САФИ КИТОБХОНҲО ДАР ВИЛОЯТ МЕАФЗОЯД

Подробности статьи

Воқеан, Озмуни ҷумҳуриявии “Фурӯғи субҳи доноӣ китоб аст”, ки бо ташаббусу сарпарастии бевоситаи Асосгузори сулҳу - ваҳдати миллӣ Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва бо талошҳои пайвастаи Мақомоти иҷроияи ҳокимияти давлатии вилоят баргузор мегардад, он барои боз ҳам баланд бардоштани завқи китобхонӣ, таҳкими неруи зеҳнӣ, дарёфти ҷавонони боистеъдод ва ташаккули ҳисси худогоҳиву ватандӯстӣ заминаҳои мусоид фароҳам меоварад.

Сафия Раҷабова, хонандаи синфи 3 – юми муассисаи таҳсилоти миёнаи умумии №2, шаҳраки Чорухдаррони шаҳри Гулистон буда, имсол дар даври вилоятии озмуни “Фурӯғи субҳи доноӣ китоб аст” аз рӯи номинатсияи адабиёти кӯдакону наврасон ва осори шифоҳӣ мақоми аввалро соҳиб шуд. Духтарак, ки лаёқати хуби ҳифз ва қироат кардани осори адабиро дошт, муаллимон аз синфи як ӯро ба озмун ҷалб карда буданд. Хушбахтона, маҳз соли ҷорӣ барояш муяссар шуд, ки ба даври ҷумҳуриявии озмун роҳхат ёбад. Сарфи назар аз хурдсолӣ хонандаи муваффақ повести “Одина” – и устод Садриддин Айнӣ, 35 ҳикоя, 24 афсона, ғазалу рубоӣ, чистону зарбулмасал аз ёд кардааст.

Муаллима Шафоат Қосимова дар бораи Сафия Раҷабова гуфт, ки шогирдаш ҳофизаи боқувват ва истеъдоди нақлу қироат карданро доро мебошад. Муаллима давоми се сол пайваста бо Сафияи хушзеҳн корбарӣ ва дилашро ба омӯзиш гарм кард, барои интихоби осор, шарҳу тафсири он кӯмак менамояд. Усмонҷон Давлатов, падари Сафия Раҷабова аз он хурсанд аст, ки фарзандаш ба китобхонӣ майл дорад. Вай то қадри имкон мекӯшад, ки духтараш ба китобҳои тавсияшуда дастрасӣ дошта бошад. Барои падар муҳим он аст, ки фарзандаш тариқи озмун ба китобхонӣ одат намуда, осори хондаашро сарфаҳм равад. Файзулло Дилшодзода низ дар номинатсияи эҷоди назму наср аз зумраи ғолибони даври вилоятӣ аст. Ӯ соли дуюм аст, ки дар озмун ширкат меварзад.

‐Вақте ки барои худ мехонед, дар баробари ин ба шумо мукофот медиҳанд, албатта, падидаи ҷолиб ва ифтихорист. Ҳар касе, ки ба омӯзиш мепардозад, соҳиби бузургтарин мукофот, дониш сазовор мегардад. Ман ҳамчун эҷодкори ҷавон пайваста талош дорам, ки навовар бошам. Барои шинохт, санҷиш ва баҳодиҳии худ озмун ёрӣ мерасонад.

Аслан, то чӣ ҳад озмуни “Фурӯғи субҳи доноӣ китоб аст” барои китобхон шудани насли наврас саҳм дорад?

Тавре аз масъулони даври вилоятии озмун иттилоъ ёфтем, соли 2020 дар даври аввал 62 ҳазору 139 нафар довталаб ширкат варзидаанд, ки аз ин ҳисоб 47 ҳазору 330 нафар хонандаи муассисаҳои таҳсилоти миёнаи умумӣ, 2 ҳазору 130 нафар донишҷӯ мебошанд. Ҳамин тариқ, соли 2021 дар даври аввали озмун 118 ҳазору 146 нафар довталаб дар озмуни “Фурӯғи субҳи доноӣ китоб аст” иштирок кардаанд. Аз ин шумора 104 ҳазор нафар хонандагони муассисаҳои таълимӣ ва 12 ҳазору 247 нафар омӯзгор мебошанд. Аз рӯи омори Раёсати маорифи вилояти Суғд соли 2022 дар даврҳои якум ва дуюми озмуни “Фурӯғи субҳи доноӣ китоб аст” 38 ҳазору 523 нафар хонандагон, донишҷӯён, омӯзгорону намояндагони касбу кори гуногун иштирок карданд. Аз ин ҳисоб ба даври вилоятии озмун 900 нафар роҳхат гирифтаанд. Тибқи хулосаи ҳайати ҳакамон 91 нафар ба даври ҷумҳуриявии озмун роҳ ёфтанд. Иловатан, соли ҷорӣ дар даври якум ва дуюми озмуни “Илм фурӯғи маърифат” 48 ҳазору 906 нафар хонанда, донишҷӯ, омӯзгор ва шахсони касбу кори гуногундошта ширкат варзиданд.

Тавре сармутахассиси Раёсати маорифи вилояти Суғд Бахтиёр Сарҳадов гуфт, иштирокдорони озмун аз шаҳрҳои Хуҷанд, Бӯстон, Истаравшан, Панҷакент, Конибодом, Гулистон ва ноҳияҳои Бобоҷон Ғафуров, Ашт, Айнӣ ва Зафаробод фаъол буданд. Аз масъулони дигар шаҳру ноҳияҳо низ тақозо мешавад, ки ҷиҳати ҷалби бештари иштирокдорони китобхон мусоидат кунанд.

‐Мушоҳида мешавад, ки иштирокдорон ба озмун боз такроран ҷалб мешаванд. Воқеан, хеле хуб аст, ки насли наврасу ҷавон ба китобхонӣ рӯ меоранд. Албатта, бо рӯ овардан ба китобхонӣ имкон дорем, ки насли навро ба роҳи рост ҳидоят кунем, ҳамзамон, сатҳи дуздию ҷинояткорӣ ва гаравиш ба ҳизбу ҳаракатҳои гуногунро дар байнашон ба ҳадде кам кунем. Ин ҷиҳат ҳам хеле муҳим аст, ки барои маблағи озмун шуда китоб хондан лозим нест. Муҳим ин аст, ки воқеан китобхон шавему доираи ҷаҳонбиниро фарох кунем, дар ҳама ҳолат бомулоҳиза бошему инсондӯст шавем. Воқеан, дар ин самт китоб роҳнамои беҳтарин аст, мегӯяд Бахтиёр Сарҳадов.

Мутрибахон Мавлонова – устоди кафедраи адабиёти классикии факултети филологияи Донишгоҳи давлатии Хуҷанд ба номи академик Бобоҷон Ғафуров дар номинаи адабиёти классикӣ узви ҳакамон буд. Мавсуф оид ба аҳамияти озмун изҳори назар кард.

‐Озмуни ҷумҳуриявии «Фурӯғи субҳи доноӣ китоб аст» аз бонуфузтарин озмунҳост, ки даври вилоятии он ҳамасола аз ҷониби Вазорати маориф ва илми Ҷумҳурии Тоҷикистон ва Мақомоти иҷроияи ҳокимияти давлатии вилояти Суғд дар сатҳи матлуб ба роҳ монда мешавад. Соли ҷорӣ низ масъулон ҷиҳати хубу хотирмон ташкил ва гузаронидани он шароит фароҳам оварданд. Озмун дар давоми панҷ рӯз сурат гирифт, ки ин фосила барои ҳарчӣ бештару хубтар санҷидани вазъи омодагии довталабон имкони хубе фароҳам овард. Синну соли иштирокдорон гуногун буд ва дар маҷмуъ аз 7 то 80‐сола дар озмун иштирок доштанд, ки ин далели муҳаббати беҳудуди мардуми тоҷик ба китобу китобхонист. Эҳсос мешуд, ки ҳар як довталаб сарфи назар аз синну сол ва касбу кор мехоҳад маҳорату истеъдод ва омодагии худро хубу хотирмон назди ҳакамон муаррифӣ кунад. Ба андешаи ман, сол ба сол сафи натанҳо хоҳишмандони озмун меафзояд, балки дар озмун нафарони воқеан арзанда бо омодагии хуб бештар иштирок карда истодаанд.

