18 January 2022

АШТ - БЕҲТАРИН НОҲИЯИ КИШОВАРЗӢ

Чуноне ки ҳамагон огаҳӣ доранд, санаи 10 – уми январи соли равон озмуни вилоятии «Оила, кӯча, маҳалла, деҳа, деҳот ва шаҳраки беҳтарин» ҷамъбаст гардид. Дар доираи он ноҳияи Ашт барои нишондҳандаҳои назаррас ноҳияи беҳтарини кишоварзии вилояти Суғд дар соли 2021 дониста шуда, муовини якуми Сарвазири мамлакат Давлаталӣ Саид ва Раиси вилояти Суғд Раҷаббой Аҳмадзода раиси ноҳияи Ашт Зариф Мирдадоро бо Диплом, вимпел ва рамзи “Ноҳияи беҳтарини кишоварзӣ” сарфароз гардониданд.

Қайд кардан ба маврид аст, ки озмуни мазкур бахшида ба 30-солагии Истиқлоли давлатии Ҷумҳурии Тоҷикистон тибқи қарори Раиси вилоят Раҷаббой Аҳмадзода гузаронида шуда буд.

Бо супориши роҳбарияти идора, ҷиҳати огаҳии бештаре дарёфтан аз дастовардҳои соҳаи кишоварӣ бо раиси ноҳияи Ашт Зариф Мирдадо дар тамос шудем:

- Пеш аз ҳама, ғолибият дар озмуни вилоятиро барои Шумо ва мардуми шуҳратманди ноҳияи Ашт муборакбод мегӯям. Мехостам, мушахассан оид ба нишондиҳандаҳои назарраси соҳаи кишоварзӣ, ҳамчун соҳаи пешбарандаи иқтисодиёти ноҳия маълумот дода бошед.

- Ташаккур, воқеан бо мақсади бо дастовардҳои арзандаи меҳнатӣ истиқбол гирифтани ҷашни таърихии миллат – 30 - солагии Истиқлоли давлатии Ҷумҳурии Тоҷикистон мақомоти иҷроияи ҳокимияти давлатии ноҳия дар баробари таъсиси коргоҳҳои саноатии нав, истифодаи самараноки иқтидорҳои мавҷуда, дастгирии соҳибкорӣ, рушди сохтмон ва шаҳрсозӣ, аз ҷумла баланд бардоштани ҳосилнокии зироатҳо ва боғу токзор, афзоишисаршумори чорво, беҳтар намудани вазъи обрасонӣ, барқарор намудани пойгоҳҳои обкашӣ, азхудкунии заминҳои навро аз самтҳои афзалиятноки фаъолияти худ қарор додем.

Чуноне таъкид гардид, фаъолияти соҳаи кишоварзӣ соҳаи асосии пешбарандаииқтисодиётиноҳия буда, барои таъмини рушди бонизоми соҳа, иҷрои барномаҳои соҳавӣ, истифодаи самараноки обу заминҳои корам чораву тадбирҳои зарурӣ амалӣ намуда истодааст.

Пахтакорӣ - соҳаи асосӣ ва афзалиятноки кишоварзӣ маҳсуб ёфта, соли равон дар ноҳия барои таъмини рушди устувори соҳа, зиёд гардидани ҳаҷми истеҳсоли пахта тамоми имконияту захираҳо равона карда шуданд. Дар хоҷагиҳои пахтакори ноҳия соли равон дар майдони 6183 гектар кишти пунбадона бо истифодаи тухмиҳои хушсифати серҳосили навъҳои “Флеш”, “Дӯстӣ”, “Майа” дар муҳлатҳои муқаррашуда гузаронида шуд. Саривақт гузаронидани тадбирҳои агротехникии нигоҳубини пахтазор ва ҳимоя аз касалиҳову ҳашароти зараррасон, имконият фароҳам овард, ки соли равон дар хоҷагиҳои пахтакории ноҳия ҳосили фаровон ҷамъоварӣ карда шавад. Ба санаи ҳисоботӣ дар ноҳия ба миқдори зиёда аз 19 ҳазору 200 тонна ҳосили пахта ҷамъоварӣ ва ба корхонаҳои коркард супорида шудааст, ки баробари 124,4 фоизи дурнамои солона буда, нисбат ба нишондиҳандаи ҷамъбастии соли сипарӣ 5660,3 тонна зиёд мебошад. Ҳосилнокии миёнаи пахтазори ноҳия соли равон ба 31,1 сентнерӣ расонида шуд, ки аз нишондиҳандаи ҷамъбастии соли 2020 (22,4 сентнерӣ) 8,7 сентнерӣ зиёд мебошад. Боиси қайд мебошад, кидар давраи соҳибистиқлолии кишвар, пахтакорони ноҳия ба чунин нишондиҳандаҳои баланди истеҳсолӣ бори аввал ноил гардиданд.

