад. Ӯ, ки худ фарҳанги экологии баланд дорад, ҷиҳати риояи талаботи башардӯстона ба истифодабарии сарватҳои табиат ва узвҳои дигари ҷомеа саҳмгузор мешавад. Хусусан, ташкили ҳизбу ҳаракатҳои экологӣ ва амалинамоии тадбирҳои пешгирии ифлосшавии обу ҳаво, муомилоти оқилона бо партовҳои маишию саноатӣ ва дигар падидаҳои номусоиди ҷомеа меъёри ҳамарӯзаи фарди соҳибфарҳанг баҳри ҳифзи табиат ва саломатии аҳолӣ мегардад.

Зеро, ҳамтаъсирии инсон, ҷомеа ва муҳит меъёри интегралии замони муосир ва оянда маҳсуб меёбад. Фарҳанги экологӣ ба саломатии аҳолӣ натанҳо аз нуқтаи назари набудани беморӣ ва шикастҳо, балки бо ҳолати беҳбудии ҷисмонӣ, ақлӣ, шуур ва иҷтимоӣ нигоҳ карданро тақозо менамояд. Чунки имрӯзҳо дар раванди муосири ҷаҳонишавӣ бо сабаби норасоии фарҳанги экологӣ қисме аз ҷомеа шиорҳои ҳифзитабиатиро ба сифати ниқоби тавоно истифода намуда, ба фаъолияти иқтисодии баъзе намудҳои истеҳсолот (истифодаи неруи атомӣ) ва фаъолияти истеҳсолии корхонаҳои азими саноатӣ муқовимати шадид нишон дода, боиси коҳишёбии иқтисодиёт ва ноустувории давлатдорӣ ҳам шуда истодаанд.

Ҳол он, ки мебоист фарҳанги экологии фарди алоҳида ба ташаккули фарҳанги экологии ҷомеа мусоидат намуда, дар заминаи ташаккули фарҳанги аслӣ барои беҳбудии ҳам табиат ва ҳам ҷомеа мусоидат намояд.

Табиат барои ҳар як фарди алоҳида ва умуман, ҷомеа ҳам омӯзгору ҳам мураббӣ мебошад. Бояд ҳамаи неруи ҷомеа баҳри тарбияи экологӣ ва дар ин замина баҳри ташаккул ва рушди фарҳанги экологӣ равона карда шавад. Пойдевори мустаҳками фарҳанги экологӣ барои ташаккулу пойдории маърифати экологии аҳолӣ мусоидат менамояд. Итминон аст, ки танҳо болошавии маърифати экологии аҳолӣ инқирози табиатро бозмедорад ва истифодаи оқилонаю самараноки захираҳои табииро ба нафъи ҷомеа таъмин менамояд. Зеро инсоният ҳамеша бояд дар хотир нигоҳ дорад, ки “Табиат на мероси ниёгон бар мост, балки мо табиатро аз фарзандони худ ба қарз гирифтаем”.

Ф.ОЧИЛОВА, дотсент, номзади илмҳои биологӣ,
И.ШАРИФХӮҶАЕВ, донишҷӯи курси 5‐уми факултети геоэкологияи МДТ
«Донишгоҳи давлатии Хуҷанд ба номи академик Бобоҷон Ғафуров»

Читать далее

Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Ӯзбекистон Шавкат Мирзиёев суҳбати телефонӣ анҷом доданд

Дирӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Ҷумҳурии Ӯзбекистон муҳтарам Шавкат Мирзиёев суҳбати телефонӣ доир намуданд.

Дар ҷараёни суҳбат роҳбарони ду давлат дар фазои дӯстӣ ба муносибати фарорасии иди мубораки Фитр бо таманниёти некӯаҳволӣ, сулҳу субот ва шукуфоӣ унвонии мардумони Тоҷикистон ва Ӯзбекистон мубодилаи табрикоти самимӣ намуданд.

Читать далее

Пешвои миллат Эмомалӣ Раҳмон бо раиси ноҳияи Вахши вилояти Хатлон суҳбати телефонӣ анҷом доданд

Дирӯз Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо раиси ноҳияи Вахши вилояти Хатлон Қурбоналӣ Юсупов суҳбати телефонӣ анҷом доданд.

Раиси ноҳияи Вахш ба Пешвои миллат муҳтарам Эмомалӣ Раҳмон доир ба тадбирҳои бартарафсозии оқибатҳои офатҳои табиӣ ҳисобот дод.

Читать далее