Мутрибахон Мавлонова аз иқдоми шоистае, ки дар амалӣ шудани ҳадафи озмун роҳандозӣ мешавад, бо хушнудӣ изҳор дошт, ки дар китобхонаҳои гӯшаву канори вилоят толорҳои махсус барои дӯстдорони каломи мавзун ва омодашавии довталабони озмун ташкил ёфт. Ҳамарӯза шоҳид мешавед, ки дар китобхонаи вилоятии ба номи Тошхоҷа Асирӣ, китобхонаҳои шаҳру ноҳияҳо ва муассисаҳои таълимии сатҳи мухталиф мардум ба мутолиаи китоб машғул ҳастанд. Иштироки сершумори довталабон дар зинаҳои аввалу дуюм низ шаҳодат бар онанд, ки воқеан сафи дӯстдорон ва хонандагони китобҳои бадеӣ сол ба сол зиёд шуда истодаанд.

‐Беҳтарин шакли мутолиаи асари бадеӣ бодиққат будан, дарк кардани мавзуъву мундариҷа, бахотиргирии нуктаҳои меҳварӣ ва ҷузъиёти муҳими асар аст. Мутаассифона, дар баробари дастовардҳои назаррас шоҳиди он гардидем, ки бархе иштирокдорон рӯихати зиёди асарҳоро пешниҳод мекунанд, вале зимни санҷиши дараҷаи азхудкунии онҳо маълум мешавад, ки асарро пурра мутолиа накардаанд ва ё муҳимтарин нукоти онро наметавонанд шарҳ диҳанд, – бо таассуф мегӯяд узви ҳакамон.

‐Яъне, дараҷаи мустаҳкамкунии асар қаноатбахш нест. Иштирокчии озмун бояд пеш аз ҳама барои бештар бахотиргириву бахотироварӣ мазмуни мухтасари асарро ба таври тезис дар дафтари махсус ёддошт намояд, дар бораи қаҳрамонони асар маълумоти мукаммал дошта бошад, лаҳзаҳои ҷолиби асарро муассир нақл карда тавонад. Ҷиҳати бештар дар хотир нақш бастани асари мутолиашуда таҳлилу баррасии он аз ҷониби хонанда ва роҳнамо муҳим аст. Дар сурати аз бобу фаслҳо фароҳам омадани асар аз ёди унвони онҳо ҳатмист.

Файзуллохон ОБИДОВ,

“Ҳақиқати Суғд”

ЗАҲМАТИ ШОИСТА БАҲРИ ТАНСИҲАТИИ МАРДУМ

Подробности статьи

Субҳи ин ҷо аҷаб пурасрору афсонавиву зебост. Сапедадамон, дар лаҳзаҳое, ки пардаи торикӣ оҳиста аз фазои ороми деҳа боло меравад, ҷойи онро ҳарири пармонанди сап‐сафед фаро мегирад. ‐Дуди маҳини оташдон ва печҳои бухории сокинони деҳа. Ва боғу майдони ҳавлиҳо, дарахтзорони анбӯҳи қади роҳҳо, болои талу теппаҳоро печонида гирифта, як манзараи наҷибу дилангезро ба вуҷуд меорад ва кас мехоҳад соатҳо ба ин лаҳзаҳо дида дӯзад. Сипас, бо равшан шудани рӯз ташвишу тараддуди мардум сар мешавад.‐Ҳама‐хурду бузурги сокини деҳа аз пайи кореанд, бор мекашонанд, ҷӯйбор тоза мекунанд, дарахтонро ба шакл медароранд, мева мечинанд ва аҷаб меҳнатианд…

Ана дар ҳамин мавзеи пурдолу дарахт ва сарсабзу хушобуҳаво ҷойгир шудааст муассисаи табобатии «Тибби Сино». Ҳини суханронӣ дар тантанаи таҷлили 30‐солагии Иҷлосияи тақдирсози ХVI Шӯрои Олии Ҷумҳурии Тоҷикистон Асосгузори сулҳу ваҳдати миллӣ‐Пешвои муаззами миллат, Президенти мамлакат муҳтарам Эмомалӣ Раҳмон иброз доштанд, ки солҳои аввали соҳибистиқлолӣ аз сабаби набудани бунгоҳҳои тиббӣ, таваллудхонаҳо дар деҳоти дурдаст ҳодисаҳои ба чандин километр роҳ бо азобу машаққат бурдани беморон, аксаран дар сари таваллуд фавтидани ҷавонзанон хеле бисёр буд, ки аз муаммоҳои ҳалталаби рӯз маҳсуб меёфт. Ва маҳз аз ҳамин боис ба соҳаи нигаҳдории тандурустии мамлакат бо эҳтимоми Пешвои миллат ҳанӯз аз рӯзҳои нахустини соҳибистиқлолӣ ҳамчун соҳаи афзалиятнок эътибор ҷиддӣ гардид.

Тайи солҳои охир бошад, бахусус ба истиқболи ҷашни сисолагии мустақилияти кишвар бо дастуру ҳидоятҳои Сарвари давлат бемуҳобот, дар ҳар як деҳа дармонгоҳ, бунгоҳи тиббӣ, таваллудхона ба истифода дода шуд, ки фаъолияташон ба ҳифзу нигаҳдории саломатии сокинон нигаронида шудааст. Ба ин, пеш аз ҳама роҳи васеъ кушодан ба фаъолияти созандагии соҳибкорон ва пешниҳод намудани имтиёзҳо ба онҳо ҳамаҷониба мусоидат кард. Соҳибкорон ба ин ғамхориҳои Пешвои миллат ҳамовозии ҳамаҷониба зоҳир намуданд. Маркази ташхисию табобатии «Тибби Сино» низ дар ҳамин радиф дар Ҷамоати деҳоти Унҷии ноҳияи Бобоҷон Fафуров бо иқдоми неки соҳибкори ватанӣ Нодирҷон Хоҷаев бунёд ёфт.

Он соли гузашта дар рӯзҳои таҷлили ҷашни 30‐солагии Истиқлолияти давлатии Тоҷикистон аз ҷониби Ҷаноби Олӣ, Президенти мамлакатамон муҳтарам Эмомалӣ Раҳмон мавриди баҳрабардорӣ дода шуд. Ин бинои хуштарҳу замонавӣ аз чаҳор ошёна ва таҳхона иборат буда, дар як вақт шаст нафар беморро бо табобат фаро мегирад. Ба ин муассиса бо ибтикори табиби шинохтаву соҳибтаҷриба Инъом Тоҷибоев духтурони ба касбашон фидоиву кордон, ки бо истеъдоди худ дар байни мардум соҳибобрӯ гаштаанд, ба фаъолият ҷалб шудаанд. Табибони асабшинос Илҳом Тоҷибоев, Мӯъминҷон Муллоҷонов, Амирҷон Ёқубов, ҷарроҳон Исмоил Маллахоҷаев, Фирдавс Вализода, Икром Мирҷалолов, дилшинос А. Маҷидов, осебшинос Диловар Сафаров, духтури бемориҳои гурда Абдусалом Умаров ва бемориҳои узвҳои дарунӣ А.Баротов аз ҷумлаи онҳоанд.