Ҷиҳати таъмини рушди минбаъдаи соҳаи боғу токпарварӣ, соли равон аз ҳисоби заминҳои бекорхобида, чарогоҳ ва талу теппаҳо дар майдони 391,1гектар боғи нав бунёд карда шудаанд, ки аз онҳо 7 гектар боғи интенсивии қатрагӣ буда, дар он кӯчати бодоми аз хориҷи кишвар воридшуда, шинонида шудааст. Аз майдони умумии боғҳои навбунёд, 150 гектарашро боғҳои ҳуч ташкил медиҳад. Инчунин дар майдони 421,2 гектар боғҳои куҳна барқарор шуданд.

Ҷиҳати мунтазам ба роҳ мондани таъминоти аҳолӣ бо маҳсулоти кишоварзӣ барои зиёд намудани майдони гармхонаҳои доимоамалкунанда чораҷӯӣ шуда, ҳоло масоҳати онҳо ба 1,6 гектар расонида шудааст.

Бо мақсади нигоҳдорӣ ва афзун намудани содироти маҳсулоти кишоварзӣ аз ҷумла, меваю сабзавот дар назди ҶСК «Зардолу компания» 1 сардхона бо ғунҷоиши 200 тонна ва дар хоҷагии деҳқонии “Ифтихор” 1 сардхона бо ғунҷоиши 60 тонна фаъолият дорад.

Роҳбарияти ноҳия бобати вазъи кунунии соҳаи обрасонӣ маълумот дода, афзуд, ки дар асоси Қарори Ҳукумати Ҷумҳурии Тоҷикистон аз 1 - уми августи соли 2018, таҳти рақами 374 “Доир ба беҳтар намудани вазъи мелиоративии заминҳои обёришавандаи кишоварзии Ҷумҳурии Тоҷикистон барои солҳои 2019 - 2023” ва қарори дахлдори Раиси вилояти Суғд, нақшаи чорабиниҳои махсус тасдиқ гардида, тибқи он дар ноҳия то соли 2023 беҳтар намудани ҳолати мелиоративии 7231 гектар заминҳои обӣ пешбинӣ шудааст.

Дар соли 2021 тибқи нақша, дар ноҳия беҳтар намудани ҳолати мелиоративии 1446 гектар бо маблағи 1 миллиону 446 ҳазор сомонӣ, аз ҷумла аз ҳисоби буҷети маҳаллӣ беш аз 1 милион сомонӣ ва аз буҷети мутамарказ 434 ҳазор сомонӣ, пешбинӣ шудааст. Дар давраи ҳисобии соли сипарӣ 53,5 километр заҳбуру заҳкашҳо тоза карда шуда, дар ин замина ҳолати мелиоративии 1526 гектар замини обии ноҳия беҳтар карда шуд, ки баробари 105,5 фоизи нақшаи солона мебошад.

 - Воқеан, давоми чанд соли охир дар соҳоти мухталифи ноҳия басо пешравиҳову дастовардҳои назаррас дида мешавад. Бовардорем, ки роҳбарият ва масъулини сохтору мақомоти гуногун дар раванди ободкориву созандагиҳо баҳри рушду тараққиёти иқтисодиёти кишвар фаъолияти боз пурсамарро пеш хоҳанд гирифт ва дар ин ҷода барояшон барору комёбиҳо хоҳонем.

Маъмурахон САМАДОВА,

Cуратгир И. РАБИЗОД,

“Ҳақиқати Суғд"

Читать далее

ҚАДРШИНОСИИ ҶАМОАТИ ДЕҲОТИ ВОРУХ

Даҳуми январи соли равон Раиси вилоят Раҷаббой Аҳмадзода ба ғолибони озмуни вилоятии «Оила, кӯча, маҳалла, деҳа, деҳот ва шаҳраки беҳтарин», ки ба муносибати 30-солагии Истиқлолияти давлатии Ҷумҳурии Тоҷикистон эълон гардида буд, диплому мукофотпулӣ супорид. Аз ҷумла, Ҷамоати деҳоти Ворухи шаҳри Исфара чун Ҷамоати деҳоти беҳтарин мақоми аввалро сазовор шуд.

Фазои соҳибистиқлолии кишвар, сулҳу оромии Ватанамон ва мардуми маърифатпарвару фарҳангдӯсти Тоҷикистон буд, киҳатто гӯшаи дурдасттарини кишвари мо низ ободу зебо гардид. Ба истиқболи 30- солагии Истиқлолияти давлатии кишвар бошад, кулли мардуми шарифи Ватани офтобрӯяамон рӯ ба ободониву беҳбудии шаҳру ноҳияву маҳаллаҳо ниҳоданд. Аз ҷумла, Ҷамоати деҳоти Ворух, кидар як гӯшаи дурдасттарини диёр ҷойгир аст, ободу зебо гардид, ки инро ҳангоми ташрифашон ба ин мавзеъ Пешвои муаззами миллат хосатан таъкид доштанд.