Дар ин дармонгоҳ табобат гирифтаму эҳсос намудам, ки ҳарчанд аз таъсиси ин муассисаи тиббӣ фурсати зиёде нагузашта бошад ҳам, тавассути тарзу усули замонавӣ ва хеле муфиди дармонбахшӣ аллакай байни сокинони вилоят соҳиби эътибору нуфузи баланд гардидааст ва аз тамоми шаҳру навоҳӣ, аз ҷумла Ашт, Исфара, Панҷакент, Мастчоҳ, Зафаробод, Ҷаббор Расулов ва ҳатто, деҳоти дурдасти вилоят ба ин даргоҳ сокинон барои шифоёбӣ меоянд. Собиқадори соҳаи маориф, муаллимаи мактаби рақами 27‐уми Ҷамоати деҳоти Унҷӣ Мушаррафахон Мансурова иброз дошт, дар ҳудуди Ҷамоат кушода шудани ин дармонгоҳ барои сокинони маҳаллаҳои гирду атроф хеле хуб ва боманфиат гашт. Аз дарди пойҳо ва гурда азият мекашид, ба назди духтур А.Умаров омаду табобат гирифт ва вазъи саломатиаш хеле хуб шуд.

Дар ҳақиқат истеъдоду қобилияти дармонбахшии табибони ин марказ шоистаи арҷгузорӣ аст,‐мегӯяд ин бону. Мӯъминҷон Муллоҷонов ба ҳайси пизишки асабшинос соли чаҳорум аст, ки фаъолият дорад. Вале услуби ба худ хоси дармонбахшии ин табиб, ки ба тарзи интенсивӣ ва маҷмӯӣ ба роҳ мемонад, инчунин беморони вазнини бистариро табобат карданаш боис шуд, ки имрӯз ихлосмандонаш аз тамоми гӯшаву канори вилоят ба ҷустуҷӯяш меоянд.

Баъди хатми Донишгоҳи давлатии тиббии Тоҷикистон ба номи Абӯалӣ ибни Сино нахуст дар Беморхонаи марказии ноҳиявии ноҳия ба номи Абдумаҷид Пӯлодов ба фаъолият шуруъ кард. Дар он ҷо аз табибон Исломхон Иброҳимов ва Фаррух Қодиров таҷрибаи кору сирру асрори касбии ин фардони шарифу дар пешаи хеш соҳибистеъдодро омӯхт.

– Аслан баробари ба мактаби олӣ дохил шудан кӯшиш намудам, донишҳои назариявии гирифтаамро бо амалия пайванд намоям,‐мегӯяд ӯ.‐Аз ин лиҳоз дар курсҳои минбаъда дар Беморхонаи ҷумҳуриявии Қарияи Боло ба фаъолият шуруъ кардам.

Ҳар рӯз пас аз машғулиятҳо дар донишгоҳ ба сӯи ин беморхона роҳ мегирифтам. Донишандӯзӣ дар донишгоҳи тиббӣ махсусиятҳои худро дорад. Машғулиятҳо доимо бо баҳсу мунозираҳо сурат мегиранд, чунонки ҳикмати халқ мегӯяд, ҳақиқат зодаи баҳс аст, ҳангоми сабақомӯзӣ ҳар як ашё, амал барои мо, табибони оянда номафҳум буд ва барои андӯхтану идроки он бо устодон соатҳо баҳсу талош менамудем. Устодони донишгоҳ Муҳаммад Гулов, М.Зарифов, Фирӯз Шукуров, А.Табаров ба донишҷӯён хеле сахтгир буданд ва дар як вақт баҳри мо имконият фароҳам меоварданд, ки донишҳои пухтаву комил гирем. Ин соатҳо, инчунин фаъолият дар беморхонаи ҷумҳуриявӣ ва бо амалиятабобати беморон машғул гаштан боис гашт, ки донишгоҳро бо кӯлбори кироӣ хатм намоем,‐гуфт табиб.

Ба ин суханаш далел дорад ӯ. Ҳангоми дар Беморхонаи марказии ноҳиявии ноҳияи Бобоҷон Fафуров фаъолият бурдан воқеае рух дод: Табобати ҷавонзани бистсолаи дар ҳолати вазнин қарордоштаро, ки табибон дардашро дармоннопазир шуморида, ба хонааш ҷавоб дода буданд, ба уҳда гирифт. Ба қавле, тамоми дониши андӯхтаашро дар майнааш гирдгардон намуд, то бевақтиву поси шаб дар шабакаҳои интернет дар ҷустуҷӯ шуд. Оқибат, як дармонеро пайдо намуд, ки ба он низ пурра эътимод надошт. Он дармон гидротак‐барои бемориҳои бистарие тавсия мешуд, ки ба захми бадан гирифтор шуда буданд. Аз он дармон истифода бурд. Тадриҷан як‐як он найчаҳоеро, ки баҳри нафасгирӣ, ба ҳам омадани ҷароҳатҳо ба тани бемор гузошта буданд, гирифт ва ҷавонзани чандин муддат дар ҳолати кома беҳушӣ қарордошта оҳиста ба худ омад. Кам‐кам ғизо тановул кард, сухан гуфт…

Имрӯз падари он ҷавонзан, ки аз Ҷамоати деҳоти Исфисор аст, аз табиб‐Мӯъминҷон сипосгузор аст, ки духтари яккаву ягонаашро аз нав ба ҳаёт баргардонид. Ҳамин бо донишҳои навтарин ва замонавӣ мусаллаҳ буданаш ва сари вақту ботадбирона ба кор бурданаш ба ин духтури ҷавон имкон дод, ки дар ин роҳ муваффақ гардад. Ҳамчун табиби маризиҳои асаб изҳор медорад, ки сокинон бештар бо нишонаҳои хасташавии асаб, остеохондрози мӯҳраҳо, фишори баланди хун, оқибатҳои вайроншавии гардиши хуни майнаи сар, бемории Паркинсон‐ларзиши узвҳо муроҷиат мекунанд ва аксари онҳо дар дармонгоҳи «Тибби Сино» шифои комили дарди худро меёбанд. Зеро ба ҷуз дониши пурраву пухтаи пизишкон боз дармонҳои физиотерапевтӣ, аз ҷумлаи маҳси дастӣ, сӯзандармонӣ, гиёҳдармонӣ, истифодаи парафин низ, ки аз ҷониби ҳамшираҳои тиб босифат гузаронида мешаванд, ба беҳтаршавии саломатии беморон мусоидат мекунад. Барои оромии асаб беҳтарин даво ин фикру андешаи нек, муҳити солим, ғизои солим ва оби тозаву пок аст,‐мегӯяд ӯ. Ва албатта, реҷаи таомхӯрӣ бояд ҳатман риоя гардад. Ҳам барои хурдон, ҳам баҳри калонсолон. Ҷоиз ба зикр аст, ки дар Марказ ҳамчунин гузаронидани ҷарроҳиҳои гуногун, ба роҳ монда шудааст ва бо эъҷози дастони духтурон ҳар рӯз ҷарроҳии санги талхадон ва дигар дардҳо ба роҳ монда мешавад.

‐Муассисон ва табибон ният доранд, минбаъд дар Марказ ҳамчунин табобати маризиҳои гӯшу гулӯ, чашм ва эндокринологиро низ ба роҳ монда, сатҳи хизматрасониро ба мардуми вилоят васеъ намоянд, ‐гуфт Мӯъминҷон Муллоҷонов.

Ҳангоми табобат гирифтан эҳсос намудам, ки аксари пизишкони ин Марказ мутахассисони ҷавонанд ва рисолати касбии хешро дар сатҳи зарурӣ баҷо оварда, шоистаи сипосгузории мизоҷон мегарданд. Барҳақ, чуноне Пешвои муаззами миллат таъкид менамоянд, ҷавонон насли ояндасози ин миллати куҳанбунёд ҳастанд. Ва доимо баҳри он ғамхорӣ менамоянд, ки ҷиҳати фаъолияти пурсамараи ҷавонон тамоми шароитҳо фароҳам карда шавад. Ва имрӯз табибони ҳозиқи ин муассисаи табобатӣ ҷавобан ба ин ғамхориҳо баҳри ҳифзи саломатии сокинон азму талош ва заҳмати шабонарӯзӣ доранд.

Рафоат МӮЪМИНОВА,

«Ҳақиқати Суғд»

Имрӯз маҷлиси Ҳукумати Ҷумҳурии Тоҷикистон баргузор шуд

Подробности статьи

29 ноябр таҳти раёсати Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси Ҳукумати мамлакат муҳтарам Эмомалӣ Раҳмон маҷлиси Ҳукумати Ҷумҳурии Тоҷикистон баргузор шуд.

Дар маҷлиси Ҳукумати мамлакат нахуст ҳисоботи муовини якуми Вазири саноат ва технологияҳои нави Ҷумҳурии Тоҷикистон оид ба ҷараёни иҷрои қарори Ҳукумати Ҷумҳурии Тоҷикистон «Дар бораи Барномаи рушди саноати сабук дар Ҷумҳурии Тоҷикистон барои давраи то соли 2022» шунида шуд. Таъкид гардид, ки барномаи мазкур дар доираи ҳадафи чоруми стратегӣ – саноатикунонии босуръати мамлакат амалӣ шуда, барои таъмини рушди иқтисодиёти мамлакат аз ҳисоби рушди саноати сабук муҳим мебошад.

ФАЪОЛИЯТИ КОРГОҲҲОИ ОРДБАРОРӢ – ЗАХИРА ВА ВОРИДОТИ ГАНДУМ

Подробности статьи

Амалигардонии ҳадафи стратегии саноатикунонии босуръати кишвар имкон медиҳад, ки рушди устувори соҳаи саноат ҳамчун тавлидкунандаи арзиши баланди иловашуда таъмин гардида, дар ин раванд даҳҳо ҳазор ҷойи нави корӣ ташкил карда шавад.

Эмомалӣ РАҲМОН

Саноатчиёни вилояти Суғд дар ҳамбастагӣ бо сохторҳои дахлдор ва мақомоти иҷроияи ҳокимияти давлатии шаҳру ноҳияҳо, давоми моҳҳои январ октябри соли 2022 баҳри расидан ба ҳадафи чоруми миллӣ саноатикунонии босуръати кишвар, барқарор кардани иқтидорҳои бозистода, роҳандозии истеҳсоли маҳсулоти нави рақобатноку воридотивазкунанда як силсила тадбирҳои судманд андешида, дар натиҷа 142 корхонаву коргоҳи нави саноатӣ бо 2743 ҷойи корӣ таъсис дода шуд. Корхонаҳо асосан дар соҳаҳои саноати сабук, кимиё, масолеҳи бинокорӣ, маъдан ва хўрокворӣ таъсис дода шуда, барои таъмини бозори дохилӣ бо маҳсулоти истеҳсоли ватанӣ ва воридотивазкунанда мусоидат намуданд.

Бино ба иттилои мудири шуъбаи саноат ва энергетикаи Мақомоти иҷроияи ҳокимияти давлатии вилояти Суғд Озифхон Шарифзода алҳол дар вилоят 789 корхонаи саноатӣ мавҷуд буда, баҳри таъминоти аҳолӣ бо маҳсулоти баландсифату рақобатпазир чораҳои зарурӣ андешида истодаанд. Дар натиҷаи тадбирҳои андешидашуда соли равон дар вилоят 231 намуди маҳсулоти саноатӣ истеҳсол гардидааст. Иттилоъ дода шуд, ки давоми моҳҳои январ октябри соли 2022 ҳаҷми истеҳсоли маҳсулоти саноатӣ ба маблағи 19,6 миллиард сомонӣ расонида шуд, ки нисбат ба ҳамин давраи соли 2021 бо нархҳои муқоисавӣ 3 миллиард сомонӣ зиёд аст.

Суръати рушди саноати вилоят бо назардошти индекси нархҳо бошад, ба 120 фоиз баробар гардид. Тадбирҳои андешидашуда имкон доданд, ки дар давоми даҳ моҳи соли 2022 саҳми вилояти Суғд дар ташаккулёбии ҳаҷми маҳсулоти саноати Ҷумҳурии Тоҷикистон ба 57,2 фоиз баробар гардад. Таъминоти аҳолии кишвар, алалхусус вилоят бо маҳсулоти саноатии гуногун ва дар ин замина таъсиси ҷойҳои нави корӣ имконият медиҳад, ки иқтисодиёти сокинон беҳ гардида, соҳаҳои мухталифи кишвар рушд ёбад. Имрӯзҳо дар коргоҳҳои саноатӣ маҳсулоти мухталиф истеҳсол мегарданд, ки барои зиндагии рӯзмарраи аҳолии кишвар зарур ва муҳим аст, аз ҷумла яке аз маҳсулоте, ки сокинон ба он бештар ниёз доранд ин гандум ва орд мебошад. Бинобар он таъсис ва фаъолияти хуби коргоҳҳои ордбарорӣ барои вилоят хеле муҳим аст.

‐Таъминот бо орд ва захираи кофии гандум имкон медиҳад, ки нархи он дар бозор ва нуқтаҳои фурӯш дастрасу арзон бошад. Алҳол дар қаламрави вилоят 18 корхонаи истеҳсоли орд фаъолият доранд, ки бештари он дар шаҳру навоҳии Бўстон, Гулистон, Бобоҷон Ғафуров, Ҷаббор Расулов, Спитамен фаъолият доранд. Аз ҷониби корхонаҳои ордбарории вилоят давоми даҳ моҳи соли равон 205,3 ҳазор тонна орд истеҳсол шудааст. Ба санаи якуми ноябри соли равон дар анбори корхонаҳои ордбарорӣ зиёда аз 7,5 ҳазор тонна орди тайёр мавҷуд буда, 26,2 ҳазор тонна гандум захира шудааст. Боиси таъкид аст, ки аз Ҷумҳурии Қазоқистон ба Ҷумҳурии Тоҷикистон барои пешниҳоди 300 ҳазор тонна гандум шартнома имзо шуда, бо роҳи оҳан тариқи вагонҳо воридот шуда истодааст. Дар маҷмуъ дар давоми даҳ моҳи соли равон 671,7 ҳазор тонна гандум ворид шудааст, ‐гуфт Озифхон Шарифзода.

Яке аз коргоҳи ордбарорие, ки фаъолияти назаррас дорад ҶДММ “Орди Фатир” аст. Бино ба маълумоти сармуҳосиби корхона Равшанҷон Мӯъминов 200 нафар бо ҷойи кории доимӣ ва маоши баланд таъмин буда, ба ҷуз орд боз истеҳсоли маҳсулоти макаронӣ, сабӯс ва гандуммайда ба роҳ монда шудааст.

‐Корхонаи ордбарории “Орди Фатир” ҳанӯз соли 2011 таъсис ёфта, истеҳсоли якчанд навъи орд, аз ҷумла навъи олӣ, якум, орди навъи махсус барои нуқтаҳои нонпазиро ба роҳ мондааст. Нархҳои орд низ аз рӯи навъҳо аз ҳамдигар фарқ мекунанд, масалан нархи орди навъи олӣ 285 сомонӣ (50 килограмм), навъи якум 275 сомонӣ (50 килограмм), навъи дуюм (45 килограмм) 235 сомонӣ мебошад. Орд дар халтаҳои ғунҷоишаш 5,10,25 ва 50 килограмма ҷой дода шудааст, ‐гуфт Равшанҷон Мӯъминов.

Ҳамчунин мавсуф қайд кард, ки алҳол дар коргоҳ 10 – 12 ҳазор тонна захираи орд ва 9 – 8 ҳазор тонна захираи гандум мавҷуд аст. Ба коргоҳ гандум аз Ҷумҳурии Қазоқистон ворид гардида, тариқи таҷҳизоту дастгоҳҳои махсуси замонавӣ коркард карда мешавад. Ҳамчунин таъкид гардид, ки корхона иқтидор ва имконият дорад содироти ордро низ ба роҳ монда, ба ин васила фаъолияти худро васеътар сохта, шумораи кормандонро зиёд намояд.