Ба истиқболи ҷашни бузурги миллӣ дар ин диёри ҳамешасабз бинои Қасри фарҳанг на танҳо таъмиру таҷдид, балки ҳунармандони чирадаст бо истифода аз санъати меъмории миллии қадима девораҳо ва сутунпояҳои онро оро дода, дар саҳни он ниҳолу гулҳои ҳамешасабз шинонида, пурра чароғон карданд, ки алҳол он барои сокинон ва меҳмонон яке аз мавзеъҳои истироҳатию фароғатӣ маҳсуб ёфта, ба ҳусни деҳот боз ҳусни дигар зам намуд.

Ҳамчунин дар доираи «Солҳои 2019 - 2021 «Солҳои рушди деҳот, сайёҳӣ ва ҳунарҳои мардумӣ» дар замини бекорхобида бунёди Маркази фарҳангӣ– фароғатӣ ва варзишии «Ширин» ва дар гирду атрофи он шинонидани беш аз 400 бех ниҳоли мевадиҳандаву сояафкан ва гулҳои рангоранг туҳфае буд аз ҷониби соҳибкор Сорбон Савриддинов ба ифтихори ҷашни бузурги миллӣ.

- Барои мо, ворухиён, соли 2021 соли хотирмон ва таърихӣбуд,- гуфт раиси ҶамоатидеҳотиВорух Меҳринисо Раҳматова,- зеро моро мушарраф гардид, ки бо иштироки Асосгузори сулҳу ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон чанд иншооти ҷашниро ба истифода диҳем. Пешвои муаззами миллат ҳангоми мулоқот на танҳо дарди дили ҳар яке аз мо, сокинонро гӯш карданд,инчунин дар баробари дастуру пешниҳодҳои муфид, аз камбудиву норасоии деҳот пурсон гашта, баҳри дастгирии ҷавонон ва таъмин намудан бо мутахассисони касбҳои мухталиф бист нафар толибилмон давоми се соли минбаъда ба мактабҳои олии пойтахт соҳиби квотаи Президентӣ гардиданд. Соли хониши 2020 - 2021 –ум беш аз сесад нафар хонандагон муассисаи таълимиро хатм намуда, 276 нафар ба номи баланди донишҷӯй шарафёб шуданд. Алҳол 230 нафар духтарон дар донишкадаву донишгоҳҳои олии кишвар ва берун аз он таҳсили хешро идома дода истодаанд.

- Мардуми деҳоти Ворух, ба ибораи Пешвои муаззами миллат «меҳнатқарину заҳматкаш ва илмҷӯву ҷӯянда»-анд, - суханашро идома дод М. Раҳматова, - соли сипарӣ бо дастгирии саховатпешагони диёр 14,5 километр роҳ мумфарш ва 30 километр роҳҳои дохили маҳаллаҳо шағалпӯш ва Беморхонаи деҳот бо харҷи миллион сомонӣ таъмиру тармим гардиданд. Бо иваз намудани сесад адад симчӯб маҳаллаҳои деҳаамон чароғон, 15 километр қубури оби нӯшокӣ васл ва таъмир гардида, дар масофаи 12 километр ба ҷӯйборҳо қубур партофта шуд.

Бо мақсади ободонӣ дар бист маҳаллаи деҳот, зиёда аз 1000 бех дарахти ороишию сояафкан ва зиёда аз 200 ҳазор бех гули рангорангу ҳамешабаҳор шинонида шуд. Устодону омӯзгорону толибилмон ва табибону ҳамширагони шафқат низ дар ободонии гирду атрофи 12 муассисаи таълимӣ, як кӯдакистон, беморхонаву Маркази саломатӣ, ду Хонаи саломатӣ ва чор бунгоҳи тиббӣ бетараф набуданд, - қайд кард раиси Ҷамоати деҳоти Ворух.

Воқеан, мардуми сулҳ дӯсту фарҳангпарвар новобаста аз он ки мушкилот аз ҷойгирии наздисарҳадӣ доранд, аммо рӯҳияи шикастнопарзири ворухиён буд, ки рӯ ба ободкориву созандагӣ ниҳода, дар рушду нумӯи зодгоҳашон саҳми арзандаи хешро гузошта истодаанд.

Тавҳида ҶӮРАЕВА,

«Ҳақиқати Суғд

Читать далее