‐Нархи орд нисбат ба чанд моҳи охир арзон шудааст, зеро бинобар ба эътидол омадани қурби асъор гандум низ бо нархи арзон дастрас гардида истодааст. Ҳоло мо ба ҷуз нуқтаҳои фурӯш, мағоза ва бозорҳои вилоят тамоми минтақаҳои ҷумҳурӣ, аз ҷумла Вилояти Мухтори Кӯҳистони Бадахшонро низ бо орди баландсифат таъмин карда истодаем. Дар ҳолати аз тарафи мақомотҳои дахлдор дастрас ва иҷозат барои содироти ордро гирифтан, ният дорем содироти онро берун аз кишвар ба роҳ монем, зеро қувваи корӣ, иқтидор ва шароити истеҳсол ва коркарди гандуму ордро дорем, ‐гуфт номбурда.

Дар давоми даҳ моҳи соли равон ба ҷуз коргоҳи мазкур боз чанд коргоҳи ордбарорӣ, аз ҷумла ҶДММ “Аркаим”, ҶДММ “Хубҷамъ Инвест”, ҶДММ “Аҷр”, ҶДММ “Азимов А”, ҶДММ “Сомон кишоварз” ва ҶДММ “Ҳоҷӣ Юсуф” фаъолияти хуби корӣ доранд.

Ҷоиз ба қайд аст, ки бо дастури Раиси вилояти Суғд Раҷаббой Аҳмадзода ҳар рўзи шанбе дар шаҳрҳои саноатии вилоят ярмарка фурўши маҳсулоти кишоварзӣ ташкил шуда истодааст. Дар ярмарка сокинон имконият доранд ба ҷуз маҳсулоти кишоварзиву қаннодӣ маҳсулоти ордӣ ва ордро бо нархҳои нисбатан аз бозор арзон дастрас кунанд, ин амал низ харидоронро рӯҳбаланд сохта, барои корхонаҳои ордбарорӣ ва фурӯшандагон низ манфиатовар аст.

Шаҳбону ОЛИМОВА,

«Ҳақиқати Суғд»

КОРКАРДИ ХУЧ ЗИЁД МЕГАРДАД

Подробности статьи

Солҳои охир дар Ҷумҳурии Тоҷикистон барои омода намудани нӯшобаҳо аз ҳар намуди растанию гиёҳҳо истифода мебаранд, ки барои солимии ҷомеа ва тарзи ҳаёти солим мусоидат менамояд. Яке аз чунин растаниҳо, ки имрӯз хеле маъмул гардидаасту коркарди он рӯз аз рӯз вусъати тоза меёбад, ин растании хуч аст. Номи мардумии растании хуч садбарги худрўй буда, он аввалҳои баҳор асосан дар доманакӯҳҳо, ҷариҳо нашъунамо меёбад. Хуч дар табиат натанҳо дар намуди худрӯй бисёр дучор мешавад, балки онро мардуми мо дар боғот, замини наздиҳавлигии худ парварида афзун низ мекунанд. Зеро бо назардошти пурманфиат будани он барои зиёд намудани ин намуди растанӣ зарурият ба миён омад. Гулҳои хуч сода ва бахмалӣ буда, танаи ин растанӣ хордор аст, танҳо дар сесолагиаш ҳосил медиҳаду мавсими баҳор ва аввали тобистон гул мекунад. Меваҳои хуч шакли мудаввар дошта, шишамонанд ва нокшакл ва шаклаш суфта, рангашон сурхи баланд ва равшану ҷигарӣ доранду ҷило надоранд.

Бояд изҳор кард, ки чор ҳазор навъи хуч мавҷуд буда, он дар минтақаҳои иқлимаш мӯътадил ва субтропикии нимкураи шимолӣ, бештар аз баҳри Миёназамин то минтақаҳои Ҳимолой паҳн шудааст. Ҷоиз ба зикр аст, ки дар Тоҷикистон 18 намуди меваи хуч мавҷуд буда, дар қисмати дарахтзорон паҳну парешон, дар ҷангалзорҳои байни чормағззор ва байни дарахтони сафедору санҷид нашъунамо дорад.

Меваҳои он моҳҳои август ва сентябр пухта, барои чидан омода мегардад. Дар Тоҷикистон солҳои охир парвариши растании хуч ба роҳ монда шудааст. Он дар қади роҳҳо, гирду атрофи заминҳои корам шинонида мешавад. Бино ба гуфти сардори шуъбаи истеҳсолии Сарраёсати кишоварзии вилоят Абдуҳаким Қаландаров дар вилояти Суғд дар майдони 489 гектар растании хуч парвариш карда мешавад, дар шаҳру ноҳияҳои Ашт 711 гектар, Деваштич 13, Панҷакент 8 ва Ҷаббор Расулов 11 гектарро ташкил медиҳад.

Муовини сардори Раёсати кишоварзии ноҳияи Ашт Аҳлиддин Баҳриддинов изҳор намуд, ки ноҳияи Ашт имрӯз ҷои асосии парвариши ин намуди растанӣ буда, имсол дар майдони 711 гектар растании хуч кишт кардаанд. Соли 2022 дар масоҳати 120 гектар боғи нави хуч бунёд карда шуд. Аз соли 2017 то ин дам дар ҳамаи ҷамоатҳои ноҳия 1850 тонна хуч истеҳсол гардид. Бояд изҳор намуд, ки сол аз сол талабот ба ин намуди растанӣ хеле зиёд гардида, коркарди он дар баъзе минтақаҳо ба роҳ монда шудааст. Соли 2021 ҳосилнокӣ агар дар ноҳияи Ашт 6,7 сентнериро ташкил диҳад, имсол, яъне соли 2022‐юм 14,7 сентнериро ташкил намуд, ки он нисбат ба соли гузашта ду баробар зиёд аст. Чӣ хеле, ки Аҳлиддин Баҳриддинов изҳор намуд, асосан ниҳолакони хуч дар ҷамоатҳои деҳоти Ошоба, Меҳробод ва Понғоз зиёд буда, сол аз сол боғи нави хуч тамоили зиёдшавӣ дорад. Бояд изҳор намуд, ки имрӯз аҳли хоҷагии деҳқонии Хоҷа Карим дар гармхонаи худ қаламчаҳои хучро парвариш карда, тамоми ҷумҳуриро бо ин намуди растании ҳосилдеҳ таъмин месозад.

Дар ноҳия ҳамзамон барои бандубасти растании хуч ҶДММ “Аштфруд” машғул буда, онҳо ҳосили рӯёнидаи худро коркард менамоянд. Асосгузори сулҳу ваҳдати миллӣ ‐ Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки моҳи апрел ба ноҳияи Ашт сафари корӣ доштанд, зимни суханронӣ таъкид намуданд, ки Ашт иқлими гарму ба парвариши растании хуч мутобиқро дорост. Аз ин рӯ, бояд танҳо бо парвариши ин растании шифобахш маҳдуд нагардида, балки инчунин корхонаҳои нави саноатӣ бунёд карда, ба истеҳсоли нӯшобаю қиёми хуч машғул шаванд, ки он аз ҳар ҷиҳат манфиатовар аст. Сарвари давлат изҳор намуданд, ки хуч ҳамчун гиёҳи шифобахш дар байни мардум машҳур гардидааст.

Дар ҳақиқат хусусиятҳои шифобахшии растании хучро дар замонҳои қадим, дар асри IV то милод дар китоби “Таърихи тиб”‐и худ Теофраст қайд намудааст. Он аз насл ба насл, аз як китоб ба китоби дигар сарчашма гардида, то замони мо омада расидааст. Дар китоб роҳҳои истифодаи хуч, оид ба истифодаи хуч ба сифати хокаи дандоншӯӣ фикру андешаҳои ҷолиб баён гардидаанд. Изҳор кардааст, ки хуч дар мустаҳкам намудани милки дандон истифода мешуд. Дар мамлакати Россия меваҳои хучро барои пешгирии хунравии милки дандон ва табобати ҷароҳат истифода мебурданд. Дар асрҳои ХVI‐ХVII барои тайёр кардани меваи хуч ҳатто гурӯҳҳои махсус ташкил намуда, ба шаҳри Оренбург мефиристоданд.

Ҳангоми ҷанги байни туркҳо ва русҳо дар беморхонаи якуми ҳарбӣ дар шаҳри Маскав ба маҷрӯҳон ҷиҳати қувват бахшидани табобат “патокаи свороборини” медоданд. Ин анъанаро ба ёд оварда, солҳои Ҷанги Бузурги Ватанӣ бо истифода аз чойҳои меваи хуч ҷароҳати маҷрӯҳонро табобат мекарданд. Меваи хушки хуч ҳамчун меваи табобатӣ дар Самарқанду Бухоро ҳанӯз дар асри ХV маълуму машҳур буд. Он вақтҳо меваҳои хушки хуч хеле нархи баланд дошта, бо иҷозати махсус танҳо барои шахсони мӯътабар мешуду халос. Хусусияти шифобахши растании хучро ба инобат гирифта, солҳои охир натанҳо барои ба даст овардани ҳосили фаровони хуч, балки коркарди он кӯшиши зиёд ба харҷ медиҳанд.

Тоҷиддин Насриддинов, муовини директори Муассисаи давлатии хоҷагии ҷангали вилоят зимни сӯҳбат изҳор кард, ки дар ҳудуди хоҷагӣ фаъолияти сехи коркарди хуч ба роҳ монда шудааст, ки дар он нӯшоба ва ҳам мураббои ин растаниро омода месозанд. Соли равон 60 ҳазор шиша маҳсулот истеҳсол намуданд, ки аз ҷиҳати экологӣ тоза буда, барои саломатии мардум манфиатовар аст. Ба маҳсулоти омодакардаи мо талабот хеле зиёд аст. Аз ин рӯ, ният дорем, иқтидори коркардро васеъ ва соли оянда истеҳсоли нӯшобаҳои хучро зиёд намуда, натанҳо вилояти Суғд, балки сокинони ҷумҳуриро низ таъмин намоем ва ба хориҷи кишвар онро ирсол кунем. Муассисаи давлатии хоҷагии ҷангали вилояти Суғд низ дар ин самт корҳои зиёдеро ба сомон расонидааст. Онҳо ҳар сол ба таври плантатсия ва ё раддабандӣ дар кӯҳҳо хучро мекоранд. Соли 2022 дар бахшҳои шаҳриву ноҳиявии хоҷагии ҷангали вилоят дар маҷмуъ 100 тонна растании хуч рӯёниданд.

Онҳо майдони кишти хучро доранд ва пайваста дар куҷое, ки замини холиву ҳамвор аст, ба он ҷо онро кӯчат менамоянд. Айни ҳол дар 33 гектар қаламчаи хучро шинониданд. Дар Муассисаи хоҷагии ҷангали шаҳру навоҳии вилоят низ дар ин самт корҳои зиёд ба роҳ монда шуданд. Аз ҷумла, дар хоҷагии ҷангали ноҳияи Ашт дар майдони 15 гектар ин намуди растанӣ парвариш карда мешавад. Имрӯзҳо кишоварзон кӯшиш доранд, ки парвариши замини хучро зиёд намуда, барои коркарди ин маҳсулот дар ҳудуди вилоят чораҳои зарурӣ андешанд.

Тибқи маълумоте, ки аз сармутахассиси шуъбаи энергетика ва саноати Мақомоти иҷроияи ҳокимияти давлатии вилоят Муҳаммад Бахтиёрзода ба мо дастрас гардид, дар шаҳри Исфара низ се корхона ба истеҳсоли нӯшобаҳо машғул аст. Инҳо ҶДММ “Экофрут”, ҶДММ “Нурфут” ва ҶДММ “Чилфрукт” мебошанд. Рӯзҳои наздик як корхонаи коркард дар ноҳияи Деваштич ба фаъолият шурӯъ хоҳад кард.

Гулҷаҳон МАҲКАМОВА,

“Ҳақиқати Суғд”

ҲАҶМИ ИСТЕҲСОЛ - АРЗАНДА

Подробности статьи

Заркорони меҳнатқарини ноҳияи шуҳратманди Ашт низ санаи 21 – уми ноябри соли равон дурнамои ҷамъоварии истеҳсоли пахтаро ба иҷро расониданд. "Муждаи зафар"‐ро аз номи аҳли заҳмати ноҳия раиси ноҳия Шӯҳрат Муҳаммадзода ба Раиси вилояти Суғд Раҷаббой Аҳмадзода расонид.

Зимни суҳбат сардори Раёсати кишоварзии ноҳияи Ашт Бахтиёр Усмонов иброз дошт, ки имсол майдони кишти пунбадона дар ноҳия бештар гардида, аз 6200 гектари ба нақшагирифташуда ба 6323 гектар расид. Ҳамагон воқифанд, ки соҳаи мазкур соҳаи афзалиятноки кишоварзӣ маҳсуб ёфта, чанд соли охир дар ноҳия барои таъмини рушди устувори соҳа, зиёд гардидани ҳаҷми истеҳсоли пахта тамоми имконияту захираҳо равона шудаанд. Дар хоҷагиҳои кишоварзии ноҳия соли равон бо истифодаи тухмиҳои хушсифати серҳосили навъҳои “Флеш”, “Дӯстӣ”, “Мая” дар муҳлатҳои муқаррашуда гузаронида шуд.

Дар майдони пахтазори ноҳия новобаста аз номусоид омадани обу ҳаво, бинобар саривақт гузаронидани тадбирҳои агротехникии нигоҳубини пахтазор имконият фароҳам овард, ки соли равон низ дар хоҷагиҳои пахтакори ноҳия ҳосили фаровон ҷамъоварӣ карда шавад. Ба санаи ҳисоботӣ дар ноҳия ба миқдори зиёда аз 17 ҳазору 300 тонна ҳосили пахта ҷамъоварӣ ва ба корхонаҳои коркард супорида шудааст, ки баробари 100,1 фоизи дурнамои солона мебошад.

Ҳосилнокии миёнаи пахтазори ноҳия соли равон ба 27,4 сентнерӣ расонида шуд. Боиси қайд мебошад, ки дар давраи соҳибистиқлолии кишвар пахтакорони ноҳия ба чунин нишондиҳандаҳои баланди истеҳсолӣ бори аввал ноил гардиданд. Дар таъмини иҷрои дурнамои солонаи истеҳсоли пахтаи ноҳия ҳамаи ҳашт хоҷагиҳои пахтакории ҷамоатҳои деҳоти ноҳия саҳмгузорӣ намуданд. Нақшаи солона дар Ҷамоатҳои деҳоти Ашт 113,2 фоиз, Меҳробод – 111,1, Пунук ‐109,5, Ориён – 104,2, Ошоба – 107,6, Ифтихор ‐105,1 фоиз иҷро гардидааст.

‐Дар ҷамъоварии саривақтиву беталафи ҳосили дастранҷи марди деҳқон саҳми ҳашарчиён басо назаррас буда, дар мавсим ҳамарӯза аз 4 ҳазор то 7,5 ҳазор чинакчиён ба майдони пахта мебаромаданд,изҳор дошт Бахтиёр Усмонов. Пахтакорони ноҳия тасмим гирифтанд, ки бо истифода аз обу ҳавои мусоид ва имкониятҳои мавҷуда, ҳосили боқимондаи пахтаро то пағаи охирин ҷамъоварӣ намоянд ва боз 2 ҳазор тоннаи дигар дурри гаронбаҳо ба хирмани ноҳия зам намоянд.

Воқеан, давоми чанд соли охир дар соҳоти мухталифи ноҳия басо пешравиҳову дастовардҳои назаррас дида мешавад. Умедворем, ки роҳбарият ва масъулини сохтору мақомоти гуногун дар раванди ободкориву созандагиҳо баҳри рушду тараққиёти иқтисодиёти кишвар фаъолияти боз пурсамарро пеш хоҳанд гирифт.

Маъмурахон САМАДОВА,

“Ҳақиқати Суғд”

ОМОДАГӢ БА ЗИМИСТОНГУЗАРОНӢ ХУБ АСТ?!

Подробности статьи

Тибқи қарори раиси шаҳри Хуҷанд, ки аз санаи 4‐уми майи соли 2022, таҳти №187 ба тавсиб расидааст, корҳои омодагӣ ба мавсими тирамоҳу зимистон бо маром ҷараён дорад. Баҳри амалигардонии қарори мазкур дар КД «Истифодабарии манзил»‐и соҳили росту чапи шаҳри Хуҷанд якқатор корҳо ба сомон расонида шуданд.

Мутобиқ ба дастури раиси шаҳр идораву ташкилот ва корхонаҳои шаҳр муваззаф гардидаанд, ки дар заминаи нақша чорабиниҳои тасдиқгардида, корҳои ободониву созандагиро равнақ бахшанд.

Аз тарафи ҷомеаи меҳнатии Корхонаи давлатии «Истифодабарии манзил»‐и соҳили росту чапи шаҳр ба корҳои ободонию бунёдкорӣ, аз он ҷумла, таъмиру таҷдиди боми хонаҳои баландошёна, тозаву озода нигоҳ доштани кӯчаву маҳаллаҳо вусъати тоза бахшида шуд.

Алҳол дар 7 кумитаи маҳалла ва 5 қитъаи корхонаи давлатии «Истифодабарии манзил»‐и соҳили рости шаҳри Хуҷанд ҷиҳати ободу зебо намудани кӯча, бино ва рангубор намудани биноҳои баландошёна мутобиқ ба талаби замон анҷом ёфта, таъмири бомҳои хонаҳои истиқоматӣ тибқи нақша‐3 ҳазор метри квадратӣ, иҷрои он 3 ҳазору 97 метри квадратӣ, шиферпӯш кардани бомҳо 10 дона, иҷроиш 130 дона, таъмири даромадгоҳҳо 40 адад, иҷро 48 адад, тоза кардани таҳхонаҳои биноҳои баландошёнаи истиқоматӣ 120 адад, иҷроиш 120 адад, тоза кардани ҷӯйборҳо 1700 метр, иҷро 1870 метр, таъмири лифти одамкашон 4 адад, иҷро 6 адад, таъмири намои бино 5 адад, иҷро 9 адад, иваз кардани қубури оби ташноб 230 метр, иҷро 248 метр, оинабандии даромадгоҳҳо 120 метри квадратӣ, иҷроиш 120 метри квадратиро ташкил медиҳад. Аз иҷрои корҳои ба сомон расида, маълум мешавад, ки масъулини соҳа вазифаи бар дӯшашон гузошташударо сарбаландона иҷро карда истодаанд ва дар оянда корро боз ҷоннок хоҳанд кард.

Аз маълумоте, ки масъулини Корхонаи давлатии «Истифодабарии манзил»‐и соҳили чап пешниҳод кард, аён гардид, ки онҳо соли равон чунин корҳоро ба анҷом расонидаанд: таъмири бомҳои хонаҳои истиқоматии баландошёна бо толи эронӣ 2000 метри квадратӣ, иҷро 3192 метри квадратӣ, шиферпӯш кардани бомҳо 70 дона, иҷро 345 дона, таъмир ва иваз намудани қубурҳои обу ташноб 170 метр, иҷроиш 257 метр, таъмири даромадгоҳҳои биноҳои баландошёна тибқи нақша 30 адад, иҷро 47 адад, тоза кардани таҳхонаҳо 60 адад, иҷро 64 адад, тоза намудани ҷӯйбор 300 метр, иҷро 520 метр, оинабандии даромадгоҳҳо 60 метри квадратӣ, иҷро 68,8 метри квадратӣ мебошад.

‐Бояд гуфт, ки имрӯз аксари биноҳои истиқоматии баландошёна дар тавозуни корхонаи давлатии «Истифодабарии манзил»‐и соҳили рост ва чапи шаҳри Хуҷанд мавҷуд аст, ки нигоҳдошти зебои ин биноҳои шаҳр масъулияти дуҷонибаро талаб менамояд. Аз ин лиҳоз, бояд шаҳрвандон бо пардохти маблағи хизматрасонии техникӣ ва ё худ ба истилоҳ хонапулиҳо фаъол гардида, дар ободонии маҳалли зисти худ ва ё шаҳр ҳиссагузорӣ намоянд,‐мегўяд роҳбари корхонаи мазкур Шуҳрат Раҳимбоев.

Қайд кардан ба маврид аст, ки ин ҳама иқдомот дар заминаи татбиқи барномаҳои ободонию созандагӣ ва зебо гардонидани симои шаҳри бостонии Хуҷанд мегарданд. Меҳри Ватан дар қалби ҳар як шахси меҳанпараст бояд нақши абадӣ дошта бошад ва агар мо онро содиқона дӯст дорем, ҷиҳати ободонии он аҳлона заҳмат кашем ва барои пешрафташ хизмат кунем, маркази вилоятро боз ҳам обод ва барои мардум зиндагии шоистаро таъмин менамоем.

Нодир ТУРСУНЗОДА,

«Ҳақиқати Суғд»

ИҶЛОСИЯИ НУСРАТОВАР ВА ПАРЧАМИ МИЛЛӢ

Подробности статьи

Санаи 22 – юми ноябр дар толори Осорхонаи ҷумҳуриявии академик Бобоҷон Ғафуров конференсияи илмӣ амалии вилоятӣ таҳти унвони “Аз Анҷумани миллати хушиқбол то Парчами озодӣ ва истиқлол” бахшида ба 30 – солагии Иҷлосияи XVI Шӯрои Олӣ, Рӯзи Президенти Ҷумҳурии Тоҷикистон ва рӯзи Парчами миллӣ баргузор гардид.

Нахуст директори осорхона Муқаддама Ҳошимзода перомуни муҳимияти Иҷлосияи XVI Шӯрои Олии Ҷумҳурии Тоҷикистон сухан ронда, афзуд, ки баргузории иҷлосияи нусратовар барои бо ҳам омадани намояндагони халқ, интихоб шудани фарзанди фидоии миллат муҳтарам Эмомалӣ Раҳмон ба вазифаи Раиси Шӯрои Олии Ҷумҳурии Тоҷикистон, қабули қарору фармонҳо ва муқаддасоти миллӣ мусоидат кард.

Сипас, котиби илмии осорхона, номзади илмҳои таърих Шавкат Шарифов дар мавзӯи “Иҷлосияи XVI Шӯрои Олӣ – қутбнамои роҳи давлатдории демократӣ ва дунявӣ” маърӯза хонд. Аз ҷумла, қайд кард, ки зимни баргузории Иҷлосияи XVI Шӯрои Олии Ҷумҳурии Тоҷикистон 74 санади ҳуқуқӣ, 15 қонун, 52 қарор, 6 фармон ва 1 изҳорот қабул гардид, ки барои ба эътидол овардани вазъи сиёсиву иҷтимоии ҷомеа саҳми вижа гузошт. Бахусус, таърихи 19 – уми ноябри соли 1992 вакилони Шӯрои Олӣ ба вазифаи аввалиндараҷаи Шӯрои Олии Ҷумҳурии Тоҷикистон муҳтарам Эмомалӣ Раҳмонро интихоб карданд, ки барои ояндаи дурахшони миллат замина фароҳам омад.

Дар идомаи ҳамоиши илмӣ кормандони илмии Осорхона оид ба таърихи таъсис ва рушди институти идоракунии Президентӣ дар Тоҷикистон, таърихи Парчам ва парчамдории тоҷикон сухан гуфтанд.

Пас аз ҷамъбасти ҳамоиш дар гӯшаҳои ҷашнии Осорхона сайри таърихӣ гузаронида шуд.

Файзуллохон ОБИДОВ,

“Ҳақиқати Суғд”

Китобҳои нав

Подробности статьи

“КОЗУРПИСАР”

Муассисаи давлатии “Маркази илмии Камоли Хуҷандӣ” “Козурписар”‐и Фитрати Зардӯзии Самарқандиро тариқи нашриёти “Хуросон”‐и шаҳри Хуҷанд ба нашр расонид.

Козурписар”‐и Фитрати Зардӯзии Самарқандӣ бо таҳия ва тавзеҳи Исмоил Саидов омодаи чоп шуда, яке аз маснавиҳои машҳур ба шумор меравад. Ин маснавӣ то кунун бо ҳуруфи сирилик ба хонандаи тоҷик пешниҳод нагашта буд ва бо номи “Толиб ва Матлуб” ҳам шуҳрат дорад. Маснавии мазкур баробари мавзӯи ишқӣ доштан, масоили гуногуни ахлоқӣ ва ирфониро низ фаро гирифта, “Козуписар” ягона асари барҷомондаи Фитрати Зардӯзии Самарқандӣ мебошад. Достон дар ҳаҷми 986 байт суруда шудааст. Муҳаррирони китоб номзадҳои илмҳои филологӣ Шарифҷон Тоҷибоев ва Баҳром Раҳматов мебошанд. Дар оғози китоб сарсухани Баҳром Раҳматов “Баҳси мухтасар дар аҳвол ва осори Фитрати Зардӯзии Самарқандӣ” роҷеъ ба рӯзгору осори адиб маълумоти мушаххас медиҳад.

Бо хати сирилик дастраси хонандагон шудани достони “Козурписар” ҳадяи хубест барои хонандагони тоҷик, ки имкон медиҳад бо ин асари шоири маҳбуб аз наздик ошно шаванд.

“ТО ҲОЛ,  ТО ҲОЛО”

Таҳти ин унвон маҷмӯаи шеърҳои шоири тоҷик Баҳром Раҳматзод тавассути нашриёти “Ношир”‐и шаҳри Хуҷанд нашр шуд. Маҷмӯаи “То ҳол, то ҳоло” китоби чоруми шоир ва муҳаққиқ Баҳром Раҳматзод мебошад, ки аз ашъори нави ӯ иборат аст. Дар ин маҷмӯа баробари ашъори нави шоир, ки қисмати бештари китобро фаро мегирад, намунаҳо аз китоби пешини ӯ низ ворид шудаанд, то танаввӯи ашъор ва рангорангии тахайюли бадеӣ риоя гардад. Китоб ашъори озоди иҷтимоиву ишқӣ, ғазалҳо, рубоиву дубайтӣ, соқинома ва дигар анвои адабиро дар бар гирифтааст. Ашъори озоди маҷмӯа дар бахши “Ман омадам”, ғазалҳо дар бахши “Марзи ғазал”, модарномаҳои ғамгин дар бахши “Намози дард”, рубоиву дубайтӣ дар қисмати “Чорҷилди дил” пешниҳоди хонандагон гашта, дар бахши охири китоб тарҷумаҳои ашъори шоирони гуногун, ки шоир тарҷума кардааст, оварда шудааст. Муҳаррири маҷмӯа Шоири халқии Тоҷикистон Фарзона буда, бовар дорем, ки китоб дархури табъи алоқамандони шеъри ноби тоҷикӣ хоҳад буд.

“АХТАРИ АРМОН”

“Ахтари армон” китоби шоири ҷавон Меҳронаи Акрам аст, ки дар шумори силсилаи китобҳои нахустини адибони ҷавони кишвар таҳти унвони “Шукуфаҳои истиқлол”, ки бо дастгирии бевоситаи Раиси вилояти Суғд Раҷаббой Аҳмадзода нашр мешавад, интишор шудааст. Китоби мазкур бо тавсияи Машварати ҷумҳуриявии омӯзишии адибони ҷавон дар шаҳри Хуҷанд (20‐25 майи соли 2021) интишор шуда, маҷмӯаи нахустини шоираи ҷавону умедбахш Меҳронаи Акрам мебошад. Ба китоб Шоири халқии Тоҷикистон Аҳмадҷони Раҳматзод пешгуфтор навишта, шеърҳои шоири ҷавонро самимӣ ва умедворкунанда унвон кардааст.

Шеърҳои “Ахтари армон” фарогири ишқу зебоиву мубарроист ва хонандаро ба меҳанпарастиву ватандӯстӣ раҳнамоӣ мекунад.

Сурайё ҲАКИМОВА,

“Ҳақиқати Суғд”

ХИЁНАТКОРӢ БА ХОТИРИ САРВАТ!

Подробности статьи

Инак, барои халқи тоҷик аз баргузории Иҷлосияи тақдирсоз 30 сол ва ба даст овардани Истиқлоли давлатӣ 31 сол пур гардид. Тӯли ин солҳо барои пешрафту тараққиёт ва сулҳу ваҳдати кишвари тоҷикон гурӯҳҳои ифротгарою бадхоҳ, террористону нотавонбинон монеа эҷод мекарданд. Дар ин замина онҳо мекӯшиданд бо роҳи фиребу маблағҳои гӯшношунид ҷавононро ба гурӯҳҳои хурд ҷалб кунанд. Мутаассифона, бархе аз ҷавонон ба доми фиреби чунин ашхос даромада, ҳаёти худу оилаи худро барбод доданд. Худ қазоват кунед, оилае, ки дар он хоин ба воя мерасад, магар метавонад оилаи солим бошад? Чунин фарзандонро ҳатто падару модар аз оилаи худ меронанд. Тақдири минбаъдаи чунин гумроҳон танҳо канораҷӯиву ночориву нодорист!

Таҳлилҳо нишон медиҳанд, ки ба сафи ташкилотҳои ифротӣ ҷавононе пайравӣ мекунанд, ки натанҳо аз илму фарҳанги дунявӣ, балки бобати донишҳои аввалияи динӣ низ тасаввуроте надоранд. Аз нодониву камсаводии худ ба суханони нодурусти ифротгароён бовар карда, роҳи нодурусти зиндагиро интихоб мекунанд, ки охири он роҳ танҳо торикиву бадбахтист!

Вале ҳастанд ҷавононе, ки бо ақлу заковати қавии худ ба суханони ин гуна ашхос ҳатто аҳамияте намедиҳанду баръакс зери танқид гирифта, ба мақомотҳои дахлдор муроҷиат мекунанд.

Ҷоиз ба қайд аст, ки дар вазъияти гузаштаву имрӯза ҳоло ҳам ҳаммаслакони Муҳиддин Кабирӣ пинҳонкорона фаъолият доранду ҳатто аз хориҷи кишвар тариқи шабакаҳои интернетӣ мекӯшанд ҷавононро гумроҳ сохта, сафи худро зиёд кунанд.

Аз ин рӯ, набояд ҷавонон ба васвасаҳои чунин бадхоҳон дода шаванду сарзамини ободу оилаи солими худро вайрону нообод кунанд. Мақсади асосии чунин афрод ин пеш аз ҳама ноором кардани вазъи кунунии кишвар аст, зеро ин нотавонбинон сулҳу ваҳдат ва тинҷиву оромии кишвари тоҷиконро дида наметавонанд.

Таърих гувоҳ аст, ки тӯли солҳо нафарони Кабиримонанд авзои ҷомеаро ноором мекарданд ва ин боиси он гардид, ки ин афрод сарсону саргардон мисли гадо дар мамлакатҳои хориҷ умр ба сар мебаранд. Ҳатто, ҷангҳои иттилоотиро метавон кори дасти онҳо номид. Вале имрӯз мардум ба фиреби онҳо дода намешаванд, зеро симои ҳақиқии ин тоифаро шинохтаанд. Ин хоинони ватан ҳаргиз бла мақсадҳои нопоки худ нахоҳанд расид.

Пурмоҳи ОЛИМӢ,
сокини шаҳри Хуҷанд